စံၣ်ညီၣ်ကွီၢ်

၃ ဒ်သိး ယဟိဝၤယွၤ ကမၤကွၢ် ပှၤအံၣ်စရ့လးဖိ ခဲလၢာ်လၢ အတဒုးဘၣ်တၢ်ဒီး ပှၤကနၤဧၣ်ဖိတဖၣ်ဒံးဘၣ်အဂီၢ် အဝဲပျဲဝဲလၢ ပှၤကလုာ်တဖၣ်​ ကအိၣ်ဒံးလၢ ပှၤအံၣ်စရ့လးဖိ အကျါလီၤ.+ ၂ (အဝဲပျဲဝဲ ဒ်သိးပှၤအံၣ်စရ့လးဖိ အဖိအလံၤ လၢကဟဲတဖၣ်​ လၢအတထံၣ်ဘၣ်​ တၢ်ဒုးနီတဘျီဒံးဘၣ်တဖၣ်​ ကလဲၤခီဖျိတၢ်ဒုးအဂီၢ်) ၃ ပှၤကလုာ်တဖၣ်အံၤ မ့ၢ်ဝဲ ပှၤဖလ့ၡသးဖိ+ အခိၣ်အနၢ်ယဲၢ်ဂၤ, ပှၤကနၤဧၣ်ဖိခဲလၢာ်, ပှၤစံဒိၣ်ဖိ+ ဒီးပှၤဃံၤဝံဖိ+ လၢအအိၣ်ဝဲလၢ ကစၢၢ်လဘၤနိၣ်အလိၤ+ စးထီၣ်လၢ ကစၢၢ်ဘဧၤလးဃ့ရမိၣ်​ ပၢၢ်တုၤလၢ လံၤဘိၤဃမါသးလီၤ.+ ၄ ပှၤကလုာ်တဖၣ်အံၤ ကဲထီၣ်ဝဲ တၢ်မၤကွၢ်လၢ ပှၤအံၣ်စရ့လးဖိအဂီၢ် ဒ်သိး ကပာ်ဖျါထီၣ်ဝဲလၢ မ့ၢ်ပှၤအံၣ်စရ့လးဖိ ကဒိကနၣ်​ တၢ်မၤလိာ်လၢ ယဟိဝၤယွၤ ဟ့ၣ်လီၤပာ်စၢၤ အဝဲသ့ၣ်​ အမိၢ်ပၢ်ဖံဖု လၢပျၢၤတဖၣ်​ ခီဖျိလၢ စီၤမိၤၡ့ဧါ တဒိကနၣ်ဘၣ်ဧါန့ၣ်လီၤ.+ ၅ အဃိ ပှၤအံၣ်စရ့လးဖိ အိၣ်ဝဲလၢ ပှၤကနၤဧၣ်ဖိ,+ ပှၤဃ့ၤသးဖိ, ပှၤအမိၢ်ဖိ, ပှၤပရးစၤဖိ, ပှၤဃံၤဝံဖိ ဒီးပှၤယဘူၣ်ဖိတဖၣ်​ အကျါလီၤ. ၆ ဒီးပှၤအံၣ်စရ့လးဖိ ဟံးန့ၢ်အမါလၢ ပှၤကလုာ်သ့ၣ်တဖၣ်အံၤ အဖိမုၣ်​ ဒီးအဝဲသ့ၣ်​ ဟ့ၣ်လီၤအဖိမုၣ်တဖၣ်လၢ ပှၤကလုာ်သ့ၣ်တဖၣ်အံၤ အဖိခွါတဖၣ်လီၤ. ဒီးပှၤအံၣ်စရ့လးဖိ ဘူၣ်ထီၣ်ဘါထီၣ်ဝဲ အဝဲသ့ၣ်​ အယွၤတဖၣ်လီၤ.+

