ယိၤၡူ
၁၇ ဒီးဒ်တၢ်ဖး+ လီၤဘၣ်ဝဲအသိး မနၤၡ့ၤအဒူၣ်+ ဒိးန့ၢ်ဘၣ်ဝဲ တၢ်လီၢ်တၢ်ကျဲ ခီဖျိလၢ စီၤမနၤၡ့ၤ မ့ၢ်ဝဲ စီၤယိၤသး အဖိဝဲၢ်ကိအဃိလီၤ.+ ဒီးစီၤမနၤၡ့ၤ အဖိဝဲၢ်ကိ စီၤမၤကံၢ်န့ၣ်+ အဖိခွါမ့ၢ်ဝဲ စီၤကံးလဧးလီၤ. စီၤမၤကံၢ် မ့ၢ်ပှၤဒုးတၢ်ဖၠဲး တဂၤအဃိ အဝဲဒိးန့ၢ်ဘၣ်ဝဲ ကံးလဧး အဟီၣ်ကဝီၤ ဒီးကီၢ်ဘၤၡၣ်လီၤ.+ ၂ ဒီးတၢ်ဖး လီၤဘၣ်ဝဲလၢ စီၤမနၤၡ့ၤ အစၢၤအသွဲၣ်အဂၤတဖၣ်အဂီၢ် ဒီးတၢ်နီၤလီၤ အဝဲသ့ၣ် တၢ်လီၢ်တၢ်ကျဲ ဒ်အဒူၣ်ဖိထၢဖိတဖၣ် အိၣ်ဝဲအသိးလီၤ. ဒီးအဝဲသ့ၣ်န့ၣ် မ့ၢ်ဝဲ စီၤအဘံဧ့စၢ်,+ စီၤဃ့လ့း, စီၤအးစရံၤအ့လး, စီၤၡက့ၣ်, စီၤဃ့ဖ့ၢ် ဒီးစီၤၡမံဒၤ အဖိအလံၤတဖၣ်လီၤ. ဒ်စီၤယိၤသး အဖိခွါ စီၤမနၤၡ့ၤ အဒူၣ်ဖိထၢဖိ အိၣ်ဝဲအသိး, ပှၤပိာ်ခွါတဖၣ်အံၤ မ့ၢ်ဝဲ စီၤမနၤၡ့ၤ အစၢၤအသွဲၣ်လီၤ.+ ၃ မ့မ့ၢ် စီၤစလၤဖဃးန့ၣ်+ အဖိခွါတအိၣ် နီတဂၤဘၣ်. အိၣ်ဝဲထဲ အဖိမုၣ်တဖၣ်လီၤ. ဒီးအဖိမုၣ်တဖၣ် အမံၤမ့ၢ်ဝဲ နီၢ်မၤလၤ, နီၢ်နိဧၤ, နီၢ်ဃၤကလၤ, နီၢ်မံးလကၤ ဒီးနီၢ်တံးရစၢ်လီၤ. စီၤစလၤဖဃးန့ၣ် အပၢ်မ့ၢ်ဝဲ စီၤဃ့ဖ့ၢ်, စီၤဃ့ဖ့ၢ် အပၢ်မ့ၢ်ဝဲ စီၤကံးလဧး, စီၤကံးလဧး အပၢ်မ့ၢ်ဝဲ စီၤမၤကံၢ် ဒီးစီၤမၤကံၢ် အပၢ်မ့ၢ်ဝဲ စီၤမနၤၡ့ၤလီၤ. ၄ ဒီးစီၤစလၤဖဃး အဖိမုၣ်တဖၣ် လဲၤလၢ ပှၤလုၢ်တၢ်ဒိၣ် စီၤအလၤဧစၢ်,+ စီၤနိၣ်အဖိခွါ စီၤယိၤၡူ ဒီးပှၤခိၣ်ပှၤနၢ်တဖၣ် အအိၣ် ဒီးတဲဝဲလၢ “ယဟိဝၤယွၤ မၤလိာ် စီၤမိၤၡ့ လၢအကဟ့ၣ်ပှၤ တၢ်န့ၢ်သါလၢ ပဒီပုၢ်ဝဲၢ်ခွါတဖၣ်အကျါလီၤ.”+ အဃိ ဒ်ယဟိဝၤယွၤ မၤလိာ်ဝဲအသိး အဝဲသ့ၣ် ဒိးန့ၢ်ဘၣ် တၢ်န့ၢ်သါ လၢအပၢ်အဒီပုၢ်ဝဲၢ်ခွါတဖၣ် အကျါလီၤ.+
၅ မနၤၡ့ၤအဒူၣ် ဒိးန့ၢ်ဘၣ်ဝဲ ကံးလဧး အဟီၣ်ကဝီၤ ဒီးကီၢ်ဘၤၡၣ် လၢအအိၣ်လၢ ထံကျိယၢ်ဒ့ၣ် အမုၢ်ထီၣ်တခီလီၤ. တကးဒံးဘၣ် အဝဲသ့ၣ် ဒိးန့ၢ်ဘၣ်အါထီၣ်ဒံး တၢ်လီၢ်တၢ်ကျဲ အတီၤတဆံ,+ ၆ မ့ၢ်လၢ ပှၤပိာ်မုၣ် တဖၣ်လၢ မနၤၡ့ၤအဒူၣ်အကျါ ဒိးန့ၢ်ဘၣ်စ့ၢ်ကီး တၢ်န့ၢ်သါ ဒ်ပှၤပိာ်ခွါတဖၣ် အသိးအဃိလီၤ. ဒီးစီၤမနၤၡ့ၤ အစၢၤအသွဲၣ်အဂၤတဖၣ် ဒိးန့ၢ်ဘၣ်ဝဲ ကံးလဧး အဟီၣ်ကဝီၤလီၤ.
