ယံးရမံယၤ
၁၂ အိ ယဟိဝၤယွၤဧၢ,+ နမ့ၢ်ပှၤတီပှၤလိၤလီၤ. ဖဲယတီၣ်ဖျါထီၣ်တၢ်ဂ့ၢ်
ဒီးဖဲယတဲနၤ ဘၣ်ဃးဒီး တၢ်စံၣ်ညီၣ်တီအဂ့ၢ်အခါ နမၤတၢ်တီတီ လိၤလိၤလီၤ.
ဘၣ်ဆၣ် ဘၣ်မနုၤအဃိ ပှၤအၢပှၤသီတဖၣ် မၤတၢ်ကဲထီၣ်လိၣ်ထီၣ်+
ဒီးဘၣ်မနုၤအဃိ ပှၤလၢအသးတတီဘၣ်တဖၣ် တကိၢ်တဂီၤ တၢ်ဘၣ်လဲၣ်.
၂ နသူၣ်လီၤအဝဲသ့ၣ် ဒီးအဂံၢ်စဲၤလီၤအသးလံ.
အဝဲသ့ၣ် ဒိၣ်ထီၣ် ဒီးအသၣ်ထီၣ်ဝဲလီၤ.
အဝဲသ့ၣ် တဲနဂ့ၢ်ထီဘိဘၣ်ဆၣ် အဝဲသ့ၣ်အသး* န့ၣ်ယံၤဝဲဒီးနၤလီၤ.+
၃ ဘၣ်ဆၣ် နသ့ၣ်ညါယၤ ဂ့ၤဂ့ၤလီၤ. အိ ယဟိဝၤယွၤဧၢ,+ နထံၣ်ယၤ,
နသမံသမိးတ့ၢ်ယသး ဒီးနထံၣ်ဘၣ်လၢ ယသးတီဒီးနၤလီၤ.+
ထုးထီၣ် အဝဲသ့ၣ် ဒ်သိးဒီး သိလၢ တၢ်ကမၤသံအီၤအဂီၢ်
ဒီးပာ်လီၤဆီ အဝဲသ့ၣ်လၢ တၢ်မၤသံ အမုၢ်နံၤ အဂီၢ်န့ၣ်တက့ၢ်.
၄ ကီၢ်ကလီၤညွံးလီၤဘဲဝဲ
ဒီးတၢ်မုၢ်တၢ်ဘိလၢ ပျီကိးဘ့ၣ်ဒဲး အပူၤန့ၣ် ကဃ့ထီကွံာ် ယံာ်ဒံးထဲလဲၣ်.+
ခီဖျိလၢ ပှၤလၢအအိၣ်လၢ ကီၢ်ပူၤ အတၢ်အၢတၢ်သီအဃိ
ဆၣ်ဖိကီၢ်ဖိလၢအဒူတဖၣ် ဒီးထိၣ်တဖၣ် တအိၣ်လၢၤဘၣ်.
ပှၤလၢအအိၣ်လၢ ကီၢ်ပူၤ တဲဝဲလၢ “တၢ်ကမၤအသးဒီးပှၤ ဒ်လဲၣ်န့ၣ် ကစၢ်ယွၤ တထံၣ်ဝဲဘၣ်.”
၅ ကစၢ်ယွၤ တဲယၤလၢ “ဖဲနဃ့ၢ်ဒီး ပှၤကညီအခါ နမ့ၢ်လီၤဘှံးန့ၣ်
နဃ့ၢ်ပြၢဒီး ကသ့ၣ်တဖၣ် ကသ့ဒ်လဲၣ်.+
ဖဲနအိၣ်လၢ ကီၢ်လၢ အပှဲၤဒီး တၢ်ဃူတၢ်ဖိး အပူၤအခါ နမ့ၢ်နာ်န့ၢ်လီၤ နသး သနာ်က့
ဖဲနအိၣ်လၢ ယၢ်ဒ့ၣ်အသ့ၣ်တပှီာ်တီၣ်အကျါ အခါ နကမၤသးဒ်လဲၣ်.
