ယၡါယၤ
၁ ဖဲယူဒၤအစီၤပၤ+ လၢအမ့ၢ် စီၤဧူးစံယါ,+ စီၤယိၤသၣ်,+ စီၤအၤဃး+ ဒီးစီၤဃံးစကံယၤ+ ပၢတၢ်အစိၤန့ၣ် စီၤအၤမိးအဖိခွါ စီၤယၡါယၤ* အတၢ်ထံၣ်လၢညါခီ+ ဘၣ်ဃးဒီး ယူဒၤဘီမုၢ် ဒီးဝ့ၢ်ယရူၤၡလ့ၣ်အဂ့ၢ် အိၣ်ဝဲဒ် လၢလာ်အံၤအသိးလီၤ.
၂ ပှၤအိၣ်လၢ မူခိၣ်သ့ၣ်ဧၢ, ကနၣ်တက့ၢ်. ပှၤအိၣ်လၢ ဟီၣ်ခိၣ်သ့ၣ်ဧၢ,+ သးစၢၢ်ဆၢ တၢ်ကတိၤအံၤတက့ၢ်.
၃ ကျီၢ်ဖါန့ၣ် သ့ၣ်ညါ အကစၢ်ဂ့ၤဂ့ၤ
ဒီးကသ့ၣ်ယီၤန့ၣ် အအီၣ်ဆၣ်အကျိး လၢအကစၢ် ပာ်လီၤန့ၢ်အီၤန့ၣ် အသ့ၣ်ညါဝဲ ဂ့ၤဂ့ၤလီၤ.
မ့မ့ၢ် အံၣ်စရ့လးန့ၣ် တသ့ၣ်ညါ ယၤဘၣ်.*+
ယပှၤဂီၢ်မုၢ်မး တအိၣ်ဒီး တၢ်သ့ၣ်ညါနၢ်ပၢၢ်ဘၣ်.”
၄ သုဝဲလၢ အမ့ၢ်ပှၤတၢ်ဒဲးဘးဖိ တကလုာ်,
ပှၤလၢအပှဲၤဒီး တၢ်ကမၣ်ဖးဒိၣ်တဖၣ်
ဒီးဖိလၢ အဟးဂီၤ ဒီးအၢသီတဒူၣ်ဧၢ, သုကဘၣ်နးဘၣ်ဖှီၣ် သပှၢ်တၢၢ်လီၤ.+
သုပာ်တ့ၢ် ယဟိဝၤယွၤ,+
သုတပာ်ကဲ အံၣ်စရ့လး အကစၢ်ယွၤလၢ အစီဆှံတဂၤဘၣ်.
သုဃၣ်ဒူၣ်ချၢသုသးလၢ အအိၣ်လံ.
၅ ဘၣ်မနုၤအဃိ သုဆဲးထီဒါက့ၤတၢ်လဲၣ်. လၢသုမိၢ်ပှၢ်လိၤန့ၣ် တၢ်ကတီၢ်သုအဂီၢ် အလီၢ်မး တအိၣ်လၢၤဘၣ်.+
သုခိၣ်သၣ်ဃံ အိၣ်ထဲ တၢ်ပူၤလီၢ်လဲလဲ
ဒီးသုသးဒီတဖျၢၣ်န့ၣ် အိၣ်ထဲ တၢ်ဆူးတၢ်ဆါလီၤ.+
၆ စးထီၣ်လၢ သုခိၣ် တုၤလီၤလၢ သုခီၣ်န့ၣ် အိၣ်ထဲ တၢ်ဆူးတၢ်ဆါလီၤ.
လၢသုမိၢ်ပှၢ်လိၤန့ၣ် အိၣ်ဒီး တၢ်တီၢ်အလီၢ်တဖၣ်, တၢ်ထီၣ်လုးထီၣ်လါတဖၣ် ဒီးတၢ်ပူၤလီၢ်တဖၣ်လီၤ.
