ယၡါယၤ
၆၄ လၢညါ နမ့ၢ်ဟဲလီၤန့ၣ် နကဖှီညာ်မူခိၣ်တဖၣ်
ဒီးဖဲန့ၣ် ကစၢၢ်တဖၣ် ကဟူးဝးဝဲ လၢနဃိလီၤ.
၂ ဒီးအကလီၤဂာ်ဒ် မ့ၣ်အူလၢ အအီၣ်ကွံာ် သ့ၣ်မုၣ်ဒ့တဖၣ်
ဒီးမ့ၣ်အူလၢ အမၤကလာ်ထီၣ်ထံအသိးလီၤ.
အန့ၣ်မး ပှၤလၢ အထီဒါနၤတဖၣ် ကသ့ၣ်ညါနမံၤ
ဒီးပှၤကလုာ်တဖၣ် ကကနိးလၢ နမဲာ်ညါလီၤ.
၃ လၢပျၢၤန့ၣ် နမၤတၢ်လၢ အလီၤကမၢကမၣ်တဖၣ် လၢပမုၢ်လၢ်အီၤမး တကြၢးဘၣ်+
ဒီးဖဲန့ၣ်အခါ နဟဲလီၤ ဒီးကစၢၢ်တဖၣ် ဟူးလၢနမဲာ်ညါလီၤ.+
၄ စးထီၣ်လၢပျၢၤလံၤလံၤန့ၣ် ယွၤအဂၤလၢ အမၤစၢၤ ပှၤလၢအအိၣ်ခိးကွၢ်လၢ်အီၤ*
ဒ်နမၤအသိးန့ၣ် ပှၤတနၢ်ဟူ, တဒိကနၣ် ဒီးတထံၣ်ဘၣ်ဝဲ နီတဂၤဘၣ်,
အိၣ်ဒၣ်ထဲနၤတဂၤလီၤ.+
၅ ပှၤလၢ အမၤတၢ်လၢအဘၣ် လၢတၢ်သးခုအပူၤ+
ဒီးပှၤလၢ အနီၣ်ဘၣ်နၤ ဒီးအိၣ်မူဒ် နတၢ်ဘၣ်သးအသိးန့ၣ် နဟဲမၤစၢၤအဝဲသ့ၣ်လီၤ.
ပဆဲးမၤတၢ်ဒဲးဘး+
ဒီးပမၤအီၤဖးယံာ်အဃိ နသးဒိၣ်ထီၣ်ပှၤလီၤ.
အဃိ ပကပူၤဖျဲးအဂီၢ် တၢ်မုၢ်လၢ် အိၣ်ဒံးဧါ.
၆ ပဝဲခဲလၢာ် ပကဲထီၣ်ဒ်သိးဒီး ပှၤလၢ အတကဆှီဘၣ်
ဒီးပတၢ်မၤလၢ အတီအလိၤခဲလၢာ်န့ၣ် လီၤဂာ်ဒ်သိးဒီး ပိာ်မုၣ်တဂၤ အတၢ်ကံးညာ်လၢ အဘၣ်အၢလၢ အလုၢ်လၢ်ဟဲအဃိလီၤ.+
ပဝဲခဲလၢာ် ပကလီၤညွံး ဒ်သ့ၣ်လၣ်တဘ့ၣ်အသိး
ဒီးပတၢ်ကမၣ်တဖၣ် ကစိာ်ထီၣ်ကွံာ်ပှၤ ဒ်ကလံၤအသိးလီၤ.
၇ နဃၣ်ကွံာ်နမဲာ် လၢပအိၣ်+
ဒီးနပျဲလၢ ပတၢ်ကမၣ် ကဒုးဃဲၤလီၤဃိလီၤပှၤလီၤ.
အဃိ ပှၤတကိးထီၣ် နမံၤနီတဂၤဘၣ်
ဒီးပှၤတထဲးဂံၢ်ထဲးဘါ ဒ်သိး ကဟံးဃာ်နၤအဂီၢ် နီတဂၤဘၣ်.
၈ ဘၣ်ဆၣ် အိ ယဟိဝၤယွၤဧၢ, နမ့ၢ်ပပၢ်လီၤ.+
ပမ့ၢ်ကပံာ် ဒီးနမ့ၢ် ပှၤတ့ သပၢၤလီၤ.*+
ပဝဲခဲလၢာ်န့ၣ် ပမ့ၢ် နစုအတၢ်မၤလီၤ.
၉ အိ ယဟိဝၤယွၤဧၢ, တဘၣ်သးပှံၢ်ထီၣ်ပှၤ ဒိၣ်တလၢတဂ့ၤ.+
ဒီးတဘၣ် သ့ၣ်နီၣ်ထီၣ် ပတၢ်ကမၣ် လီၤထူလီၤယိာ်တဂ့ၤ.
ဝံသးစူၤ သ့ၣ်နီၣ်ထီၣ်လၢ ပဝဲခဲလၢာ် ပမ့ၢ်နပှၤဂီၢ်မုၢ်တက့ၢ်.
၁၀ နဝ့ၢ်စီဆှံတဖၣ် ကဲထီၣ် ပှၢ်မုၢ်ကနၢလံ.
ဝ့ၢ်စံယိၣ် ကဲထီၣ် ပှၢ်မုၢ်ကနၢ
ဒီးဝ့ၢ်ယရူၤၡလ့ၣ် အိၣ်သယုၢ်ဝဲလီၤ.+
၁၁ ပတၢ်လုၢ်ဟံၣ် လၢအစီဆှံ ဒီးအဃံလၤ
လၢပမိၢ်ပၢ်ဖံဖု လၢပျၢၤတဖၣ် စံးထီၣ်ပတြၢၤနၤ လၢအပူၤန့ၣ်
ဘၣ်တၢ်ဒွဲၣ်အူထီၣ်ကွံာ်အီၤ+
ဒီးတၢ်လၢ ပပာ်လုၢ်ပာ်ပှ့ၤအီၤ ခဲလၢာ်န့ၣ် ဟးဂီၤကွံာ်ဝဲ ခဲလၢာ်လံ.
၁၂ ဘၣ်ဆၣ် အိ ယဟိဝၤယွၤဧၢ, မ့ၢ်နကဆဲးအိၣ်ဒ်န့ၣ် ဒီးတမၤစၢၤပှၤဘၣ်ဧါ.
မ့ၢ်နကအိၣ်ဘှ့ၣ် ဒီးပျဲလၢ ပကဘၣ်နးဘၣ်ဖှီၣ် နးထဲအံၤညါဧါ.+