၇ ဒီးမနၤၡ့ၤအဒူၣ် အကီၢ်ဆၢန့ၣ် စးထီၣ်လၢ အၤၡ့ၢ် တုၤလၢ မံးကမသၤ+ လၢအမဲာ်ဃၣ်ဃီၤအသးဆူ ဝ့ၢ်ၡက့ၣ်တခီလီၤ.+ ဒီးကီၢ်ဆၢန့ၣ် ဆဲးလဲၤဝဲလၢ ကလံၤထံးတခီ လၢပှၤဧ့ၣ်တးပူၤဖိတဖၣ် အိၣ်တၢ်အလီၢ်န့ၣ်လီၤ. ၈ ပှၤတးပူၤဖိ အတၢ်လီၢ်န့ၣ်+ ကဲထီၣ်က့ၤဝဲ မနၤၡ့ၤအဒူၣ် အတၢ်လီၢ်လီၤ. ဘၣ်ဆၣ် တးပူၤအဝ့ၢ်လၢ အအိၣ်လၢ မနၤၡ့ၤအဒူၣ် အကီၢ်ဆၢန့ၣ် မ့ၢ်ဝဲ အ့ဖရဲၣ် အစၢၤအသွဲၣ် အတၢ်လီၢ်န့ၣ်လီၤ. ၉ ဒီးကီၢ်ဆၢန့ၣ် လဲၤလီၤတုၤလၢ ကါနၤအတၢ်တြီၤ လၢအအိၣ်လၢ ကလံၤထံးတခီန့ၣ်လီၤ. အ့ဖရဲၣ် အဝ့ၢ်တနီၤအိၣ်ဝဲလၢ မနၤၡ့ၤ အဝ့ၢ်တဖၣ်အကျါလီၤ.+ ဒီးမနၤၡ့ၤအဒူၣ် အကီၢ်ဆၢန့ၣ် အိၣ်ဝဲလၢ တၢ်တြီၤ အကလံၤစိးတခီ ဒီးကတၢၢ်ဝဲဖဲ ပီၣ်လဲၣ်န့ၣ်လီၤ.+ ၁၀ တၢ်လီၢ်လၢ အအိၣ်လၢ ကလံၤထံးတခီန့ၣ် မ့ၢ်ဝဲအ့ဖရဲၣ် အတၢ်, မ့မ့ၢ် တၢ်လီၢ်လၢအအိၣ်လၢ ကလံၤစိးတခီန့ၣ် မ့ၢ်ဝဲ မနၤၡ့ၤအတၢ်လီၤ. ဒီးပီၣ်လဲၣ် မ့ၢ်ဝဲ မနၤၡ့ၤ အကီၢ်ဆၢလီၤ.+ ဒီးမနၤၡ့ၤ အတၢ်လီၢ် လၢကလံၤစိးတခီန့ၣ် လဲၤတုၤလၢ အၤၡ့ၢ်အတၢ်လီၢ် ဒီးလၢမုၢ်ထီၣ်တခီန့ၣ် လဲၤတုၤလၢ ယံးစၣ်ကၢ် အတၢ်လီၢ်လီၤ.
၁၁ လၢယံးစၣ်ကၢ်အဒူၣ် ဒီးအၤၡ့ၢ်အဒူၣ် အဟီၣ်ကဝီၤတဖၣ် အပူၤန့ၣ် မနၤၡ့ၤအဒူၣ် ဒိးန့ၢ်ဘၣ်ဝဲ ဝ့ၢ်ဘ့ၤသၡၣ် ဒီးအဒူသဝီတဖၣ်, ဝ့ၢ်ယံးဘျၣ်+ ဒီးအဒူသဝီတဖၣ်, ပှၤဒိၢ်ဖိ+ အိၣ်တၢ်အလီၢ် ဒီးအဒူသဝီတဖၣ်, ပှၤဧ့ၣ်ဒိၢ်ဖိ+ အိၣ်တၢ်အလီၢ် ဒီးအဒူသဝီတဖၣ်, ပှၤတၤနးဖိ+ အိၣ်တၢ်အလီၢ် ဒီးအဒူသဝီတဖၣ် ဒီးပှၤမကံးဒိၤဖိ အိၣ်တၢ်အလီၢ် ဒီးအဒူသဝီတဖၣ်လီၤ. တၢ်လီၢ်ထီၣ်ထီ သၢတီၤအံၤန့ၣ် မနၤၡ့ၤအဒူၣ် ဒိးန့ၢ်ဘၣ်ဝဲလီၤ.
