မးသဲ

၅ ဖဲယ့ၣ်ၡူးထံၣ်​ ပှၤဂီၢ်မုၢ်တဖၣ်အခါ အဝဲလဲၤထီၣ်လၢ ကစၢၢ်ဒီခိၣ်​ ဒီးဖဲအဆ့ၣ်နီၤအခါ အပျဲၢ်အဘီၣ်တဖၣ်​ ဟဲလၢအအိၣ်လီၤ. ၂ ဖဲန့ၣ်အခါ အဝဲစးထီၣ်​ သိၣ်လိတၢ် ဒီးတဲဝဲလၢ

၃ “ပှၤလၢ အသ့ၣ်ညါလီၤအသးလၢ အလိၣ်ဘၣ်​ ကစၢ်ယွၤ အတၢ်ဟံးစုနဲၣ်ကျဲန့ၣ်*+ ကသးခုဝဲ, မ့ၢ်လၢ မူခိၣ်အဘီအမုၢ်န့ၣ်​ မ့ၢ်အဝဲသ့ၣ်​ အတၢ်အဃိလီၤ.

၄ “ပှၤလၢ အသးအုးန့ၣ်​ ကသးခုဝဲ, မ့ၢ်လၢအဝဲသ့ၣ်​ ကဘၣ်​ တၢ်မၤမုာ်ထီၣ်က့ၤအီၤ အဃိလီၤ.+

၅ “ပှၤလၢ အသးစူၤန့ၣ်*+ ကသးခုဝဲ, မ့ၢ်လၢအဝဲသ့ၣ်​ ကန့ၢ်သါဘၣ်​ ဟီၣ်ခိၣ်အဃိလီၤ.+

၆ “ပှၤလၢအလီကီ*+ တၢ်တီတၢ်လိၤန့ၣ်​ ကသးခုဝဲ, မ့ၢ်လၢ ကစၢ်ယွၤ ကမၤလၢပှဲၤ အဝဲသ့ၣ်အတၢ်မိၣ်န့ၢ်သးလီ အဃိလီၤ.+

၇ “ပှၤလၢအပာ်ဖျါထီၣ်​ တၢ်သးကညီၤန့ၣ်+ ကသးခုဝဲ, မ့ၢ်လၢအဝဲသ့ၣ်​ ကဒိးန့ၢ်ဘၣ်​ တၢ်သးကညီၤ အဃိလီၤ.

၈ “ပှၤလၢ အသးကဆှီန့ၣ်+ ကသးခုဝဲ, မ့ၢ်လၢအဝဲသ့ၣ်​ ကထံၣ်ဘၣ်​ ကစၢ်ယွၤအဃိလီၤ.

၉ “ပှၤလၢ အမၤဃူမၤဖိးတၢ်တဖၣ်န့ၣ်*+ ကသးခုဝဲ, မ့ၢ်လၢအဝဲသ့ၣ်​ ကဘၣ်တၢ်ကိးအီၤလၢ ကစၢ်ယွၤ အဖိခွါတဖၣ်အဃိလီၤ.

၁၀ “ပှၤလၢ အဘၣ်တၢ်မၤအၢမၤနးအီၤခီဖျိလၢ အမၤတၢ်တီတီလိၤလိၤအဃိန့ၣ်​ ကသးခုဝဲ,+ မ့ၢ်လၢ မူခိၣ်အဘီအမုၢ်န့ၣ်​ မ့ၢ်အဝဲသ့ၣ်​ အတၢ်အဃိလီၤ.

၁၁ “ဖဲပှၤဒုၣ်ဒွဲၣ်သု+ ဒီးမၤအၢမၤနးသု+ ဒီးတဲလံၣ်တဲလီသုဂ့ၢ် အကလုာ်ကလုာ်လၢ ယဃိအခါန့ၣ်​ သုကသးခုလီၤ.+ ၁၂ မ့ၢ်လၢသုခိၣ်ဖး+ လၢမူခိၣ်န့ၣ်​ ဒိၣ်ဝဲအဃိ မ်သုပှဲၤဒီး တၢ်သးခုဒိၣ်ဒိၣ်တက့ၢ်.+ ဝံလၢညါတဖၣ်စ့ၢ်ကီး ဘၣ်တၢ်မၤအၢမၤနး အဝဲသ့ၣ်​ ဒ်န့ၣ်အသိးလီၤ.+

