စံၣ်ညီၣ်ကွီၢ်
၂၁ လၢဝ့ၢ်မံးစပၤန့ၣ်+ ပှၤအံၣ်စရ့လးဖိ မၤပာ်စၢၤတၢ်အၢၣ်လီၤ ဒ်အံၤလီၤ. “ပတဟ့ၣ် ပဖိမုၣ်လၢ ပှၤဘံၣ်ယၤမံၣ်ဖိ ဒ်အမါအသိး နီတဂၤဘၣ်.”+ ၂ အဃိ ပှၤအံၣ်စရ့လးဖိ လဲၤလၢ ဝ့ၢ်ဘ့ၤသ့လး+ ဒီးဆ့ၣ်နီၤဟီၣ်ဝဲဖးဒိၣ်လၢ ယွၤလၢအမ့ၢ်အတီတဂၤ အမဲာ်ညါ တုၤလီၤလၢ မုၢ်ဟါလီၤ န့ၣ်လီၤ. ၃ ဒီးအဝဲသ့ၣ် တဲဝဲလၢ “အိ အံၣ်စရ့လးအကစၢ် ယဟိဝၤယွၤဧၢ, ဘၣ်မနုၤအဃိ တၢ်ကဲထီၣ်အသး လၢအံၣ်စရ့လးအပူၤ ဒ်အံၤလဲၣ်. တနံၤအံၤ လၢအံၣ်စရ့လး အပူၤန့ၣ် ဘၣ်မနုၤအဃိ ပှၤဘၣ်လီၤမၢ် တဒူၣ်လဲၣ်.” ၄ ဒီးလၢခံတသီန့ၣ် ပှၤအံၣ်စရ့လးဖိ ဂဲၤဆၢထၢၣ်ဂီၤဂီၤ ဒီးတ့ထီၣ်ဝဲ တၢ်လုၢ်လီၢ်တခါ လၢဝ့ၢ်ဘ့ၤသ့လး ဒီးလုၢ်ထီၣ်ဝဲ တၢ်လုၢ်ဒွဲၣ်အူ ဒီးတၢ်လုၢ်အိၣ်ဃူအိၣ်ဖိးတဖၣ်လီၤ.+
၅ ပှၤအံၣ်စရ့လးဖိ မၤပာ်စၢၤ တၢ်အၢၣ်လီၤ ဖးဒိၣ်တခါလၢ ပှၤတဂၤဂၤ မ့ၢ်တဟဲထီၣ် လၢယဟိဝၤယွၤ အမဲာ်ညါ လၢဝ့ၢ်မံးစပၤ အပူၤဘၣ်န့ၣ် ပှၤကမၤသံအီၤ သပှၢ်တၢၢ်လီၤ. အဃိ ပှၤအံၣ်စရ့လးဖိ တဲဝဲလၢ “လၢအံၣ်စရ့လး အဒူၣ်ခဲလၢာ် အကျါန့ၣ် ပှၤလၢအတဟဲ ပာ်ဖှိၣ်ထီၣ်အသး လၢယဟိဝၤယွၤ အမဲာ်ညါဘၣ်န့ၣ် မ့ၢ်မတဂၤလဲၣ်.” ၆ ဒီးပှၤအံၣ်စရ့လးဖိ သးအုးဝဲ ခီဖျိလၢ တၢ်မၤအသးဒီး အဒီပုၢ်ဝဲၢ် ပှၤဘံၣ်ယၤမံၣ်ဖိ အဃိလီၤ. ဒီးအဝဲသ့ၣ် တဲဝဲလၢ “တနံၤအံၤ အံၣ်စရ့လးအဒူၣ်တဒူၣ် ဘၣ်တၢ်ဒီၣ်တဲာ် ကွံာ်အီၤလံ. ၇ ခဲအံၤ မ့ၢ်လၢ ပမၤပာ်စၢၤ တၢ်အၢၣ်လီၤ လၢယဟိဝၤယွၤ အမဲာ်ညါလၢ+ ပတဟ့ၣ် ပဖိမုၣ်လၢ ပှၤဘံၣ်ယၤမံၣ်ဖိ ဒ်အမါအသိး နီတဂၤဘၣ်အဃိ+ ဒ်သိး ပှၤဘံၣ်ယၤမံၣ်ဖိ လၢအအိၣ်တ့ၢ်ဒံးတဖၣ် ကန့ၢ်အမါအဂီၢ် ပကဘၣ်မၤဒ်လဲၣ်.”
