စံၣ်ညီၣ်ကွီၢ်
၁၉ ဖဲန့ၣ်အဆၢကတီၢ် လၢအံၣ်စရ့လးအပူၤန့ၣ် စီၤပၤတအိၣ် နီတဂၤဘၣ်.+ ဒီးပှၤလ့ၤဝံဖိတဂၤ အိၣ်ဝဲလၢ တၢ်လီၢ်ဖးယံၤလၢ အ့ဖရဲၣ် အကစၢၢ်ကလိကျါလီၤ.+ အဝဲဟံးန့ၢ် ပိာ်မုၣ်တဂၤလၢ ဝ့ၢ်ဘ့ၤသလ့ဃ့ၣ်+ လၢအအိၣ်လၢ ယူဒၤအဟီၣ်ကဝီၤအပူၤ ဒ်အသံၣ်မါ* အသိးလီၤ. ၂ ဘၣ်ဆၣ် အသံၣ်မါ အဲၣ်ဘၢအီၤလီၤ. ဒီးအသံၣ်မါန့ၣ် ပာ်တ့ၢ်ကွံာ်အီၤ ဒီးက့ၤကဒါက့ၤလၢ အပၢ်အဟံၣ် လၢဝ့ၢ်ဘ့ၤသလ့ဃ့ၣ် လၢယူဒၤအဟီၣ်ကဝီၤအပူၤလီၤ. ဒီးအဝဲအိၣ်ဝဲဖဲန့ၣ် လွံၢ်လါလီၤ. ၃ ဒီးအဝၤ လဲၤလူၤက့ၤအီၤ ဒ်သိး ကတဲတၢ်ဒီးအီၤမုာ်မုာ် လၢအကဟဲက့ၤ ဒီးအီၤအဂီၢ်လီၤ. အဝဲလဲၤဃုာ်ဒီး အခ့အပှၤပိာ်ခွါတဂၤ ဒီးအကသ့ၣ်ယီၤခံဒုလီၤ. ဒီးပိာ်မုၣ်န့ၣ် ကိးနုာ်အဝၤလၢ အပၢ်အဟံၣ်ပူၤလီၤ. ဖဲပိာ်မုၣ်အပၢ်န့ၣ် ထံၣ်ဘၣ် အမာ်အခါ အသးခုဒိၣ်မးလီၤ. ၄ ဒီးအမံၤပှၢ်ပိာ်ခွါ လၢအမ့ၢ် ပိာ်မုၣ်အပၢ်န့ၣ် မၢအီၤသပှၢ်တၢၢ်လၢ အကအိၣ်ဒီးအီၤ သၢသီလီၤ. ဒီးအဝဲသ့ၣ် အီၣ်တၢ်ဒီးအီတၢ် ဒီးပိာ်ခွါတဂၤန့ၣ် မံဝဲဖဲန့ၣ်လီၤ.
၅ လၢလွံၢ်သီတသီန့ၣ် အဝဲသ့ၣ် ဂဲၤဆၢထၢၣ်ဂီၤဂီၤ ဒ်သိး အကက့ၤဝဲ အဂီၢ်လီၤ. ဘၣ်ဆၣ် ပိာ်မုၣ်အပၢ် တဲဘၣ် အမာ်လၢ “ဒ်သိးနဂံၢ်ကအိၣ်အဂီၢ် အီၣ်တၢ်တမံၤမံၤ ဝံၤမးက့ၤမီၤ.” ၆ အဃိ အဝဲသ့ၣ်ဆ့ၣ်နီၤ အီၣ်သကိး အီသကိးတၢ်လီၤ. ဝံၤဒီး ပိာ်မုၣ်အပၢ်န့ၣ် တဲဘၣ်အမာ်လၢ “ဝံသးစူၤ အိၣ်ဒံးဖဲအံၤတနၤ ဒီးမၤမုာ်မၤဖှံနသးမီၤ.” ၇ ဒီးဖဲပိာ်ခွါတဂၤန့ၣ် ကက့ၤဝဲအခါ အမံၤပှၢ်ပိာ်ခွါ ဆဲးဃ့ကညးအီၤအဃိ အဝဲအိၣ်ကဒီး တနၤလီၤ.