၁၃ “သုမ့ၢ်ဟီၣ်ခိၣ်​ အအံသၣ်လီၤ.+ ဘၣ်ဆၣ်​ အံသၣ်အံၤ မ့ၢ်တဟီလၢၤဘၣ်န့ၣ်​ ဒ်သိး ကဟီထီၣ်က့ၤအဂီၢ် ပှၤကဘၣ်မၤအီၤဒ်လဲၣ်. မ့ၢ်လၢအံသၣ်အံၤ အဘျုးတအိၣ်လၢၤဘၣ်အဃိ ပှၤကတၢၤကွံာ်အီၤ လၢတၢ်ချၢ+ ဒီးပှၤကယီၢ်တံၢ်အီၤလီၤ.

၁၄ “သုမ့ၢ် ဟီၣ်ခိၣ်​ အတၢ်ကပီၤလီၤ.+ ဝ့ၢ်တဝ့ၢ် မ့ၢ်အိၣ်လၢ ကစၢၢ်ဒီခိၣ်န့ၣ်​ အအိၣ်သဒၢတသ့ဘၣ်. ၁၅ ပှၤမ့ၢ်ဒွဲၣ်ထီၣ်​ မ့ၣ်အူဒၢန့ၣ်​ ပှၤတပာ်လီၤဝဲလၢ နာ်တဖျၢၣ်* အဖီလာ်ဘၣ်. လၢတၢ်န့ၣ်အလီၢ် ပှၤကပာ်ထီၣ်ဝဲလၢ မ့ၣ်အူဒၢအလီၢ် ဒ်သိးအကကပီၤထီၣ်ဘၣ်​ ပှၤအိၣ်လၢ ဟံၣ်ပူၤတဖၣ်အဂီၢ်လီၤ.+ ၁၆ ဒ်န့ၣ်အသိး သုတၢ်ကပီၤန့ၣ်​ ဒုးကပီၤထီၣ်အီၤလၢ ပှၤဂၤအမဲာ်ညါတက့ၢ်.+ သုမ့ၢ်မၤဒ်န့ၣ်န့ၣ်​ ဖဲပှၤထံၣ်​ သုတၢ်မၤလၢအဂ့ၤအခါ+ အဝဲသ့ၣ်​ ကမၤလၤကပီၤသုပၢ် အိၣ်လၢမူခိၣ်လီၤ.+

၁၇ “တဘၣ်ဆိကမိၣ်လၢ ယဟဲမၤဟးဂီၤ စီၤမိၤၡ့အတၢ်သိၣ်တၢ်သီ မ့တမ့ၢ် ဝံအတၢ်စံးပာ်တဖၣ်တဂ့ၤ. ယဟဲဒ်သိး ယကမၤလၢထီၣ်ပှဲၤထီၣ်အီၤလီၤ. တမ့ၢ်ဒ်သိး ယကမၤဟးဂီၤအီၤဘၣ်.+ ၁၈ ယကတဲဘၣ်သုတီတီလၢ မူခိၣ်ဒီးဟီၣ်ခိၣ်​ မ့ၢ်ဒံကွံာ်ဘၣ်ဆၣ်​ လၢစီၤမိၤၡ့ အတၢ်သိၣ်တၢ်သီအပူၤန့ၣ်​ လံာ်မဲာ်ဖျၢၣ်​ အဆံးကတၢၢ်တဖျၢၣ်​ မ့တမ့ၢ် တၢ်အဖျၢၣ်ဆံးဆံးဖိ တဖျၢၣ်ဒၣ်လဲာ် တဒံကွံာ်ဝဲဘၣ်. ကဟဲလၢထီၣ်​ ပှဲၤထီၣ်ဝဲ ခဲလၢာ်လီၤ.+ ၁၉ ပှၤလၢအမၤကမၣ်​ တၢ်မၤလိာ် အဆံးကတၢၢ်တထံၣ်​ ဒီးသိၣ်လိပှၤဂၤလၢ ကမၤဝဲဒ်န့ၣ်စ့ၢ်ကီးန့ၣ်​ အတကြၢးဒီး* မူခိၣ်အဘီအမုၢ် နီတဂၤဘၣ်. မ့မ့ၢ်ပှၤလၢ အမၤထွဲ ဒီးသိၣ်လိဝဲ တၢ်မၤလိာ်တဖၣ်အံၤန့ၣ်​ ကြၢးဝဲဒီး* မူခိၣ်အဘီအမုၢ်လီၤ. ၂၀ ယကတဲဘၣ်သုလၢ သုတၢ်တီတၢ်လိၤ မ့ၢ်တအါန့ၢ် ပှၤကွဲးလံာ်ဖိ ဒီးပှၤဖၤရံၤၡဲဘၣ်န့ၣ်+ လ့ၤတက့ၤ သုတလဲၤနုာ်လီၤဘၣ်လၢ မူခိၣ်အဘီအမုၢ်ပူၤဘၣ်.+

