ယံးရမံယၤ
၂ ယဟိဝၤယွၤ တဲယၤလၢ ၂ “ဒ်သိး ပှၤအိၣ်လၢ ဝ့ၢ်ယရူၤၡလ့ၣ်အပူၤတဖၣ် ကနၢ်ဟူဝဲအဂီၢ် လဲၤတဲဖျါန့ၢ် အဝဲသ့ၣ်လၢ ‘ယဟိဝၤယွၤ တဲဝဲဒ်အံၤ,
“ယသ့ၣ်နီၣ်ထီၣ်က့ၤ နတၢ်သးတီ* ဖဲနသးစၢ်ဒံးအခါ+
ဒီးတၢ်အဲၣ်လၢ နပာ်ဖျါထီၣ်အီၤ တချုးလၢ ပဖျီသးဒံးဘၣ် အခါလီၤ.+
နလဲၤပိာ်ယခံလၢ ပှၢ်မုၢ်ကနၢ
ဖဲတၢ်လီၢ်လၢ ပှၤတဖှံလီၤ တၢ်ချံဒံးဘၣ်လီၤ.+
၃ လၢညါ ပှၤအံၣ်စရ့လးဖိန့ၣ် စီဆှံဝဲလၢ ယဟိဝၤယွၤအမဲာ်ညါ+ ဒီးမ့ၢ်ဝဲ ကစၢ်ယွၤ အတၤသၣ်ဆိလီၤ.”’
‘ပှၤတဂၤဂ့ၤ တဂၤဂ့ၤလၢ အမၤဘၣ်ဒိအီၤန့ၣ် ကအိၣ်ဒီးတၢ်ကမၣ်
ဒီးတၢ်နးတၢ်ဖှီၣ် ကလီၤဘၣ်လၢ အဝဲသ့ၣ်အလိၤလီၤ.’ ယၤ, ယဟိဝၤယွၤ တဲဝဲဒ်န့ၣ်လီၤ.”+
၄ စီၤယၤကိာ် အစၢၤအသွဲၣ် ဒီးအံၣ်စရ့လး အပှၤဂီၢ်မုၢ် အဒူၣ်ဖိထၢဖိ ခဲလၢာ်သ့ၣ်ဧၢ,
ကနၣ် ယဟိဝၤယွၤ အတၢ်ကတိၤတက့ၢ်.
၅ ယဟိဝၤယွၤ တဲဝဲလၢ
“သုမိၢ်ပၢ်ဖံဖု လၢပျၢၤတဖၣ် ပာ်တ့ၢ်ကွံာ်ယၤန့ၣ်+
မ့ၢ်အဝဲသ့ၣ် ထံၣ်န့ၢ်ယတၢ်ကမၣ် မနုၤတမံၤလဲၣ်.
အဝဲသ့ၣ် လဲၤဘူၣ်ထီၣ်ဘါထီၣ် တၢ်ဂီၤတၢ်ဖှီၣ်တဖၣ်လၢ အဘျုးတအိၣ်ဘၣ်+ ဒီးအဝဲသ့ၣ် အနီၢ်ကစၢ်ဒၣ်ဝဲ ကဲထီၣ်ပှၤလၢ အဘျုးတအိၣ်ဘၣ်.+
၆ အဝဲသ့ၣ် တတဲဝဲလၢ ‘မ်ပဃု ယဟိဝၤယွၤတက့ၢ်’* န့ၣ်ဘၣ်.
