မၤလကံ

၂ “ပှၤလုၢ်တၢ်ဒိၣ်သ့ၣ်ဧၢ, ခဲအံၤ ယမၤလိာ်သုလၢ+ ၂ သုမ့ၢ်တအဲၣ်ဒိး ဒိကနၣ်ဒီး သုမ့ၢ်တပာ်လီၤသုသးလၢ သုကမၤလၤကပီၤ ယမံၤဘၣ်န့ၣ်​ ယကဒုးဘၣ်သုလၢ တၢ်ဆိၣ်အၢ+ ဒီးသုတၢ်ဆိၣ်ဂ့ၤန့ၣ်​ ယကဒုးကဲထီၣ်က့ၤလၢ တၢ်ဆိၣ်အၢလီၤ.+ မ့ၢ်လၢသုတဒိကနၣ်​ ယတၢ်မၤလိာ်လၢ သုသးဒီဖျၢၣ်ဘၣ်အဃိ တၢ်ဆိၣ်ဂ့ၤတဖၣ်န့ၣ်​ ယဒုးကဲထီၣ်က့ၤလၢ တၢ်ဆိၣ်အၢသပှၢ်တၢၢ်လံ.” တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲဒ်န့ၣ်လီၤ.

၃ “ခီဖျိလၢ တၢ်လၢသုမၤတဖၣ်အဃိ တၢ်ချံလၢ သုဖှံလီၤန့ၣ်​ ယကမၤဟးဂီၤကွံာ်အီၤလီၤ.+ ဖဲသုမၤဘူၣ်တဖၣ်အခါ ဆၣ်ဖိကီၢ်ဖိလၢ သုလုၢ်ထီၣ်အီၤတဖၣ်​ အအ့ၣ်န့ၣ်​ ယကပဲထီၣ်အီၤလၢ သုမဲာ်သၣ်လိၤ ဒီးပှၤကလဲၤတၢၤကွံာ်သုလၢ တၢ်အ့ၣ်အကျါလီၤ.* ၄ အန့ၣ်မး သုကသ့ၣ်ညါလၢ ယဟ့ၣ်လီၤသုတၢ်မၤလိာ်အံၤ ဒ်သိး ယတၢ်အၢၣ်လီၤအီလီၤဒီး စီၤလ့ၤဝံ ကဆဲးအိၣ်ဝဲ အဂီၢ်လီၤ.”+ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲဒ်န့ၣ်လီၤ.

၅ “ခီဖျိလၢ ယတၢ်အၢၣ်လီၤအီလီၤဒီးအီၤအဃိ အဝဲဆဲးအိၣ်မူဝဲ ဒီးအိၣ်ဒီးတၢ်ဃူတၢ်ဖိးလီၤ. တၢ်ဆိၣ်ဂ့ၤတဖၣ်န့ၣ်​ ထိၣ်ဟူးထိၣ်ဂဲၤထီၣ်အီၤလၢ အကပျံၤ* ယၤအဂီၢ်လီၤ. အဝဲပာ်ကဲယၤ ဒီးမၤလၤကပီၤယမံၤ သပှၢ်ကတၢၢ်လီၤ. ၆ အသိၣ်လိ တၢ်သိၣ်တၢ်သီလၢ အမ့ၢ်အတီ+ ဒီးတၢ်လၢ အတတီတလိၤဘၣ်န့ၣ်​ တဟဲထီၣ်လၢ အကိာ်ပူၤဘၣ်. အလဲၤတၢ်ဒီးယၤလၢ တၢ်ဃူတၢ်ဖိး ဒီးတၢ်သူၣ်ဘျၢသးဘျၢအပူၤ+ ဒီးအဃၣ်ယံၤကွံာ် ပှၤအါဂၤလၢ တၢ်အၢတၢ်သီလီၤ. ၇ ပှၤလုၢ်တၢ်ဒိၣ်​ အထးခိၣ်န့ၣ်​ ကဘၣ်သိၣ်လိ ပှၤဂီၢ်မုၢ်လၢ တၢ်သ့ၣ်ညါကစၢ်ယွၤလီၤ. ဒီးမ့ၢ်လၢ ပှၤလုၢ်တၢ်ဒိၣ်န့ၣ်​ မ့ၢ်ဝဲ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ အပှၤစိာ်တၢ်ကစီၣ်ဖိ အဃိ ပှၤဂီၢ်မုၢ် ကြၢးဃုသ့ၣ်ညါ တၢ်သိၣ်တၢ်သီ* လၢအအိၣ်လီၤ.+