၂၁ “သုသ့ၣ်ညါလၢ ပှၤတဲဘၣ်​ သုမိၢ်ပၢ်ဖံဖု လၢပျၢၤတဖၣ်လၢ ‘နတဘၣ်မၤသံ ပှၤနီတဂၤတဂ့ၤ,+ ဒီးပှၤလၢ အမၤသံတၢ်တဂၤန့ၣ်​ ကဘၣ်လဲၤပာ်ဖျါထီၣ်အသးလၢ စံၣ်ညီၣ်ကွီၢ်အရူလီၤ.’+ ၂၂ ဘၣ်ဆၣ်​ ယကတဲဘၣ်သုလၢ ပှၤတဂၤဂၤ မ့ၢ်သးဒိၣ်ထီၣ်+ အဒီပုၢ်ဝဲၢ် ဒီးမ့ၢ်တမၤလီၤမၢ် အတၢ်သးဒိၣ်ထီၣ်ဘၣ်န့ၣ်​ အကဘၣ်လဲၤပာ်ဖျါထီၣ်အသးလၢ စံၣ်ညီၣ်ကွီၢ်အရူလီၤ. ဒီးပှၤလၢအဒုၣ်ဒွဲၣ်စံးအၢ အဒီပုၢ်ဝဲၢ်န့ၣ်​ ကဘၣ်လဲၤပာ်ဖျါထီၣ်အသးလၢ စံၣ်ညီၣ်ကွီၢ်အရူလၢ အထီကတၢၢ်လီၤ. မ့မ့ၢ်ပှၤလၢ အတဲအဒီပုၢ်ဝဲၢ်လၢ ‘နမ့ၢ်ပှၤဟးဂီၤဖိလၢ အဘျုးတအိၣ်ဘၣ်’ န့ၣ်အကဘၣ်​ တၢ်စံၣ်ညီၣ်ဘၣ်ဖုးအီၤလၢ ကဟဲနၢ်*+ လၢအအိၣ်ဒီး မ့ၣ်အူလီၤ.

၂၃ “အဃိ နမ့ၢ်လဲၤစိာ် နတၢ်ဟ့ၣ်လၢ တၢ်လုၢ်လီၢ်+ ဒီးဖဲန့ၣ်န့ၣ်​ နမ့ၢ်သ့ၣ်နီၣ်ထီၣ်လၢ နဒီပုၢ်ဝဲၢ် ပာ်တၢ်ကမၣ်လၢ နလိၤတမံၤမံၤန့ၣ်​ ၂၄ ပာ်တ့ၢ်နတၢ်ဟ့ၣ်ဖဲ တၢ်လုၢ်လီၢ်အမဲာ်ညါ ဒီးဟးထီၣ်ကွံာ် ဖဲန့ၣ်တက့ၢ်. က့ၤမၤဃူမၤဖိးဆိတၢ်ဒီး နဒီပုၢ်ဝဲၢ်မ့ၢ်ဝံၤမး ဟဲက့ၤ ဟ့ၣ်လုၢ်ထီၣ်က့ၤတၢ်တက့ၢ်.+

