ယံးရမံယၤ
၃၂ ဖဲယူဒၤအစီၤပၤ စံးဒကံယၤ ပၢတၢ်အနံၣ် ၁၀ အနံၣ် ဒီးဘၣ်ဖဲ စီၤပၤနဘူၤကးန့စၢ် ပၢတၢ် ၁၈ နံၣ်တနံၣ်န့ၣ် ဝံယံးရမံယၤ ဒိးန့ၢ်ဘၣ် တၢ်ကစီၣ်လၢ ယဟိဝၤယွၤ အအိၣ်လီၤ.+ ၂ ဖဲန့ၣ်အဆၢကတီၢ် ဘၤဘူၤလိၣ်အစီၤပၤ အသုးမုၢ်တဖၣ် ကဝီၤဃာ်ဝဲ ဝ့ၢ်ယရူၤၡလ့ၣ်လီၤ. မ့မ့ၢ် ဝံယံးရမံယၤန့ၣ် ပှၤဖီၣ်ဃာ်အီၤလၢ ပှၤခိးတၢ်ဖိတဖၣ် အကရၢၢ်ပူၤလၢ+ အအိၣ်လၢ ယူဒၤအစီၤပၤ အနီပူၤလီၤ. ၃ ယူဒၤအစီၤပၤ စံးဒကံယၤ ဖီၣ်ဃာ်အီၤ+ ဒီးတဲအီၤလၢ “ဘၣ်မနုၤအဃိ နတဲဆိပာ်စၢၤတၢ် ဒ်အံၤလဲၣ်. နတဲလၢ ‘ယဟိဝၤယွၤ တဲဝဲလၢ အကဟ့ၣ်လီၤကွံာ် ဝ့ၢ်တဖျၢၣ်အံၤလၢ ဘၤဘူၤလိၣ် အစီၤပၤအစုပူၤ ဒီးဘၤဘူၤလိၣ်အစီၤပၤန့ၣ် ကမၤန့ၢ်ဝဲ ဝ့ၢ်အံၤလီၤ.+ ၄ ဒီးယၤ, ယူဒၤအစီၤပၤ စံးဒကံယၤအံၤ တပူၤဖျဲးလၢ ပှၤက့ၤစ့းဖိ အစုပူၤဘၣ်. ယကဘၣ် တၢ်ဟ့ၣ်လီၤကွံာ်ယၤလၢ ဘၤဘူၤလိၣ် အစီၤပၤ အစုပူၤ သပှၢ်တၢၢ် ဒီးယကဘၣ် တဲသကိးတၢ်ဒီး ဘၤဘူၤလိၣ်အစီၤပၤလၢ မဲာ်သကိးမဲာ်လီၤ.’+ ၅ ဒီးနတဲလၢ ယဟိဝၤယွၤ တဲဝဲလၢ ‘ဘၤဘူၤလိၣ်အစီၤပၤ ကက့ၤဖီၣ် ယၤ, စီၤစံးဒကံယၤ လၢဘၤဘူၤလိၣ် ဒီးယကဘၣ်အိၣ်ဖဲန့ၣ် တုၤလၢ ကစၢ်ယွၤ ဆၢတဲာ်လီၤအသးလၢ အကမၤယၤဒ်လဲၣ်န့ၣ်လီၤ. ဒီးပမ့ၢ်ဆဲးဒုး ပှၤက့ၤစ့းဖိ သနာ်က့ ပတမၤနၢၤတၢ်ဘၣ်.’”+
၆ စီၤယံးရမံယၤ တဲဝဲလၢ “ယဟိဝၤယွၤ တဲဘၣ်ယၤလၢ ၇ ‘နတံစီၤၡၤလူၣ် အဖိခွါ စီၤဃနၤန့လး ကဟဲတဲနၤလၢ “နမ့ၢ် ပှၤအဆိကတၢၢ်တဂၤလၢ အအိၣ်ဒီးတၢ်ခွဲးတၢ်ယာ်လၢ ကပှ့ၤက့ၤ ပျီတဘ့ၣ်လၢ ဝ့ၢ်ဧၤနသိးအပူၤအဃိ+ ပှ့ၤက့ၤအီၤလၢ နနီၢ်ကစၢ်အဂီၢ်မီၤ.”’”+
၈ ဒ်ယဟိဝၤယွၤ တဲဝဲအသိး ယတံစီၤၡၤလူၣ် အဖိခွါ စီၤဃနၤန့လး ဟဲလၢယအိၣ်လၢ ပှၤခိးတၢ်ဖိတဖၣ် အကရၢၢ်ပူၤ ဒီးတဲယၤလၢ “နအိၣ်ဒီး တၢ်ခွဲးတၢ်ယာ်လၢ နကမၤန့ၢ် ဒီးပှ့ၤက့ၤ ယတၢ်ပျီတဘ့ၣ် လၢဝ့ၢ်ဧၤနသိးအပူၤ လၢအအိၣ်လၢ ဘံၣ်ယၤမံၣ်အဟီၣ်ကဝီၤလီၤ. အဃိ ဝံသးစူၤ ပှ့ၤက့ၤအီၤလၢ နနီၢ်ကစၢ်အဂီၢ်မီၤ.” ဖဲန့ၣ်အခါ ယသ့ၣ်ညါဘၣ်လၢ ယဟိဝၤယွၤ အဲၣ်ဒိးလၢ ယကမၤဒ်န့ၣ်လီၤ.
