ဟိၤၡ့
၉ “အိ အံၣ်စရ့လးဧၢ, သူၣ်ဖှံသးညီတဂ့ၤ.+
သူၣ်ဖှံသးညီ ဒ်သိးဒီး ပှၤကလုာ်ဂၤတဖၣ် အသိးတဂ့ၤ.
သုဃၣ်ကွံာ်သုသးလၢ သုကစၢ်ယွၤအအိၣ် ခီဖျိ သုဆါလီၤအီၣ်သုသး* အဃိလီၤ.+
တၢ်ဆါလီၤအီၣ်သး အဘူးအလဲလၢ သုန့ၢ်ဘၣ်အီၤလၢ ကြဲၢ်ကိးဘ့ၣ်ဒဲး အပူၤန့ၣ် သုဘၣ်သူၣ်ဘၣ်သးအီၤဒိၣ်မး.+
၂ ဘၣ်ဆၣ် ကြဲၢ်ဒီးစပံးထံအကျီးန့ၣ် တဒုးအီၣ်ဒုးအီသုလၢၤဘၣ်.
ဒီးစပံးထံအသီ တအိၣ်ဒီးသု လၢၤဘၣ်.+
၃ သုတဆဲးအိၣ်လၢ ယဟိဝၤယွၤ အကီၢ်ပူၤလၢၤဘၣ်.+
၄ ဒီးအဝဲသ့ၣ် တလူလီၤ စပံးထံလၢ တၢ်လုၢ်ထီၣ်တၢ်လၢ ယဟိဝၤယွၤ အအိၣ်လၢၤဘၣ်.+
အဝဲသ့ၣ် အတၢ်လုၢ်တဖၣ်န့ၣ် တဘၣ် ကစၢ်ယွၤ အသးလၢၤဘၣ်.+
တၢ်လုၢ်တဖၣ်န့ၣ် လီၤဂာ်ဒ်သိးဒီး တၢ်သးအုးအကိၣ်လီၤ.
ဒီးပှၤတဂၤဂ့ၤတဂ့ၤ လၢအအီၣ်ဝဲန့ၣ် ကကဲထီၣ် တၢ်တကဆှီဘၣ်
မ့ၢ်လၢ အဝဲသ့ၣ် အကိၣ်န့ၣ် မ့ၢ်ဒၣ်လၢ အနီၣ်ကစၢ်အဂီၢ်
ဒီးပှၤလဲၤစိာ်အီၤလၢ ယဟိဝၤယွၤ အဟံၣ်ပူၤ တန့ၢ်ဘၣ်အဃိလီၤ.
၅ ဖဲတၢ်ဆၢကတီၢ်တုၤလၢ သုကဘၣ် ပာ်ဖှိၣ်ထီၣ်သုသး
မ့တမ့ၢ် ဖဲယဟိဝၤယွၤ အဘူၣ်ဘၣ်ဝဲအခါန့ၣ် သုကမၤဒ်လဲၣ်.
၆ အဝဲသ့ၣ် ကဘၣ်ဃ့ၢ်ကွံာ် ခီဖျိလၢ တၢ်မၤဟးဂီၤအဃိလီၤ.+
အဲၤကူပတူး ကပာ်ဖှိၣ်ထီၣ်အဝဲသ့ၣ်+ ဒီးကခူၣ်လီၤကွံာ် အဝဲသ့ၣ် ဖဲတၢ်လီၢ်လၢအမ့ၢ် မဲဖ့းန့ၣ်လီၤ.+
လးဆါအထူၣ် ကမဲထီၣ်ဒီး ကဒိၣ်ဘၢကွံာ် အဝဲသ့ၣ် အတၢ်ဖိတၢ်လံၤလၢ အမ့ၢ် စ့ညၣ်လၢ အလုၢ်ဒိၣ်ပှ့ၤဒိၣ်တဖၣ်လီၤ.
သပှီာ်တၤဆှုၣ် ကမဲထီၣ်လၢ အဝဲသ့ၣ် အဒဲတဖၣ်အပူၤလီၤ.
