ယိၤၡူ

၁၁ ဖဲဝ့ၢ်ဃါစိၢ် အစီၤပၤယၤဘံၣ်​ နၢ်ဟူဝဲ ဘၣ်ဃးဒီး တၢ်မၤအသးတဖၣ်အံၤအခါ အဝဲဆှၢလီၤ တၢ်ကစီၣ်ဆူ ဝ့ၢ်မၤဒိၣ်+ အစီၤပၤယိၤဘာ်, ဝ့ၢ်ၡံးမရိၣ်​ အစီၤပၤ, ဝ့ၢ်အးကၡး အစီၤပၤ,+ ၂ စီၤပၤတဖၣ်လၢ အအိၣ်လၢ တၢ်လီၢ်လၢ ကစၢၢ်ကလိကျါ လၢကလံၤစိးတခီ, လၢတၢ်ပၢၤခိၣ်​ လၢအအိၣ်လၢ ကံးန့ၤရ့သး* ကလံၤထံးတခီ, လၢၡ့ဖလၣ်​ ဒီးလၢ ဝ့ၢ်ဒိၢ်အတၢ်လီၤဘံ+ လၢမုၢ်နုာ်တခီ, ၃ ပှၤကနၤဧၣ်ဖိ+ လၢအအိၣ်လၢ မုၢ်ထီၣ်ဒီးမုၢ်နုာ်, ပှၤအမိၢ်ဖိ,+ ပှၤဃ့ၤသးဖိ, ပှၤပရးစၤဖိ, ပှၤယဘူၣ်ဖိ လၢအအိၣ်လၢ ကစၢၢ်ကလိကျါ ဒီးပှၤဃံၤဝံဖိ+ လၢအအိၣ်လၢ ကစၢၢ်ဃ့ရမိၣ်အခီၣ်ထံးလၢ+ မံးစပၤအတၢ်လီၢ်န့ၣ်လီၤ. ၄ အဃိ စီၤပၤတဖၣ်အံၤ ဟဲဝဲဒီး အသုးမုၢ်ခဲလၢာ် လၢအနီၣ်ဂံၢ်အိၣ်ဝဲ အါအါဂီၢ်ဂီၢ် ဒ်မဲးလၢ ပီၣ်လဲၣ်ကၢၢ်နံၤအသိး ဃုာ်ဒီးကသ့ၣ်တဖၣ်​ ဒီးလ့ၣ်ကဟၣ်သုးတဖၣ်​ ဒီဒူၣ်ဒီထၢလီၤ. ၅ ဒီးစီၤပၤတဖၣ်အံၤ အသးလီၤပလိာ်လၢ ကထံၣ်ဖှိၣ်လိာ်အသး ဒီးအဝဲသ့ၣ်​ ဟဲဆီလီၤသကိး အဒဲလၢ မ့ၤရိၣ်အထံထီၣ်ပၢၢ် ဒ်သိးကဒုးဝဲ ပှၤအံၣ်စရ့လးဖိန့ၣ်လီၤ.

၆ ဖဲန့ၣ်အခါ ယဟိဝၤယွၤ တဲစီၤယိၤၡူလၢ “ခဲမုၢ်ဆ့ၣ်​ အဆၢကတီၢ်ဒ်အံၤန့ၣ်​ ယကဟ့ၣ်လီၤ အဝဲသ့ၣ်ကိးဂၤဒဲးလၢ ပှၤအံၣ်စရ့လးဖိအစုပူၤ ဒ်သိးအဝဲသ့ၣ်​ ကဘၣ်တၢ်မၤသံအီၤအဂီၢ်အဃိ တဘၣ်ပျံၤ အဝဲသ့ၣ်တဂ့ၤ.+ သုကဘၣ်မၤတဲာ်ကွံာ် အကသ့ၣ်တဖၣ်​ အခီၣ်ထူၣ်+ ဒီးဒွဲၣ်အူထီၣ်​ အလ့ၣ်ကဟၣ်တဖၣ်​ လၢမ့ၣ်အူလီၤ.” ၇ ဒီးစီၤယိၤၡူ ဒီးအပှၤသုးဖိခဲလၢာ် နုာ်လီၤဒုးအဝဲသ့ၣ်​ သတူၢ်ကလာ် ဖဲမ့ၤရိၣ်အထံထီၣ်ပၢၢ်န့ၣ်လီၤ. ၈ ယဟိဝၤယွၤ ဟ့ၣ်လီၤအဝဲသ့ၣ်​ လၢပှၤအံၣ်စရ့လးဖိ အစုပူၤ+ ဒီးပှၤအံၣ်စရ့လးဖိ မၤနၢၤအဝဲသ့ၣ်​ ဒီးလူၤအဝဲသ့ၣ်​ တုၤလၢ စံဒိၣ်​ လၢအမ့ၢ်ဝ့ၢ်ဖးဒိၣ်,+ မံးစြဖိးမၤယံၣ်+ ဒီးမံးစပၤအတၢ်တြီၤပူၤ လၢမုၢ်ထီၣ်တကပၤလီၤ. ဒီးပှၤအံၣ်စရ့လးဖိ ကျီသံကွံာ် အဝဲသ့ၣ်​ ဒီးတပာ်မူအဝဲသ့ၣ်​ နီတဂၤဘၣ်.+ ၉ စီၤယိၤၡူ မၤအဝဲသ့ၣ်​ ဒ်ယဟိဝၤယွၤ တဲအီၤအသိးလီၤ. စီၤယိၤၡူ မၤတဲာ်ကွံာ်ဝဲ အဝဲသ့ၣ်​ အကသ့ၣ်တဖၣ်​ အခီၣ်ထူၣ်​ ဒီးဒွဲၣ်အူထီၣ်ကွံာ်ဝဲ အလ့ၣ်ကဟၣ်တဖၣ်လီၤ.+