၂၅ “တချုးလၢနလဲၤတုၤလၢ စံၣ်ညီၣ်ကွီၢ်အရူဒံးဘၣ်အခါ လၢကျဲန့ၣ်​ မၤဘၣ်လိာ်ဖိးဒ့က့ၤ နသးဒီး ပှၤလၢအလဲၤကိးနၤလၢ စံၣ်ညီၣ်ကွီၢ်အအိၣ်​ ချ့ချ့တက့ၢ်. နမ့ၢ်မၤဒ်န့ၣ်န့ၣ်​ ဘၣ်သ့ၣ်သ့ၣ်​ အဝဲတလဲၤကိးနၤလၢ စံၣ်ညီၣ်ကွီၢ်အအိၣ်လၢၤဘၣ်. နမ့ၢ်တမၤဒ်န့ၣ်ဘၣ်န့ၣ်​ စံၣ်ညီၣ်ကွီၢ် ကဟ့ၣ်လီၤဘၣ်ဖုးနၤလၢ ပှၤခိးတၢ်ဖိ ဒီးပှၤခိးတၢ်ဖိကထၢနုာ်နၤ လၢဃိာ်ပူၤလီၤ.+ ၂၆ ဒီးယကတဲဘၣ်နၤတီတီလၢ နလိးက့ၤစ့ မ့ၢ်တတူာ် ကိးဘ့ၣ်ဒဲးဘၣ်န့ၣ်* လ့ၤတက့ၤ နဟးထီၣ်ဖဲန့ၣ်တန့ၢ်ဘၣ်.

၂၇ “သုနၢ်ဟူ ပှၤတဲဝဲလၢ ‘နတဘၣ်​ အဲၣ်ဘၢမါအဲၣ်ဘၢဝၤတဂ့ၤ.’+ ၂၈ ဘၣ်ဆၣ်​ ယကတဲဘၣ်သုလၢ ပှၤတဂၤဂၤလၢ အဆဲးကွၢ်ပိာ်မုၣ်လၢ တၢ်သးကတၢအပူၤန့ၣ်+ အဲၣ်ဘၢတၢ်ဒီးအီၤလၢ အသးပူၤလံ.+ ၂၉ နမဲာ်ချံလၢ အထွဲတခီ မ့ၢ်မၤလီၤဃံၢ်နၤန့ၣ်​ ခွဲးထုးထီၣ်ကွံာ်အီၤဒီး တၢၤကွံာ်အီၤတက့ၢ်.+ နမဲာ်ချံတခီ မ့ၢ်ဟးဂီၤန့ၣ်​ ဂ့ၤဒိၣ်န့ၢ်ဒံး နမိၢ်ပှၢ်ဒီတဂၤ ဘၣ်တၢ်တၢၤလီၤကွံာ်အီၤလၢ ကဟဲနၢ်*+ အပူၤလီၤ. ၃၀ ဒီးနစုလၢအထွဲတခီ မ့ၢ်မၤလီၤဃံၢ်နၤန့ၣ်​ ဒီၣ်တဲာ်ကွံာ်အီၤဒီး တၢၤကွံာ်အီၤတက့ၢ်.+ နစုတခီ မ့ၢ်ဟးဂီၤန့ၣ်​ ဂ့ၤဒိၣ်န့ၢ်ဒံး နမိၢ်ပှၢ်ဒီတဂၤ ဘၣ်တၢ်တၢၤလီၤအီၤလၢ ကဟဲနၢ်*+ အပူၤလီၤ.

၃၁ “တကးဒံးဘၣ်​ ပှၤတဲဝဲလၢ ‘ပှၤလၢအဲၣ်ဒိးမၤကတၢၢ်ကွံာ် အတၢ်ဆီဟံၣ်ဆီဃီဒီးအမါန့ၣ်​ အကဘၣ်ဟ့ၣ်အီၤလၢ လံာ်လီၤဖးလီၤ.’*+ ၃၂ မ့မ့ၢ်ယၤန့ၣ်​ ယကတဲဘၣ်သုဒ်အံၤ, မ့တမ့ၢ်ဘၣ်လၢ အမါမၤကမၣ်မုၣ်ကမၣ်ခွါ* အဃိဘၣ်ဒီး ပှၤတဂၤဂၤ မ့ၢ်မၤကတၢၢ်ကွံာ် အတၢ်ဆီဟံၣ်ဆီဃီဒီးအမါန့ၣ်​ မ့ၢ်ဒၣ်အဒုးအိၣ်ထီၣ်​ တၢ်လ့ပစီလၢ အမါကအဲၣ်ဘၢတၢ်လီၤ. ဒီးပှၤလၢ အဆီဟံၣ်ဆီဃီဒီး ပိာ်မုၣ်ဒ်အံၤတဂၤန့ၣ်​ မ့ၢ်အအဲၣ်ဘၢတၢ်လီၤ.+

