မၤတၢ်
၂၅ အဃိ စီၤဖ့စတူး+ ဟဲတုၤလၢကီၢ်ပူၤ ဒီးဟံးထီၣ်မူဒါ သၢသီ ဝံၤအလီၢ်ခံန့ၣ် အဝဲဟးထီၣ်ဖဲ ဝ့ၢ်ကဲၤစါရံၤဒီး လဲၤဝဲလၢ ဝ့ၢ်ယရူၤၡလ့ၣ်လီၤ. ၂ ဒီးပှၤလုၢ်တၢ်ဒိၣ်အခိၣ်တဖၣ် ဒီးပှၤယူဒၤဖိ အပှၤဘၣ်မူဘၣ်ဒါတဖၣ် တဲဖျါထီၣ်န့ၢ်အီၤ တၢ်ဂ့ၢ်တၢ်ကျိၤလၢ အဝဲသ့ၣ် ပာ်ဒ့ၣ်ပာ်ကမၣ် စီၤပီလူးလီၤ.+ ဒီးအဝဲသ့ၣ် ဃ့ကညး စီၤဖ့စတူး ၃ ဒ်သိးကဆှၢလီၤ စီၤပီလူးလၢ ဝ့ၢ်ယရူၤၡလ့ၣ် အပူၤလီၤ. ဘၣ်ဆၣ် အဝဲသ့ၣ် ကူၣ်ထီၣ်ဝဲလၢ ကအိၣ်ခိးပာ်စၢၤ စီၤပီလူး ဒီးမၤသံအီၤလၢ ကျဲလီၤ.+ ၄ ဘၣ်ဆၣ် စီၤဖ့စတူး တဲဆၢဝဲလၢ စီၤပီလူးန့ၣ် ကဘၣ်တၢ်ဖီၣ်ဃာ်ဒံးအီၤလၢ ဝ့ၢ်ကဲၤစါရံၤ ဒီးတယံာ်လၢၤဘၣ်န့ၣ် ယကက့ၤကဒါက့ၤ ဖဲန့ၣ်စ့ၢ်ကီးလီၤ. ၅ ဒီးအဝဲတဲဝဲလၢ “အဝဲမ့ၢ်မၤ တၢ်ကမၣ်တမံၤမံၤ နီၢ်ကီၢ်ကီၢ်န့ၣ် မၢပှၤခိၣ်ပှၤနၢ်လၢ သုကျါ လဲၤလီၤဒီးယၤဒီး ပာ်ဒ့ၣ်ပာ်ကမၣ်အီၤတက့ၢ်.”+
၆ အဃိ အဝဲအိၣ်ဒီး အဝဲသ့ၣ် ဃိးသီ မ့တမ့ၢ် အသီတဆံဃၣ်ဃၣ် ဝံၤဒီးအဝဲ လဲၤလီၤလၢ ဝ့ၢ်ကဲၤစါရံၤ ဒီးလၢခံတနံၤန့ၣ် အဝဲဆ့ၣ်နီၤဝဲလၢ ပှၤစံၣ်ညီၣ်တၢ် အလီၢ်ဆ့ၣ်နီၤ ဒီးမၤလိာ်ဝဲလၢ ပှၤကဟဲကိး စီၤပီလူးလီၤ. ၇ ဖဲစီၤပီလူး ဟဲနုာ်လီၤဝဲအခါ ပှၤယူဒၤဖိလၢ အအိၣ်ဟဲလၢ ဝ့ၢ်ယရူၤၡလ့ၣ်န့ၣ် အိၣ်ဆၢထၢၣ် ဝးတရံးအီၤ ဒီးပာ်တၢ်ကမၣ် ဒိၣ်ဒိၣ်မုၢ်မုၢ် လၢအလိၤအါမံၤ သနာ်က့ တၢ်အုၣ်အသးလၢ အဝဲသ့ၣ် ကပာ်ဖျါထီၣ်ဝဲန့ၣ် တအိၣ်ဘၣ်.+