၁၀ ဒီးမ့ၢ်လၢ ဝ့ၢ်ဃါစိၢ် မ့ၢ်ဝ့ၢ်လၢ အရ့ဒိၣ်ကတၢၢ်လၢ ဘီမုၢ်တဖၣ်အံၤ ခဲလၢာ်အကျါအဃိ စီၤယိၤၡူ က့ၤကဒါက့ၤ ဒီးမၤန့ၢ်ဝ့ၢ်ဃါစိၢ် ဒီးကျီသံကွံာ် ဝ့ၢ်ဃါစိၢ် အစီၤပၤလၢနးလီၤ.+ ၁၁ ပှၤအံၣ်စရ့လးဖိ ကျီသံကွံာ် ပှၤလၢဝ့ၢ်ဃါစိၢ်အပူၤ ခဲလၢာ်လၢနး ဒီးမၤဟးဂီၤကွံာ် အဝဲသ့ၣ်လီၤ.+ ဒီးပှၤအံၣ်စရ့လးဖိ တပာ်မူအဝဲသ့ၣ်​ နီတဂၤဘၣ်.+ ဒီးစီၤယိၤၡူ ဒွဲၣ်အူထီၣ်ကွံာ်ဝဲ ဝ့ၢ်ဃါစိၢ်လၢ မ့ၣ်အူလီၤ. ၁၂ စီၤယိၤၡူ မၤန့ၢ်ဝဲ စီၤပၤတဖၣ်အံၤ အဝ့ၢ်ခဲလၢာ် ဒီးကျီသံကွံာ်ဝဲ စီၤပၤခဲလၢာ် လၢနးလီၤ.+ စီၤယိၤၡူ မၤဟးဂီၤကွံာ် အဝဲသ့ၣ်+ ဒ်ယဟိဝၤယွၤ အခ့အပှၤ စီၤမိၤၡ့ မၤလိာ်ပာ်စၢၤဝဲ အသိးလီၤ. ၁၃ ဘၣ်ဆၣ်​ ဝ့ၢ်လၢအအိၣ်လၢ တၢ်လူၢ်ခိၣ်တဖၣ်န့ၣ်​ ပှၤအံၣ်စရ့လးဖိ တဒွဲၣ်အူထီၣ်ဝဲဘၣ်. စီၤယိၤၡူ ဒွဲၣ်အူထီၣ်ထဲ ဝ့ၢ်ဃါစိၢ်တဖျၢၣ်ဧိၤလီၤ. ၁၄ ဝ့ၢ်တဖၣ်အံၤ အတၢ်ဖိတၢ်လံၤ ဒီးအဆၣ်ဖိကီၢ်ဖိ ခဲလၢာ်န့ၣ်​ ပှၤအံၣ်စရ့လးဖိ ဟံးန့ၢ်ဝဲ လၢအဝဲသ့ၣ်​ အနီၢ်ကစၢ်အဂီၢ်လီၤ.+ မ့မ့ၢ်ပှၤကညီန့ၣ်​ အဝဲသ့ၣ်​ ကျီသံကွံာ်ဝဲလၢနး ကိးဂၤဒဲးလီၤ.+ အဝဲသ့ၣ်​ တပာ်မူ ပှၤနီတဂၤဘၣ်.+ ၁၅ ဒ်ယဟိဝၤယွၤ မၤလိာ်ဝဲ အခ့အပှၤ စီၤမိၤၡ့အသိး စီၤမိၤၡ့ မၤလိာ်ဝဲ စီၤယိၤၡူ+ ဒီးစီၤယိၤၡူ မၤဝဲဒ်န့ၣ်လီၤ. တၢ်လၢ ယဟိဝၤယွၤ မၤလိာ်စီၤမိၤၡ့န့ၣ်​ စီၤယိၤၡူ မၤဝဲကိးထံၣ်ဒဲးလီၤ.+