၇ အဃိ တၢ်လၢ ယဟိဝၤယွၤ ထံၣ်ဝဲလၢအအၢန့ၣ်​ ပှၤအံၣ်စရ့လးဖိ မၤဝဲ ဒီးအဝဲသ့ၣ်​ သးပ့ၤနီၣ်ကွံာ် အကစၢ် ယဟိဝၤယွၤ ဒီးဘူၣ်ထီၣ်ဘါထီၣ်ဝဲ ဘဧၤလး+ အတၢ်ဂီၤတၢ်ဖှီၣ်တဖၣ်​ ဒီးတၢ်စီဆှံအထူၣ်တဖၣ်လီၤ.+ ၈ ဒီးယဟိဝၤယွၤ သးပှံၢ်ထီၣ်​ ပှၤအံၣ်စရ့လးဖိ အဃိ အဝဲဟ့ၣ်လီၤကွံာ်* အဝဲသ့ၣ်လၢ ကီၢ်မ့းစပတၤမံ အစီၤပၤကူၡၣ်ရံးၡၤသဲၣ်​ အစုပူၤလီၤ. ဒီးပှၤအံၣ်စရ့လးဖိ ဘၣ်မၤန့ၢ်တၢ်လၢ စီၤပၤကူၡၣ်ရံးၡၤသဲၣ်​ အဂီၢ် ဃိးနံၣ်ညါလီၤ. ၉ အဃိ ဖဲပှၤအံၣ်စရ့လးဖိ ဃ့တၢ်မၤစၢၤလၢ ယဟိဝၤယွၤ အအိၣ်အခါ+ ယဟိဝၤယွၤ ဃုထၢထီၣ်ဝဲ စီၤဧီၤသန့လး လၢအကမၤထူၣ်ဖျဲးထီၣ်​ ပှၤအံၣ်စရ့လးဖိ အဂီၢ်လီၤ.+ စီၤဧီၤသန့လးန့ၣ်+ အပၢ်မ့ၢ်ဝဲ စီၤကနးစး ဒီးစီၤကနးစးန့ၣ်​ မ့ၢ်ဝဲ စီၤကၤလ့းအပုၢ်လီၤ. ၁၀ စီၤဧီၤသန့လး ဒိးန့ၢ်ဘၣ်​ ယဟိဝၤယွၤ အသးစီဆှံ+ ဒီးအဝဲကဲထီၣ်ဝဲ အံၣ်စရ့လး အစံၣ်ညီၣ်ကွီၢ် တဂၤလီၤ. ဖဲအဝဲ လဲၤဒုးတၢ်အခါ ယဟိဝၤယွၤ ဟ့ၣ်လီၤ ကီၢ်မ့းစပတၤမံ အစီၤပၤကူၡၣ်ရံးၡၤသဲၣ်​ လၢအစုပူၤအဃိ အဝဲမၤနၢၤဝဲ စီၤကူၡၣ်ရံးၡၤသဲၣ်လီၤ. ၁၁ ဖဲန့ၣ်ဝံၤအလီၢ်ခံ လၢကီၢ်ပူၤန့ၣ်​ တၢ်မုာ်တၢ်ခုၣ်​ အိၣ်ဝဲ အနံၣ်​ ၄၀ ညါလီၤ. ဒီးစီၤကနးစး အဖိခွါစီၤဧီၤသန့လး သံဝဲလီၤ.