၃၃ “သုသ့ၣ်ညါလၢ ပှၤတဲဘၣ်​ သုမိၢ်ပၢ်ဖံဖု လၢပျၢၤတဖၣ်လၢ ‘နမ့ၢ်မၤ တၢ်အၢၣ်လီၤန့ၣ်​ နတဘၣ်​ မၤဟးဂီၤအီၤတဂ့ၤ,+ ဒီးနကဘၣ်​ မၤလၢပှဲၤတၢ်လၢ နအၢၣ်လီၤ ယဟိဝၤယွၤလီၤ.’*+ ၃၄ ဘၣ်ဆၣ်​ ယကတဲဘၣ်သုလၢ သုတဘၣ်မၤ တၢ်အၢၣ်လီၤ နီတမံၤတဂ့ၤ.+ မ့ၢ်လၢမူခိၣ်န့ၣ်မ့ၢ်ဝဲ ကစၢ်ယွၤ အလီၢ်ပစိာ်အဃိ တဘၣ်အၢၣ်လီၤတၢ်လၢ မူခိၣ်အမဲာ်ညါတဂ့ၤ. ၃၅ ဒီးမ့ၢ်လၢဟီၣ်ခိၣ်န့ၣ်​ မ့ၢ်ဝဲကစၢ်ယွၤ အခီၣ်ယီၢ်လီၤအလီၢ်အဃိ+ တဘၣ်အၢၣ်လီၤတၢ်လၢ ဟီၣ်ခိၣ်အမဲာ်ညါတဂ့ၤ. ဒီးမ့ၢ်လၢ ဝ့ၢ်ယရူၤၡလ့ၣ်န့ၣ်မ့ၢ်ဝဲ စီၤပၤဖးဒိၣ်အဝ့ၢ်အဃိ+ တဘၣ်​ အၢၣ်လီၤစ့ၢ်ကီးတၢ်လၢ ဝ့ၢ်ယရူၤၡလ့ၣ်အမဲာ်ညါတဂ့ၤ. ၃၆ ဒီးမ့ၢ်လၢ နခိၣ်ဆူၣ်တဘိဒၣ်လဲာ် နမၤဝါအီၤမ့ၢ်ဂ့ၤ နမၤသူအီၤမ့ၢ်ဂ့ၤ တသ့ဘၣ်အဃိ တဘၣ်အၢၣ်လီၤတၢ်လၢ နခိၣ်* တဂ့ၤ. ၃၇ လၢတၢ်န့ၣ်အလီၢ် နမ့ၢ်တဲလၢ ‘အမ့ၢ်’ န့ၣ်​ မၤလၢပှဲၤ နတၢ်ကတိၤတက့ၢ်. ဒီးနမ့ၢ်တဲလၢ ‘တမ့ၢ်ဘၣ်’+ န့ၣ်​ မၤဒ်နတဲအသိးတက့ၢ်. နတဲတၢ်မ့ၢ် ပိၣ်န့ၢ်တၢ်သ့ၣ်တဖၣ်န့ၣ်န့ၣ်​ မ့ၢ်တၢ်လၢအဟဲလၢ မုၣ်ကီၤလံၢ်* အအိၣ်လီၤ.+