၈ ဘၣ်ဆၣ် ဒ်သိးစီၤပီလူး ကဒီသဒၢလီၤ အနီၢ်ကစၢ် အသးအဂီၢ် အတဲဝဲလၢ “တၢ်လၢအထီဒါ ပှၤယူဒၤဖိ အတၢ်သိၣ်တၢ်သီမ့ၢ်ဂ့ၤ, တၢ်လုၢ်ဟံၣ်မ့ၢ်ဂ့ၤ, ကဲစၢ်မ့ၢ်ဂ့ၤန့ၣ် ယတမၤအီၤ နီတမံၤဘၣ်.”+ ၉ စီၤဖ့စတူး အဲၣ်ဒိးလၢ ပှၤယူဒၤဖိတဖၣ် ဘၣ်သူၣ်ဘၣ်သးအီၤအဃိ+ အဝဲသံကွၢ် စီၤပီလူးလၢ “မ့ၢ်နအဲၣ်ဒိး လဲၤထီၣ်လၢ ဝ့ၢ်ယရူၤၡလ့ၣ် ဒ်သိး ပှၤကသမံသမိးနၤလၢ ယမဲာ်ညါဘၣ်ဃးဒီး တၢ်ဂ့ၢ်တဖၣ်အံၤဧါ.” ၁၀ ဘၣ်ဆၣ် စီၤပီလူး တဲဝဲလၢ “ယဆၢထၢၣ်လၢ ကဲစၢ်အ ပှၤစံၣ်ညီၣ်တၢ် အလီၢ်ဆ့ၣ်နီၤ အမဲာ်ညါလီၤ. ဒီးပှၤကြၢးစံၣ်ညီၣ်ယၤ ဖဲအံၤလီၤ. ယတမၤကမၣ် ပှၤယူဒၤဖိတဖၣ် နီတမံၤဘၣ်န့ၣ် နသ့ၣ်ညါ ဂ့ၤဂ့ၤလီၤ. ၁၁ ယမ့မ့ၢ် ပှၤလၢအမၤ တၢ်အၢတၢ်သီ ဒီးယမ့ၢ် မၤကမၣ်တၢ်လၢ ယကြၢးသံန့ၣ် ယတဃ့ကညးတၢ် ဒ်သိးယသု တသံတဂ့ၤအဂီၢ်ဘၣ်.+ ဘၣ်ဆၣ် ပှၤတဖၣ်အံၤ ပာ်ဒ့ၣ်ပာ်ကမၣ်ယၤ ဒ်အံၤန့ၣ် မ့တမ့ၢ် အမ့ၢ်အတီဘၣ်န့ၣ် ပှၤတအိၣ်ဒီး အခွဲးလၢ ကဟ့ၣ်လီၤကွံာ်ယၤလၢ အဝဲသ့ၣ်အစုပူၤ ဒ်သိးကမၤမုာ် အဝဲသ့ၣ် အသးအဂီၢ် နီတဂၤဘၣ်. အဃိ ယအဲၣ်ဒိး တီၣ်ထီၣ်တၢ်ဂ့ၢ်လၢ ကဲစၢ်အအိၣ်လီၤ.”+ ၁၂ ဒီးစီၤဖ့စတူး တဲတၢ်ဒီး ပှၤဟ့ၣ်ကူၣ်တၢ်တဖၣ်ဝံၤ တဲဆၢက့ၤဝဲလၢ “မ့ၢ်လၢ နအဲၣ်ဒိး တီၣ်ထီၣ်တၢ်ဂ့ၢ်လၢ ကဲစၢ်အအိၣ် အဃိ နကဘၣ်လဲၤလၢ ကဲစၢ်အအိၣ်လီၤ.”