၈ လၢယဲၢ်သီတသီ ပိာ်ခွါတဂၤန့ၣ် ဂဲၤဆၢထၢၣ်ဂီၤဂီၤ ဒ်သိး အကက့ၤဝဲအဂီၢ်လီၤ. ဒီးပိာ်မုၣ်အပၢ်န့ၣ် တဲဘၣ် အီၤလၢ “ဒ်သိးနဂံၢ်ကအိၣ် အဂီၢ် အီၣ်တၢ်တမံၤမံၤမီၤ.” ဒီးအဝဲသ့ၣ် ထုးယံာ်တၢ်ဆၢကတီၢ် တုၤလၢ မုၢ်ဘူးကဘၣ် ဒီးအဝဲသ့ၣ် ဆဲးအီၣ်သကိးတၢ်လီၤ. ၉ ဖဲပိာ်ခွါတဂၤန့ၣ် ဂဲၤဆၢထၢၣ် ဒ်သိး အကက့ၤဝဲဒီး အသံၣ်မါ ဒီးအခ့အပှၤတဂၤ အခါ အမံၤပှၢ်ပိာ်ခွါ လၢအမ့ၢ် ပိာ်မုၣ်အပၢ်တဂၤန့ၣ် တဲအီၤလၢ “ကွၢ်လၢအံၤ, မုၢ်ဘူးကဟါလံ. ဝံသးစူၤ အိၣ်ဒံးတနၤနီၤ. တၢ်ကခံးလီၤအဃိ အိၣ်ကဒီး ဖဲအံၤတနၤ ဒီးမၤမုာ်မၤဖှံနသးမီၤ. ခဲမုၢ်ဆ့ၣ် နဂဲၤဆၢထၢၣ်ဂီၤဂီၤ ဒီးက့ၤလၢနဟံၣ်* သ့လီၤ.” ၁၀ ဘၣ်ဆၣ် ပိာ်ခွါတဂၤန့ၣ် တအဲၣ်ဒိး အိၣ်ကဒီး တနၤလၢၤဘၣ်. အဃိ အဝဲက့ၤဒီး အသံၣ်မါ, အခ့အပှၤတဂၤ ဒီးအကသ့ၣ်ယီၤခံဒု ဒီးက့ၤဝဲ ပၢၢ်တုၤလၢ ဝ့ၢ်ယဘူၣ် လၢအမ့ၢ် ဝ့ၢ်ယရူၤၡလ့ၣ်လီၤ.+
၁၁ ဖဲတၢ်ဘူးကခံးလီၤအခါ အဝဲသ့ၣ် လဲၤတၢ် ဘူးထီၣ်ဒီး ဝ့ၢ်ယဘူၣ်လီၤ. အဃိ အခ့အပှၤတဂၤန့ၣ် တဲဘၣ်အီၤလၢ “မ့ၢ်ပကဘၣ် အိၣ်ပတုာ်လၢ ပှၤယဘူၣ်ဖိ အဝ့ၢ်တဖျၢၣ်အံၤ ဒီးအိၣ်ဖဲအံၤ တနၤဧါ.” ၁၂ ဘၣ်ဆၣ် အကစၢ် တဲအီၤလၢ “ပတကြၢးအိၣ်ပတုာ်လၢ ပှၤထံဂၤကီၢ်ဂၤဖိ လၢအတမ့ၢ် ပှၤအံၣ်စရ့လးဖိဘၣ်န့ၣ် အဝ့ၢ်ဘၣ်. ပကဆဲးလဲၤ တုၤလၢ ဝ့ၢ်ကံဘဧၤလီၤ.”+ ၁၃ ဒီးအဝဲတဲ အခ့အပှၤတဂၤလၢ “ဟဲမီၤ, ပကဆဲးလဲၤတုၤလၢ ဝ့ၢ်ကံဘဧၤ မ့တမ့ၢ် ဝ့ၢ်ရၤမါ ဒီးပကမံလၢ ဝ့ၢ်ခံဖျၢၣ်န့ၣ် တဖျၢၣ်ဖျၢၣ် အပူၤလီၤ.”+ ၁၄ အဃိ အဝဲသ့ၣ် ဆဲးလဲၤတၢ် ဒီးဖဲအဝဲသ့ၣ် လဲၤဘူးထီၣ်ဒီး ဝ့ၢ်ကံဘဧၤ လၢအအိၣ်လၢ ဘံၣ်ယၤမံၣ်အဟီၣ်ကဝီၤ အခါ မုၢ်လီၤနုာ်ဝဲလီၤ.