၃၈ “သုနၢ်ဟူပှၤတဲဝဲလၢ ‘မဲာ်ချံလၢ မဲာ်ချံအဂီၢ် ဒီးမဲလၢ မဲအဂီၢ်လီၤ.’+ ၃၉ ဘၣ်ဆၣ်​ ယကတဲဘၣ်သုလၢ တဘၣ်ထီဒါက့ၤ ပှၤလၢအအၢတဂၤတဂ့ၤ. ဒီးပှၤမ့ၢ်ဒဲနမဲာ်လၢ အထွဲတကပၤန့ၣ်​ ဃၣ်န့ၢ်အီၤလၢ အဝဲတကပၤတက့ၢ်.+ ၄၀ ပှၤတဂၤ မ့ၢ်အဲၣ်ဒိးလဲၤကိးနၤလၢ စံၣ်ညီၣ်ကွီၢ်အရူ ဒ်သိးကဟံးန့ၢ် နဆ့ကၤလၢ အဖီလာ်တဘ့ၣ်န့ၣ်​ ပျဲအဟံးန့ၢ်စ့ၢ်ကီး နဆ့ကၤလၢ အဖီခိၣ်တဘ့ၣ်န့ၣ်တက့ၢ်.+ ၄၁ ဒီးပှၤလၢအအိၣ်ဒီး တၢ်စိတၢ်ကမီၤတဂၤ မ့ၢ်မၢဆူၣ်နၤလၢ နကလဲၤစိာ်စၢၤအီၤတၢ် တမံးလာ်ကျဲန့ၣ်* လဲၤစိာ်န့ၢ်အီၤ ခံမံးလာ်တက့ၢ်. ၄၂ ပှၤလၢအဃ့နၤတၢ်န့ၣ်​ ဟ့ၣ်လီၤအီၤတက့ၢ်. ဒီးပှၤလၢအအဲၣ်ဒိး ဃ့လိၢ်တၢ်* လၢနအိၣ်န့ၣ်​ ဂ့ၢ်လိာ်အီၤတဂ့ၤ.+

၄၃ “သုနၢ်ဟူ ပှၤတဲဝဲလၢ ‘နကဘၣ်အဲၣ်ပှၤလၢနဃၢၤ+ ဒီးသးဟ့ နဒုၣ်နဒါလီၤ.’ ၄၄ ဘၣ်ဆၣ်​ ယကတဲဘၣ်သု ဆဲးအဲၣ်သုဒုၣ်သုဒါတက့ၢ်.+ ဒီးပှၤလၢ အမၤအၢမၤနးသုန့ၣ်​ ဃ့ထုကဖၣ်န့ၢ်တၢ်လၢ အဝဲသ့ၣ်အဂီၢ်တက့ၢ်.+ ၄၅ သုမ့ၢ်မၤဒ်န့ၣ်န့ၣ်​ သုကပာ်ဖျါထီၣ်လၢ သုမ့ၢ် သုပၢ်အိၣ်လၢမူခိၣ်​ အဖိတဖၣ်,+ မ့ၢ်လၢအဝဲ ဒုးဟဲထီၣ်မုၢ်လၢ ပှၤအၢပှၤသီ ဒီးပှၤဂ့ၤအဂီၢ် ဒ်သိးသိး ဒီးဒုးစူၤလီၤမူခိၣ်ထံလၢ ပှၤတီပှၤလိၤ ဒီးပှၤတတီတလိၤဘၣ်အဂီၢ် ဒ်သိးသိးအဃိလီၤ.+ ၄၆ သုမ့ၢ်အဲၣ်ထဲ ပှၤလၢအအဲၣ်သုန့ၣ်​ မ့ၢ်သုကကြၢးဒီး တၢ်ဆိၣ်ဂ့ၤ တမံၤမံၤဧါ.+ ပှၤထၢတၢ်ခိတၢ်သွဲတဖၣ်​ မၤဝဲဒ်န့ၣ်စ့ၢ်ကီး တမ့ၢ်ဧီၤ. ၄၇ ဒီးသုမ့ၢ်ဆၢဂ့ၤဆၢဝါထဲ သုဒီပုၢ်ဝဲၢ်တဖၣ်န့ၣ်​ မ့ၢ်သုမၤတၢ်လၢ အဂ့ၤလီၤဆီ တမံၤမံၤဧါ. ပှၤကလုာ်အဂၤတဖၣ်​ မၤဝဲဒ်န့ၣ်စ့ၢ်ကီး တမ့ၢ်ဧီၤ. ၄၈ ဒ်သုပၢ်အိၣ်လၢမူခိၣ်​ မ့ၢ်ပှၤလၢပှၤပှဲၤအသိး သုဘၣ်ကဲထီၣ်​ ပှၤလၢပှၤပှဲၤလီၤ.*+