၁၂ ဒီးပှၤအံၣ်စရ့လးဖိ မၤကဒီးဝဲ တၢ်လၢ ယဟိဝၤယွၤ ထံၣ်ဝဲလၢအအၢန့ၣ်လီၤ.+ မ့ၢ်လၢ ပှၤအံၣ်စရ့လးဖိ မၤတၢ်လၢ ယဟိဝၤယွၤ ထံၣ်ဝဲလၢအအၢ အဃိ ယဟိဝၤယွၤ ပျဲဝဲလၢ မိၤအး+ အစီၤပၤဧ့းကလိၣ်​ ကဒိၣ်စိလၢ ပှၤအံၣ်စရ့လးဖိ အဖီခိၣ်လီၤ. ၁၃ တကးဒံးဘၣ်​ စီၤပၤဧ့းကလိၣ်​ ဖီၣ်လိာ်သးစုဒီး ပှၤဧၣ်မိၣ်ဖိ+ ဒီးပှၤဧမၤလ့းဖိလီၤ.+ အဝဲသ့ၣ်​ လဲၤဒုးဝဲ ပှၤအံၣ်စရ့လးဖိ ဒီးမၤန့ၢ်ဝဲ ဝ့ၢ်သ့ၣ်စူၣ်ပလိၣ်လီၤ.+ ၁၄ ပှၤအံၣ်စရ့လးဖိ ဘၣ်မၤန့ၢ်တၢ်လၢ မိၤအးအစီၤပၤ ဧ့းကလိၣ်အဂီၢ် ၁၈ နံၣ်ညါလီၤ.+ ၁၅ ဒီးပှၤအံၣ်စရ့လးဖိ ဃ့တၢ်မၤစၢၤလၢ ယဟိဝၤယွၤအအိၣ်+ အဃိ ယဟိဝၤယွၤ ဃုထၢထီၣ်ဝဲ ပှၤတဂၤလၢ အကမၤထူၣ်ဖျဲးထီၣ်​ အဝဲသ့ၣ်လီၤ.+ အဝဲမ့ၢ် ပှၤဘံၣ်ယၤမံၣ်ဖိ+ စီၤက့ရၤအဖိခွါ စီၤအ့ဟူာ်+ ဒီးအဝဲမ့ၢ် ပှၤလၢ အစုဆူၣ်လၢ အစ့ၣ်တခီလီၤ.+ လၢခံ ပှၤအံၣ်စရ့လးဖိ ဆှၢလီၤ စီၤအ့ဟူာ် ဒ်သိးကဟ့ၣ်​ မိၤအးအစီၤပၤဧ့းကလိၣ်​ တၢ်ဟ့ၣ်လၢ အဝဲမၤလိာ်ဝဲတဖၣ်လီၤ. ၁၆ ဒီးစီၤအ့ဟူာ် တ့န့ၢ်ဝဲ နးလၢအကနၣ်အ့ၣ်​ ခံခီလၢာ် လၢအထီအိၣ်ဝဲ တပျၢ်လီၤ.* ဒီးအဝဲစၢဃာ်ဝဲနးလၢ အဆ့ကၤဖီလာ် လၢအခီၣ်ကံၣ်ဒုၣ်​ လၢအထွဲတခီအလိၤန့ၣ်လီၤ. ၁၇ ဝံၤဒီး စီၤအ့ဟူာ် လဲၤဟ့ၣ်ဝဲ မိၤအးအစီၤပၤဧ့းကလိၣ်​ တၢ်ဟ့ၣ်တဖၣ်လီၤ. ဒီးစီၤပၤဧ့းကလိၣ်န့ၣ်​ မ့ၢ်ပှၤလၢ အဘီၣ်အုၣ်ဒိၣ်မးတဂၤလီၤ.

