ယံးရမံယၤ
၁၅ ဒီးယဟိဝၤယွၤ တဲဘၣ်ယၤလၢ “စီၤမိၤၡ့ ဒီးစီၤၡမူၤအ့လး မ့ၢ်ဆၢထၢၣ်လၢ ယမဲာ်ညါဒၣ်လဲာ်+ ယတပာ်ဖျါထီၣ် တၢ်သးကညီၤလၢ ပှၤဂီၢ်မုၢ်တဖၣ်အံၤ အဖီခိၣ်ဘၣ်. နီဟးထီၣ်ကွံာ်အဝဲသ့ၣ် လၢယမဲာ်ညါ ဒီးဒုးဟးထီၣ်ကွံာ် အဝဲသ့ၣ်တက့ၢ်. ၂ ဒီးအဝဲသ့ၣ် မ့ၢ်သံကွၢ်နၤလၢ တၢ်ကမၤအသးဒီး အဝဲသ့ၣ် ဒ်လဲၣ်န့ၣ် နကဘၣ်တဲ အဝဲသ့ၣ်လၢ ‘ယဟိဝၤယွၤ တဲဝဲလၢ
“သုဝဲတနီၤ ကသံလၢ တၢ်ဆါသံသတြိာ်,
သုဝဲတနီၤ ကသံလၢနး,+
သုဝဲတနီၤ ကသံလၢ တၢ်သၣ်ဝံၤလီၤဒိ
ဒီးသုဝဲတနီၤန့ၣ် ပှၤကက့ၤဖီၣ် သုလီၤ.”’+
၃ “ယဟိဝၤယွၤ တဲဝဲလၢ ‘ယကဃုထၢန့ၢ် အဝဲသ့ၣ်လၢ တၢ်ကီတၢ်ခဲလွံၢ်ခါ+ လၢအမ့ၢ် နးလၢအကမၤသံတၢ်, ထွံၣ်လၢ အကအ့ၣ်တွံၢ်ကွံာ်တၢ်, ထိၣ်လၢအယူၤလၢ တၢ်ဖးဖီဒီး ဆၣ်ဖိကီၢ်ဖိအဒူ လၢအကယူၢ်လီၤကွံာ် ဒီးမၤဟးဂီၤကွံာ် တၢ်လၢအအိၣ်တ့ၢ်လီၤ.+ ၄ ခီဖျိ တၢ်လၢ ယူဒၤအစီၤပၤ ဃံးစကံယၤ အဖိခွါ စီၤမနၤၡ့ၤ မၤတ့ၢ်ဝဲလၢ ဝ့ၢ်ယရူၤၡလ့ၣ်အပူၤအဃိ+ ယကဒုးကဲထီၣ် အဝဲသ့ၣ်လၢ တၢ်လီၤပျံၤလီၤဖုးအလီၢ်လၢ ဘီမုၢ်ခဲလၢာ်လၢ ဟီၣ်ခိၣ်ချၢအဂီၢ်လီၤ.+
၅ ဝ့ၢ်ယရူၤၡလ့ၣ်ဧၢ, မတဂၤ ကပာ်ဖျါထီၣ် တၢ်သးကညီၤလၢ နဖီခိၣ်လဲၣ်.
မတဂၤ ကပာ်ဖျါထီၣ် တၢ်ဒိသူၣ်ဒိသး လၢနဖီခိၣ်လဲၣ်.
ဒီးမတဂၤ ကပတုာ်ဒီး သံကွၢ်န တၢ်အိၣ်သးလဲၣ်.’
၆ ယဟိဝၤယွၤ တဲဝဲလၢ ‘နပာ်တ့ၢ်ကွံာ်ယၤလံ.+
နဃၣ်ဒူၣ်ချၢနသးလၢ ယအိၣ်လံ.+
အဃိ ယကယၤထီၣ်ယစု ဒ်သိး ယကထီဒါနၤ ဒီးယကမၤဟးဂီၤကွံာ် နၤလီၤ.+
ယပာ်ဖျါထီၣ် တၢ်သးကညီၤလၢ နဖီခိၣ်န့ၣ် ယလီၤဘှံးလၢာ်လံ.
၇ ယပှၤဂီၢ်မုၢ်လၢ အအိၣ်လၢ ဝ့ၢ်တဖၣ်* လၢကီၢ်ပူၤန့ၣ် ယကကွံာ်ထီၣ် အဝဲသ့ၣ်လၢ ကလံၤကျါလၢ နီၣ်ဆဲးတၢ် ဒ်ဘုအသိးလီၤ.