၁၅ အဃိ အဝဲသ့ၣ် အိၣ်ပတုာ်ဖဲန့ၣ် ဒီးလဲၤနုာ်လီၤလၢ ဝ့ၢ်ကံဘဧၤ ဒ်သိး အကမံဝဲဖဲန့ၣ် တနၤလီၤ. ဖဲအဝဲသ့ၣ် နုာ်လီၤလၢ ဝ့ၢ်ပူၤအခါ အဝဲသ့ၣ် လဲၤဆ့ၣ်နီၤဝဲလၢ တၢ်ဆါတၢ်ပှ့ၤအလီၢ်လီၤ. ဘၣ်ဆၣ် ပှၤတကိးနုာ် အဝဲသ့ၣ်လၢ အဟံၣ်ပူၤလၢ ကမံဝဲအဂီၢ် နီတဂၤဘၣ်.+ ၁၆ လၢခံ ပှၤသးပှၢ်တဂၤလၢ အမၤတၢ်လၢ စံာ်ပျီပူၤန့ၣ် ဟဲက့ၤဖဲ မုၢ်ဟါလီၤ အဆၢကတီၢ်လီၤ. အဝဲမ့ၢ်ပှၤလၢ အဟဲလၢ အ့ဖရဲၣ် အကစၢၢ်ကလိကျါ+ ဘၣ်ဆၣ် အဝဲလဲၤအိၣ်ဝဲလၢ ဝ့ၢ်ကံဘဧၤအပူၤ တစိၢ်တလီၢ်လီၤ. မ့မ့ၢ်ပှၤဝ့ၢ်ဖိတဖၣ်န့ၣ် မ့ၢ်ဝဲ ပှၤဘံၣ်ယၤမံၣ်ဖိတဖၣ်လီၤ.+ ၁၇ ဖဲပှၤသးပှၢ်တဂၤအံၤ ထံၣ်ဘၣ် ပှၤပိာ်ခွါ လၢအမ့ၢ် ပှၤလဲၤတၢ်က့ၤတၢ်တဂၤန့ၣ် အိၣ်လၢ ဝ့ၢ်အတၢ်ဆါတၢ်ပှ့ၤအလီၢ် အခါ အတဲဝဲလၢ “နဟဲဖဲလဲၣ် ဒီးနကလဲၤဖဲလဲၣ်.” ၁၈ ပှၤပိာ်ခွါတဂၤန့ၣ် တဲဆၢက့ၤဝဲလၢ “ပလဲၤလၢ ဝ့ၢ်ဘ့ၤသလ့ဃ့ၣ် လၢယူဒၤအဟီၣ်ကဝီၤအပူၤလီၤ.+ ခဲအံၤ ပဟဲက့ၤလၢ ဝ့ၢ်ဘ့ၤသလ့ဃ့ၣ် ဒီးပကလဲၤလၢ ယဟိဝၤယွၤ အဟံၣ်လီၤ. လၢခံ ပကက့ၤလၢ ယအိၣ်တၢ်လီၢ် လၢအအိၣ်လၢ တၢ်လီၢ်ဖးယံၤ လၢအ့ဖရဲၣ် အကစၢၢ်ကလိကျါလီၤ. ဘၣ်ဆၣ် ဖဲအံၤန့ၣ် ပှၤတကိးနုာ်ယၤလၢ အဟံၣ်ပူၤ နီတဂၤဘၣ်. ၁၉ လၢပကသ့ၣ်ယီၤတဖၣ် အဂီၢ်န့ၣ် နီၣ်ဒီး အဆၣ်တဖၣ် အိၣ်ဝဲလံ.