ရိမ့ၤ
၅ ခဲအံၤ ပဘၣ်တၢ်ပာ်တီပာ်လိၤပှၤ ခီဖျိလၢ ပတၢ်နာ်လီၤ.+ အဃိ မ်ပဆဲး အိၣ်ဃူအိၣ်ဖိးဒီး ကစၢ်ယွၤ ခီဖျိ ပကစၢ်ယ့ၣ်ၡူးခရံာ်တက့ၢ်.+ ၂ ခီဖျိလၢ ပနာ်ယ့ၣ်ၡူးအဃိ ကျဲအိးထီၣ်န့ၢ်ပှၤ ဒ်သိးပကဒိးန့ၢ်ဘၣ် တၢ်သးကညီၤ ဒိၣ်ဒိၣ်မုၢ်မုၢ်အဂီၢ်လီၤ. ဒီးခဲအံၤ ပဒိးန့ၢ်ဘၣ်အီၤလံ.+ မ်ပသးခု ခီဖျိလၢ ပအိၣ်ဒီး တၢ်မုၢ်လၢ်လၢ ပကဒိးန့ၢ်ဘၣ် တၢ်လၤကပီၤလၢ ကစၢ်ယွၤအအိၣ် အဃိတက့ၢ်. ၃ ထဲန့ၣ်တကးဒံးဘၣ် ဖဲပလဲၤခီဖျိ တၢ်နးတၢ်ဖှီၣ်အခါ+ ပသးခုသ့ခီဖျိလၢ ပသ့ၣ်ညါလၢ တၢ်နးတၢ်ဖှီၣ်န့ၣ် ဒုးအိၣ်ထီၣ် တၢ်တူၢ်န့ၢ်ခီၣ်ကဲအဃိလီၤ.+ ၄ ဒီးပတၢ်တူၢ်န့ၢ်ခီၣ်ကဲန့ၣ် ဒုးအိၣ်ထီၣ် ကစၢ်ယွၤ အတၢ်ဘၣ်သး+ ဒီးကစၢ်ယွၤ အတၢ်ဘၣ်သးန့ၣ် ဟ့ၣ်ပှၤ တၢ်မုၢ်လၢ်လီၤ.+ ၅ ဒီးတၢ်မုၢ်လၢ်အံၤ တကဲထီၣ် တၢ်သးဟးဂီၤလၢ ပဂီၢ်ဘၣ်,+ မ့ၢ်လၢ ကစၢ်ယွၤအတၢ်အဲၣ် ဘၣ်တၢ်လူလီၤအီၤလၢ ပသးပူၤခီဖျိ သးစီဆှံလၢ ကစၢ်ယွၤ ဟ့ၣ်လီၤပှၤ အဃိလီၤ.+
၆ ခရံာ်တူၢ်သံအသးလၢ ပှၤလၢ အတယူးတယီၣ်ယွၤဘၣ်အဂီၢ် ဖဲတၢ်ဆၢကတီၢ် လၢအဘၣ် တၢ်ပာ်ပနီၣ်အီၤလီၤ. အဝဲတူၢ်သံအသးလၢပဂီၢ် ဖဲပမ့ၢ်ဒံး ပှၤဂံၢ်စၢ်ဘါစၢ် အခါလီၤ.+ ၇ ပှၤကတူၢ်သံအသးလၢ ပှၤတီပှၤလိၤ တဂၤအဂီၢ်န့ၣ် တအိၣ်ကြီကြီဘၣ်. ဘၣ်ဆၣ် လၢပှၤအဂ့ၤ တဂၤအဂီၢ်န့ၣ် ဘၣ်သ့ၣ်သ့ၣ် ပှၤတဂၤဂၤ တူၢ်သံအသး ကဘူၣ်ဝဲလီၤ. ၈ ဘၣ်ဆၣ် ဖဲပမ့ၢ်ဒံး ပှၤတၢ်ဒဲးဘးဖိအခါ ကစၢ်ယွၤပာ်ဖျါထီၣ် အတၢ်အဲၣ်လၢပဖီခိၣ် ခီဖျိ ခရံာ်တူၢ်သံအသး လၢပဂီၢ်အဃိလီၤ.+ ၉ မ့မ့ၢ်ဒ်န့ၣ်န့ၣ် ခဲအံၤပဘၣ် တၢ်ပာ်တီပာ်လိၤပှၤ ခီဖျိယ့ၣ်ၡူး အသွံၣ်အဃိ+ ပနာ်သ့သပှၢ်တၢၢ်လၢ ပကပူၤဖျဲးလၢ ကစၢ်ယွၤ အတၢ်သးထီၣ် ခီဖျိလၢအီၤလီၤ.+ ၁၀ ဖဲပမ့ၢ်ဒံး ဒုၣ်ဒါတဖၣ်အခါ ပဘၣ် တၢ်မၤဘၣ်လိာ်ဖိးဒ့က့ၤပှၤဒီး ကစၢ်ယွၤ ခီဖျိလၢ အဖိခွါအတၢ်သံ အဃိလီၤ.