၉ အဃိ ယပှ့ၤတၢ်ပျီတဘ့ၣ်လၢ အအိၣ်ဝဲလၢ ဝ့ၢ်ဧၤနသိးအပူၤ လၢယတံအဖိခွါ စီၤဃနၤန့လး အအိၣ်လီၤ. ဒီးယစီၤန့ၢ်အီၤစ့+ ၇ ၡက့လး* ဒီးစ့ညၣ်အဘ့ၣ်တဆံလီၤ. ၁၀ ဒီးယကွဲးနီၣ်ကွဲးဃါတၢ်လၢ လံာ်အုၣ်သးတဘ့ၣ်အပူၤ,+ ဆီၣ်လီၤတၢ်ပနီၣ်လၢအလိၤ, ကိးန့ၢ်ပှၤအုၣ်အသးတဖၣ်+ ဒီးစီၤထီၣ်စ့လၢ စီၤပီၢ်ပူၤလီၤ. ၁၁ ယဟံးန့ၢ် ပှၤပှ့ၤတၢ် အလံာ်အုၣ်သးတဘ့ၣ်လၢ အဘၣ်တၢ်ဆီၣ်လီၤတ့ၢ် တၢ်ပနီၣ်လၢအလိၤ ဒ်တၢ်မၤလိာ် ဒီးပဒိၣ်တၢ်သိၣ်တၢ်သီ အိၣ်ဝဲအသိးလီၤ. ဒီးယဟံးန့ၢ်စ့ၢ်ကီး လံာ်လၢ အတဘၣ်တၢ်ဆီၣ်လီၤတ့ၢ် တၢ်ပနီၣ်လၢအလိၤဘၣ်တဘ့ၣ် ၁၂ ဒီးယဟ့ၣ်လီၤ ပှၤပှ့ၤတၢ်အလံာ်အုၣ်သး တဘ့ၣ်န့ၣ်လၢ စီၤဘၤရူးအအိၣ်+ လၢယတံအဖိခွါ စီၤဃနၤန့လး အမဲာ်ညါ, ပှၤအုၣ်အသးတဖၣ်လၢ အဆဲးလီၤအမံၤလၢ ပှၤပှ့ၤတၢ် အလံာ်အုၣ်သးတဘ့ၣ်အလိၤ အမဲာ်ညါ ဒီးလၢကယဲၢ် ပှၤယူဒၤဖိတဖၣ်လၢ အဆ့ၣ်နီၤလၢ ပှၤခိးတၢ်ဖိတဖၣ် အကရၢၢ်ပူၤ အမဲာ်ညါလီၤ.+ စီၤဘၤရူးန့ၣ် မ့ၢ်ဝဲ စီၤန့ၤရံယၤ+ အဖိခွါ ဒီးစီၤန့ၤရံယၤန့ၣ် မ့ၢ်ဝဲ စီၤမၤစ့ယာ် အဖိခွါလီၤ.