၈ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ “မ့မ့ၢ်သုဝဲသ့ၣ်အံၤ သုနီၢ်ကစၢ်ဒၣ်ဝဲ ဃၣ်ကွံာ်သုသးလၢ ကျဲလီၤ. ဘၣ်ဃးဒီး တၢ်သိၣ်တၢ်သီန့ၣ်​ သုမၤလီၤဃံၢ်ပှၤအါဂၤ+ ဒီးသုမၤဟးဂီၤ တၢ်အၢၣ်လီၤအီလီၤလၢ အဘၣ်တၢ်မၤအီၤဒီး စီၤလ့ၤဝံလံ.+ ၉ မ့ၢ်လၢ သုတအိၣ်မူမၤထွဲ ဒ်ယတၢ်ဘၣ်သးအသိးဘၣ်​ ဒီးဖဲသုရဲၣ်ကျဲၤတၢ်ဂ့ၢ်လၢ အဘၣ်ထွဲဒီး ယတၢ်သိၣ်တၢ်သီအခါ သုကွၢ်မဲာ်တၢ်အဃိ ယကမၤဒ်သိး ပှၤဂီၢ်မုၢ်ခဲလၢာ် ကသးဘၣ်အၢသု ဒီးထံၣ်ဆံးသုလီၤ.”+

၁၀ “ပဝဲခဲလၢာ် ပပၢ်အိၣ်ထဲတဂၤတမ့ၢ်ဧီၤ.+ ကစၢ်ယွၤလၢ အတ့လီၤပှၤန့ၣ်​ အိၣ်ထဲတဂၤလီၤ တမ့ၢ်ဧီၤ. အဃိ ဘၣ်မနုၤအဃိ ပတတီလိာ်ပသး တဂၤဒီးတဂၤဘၣ်+ ဒီးမၤဟးဂီၤ* ပမိၢ်ပၢ်ဖံဖုလၢပျၢၤတဖၣ်​ အတၢ်အၢၣ်လီၤအီလီၤန့ၣ်လဲၣ်. ၁၁ ပှၤလၢအအိၣ်လၢ ယူဒၤအဟီၣ်ကဝီၤန့ၣ်​ တအိၣ်ဒီးတၢ်သးတီဘၣ်​ ဒီးမၤတၢ်လၢ အလီၤသးဘၣ်အၢလၢ အံၣ်စရ့လး အဟီၣ်ကဝီၤ ဒီးဝ့ၢ်ယရူၤၡလ့ၣ်အပူၤလီၤ. ပှၤလၢအအိၣ်လၢ ယူဒၤအဟီၣ်ကဝီၤန့ၣ်​ တပာ်ကဲ ယဟိဝၤယွၤ လၢအမ့ၢ် ကစၢ်လၢအအဲၣ်​ တၢ်စီတၢ်ဆှံတဂၤန့ၣ်ဘၣ်.+ ဒီးအဝဲသ့ၣ်​ ဖျီသးဒီး ပိာ်မုၣ်လၢ အဘါထီၣ်​ ယွၤအဂၤလီၤ.+ ၁၂ ပှၤလၢ အအိၣ်လၢ စီၤယၤကိာ်အဒဲတဖၣ်အပူၤ တဂၤဂ့ၤတဂၤဂ့ၤ လၢအမၤဝဲဒ်န့ၣ်န့ၣ်​ အမ့မ့ၢ် ပှၤဒ်လဲၣ်ဂ့ၤ ဒ်လဲၣ်ဂ့ၤ ဒီးအမ့ၢ်လဲၤလုၢ်ထီၣ်​ တၢ်လုၢ်လၢ တၢ်သုးမုၢ်ဂီၢ်မုၢ်အကစၢ် ယဟိဝၤယွၤအအိၣ်​ သနာ်က့ ယဟိဝၤယွၤ ကမၤဟးဂီၤကွံာ်အီၤလီၤ.”+