+ ဒီးမ့မ့ၢ်လၢ ယၤ, ယသံၣ်မါ ဒီးပခ့ပပှၤတဂၤ အဂီၢ်န့ၣ် ကိၣ်ဒီး+ စပံးထံအိၣ်လံ အဃိ ပတလိၣ်ဘၣ် တၢ်အီၣ်တၢ်အီ နီတမံၤဘၣ်.” ၂၀ ဒီးပှၤသးပှၢ်တဂၤန့ၣ် တဲဝဲလၢ “မ်တၢ်ဃူတၢ်ဖိး အိၣ်ဒီးသုတက့ၢ်. သုမ့ၢ်လိၣ်ဘၣ် တၢ်တမံၤမံၤန့ၣ် ယကကွၢ်ကျဲၤန့ၢ်သု. ဘၣ်ဆၣ် တဘၣ် အိၣ်လၢ တၢ်ဆါတၢ်ပှ့ၤအလီၢ် ဒီတနၤကျၢၤတဂ့ၤ.” ၂၁ ဒီးအဝဲက့ၤကိးအီၤလၢ အဟံၣ်ပူၤ ဒီးဟ့ၣ်ဒုးအီၣ် အကသ့ၣ်ယီၤတဖၣ် အဆၣ်လီၤ. ဝံၤဒီး အဝဲသ့ၣ် သ့အခီၣ် ဒီးအီၣ်တၢ်အီတၢ်လီၤ.
၂၂ ဖဲအဝဲသ့ၣ် သူၣ်ဖှံသးညီ အခါ ဝ့ၢ်အပှၤပိာ်ခွါလၢ အအၢအသီတဖၣ် ကဝီၤဃာ်ဝဲဟံၣ် ဒီးအဝဲသ့ၣ် တီၢ်ဝဲပဲတြီလီၤ. ဒီးအဝဲသ့ၣ် တဲဘၣ်ပှၤသးပှၢ် လၢအမ့ၢ် ဟံၣ်ကစၢ်တဂၤန့ၣ်လၢ “ပှၤပိာ်ခွါတဂၤ လၢအလဲၤနုာ် လၢနဟံၣ်ပူၤန့ၣ် ဟဲကိးထီၣ်အီၤ ဒ်သိး ပကမံဃုာ်ဒီးအီၤ တက့ၢ်.”+ ၂၃ ဒီးဟံၣ်ကစၢ်န့ၣ် ဟးထီၣ်လၢဟံၣ်ချၢ ဒီးတဲအဝဲသ့ၣ်လၢ “ယတမၤဘၣ်. ယဒီပုၢ်ဝဲၢ်သ့ၣ်ဧၢ, ဝံသးစူၤ တဘၣ်မၤသုသး အၢအၢသီသီ ဒ်န့ၣ်တဂ့ၤ. ပှၤပိာ်ခွါတဂၤအံၤ အကဲယပှၤတမှံၤလီၤ. တဘၣ်မၤ တၢ်လၢအလီၤမဲာ်ဆှး တခါအံၤတဂ့ၤ. ၂၄ ယဖိမုၣ် လၢအကဲ မုၣ်ကနီၤ ဒီးပိာ်ခွါတဂၤအံၤ အသံၣ်မါ အိၣ်ဖဲအံၤလီၤ. ယကဟဲကိးထီၣ်အဝဲသ့ၣ် ဒီးသုမ့ၢ်ဘၣ်မၤန့ၣ် သုမၤမဲာ်ဆှး အဝဲသ့ၣ်သ့လီၤ.+ ဘၣ်ဆၣ် သုတဘၣ်မၤ ပှၤပိာ်ခွါတဂၤအံၤလၢ တၢ်လၢအလီၤမဲာ်ဆှး တခါအံၤတဂ့ၤ.”