ယကမၤသံ အဝဲသ့ၣ်အဖိတဖၣ်+
ဒီးယကမၤဟးဂီၤကွံာ် ယပှၤဂီၢ်မုၢ်အံၤ
မ့ၢ်လၢ အဝဲသ့ၣ် တသးအိၣ် ဆီတလဲ အလုၢ်လၢ်သကဲာ်ပဝးတဖၣ်ဘၣ် အဃိလီၤ.+
၈ ယကမၤဒ်သိး အဝဲသ့ၣ် အပှၤမုၣ်ကမဲတဖၣ် ကအိၣ်ဝဲ အါန့ၢ်ဒံး မဲးလၢ ပီၣ်လဲၣ်နံၤလီၤ.
ယကဒုးဟဲ ပှၤမၤဟးဂီၤတၢ်ဖိလၢ မုၢ်ဆါခီ လၢကထီဒါ မိၢ်ဒီးအဖိ တဖၣ်လီၤ.
ယကဒုးလီၤဘၣ် တၢ်ကိၢ်တၢ်ဂီၤ ဒီးတၢ်လီၤပျံၤလီၤဖုး လၢအဝဲသ့ၣ်အဖီခိၣ် သတူၢ်ကလာ်လီၤ.
၉ ပိာ်မုၣ်လၢ အအိၣ်ဖျဲၣ်ထီၣ် အဖိနွံဂၤန့ၣ် အဂံၢ်လီၤစၢ်လံ.
အဝဲကသါတပှဲၤလၢၤဘၣ်.
ဒီးဖဲ မုၢ်ဆါခီအဆၢကတီၢ်န့ၣ် ပိာ်မုၣ်အံၤ အမုၢ်လီၤနုာ်ဝဲအဃိ
အကဲထီၣ် တၢ်မဲာ်ဆှး လၢအဂီၢ်လီၤ.
ပှၤစှၤဂၤလၢ အအိၣ်မူဒံးန့ၣ်
ယကဟ့ၣ်လီၤ အဝဲသ့ၣ်လၢ အဒုၣ်အဒါလၢ အအိၣ်ဒီးနးတဖၣ် အစုပူၤလီၤ. ယၤ, ယဟိဝၤယွၤ တဲဝဲဒ်န့ၣ်လီၤ.”+
၁၀ မိဧၢ, နအိၣ်ဖျဲၣ်ထီၣ်ယၤ+ အဃိ ယဘၣ်ကီဘၣ်ခဲ သပှၢ်တၢၢ်လီၤ.
ယတဟ့ၣ်လိၢ်တၢ်ဘၣ် ဒီးယတဃ့လိၢ်ပှၤတၢ်ဘၣ် သနာ်က့
လၢကီၢ်ဒီဘ့ၣ်အပူၤန့ၣ် ပှၤတဲအါတၢ်ဒီးယၤ, ပှၤအ့ၣ်လိာ်သးဒီးယၤ
ဒီးအဝဲသ့ၣ် ကိးဂၤဒဲး ဆိၣ်အၢ ယၤလီၤ.
၁၁ ယဟိဝၤယွၤ တဲဝဲလၢ “ယကမၤဘျုးနၤ သပှၢ်တၢၢ်လီၤ.
ဖဲတၢ်ကီတၢ်ခဲ ဒီးတၢ်ကိၢ်တၢ်ဂီၤ အဆၢကတီၢ်န့ၣ်
ယကနုာ်လီၤ မၤစၢၤနၤလၢ ဒုၣ်ဒါတဖၣ် အမဲာ်ညါ သပှၢ်တၢၢ်လီၤ.
၁၂ မ့ၢ်ပှၤမၤကၢ်ထး တကူာ်ဘၣ်တကူာ်
လီၤဆီဒၣ်တၢ် ထးလၢအအိၣ်ဟဲလၢ ကလံၤစိးတခီ ဒီးမၤကၢ်တိၢ်ဘီ ကသ့တဂၤဂၤဧါ.
၁၃ ခီဖျိလၢ န* တၢ်ဒဲးဘးတဖၣ်လၢ နမၤအီၤလၢ နဟီၣ်ကဝီၤခဲလၢာ် အပူၤအဃိ
နတၢ်ထူးတၢ်တီၤဒီး တၢ်လၢ အအိၣ်ဒီးနၤန့ၣ် ယကဟ့ၣ်လီၤ ခီလီအီၤလၢ နဒုၣ်နဒါတဖၣ် အစုပူၤလီၤ.+
၁၄ ယကဟ့ၣ်လီၤ သုဒုၣ်သုဒါလၢ တၢ်သ့ၣ်တဖၣ်န့ၣ်
ဒ်သိး အဝဲသ့ၣ် ကက့ၤစိာ်ဝဲလၢ ကီၢ်လၢ သုတသ့ၣ်ညါအီၤဘၣ် တဘ့ၣ်အပူၤလီၤ.+
ယတၢ်သးဒိၣ်န့ၣ် မၤကဲၤထီၣ် မ့ၣ်အူ
ဒီးမ့ၣ်အူန့ၣ် ကဲၤထီၣ်ဘၣ်သုလီၤ.”+
၁၅ အိ ယဟိဝၤယွၤဧၢ, နသ့ၣ်ညါ ယတၢ်အိၣ်သးအဃိ
သ့ၣ်နီၣ်ထီၣ်က့ၤယၤ ဒီးပာ်သူၣ် ပာ်သးယၤတက့ၢ်.