၇ တၢ်သမံသမိးတၢ် အမုၢ်နံၤတဖၣ် ကဟဲဝဲ+
ဒီးတၢ်ဟ့ၣ်ကၣ် အမုၢ်နံၤတဖၣ် ကဟဲဝဲလီၤ.
မ်အံၣ်စရ့လး သ့ၣ်ညါ တၢ်ဂ့ၢ်တခါအံၤတက့ၢ်.
မ့ၢ်လၢ သုတၢ်ကမၣ်တဖၣ် အိၣ်အါဝဲအဃိ တၢ်သးဒိၣ်လၢ သုဖီခိၣ် အိၣ်အါဝဲလီၤ.
ဒီးဖဲန့ၣ်အခါ သုဝံတဖၣ်န့ၣ် ကဖျါဒ်သိးဒီး ပှၤနါစိၤ ဒီးပှၤလၢ အတဲလီၤအသးလၢ အတဲတၢ်လၢ ကစၢ်ယွၤအခၢၣ်စးန့ၣ် ကဖျါဒ်သိးဒီး ပှၤပျုၢ်လီၤ.”
၈ လၢညါန့ၣ် အ့ဖရဲၣ် အပှၤခိးကွၢ်တၢ်ဖိတဖၣ်+ တီဒီးကစၢ်ယွၤလီၤ.+
ဘၣ်ဆၣ် ခဲအံၤ တၢ်လၢဝံတဖၣ် မၤဝဲခဲလၢာ်န့ၣ်+ လီၤဂာ်ဒ်သိးဒီး ပှၤဖီၣ်ထိၣ်ဖိ အပျံၤသကွီၤတဖၣ်လီၤ.
တၢ်သးဟ့ အိၣ်ထီၣ်ဝဲလၢ ကစၢ်ယွၤ အဟံၣ်ပူၤလီၤ.
၉ ဒ်ပှၤလၢအအိၣ်လၢ ဝ့ၢ်ကံဘဧၤ အပူၤ မၤတ့ၢ်ဝဲအသိး အံၣ်စရ့လးအပှၤဂီၢ်မုၢ် မၤတၢ်အၢတၢ်သီ အါမးလီၤ.+
ကစၢ်ယွၤ ကသ့ၣ်နီၣ် အဝဲသ့ၣ် အတၢ်ကမၣ် ဒီးကစံၣ်ညီၣ် အဝဲသ့ၣ် လၢအတၢ်ဒဲးဘး အဃိလီၤ.+
၁၀ ကစၢ်ယွၤတဲဝဲလၢ “လၢညါန့ၣ် ယထံၣ်န့ၢ် အံၣ်စရ့လး ဒ်စပံးသၣ်တဖၣ်လၢ ပှၢ်မုၢ်ကနၢ အသိးလီၤ.+
ဒီးယထံၣ် သုမိၢ်ပၢ်ဖံဖု လၢပျၢၤတဖၣ် ဒ်ချၢဒၢအသၣ်လၢ အသၣ်ထီၣ် အဆိကတၢၢ်လီၤ.
ဘၣ်ဆၣ် အဝဲသ့ၣ် လဲၤလၢ ဘဧၤလးပဧိၢ် အအိၣ်လီၤ.+
အဝဲသ့ၣ် ဟ့ၣ်လီၤအသးလၢ ယွၤလၢ အလီၤသးဘၣ်အၢအအိၣ်+
ဒီးအဝဲသ့ၣ် ကဲထီၣ် တၢ်လီၤသးဘၣ်အၢ ဒ်တၢ်လၢ အဝဲသ့ၣ် ဘူၣ်ထီၣ်ဘါထီၣ်ဝဲ အသိးလီၤ.
၁၁ အ့ဖရဲၣ် အလၤကပီၤ ကယူၤကွံာ် ဒ်သိးဒီး ထိၣ်တဘ့ၣ်လီၤ.
