ရိမ့ၤ
၅ ခဲအံၤ ပဘၣ်တၢ်ပာ်တီပာ်လိၤပှၤ ခီဖျိလၢ ပတၢ်နာ်လီၤ. အဃိ မ်ပဆဲး အိၣ်ဃူအိၣ်ဖိးဒီး ကစၢ်ယွၤ ခီဖျိ ပကစၢ်ယ့ၣ်ၡူးန့ၣ်တက့ၢ်. ၂ ခီဖျိလၢ ပနာ်အီၤအဃိ ကျဲအိးထီၣ်န့ၢ်ပှၤ ဒ်သိးပကဒိးန့ၢ်ဘၣ် တၢ်သးကညီၤ ဒိၣ်ဒိၣ်မုၢ်မုၢ်အဂီၢ်လီၤ. ဒီးခဲအံၤ ပဒိးန့ၢ်ဘၣ်အီၤလံ. မ်ပသးခု ခီဖျိလၢ ပအိၣ်ဒီး တၢ်မုၢ်လၢ်လၢ ပကဒိးန့ၢ်ဘၣ် တၢ်လၤကပီၤလၢ ယွၤအအိၣ်အဃိ န့ၣ်တက့ၢ်. ၃ ထဲန့ၣ်တကးဒံးဘၣ် ဖဲပလဲၤခီဖျိ တၢ်နးတၢ်ဖှီၣ်အခါ မ်ပသးခုတက့ၢ်, မ့ၢ်လၢပသ့ၣ်ညါလၢ တၢ်နးတၢ်ဖှီၣ်ဒုးအိၣ်ထီၣ် တၢ်တူၢ်န့ၢ်ခီၣ်ကဲ ၄ ဒီးတၢ်တူၢ်န့ၢ်ခီၣ်ကဲန့ၣ် ဒုးအိၣ်ထီၣ် ကစၢ်ယွၤ အတၢ်ဘၣ်သး ဒီးကစၢ်ယွၤ အတၢ်ဘၣ်သးန့ၣ် ဒုးအိၣ်ထီၣ် တၢ်မုၢ်လၢ်အဃိလီၤ. ၅ ဒီးတၢ်မုၢ်လၢ်အံၤ တမၤဟးဂီၤ ပသးဘၣ်, မ့ၢ်လၢ ကစၢ်ယွၤအတၢ်အဲၣ် ဘၣ်တၢ်လူလီၤအီၤလၢ ပသးပူၤခီဖျိ သးစီဆှံ, လၢယွၤဟ့ၣ်လီၤပှၤ အဃိန့ၣ်လီၤ.
၆ ဖဲပမ့ၢ်ဒံး ပှၤဂံၢ်စၢ်ဘါစၢ် အဖၢမုၢ်န့ၣ် ခရံာ်တူၢ်သံအသးလၢ ပှၤလၢ အတယူးတယီၣ်ယွၤအဂီၢ် ဖဲတၢ်ဆၢကတီၢ် လၢအဘၣ် တၢ်ပာ်ပနီၣ်အီၤန့ၣ်လီၤ. ၇ ပှၤကတူၢ်သံအသးလၢ ပှၤတီပှၤလိၤ တဂၤအဂီၢ်န့ၣ် တအိၣ်ကြီကြီဘၣ်. ဘၣ်ဆၣ် လၢပှၤအဂ့ၤ တဂၤအဂီၢ်န့ၣ် ဘၣ်သ့ၣ်သ့ၣ် ပှၤတဂၤဂၤ တူၢ်သံအသး ကဘူၣ်ဝဲလီၤ. ၈ ဘၣ်ဆၣ် ဖဲပမ့ၢ်ဒံး ပှၤတၢ်ဒဲးဘးဖိအခါ ကစၢ်ယွၤပာ်ဖျါထီၣ် တၢ်အဲၣ်လၢပဖီခိၣ် ခီဖျိ ခရံာ်တူၢ်သံအသး လၢပဂီၢ်အဃိလီၤ. ၉ မ့မ့ၢ်ဒ်န့ၣ်န့ၣ် ခဲအံၤပဘၣ် တၢ်ပာ်တီပာ်လိၤပှၤ ခီဖျိယ့ၣ်ၡူး အသွံၣ်အဃိ ပနာ်သ့သပှၢ်တၢၢ်လၢ ပကပူၤဖျဲးလၢ ယွၤအတၢ်သးထီၣ် ခီဖျိလၢအီၤလီၤ. ၁၀ ဖဲပမ့ၢ်ဒံး ဒုၣ်ဒါတဖၣ်အခါ ပဘၣ် တၢ်မၤဘၣ်လိာ်ဖိးဒ့က့ၤ ပှၤဒီးကစၢ်ယွၤ ခီဖျိလၢ အဖိခွါအတၢ်သံ အဃိလီၤ. ခဲအံၤ ပဘၣ် တၢ်မၤဘၣ်လိာ်ဖိးဒ့က့ၤပှၤ ဝံၤလံအဃိ ပနာ်သ့ သပှၢ်ကတၢၢ်လၢ ပကတုၤလၢ တၢ်အုၣ်က့ၤခီၣ်က့ၤ ခီဖျိလၢ အမူဝဲအဃိလီၤ. ၁၁ တကးဒံးဘၣ် ပသးခု လၢကစၢ်ယွၤအပူၤ ခီဖျိလၢ ပကစၢ် ယ့ၣ်ၡူးခရံာ်န့ၣ်လီၤ. ခီဖျိလၢ အီၤအဃိ ခဲအံၤပဘၣ် တၢ်မၤဘၣ်လိာ်ဖိးဒ့က့ၤပှၤလံ.