ဟ့ၣ်ကၣ်က့ၤ ပှၤလၢ အမၤအၢမၤနးယၤန့ၣ်တက့ၢ်.+
တဘၣ်ပျဲလၢ ပှၤကမၤဟးဂီၤယၤ ခီဖျိလၢ နတသးဒိၣ်ထီၣ်တၢ် ချ့ချ့ဘၣ်အဃိတဂ့ၤ.
သ့ၣ်နီၣ်လၢ ယတူၢ်တၢ်ဒုၣ်ဒွဲၣ်တဖၣ်အံၤ လၢနဃိန့ၣ်တက့ၢ်.+
၁၆ တၢ်သုးမုၢ်ဂီၢ်မုၢ် အကစၢ်ယဟိဝၤယွၤဧၢ, ယဘၣ်တၢ်ကိးယၤလၢ နမံၤလီၤ.
နတၢ်ကတိၤတဖၣ် လၢယဒိးန့ၢ်ဘၣ်န့ၣ် ယအီၣ်အီၤ ဒ်တၢ်အီၣ် အသိးလီၤ.+
ဒီးနတၢ်ကတိၤန့ၣ် ကဲထီၣ် တၢ်သးခု ဒီးတၢ်သူၣ်ဖှံသးညီ လၢယဂီၢ်လီၤ.
၁၇ ယတဆ့ၣ်နီၤသကိးဒီး ပှၤလၢ အအဲၣ်တၢ်မုာ်တၢ်ပၠီၣ်တဖၣ် ဒီးမၤတၢ်သူၣ်ဖှံသးညီ ဃုာ်ဒီးအဝဲသ့ၣ်ဘၣ်.+
၁၈ ဘၣ်မနုၤအဃိ ယတၢ်ဆါအိၣ်ဝဲ ယံာ်ယံာ်ထၢထၢ ဒီးယတၢ်ပူၤလီၢ် ဘျါက့ၤတသ့ဘၣ်လဲၣ်.
ယတၢ်ပူၤလီၢ်န့ၣ် တအဲၣ်ဒိး ဘျါက့ၤဘၣ်.
မ့ၢ်နကကဲထီၣ် ဒ်သိးဒီး ထံထီၣ်ပၢၢ်လၢ အတဟ့ၣ်ထီၣ်ထံ
ဒီးယသန့ၤသးလၢအီၤ တသ့ဘၣ်န့ၣ်ဧါ.
၁၉ အဃိ ယဟိဝၤယွၤ တဲဝဲလၢ
“န* မ့ၢ်ဆီတလဲ နတၢ်ပာ်သူၣ်ပာ်သး လၢယဖီခိၣ်န့ၣ် ယကဘၣ်သူၣ် ဘၣ်သးကဒီးနၤ
ဒီးနကဆဲးမၤဘၣ်တၢ်* လၢယမဲာ်ညါလီၤ.
နမ့ၢ်နီၤဖး တၢ်လၢအဘျုးတအိၣ်ဘၣ် ဒီးတၢ်လၢအလုၢ်ဒိၣ်ပှ့ၤဒိၣ်န့ၣ်
နကကဲ ဒ်သိးဒီး ယထးခိၣ်လီၤ.*
ဒီးခဲကၢာ် အဝဲသ့ၣ် ကဘၣ်ဃၣ်အသးလၢနအိၣ်
ဘၣ်ဆၣ် နတလိၣ် ဃၣ်နသးလၢ အဝဲသ့ၣ်အအိၣ်ဘၣ်.”
၂၀ ယဟိဝၤယွၤ တဲဝဲလၢ “လၢပှၤဂီၢ်မုၢ်တဖၣ်အံၤ အကျါန့ၣ် ယကဒုးကဲထီၣ်နၤလၢ တၢ်ဒူၣ်တိၢ်ဘီ လၢ အကျၢၤလီၤ.+
အဝဲသ့ၣ် ကထီဒါနၤ သပှၢ်တၢၢ်လီၤ.
ဘၣ်ဆၣ် ယကအိၣ်ဒီးနၤ, ယက မၤစၢၤနၤ ဒီးမၤပူၤဖျဲးနၤအဃိ
အဝဲသ့ၣ် မၤနၤတနၢၤဘၣ်.+
၂၁ ဒီးယကမၤပူၤဖျဲးနၤလၢ ပှၤအၢပှၤသီ အစုပူၤ
ဒီးမၤပူၤဖျဲးနၤလၢ ပှၤလၢ အသူၣ်အၢသးသီတဖၣ် အစုပူၤလီၤ.”