၁၈ ဖဲစီၤအ့ဟူာ် ဟ့ၣ်တၢ်ဟ့ၣ်တဖၣ်​ ဝံၤဝဲအခါ အဝဲဒီး ပှၤလၢအဟဲစိာ် တၢ်ဟ့ၣ်တဖၣ်​ က့ၤဝဲလီၤ. ၁၉ ဘၣ်ဆၣ်​ ဖဲအဝဲက့ၤတုၤလၢ တၢ်ဂီၤတၢ်ဖှီၣ်လၢ ပှၤစိးပျၤအီၤတဖၣ်​ လၢအအိၣ်ဘူးဒီး ဝ့ၢ်ကံးလကၤလးအခါ+ အဝဲက့ၤကဒါက့ၤလၢ စီၤပၤအအိၣ်ဒီး တဲအီၤလၢ “စီၤပၤဧၢ, ယဘၣ်တဲနၤ တၢ်ဂ့ၢ်ခူသူၣ်​ အိၣ်တခါနီၤ.” အဃိ စီၤပၤ ဟ့ၣ်လီၤတၢ်ကလုၢ်လၢ “အိၣ်ဘှ့ၣ်သၢၤ.” ဖဲန့ၣ်န့ၣ်​ စီၤပၤအခ့အပှၤခဲလၢာ် ဟးထီၣ်ကွံာ်ဝဲလီၤ. ၂၀ ဒီးဖဲစီၤပၤဧ့းကလိၣ်​ ဆ့ၣ်နီၤအိၣ်ဝဲလၢ အဒၢးလၢအခုၣ်​ လၢဟံၣ်ခိၣ်အခါ စီၤအ့ဟူာ် လဲၤလၢအအိၣ်လီၤ. ဒီးစီၤအ့ဟူာ် တဲဝဲလၢ “ယဘၣ်တဲနၤ တၢ်ကစီၣ်တခါ လၢအဟဲလၢ ကစၢ်ယွၤအအိၣ်လီၤ.” အဃိ စီၤပၤဧ့းကလိၣ်​ လၢအဆ့ၣ်နီၤလၢ အလီၢ်ပစိာ်အဖီခိၣ်န့ၣ်​ ဆၢထၢၣ်ဝဲ တဘျီဃီလီၤ. ၂၁ ဒီးစီၤအ့ဟူာ် ထုးထီၣ်နး လၢအအိၣ်လၢ အခီၣ်ကံၣ်ဒုၣ်​ အထွဲအလိၤ လၢအစုစ့ၣ်တခီ ဒီးဆဲးဝဲ စီၤပၤဧ့းကလိၣ်​ အဟၢဖၢလီၤ. ၂၂ ဒီးနးဒီဘ့ၣ်ညါ နုာ်လီၤ ဃုာ်ဒီးအတိၢ်စ့ၢ်ကီးလီၤ. ဒီးမ့ၢ်လၢ စီၤအ့ဟူာ် တထုးထီၣ်ကဒါက့ၤ နးလၢ စီၤပၤအဟၢဖၢအပူၤဘၣ်အဃိ စီၤပၤအဟၢဖၢအသိ ကးဘၢဝဲနး ဒီးတၢ်အ့ၣ်တၢ်ဆံၣ်​ လီၤလာ်ဝဲလီၤ. ၂၃ စီၤအ့ဟူာ် ဟးထီၣ်ကျဲ လၢဒၢးအိၣ်ကသုၣ်တကပၤ ဒီးအဝဲ ကးပံးကွံာ်ဝဲ ဒၢးလၢဟံၣ်ခိၣ်​ အပဲတြီတဖၣ်​ ဒီးခးတံၢ်ဝဲလၢသီးလီၤ. ၂၄ ဖဲစီၤအ့ဟူာ် ဟးထီၣ်ဝံၤအလီၢ်ခံ စီၤပၤအခ့အပှၤတဖၣ်​ ဟဲက့ၤထံၣ်ဝဲလၢ ဒၢးလၢဟံၣ်ခိၣ်န့ၣ်​ ပှၤခးတံၢ် အပဲတြီတဖၣ်​ လၢသီးလီၤ. အဃိ အဝဲသ့ၣ်​ တဲလိာ်အသးလၢ “စီၤပၤ ထီၣ်တၢ်ဟးလီၢ်လၢ ဒၢးလၢအခုၣ်တဖျၢၣ်​ အပူၤဧါသၢၤ.” ၂၅ ဒီးအဝဲသ့ၣ်​ အိၣ်ခိးဝဲယံာ်လံ အဃိ လၢခံ အဝဲသ့ၣ်​ သူၣ်ကိၢ်သးဂီၤတၢ်လီၤ. ဘၣ်ဆၣ်​ စီၤပၤတအိးထီၣ်​ ဒၢးအပဲတြီဒံးဘၣ်. အဃိ အဝဲသ့ၣ်​ ဟံးန့ၢ်သီးခွဲး ဒီးအိးထီၣ်ဝဲ ပဲတြီ ဒီးထံၣ်ဝဲလၢ အကစၢ်လီၤဃံၢ်သံဝဲလီၤ.