ပှၤပိာ်မုၣ်တဖၣ် တဒၢထီၣ် ဒီးတအိၣ်ဖျဲၣ်ထီၣ်အဖိ နီတဂၤဘၣ်.+
၁၂ အဝဲသ့ၣ် မ့ၢ်ကွၢ်ဒိၣ်ထီၣ်ဘၣ် အဖိသနာ်က့
ယကမၤလီၤမၢ်ကွံာ် အဝဲသ့ၣ် တုၤလၢအတအိၣ်တ့ၢ် နီတဂၤလၢၤဘၣ်.+
နီၢ်ကီၢ်န့ၣ် ဖဲယပာ်တ့ၢ်ကွံာ် အဝဲသ့ၣ်အခါ ကလီၤသးအုး လၢအဝဲသ့ၣ် အဂီၢ်ထဲလဲၣ်.+
၁၃ အ့ဖရဲၣ် လၢအဘၣ်တၢ်သူၣ်လီၤအီၤလၢ တၢ်အီၣ်ဆၣ်အလီၢ်န့ၣ် လီၤဂာ်ဘၣ်ယၤ ဒ်သိးဒီး ဝ့ၢ်စိၢ်လီၤ.+
ဘၣ်ဆၣ် ခဲအံၤန့ၣ် အ့ဖရဲၣ် ကဘၣ်လဲၤဆှၢအဖိခွါတဖၣ် လၢတၢ်ကမၤသံအီၤ အဂီၢ်လီၤ.”
၁၄ အိ ယဟိဝၤယွၤဧၢ, ဟ့ၣ်အဝဲသ့ၣ် တၢ်လၢနကြၢးဟ့ၣ် အဝဲသ့ၣ်တက့ၢ်.
မ်အဝဲသ့ၣ် အဖိလီၤတဲာ် ဒီးအနုၢ်ထံ ဃ့ထီတက့ၢ်.
၁၅ “အဝဲသ့ၣ် မၤတၢ်အၢတၢ်သီခဲလၢာ်လၢ ဝ့ၢ်ကံးလကၤလးအပူၤလီၤ.+ လၢတၢ်ဂ့ၢ်အံၤအဃိ ယစးထီၣ် သးဟ့ အဝဲသ့ၣ်လီၤ.
မ့ၢ်လၢ အဝဲသ့ၣ် အတၢ်မၤလၢ အအၢအသီတဖၣ်အဃိ ယကနီဟးထီၣ်ကွံာ် အဝဲသ့ၣ် လၢယဟံၣ်လီၤ.+
ယတအဲၣ်အဝဲသ့ၣ်လၢၤဘၣ်.+
အဝဲသ့ၣ် အပဒိၣ်တဖၣ်န့ၣ် အခိၣ်ကိၤကိးဂၤဒဲးလီၤ.
၁၆ တၢ်ကကျီကွံာ် အ့ဖရဲၣ်+
ဒီးအဂံၢ်န့ၣ် ကဃ့ထီကွံာ်ဝဲ ဒီးအတသၣ်ထီၣ်ဘၣ် တၤသၣ် နီတစဲးလၢၤဘၣ်.
အဝဲသ့ၣ် မ့ၢ်အိၣ်ဖျဲၣ်ထီၣ်အဖိ သနာ်က့ ယကမၤသံကွံာ် အဖိလၢ အဝဲသ့ၣ် ပာ်လုၢ်ပာ်ပှ့ၤဝဲ တဖၣ်အံၤလီၤ.”
၁၇ မ့ၢ်လၢအဝဲသ့ၣ် တဒိကနၣ် ကစၢ်ယွၤ အကလုၢ်ဘၣ်အဃိ+
ကစၢ်ယွၤ ကပာ်တ့ၢ်ကွံာ် အဝဲသ့ၣ်လီၤ.
ဒီးအဝဲသ့ၣ် ကလီၤမုၢ်ပြံပြါလၢ ပှၤကလုာ်တဖၣ် အကျါလီၤ.+