ဒီးတတဲဝဲလၢ ‘ကစၢ်ယွၤလၢ အဒုးဟးထီၣ်ပှၤလၢ ကီၢ်အဲၤကူပတူး,+
ဆှၢတ့ၢ်ပှၤလၢ ပှၢ်မုၢ်ကနၢအပူၤ
ဒီးဒုးလဲၤခီဂာ်ပှၤလၢ ကီၢ်လၢအအိၣ်ဒီး မဲးမုၢ်ခိၣ်+ ဒီးတၢ်ပူၤတဖၣ်,
ကီၢ်လၢအဃ့ထီ+ ဒီးအိၣ်ဝဲဒီး တၢ်ခံးယိာ်,
ကီၢ်လၢ ပှၤတလဲၤတၢ်က့ၤတၢ်ဖဲန့ၣ် နီတဂၤဘၣ်
ဒီးပှၤတအိၣ်ဝဲဆိးဝဲလၢအပူၤ နီတဂၤဘၣ်န့ၣ် မ်ပဃုအီၤတက့ၢ်’ န့ၣ်ဘၣ်.
၇ ဝံၤဒီး ယဟဲကိးသုလၢ ကီၢ်လၢ အဟီၣ်ခိၣ်ညၣ်ထ့ၣ်ဂ့ၤ
ဒ်သိး သုကအီၣ် အတၤသူတၤသၣ် ဒီးတၢ်လၢအဂ့ၤတဖၣ် လၢအအိၣ်လၢအပူၤလီၤ.+
ဘၣ်ဆၣ် သုဟဲနုာ် မၤဘၣ်အၢယကီၢ်
ဒီးသုမၤကဲထီၣ် ယတၢ်န့ၢ်သါလၢ တၢ်လၢ အလီၤသးဘၣ်အၢလီၤ.+
၈ ပှၤလုၢ်တၢ်ဒိၣ်တဖၣ် တတဲဝဲလၢ ‘မ်ပဃု ယဟိဝၤယွၤတက့ၢ်’* န့ၣ်ဘၣ်.+
ပှၤလၢအအိၣ်ဒီး မူဒါလၢ ကသိၣ်လိ စီၤမိၤၡ့ အတၢ်သိၣ်တၢ်သီန့ၣ် တသ့ၣ်ညါယၤဘၣ်.
ပှၤကွၢ်သိတဖၣ် ထီဒါက့ၤယၤ,+
ဝံတဖၣ် တဲတၢ်ဒ်ဝံအသိးလၢ ဘဧၤလးအမံၤပူၤ+
ဒီးအဝဲသ့ၣ် ဘူၣ်ထီၣ်ဘါထီၣ် ယွၤတဖၣ်လၢ အတကဲဘျုး နီတမံၤဘၣ်.
၉ ယၤ, ယဟိဝၤယွၤ တဲဝဲလၢ ‘ယကဆဲးထီဒါသု+
ဒီးယကထီဒါ သုဖိသုလံၤတဖၣ်လီၤ.’
၁၀ ‘မ့ၢ်တၢ်ဟဲကဲထီၣ်အသးဒ်အံၤ အိၣ်တဘျီဘျီဧါ, လဲၤကွၢ်မီၤ.
လဲၤခီဂာ် ပီၣ်လဲၣ်ဆူ ကံတံၣ်အကီးတဖၣ်+ ဒီးကွၢ်သၢၤ.
ဒီးဆှၢလီၤ ပှၤတဂၤဂၤလၢ ကီၢ်က့ဒၢ်+ ဒီးကွၢ်ဆိကမိၣ် လီၤတံၢ်လီၤဆဲးသၢၤ.
၁၁ ပှၤကလုာ် အဂၤတကလုာ်န့ၣ် မ့ၢ်အခီလဲ အယွၤတဖၣ်လၢ ယွၤအဂၤတဖၣ်လၢ အဝဲသ့ၣ် တထံၣ်ဝဲဒ် ယွၤနီၢ်နီၢ်တဖၣ်အသိးဘၣ် အဂီၢ်န့ၣ် အိၣ်တဘျီဘျီဧါ.
