၂ ကွဲးနီၣ်တၢ်
၃၁ ဖဲအဝဲသ့ၣ် မၤဘူၣ်ဝံၤအလီၢ်ခံ ပှၤအံၣ်စရ့လးဖိလၢ အလဲၤပာ်ဖှိၣ်ထီၣ်အသးတဖၣ်န့ၣ် လဲၤဝဲလၢ ယူဒၤအဝ့ၢ်တဖၣ် ဒီးအဝဲသ့ၣ် မၤကၢ်လီၤကွံာ် လၢၢ်ထူၣ်စီဆှံတဖၣ်,+ မၤလီၤကူၢ်ကွံာ်ဝဲ တၢ်စီဆှံအထူၣ်တဖၣ်*+ ဒီးမၤလီၤပှီၢ်ကွံာ်ဝဲ တၢ်လီၢ်ထီၣ်ထီတဖၣ်+ ဒီးတၢ်လုၢ်လီၢ်တဖၣ်လၢ+ ယူဒၤ ဒီးဘံၣ်ယၤမံၣ် အတၢ်လီၢ်ခဲလၢာ်လီၤ. ဒီးအဝဲသ့ၣ် မၤစ့ၢ်ကီးဝဲလၢ အ့ဖရဲၣ် ဒီးမနၤၡ့ၤ+ အတၢ်လီၢ် တုၤလၢ အဝဲသ့ၣ် မၤဟးဂီၤကွံာ်ဝဲ ဝံၤဝဲတစုလီၤ. ဝံၤဒီး ပှၤအံၣ်စရ့လးဖိခဲလၢာ် က့ၤကဒါက့ၤလၢ အတၢ်လီၢ် လၢအဝ့ၢ်ဒၣ်ဝဲလီၤ.
၂ ဝံၤဒီးစီၤဃံးစကံယၤ ရဲၣ်ကျဲၤဝဲ ပှၤလုၢ်တၢ်ဒိၣ်တဖၣ်+ ဒီးပှၤလ့ၤဝံဖိတဖၣ်လၢ အကရူၢ်တဖၣ်+ ဒ်သိးအဝဲသ့ၣ် ကမၤလၢပှဲၤအမူဒါအဂီၢ်လီၤ.+ အဝဲသ့ၣ်လုၢ်ထီၣ် တၢ်လုၢ်ဒွဲၣ်အူ ဒီးတၢ်လုၢ်အိၣ်ဃူအိၣ်ဖိးတဖၣ်, မၤယွၤအတၢ်မၤ ဒီးဟ့ၣ်တၢ်စံးထီၣ်ပတြၢၤ ဒီးတၢ်စံးဘျုးစံးဖှိၣ် ဖဲယဟိဝၤယွၤ အတၢ်လုၢ်ဟံၣ်လီၤ.+ ၃ စီၤပၤ ဟ့ၣ်လီၤ အတၢ်ဖိတၢ်လံၤတနီၤလၢ တၢ်လုၢ်ဒွဲၣ်အူတဖၣ်အဂီၢ်လီၤ.+ တၢ်လုၢ်ဒွဲၣ်အူတဖၣ်အံၤ ပၣ်ဃုာ်ဒီး ဂီၤခီဒီးဟါခီ တၢ်လုၢ်တဖၣ်+ ဒီးတၢ်လုၢ်ဒွဲၣ်အူတဖၣ်လၢ မုၢ်အိၣ်ဘှံးနံၤအဂီၢ်,+ လၢလါထီၣ်သီအဂီၢ်+ ဒီးလၢဘူၣ်တဖၣ်အဂီၢ်+ ဒ်တၢ်ကွဲးအသးလၢ ယဟိဝၤယွၤ အတၢ်သိၣ်တၢ်သီအပူၤ ပာ်ဖျါဝဲအသိးလီၤ.