၁၃ “ခီဖျိလၢ တၢ်အဂၤတမံၤလၢ သုမၤအဃိ ယဟိဝၤယွၤ အတၢ်လုၢ်လီၢ်ပှဲၤဒီး တၢ်မဲာ်ထံမဲာ်နိ, တၢ်ဟီၣ်တၢ်ယၢၤ ဒီးတၢ်ကအုကစွါလီၤ. အဃိ ကစၢ်ယွၤ တတူၢ်လိာ် သုတၢ်လုၢ်လၢၤဘၣ်​ ဒီးအဝဲတဘၣ်သး တၢ်လၢသုဟဲစိာ် နီတမံၤလၢၤဘၣ်.+ ၁၄ ဒီးသုတဲလၢ ‘ဘၣ်မနုၤအဃိလဲၣ်.’ မ့ၢ်လၢ ယဟိဝၤယွၤ ကဲဝဲ ပှၤအုၣ်အသးလၢ အထံၣ်ဝဲလၢ သုတတီဒီးသုမါလၢ အအိၣ်ဒီးသုလၢ သုသးစၢ်အခါ လံၤလံၤဘၣ်​ အဃိလီၤ. သုသးသမူတံၤသကိး လၢအမ့ၢ် သုမါလၢ သုမၤ တၢ်အၢၣ်လီၤအီလီၤဒီးအီၤန့ၣ်​ သုတသးတီဒီးအီၤလၢၤဘၣ်.+ ၁၅ ဘၣ်ဆၣ်​ ပှၤလၢသုကျါတနီၤန့ၣ်​ ကစၢ်ယွၤ အသးစီဆှံ အိၣ်ဒီးအီၤဒံးအဃိ အဝဲသ့ၣ်​ တမၤဝဲဒ်န့ၣ်ဘၣ်. အဝဲသ့ၣ်​ ပာ်လုၢ်ပာ်ပှ့ၤဝဲ မနုၤလဲၣ်. အဝဲသ့ၣ်​ ပာ်လုၢ်ပာ်ပှ့ၤဝဲ ကစၢ်ယွၤ အချံအသၣ်လီၤ. သုဝဲစ့ၢ်ကီး ပလီၢ်သုသး ဘၣ်ဃးဒီး သုတၢ်ပာ်သူၣ်ပာ်သး ဒီးတဘၣ်မၤဟးဂီၤ သုတၢ်သးတီဒီးသုမါလၢ အအိၣ်ဒီးသုလၢ သုသးစၢ်အခါ လံၤလံၤတဂၤန့ၣ်တဂ့ၤ. ၁၆ အံၣ်စရ့လး အကစၢ် ယဟိဝၤယွၤ တဲဝဲလၢ “ယသးဟ့ တၢ်မၤကတၢၢ်ကွံာ် တၢ်ဆီဟံၣ်ဆီဃီ+ ဒီးပှၤလၢ အမၤဆူၣ်မၤစိးတၢ်လီၤ. ပလီၢ်သုသး ဘၣ်ဃးဒီး သုတၢ်ပာ်သူၣ်ပာ်သး ဒီးတဘၣ်မၤဟးဂီၤ သုတၢ်သးတီတဂ့ၤ.”+ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲဒ်န့ၣ်လီၤ.

၁၇ “သုမၤလီၤဘှံး ယဟိဝၤယွၤအသးလၢ သုတၢ်ကတိၤတဖၣ်+ ဘၣ်ဆၣ်​ သုတဲလၢ ‘ပမၤလီၤဘှံးအီၤဒ်လဲၣ်.’ ခီဖျိသုတဲလၢ ‘ပှၤကိးဂၤဒဲးလၢ အမၤတၢ်အၢန့ၣ်​ ယဟိဝၤယွၤ ထံၣ်ဝဲလၢအဂ့ၤ ဒီးကစၢ်ယွၤဘၣ်သူၣ်ဘၣ်သးအီၤ.’+ ဒီးသုတဲစ့ၢ်ကီးလၢ ‘ကစၢ်ယွၤလၢ အစံၣ်ညီၣ်တၢ်တီန့ၣ်​ အိၣ်ဖဲလဲၣ်.’”