၁၆ စီၤယိၤၡူ မၤန့ၢ်ဟီၣ်ကဝီၤအံၤ, တၢ်လီၢ်လၢ ကစၢၢ်ကလိကျါ, နဲကဲၤခဲလၢာ်,+ ကိၡ့ၣ်အတၢ်လီၢ်ခဲလၢာ်, ၡ့ဖလၣ်,+ ဧၤရဘၤ,+ တၢ်လီၢ်လၢ အံၣ်စရ့လး အကစၢၢ်ကလိကျါ ဒီးအတၢ်ပၢၤခိၣ်, ၁၇ စးထီၣ်လၢ ကစၢၢ်ဃၤလးလၢ အလဲၤထီၣ်ဆူ ကီၢ်စ့ဧၢ် ဒီးတုၤလီၤလၢ ဝ့ၢ်ဘဧၤလးကး+ လၢအအိၣ်လၢ လဘၤနိၣ်အကစၢၢ်ကဆူးအပူၤ ဖဲကစၢၢ်ဃ့ရမိၣ်​ အခီၣ်ထံးလီၤ.+ စီၤယိၤၡူဖီၣ်န့ၢ် အဝဲသ့ၣ်​ အစီၤပၤကိးဂၤဒဲး ဒီးမၤသံအဝဲသ့ၣ်လီၤ. ၁၈ စီၤယိၤၡူ ဘၣ်ဒုးတၢ် ဒီးစီၤပၤတဖၣ်အံၤ ကအိၣ်ဖးယံာ်ဖိညါလီၤ. ၁၉ ဝ့ၢ်လၢ အမၤတၢ်ဃူတၢ်ဖိး ဒီးပှၤအံၣ်စရ့လးဖိန့ၣ်​ တအိၣ်နီတဝ့ၢ်ဘၣ်. အိၣ်ထဲဒၣ်​ ပှၤဃံၤဝံဖိ လၢအအိၣ်လၢ ဝ့ၢ်ကံးဘိၣ်န့ၣ်လီၤ.+ အဃိ ပှၤအံၣ်စရ့လးဖိ မၤနၢၤဝဲ ဝ့ၢ်အဂၤတဖၣ်​ လၢတၢ်ဒုးပူၤ ခဲလၢာ်လီၤ.+ ၂၀ ယဟိဝၤယွၤ ပျဲဝဲလၢ ပှၤတဖၣ်အံၤ အခိၣ်ကကိၤ+ ဒီးကဒုးပှၤအံၣ်စရ့လးဖိ ဒ်သိးကစၢ်ယွၤ ကမၤဟးဂီၤ ပှၤတဖၣ်အံၤအဂီၢ်, မ့ၢ်လၢ ပှၤတဖၣ်အံၤ တကြၢးဒီး အတၢ်သးကညီၤဘၣ်​ အဃိလီၤ.+ ဒ်ယဟိဝၤယွၤ မၤလိာ်ပာ်စၢၤ စီၤမိၤၡ့အသိး အဝဲသ့ၣ်ကဘၣ်​ တၢ်မၤဟးဂီၤကွံာ်အီၤလီၤ.+

၂၁ ဖဲန့ၣ်အခါ စီၤယိၤၡူ မၤဟးဂီၤကွံာ်ဝဲ ပှၤဧနးဖိ+ လၢအအိၣ်လၢ ကစၢၢ်ကလိကျါ, လၢဝ့ၢ်ဃ့ဘြိၣ်, ဝ့ၢ်ဒဘံၢ်, ဝ့ၢ်ဧနာ် ဒီးယူဒၤ အဟီၣ်ကဝီၤ လၢကစၢၢ်ကလိကျါခဲလၢာ် ဒီးလၢအံၣ်စရ့လး အဟီၣ်ကဝီၤ လၢကစၢၢ်ကလိကျါ ခဲလၢာ်န့ၣ်လီၤ. စီၤယိၤၡူ မၤဟးဂီၤကွံာ် အဝဲသ့ၣ်​ ဒီးအဝဲသ့ၣ်အဝ့ၢ်တဖၣ်လီၤ.+ ၂၂ လၢအံၣ်စရ့လး အကီၢ်ပူၤန့ၣ်​ ပှၤဧနးဖိ တအိၣ်တ့ၢ် နီတဂၤလၢၤဘၣ်. အဝဲသ့ၣ်​ အိၣ်တ့ၢ်ထဲလၢ+ ဝ့ၢ်ဂါစၤ,+ ဝ့ၢ်ကၤသး+ ဒီးဝ့ၢ်အၤစဒိာ်အပူၤလီၤ.+ ၂၃ အဃိ စီၤယိၤၡူ ပၢက့ၤဝဲ တၢ်လီၢ်ခဲလၢာ် ဒ်ယဟိဝၤယွၤ အၢၣ်လီၤပာ်စၢၤဝဲ စီၤမိၤၡ့အသိးလီၤ.+ ဒီးစီၤယိၤၡူ ဟ့ၣ်လီၤဝဲတၢ်လီၢ်တဖၣ်အံၤ ဒ်သိး တၢ်ကနီၤဖးလီၤအီၤ လၢပှၤအံၣ်စရ့လးဖိ အဒူၣ်တဖၣ်အအိၣ်​ ဒ်အဝဲသ့ၣ်​ အတၢ်န့ၢ်သါအိၣ်ဝဲအသိးလီၤ.+ ဒီးလၢကီၢ်ပူၤန့ၣ်​ တၢ်ဒုးတအိၣ်လၢၤဘၣ်.+