၄ ဒီးဒ်သိး ပှၤလုၢ်တၢ်ဒိၣ်တဖၣ် ဒီးပှၤလ့ၤဝံဖိတဖၣ် မၤထွဲ ယဟိဝၤယွၤ အတၢ်သိၣ်တၢ်သီ လီၤတံၢ်လီၤဆဲး ကန့ၢ်အဂီၢ် စီၤပၤမၤလိာ် ပှၤဂီၢ်မုၢ်လၢ ဝ့ၢ်ယရူၤၡလ့ၣ်အပူၤလၢ အဝဲသ့ၣ် ကဘၣ်ဟ့ၣ်လီၤ ပှၤလုၢ်တၢ်ဒိၣ်တဖၣ် ဒီးပှၤလ့ၤဝံဖိတဖၣ် တၢ်လၢအဝဲသ့ၣ် ကြၢးဒိးန့ၢ်ဘၣ်ဝဲလီၤ.+ ၅ ဖဲစီၤပၤ မၤလိာ်ဝဲဒ်န့ၣ်အခါ ပှၤအံၣ်စရ့လးဖိ ဟ့ၣ်လီၤဝဲ တၢ်လၢအဂ့ၤကတၢၢ်တဖၣ်လၢ အဝဲသ့ၣ် အဘု, စပံးထံအသီ, သိ,+ ကနဲစီ ဒီးတၢ်လၢအမဲထီၣ်သၣ်ထီၣ်လၢ ပျီပူၤအကျါ အါအါဂီၢ်ဂီၢ်လီၤ.+ အဝဲသ့ၣ် ဟဲစိာ်ဝဲ တၢ်လၢအဒိးန့ၢ်ဝဲခဲလၢာ် ဆံဆဲၣ်ပူတပူလီၤ.+ ၆ မ့မ့ၢ် အံၣ်စရ့လး ဒီးယူဒၤ အပှၤဂီၢ်မုၢ်လၢ အအိၣ်လၢ ယူဒၤအဝ့ၢ်တဖၣ်န့ၣ် ဟဲမူၤစ့ၢ်ကီးဝဲ ကျီၢ် ဒီးသိ ဆံဆဲၣ်ပူတပူ ဒီးဟဲစိာ်ဝဲ တၢ်စီဆှံတဖၣ်လၢ+ အဘၣ်တၢ်ပာ်စီဆှံအီၤလၢ အဝဲသ့ၣ် အကစၢ် ယဟိဝၤယွၤအဂီၢ် ဆံဆဲၣ်ပူတပူလီၤ. ဒီးအဝဲသ့ၣ် ဟဲစိာ်ဝဲဒီး ပာ်လီၤဝဲ အါပူၣ်လီၤ. ၇ လၢသၢလါတလါန့ၣ်+ အဝဲသ့ၣ်စးထီၣ် ပာ်လီၤဝဲ တၢ်မၤဘူၣ်တဖၣ်အံၤ ဒီးလၢနွံလါတလါန့ၣ်+ အဝဲသ့ၣ် ပာ်လီၤဝဲ အါပူၣ်ဝံၤဝဲလီၤ. ၈ ဖဲစီၤဃံးစကံယၤ ဒီးပဒိၣ်ဖးဒိၣ်တဖၣ် ဟဲထံၣ်ဝဲ တၢ်မၤဘူၣ်အါပူၣ်အခါ အဝဲသ့ၣ် စံးထီၣ်ပတြၢၤ ယဟိဝၤယွၤ ဒီးဆိၣ်ဂ့ၤ အပှၤဂီၢ်မုၢ် အံၣ်စရ့လးလီၤ.
၉ လၢခံ စီၤဃံးစကံယၤ သံကွၢ်ဝဲ ပှၤလုၢ်တၢ်ဒိၣ်တဖၣ် ဒီးပှၤလ့ၤဝံဖိတဖၣ် ဘၣ်ဃးဒီး တၢ်မၤဘူၣ်အပူၣ်တဖၣ်လီၤ. ၁၀ ဒီးပှၤလုၢ်တၢ်ဒိၣ်အခိၣ် စီၤဧစၤရယၤ လၢအဟဲလီၤစၢၤလီၤသွဲၣ်လၢ စီၤစၤဒိးန့ၣ် တဲအီၤလၢ “စးထီၣ်ဖဲ ပှၤဂီၢ်မုၢ်ဟဲစိာ် တၢ်မၤဘူၣ်တဖၣ်လၢ ယဟိဝၤယွၤ အဟံၣ်ပူၤ+ သီသီတုၤခဲအံၤန့ၣ် ပှၤအီၣ်ဘၣ်တၢ်ဘျဲဘျဲ တကးဒံးဘၣ် တၢ်အီၣ်အဘျဲၣ် အိၣ်တ့ၢ်ဝဲအါမး. ဒီးယဟိဝၤယွၤ ဆိၣ်ဂ့ၤအပှၤဂီၢ်မုၢ်အဃိ တၢ်အီၣ်အိၣ်ဒံးဒီဒူၣ်လီၤ.”+
