ယၡါယၤ

၇ ဖဲယူဒၤ အစီၤပၤအၤဃး+ ပၢတၢ်အဆၢကတီၢ်န့ၣ် ကီၢ်စူၤရံ အစီၤပၤရစံၣ် ဒီးစီၤရမါလယၤ အဖိခွါ လၢအမ့ၢ် အံၣ်စရ့လး အစီၤပၤပ့ကး+ လဲၤထီၣ်ဝဲ ဒ်သိးကဒုး ဝ့ၢ်ယရူၤၡလ့ၣ်အဂီၢ်လီၤ. ဘၣ်ဆၣ် အ* တမၤန့ၢ်ဝ့ၢ်ဘၣ်. စီၤအၤဃး အပၢ်မ့ၢ်ဝဲ စီၤယိၤသၣ် ဒီးစီၤယိၤသၣ် အပၢ်မ့ၢ်ဝဲ စီၤဧူးစံယါလီၤ.+ ၂ ဒီးပှၤတဲဘၣ် စီၤဒၤဝံး အစၢၤအသွဲၣ်လၢ “ပှၤစူၤရံဖိ ပာ်ဖှိၣ်ထီၣ်အသးဒီး အ့ဖရဲၣ် အပှၤဂီၢ်မုၢ်လံ.”*

ဖဲန့ၣ်အခါ စီၤအၤဃး ဒီးအပှၤဂီၢ်မုၢ်တဖၣ် ပျံၤတၢ်ဒီးကနိးဝဲ ဒ်သိးဒီး သ့ၣ်တဖၣ်လၢ ပှၢ်ကျါလၢ အဟူးဝဲလၢ ကလံၤအူတၢ်အဃိလီၤ.

၃ ယဟိဝၤယွၤ တဲစီၤယၡါယၤလၢ “ဝံသးစူၤ နၤဒီးနဖိခွါ စီၤၡယၤၡူာ်န့ၣ်*+ လဲၤထံၣ်လိာ်သးဒီး စီၤအၤဃး လၢထံကမါလၢ ထးခီအထံကျိၤ+ အကတၢၢ်လၢ အအိၣ်ဘူးဒီး ကျဲမုၢ်လၢအလဲၤဆူ ပှၤဆှုၣ်တၢ်ကံးညာ် အပျီန့ၣ်တက့ၢ်. ၄ နကဘၣ်တဲအီၤလၢ ‘ပာ်နသးဂၢၢ်ဂၢၢ်တက့ၢ်. ကီၢ်စူၤရံ အစီၤပၤရစံၣ် ဒီးစီၤရမါလယၤ အဖိခွါန့ၣ် သးဒိၣ်ထီၣ်တၢ် သနာ်က့ အဝဲသ့ၣ် ခံဂၤလၢာ်န့ၣ် လီၤဂာ်ဒ်သိးဒီး သ့ၣ်ဖူလၢ မ့ၣ်အူအီၣ်ကွံာ်ဝဲ ဒီးအိၣ်တ့ၢ်က့ၤထဲ အခံထီး ခံကူာ်လၢ အခုၣ်ထီၣ်ဒံး ကယီကယီလီၤ. အဃိ တဘၣ်ပျံၤတၢ် ဒီးတဘၣ်ပျဲလၢ နသးအဂံၢ်ဘါ ကလီၤစၢ်တဂ့ၤ.+ ၅ နီၢ်ကီၢ်န့ၣ် ပှၤစူၤရံဖိ, အ့ဖရဲၣ် အပှၤဂီၢ်မုၢ် ဒီးစီၤရမါလယၤ အဖိခွါန့ၣ် အဝဲသ့ၣ် ကူၣ်အၢနၤလီၤ. ဒီးအဝဲသ့ၣ်တဲဝဲလၢ ၆ “ပကလဲၤထီဒါ ယူဒၤအတၢ်လီၢ်တၢ်ကျဲ ဒီးမၤဟးဂီၤကွံာ်အီၤ ဒီးမၤန့ၢ်အီၤလၢ ပနီၢ်ကစၢ်အဂီၢ်ဟီ. ဝံၤဒီးပကပာ်ထီၣ်က့ၤ စီၤတၤဘ့လး အဖိခွါလၢ ယူဒၤအစီၤပၤလီၤ.”+