သုပူၤလီၢ်တဖၣ်အံၤ တၢ်တမၤကဆှဲကဆှီအီၤဘၣ်, တၢ်တဘိၣ်ထီၣ်အီၤဘၣ် ဒီးတၢ်တဖှူအီၤ လၢသိဘၣ်.+
၇ သုတၢ်လီၢ်တၢ်ကျဲန့ၣ် ကအိၣ်သယုၢ်ဝဲ,
သုဝ့ၢ်တဖၣ်န့ၣ် ကအူအီၣ်ကွံာ် လၢမ့ၣ်အူ,
ပှၤထံဂၤကီၢ်ဂၤဖိတဖၣ် ကအီၣ်ကွံာ် တၢ်လၢအမဲထီၣ်သၣ်ထီၣ် လၢသုပျီပူၤ+
ဒီးအကလီၤဂာ်ဒ်သိးဒီး ဒုၣ်ဒါတဖၣ် ဟဲနုာ်လီၤန့ၢ်ဆူၣ်လၢ သုတၢ်လီၢ်တၢ်ကျဲ ဒီးမၤဟးဂီၤတၢ်ခဲလၢာ်လီၤ.+
၈ ဝ့ၢ်စံယိၣ်န့ၣ် ကဘၣ်တၢ်ပာ်တ့ၢ်အီၤ ဒ်သိးဒီး ဒဲလၢအအိၣ်လၢ စပံးကျီး,
ဒဲလၢအအိၣ်လၢ ဒံသၣ်ကျီး
ဒီးဒ်သိးဒီး ဝ့ၢ်လၢ အဘၣ်တၢ်ကဝီၤဃာ်အီၤလီၤ.+
၉ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ မ့ၢ်တဒုးပူၤဖျဲး ပှၤစှၤကိာ်ဂၤဘၣ်န့ၣ်
ပကကဲထီၣ်ဒ် ဝ့ၢ်စဒိၣ်ဒီး
ဂမိရၤအသိးလီၤ.+
၁၀ ဝ့ၢ်စဒိၣ် အပှၤပၢတၢ်သ့ၣ်ဧၢ, ကနၣ် ယဟိဝၤယွၤ အတၢ်ကတိၤတက့ၢ်.+
ဝ့ၢ်ဂမိရၤ အပှၤဂီၢ်မုၢ်သ့ၣ်ဧၢ, သးစၢၢ်ဆၢ ပကစၢ်ယွၤ အတၢ်သိၣ်တၢ်သီတက့ၢ်.*+
၁၁ ယဟိဝၤယွၤ တဲဝဲလၢ “သုလုၢ်ထီၣ်တၢ် ဒီဒူၣ်န့ၣ် မ့ၢ်အကဲဘျုးလၢ ယဂီၢ်ဒ်လဲၣ်.+
သိဖါတဖၣ်လၢ သုလုၢ်ထီၣ်ဒ် တၢ်လုၢ်ဒွဲၣ်အူအသိး+ ဒီးသုဆၣ်ဖိကီၢ်ဖိ အဂ့ၤကတၢၢ်တဖၣ် အသိန့ၣ် ဘျဲဘၣ်ယၤလံ.+
ယတဘၣ်သူၣ်ဘၣ်သး ကျီၢ်ဖါဖိတဖၣ်,+ သိဖိတဖၣ် ဒီးမဲာ်တဲးလဲးဖိတဖၣ်+ အသွံၣ်ဘၣ်.+
၁၃ တၢ်လုၢ်ဘုတဖၣ်လၢ အဘျုးတအိၣ်ဘၣ်န့ၣ် ဟဲစိာ်လၢၤတဂ့ၤ.
ယသးဘၣ်အၢ သုတၢ်နၢမူလံ.+
သုမၤလါထီၣ်သီအမူး+ ဒီးမုၢ်အိၣ်ဘှံးနံၤ+ ဒီးသုကိးတၢ်အိၣ်ဖှိၣ်တဖၣ်+
ဘၣ်ဆၣ် ဖဲသုမၤတၢ်အိၣ်ဖှိၣ်လီၤဆီအခါ သုသူတၢ်ဝံတၢ်နါ အတၢ်ဖံးတၢ်မၤန့ၣ်+ ယဝံသးစူၤ တကဲလၢၤဘၣ်.
၁၄ ယသးဟ့ သုလါထီၣ်သီအမူး ဒီးသုဘူၣ်ဧိၤပွဲဧိၤအဂၤတဖၣ်လံ.
တၢ်သ့ၣ်တဖၣ်န့ၣ် ကဲထီၣ် တၢ်ဝံဃၢလၢ ယဂီၢ်
ဒီးယတူၢ်တကဲလၢၤဘၣ်.