၂၅ ဘၣ်ဆၣ် ပှၤပိာ်ခွါတဖၣ်န့ၣ် တဒိကနၣ် အကလုၢ်ဘၣ်. အဃိ ပှၤလ့ၤဝံဖိတဂၤန့ၣ် ဖီၣ်န့ၢ်အသံၣ်မါ+ ဒီးတွံၢ်ထီၣ်အီၤ လၢတၢ်ချၢ ဆူအဝဲသ့ၣ် အအိၣ်လီၤ. အဝဲသ့ၣ် ဖီၣ်ဆူၣ် ပိာ်မုၣ်တဂၤန့ၣ် ဒီးမၤတရီတပါအီၤ ဒီတနၤညါ တုၤလၢဂီၤခီလီၤ. ဒီးဖဲမုၢ်ဝါထီၣ်အခါ အဝဲသ့ၣ် မၢအက့ၤဝဲလီၤ. ၂၆ လၢဂီၤခီ ဂီၤဂီၤန့ၣ် ပိာ်မုၣ်တဂၤန့ၣ် ဟဲက့ၤလၢ ပှၤသးပှၢ်တဂၤန့ၣ် အဟံၣ် လၢအဝၤ* အိၣ်ဝဲန့ၣ်လီၤ. ဒီးအဝဲလီၤဃံၢ် လၢဟံၣ်မဲာ်ညါ ဒီးမံနီၤဝဲဖဲန့ၣ် တုၤလၢ မုၢ်ဝါထီၣ်လီၤ. ၂၇ လၢဂီၤခီ ဖဲအဝၤ ဂဲၤဆၢထၢၣ်အခါ အဝဲအိးထီၣ်ဝဲ တြဲၤတဖၣ် ဒ်သိး ကဆဲးလဲၤတၢ်အဂီၢ် ဒီးအထံၣ်ဘၣ်ဝဲ ပိာ်မုၣ်လၢအမ့ၢ် အသံၣ်မါတဂၤန့ၣ် မံနီၤလၢ ဟံၣ်အမဲာ်ညါ ဒီးအစုအိၣ်လၢ ဟံၣ်အတြဲၤ ခိၣ်ထိးလီၤ. ၂၈ အဃိ ပိာ်ခွါတဂၤန့ၣ် တဲဘၣ်အသံၣ်မါလၢ “ဂဲၤဆၢထၢၣ်ဟီ. ပကလဲၤတၢ်လီၤ.” ဘၣ်ဆၣ် အသံၣ်မါ တသီၣ်တသဲလၢၤဘၣ်. ဒီးပိာ်ခွါတဂၤန့ၣ် ပာ်ထီၣ်အီၤလၢ ကသ့ၣ်ယီၤအလိၤ ဒီးဟးထီၣ် ဒ်သိး ကက့ၤလၢ အဟံၣ်အဂီၢ်လီၤ.
၂၉ ဖဲအဝဲ က့ၤတုၤလၢဟံၣ်အခါ အဝဲဟံးန့ၢ် ဒီတဘ့ၣ်လီၤ. ဒီးအဝဲ ဟံးထီၣ် အသံၣ်မါအစိၣ် ဒီးဒီၣ်တဲာ်အီၤ ၁၂ ကူာ် ဒီးဆှၢလီၤဝဲ လၢအံၣ်စရ့လး အဟီၣ်ကဝီၤ ကိးဘ့ၣ်ဒဲးအပူၤ တဘ့ၣ်တကူာ် တဘ့ၣ်တကူာ်လီၤ. ၃၀ ပှၤလၢအထံၣ်ဘၣ်ဝဲ ကိးဂၤဒဲးန့ၣ် တဲဝဲလၢ “စးထီၣ်လၢ မုၢ်နံၤလၢ ပှၤအံၣ်စရ့လးဖိ ဟးထီၣ်လၢ ကီၢ်အဲၤကူပတူးအပူၤ တုၤလီၤလၢ မုၢ်မဆါတနံၤအံၤန့ၣ် ပှၤတထံၣ်ဘၣ် တၢ်ကဲထီၣ်အသး ဒ်အံၤနီတဘျီဘၣ်. ဆိကမိၣ်ထံ ဒီးတဲဘၣ်ပှၤ သုတၢ်ထံၣ်+ ဒ်သိးပကသ့ၣ်ညါလၢ ပကဘၣ်မၤဒ်လဲၣ် န့ၣ်တက့ၢ်.”