၁၂ ဘၣ်ဆၣ် ပှၤကနၤဧၣ်ဖိတဖၣ် ဆဲးအိၣ်ဒံးဝဲလၢ ကီၢ်အံၤအပူၤ ဒီးမနၤၡ့ၤ အစၢၤအသွဲၣ်တဖၣ်န့ၣ် မၤန့ၢ်ဝဲ ဝ့ၢ်တဖၣ်အံၤ တန့ၢ်ဘၣ်.+ ၁၃ ဖဲပှၤအံၣ်စရ့လးဖိတဖၣ် အဂံၢ်အဘါဆူၣ်ထီၣ်အခါ အဝဲသ့ၣ် မၢကဲကုၢ်ဝဲ ပှၤကနၤဧၣ်ဖိတဖၣ်+ ဒီးတနီဟးထီၣ်ကွံာ် အဝဲသ့ၣ် ခဲလၢာ်ခဲဆ့ဘၣ်.+
၁၄ စီၤယိၤသး အစၢၤအသွဲၣ် တဲဘၣ် စီၤယိၤၡူလၢ “ယဟိဝၤယွၤ ဆိၣ်ဂ့ၤပှၤ တုၤလၢခဲအံၤ ဒီးပအိၣ်အါအါဂီၢ်ဂီၢ်ညါဒၢး,+ ဘၣ်မနုၤအဃိ နဟ့ၣ်ပှၤ တၢ်လီၢ်ထဲတတီၤဖိလၢ ပတၢ်န့ၢ်သါအဂီၢ်လဲၣ်.”+ ၁၅ စီၤယိၤၡူ တဲဆၢက့ၤ အဝဲသ့ၣ်လၢ “သုမ့ၢ်အိၣ်အါထဲန့ၣ်ညါဒီး အ့ဖရဲၣ်+ အကစၢၢ်ကလိကျါ မ့ၢ်အံၣ်တလၢ လၢသုဂီၢ်န့ၣ် လဲၤထီၣ်လၢပှၢ်ကျါ ဒီးမၤပျီကွံာ် တၢ်လီၢ်တတီၤလၢ အအိၣ်လၢ ပှၤပရးစၤဖိ+ ဒီးပှၤရၤဖၤဖိ+ အဟီၣ်ကဝီၤပူၤတက့ၢ်.” ၁၆ ဒီးစီၤယိၤသး အစၢၤအသွဲၣ် တဲဝဲလၢ “တၢ်လီၢ်တၢ်ကျဲလၢ ကစၢၢ်ကလိကျါန့ၣ် တယၢလၢပဂီၢ်ဒံးဘၣ်. ဒီးပှၤကနၤဧၣ်ဖိ လၢအအိၣ် လၢဘ့ၤသၡၣ်+ ဒီးအဒူသဝီတဖၣ် ဒီးလၢယံးစရ့လး အတၢ်တြီၤန့ၣ်+ အဝဲသ့ၣ် အလ့ၣ်ကဟၣ်သုး+ အိၣ်ဒီးထါဂဲာ်လီၤ.” ၁၇ အဃိ စီၤယိၤၡူ တဲဘၣ်ဝဲ စီၤယိၤသး အစၢၤအသွဲၣ် လၢအမ့ၢ် မနၤၡ့ၤအဒူၣ် ဒီးအ့ဖရဲၣ်အဒူၣ်လၢ “သုအိၣ်အါအါဂီၢ်ဂီၢ် ဒီးသုဂံၢ်ဆူၣ်ဘါဆူၣ်လီၤ. သုတဒိးန့ၢ်ဘၣ် ထဲတၢ်လီၢ်တတီၤအံၤဘၣ်.+ ၁၈ သုကဒိးန့ၢ်ဘၣ်စ့ၢ်ကီး တၢ်လီၢ်လၢ ကစၢၢ်ကလိကျါလီၤ.+ တၢ်လီၢ်ဝဲန့ၣ် ကဲဝဲပှၢ်သနာ်က့ သုကမၤပျီအီၤ ဒီးကကဲထီၣ် သုဟီၣ်ကဝီၤအဆၢလီၤ. ဒီးပှၤကနၤဧၣ်ဖိတဖၣ်န့ၣ် အဂံၢ်အဘါမ့ၢ်ဆူၣ် ဒီးအဝဲသ့ၣ် အလ့ၣ်ကဟၣ်သုး မ့ၢ်အိၣ်ဒီးထါဂဲာ်သနာ်က့ သုကနီဟးထီၣ်ကွံာ် အဝဲသ့ၣ်လီၤ.”+