၂၆ ဖဲစီၤပၤအခ့အပှၤတဖၣ်​ မၤယံာ်မၤနီၢ်အသးအခါ စီၤအ့ဟူာ် စံၣ်ထီၣ်ကွံာ်ဝဲ ဒီးအဝဲလဲၤတလၢ တၢ်ဂီၤစိးပျၤတဖၣ်+ ဒီးလဲၤတုၤဝဲလၢ စ့ဧ့ၢ်သၤ ပူၤပူၤဖျဲးဖျဲးလီၤ. ၂၇ ဖဲစီၤအ့ဟူာ် လဲၤတုၤလၢ အ့ဖရဲၣ်+ အကစၢၢ်ကလိကျါအခါ အဝဲအူထီၣ်​ ကွဲၤလီၤ.+ ဒီးပှၤအံၣ်စရ့လးဖိ ဟဲလီၤဒီးအီၤ လၢကစၢၢ်ကလိကျါ ဒီးစီၤအ့ဟူာ် ကဲအဝဲသ့ၣ်​ အခိၣ်လီၤ. ၂၈ ဝံၤဒီး စီၤအ့ဟူာ် တဲဘၣ်အဝဲသ့ၣ်လၢ “မ့ၢ်လၢ ယဟိဝၤယွၤ ဟ့ၣ်လီၤ သုဒုၣ်သုဒါ လၢအမ့ၢ် ပှၤမိၤအးဖိတဖၣ်​ လၢသုစုပူၤလံအဃိ ပိာ်ထီၣ်ယခံသၢၤ.” အဃိ ပှၤအံၣ်စရ့လးဖိ ပိာ်ထီၣ်အခံ ဒီးအဝဲသ့ၣ်​ ဆီလီၤအသးလၢ ထံကျိယၢ်ဒ့ၣ်​ အထံဒီၣ်​ အလီၢ်တဖၣ်​ ဒ်သိးပှၤမိၤအးဖိ ဃ့ၢ်ပူၤဖျဲးအသး သုတန့ၢ်တဂ့ၤအဂီၢ် ဒီးအဝဲသ့ၣ်​ တပျဲဝဲလၢ ပှၤကခီဂာ်ဝဲ နီတဂၤဘၣ်. ၂၉ ဒီးအဝဲသ့ၣ်​ မၤသံကွံာ်ဝဲ ပှၤမိၤအးသုးဖိ လၢအဂံၢ်ဆူၣ်​ ဒီးအဒုးတၢ်ဖၠဲး အဂၤ ၁၀,၀၀၀ လၢနးလီၤ.+ ဒီးပှၤတပူၤဖျဲး နီတဂၤဘၣ်.+ ၃၀ အဃိ တၢ်တနံၤန့ၣ်​ ပှၤအံၣ်စရ့လးဖိ မၤနၢၤဝဲ ပှၤမိၤအးဖိတဖၣ်လီၤ. ဒီးလၢကီၢ်ပူၤန့ၣ်​ တၢ်မုာ်တၢ်ခုၣ်အိၣ်ဝဲ အနံၣ်​ ၈၀ ညါလီၤ.+

၃၁ ဒီးစံၣ်ညီၣ်ကွီၢ် လၢခံတဂၤန့ၣ်​ မ့ၢ်ဝဲ စီၤဧးနးအဖိခွါ စီၤၡးမကၢ်လီၤ.+ အဝဲစ့ၢ်ကီး မၤထူၣ်ဖျဲးထီၣ်​ ပှၤအံၣ်စရ့လးဖိ ခီဖျိလၢ အမၤသံ ပှၤဖလ့ၡသးဖိ+ အဂၤ ၆၀၀ လၢနီၣ်ခိၣ်စူတဘိလီၤ.+