ဘၣ်ဆၣ် မ့မ့ၢ် ယပှၤဂီၢ်မုၢ်န့ၣ် အဝဲသ့ၣ် ခီလဲ ယလၤကပီၤလၢ တၢ်လၢအဘျုး တအိၣ်နီတမံၤဘၣ် အဂီၢ်လီၤ.+
၁၂ မူခိၣ်သ့ၣ်ဧၢ, ကွၢ်ထံတၢ်လၢ တၢ်ကမၢကမၣ် အပူၤ
ဒီးကနိးကစုာ်ဖးဒိၣ် လၢတၢ်ပျံၤတၢ်ဖုး အပူၤတက့ၢ်.’ ယၤ, ယဟိဝၤယွၤ တဲဝဲဒ်န့ၣ်လီၤ.
၁၃ ‘ယပှၤဂီၢ်မုၢ် မၤတ့ၢ် တၢ်အၢခံမံၤလီၤ.
အဝဲသ့ၣ် ပာ်တ့ၢ်ကွံာ်ယၤ လၢအမ့ၢ် ထံမူအဂံၢ်ခီၣ်ထံး+
ဒီးခူၣ်န့ၢ်ဝဲ ကမါလၢ အဝဲသ့ၣ် အနီၢ်ကစၢ်အဂီၢ်လီၤ.
ထံကမါန့ၣ် အတဲၤထီၣ်အဃိ အပာ်ဃာ်ထံတန့ၢ်ဘၣ်.’
၁၄ ‘မ့ၢ်အံၣ်စရ့လး ကဲကုၢ်တဂၤဧါ. မ့ၢ်အကဲကုၢ်လၢ အအိၣ်ဖျဲၣ်ထီၣ်လၢ အကစၢ် အဟံၣ်ပူၤဧါ.
အမ့ၢ်တကဲဘၣ်န့ၣ် ဘၣ်မနုၤအဃိ ပှၤက့ၤဖီၣ်အီၤ ဒ်ကုၢ်တဂၤ အသိးလဲၣ်.
၁၅ ခ့ယုၢ်တဖၣ် မၤဒိၣ်ထီၣ်အကလုၢ်
ဒီးကညီၤအီၤလီၤ.+
ခ့ယုၢ်တဖၣ် ဒုးကဲထီၣ် အံၣ်စရ့လး အတၢ်လီၢ်လၢ တၢ်လီၤပျံၤလီၤဖုးအလီၢ်လီၤ.
ဒီးအဝ့ၢ်တဖၣ်န့ၣ် ဘၣ်တၢ်ဒွဲၣ်အူထီၣ်ကွံာ်အီၤ ဒ်သိး ပှၤအိၣ်ဖဲန့ၣ် သုတသ့လၢၤတဂ့ၤ အဂီၢ်လီၤ.
၁၆ ပှၤနိဖးဖိ*+ ဒီးပှၤတၤပါန့ၤဖိတဖၣ်+ ဂုာ်န့ၢ်ဆူၣ်တၢ်အိၣ်လၢ နကီၢ်ပူၤလီၤ.*
၁၇ အံၣ်စရ့လးဧၢ, ဖဲနကစၢ် ယဟိဝၤယွၤ ဆှၢနၤလၢ ကျဲအခါ
နပာ်တ့ၢ်အီၤအဃိ+
နဒုးအိၣ်ထီၣ် တၢ်ကီတၢ်ခဲအံၤလၢ နနီၢ်ကစၢ်အဂီၢ် တမ့ၢ်ဧီၤ.
ဘၣ်မနုၤအဃိ နအဲၣ်ဒိးလဲၤကျဲဆူ ကီၢ်အၤၡူၢ်+
ဒီးအဲၣ်ဒိးအီထံလၢ ထံကျိ ဖရၤသးလဲၣ်.
၁၉ နတၢ်အၢတၢ်သီ ကြၢးဘှီဘၣ်ထီၣ်က့ၤနၤ
ဒီးနတၢ်သးတတီဘၣ်န့ၣ် ကြၢးသိၣ်ဃီၣ်က့ၤနၤလီၤ.