၁၀ ယဟိဝၤယွၤ ဆဲးတဲ စီၤအၤဃးလၢ ၁၁ “လၢယၤ, နကစၢ် ယဟိဝၤယွၤ အအိၣ်န့ၣ် ဃ့တၢ်ပနီၣ်တခါမီၤ.+ နမ့ၢ်ဃ့တၢ်ပနီၣ်လၢ ကမၤအသးလၢ တၢ်လီၢ်လၢ အယိာ်တုၤလၢ တၢ်သွၣ်ခိၣ်မ့ၢ်ဂ့ၤ,* တၢ်လီၢ်လၢ အထီတုၤလၢ မူကပိာ်လိၤမ့ၢ်ဂ့ၤ ယကဟ့ၣ်လီၤနၤလီၤ.” ၁၂ ဘၣ်ဆၣ် စီၤအၤဃးတဲဝဲလၢ “ယတဃ့ဘၣ် ဒီးယတမၤကွၢ် ယဟိဝၤယွၤဘၣ်.”

၁၃ ဝံၤဒီး စီၤယၡါယၤ တဲဝဲလၢ “သုဝဲလၢအမ့ၢ် စီၤဒၤဝံး အစၢၤအသွဲၣ်သ့ၣ်ဧၢ, ဝံသးစူၤ ဒိကနၣ်သၢၤ. သုမၤကွၢ် ပှၤကညီ အတၢ်ဝံသးစူၤန့ၣ် တလၢပှဲၤလၢ သုဂီၢ်ဒံးဧီၤ. မ့ၢ်သုကဘၣ်မၤကွၢ် ကစၢ်ယွၤ အတၢ်ဝံသးစူၤ စ့ၢ်ကီးဧါ.+ ၁၄ ဘၣ်ဆၣ် ယဟိဝၤယွၤ အနီၢ်ကစၢ် ကဒုးနဲၣ်သု တၢ်ပနီၣ်တခါလီၤ. ပိာ်မုၣ်သးစၢ်တဂၤ* ကဒၢထီၣ် ဒီးအဝဲကအိၣ်ဖျဲၣ်ထီၣ်ဝဲ ဖိခွါတဂၤ+ ဒီးကကိးန့ၢ်ဝဲ အမံၤလၢ ဧံးမၤနူၤအ့လးလီၤ.*+ ၁၅ တချုးလၢအဝဲ သ့ၣ်ညါနီၤဖး တၢ်ဂ့ၤဒီးတၢ်အၢဒံးဘၣ်န့ၣ် လၢကီၢ်ပူၤန့ၣ် ကအိၣ်တ့ၢ်က့ၤထဲ ထီပး ဒီးကနဲစီလၢ အဝဲကအီၣ်ဝဲအဂီၢ်လီၤ. ၁၆ တချုးလၢ ဖိသၣ်ပိာ်ခွါတဂၤန့ၣ် သ့ၣ်ညါနီၤဖး တၢ်ဂ့ၤဒီးတၢ်အၢဒံးဘၣ်အခါ စီၤပၤခံဂၤလၢ သုပျံၤအီၤန့ၣ် ပှၤတအိၣ်လၢ အဝဲသ့ၣ်အကီၢ်ပူၤ နီတဂၤလၢၤဘၣ်.+ ၁၇ စီၤအၤဃးဧၢ, ယဟိဝၤယွၤ ကဆှၢလီၤ ကီၢ်အၤၡူၢ်အစီၤပၤ+ အဃိ နၤ, နပှၤဂီၢ်မုၢ် ဒီးနပၢ် အဒူၣ်ဖိထၢဖိတဖၣ် ကထံၣ်ဘၣ် တၢ်ဆၢကတီၢ်လၢ အကီအခဲလီၤ. ဒီးစးထီၣ်လၢ အ့ဖရဲၣ် ထုးလီၤဖးအသးဒီး ယူဒၤအဘီမုၢ် လံၤလံၤန့ၣ်+ တၢ်ဆၢကတီၢ်လၢ အကီအခဲ တဟဲကဲထီၣ်အသး နးထဲအံၤ နီတဘျီဒံးဘၣ်.