၁၃ ဒီးယမၢလီၤ စီၤဘၤရူး လၢအဝဲသ့ၣ်အမဲာ်ညါ ဒီးတဲအီၤလၢ ၁၄ “တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် အံၣ်စရ့လးအကစၢ်ယွၤန့ၣ် တဲဝဲလၢ ‘ဟံးန့ၢ်လံာ်အုၣ်သးလၢ အဘၣ်တၢ်ဆီၣ်လီၤတ့ၢ် တၢ်ပနီၣ်လၢအလိၤတဘ့ၣ် ဒီးတၢ်တဆီၣ်လီၤတ့ၢ် တၢ်ပနီၣ်လၢအလိၤဘၣ်တဘ့ၣ် ဒီးထၢနုာ်အီၤလၢ သပၢၤဟီၣ်ခိၣ်အပူၤ ဒ်သိးလံာ်အုၣ်သးတဖၣ်အံၤ ကတူၢ်ဖးယံာ်အဂီၢ်တက့ၢ်.’ ၁၅ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် အံၣ်စရ့လးအကစၢ်ယွၤန့ၣ် တဲဝဲလၢ ‘လၢခံန့ၣ် ဟံၣ်တဖၣ်, ပျီတဖၣ် ဒီးစပံးကျီးတဖၣ်န့ၣ် ပှၤကပှ့ၤကဒီးအီၤလၢ ကီၢ်အံၤအပူၤလီၤ.’”+
၁၆ ယဟ့ၣ်လီၤ စီၤန့ၤရံယၤ အဖိခွါ စီၤဘၤရူးလၢ ပှၤပှ့ၤတၢ်အလံာ်အုၣ်သးတဘ့ၣ် ဝံၤအလီၢ်ခံ ယဃ့ထုကဖၣ်လၢ ယဟိဝၤယွၤအအိၣ်လၢ ၁၇ “အိ တၢ်ပၢကစၢ် ယဟိဝၤယွၤဧၢ, နတ့လီၤမူခိၣ် ဒီးဟီၣ်ခိၣ် ခီဖျိနစိနကမီၤလၢအဒိၣ်+ ဒီးနစုလၢအယူာ်ဃီၤအသးလီၤ. တၢ်လၢအကီတလၢ လၢနဂီၢ်န့ၣ် တအိၣ်နီတမံၤဘၣ်. ၁၈ နမ့ၢ်ကစၢ်ယွၤလၢ အပာ်ဖျါထီၣ် တၢ်အဲၣ်လၢအတီလၢ ပှၤလၢအကထိတဖၣ် အဖီခိၣ် ဘၣ်ဆၣ် နပျဲလၢဖိခွါတဖၣ် ကတူၢ်ဘၣ်တၢ်လၢ အပၢ်တဖၣ် အတၢ်ကမၣ်အဃိလီၤ.+ နမ့ၢ်ယွၤလၢ အမ့ၢ်အတီ ဒီးယွၤလၢ အဒိၣ်အထီလၢ အဂံၢ်ဆူၣ်ဘါဆူၣ်တဂၤ ဒီးနမံၤမ့ၢ် တၢ်သုးမုၢ်ဂီၢ်မုၢ်အကစၢ် ယဟိဝၤယွၤလီၤ. ၁၉ နတၢ်တိာ်ပာ်န့ၣ်* လီၤကမၢကမၣ်ဒိၣ်မး ဒီးနမၤတၢ်လၢအဒိၣ်အမုၢ်လီၤ.+ နကွၢ်ပှၤဟီၣ်ခိၣ်ဖိခဲလၢာ် အတၢ်အိၣ်မူအကျဲ+ ဒ်သိးနကဟ့ၣ် အဝဲသ့ၣ်တဂၤစုာ်စုာ် ဒ်အသကဲာ်ပဝး အိၣ်ဝဲအသိး ဒီးဒ်တၢ်လၢ အမၤဝဲအသိးလီၤ.