ယၡါယၤ

၁၈ တၢ်လီၢ်လၢ တၢ်ဖိဃၢ်အဒံး သီၣ် ဧူၢ်ဧူၢ်လၢ

ကီၢ်အဲၤသံအီးပး အထံကျိတဖၣ် အဟီၣ်ကဝီၤန့ၣ် ကဘၣ်ကီဘၣ်ခဲ သပှၢ်တၢၢ်လီၤ.+

 ၂ ပှၤလၢအအိၣ်လၢ တၢ်လီၢ်အဝဲန့ၣ်န့ၣ် ဆှၢလီၤ ပှၤစိာ်တၢ်ကစီၣ်ဖိတဖၣ် လၢပီၣ်လဲၣ်တခီ,

ဒ်သိးကလဲၤခီဂာ်ဝဲ ထံတဖၣ်လၢ ချံလၢပှၤတ့အီၤလၢ တပိၢ်ဆှဲတဖၣ်လီၤ. ဒီးပှၤလၢအအိၣ်လၢ တၢ်လီၢ်အဝဲန့ၣ် တဲပာ်စၢၤ ပှၤစိာ်တၢ်ကစီၣ်ဖိတဖၣ်အံၤလၢ

“ပှၤစိာ်တၢ်ကစီၣ်ဖိလၢ အလဲၤတၢ်ချ့ချ့တဖၣ်ဧၢ, လဲၤလၢ

ပှၤကလုာ်လၢ အနီၢ်ထီ ဒီးအဘ့ၣ်ဘျ့,

ပှၤတဒူၣ်လၢ ပှၤလၢတၢ်လီၢ် ကိးတီၤဒဲး ပျံၤအီၤ,+

ပှၤကလုာ်လၢ အဂံၢ်ဆူၣ် ဒီးမၤနၢၤတၢ်

လၢအအိၣ်လၢ ကီၢ်တဘ့ၣ်လၢ ထံကျိတဖၣ် ယွၤဝဲလၢအပူၤ အအိၣ်န့ၣ်တက့ၢ်.”

 ၃ ပှၤခဲလၢာ်လၢ အအိၣ်လၢကီၢ်ပူၤ ဒီးအအိၣ်လၢ ဟီၣ်ခိၣ်ချၢသ့ၣ်ဧၢ,

တၢ်လၢသုကထံၣ်ဘၣ်န့ၣ် ကလီၤဂာ်ဒ်သိးဒီး တၢ်ပနီၣ်တခါလၢ ဘၣ်တၢ်ဆီလီၤအီၤလၢ ကစၢၢ်ခိၣ်လီၤ.

 ၄ ယဟိဝၤယွၤ တဲယၤလၢ

“ယကအိၣ်ကစုဒု ဒီးယကကွၢ်လီၤ ယတၢ်အိၣ်တၢ်ဆိးအလီၢ်

ဒီးယမၤဒ်အံၤအဃိ ကလီၤဂာ်ဒ် မုၢ်အတၢ်ကပီၤ ဖဲတၢ်ကိၢ်ခါအသိး

ဒီးဒ်ပစီၤထံလၢ အလီၤလၢ တၢ်ကိၢ်ကျါ ဖဲကူးတၢ် အဆၢကတီၢ်လီၤ.

 ၅ စပံးအဖီ ကဘိၣ်ထီၣ် ဒီးစပံးသၣ်တဖၣ် ဘူးကမံထီၣ်ဝဲ

ဘၣ်ဆၣ် တချုးလၢ ပှၤဒဲးအီၤ ဒံးဘၣ်န့ၣ်

အဒိးဘီၣ်တဖၣ် ကဘၣ် တၢ်ကူးတဲာ်ကွံာ်အီၤ လၢထါဂဲာ်

ဒီးအမုၢ်တဖၣ် ကဘၣ်တၢ် ကျီကွံာ်အီၤလီၤ.

 ၆ အဝဲသ့ၣ် ကဘၣ်တၢ်ပာ်တ့ၢ်ကွံာ်အီၤလၢ ထိၣ်လၢကစၢၢ်ခိၣ်တဖၣ် ကအီၣ်ဝဲအဂီၢ်

ဒီးဆၣ်ဖိကီၢ်ဖိအမံၤ လၢဟီၣ်ခိၣ်ချၢ ကအီၣ်ဝဲအဂီၢ်လီၤ.

လၢတၢ်ကိၢ်ခါ ဒီတကတီၢ်န့ၣ် ထိၣ်တဖၣ် ကအီၣ်အဝဲသ့ၣ်

ဒီးလၢကူးတၢ် အဆၢကတီၢ် ဒီတကတီၢ်န့ၣ် ဆၣ်ဖိကီၢ်ဖိအမံၤ လၢဟီၣ်ခိၣ်ချၢ ကအီၣ်အဝဲသ့ၣ်လီၤ.

 ၇ ဖဲန့ၣ်အဆၢကတီၢ် ပှၤကလုာ်လၢ အနီၢ်ထီ ဒီးအဘ့ၣ်ဘျ့,

ပှၤတဒူၣ်လၢ ပှၤလၢတၢ်လီၢ် ကိးတီၤဒဲးပျံၤအီၤ,

ပှၤကလုာ်လၢ အဂံၢ်ဆူၣ်ဒီး မၤနၢၤတၢ်

လၢအအိၣ်လၢ ကီၢ်တဘ့ၣ်လၢ ထံကျိတဖၣ် ယွၤဝဲလၢအပူၤန့ၣ်

ကဟဲစိာ်တၢ်ဟ့ၣ်လၢ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ အအိၣ်လီၤ.