သ့ၣ်ညါ ဒီးနၢ်ပၢၢ်လၢ နပာ်တ့ၢ် ယၤ, နကစၢ် ယဟိဝၤယွၤန့ၣ်
မ့ၢ်တၢ်တမံၤလၢ အအၢ ဒီးအနးဒိၣ်မးန့ၣ်တက့ၢ်.+
နတပျံၤယၤနီတစဲးဘၣ်.’+ ယၤ, တၢ်ပၢကစၢ် ယဟိဝၤယွၤ တဲဝဲ ဒ်န့ၣ်လီၤ.
၂၀ ‘လၢညါန့ၣ် ယမၤကၢ်ကွံာ် နနီၣ်ယိးဘိ+
ဒီးမၤတဲာ်ကွံာ် ထးသွဲတဖၣ်လၢ အစၢဃာ်နၤလီၤ.
ဘၣ်ဆၣ် နတဲလၢ “ယတမၤ နတၢ်မၤဘၣ်.”
ဒီးလၢတၢ်လူၢ်လၢ အထီကိးဖျၢၣ်ဒဲးအလိၤ ဒီးလၢသ့ၣ်လါဟ့ လၢအပှဲၤဒီးအလၣ် ကိးထူၣ်ဒဲး အခီၣ်ထံးန့ၣ်+
နမံနီၤအီထီ ဒီးဆါလီၤအီၣ် နသးလီၤ.+
၂၁ ယသူၣ်လီၤနၤ ဒ်စပံးမုၢ်လၢ အဂ့ၤကတၢၢ်တမုၢ်+ လၢအဟဲလၢ တၢ်ချံလၢအဂ့ၤကတၢၢ်လီၤ.
မ့မ့ၢ်ဒ်န့ၣ်န့ၣ် နအၢထီၣ်သီထီၣ်လၢ ယမဲာ်ညါ ဒီးကဲထီၣ်က့ၤ စပံးမုၢ်အဂၤတမုၢ်ဒ်လဲၣ်.’+
၂၂ ‘နမ့ၢ်သ့ကဆှီနသးဒီး အံသၣ် ဒီးဆးပၠၣ်ဒီဒူၣ် သနာ်က့
နတၢ်ကမၣ် ကအိၣ်ဒံးလၢ ယမဲာ်ညါလီၤ.’+ ယၤ, တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.
၂၃ နတဲလၢ နတမၤဘၣ်အၢလီၤ နသးဘၣ်
ဒီးနတဘူၣ်ထီၣ်ဘါထီၣ် ဘဧၤလးဘၣ်န့ၣ် ကသ့ဒ်လဲၣ်.
နတၢ်မၤလၢ တၢ်တြီၤပူၤန့ၣ် ကွၢ်မီၤ.
နမၤတ့ၢ် မနုၤလဲၣ်န့ၣ် ဆိကမိၣ် လီၤတံၢ်လီၤဆဲးသၢၤ.
နလီၤဂာ်ဒ်သိးဒီး ကီၤလၤအူးမိၢ်တဒုလၢ အဃ့ၢ်ချ့
ဒီးဃ့ၢ်ကြီ လၢအံၤလၢန့ၣ်လီၤ.
၂၄ နလီၤဂာ် ဒ်သိးဒီး ကသ့ၣ်ယီၤမိၢ်အမံၤတဒုလၢ အအိၣ်ညီနုၢ်လၢ ပှၢ်မုၢ်ကနၢအပူၤ
ဒီးဟးနၢ အဖါအစိလၢ ကလံၤကျါ ဖဲအလူၤဖါ အဆၢကတီၢ်လီၤ.
ဖဲကသ့ၣ်ယီၤမိၢ်အမံၤအံၤ လူၤဖါအဆၢကတီၢ် မတဂၤ တြီအီၤ ကသ့လဲၣ်.
ကသ့ၣ်ယီၤအဖါတဖၣ် တလိၣ်ဃုအီၤ ကီကီခဲခဲဘၣ်.