၁၅ ဖဲသုယူာ်ထီၣ်သုစုလၢ တၢ်ထုကဖၣ်အပူၤအခါ
ယတကွၢ်သုဘၣ်.+
၁၆ သ့စီကွံာ်သုသး ဒီးမၤကဆှီထီၣ် သုသးတက့ၢ်.+
သုတၢ်မၤအအၢအသီန့ၣ် ယတအဲၣ်ဒိးထံၣ်လၢၤဘၣ်.
မၤတၢ်အၢလၢၤတဂ့ၤ.+
၁၇ မၤလိထီၣ်သုသးလၢ သုကမၤ တၢ်ဂ့ၤ, မၤတၢ်တီတီလိၤလိၤ,+
ဘှီဘၣ်က့ၤ ပှၤလၢ အဆီၣ်တံၢ် မၤနၢၤတၢ်,
ဒီသဒၢန့ၢ် ပှၤဖိၣ်ဃဲဖိ အတၢ်ခွဲးတၢ်ယာ်
ဒီးစံၣ်ညီၣ်န့ၢ်တၢ်လၢ ပှၤမုၣ်ကမဲ အဂီၢ်တက့ၢ်.”+
၁၈ ယဟိဝၤယွၤ တဲဝဲလၢ “ဟဲ ပှၤဂီၢ်မုၢ်သ့ၣ်ဧၢ, ပကတဲသကိးတၢ် ဒီးယကမၤစၢၤသု ဒ်သိးသုကမၤ ဘၣ်ဂီၢ်က့ၤ သုတၢ်ရ့လိာ်သးဒီးယၤ အဂီၢ်လီၤ.+
သုတၢ်ဒဲးဘးတဖၣ် မ့ၢ်ဂီၤဆှုၣ်ကလာ် ဘၣ်ဆၣ်
အကဝါထီၣ်က့ၤဒ် မူခိၣ်ဖီအသိး+
ဒီးသုတၢ်ဒဲးဘး မ့ၢ်ဂီၤဒ် တၢ်သွံၣ် အသိး ဘၣ်ဆၣ်
အကဝါထီၣ်က့ၤဒ် သိဆူၣ်အသိးလီၤ.
၁၉ သုမ့ၢ်သးအိၣ် ဒိကနၣ်တၢ်န့ၣ်
သုကအီၣ်ဘၣ် တၢ်လၢအဂ့ၤလၢ အမဲထီၣ်လၢ ကီၢ်ပူၤလီၤ.+
၂၀ ဘၣ်ဆၣ် သုမ့ၢ်တဒိကနၣ်တၢ်ဘၣ် ဒီးထီဒါတၢ်န့ၣ်
သုကသံလၢ နးလီၤ.+
ယၤ, ယဟိဝၤယွၤ တဲဝဲဒ်န့ၣ်လီၤ.”
၂၁ ဝ့ၢ်တဖျၢၣ်လၢ အတီဒီးကစၢ်ယွၤန့ၣ်+ ခဲအံၤ အကဲထီၣ်က့ၤဒ် ပိာ်မုၣ်ဆါလီၤအီၣ်သးလံ.*+
ဘၣ်ဆၣ် ခဲအံၤ အိၣ်တ့ၢ်က့ၤထဲ ပှၤလၢအမၤသံတၢ်တဖၣ်လီၤ.+
၂၂ ဝ့ၢ်ဧၢ, နစ့ညၣ် ဘၣ်အၢဘၣ်သီလံ+
ဒီးနဘံၤယၤ ဃါဃုာ်အသးဒီး ထံလံ.
၂၃ နပဒိၣ်ဖးဒိၣ်တဖၣ်န့ၣ် အခိၣ်ကိၤ ဒီးမၤသကိးတၢ်ဒီး တၢ်ဘျၣ်တဖၣ်လီၤ.+
အဝဲသ့ၣ် ကိးဂၤဒဲးန့ၣ် အဲၣ်တၢ်ထီးကျိၣ်ထီးစ့ ဒီးလီကီတၢ်ဟ့ၣ် တဖၣ်လီၤ.+
အဝဲသ့ၣ် တစံၣ်ညီၣ်န့ၢ်တၢ်လၢ ပှၤဖိၣ်ဃဲဖိတဖၣ်အဂီၢ် တီတီလိၤလိၤဘၣ်.