+ ၂၀ နပာ်ဖျါထီၣ် တၢ်ပနီၣ်လီၤလးတဖၣ် ဒီးတၢ်လီၤလးတဖၣ်လၢ ကီၢ်အဲၤကူပတူးအပူၤ ဒီးဘၣ်တၢ်သ့ၣ်ညါအီၤတုၤလၢ တနံၤအံၤလီၤ. အဃိ နမၤဒိၣ်ထီၣ် နမံၤ လၢပှၤအံၣ်စရ့လးဖိအကျါ ဒီးလၢပှၤဟီၣ်ခိၣ်ဖိ ခဲလၢာ်အကျါ+ တုၤလၢ မုၢ်မဆါတနံၤညါအံၤလီၤ. ၂၁ ဒီးနဒုးဟးထီၣ်ကွံာ် နပှၤဂီၢ်မုၢ် ပှၤအံၣ်စရ့လးဖိလၢ တၢ်ပနီၣ်လီၤလးတဖၣ်, တၢ်လီၤလးတဖၣ်, စုလၢအဂံၢ်ဆူၣ်ဘါဆူၣ်, စုလၢအယူာ်ဃီၤအသး ဒီးတၢ်မၤလၢ အလီၤပျံၤ ဒိၣ်ဒိၣ်မုၢ်မုၢ်တဖၣ်လီၤ.+
၂၂ “လၢခံ နဟ့ၣ်လီၤအဝဲသ့ၣ်လၢ ကီၢ်တဘ့ၣ်အံၤလၢ တၢ်နုၢ်ထံ ဒီးကနဲစီယွၤလီၤလၢအပူၤ+ လၢအမ့ၢ် ကီၢ်တဘ့ၣ်လၢ နအၢၣ်လီၤလၢ နကဟ့ၣ် အဝဲသ့ၣ် အမိၢ်ပၢ်ဖံဖု လၢပျၢၤတဖၣ်လီၤ.+ ၂၃ အဝဲသ့ၣ် ဟဲနုာ်လီၤအိၣ်ဝဲလၢအပူၤ ဘၣ်ဆၣ် အဝဲသ့ၣ် တဒိကနၣ် ဒီးအိၣ်မူမၤထွဲ နတၢ်သိၣ်တၢ်သီဘၣ်. တၢ်လၢနမၤလိာ် အဝဲသ့ၣ်န့ၣ် အဝဲသ့ၣ်တမၤထွဲဝဲ နီတမံၤဘၣ်. အဃိ နဒုးလီၤဘၣ် တၢ်နးတၢ်ဖှီၣ်တဖၣ်အံၤ လၢအဝဲသ့ၣ်အလိၤ ခဲလၢာ်လီၤ.+ ၂၄ ပှၤပိာ်ခွါတဖၣ် ဟဲပာ်ပူၣ်ထီၣ်ဟီၣ်ခိၣ် ဒ်သိးကဒုးန့ၢ်ဝ့ၢ် အဂီၢ်လီၤ.+ ဒီးခီဖျိလၢ တၢ်ဒုးတၢ်ယၤ,+ တၢ်သၣ်ဝံၤလီၤဒိ, ဒီးတၢ်ဆါသံသတြိာ်+ အဃိ ဝ့ၢ်တဖျၢၣ်အံၤ ကလီၤဘၣ်လၢ ပှၤက့ၤစ့းဖိလၢ အဟဲထီၣ်ဒုးအီၤတဖၣ်အစုပူၤ သပှၢ်တၢၢ်လီၤ. တၢ်လၢနတဲတဖၣ်န့ၣ် ဟဲကဲထီၣ်အသးခဲလၢာ် ဒ်နထံၣ်ဘၣ် ခဲအံၤအသိးလီၤ. ၂၅ တၢ်ကဟ့ၣ်လီၤကွံာ် ဝ့ၢ်လၢပှၤက့ၤစ့းဖိတဖၣ် အစုပူၤ သပှၢ်တၢၢ် ဘၣ်ဆၣ် တၢ်ပၢကစၢ် ယဟိဝၤယွၤဧၢ, နတဲယၤလၢ ယဘၣ်ပှ့ၤတၢ်ပျီအံၤ လၢယနီၢ်ကစၢ်အဂီၢ် ဒီးကိးန့ၢ် ပှၤအုၣ်အသးတဖၣ်လီၤ.”