ဖဲကသ့ၣ်ယီၤမိၢ်အမံၤတဒုအံၤ လူၤအဖါ အဆၢကတီၢ်ဘၣ်အခါ ကသ့ၣ်ယီၤအဖါတဖၣ် ဃုဘၣ်အီၤ ညီညီလီၤ.
၂၅ အံၣ်စရ့လးဧၢ, တဘၣ်မၤလီၤဘှံး နခီၣ်
ဒီးမၤဃ့ထီ နကိာ်ယူၢ်ဘိတဂ့ၤ.
ဘၣ်ဆၣ် နတဲလၢ ‘ယဂုၤကဒါက့ၤလၢလီၢ်ခံ တန့ၢ်လၢၤဘၣ်.+
၂၆ ဒ်တၢ်ဘျၣ်တဂၤ ဒိးန့ၢ်ဘၣ်တၢ်မဲာ်ဆှး ဖဲပှၤထံၣ်ချုးအီၤအခါ အသိး
ပှၤအံၣ်စရ့လးဖိ ဒီးအဝဲသ့ၣ် အစီၤပၤတဖၣ်,
အပဒိၣ်တဖၣ်, အပှၤလုၢ်တၢ်ဒိၣ်တဖၣ် ဒီးအဝံတဖၣ်န့ၣ်
ဒိးန့ၢ်ဘၣ်တၢ်မဲာ်ဆှးလံ.+
၂၇ အဝဲသ့ၣ် ကိးသ့ၣ်လၢ ပါ+
ဒီးအဝဲသ့ၣ် ကိးလၢၢ်လၢ မိလီၤ.
မ့မ့ၢ်ယၤန့ၣ် အဝဲသ့ၣ် ဃၣ်ဒူၣ်ချၢအသး လၢယအိၣ်ဒီး တဃၣ်အမဲာ်လၢ ယအိၣ်ဘၣ်.+
ဒီးဖဲအဝဲသ့ၣ် ဘၣ်နးဘၣ်ဖှီၣ်အခါ အဝဲသ့ၣ် ကတဲယၤလၢ
‘ဂဲၤဆၢထၢၣ် မၤပူၤဖျဲးပှၤသၢၤ.’+
၂၈ အိ ယူဒၤအပှၤဂီၢ်မုၢ်ဧၢ, သုယွၤတဖၣ်န့ၣ် အါထီၣ်ဝဲ ပှဲၤသိးဒီး သုဝ့ၢ် တဖၣ်လံ.+
ခဲအံၤသုယွၤတဖၣ် လၢသုတ့လၢ သုနီၢ်ကစၢ်အဂီၢ်န့ၣ် အိၣ်ဖဲလဲၣ်.+
အဝဲသ့ၣ် မၤပူၤဖျဲးသု ဖဲသုဘၣ်နးဘၣ်ဖှီၣ်အခါ မ့ၢ်သ့န့ၣ် မၢအဂဲၤဆၢထၢၣ် မၤပူၤဖျဲးသုသၢၤ.
၂၉ ‘ဘၣ်မနုၤအဃိ သုဆဲးထီဒါယၤလဲၣ်.
ဘၣ်မနုၤအဃိ သုဝဲခဲလၢာ် ထီဒါက့ၤယၤလဲၣ်.’+ ယၤ, ယဟိဝၤယွၤ တဲဝဲဒ်န့ၣ်လီၤ.
၃၀ သုဖိတဖၣ်န့ၣ် ယတီၢ်အီၤ သနာ်က့ အကဲတၢ်ခီလီလီလီၤ.+
အဝဲသ့ၣ် တတူၢ်လိာ် တၢ်သိၣ်က့ၤ သီက့ၤ နီတစဲးဘၣ်.+
သုမၤသံ သုဝံတဖၣ်လၢ သုနီၢ်ကစၢ် အနး+
လီၤဂာ်ဒ်ခ့ယုၢ်လၢ အသးပှံၢ်ထီၣ်တၢ် တဒုအသိးလီၤ.