၈ အဝဲသ့ၣ် သံကွၢ်ဝဲလၢ “လၢအံၣ်စရ့လး အဒူၣ်တဖၣ် အကျါန့ၣ် ပှၤလၢအတဟဲထီၣ်လၢ ယဟိဝၤယွၤအမဲာ်ညါ ဖဲဝ့ၢ်မံးစပၤဘၣ်န့ၣ်+ မ့ၢ်မတၤတဖၣ်လဲၣ်.” ဒီးအဝဲသ့ၣ် ထံၣ်ဘၣ်ဝဲလၢ ပှၤလၢအအိၣ်လၢ ယၤဘ့ၣ်ကံးလဧး အပူၤန့ၣ် တဟဲတုၤလၢ ပှၤဂီၢ်မုၢ် အိၣ်ဖှိၣ်ဝဲအလီၢ် နီတဂၤဘၣ်, ၉ မ့ၢ်လၢ ဖဲပှၤဂံၢ်ဝဲ ပှၤအံၣ်စရ့လးဖိ အနီၣ်ဂံၢ်အခါ အဝဲသ့ၣ် ထံၣ်ဘၣ်ဝဲလၢ ပှၤလၢအအိၣ်လၢ ယၤဘ့ၣ်ကံးလဧး အပူၤန့ၣ် တအိၣ်ဖဲန့ၣ် နီတဂၤဘၣ်. ၁၀ အဃိ ပှၤဂီၢ်မုၢ် အတၢ်အိၣ်ဖှိၣ် ဆှၢလီၤဝဲ ပှၤပိာ်ခွါလၢ အဂံၢ်ဆူၣ်ဘါဆူၣ် ကတၢၢ် အဂၤ ၁၂,၀၀၀ လၢတၢ်လီၢ်ဖဲန့ၣ်လီၤ. ဒီးပှၤဂီၢ်မုၢ် အတၢ်အိၣ်ဖှိၣ် မၤလိာ် အဝဲသ့ၣ်လၢ “ပှၤလၢအအိၣ်လၢ ယၤဘ့ၣ်ကံးလဧးအပူၤ ဃုာ်ဒီး ပိာ်မုၣ်မ့ၢ်ဂ့ၤ, ဖိသၣ်မ့ၢ်ဂ့ၤ လဲၤမၤသံကွံာ် အဝဲသ့ၣ်ခဲလၢာ် လၢနးတက့ၢ်.+ ၁၁ ဒီးသုကဘၣ်မၤ ဒ်အံၤလီၤ. မၤသံကွံာ် ပှၤပိာ်ခွါကိးဂၤဒဲး ဒီးပှၤပိာ်မုၣ်ခဲလၢာ် လၢအမံဃုာ်ဘၣ်ဒီး ပှၤပိာ်ခွါ တက့ၢ်.” ၁၂ လၢပှၤလၢအအိၣ်လၢ ယၤဘ့ၣ်ကံးလဧး အကျါန့ၣ် အံၣ်စရ့လးသုးဖိ ထံၣ်ဘၣ်ဝဲ ပှၤမုၣ်ကနီၤ လၢအတမံဃုာ်ဒီး ပှၤပိာ်ခွါ နီတဘျီဒံးဘၣ် အဂၤ ၄၀၀ လီၤ. အဃိ အဝဲသ့ၣ် ဟဲက့ၤကိး မုၣ်ကနီၤတဖၣ်န့ၣ်လၢ ဒဲကဝီၤအပူၤ လၢဝ့ၢ်ၡံလိၤ+ လၢအအိၣ်လၢ ကီၢ်ကနၤဧၣ်လီၤ.