၁၁ အဃိ စီၤဃံးစကံယၤ မၢအဝဲသ့ၣ် ကတဲာ်ကတီၤထီၣ် တၢ်ပာ်ဖှိၣ်တၢ်အဒၢးတဖၣ်+ လၢယဟိဝၤယွၤ အဟံၣ်ပူၤလီၤ. ဒီးအဝဲသ့ၣ် ကတဲာ်ကတီၤထီၣ်ဝဲလီၤ. ၁၂ ဒီးလၢတၢ်သးတီအပူၤန့ၣ် အဝဲသ့ၣ် ဆဲးဟဲစိာ်ဒံးဝဲ တၢ်မၤဘူၣ်တဖၣ်, တၢ်ဆံဆဲၣ်ပူတဖၣ်+ ဒီးတၢ်စီဆှံတဖၣ်လီၤ. ဒီးစီၤကနၤနယၤ လၢအမ့ၢ် ပှၤလ့ၤဝံဖိန့ၣ် တီခိၣ်ရိၤမဲဝဲ ဘၣ်ဃးဒီး တၢ်မၤဘူၣ်တဖၣ်အံၤ ဒီးအဒီပုၢ်ဝဲၢ်ခွါ စီၤၡံမံၤ ကဲဝဲ ပှၤတီခိၣ်ရိၤမဲတၢ် ခံဂၤတဂၤလီၤ. ၁၃ ဒ်စီၤပၤဃံးစကံယၤ မၤလိာ်ဝဲအသိး စီၤယဃံအ့လး, စီၤဧၤစါစယၤ, စီၤနၤဃး, စီၤဧစၤအ့လး, စီၤယရံမိး, စီၤယိစဘး, စီၤအလံၤအ့လး, စီၤယံးစမၤကယၤ, စီၤမၤဃး ဒီးစီၤဘနါယၤန့ၣ် မ့ၢ်ပှၤမၤစၢၤတၢ်တဖၣ်လၢ အမၤစၢၤ စီၤကနၤနယၤ ဒီးအဒီပုၢ်ဝဲၢ်ခွါ စီၤၡံမံၤလီၤ. ဒီးပှၤအခိၣ်လၢ အကွၢ်ထွဲ ယွၤလၢအမ့ၢ်အတီတဂၤအဟံၣ်န့ၣ် မ့ၢ်ဝဲ စီၤဧစၤရယၤလီၤ. ၁၄ ပှၤလ့ၤဝံဖိ စီၤယံးမနၤ အဖိခွါ စီၤကိၤရ့ လၢအမ့ၢ် ပှၤခိးတြဲၤဖိ လၢမုၢ်ထီၣ်တခီန့ၣ်+ တီခိၣ်ရိၤမဲတၢ် ဘၣ်ဃးဒီး တၢ်ဟ့ၣ်လၢ ပှၤဟ့ၣ်လီၤ ကစၢ်ယွၤလၢ တၢ်သူၣ်အိၣ်သးအိၣ်အပူၤလီၤ.+ ဒီးတၢ်မၤဘူၣ်လၢ ယဟိဝၤယွၤအဂီၢ်+ ဒီးတၢ်လၢအစီဆှံနီၢ်ကီၢ်န့ၣ်+ စီၤကိၤရ့ နီၤလီၤဝဲလီၤ. ၁၅ ဒီးလၢ စီၤကိၤရ့ အတၢ်တီခိၣ်ရိၤမဲအဖီလာ်န့ၣ် ပၣ်ဃုာ်ဒီး စီၤဧ့ၤဒ့ၣ်, စီၤမံးနယၤမံၣ်, စီၤယ့ၤၡူ, စီၤၡမါယၤ, စီၤအမၤရယၤ ဒီးစီၤၡကါနယၤလီၤ. အဝဲသ့ၣ် အိၣ်ဝဲလၢ ပှၤလုၢ်တၢ်ဒိၣ်အဝ့ၢ်တဖၣ်အပူၤ+ ဒီးအဝဲသ့ၣ် မၤဝဲအမူဒါ ဒီးနီၤလီၤအဘူးအတံၢ်တဖၣ်လၢ အအိၣ်လၢ အကရူၢ်တဖၣ်န့ၣ်+ လၢတၢ်လၢ အဝဲသ့ၣ် ကြၢးဒိးန့ၢ်ဘၣ်ဝဲတဖၣ်လီၤ. ဒီးအဝဲသ့ၣ် နီၤလီၤဝဲ ပှၤလၢအဒိၣ်မ့ၢ်ဂ့ၤ အဆံးမ့ၢ်ဂ့ၤ ပှဲၤသိးသိးလီၤ. ၁၆ တကးဒံးဘၣ် အဝဲသ့ၣ်နီၤလီၤ တၢ်သ့ၣ်တဖၣ်န့ၣ်လၢ ပှၤလၢအမံၤဘၣ်တၢ်ကွဲးလီၤအီၤလၢ တၢ်ဟဲလီၤစၢၤလီၤသွဲၣ် အတၢ်ကွဲးနီၣ်ကွဲးဃါအပူၤလီၤ. ပှၤတဖၣ်န့ၣ် မ့ၢ်ဝဲ ပှၤပိာ်ခွါတဖၣ်လၢ အဟဲတနံၤဘၣ်တနံၤ ဒ်သိးကမၤတၢ်ဖဲ ယဟိဝၤယွၤအဟံၣ် ဒီးမၤလၢပှဲၤ အကရူၢ်အမူဒါတဖၣ်အဂီၢ် ဒီးအဝဲသ့ၣ် အဖိခွါတဖၣ်လၢ အသးနံၣ်အိၣ်ဝဲ သၢနံၣ် ဒီးဆူအဖီခိၣ်လီၤ.