၁၂ တၢ်ဒဲးဘး ဟဲနုာ်လီၤလၢ ဟီၣ်ခိၣ် ခီဖျိပိာ်ခွါတဂၤ ဒီးတၢ်သံန့ၣ် ဟဲအိၣ်ထီၣ်ခီဖျိလၢ တၢ်ဒဲးဘးအဃိလီၤ. လၢတၢ်န့ၣ်အဃိ တၢ်သံရၤလီၤအသးလၢ ပှၤဟီၣ်ခိၣ်ဖိ ခဲလၢာ်အအိၣ် မ့ၢ်လၢပှၤခဲလၢာ် မၤတၢ်ဒဲးဘးအဃိလီၤ. ၁၃ ဒီးတချုးလၢ စီၤမိၤၡ့ အတၢ်သိၣ်တၢ်သီ အိၣ်ထီၣ်ဒံးဘၣ်န့ၣ် တၢ်ဒဲးဘး အိၣ်ပာ်စၢၤလၢ ဟီၣ်ခိၣ်လံ. ဘၣ်ဆၣ် ဖဲတၢ်သိၣ်တၢ်သီ တအိၣ်ဘၣ်အခါ ပှၤတဘၣ် တၢ်စံၣ်ညီၣ်အီၤလၢ အတၢ်ဒဲးဘးအဃိ နီတဂၤဘၣ်. ၁၄ ဒ်လဲၣ်ဂ့ၤဒ်လဲၣ်ဂ့ၤ တၢ်သံပၢတၢ်ဒ်စီၤပၤအသိး စးထီၣ်လၢ စီၤအၤဒၣ် တုၤလီၤလၢ စီၤမိၤၡ့ ဒီးအပၢဘၣ် ပှၤလၢ အတမၤတၢ်ဒဲးဘး ဒ်စီၤအၤဒၣ် မၤဝဲအသိးစ့ၢ်ကီးလီၤ. စီၤအၤဒၣ်န့ၣ် လီၤဂာ်ဒီးပှၤလၢ အကဟဲဝဲတဂၤန့ၣ်လီၤ.
