ယိၤၡူ

၁၄ ပှၤအံၣ်စရ့လးဖိ ဒိးန့ၢ်ဘၣ်ဝဲ တၢ်န့ၢ်သါလၢ ကီၢ်ကနၤဧၣ်အပူၤလီၤ. ပှၤလုၢ်တၢ်ဒိၣ်​ စီၤအလၤဧစၢ်, စီၤနိၣ်​ အဖိခွါ စီၤယိၤၡူ ဒီးအံၣ်စရ့လး အဒူၣ်အခိၣ်အနၢ်တဖၣ်​ ဟ့ၣ်လီၤအဝဲသ့ၣ်​ အတၢ်န့ၢ်သါလီၤ.+ ၂ အဝဲသ့ၣ်​ အတၢ်န့ၢ်သါန့ၣ်​ ဘၣ်တၢ်နီၤလီၤအီၤ ခီဖျိလၢတၢ်ဖး+ ဒ်ယဟိဝၤယွၤ မၤလိာ်ပာ်စၢၤ စီၤမိၤၡ့ လၢပှၤခွံဒူၣ်​ ဒီးဒူၣ်တဝာ် အဂီၢ်အသိးလီၤ.+ ၃ စီၤမိၤၡ့ ဟ့ၣ်ပာ်စၢၤ ပှၤလၢအဂၤခံဒူၣ်​ ဒီးဒူၣ်တဝာ် အတၢ်န့ၢ်သါလၢ ထံကျိယၢ်ဒ့ၣ်​ ဝၢ်ခီလီၤ.+ မ့မ့ၢ်လၢ ပှၤလ့ၤဝံဖိန့ၣ်​ အဝဲတဟ့ၣ်ဝဲ တၢ်န့ၢ်သါဘၣ်.+ ၄ ပှၤခံဒူၣ်​ ဟဲလီၤစၢၤလီၤသွဲၣ်လၢ စီၤယိၤသးလီၤ. အဝဲသ့ၣ်ခံဒူၣ်န့ၣ်+ မ့ၢ်ဝဲ မနၤၡ့ၤ ဒီးအ့ဖရဲၣ်လီၤ.+ တၢ်လီၢ်တၢ်ကျဲလၢ အဝဲသ့ၣ်ဒိးန့ၢ်ဘၣ်ဝဲတဖၣ်န့ၣ်​ အဝဲသ့ၣ်​ တဟ့ၣ်နီၤလီၤဝဲလၢ ပှၤလ့ၤဝံဖိဘၣ်. ဘၣ်ဆၣ်​ အဝဲသ့ၣ်​ ဟ့ၣ်လီၤဝဲ ဝ့ၢ်တဖၣ်+ ဒ်သိးပှၤလ့ၤဝံဖိတဖၣ်​ ကအိၣ်ဝဲအဂီၢ် ဒီးတၢ်ပျီတဖၣ်လၢ အဝဲသ့ၣ်အဆၣ်ဖိကီၢ်ဖိတဖၣ်​ ဒီးအတၢ်ဖိတၢ်လံၤတဖၣ်အဂီၢ်လီၤ.+ ၅ အဃိ ပှၤအံၣ်စရ့လးဖိ နီၤဖးလီၤဝဲ တၢ်လီၢ်တၢ်ကျဲ ဒ်ယဟိဝၤယွၤ မၤလိာ်ပာ်စၢၤ စီၤမိၤၡ့ အသိးလီၤ.