၁၇ ပှၤလ့ၤဝံဖိတဖၣ်လၢ အသးနံၣ်အိၣ်အနံၣ် ၂၀ ဒီးဆူအဖီခိၣ်တဖၣ်+ ဒီးပှၤလုၢ်တၢ်ဒိၣ်တဖၣ်န့ၣ် ဘၣ်တၢ်ကွဲးလီၤအမံၤလၢ တၢ်ဟဲလီၤစၢၤလီၤသွဲၣ် အတၢ်ကွဲးနီၣ်ကွဲးဃါအပူၤ ဒ်အဝဲသ့ၣ် အဒူၣ်ဖိထၢဖိ အိၣ်ဝဲအသိး+ ဒီးဒ်အဝဲသ့ၣ် အကရူၢ်အမူဒါ အိၣ်ဝဲအသိးလီၤ.+ ၁၈ လၢပှၤလ့ၤဝံဖိတဖၣ် အတၢ်ဟဲလီၤစၢၤလီၤသွဲၣ် အတၢ်ကွဲးနီၣ်ကွဲးဃါအပူၤန့ၣ် ပၣ်ဃုာ်ဒီး အဝဲသ့ၣ် အဖိအမါ ဒီးအဝဲသ့ၣ် အဟံၣ်ဖိဃီဖိတဖၣ် မ့ၢ်လၢ ပှၤလ့ၤဝံဖိတဖၣ် ကဘၣ်အိၣ်စီဆှံ ဒီးမၤအတၢ်မၤစီဆှံလၢ တၢ်သးတီအပူၤ ထီဘိအဃိလီၤ. ၁၉ ဒီးတၢ်ဟဲလီၤစၢၤလီၤသွဲၣ် အတၢ်ကွဲးနီၣ်ကွဲးဃါတခါအံၤန့ၣ် ပၣ်ဃုာ်ဒီး စီၤအၤဟရိၣ် အစၢၤအသွဲၣ်တဖၣ် လၢအမ့ၢ် ပှၤလုၢ်တၢ်ဒိၣ်လၢ အအိၣ်လၢ ပျီတဖၣ်လၢ အအိၣ်ဝးတရံး အဝဲသ့ၣ် အဝ့ၢ်တဖၣ်လီၤ.+ လၢဝ့ၢ်တဖၣ်န့ၣ် အပူၤန့ၣ် ပှၤဃုထၢထီၣ် ပှၤပိာ်ခွါတနီၤ ဒီးပှၤဟ့ၣ်လီၤအဝဲသ့ၣ် မူဒါလၢ ကနီၤလီၤဝဲ တၢ်အီၣ်လၢ ပှၤလုၢ်တၢ်ဒိၣ်တဖၣ် ဒီးပှၤကိးဂၤဒဲးလၢ အမံၤဘၣ်တၢ်ကွဲးလီၤအီၤလၢ ပှၤလ့ၤဝံဖိတဖၣ် အတၢ်ဟဲလီၤစၢၤလီၤသွဲၣ် အတၢ်ကွဲးနီၣ်ကွဲးဃါ အပူၤလီၤ.
၂၀ စီၤဃံးစကံယၤ မၤဝဲဒ်န့ၣ် လၢယူဒၤဘီမုၢ် ဒီတဘ့ၣ်ညါအပူၤလီၤ. ဒီးအဝဲဆဲးမၤ တၢ်လၢအကစၢ် ယဟိဝၤယွၤ ထံၣ်ဝဲလၢအဂ့ၤ ဒီးလၢအဘၣ် ဒီးတီဒီးအီၤလီၤ. ၂၁ တၢ်လၢ စီၤဃံးစကံယၤ မၤဝဲဘၣ်ဃးဒီး တၢ်ဘူၣ်ထီၣ်ဘါထီၣ် ကစၢ်ယွၤ ကိးမံၤဒဲး ပၣ်ဃုာ်ဒီး တၢ်မၤလၢ အဘၣ်ထွဲဒီး ယွၤလၢအမ့ၢ်အတီတဂၤ အဟံၣ်မ့ၢ်ဂ့ၤ,+ စီၤမိၤၡ့ အတၢ်သိၣ်တၢ်သီ ဒီးတၢ်မၤလိာ်မ့ၢ်ဂ့ၤ အဝဲမၤဝဲလၢ အသးဒီဖျၢၣ်ညါလီၤ. ဒီးတၢ်လၢအမၤဝဲန့ၣ် ကဲထီၣ်လိၣ်ထီၣ်ဝဲလီၤ.