ဒီးအဝဲသ့ၣ် တကနၣ်န့ၢ်ဝဲ ပှၤမုၣ်ကမဲ အတၢ်ဂ့ၢ်လိာ်ဘှီလိာ် နီတဘျီဘၣ်.+
၂၄ အဃိ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် ကစၢ်လၢအမ့ၢ်အတီတဂၤ
ဒီးမ့ၢ်စ့ၢ်ကီး အံၣ်စရ့လး အကစၢ်ယွၤလၢ အဂံၢ်ဆူၣ်ဘါဆူၣ်တဂၤ တဲဝဲလၢ
“ဘၣ်လံ, ယကမၤလီၤမၢ်ကွံာ် ပှၤလၢအထီဒါယၤတဖၣ်
ဒီးယကဟ့ၣ်ကၣ် ယဒုၣ်ယဒါ တဖၣ်လီၤ.+
၂၅ ယကသိၣ်ဃီၣ်နၤလီၤ.
ယကမၤပှံၢ်လီၤ နတၢ်ဘၣ်အၢ ခဲလၢာ်ခဲဆ့
ဒီးယကထုးထီၣ်ကွံာ် နတၢ်တကဆှီဘၣ် ခဲလၢာ်လီၤ.+
၂၆ ယကဟ့ၣ်ကဒီးနၤ စံၣ်ညီၣ်ကွီၢ်
ဒီးပှၤဟ့ၣ်ကူၣ်တၢ်တဖၣ် ဒ်လၢညါအသိးလီၤ.+
ဝံၤအလီၢ်ခံ နကဘၣ်တၢ်ကိးကဒီးနၤလၢ တၢ်တီတၢ်လိၤအဝ့ၢ် ဒီးဝ့ၢ်လၢအသးတီဒီး ကစၢ်ယွၤလီၤ.+
၂၇ ဝ့ၢ်စံယိၣ်န့ၣ် ကဘၣ်တၢ်ပှ့ၤက့ၤအီၤလၢ တၢ်စံၣ်ညီၣ်တီ+
ဒီးအပှၤဝ့ၢ်ဖိလၢ အဟဲက့ၤတဖၣ်န့ၣ် ကဘၣ်တၢ်ပှ့ၤက့ၤအီၤလၢ တၢ်တီတၢ်လိၤလီၤ.
၂၈ ပှၤလၢအထီဒါတၢ် ဒီးပှၤလၢအမၤ တၢ်ဒဲးဘးတဖၣ်န့ၣ် ကဘၣ်တၢ်မၤဟးဂီၤကွံာ်အီၤ တပူၤဃီလီၤ.+
ဒီးပှၤလၢ အပာ်တ့ၢ်ကွံာ် ယဟိဝၤယွၤန့ၣ် အကျဲကကတၢၢ်လီၤ.+
၂၉ အဝဲသ့ၣ်ကဒိးန့ၢ်ဘၣ် တၢ်မဲာ်ဆှး ခီဖျိလၢ သ့ၣ်ထူၣ်ဖးဒိၣ်လၢ အဝဲသ့ၣ်သူၣ်လီသးကွံဝဲတဖၣ် အဃိ+
၃၀ အဝဲသ့ၣ် ကကဲထီၣ်ဒ်သိးဒီး သ့ၣ်ထူၣ်ဖးဒိၣ်လၢ အလၣ်လီၤညွံးလီၤဘဲ+
ဒီးဒ်သိးဒီး ကရၢၢ်လၢ အတဒိးန့ၢ်ဘၣ် ထံဘၣ်လီၤ.
၃၁ ပှၤလၢအဂံၢ်ဆူၣ်န့ၣ် ကလီၤဂာ် ဒ်သိးဒီး နီၣ်လၢအဃ့
ဒီးတၢ်လၢအမၤဝဲတဖၣ်န့ၣ် ကလီၤဂာ်ဒ်သိးဒီး မ့ၣ်အူဖီလီၤ.
ဒီးမ့ၣ်အူကအီၣ်ကွံာ်အီၤ ခံခါလၢာ်
ဒီးပှၤမၤလီၤပံာ်အီၤ တန့ၢ် နီတဂၤဘၣ်.”