၆ နဒီပုၢ်ဝဲၢ်တဖၣ် လၢအမ့ၢ် နပၢ်အဒူၣ်ဖိထၢဖိ ဒၣ်လဲာ်
တရ့ဒီးနၤလၢ တၢ်သးတီအပူၤဘၣ်.+
အဝဲသ့ၣ် ကိးဃါနၤလီၤ.
အဝဲသ့ၣ် မ့ၢ်တဲနၤ တၢ်လၢအဂ့ၤ သနာ်က့
တဘၣ်နာ်န့ၢ် အဝဲသ့ၣ်တဂ့ၤ.
၇ ယပာ်တ့ၢ်ကွံာ် ယဟံၣ်လံ.+ ယပာ်တ့ၢ်ကွံာ် ယတၢ်န့ၢ်သါလံ.+
ယပှၤဂီၢ်မုၢ်လၢ ယအဲၣ်အီၤဒိၣ်မးန့ၣ် ယဟ့ၣ်လီၤကွံာ်အီၤလၢ အဒုၣ်အဒါတဖၣ် အစုပူၤလံ.+
၈ ယတၢ်န့ၢ်သါတဒူၣ်အံၤ ယထံၣ်လၢ အလီၤဂာ် ဒ်သိးဒီး ခ့ယုၢ်တဒု လၢပှၢ်ကျါ
လၢအကညီၤထီဒါယၤ
အဃိ ယသးဟ့အီၤလံ.
၉ ယတၢ်န့ၢ်သါတဒူၣ်အံၤ ယထံၣ်လၢ အလီၤဂာ် ဒ်သိးဒီး လံာ်မိၢ်ဃးလၢ အလွဲၢ်အိၣ် အကလုာ်ကလုာ် တဘ့ၣ်
ဒီးလံာ်မိၢ်ဃး အဂၤတဖၣ် ဟဲကဝီၤဃာ်အီၤ ဒီးဖျးအီၤ ကိးကပၤဒဲးလီၤ.+
ဆၣ်ဖိကီၢ်ဖိအမံၤ ခဲလၢာ်သ့ၣ်ဧၢ, ဟဲပာ်ဖှိၣ်ထီၣ်သုသး
ဒီးဟဲအီၣ်တၢ်သၢၤ.+
၁၀ ပှၤကွၢ်သိအါဂၤ မၤဟးဂီၤကွံာ် ယစပံးကျီးလံ.+
အဝဲသ့ၣ် ယီၢ်တံၢ်လီၤ ယဟီၣ်ခိၣ်လီၢ်လံ.+
ဒီးယဟီၣ်ခိၣ်လီၢ်လၢ အလီၤအိၣ်န့ၣ် အဝဲသ့ၣ် ဒုးကဲထီၣ်ဝဲလၢ ပှၢ်မုၢ်ကနၢ လၢအအိၣ်သယုၢ်လံ.
၁၁ အကဲထီၣ် တၢ်လီၢ်လၢ အဘၣ်တၢ် ပာ်တ့ၢ်ကွံာ်အီၤလံ.
အကဲထီၣ် တၢ်လီၢ်လၢ အလီၤညွံး လီၤဘဲလံ.
အအိၣ်သယုၢ်ဝဲ လၢယမဲာ်ညါလံ.+
တၢ်လီၢ်ဒီတဘ့ၣ်န့ၣ် အိၣ်သယုၢ်ဝဲ
ဘၣ်ဆၣ် ပှၤတကနၣ်ဃုာ်ဝဲ နီတဂၤဘၣ်.+
၁၂ လၢကျဲလီၢ်လံၤတဖၣ် လၢအလဲၤခီဂာ် ပှၢ်မုၢ်ကနၢ ကိးဘိဒဲးအပူၤန့ၣ် ပှၤမၤဟးဂီၤတၢ်ဖိတဖၣ် ဟဲဝဲလံ.