၁၈ “ဖဲန့ၣ်အဆၢကတီၢ် ဒ်သိးယဟိဝၤယွၤ ကကိး သၣ်ဘုလါတဖၣ်လၢ အအိၣ်လၢ ကီၢ်အဲၤကူပတူး အထံကျိနံၤလါ အဒ့အတြၢ်လၢ အအိၣ်ယံၤတဖၣ် ဒီးကနဲတဖၣ်လၢ အအိၣ်လၢ ကီၢ်အၤၡူၢ် အဂီၢ် အဝဲကကွ့ကလံၤလီၤ. ၁၉ ဒီးအဝဲသ့ၣ် ခဲလၢာ် ကဟဲစီၢ်လီၤဝဲလၢ ကစၢၢ်ကဆူး, လၢၢ်ကဆူးလ့ကဆူး, သပှီာ်တၤဆှုၣ်ခဲလၢာ်အလိၤ ဒီးလၢကယဲၢ် တၢ်လီၢ်လၢ ဆၣ်ဖိကီၢ်ဖိတဖၣ် အီထံန့ၣ်လီၤ.

၂၀ “ဖဲန့ၣ်အဆၢကတီၢ် ယဟိဝၤယွၤ ကလူၤကွံာ် သုခိၣ်ဆူၣ်, သုခီၣ်ဆူၣ် ဒီးသုခၣ်ဆူၣ် ခီဖျိလၢ ကီၢ်အၤၡူၢ်အစီၤပၤလီၤ.+ စီၤပၤန့ၣ် လီၤဂာ်ဒ်သိးဒီး ဒီလူၤတဘ့ၣ်လၢ အဘၣ်တၢ်ဒိးလဲအီၤလၢ ထံကျိ* အဟီၣ်ကဝီၤလီၤ.

၂၁ “ဖဲန့ၣ်အဆၢကတီၢ် ပှၤတဂၤ ကပာ်မူက့ၤဝဲထဲ အကျီၢ်မိၢ်တဒု ဒီးအသိခံဒုလီၤ. ၂၂ ဒီးခီဖျိလၢ တၢ်နုၢ်ထံ အိၣ်ဒီဒူၣ်အဃိ အဝဲကအီၣ် ထီပးလီၤ. ဒီးကအိၣ်တ့ၢ်က့ၤထဲ ထီပး ဒီးကနဲစီလၢ ပှၤကိးဂၤဒဲးလၢ အအိၣ်တ့ၢ်လၢ ကီၢ်ပူၤ ကအီၣ်ဝဲအဂီၢ်လီၤ.

၂၃ “ဒီးလၢညါ တၢ်လီၢ်လၢ အအိၣ်ဒီး စပံးမုၢ်အမုၢ် ၁,၀၀၀ လၢအပှ့ၤကြၢးဒီး စ့ညၣ်အဘ့ၣ် ၁,၀၀၀ ကိးတီၤဒဲးန့ၣ် ကအိၣ်တ့ၢ်က့ၤထဲ သပှီာ်တၤဆှုၣ် ဒီးနီၣ်တဖၣ်လီၤ. ၂၄ ခီဖျိလၢ ဟီၣ်ကဝီၤန့ၣ် ကအိၣ်ပှဲၤဝဲဒီး သပှီာ်တၤဆှုၣ် ဒီးနီၣ်တဖၣ်အဃိ ပှၤလၢအလဲၤဖဲန့ၣ်တဖၣ် ကစိာ်ဝဲဒီး ချံၣ်ဒီးပျၢ်လီၤ. ၂၅ ဒီးခီဖျိလၢ သပှီာ်တၤဆှုၣ် ဒီးနီၣ်တဖၣ် ကအိၣ်ထီၣ်ဝဲလၢ ကယဲၢ်ကစၢၢ်ကလိတဖၣ်လၢ ပှၤဖျးပာ်စၢၤ နီၣ်လၢ နီၣ်ဖျးဟီၣ်ခိၣ်တဖၣ် အဃိ လၢခံ နလဲၤဘူးဖဲန့ၣ် တဘူၣ်လၢၤဘၣ်. ဒီးကစၢၢ်ကလိတဖၣ်အံၤ ကကဲထီၣ်က့ၤ ကျီၢ်ဒီးသိ အီၣ်ဆၣ်အလီၢ်လီၤ.”