၂၆ ဒီးယဟိဝၤယွၤ တဲဘၣ် ဝံယံးရမံယၤလၢ ၂၇ “ယမ့ၢ်ယဟိဝၤယွၤ ဒီးပှၤဟီၣ်ခိၣ်ဖိခဲလၢာ် အကစၢ်ယွၤလီၤ. တၢ်လၢအကီတလၢ လၢယဂီၢ်န့ၣ် အိၣ်တမံၤမံၤဧါ. ၂၈ အဃိ ယၤ, ယဟိဝၤယွၤ တဲဝဲလၢ ‘ယကဟ့ၣ်လီၤ ဝ့ၢ်တဖျၢၣ်အံၤလၢ ပှၤက့ၤစ့းဖိ ဒီးလၢဘၤဘူၤလိၣ်အစီၤပၤ နဘူၤကးန့စၢ်အစုပူၤ ဒီးအကမၤန့ၢ်ဝဲ ဝ့ၢ်အံၤလီၤ.+ ၂၉ ဒီးပှၤက့ၤစ့းဖိလၢ အဒုးဝဲဝ့ၢ်တဖျၢၣ်အံၤန့ၣ် ကဟဲနုာ်လီၤလၢ ဝ့ၢ်ပူၤ ဒီးဒွဲၣ်အူထီၣ်ကွံာ်ဝဲလီၤ.+ ဟံၣ်တဖၣ်လၢ ပှၤလဲၤလုၢ်ထီၣ်တၢ် လၢအခိၣ် လၢဘဧၤလးအအိၣ် ဒီးလူလီၤစပံးထံလၢ ယွၤအဂၤတဖၣ်အအိၣ် လၢကမၤဆါယသး အဂီၢ်န့ၣ် ပှၤက့ၤစ့းဖိ ကဒွဲၣ်အူထီၣ်ကွံာ်ဝဲ စ့ၢ်ကီးလီၤ.’+
၃၀ “ယဟိဝၤယွၤ တဲဝဲလၢ ‘အံၣ်စရ့လး အပှၤဂီၢ်မုၢ် ဒီးယူဒၤ အပှၤဂီၢ်မုၢ် စးထီၣ်လၢ အသးစၢ်လံၤလံၤန့ၣ်+ မၤထဲတၢ်လၢ ယထံၣ်လၢ အအၢလီၤ. အံၣ်စရ့လး အပှၤဂီၢ်မုၢ် မၤဆါယသး ခီဖျိတၢ်လၢအဝဲသ့ၣ် မၤဝဲတဖၣ်အဃိ တလီၢ်လီၢ်လီၤ.’ ၃၁ ‘စးထီၣ်လၢ အဝဲသ့ၣ် သူၣ်ထီၣ်ဝ့ၢ်တဖျၢၣ်အံၤ တုၤလီၤလၢ မုၢ်မဆါ တနံၤအံၤန့ၣ် အိၣ်ဒၣ်ထဲ အမၤသးထီၣ်ယၤ ဒီးမၤဒိၣ်ထီၣ်ယသး+ အဃိ ယကသုးကွံာ်အီၤလၢ ယမဲာ်ညါလီၤ.+ ၃၂ ယကသုးကွံာ်အီၤ မ့ၢ်လၢ အံၣ်စရ့လးအပှၤဂီၢ်မုၢ် ဒီးယူဒၤအပှၤဂီၢ်မုၢ် မၤဝဲတၢ်အၢတၢ်သီဒီဒူၣ် ဒ်သိး ကမၤဆါယသးအဂီၢ်လီၤ. အဝဲသ့ၣ် ကိးဂၤဒဲး ဃုာ်ဒီး အစီၤပၤတဖၣ်မ့ၢ်ဂ့ၤ,+ အပဒိၣ်ဖးဒိၣ်တဖၣ်မ့ၢ်ဂ့ၤ,+ အပှၤလုၢ်တၢ်ဒိၣ်တဖၣ်မ့ၢ်ဂ့ၤ, အဝံတဖၣ်မ့ၢ်ဂ့ၤ,+ ယူဒၤအပှၤပိာ်ခွါတဖၣ်မ့ၢ်ဂ့ၤ ဒီးပှၤအိၣ်လၢ ဝ့ၢ်ယရူၤၡလ့ၣ်တဖၣ်မ့ၢ်ဂ့ၤ မၤသးထီၣ်ယၤခဲလၢာ်လီၤ. ၃၃ အဝဲသ့ၣ် ဃၣ်ဒူၣ်ချၢကွံာ်အသး လၢယအိၣ်တလီၢ်လီၢ် ဒီးတဃၣ်အမဲာ်လၢ ယအိၣ်ဘၣ်.