၁၃ အါနံၤအါသီ ပူၤကွံာ်ဝံၤအလီၢ်ခံ စီၤပၤအကြံးပၤ ဒီးနီၢ်ဘ့ၢ်နံက့ၤ လဲၤတုၤဝဲလၢ ဝ့ၢ်ကဲၤစါရံၤ ဒ်သိး ကဟဲအိၣ်သကိး စီၤဖ့စတူး ဒီးဆၢဂ့ၤဆၢဝါ အီၤအဂီၢ်လီၤ. ၁၄ အဝဲသ့ၣ် အိၣ်ဖဲန့ၣ် တဘျုးသီအဃိ စီၤဖ့စတူးတဲဘၣ် စီၤပၤလၢ စီၤပီလူးအဂ့ၢ် ဒီးတဲဝဲလၢ
“ပှၤလၢ စီၤဖ့လံး ပာ်ဃာ်အီၤလၢ ဃိာ်ပူၤန့ၣ် အိၣ်ဝဲတဂၤလီၤ. ၁၅ ဖဲယအိၣ်လၢ ဝ့ၢ်ယရူၤၡလ့ၣ်အခါ ပှၤလုၢ်တၢ်ဒိၣ် အခိၣ်တဖၣ် ဒီးပှၤယူဒၤဖိ အပှၤသူၣ်က့သးပှၢ်တဖၣ် ဟဲပာ်ဒ့ၣ်ပာ်ကမၣ်အီၤ+ ဒီးမၢယစံၣ်ညီၣ်အီၤလီၤ. ၁၆ ဘၣ်ဆၣ် ယတဲဆၢ အဝဲသ့ၣ်လၢ ပှၤတဂၤဂ့ၤ တဂၤဂ့ၤ မ့ၢ်ဘၣ်တၢ်ပာ်ဒ့ၣ် ပာ်ကမၣ်အီၤန့ၣ် တချုးလၢ အဝဲထံၣ်လိာ်သးဒီး ပှၤလၢ အပာ်ဒ့ၣ်ပာ်ကမၣ် အီၤတဖၣ် လၢမဲာ်သကိးမဲာ် ဒ်သိးအကန့ၢ်ဘၣ် တၢ်ခွဲးတၢ်ယာ်လၢ ကတဲဖျါထီၣ် အဂ့ၢ်လၢ အနီၢ်ကစၢ် ဒံးဘၣ်အခါ ပှၤရိမ့ၤဖိ အတၢ်သိၣ်တၢ်သီ တဟ့ၣ်အခွဲးလၢ ပှၤကဟ့ၣ်လီၤကွံာ်အီၤ ဒ်သိး ကမၤမုာ်ပှၤသး အဂီၢ်ဘၣ်.+ ၁၇ ဒီးဖဲအဝဲသ့ၣ် ဟဲတုၤဖဲအံၤအခါ ယတမၤယံာ်မၤနီၢ် ယသးဘၣ်. အဃိ လၢခံတနံၤန့ၣ် ယဆ့ၣ်နီၤလၢ ပှၤစံၣ်ညီၣ်တၢ် အလီၢ်ဆ့ၣ်နီၤ ဒီးယမၢ ပှၤဟဲကိးအီၤလီၤ. ၁၈ ဒီးအဝဲသ့ၣ် ဂဲၤဆၢထၢၣ်ဒီး ပာ်ဒ့ၣ်ပာ်ကမၣ်အီၤ အါမံၤလီၤ. ဘၣ်ဆၣ် တၢ်အၢတၢ်သီ ဒိၣ်ဒိၣ်မုၢ်မုၢ်လၢ ယဆိကမိၣ်ပာ်စၢၤလၢ အဝဲသ့ၣ် ကပာ်ဒ့ၣ် ပာ်ကမၣ်အီၤန့ၣ် တပၣ် နီတမံၤဘၣ်.+ ၁၉ အိၣ်ဒၣ်ထဲ အဝဲသ့ၣ် တဲအါလိာ်သးဒီးအီၤ ဘၣ်ဃး အဝဲသ့ၣ် အနီၢ်ကစၢ် အတၢ်ဘူၣ်တၢ်ဘါ+ ဒီးပှၤတဂၤလၢ အမံၤမ့ၢ်ယ့ၣ်ၡူး အဂ့ၢ်လီၤ. ဒီးယ့ၣ်ၡူးန့ၣ် အသံလံ ဘၣ်ဆၣ်ထီဘိန့ၣ် စီၤပီလူးတဲဝဲလၢ အမူဝဲလီၤ.+ ၂၀ ဘၣ်ဃးဒီး တၢ်ဂ့ၢ်လိာ်ဘှီလိာ်တခါအံၤ ယကဘၣ် မၤဒ်လဲၣ်န့ၣ် ယတယာ် တဘၣ်ဘၣ်. အဃိ ယသံကွၢ် စီၤပီလူးလၢ ဘၣ်ဃးဒီး အတၢ်ဂ့ၢ်တဖၣ်အံၤန့ၣ် မ့ၢ်အဝဲအဲၣ်ဒိး လဲၤလၢ ဝ့ၢ်ယရူၤၡလ့ၣ် ဒ်သိး ပှၤကသမံသမိးအီၤ ဖဲန့ၣ်ဧါ.+ ၂၁ ဘၣ်ဆၣ် စီၤပီလူး ဃ့ထီၣ်ဝဲလၢ ပှၤကဖီၣ်ဃာ်ဒံးအီၤ တုၤလီၤလၢ ကဲစၢ်ဆၢတဲာ်တၢ် ဝံၤဝဲလီၤ.+ အဃိ ယမၤလိာ်လၢ ပှၤကဖီၣ်ဃာ်အီၤတုၤလၢ ယကြၢးဆှၢအီၤလၢ ကဲစၢ်အအိၣ်လီၤ.”