+ ခဲအံၤ ပဘၣ် တၢ်မၤဘၣ်လိာ်ဖိးဒ့က့ၤပှၤ ဝံၤလံအဃိ ပနာ်သ့ သပှၢ်တၢၢ်လၢ ပကတုၤလၢ တၢ်အုၣ်က့ၤခီၣ်က့ၤ ခီဖျိလၢ ယ့ၣ်ၡူးမူဝဲအဃိလီၤ. ၁၁ တကးဒံးဘၣ် တၢ်လၢ ကစၢ်ယွၤမၤတ့ၢ်ဝဲ ခီဖျိ ပကစၢ်ယ့ၣ်ၡူးခရံာ်န့ၣ် မၤသးခုပသးလီၤ. ခီဖျိလၢအီၤအဃိ ခဲအံၤ ပဘၣ်တၢ်မၤဘၣ်လိာ်ဖိးဒ့က့ၤပှၤဒီး ကစၢ်ယွၤလံ.+
၁၂ တၢ်ဒဲးဘး ဟဲနုာ်လီၤလၢ ဟီၣ်ခိၣ် ခီဖျိပိာ်ခွါတဂၤ ဒီးတၢ်သံန့ၣ် ဟဲအိၣ်ထီၣ်ခီဖျိလၢ တၢ်ဒဲးဘးအဃိလီၤ.+ လၢတၢ်န့ၣ်အဃိ တၢ်သံရၤလီၤအသးလၢ ပှၤဟီၣ်ခိၣ်ဖိ ခဲလၢာ်အအိၣ် မ့ၢ်လၢပှၤခဲလၢာ် အိၣ်ဒီးတၢ်ဒဲးဘးအဃိလီၤ.+ ၁၃ ဒီးတချုးလၢ စီၤမိၤၡ့ အတၢ်သိၣ်တၢ်သီ အိၣ်ထီၣ်ဒံးဘၣ်န့ၣ် တၢ်ဒဲးဘး အိၣ်ပာ်စၢၤလၢ ဟီၣ်ခိၣ်လံ. ဘၣ်ဆၣ် ဖဲတၢ်သိၣ်တၢ်သီ တအိၣ်ဘၣ်အခါ ပှၤတဘၣ် တၢ်စံၣ်ညီၣ်အီၤလၢ အတၢ်ဒဲးဘးအဃိ နီတဂၤဘၣ်.+ ၁၄ ဒ်လဲၣ်ဂ့ၤဒ်လဲၣ်ဂ့ၤ တၢ်သံပၢတၢ် ဒ်စီၤပၤအသိး စးထီၣ်လၢ စီၤအၤဒၣ်အစိၤ တုၤလီၤလၢ စီၤမိၤၡ့အစိၤလီၤ. ဒီးတၢ်သံပၢဘၣ် ပှၤလၢ အတမၤတၢ်ဒဲးဘး ဒ်စီၤအၤဒၣ် မၤဝဲအသိးဘၣ် စ့ၢ်ကီးလီၤ. စီၤအၤဒၣ်န့ၣ် လီၤဂာ်ဒီးပှၤလၢ အကဟဲဝဲတဂၤန့ၣ်လီၤ.+
၁၅ ဘၣ်ဆၣ် ကစၢ်ယွၤအတၢ်ဟ့ၣ်န့ၣ် တလီၤဂာ်ဒ် တၢ်ဒဲးဘးအံၤအသိးဘၣ်. ပှၤအါဂၤ မ့ၢ်သံလၢ ပိာ်ခွါတဂၤ အတၢ်ဒဲးဘးအဃိ သနာ်က့ ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ် ဒီးအတၢ်ဟ့ၣ်ကလီ ခီဖျိပိာ်ခွါတဂၤ+ လၢအမ့ၢ် ယ့ၣ်ၡူးခရံာ် အတၢ်သးကညီၤ ဒိၣ်ဒိၣ်မုၢ်မုၢ် အဃိန့ၣ် ကဲဘျုးလၢ ပှၤအါဂၤအဂီၢ်+ ဒိၣ်န့ၢ်အန့ၢ် စၢၢ်တလၢၢ်လီၤ. ၁၆ တကးဒံးဘၣ် တၢ်ဟ့ၣ်ကလီ ဒီးတၢ်လၢ အဟဲကဲထီၣ်အသး ခီဖျိပိာ်ခွါတဂၤ အတၢ်ဒဲးဘး+ အဃိန့ၣ် လီၤဆီလိာ်သးလၢ ကျဲဒ်အံၤစ့ၢ်ကီးလီၤ. ဖဲတၢ်ဒဲးဘးတမံၤအံၤ အိၣ်ထီၣ်ဝံၤအလီၢ်ခံ တၢ်စံၣ်ညီၣ်လီၤဘၣ်ဝဲ ပှၤဟီၣ်ခိၣ်ဖိတဖၣ်လီၤ.