+ ယဂုာ်ကျဲးစၢး သိၣ်လိအဝဲသ့ၣ် တဘျီဝံၤတဘျီ* ဘၣ်ဆၣ် အဝဲသ့ၣ် တဒိကနၣ် ဒီးတူၢ်လိာ် တၢ်သိၣ်က့ၤသီက့ၤ နီတဂၤဘၣ်.+ ၃၄ ဒီးအဝဲသ့ၣ် ဆီလီၤ တၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ်လၢ ဟံၣ်လၢအဘၣ်ထွဲဒီး ယမံၤအပူၤလီၤ. အဝဲသ့ၣ် မၤဝဲဒ်န့ၣ်န့ၣ် ဒ်သိး ကမၤဘၣ်အၢ ဟံၣ်န့ၣ်အဂီၢ်လီၤ.+ ၃၅ တကးဒံးဘၣ် အဝဲသ့ၣ်တ့ထီၣ် တၢ်လီၢ်ထီၣ်ထီတဖၣ်လၢ ဘဧၤလးအဂီၢ် လၢဟံၣ်နိၣ် အတၢ်တြီၤပူၤ*+ ဒ်သိးကလုၢ်ထီၣ် အဖိမုၣ်ဖိခွါတဖၣ်လၢမ့ၣ်အူ ဆူကစၢ်မိလး အအိၣ်လီၤ.+ ယတမၤလိာ်+ ယူဒၤအပှၤဂီၢ်မုၢ် လၢကမၤတၢ်ဒဲးဘး ဒ်အံၤအဂီၢ်ဘၣ်. ဒီးတၢ်လၢအလီၤသးဘၣ်အၢတခါအံၤ တဟဲအိၣ်ထီၣ်လၢ ယသးပူၤနီတဘျီဘၣ်.’*
၃၆ “သုတဲလၢ ဝ့ၢ်တဖျၢၣ်အံၤ တၢ်ကဟ့ၣ်လီၤကွံာ်အီၤလၢ ဘၤဘူၤလိၣ်အစီၤပၤ အစုပူၤ ခီဖျိ တၢ်ဒုးတၢ်ယၤ, တၢ်သၣ်ဝံၤလီၤဒိ ဒီးတၢ်ဆါသံသတြိာ်လီၤ. ဘၣ်ဆၣ် ယၤ, အံၣ်စရ့လး အကစၢ် ယဟိဝၤယွၤ တဲလၢ ၃၇ ‘ပှၤဂီၢ်မုၢ်အံၤလၢ ယမၤလီၤပြံလီၤပြါအီၤ ခီဖျိလၢ ယတၢ်သးထီၣ်, တၢ်သးဒိၣ် ဒီးတၢ်သူၣ်ဒိၣ်သးဖျိး+ အဃိန့ၣ် ယကပာ်ဖှိၣ်ထီၣ်က့ၤအဝဲသ့ၣ် လၢတၢ်လီၢ်ကိးတီၤဒဲး ဒီးယကဟဲက့ၤကိးကဒါက့ၤ အဝဲသ့ၣ်လၢ တၢ်လီၢ်တတီၤအံၤ ဒီးဒုးအိၣ်အဝဲသ့ၣ် ဘံၣ်ဘံၣ်ဘၢဘၢလီၤ.+ ၃၈ အဝဲသ့ၣ် ကကဲထီၣ် ယပှၤဂီၢ်မုၢ် ဒီးယကကဲထီၣ် အဝဲသ့ၣ် အကစၢ်ယွၤလီၤ.+ ၃၉ ဒီးဒ်သိး အဝဲသ့ၣ် ကပျံၤယၤထီဘိအဂီၢ် ယကဟ့ၣ်လီၤအဝဲသ့ၣ်လၢ တၢ်သးတဖျၢၣ်ဃီ+ ဒီးကျဲတဘိဃီလီၤ. ယကမၤဒ်န့ၣ်န့ၣ် မ့ၢ်ဒၣ်လၢ အဝဲသ့ၣ် အနီၢ်ကစၢ်အဘျုးအဂီၢ် ဒီးအဖိအလံၤလၢခံတဖၣ် အဘျုးအဂီၢ်လီၤ.