၂၂ စီၤအကြံးပၤ တဲဘၣ်စီၤဖ့စတူးလၢ “ယအဲၣ်ဒိးနၢ်ဟူ ပှၤတဂၤအံၤ တဲတၢ်လၢ အနီၢ်ကစၢ်လီၤ.”+ စီၤဖ့စတူး တဲဝဲလၢ “ခဲမုၢ်ဆ့ၣ်န့ၣ် နကနၢ်ဟူဘၣ်အီၤလီၤ.” ၂၃ အဃိ လၢခံတနံၤန့ၣ် စီၤအကြံးပၤ ဒီးနီၢ်ဘ့ၢ်နံက့ၤ ဟဲဝဲပှဲၤဒီး တၢ်ကဟုကညီၢ် ဒီးလဲၤနုာ်လီၤဝဲလၢ ကွီၢ်ဘျီၣ်ပူၤ ဃုာ်ဒီး ပှၤသုးဖိ တကထိအခိၣ်တဖၣ် ဒီးပှၤလၢ အမံၤဟူသၣ်ဖျါလၢ ဝ့ၢ်ပူၤလီၤ. ဒီးဖဲစီၤဖ့စတူး ဟ့ၣ်လီၤ တၢ်ကလုၢ်အခါ ပှၤဟဲကိး စီၤပီလူးလီၤ. ၂၄ ဒီးစီၤဖ့စတူး တဲဝဲလၢ “စီၤပၤအကြံးပၤ ဒီးပှၤလၢအအိၣ်ဒီးပှၤ ဖဲအံၤ ခဲလၢာ်သ့ၣ်ဧၢ, ဘၣ်ဃးဒီး ပှၤလၢ သုထံၣ်ဘၣ်အီၤတဂၤအံၤန့ၣ် ပှၤယူဒၤဖိခဲလၢာ် လၢအအိၣ် ဖဲအံၤမ့ၢ်ဂ့ၤ, လၢဝ့ၢ်ယရူၤၡလ့ၣ်မ့ၢ်ဂ့ၤ ဟဲတီၣ်ထီၣ်တၢ်ဂ့ၢ်လၢ ယအိၣ်လီၤ. ဒီးအဝဲသ့ၣ် ကိးပသူထီၣ်လၢ အဝဲတကြၢး အိၣ်မူလၢၤဘၣ်.+ ၂၅ ဘၣ်ဆၣ် ယတထံၣ် ပှၤတဂၤအံၤ မၤဘၣ်တၢ်လၢ အကြၢးသံနီတမံၤဘၣ်.+ အဃိ ဖဲပှၤတဂၤအံၤ တဲဝဲလၢ အအဲၣ်ဒိး တီၣ်ထီၣ်တၢ်ဂ့ၢ်လၢ ကဲစၢ်အအိၣ်အခါ ယဆၢတဲာ်လၢ ယကဆှၢလီၤအီၤလီၤ. ၂၆ ဘၣ်ဃးဒီးအီၤန့ၣ် ယတအိၣ်ဒီး တၢ်ဂ့ၢ်လီၤတံၢ်လီၤဆဲးလၢ ယကကွဲးလံာ်လၢ ယကစၢ်အအိၣ်ဘၣ်. အဃိ ယဟဲကိးအီၤလၢ သုခဲလၢာ်အမဲာ်ညါ ဒီးလီၤဆီဒၣ်တၢ်လၢ နၤ, စီၤပၤအကြံးပၤ အမဲာ်ညါ ဒ်သိး တၢ်သံကွၢ်သံဒိးအီၤ မ့ၢ်ဝံၤန့ၣ် ယကွဲးဖျါထီၣ် တၢ်ဂ့ၢ်တမံၤမံၤ ကသ့အဂီၢ်လီၤ. ၂၇ လၢယတၢ်ထံၣ်န့ၣ် ဖဲပှၤဆှၢလီၤ ပှၤဃိာ်ဖိတဂၤဂၤအခါ ပှၤကဘၣ်ပာ်ဖျါထီၣ်စ့ၢ်ကီး တၢ်ဂ့ၢ်တၢ်ကျိၤလၢ ပှၤပာ်ဒ့ၣ်ပာ်ကမၣ်အီၤလီၤ.”