+ ဘၣ်ဆၣ် ဖဲပှၤမၤတၢ်ဒဲးဘး အါမးဝံၤအလီၢ်ခံ ကစၢ်ယွၤ ဟ့ၣ်ဝဲတၢ်ဟ့ၣ်လၢအမ့ၢ် တၢ်ပာ်တီပာ်လိၤ ပှၤဟီၣ်ခိၣ်ဖိလီၤ.+ ၁၇ ခီဖျိပှၤတဂၤ အတၢ်ဒဲးဘးအဃိ တၢ်သံပၢတၢ် ဒ်စီၤပၤအသိးလီၤ.+ ဘၣ်ဆၣ် တၢ်သးကညီၤ ဒိၣ်ဒိၣ်မုၢ်မုၢ် ဒီးတၢ်ဟ့ၣ်ကလီလၢအမ့ၢ် တၢ်ပာ်တီပာ်လိၤန့ၣ်+ မ့ၢ်တၢ်လၢ အဂ့ၤဒိၣ်န့ၢ်အန့ၣ်လီၤ. ပှၤလၢအဒိးန့ၢ်ဘၣ် တၢ်သ့ၣ်တဖၣ်အံၤန့ၣ် ပနာ်သ့ သပှၢ်တၢၢ်လၢ အဝဲသ့ၣ်ကမူဝဲဒီး ကပၢတၢ် ဒ်စီၤပၤတဖၣ်အသိး+ ခီဖျိပှၤတဂၤလၢအမ့ၢ် ယ့ၣ်ၡူးခရံာ်အဃိလီၤ.+
၁၈ မ့မ့ၢ်ဒ်န့ၣ်န့ၣ် ခီဖျိလၢ တၢ်ဒဲးဘးတမံၤအဃိ တၢ်စံၣ်ညီၣ် လီၤဘၣ်ပှၤဟီၣ်ခိၣ်ဖိ အကလုာ် ကလုာ်လီၤ.+ ဒ်န့ၣ်အသိး ခီဖျိလၢ တၢ်မၤလၢ အတီအလိၤတမံၤအဃိ ပှၤဟီၣ်ခိၣ်ဖိ အကလုာ်ကလုာ်+ ဘၣ်တၢ်ပာ်တီပာ်လိၤ အဝဲသ့ၣ် ဒီးကန့ၢ်ဘၣ် တၢ်မူလီၤ.+ ၁၉ ဒီးခီဖျိလၢ ပှၤတဂၤ တဒိကနၣ်တၢ်ဘၣ် အဃိ ပှၤဟီၣ်ခိၣ်ဖိ အါဂၤ ကဲထီၣ် ပှၤတၢ်ဒဲးဘးဖိလီၤ.+ ဒ်န့ၣ်အသိး ခီဖျိလၢ ပှၤတဂၤ အတၢ်ဒိကနၣ်အဃိ ပှၤအါဂၤ ကကဲထီၣ် ပှၤတီပှၤလိၤလီၤ.+ ၂၀ ဒီးစီၤမိၤၡ့ အတၢ်သိၣ်တၢ်သီ ဟဲအိၣ်ထီၣ်ဒ်သိး ကပာ်ဖျါထီၣ်ဝဲလၢ ပှၤဟီၣ်ခိၣ်ဖိတဖၣ် မၤတၢ်ဒဲးဘး အါမးလီၤ.+ ဘၣ်ဆၣ် ဖဲတၢ်ဒဲးဘး အါထီၣ်ဝဲအခါ ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ် စ့ၢ်ကီး အါထီၣ်ဝဲ အါန့ၢ်အန့ၣ်လီၤ. ၂၁ အဃိ တၢ်ဒဲးဘးဒီးတၢ်သံ ပၢတၢ် ဒ်စီၤပၤအသိးလီၤ.+ ဒ်န့ၣ်အသိး ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ်စ့ၢ်ကီး ပၢတၢ်ဒ် စီၤပၤအသိး လၢတၢ်တီတၢ်လိၤအပူၤ ဒ်သိး ကဒုးအိၣ်ထီၣ် တၢ်မူအထူအယိာ် ခီဖျိ ပကစၢ်ယ့ၣ်ၡူးခရံာ်လီၤ.+