+ ၄၀ ဒီးယကမၤ တၢ်အၢၣ်လီၤအီလီၤ အထူအယိာ်ဒီးအဝဲသ့ၣ်လၢ+ ယတပတုာ် မၤဂ့ၤတၢ်လၢ အဝဲသ့ၣ်အဂီၢ်ဘၣ်.+ တကးဒံးဘၣ် ယကပၢနုာ်လီၤ တၢ်ပျံၤယၤလၢ အဝဲသ့ၣ်အသးပူၤ ဒ်သိးအသု တဃၣ်ကွံာ်အသးလၢ ယအိၣ်တဂ့ၤလီၤ.+ ၄၁ ယကမၤဂ့ၤတၢ်လၢ အဝဲသ့ၣ်အဂီၢ်လၢ တၢ်သးခုအပူၤလီၤ.+ ဒီးယကသူၣ်လီၤ အဝဲသ့ၣ်လၢ ထံကီၢ်တဘ့ၣ်အံၤအပူၤ ကျၢၤကျၢၤ+ လၢယသူၣ်ဒီဖျၢၣ်သးဒီဖျၢၣ်လီၤ.’”
၄၂ “ယဟိဝၤယွၤ တဲဝဲလၢ ‘ဒ်ယဒုးလီၤဘၣ် တၢ်ကီတၢ်ခဲဖးဒိၣ်လၢ ပှၤဂီၢ်မုၢ်တဖၣ်အံၤ အဖီခိၣ်အသိး ယကဒုးလီၤဘၣ်စ့ၢ်ကီး တၢ်ဂ့ၤခဲလၢာ်လၢ ယအၢၣ်လီၤ အဝဲသ့ၣ်လီၤ.+ ၄၃ သုမ့ၢ်တဲလၢ “ကီၢ်တဘ့ၣ်အံၤ ဘၣ်တၢ်ဟ့ၣ်လီၤအီၤလၢ ပှၤက့ၤစ့းဖိ အစုပူၤ ဒီးပှၤကညီ ဒီးဆၣ်ဖိကီၢ်ဖိ တအိၣ်လၢ အပူၤလၢၤဘၣ် အဃိ အမ့ၢ်ကီၢ်တဘ့ၣ်လၢ အအိၣ်သယုၢ်လံ” သနာ်က့ လၢခံန့ၣ် ပျီတဖၣ် လၢအအိၣ်လၢ ကီၢ်တဘ့ၣ်အံၤ အပူၤန့ၣ် ပှၤကပှ့ၤကဒီးအီၤလီၤ.’+
၄၄ “ယဟိဝၤယွၤ တဲဝဲလၢ ‘မ့ၢ်လၢ ယကဟဲက့ၤကိးကဒါက့ၤ အဝဲသ့ၣ်အပှၤလၢ အဘၣ်တၢ်က့ၤဖီၣ်အီၤတဖၣ်အဃိ+ ပှၤကပှ့ၤပျီတဖၣ်, ပှၤကကွဲးနီၣ်ကွဲးဃါ ပှၤပှ့ၤတၢ် အလံာ်အုၣ်သးတဖၣ် ဒီးပှၤကဆီၣ်လီၤဃာ်တၢ်ပနီၣ် လၢလံာ်အုၣ်သးအလိၤလီၤ. ဒီးပှၤကကိးန့ၢ် ပှၤအုၣ်အသးတဖၣ်လၢ ဘံၣ်ယၤမံၣ် အဟီၣ်ကဝီၤပူၤ,+ လၢတၢ်လီၢ်လၢ ဝ့ၢ်ယရူၤၡလ့ၣ် အကပိာ်ကပၤ, လၢယူဒၤ အဝ့ၢ်တဖၣ်အပူၤ,+ လၢဝ့ၢ်တဖၣ်လၢ ကစၢၢ်ကလိအကျါ, လၢဝ့ၢ်တဖၣ်လၢ တၢ်လီၢ်လၢအဖုၣ်+ ဒီးလၢဝ့ၢ်တဖၣ်လၢ ကလံၤထံးတခီလီၤ.’”