၁၅ ဘၣ်ဆၣ် တၢ်ဟ့ၣ်န့ၣ် တလီၤဂာ်ဒ် တၢ်ဒဲးဘးအံၤအသိးဘၣ်. ပှၤအါဂၤ မ့ၢ်သံလၢ ပိာ်ခွါတဂၤ အတၢ်ဒဲးဘးအဃိ သနာ်က့ ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ် ဒီးအတၢ်ဟ့ၣ်ကလီ ခီဖျိပိာ်ခွါတဂၤ လၢအမ့ၢ် ယ့ၣ်ၡူးခရံာ် အတၢ်သးကညီၤ ဒိၣ်ဒိၣ်မုၢ်မုၢ် အဃိန့ၣ် ကဲဘျုးလၢ ပှၤအါဂၤအဂီၢ် ဒိၣ်န့ၢ်အန့ၢ် စၢၢ်တလၢၢ်လီၤ. ၁၆ တကးဒံးဘၣ် တၢ်ဟ့ၣ်ကလီ ဒီးတၢ်လၢ အဟဲကဲထီၣ်အသး ခီဖျိပိာ်ခွါတဂၤ အတၢ်ဒဲးဘး အဃိန့ၣ် လီၤဆီလိာ်သးလၢ ကျဲဒ်အံၤစ့ၢ်ကီးလီၤ. ဖဲတၢ်ဒဲးဘးတမံၤအံၤ အိၣ်ထီၣ်ဝံၤအလီၢ်ခံ တၢ်စံၣ်ညီၣ်လီၤဘၣ်ဝဲ ပှၤဟီၣ်ခိၣ်ဖိတဖၣ်လီၤ. ဘၣ်ဆၣ် ဖဲပှၤမၤတၢ်ဒဲးဘး အါမးဝံၤအလီၢ်ခံ ကစၢ်ယွၤ ဟ့ၣ်ဝဲတၢ်ဟ့ၣ်လၢအမ့ၢ် တၢ်ပာ်တီပာ်လိၤ ပှၤဟီၣ်ခိၣ်ဖိလီၤ. ၁၇ ခီဖျိပှၤတဂၤ အတၢ်ဒဲးဘးအဃိ တၢ်သံပၢတၢ် ဒ်စီၤပၤအသိးလီၤ. ဘၣ်ဆၣ် တၢ်သးကညီၤ ဒိၣ်ဒိၣ်မုၢ်မုၢ် ဒီးတၢ်ဟ့ၣ်ကလီလၢအမ့ၢ် တၢ်ပာ်တီပာ်လိၤန့ၣ် မ့ၢ်တၢ်လၢ အဂ့ၤဒိၣ်န့ၢ်အန့ၣ်လီၤ. ပှၤလၢအဒိးန့ၢ်ဘၣ် တၢ်သ့ၣ်တဖၣ်အံၤန့ၣ် ပနာ်သ့ သပှၢ်တၢၢ်လၢ အဝဲသ့ၣ်ကမူဝဲဒီး ကပၢတၢ် ဒ်စီၤပၤတဖၣ်အသိး ခီဖျိပှၤတဂၤလၢအမ့ၢ် ယ့ၣ်ၡူးခရံာ်အဃိလီၤ.
၁၈ မ့မ့ၢ်ဒ်န့ၣ်န့ၣ် ခီဖျိလၢ တၢ်ဒဲးဘးတမံၤအဃိ တၢ်စံၣ်ညီၣ် လီၤဘၣ်ပှၤဟီၣ်ခိၣ်ဖိ အကလုာ် ကလုာ်လီၤ. ဒ်န့ၣ်အသိး ခီဖျိလၢ တၢ်မၤလၢ အတီအလိၤတမံၤအဃိ ပှၤဟီၣ်ခိၣ်ဖိ အကလုာ်ကလုာ် ဘၣ်တၢ်ပာ်တီပာ်လိၤ အဝဲသ့ၣ် ဒီးကန့ၢ်ဘၣ်တၢ်မူလီၤ. ၁၉ ဒီးခီဖျိလၢ ပှၤတဂၤ တဒိကနၣ်တၢ်ဘၣ်အဃိ ပှၤဟီၣ်ခိၣ်ဖိအါဂၤ ကဲထီၣ် ပှၤတၢ်ဒဲးဘးဖိလီၤ. ဒ်န့ၣ်အသိး ခီဖျိလၢ ပှၤတဂၤ အတၢ်ဒိကနၣ်အဃိ ပှၤအါဂၤ ကကဲထီၣ် ပှၤတီပှၤလိၤလီၤ. ၂၀ ဒီးစီၤမိၤၡ့ အတၢ်သိၣ်တၢ်သီ ဟဲအိၣ်ထီၣ်ဒ်သိး ကပာ်ဖျါထီၣ် ပှၤဟီၣ်ခိၣ်ဖိတဖၣ် မၤတၢ်ဒဲးဘး အါမးန့ၣ်လီၤ. ဘၣ်ဆၣ် ဖဲတၢ်ဒဲးဘး အါထီၣ်ဝဲအခါ ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ်စ့ၢ်ကီး အါထီၣ်ဝဲ ကွ့ၢ်ကွ့ၢ်လီၤ. ၂၁ အဃိ တၢ်ဒဲးဘးဒီးတၢ်သံ ပၢတၢ် ဒ်စီၤပၤအသိးလီၤ. ဒ်န့ၣ်အသိး ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ်စ့ၢ်ကီး ပၢတၢ်ဒ် စီၤပၤအသိး လၢတၢ်တီတၢ်လိၤအပူၤ ဒ်သိး ကဒုးအိၣ်ထီၣ် တၢ်မူအထူအယိာ် ခီဖျိ ပကစၢ်ယ့ၣ်ၡူးခရံာ်န့ၣ်လီၤ.