၃၁ ယပှၤဂီၢ်မုၢ် ပှၤအံၣ်စရ့လးဖိသ့ၣ်ဧၢ, ဆိကမိၣ်ထံ ယၤ, ယဟိဝၤယွၤ အတၢ်ကတိၤတက့ၢ်.
မ့ၢ်ယလီၤဂာ်ဒီး ပှၢ်မုၢ်ကနၢ တတီၤလၢ သုဂီၢ်ဧါ.
မ့ၢ်ယလီၤဂာ်ဒီး ကီၢ်တဘ့ၣ်လၢ အပှဲၤဒီးတၢ်ခံးဒီး အလီၤပျံၤန့ၣ်ဧါ.
ယပှၤဂီၢ်မုၢ်ဧၢ, သုဝဲသ့ၣ်အံၤ သုတဲလၢ သုကဟးဖဲသုသး
ဒီးသုတဟဲက့ၤလၢ ယအိၣ်လၢၤဘၣ်.+ ဘၣ်မနုၤအဃိ သုတဲ ဒ်န့ၣ်လဲၣ်.
၃၂ မုၣ်ကနီၤတဂၤ သးပ့ၤနီၣ်ကွံာ် အတၢ်ကယၢကယဲတဖၣ်
ဒီးတလးမူးပိာ်မုၣ်တဂၤ သးပ့ၤနီၣ်ကွံာ် အယီၢ်တကိးဃံလၤ ကသ့ဧါ.
ဘၣ်ဆၣ် ယပှၤဂီၢ်မုၢ် သးပ့ၤနီၣ်ကွံာ်ယၤ ဖးယံာ်လံ.+
၃၃ အိ ပိာ်မုၣ်ဧၢ, န* ကဃုတၢ်အဲၣ်အဂီၢ်န့ၣ် နဖၠဲးညါ.
နမၤလိသ့ထီၣ် နသးလၢ တၢ်လၢ အတဂ့ၤဘၣ်တဖၣ်လီၤ.+
၃၄ နကူနကၤန့ၣ် ဘၣ်အၢဒီး ပှၤဖှီၣ်ဖိယာ်ဖိလၢ အတၢ်ကမၣ်တအိၣ်ဘၣ်တဖၣ် အသွံၣ်လီၤ.+
ယတထံၣ် အဝဲသ့ၣ် နုာ်လီၤလၢ နဟံၣ်ပူၤဘၣ်
သနာ်က့ အဝဲသ့ၣ် အသွံၣ်အိၣ်လၢ နတၢ်ကူတၢ်ကၤ ခဲလၢာ် အလိၤလီၤ.+
၃၅ ဘၣ်ဆၣ် နတဲလၢ နတမၤဘၣ် တၢ်ကမၣ်ဘၣ်
အဃိ ကစၢ်ယွၤ တသးဒိၣ်ထီၣ်နၤလၢၤဘၣ်.
မ့ၢ်လၢနတဲလၢ နတၢ်ကမၣ် တအိၣ်ဘၣ်အဃိ
ခဲအံၤ ယကစံၣ်ညီၣ်နၤ သပှၢ်တၢၢ်လီၤ.
၃၆ နတၢ်သးတတီဘၣ်န့ၣ် ဘၣ်မနုၤအဃိ နတပာ်လၢ တၢ်နီတမံၤ ဘၣ်လဲၣ်.
၃၇ ဒီးမ့ၢ်လၢ ယၤ, ယဟိဝၤယွၤ တတူၢ်လိာ်ပှၤလၢ နသန့ၤနသးလၢအီၤတဖၣ်အံၤဘၣ် အဃိ
နကဖီၣ်လီၤ နခိၣ်သၣ်ဃံ ဒီးဟးထီၣ်ဖဲန့ၣ်လၢ တၢ်မဲာ်ဆှးအပူၤလီၤ.+
ပှၤတဖၣ်န့ၣ် တကဲထီၣ် တၢ်မၤစၢၤ လၢနဂီၢ်ဘၣ်.”