ယဟိဝၤယွၤ အနးန့ၣ် ကမၤဟးဂီၤဝဲ ပှၤလၢအအိၣ်လၢ တၢ်လီၢ်ဒီတဘ့ၣ်အပူၤလီၤ.+
ပှၤတအိၣ်ဒီး တၢ်မုာ်တၢ်ခုၣ် နီတဂၤဘၣ်.
၁၃ အဝဲသ့ၣ် သူၣ်လီၤဘုကၠူၣ် ဘၣ်ဆၣ် ကူးဘၣ်က့ၤဝဲ တၤဆှုၣ်တဖၣ်,+
အဝဲသ့ၣ် မၤတၢ်တုၤလၢ အလီၤဘှံး ဘၣ်ဆၣ် တကဲဘျုး နီတမံၤဘၣ်.
ယၤ, ယဟိဝၤယွၤ သးဒိၣ်ထီၣ် အဝဲသ့ၣ် ဒိၣ်မးအဃိ
ဖဲကူးတၢ် အဆၢကတီၢ်န့ၣ် တၢ်လၢအမဲထီၣ်သၣ်ထီၣ်တဖၣ် ကကဲထီၣ် တၢ်မဲာ်ဆှးလၢ အဝဲသ့ၣ် အဂီၢ်လီၤ.”
၁၄ ယဟိဝၤယွၤတဲဝဲလၢ “ပှၤအၢပှၤသီ လၢယဃၢၤ လၢအထိးဘၣ် တၢ်လီၢ်ဖဲယဒုးအိၣ် ယပှၤဂီၢ်မုၢ် ပှၤအံၣ်စရ့လးဖိန့ၣ်+ ယကထဲးထီၣ်ကွံာ် အဝဲသ့ၣ်လၢ အတၢ်လီၢ်+ ဒီးယကထဲးထီၣ်ကွံာ် ယူဒၤ အပှၤဂီၢ်မုၢ် လၢအဝဲသ့ၣ် အကျါလီၤ. ၁၅ ဘၣ်ဆၣ် ယထဲးထီၣ်ကွံာ် အဝဲသ့ၣ် ဝံၤအလီၢ်ခံ ယကသးကညီၤကဒီးအဝဲသ့ၣ် ဒီးဟဲက့ၤကိး အဝဲသ့ၣ်လၢ ဟီၣ်ကဝီၤလၢ အဝဲသ့ၣ် န့ၢ်သါဘၣ်ဝဲ အပူၤလီၤ.”
၁၆ “ဒီးပှၤကလုာ်တဖၣ်န့ၣ် မ့ၢ်မၤလိ ယပှၤဂီၢ်မုၢ် အလုၢ်လၢ်သကဲာ်ပဝး သပှၢ်တၢၢ် ဒီးဒ်အဝဲသ့ၣ် သိၣ်လိတ့ၢ် ယပှၤဂီၢ်မုၢ်လၢ ကအၢၣ်လီၤတၢ်လၢ ဘဧၤလးအမံၤအပူၤ အသိးန့ၣ် အဝဲသ့ၣ် မ့ၢ်အၢၣ်လီၤတၢ်လၢ ယမံၤပူၤ ဒီးတဲလၢ ‘ဒ်ယဟိဝၤယွၤ မ့ၢ်ပှၤလၢအမူဝဲ သပှၢ်တၢၢ်အသိး’ န့ၣ်အဝဲသ့ၣ် ကဘီၣ်ထီၣ်ညီထီၣ်လၢ ယပှၤဂီၢ်မုၢ် အကျါလီၤ. ၁၇ ဘၣ်ဆၣ် ပှၤကလုာ်တဖၣ် မ့ၢ်တအဲၣ်ဒိး ဒိကနၣ်ဘၣ်န့ၣ် ယကထဲးထီၣ်ကွံာ် အဝဲသ့ၣ်လီၤ. ယကထဲးထီၣ်ကွံာ် အဝဲသ့ၣ် ဒီးမၤဟးဂီၤကွံာ်အီၤလီၤ.” ယဟိဝၤယွၤ တဲဝဲဒ်န့ၣ်လီၤ.+