၆ ဒီးပှၤယူဒၤဖိ အပိာ်ခွါတနီၤ ဟဲလၢ စီၤယိၤၡူအအိၣ်​ လၢဝ့ၢ်ကံးလကၤလးန့ၣ်လီၤ.+ လၢအဝဲသ့ၣ်အကျါတဂၤန့ၣ်​ မ့ၢ်ဝဲ ပှၤကနးဖိ စီၤယဖူန့ၤ အဖိခွါ စီၤကၤလ့းလီၤ.+ အဝဲတဲဘၣ်​ စီၤယိၤၡူလၢ “လၢကၤဒ့ၣ်ဘၢ်န့န့ၣ်+ ယဟိဝၤယွၤလၢ+ အမ့ၢ် ယွၤလၢအမ့ၢ်အတီတဂၤ+ တဲဘၣ်အခ့အပှၤစီၤမိၤၡ့ ဘၣ်ဃးဒီး နၤဒီးယၤအဂ့ၢ်ဒ်လဲၣ်န့ၣ်​ နသ့ၣ်ညါဂ့ၤဂ့ၤလီၤ.” ၇ ဖဲပအိၣ်လၢ ကၤဒ့ၣ်ဘၢ်န့အခါ ယဟိဝၤယွၤအခ့အပှၤ စီၤမိၤၡ့ မၢလီၤယၤ ဒ်သိးယက လဲၤကွၢ်ဟုၣ်ကီၢ်လီၤ.+ ဖဲန့ၣ်အခါ ယသးအိၣ်​ အနံၣ်​ ၄၀ လီၤ. ဒီးယဟဲက့ၤတဲဖျါထီၣ်​ တၢ်ဂ့ၢ်တီတီလိၤလိၤ ဒ်တၢ်အိၣ်လၢ ယသးပူၤအသိးလီၤ.+ ၈ ယဒီပုၢ်ဝဲၢ်ခွါလၢ အလဲၤဒီးယၤ ဒ်သိးသိးတဖၣ်​ မၤဟးဂီၤ ပှၤဂီၢ်မုၢ်တဖၣ်အသး ဘၣ်ဆၣ်​ ယဒိကနၣ်​ ယကစၢ် ယဟိဝၤယွၤ လၢယသးဒီဖျၢၣ်ညါလီၤ.+ ၉ ဖဲနံၤအဝဲန့ၣ်​ စီၤမိၤၡ့ အၢၣ်လီၤဝဲလၢ ‘မ့ၢ်လၢနဒိကနၣ်​ ယကစၢ် ယဟိဝၤယွၤ လၢနသးဒီဖျၢၣ်ညါအဃိ တၢ်လီၢ်လၢ နယီၢ်လီၤလၢ နခီၣ်န့ၣ်​ ကကဲထီၣ်​ တၢ်န့ၢ်သါလၢ နၤဒီးနစၢၤနသွဲၣ်တဖၣ်​ အဂီၢ်လီၤ.’+ ၁၀ ဖဲယဟိဝၤယွၤ အၢၣ်လီၤစီၤမိၤၡ့ တၢ်အၢၣ်လီၤအံၤအခါ ပှၤအံၣ်စရ့လးဖိတဖၣ်​ လဲၤတၢ်လၢ ပှၢ်မုၢ်ကနၢအပူၤလီၤ.+ ဒီးဒ်ယဟိဝၤယွၤ အၢၣ်လီၤပာ်စၢၤဝဲအသိး+ အဝဲဒုးမူဒံးယၤန့ၢ်ဝဲ+ ၄၅ နံၣ်လံ. ခဲအံၤန့ၣ်​ ယသးအိၣ်​ ၈၅ နံၣ်လံ. ၁၁ ခဲအံၤ ယဂံၢ်ဆူၣ်ဘါဆူၣ်​ ထဲသိးဒီး မုၢ်နံၤဖဲစီၤမိၤၡ့ ဆှၢလီၤယၤ အခါန့ၣ်လီၤ. ခဲအံၤ ဒ်သိးယကဒုးတၢ်ဒီး ဟံးထီၣ်ဖီၣ်ထီၣ်​ မူဒါလၢအဂၤတဖၣ်အဂီၢ် ယအိၣ်ဒီး တၢ်ဂံၢ်တၢ်ဘါ ထဲသိးဒီးလၢညါလီၤ. ၁၂ အဃိ ဟ့ၣ်ယၤ တၢ်လီၢ်လၢ ကစၢၢ်ကလိအကျါအံၤ လၢယဟိဝၤယွၤ အၢၣ်လီၤပာ်စၢၤဝဲ ဖဲမုၢ်နံၤအဝဲန့ၣ်တက့ၢ်. ဒီးဖဲနံၤအဝဲန့ၣ်​ နနၢ်ဟူဘၣ်လၢ ပှၤဧနးဖိ+ အိၣ်ဝဲဖဲန့ၣ်​ ဒီးအဝဲသ့ၣ်အဝ့ၢ်တဖၣ်​ အိၣ်ဒီး အဒူၣ်လၢအကျၢၤ+ သနာ်က့ ယဟိဝၤယွၤ ကအိၣ်ဒီးယၤ သပှၢ်ကတၢၢ်+ ဒီးယကနီဟးထီၣ်ကွံာ် အဝဲသ့ၣ်​ ဒ်ယဟိဝၤယွၤ အၢၣ်လီၤပာ်စၢၤဝဲ အသိးလီၤ.”+

၁၃ ဒီးစီၤယိၤၡူ ဆိၣ်ဂ့ၤ စီၤယဖူန့ၤ အဖိခွါ စီၤကၤလ့း ဒီးဟ့ၣ်လီၤအီၤလၢ ဝ့ၢ်ဃ့ဘြိၣ်​ ဒ်တၢ်န့ၢ်သါအသိးလီၤ.+ ၁၄ ပှၤကနးဖိ စီၤယဖူန့ၤ အဖိခွါ စီၤကၤလ့းန့ၣ်​ ဒိကနၣ်​ အံၣ်စရ့လး အကစၢ် ယဟိဝၤယွၤ လၢအသးဒီဖျၢၣ်ညါအဃိ ဝ့ၢ်ဃ့ဘြိၣ်​ ကဲထီၣ်ဝဲ အတၢ်န့ၢ်သါ တုၤလၢမုၢ်မဆါတနံၤအံၤလီၤ.+ ၁၅ ဝ့ၢ်ဃ့ဘြိၣ်န့ၣ်​ လၢညါ ပှၤကိးအီၤလၢ ဝ့ၢ်ကံးရယးအၢ်ဘၤ+ (စီၤအၢ်ဘၤန့ၣ်​ မ့ၢ်ဝဲ ပှၤလၢအရ့ဒိၣ်ကတၢၢ်တဂၤလၢ ပှၤဧနးဖိအကျါလီၤ). ဒီးလၢကီၢ်ပူၤန့ၣ်​ တၢ်ဒုးတအိၣ်လၢၤဘၣ်.+