၁၃ ဒီးပှၤဂီၢ်မုၢ် အတၢ်အိၣ်ဖှိၣ်ဒီဖုန့ၣ် ဆှၢလီၤတၢ်ကစီၣ်လၢ ပှၤဘံၣ်ယၤမံၣ်ဖိ လၢအအိၣ်လၢ လ့ရံးမိၣ်+ အအိၣ် ဒ်သိး ကဟ့ၣ်အဝဲသ့ၣ် အခွဲးလၢ အကမၤတၢ်ဃူတၢ်ဖိး အဂီၢ်လီၤ. ၁၄ အဃိ ဖဲန့ၣ်အခါ ပှၤဘံၣ်ယၤမံၣ်ဖိ ဟဲက့ၤဝဲလီၤ. ဒီးပှၤပိာ်မုၣ်လၢ အအိၣ်ဟဲလၢ ယၤဘ့ၣ်ကံးလဧး+ လၢပှၤအံၣ်စရ့လးဖိ ပာ်မူဝဲတဖၣ်န့ၣ် ပှၤအံၣ်စရ့လးဖိ ဟ့ၣ်လီၤဝဲ ပှၤဘံၣ်ယၤမံၣ်ဖိလီၤ. ဘၣ်ဆၣ် တယၢလၢ ပှၤဘံၣ်ယၤမံၣ်ဖိ အဂီၢ်ဘၣ်. ၁၅ ဒီးပှၤအံၣ်စရ့လးဖိ သးအုးဝဲ ခီဖျိလၢ တၢ်မၤတ့ၢ်အသးဒီး ပှၤဘံၣ်ယၤမံၣ်ဖိအဃိ,+ မ့ၢ်လၢ ယဟိဝၤယွၤ ဒုးအိၣ်ထီၣ် တၢ်လီၤမုၢ်လီၤဖးလၢ ပှၤအံၣ်စရ့လးဖိ အဒူၣ်တဖၣ် အကျါအဃိလီၤ. ၁၆ တၢ်အိၣ်ဖှိၣ် အပှၤသူၣ်က့သးပှၢ်တဖၣ် တဲဝဲလၢ “ပိာ်မုၣ်လၢ ဘံၣ်ယၤမံၣ်အဒူၣ်အကျါ သံလၢာ်လံ. အဃိ ဒ်သိး ပှၤပိာ်ခွါလၢ အအိၣ်တ့ၢ်ဒံးတဖၣ် ကန့ၢ်အမါအဂီၢ် ပကဘၣ်မၤဒ်လဲၣ်.” ၁၇ အဝဲသ့ၣ် တဲဆၢဝဲလၢ “ဒ်သိး အံၣ်စရ့လး အဒူၣ်တဒူၣ် သုတလီၤမၢ်တဂ့ၤအဂီၢ် လၢဘံၣ်ယၤမံၣ်အဒူၣ်ကျါန့ၣ် ပှၤလၢအပူၤဖျဲးတဖၣ် အတၢ်န့ၢ်သါ ကဘၣ်ဆဲးအိၣ်ဒံးလီၤ. ၁၈ ဘၣ်ဆၣ် ပဟ့ၣ်ပဖိမုၣ် လၢပှၤဘံၣ်ယၤမံၣ်ဖိ ဒ်အမါအသိး တန့ၢ်ဘၣ်, မ့ၢ်လၢ ပှၤအံၣ်စရ့လးဖိ အၢၣ်လီၤဝဲလၢ ‘ပှၤတဂၤဂၤလၢ အဟ့ၣ် ပှၤဘံၣ်ယၤမံၣ်ဖိ အမါန့ၣ် မ်အဘၣ် တၢ်ဆိၣ်အၢတက့ၢ်.’”+
၁၉ ဝံၤဒီး အဝဲသ့ၣ်တဲဝဲလၢ “လၢဝ့ၢ်ၡံလိၤအပူၤန့ၣ် ယဟိဝၤယွၤအဘူၣ် ဘၣ်ဝဲတနံၣ်တဘျီလီၤ. ဒီးဝ့ၢ်ၡံလိၤန့ၣ်+ အိၣ်ဝဲလၢ ဝ့ၢ်ဘ့ၤသ့လး အကလံၤစိးတခီ, လၢကျဲမုၢ် လၢအလဲၤထီၣ်လၢ ဝ့ၢ်ဘ့ၤသ့လး တုၤလၢ ဝ့ၢ်ၡက့ၣ်န့ၣ် အမုၢ်ထီၣ်တခီ ဒီးလၢလဘိနၤ အကလံၤထံးတခီန့ၣ်လီၤ. ၂၀ အဃိ အဝဲသ့ၣ် မၤလိာ်ဝဲ ပှၤဘံၣ်ယၤမံၣ်ဖိလၢ “လဲၤခိးခူသူၣ်တၢ်လၢ စပံးကျီးတဖၣ် အပူၤတက့ၢ်. ၂၁ ဒီးဖဲသုထံၣ်ဘၣ် ပိာ်မုၣ်သးစၢ်တဖၣ် လၢအအိၣ်လၢ ဝ့ၢ်ၡံလိၤအပူၤ ဟဲထီၣ်ဂဲၤကလံၣ် အခါန့ၣ် သုကဘၣ်ဟဲထီၣ်လၢ စပံးကျီးတဖၣ် အပူၤလီၤ. ဒီးသုဝဲတဂၤစုာ်စုာ် ကဘၣ်လဲၤဖီၣ်န့ၢ် သုမါတဂၤလၢ ပိာ်မုၣ်သးစၢ်တဖၣ် လၢအအိၣ်လၢ ဝ့ၢ်ၡံလိၤအပူၤ အကျါ ဝံၤဒီးက့ၤကိးအီၤလၢ ဘံၣ်ယၤမံၣ် အဟီၣ်ကဝီၤတက့ၢ်. ၂၂ ဒီးအဝဲသ့ၣ် အပၢ်မ့ၢ်ဂ့ၤ, အဒီပုၢ်ဝဲၢ်ခွါတဖၣ်မ့ၢ်ဂ့ၤ မ့ၢ်ဟဲကဒူးကဒ့ၣ်ပှၤန့ၣ် ပကတဲအဝဲသ့ၣ်လၢ ‘ခီဖျိလၢ ပှၤပိာ်မုၣ်တဖၣ်လၢ ပဖီၣ်န့ၢ်အီၤလၢ တၢ်ဒုးအပူၤန့ၣ်+ တယၢလၢ ပှၤဘံၣ်ယၤမံၣ်ဖိ ကိးဂၤဒဲး ကန့ၢ်အမါအဂီၢ်ဘၣ် အဃိ နၢ်ပၢၢ်စၢၤပှၤ ဒီးမၤစၢၤအဝဲသ့ၣ်မီၤ. ဒီးအဂၤတမံၤန့ၣ် သုမ့ၢ်ဟ့ၣ်လီၤအဝဲသ့ၣ်လၢ သုဖိမုၣ်တဖၣ်လၢ တၢ်သးအိၣ်အပူၤန့ၣ် သုတၢ်ကမၣ် ကထီၣ်ဝဲလီၤ.’”+
၂၃ အဃိ ပှၤဘံၣ်ယၤမံၣ်ဖိ မၤဝဲဒ်န့ၣ်လီၤ. အဝဲသ့ၣ် တဂၤစုာ်စုာ် လဲၤဖီၣ်န့ၢ် အမါလၢ ပှၤပိာ်မုၣ်လၢ အဂဲၤကလံၣ်တဖၣ် အကျါန့ၣ်လီၤ. ဝံၤဒီး အဝဲသ့ၣ် က့ၤကဒါက့ၤလၢ တၢ်လီၢ်လၢ အန့ၢ်သါဘၣ်ဝဲ ဒီးတ့ထီၣ်ကဒါက့ၤ ဝ့ၢ်တဖၣ်+ ဒီးအိၣ်ဝဲဖဲန့ၣ်လီၤ.
၂၄ ဖဲန့ၣ်အခါ ပှၤအံၣ်စရ့လးဖိ ဟးထီၣ်ဖဲန့ၣ် ဒီးအဝဲသ့ၣ် တဂၤစုာ်စုာ် က့ၤဝဲဆူ အနီၢ်ကစၢ် အဒူၣ် ဒီးအဒူၣ်ဖိထၢဖိအအိၣ် ဒီးအဝဲသ့ၣ် တဂၤစုာ်စုာ် ဟးထီၣ်ဖဲန့ၣ် ဒီးက့ၤဝဲဆူ အဟီၣ်ခိၣ်လီၢ် လၢအန့ၢ်သါဘၣ်ဝဲလီၤ.
၂၅ ဖဲန့ၣ်အဆၢကတီၢ် လၢအံၣ်စရ့လးအပူၤန့ၣ် စီၤပၤတအိၣ် နီတဂၤဘၣ်.+ တၢ်လၢ ပှၤတဂၤဂ့ၤ တဂၤဂ့ၤ အနီၢ်ကစၢ်ထံၣ်ဝဲလၢ အဘၣ်န့ၣ် အဝဲသ့ၣ်မၤဝဲလီၤ.