လီၣ်ဖျါ
၂၁ ဒီးယထံၣ်ဘၣ်မူခိၣ်အသီ ဒီးဟီၣ်ခိၣ်အသီလီၤ.+ မ့မ့ၢ်မူခိၣ်အလီၢ်လံၤ ဒီးဟီၣ်ခိၣ် အလီၢ်လံၤန့ၣ် ဒံကွံာ်လံ.+ ဒီးပီၣ်လဲၣ်+ တအိၣ်လၢၤဘၣ်. ၂ ဒီးယထံၣ်စ့ၢ်ကီး ဝ့ၢ်စီဆှံလၢအမ့ၢ် ယရူၤၡလ့ၣ်အသီလၢ အအိၣ်လၢ ကစၢ်ယွၤအိၣ်တၢ်အလီၢ် လၢမူခိၣ်န့ၣ်+ ဟဲလီၤဝဲ ဒီးအကတဲာ်ကတီၤ ပာ်စၢၤအသး ဒ်တလးမူးပိာ်မုၣ်တဂၤ မၤဃံမၤလၤထီၣ်အသးလၢ အဝၤအဂီၢ် အသိးလီၤ.+ ၃ ဒီးယနၢ်ဟူ တၢ်ကလုၢ်သီၣ်ဖးဒိၣ်လၢ လီၢ်ပစိာ်အအိၣ် တဲဝဲလၢ “ကွၢ်မီၤ, ကစၢ်ယွၤအဒဲ အိၣ်ဒီးပှၤဟီၣ်ခိၣ်ဖိလီၤ. ဒီးကစၢ်ယွၤ ကအိၣ်ဝဲဆိးဝဲဒီးအဝဲသ့ၣ် ဒီးအဝဲသ့ၣ် ကမ့ၢ်အပှၤဂီၢ်မုၢ်လီၤ. ဒီးကစၢ်ယွၤ အနီၢ်ကစၢ်န့ၣ် ကအိၣ်ဒီးအဝဲသ့ၣ်လီၤ.+ ၄ ဒီးကစၢ်ယွၤကထွါကွံာ် အဝဲသ့ၣ် အမဲာ်ထံခဲလၢာ်+ ဒီးတၢ်သံတအိၣ်လၢၤဘၣ်.+ ဒီးတၢ်သူၣ်အုးသးအုးမ့ၢ်ဂ့ၤ, တၢ်ဟီၣ်တၢ်ယၢၤမ့ၢ်ဂ့ၤ, တၢ်လၢအဆါမ့ၢ်ဂ့ၤ တအိၣ်လၢၤဘၣ်.+ တၢ်အလီၢ်လံၤလၢ အမၤသးအုးတ့ၢ်ပှၤန့ၣ် ဒံကွံာ်ဝဲလံ.”
၅ ဒီးပှၤတဂၤလၢ အဆ့ၣ်နီၤလၢ လီၢ်ပစိာ်အလိၤန့ၣ်+ တဲဝဲလၢ “ကွၢ်မီၤ, ယမၤကဲထီၣ် တၢ်အသီခဲလၢာ်လီၤ.”+ ဒီးအဝဲတဲဝဲလၢ “ကွဲးလီၤတၢ်ကတိၤတဖၣ်အံၤ မ့ၢ်လၢ တၢ်ကတိၤတဖၣ်အံၤ ပှၤနာ်န့ၢ်အီၤသ့ ဒီးမ့ၢ်ဝဲတီဝဲအဃိလီၤ.” ၆ ဒီးအဝဲတဲဘၣ်ယၤလၢ “တၢ်သ့ၣ်တဖၣ်န့ၣ် ဟဲကဲထီၣ်တ့ၢ်အသးလံ. ယမ့ၢ် ကဒီးဧ,* တၢ်အခီၣ်ထံး ဒီးတၢ်အကတၢၢ်လီၤ.+ ပှၤတဂၤဂ့ၤ တဂၤဂ့ၤလၢ အဲၣ်ဒိးအီထံန့ၣ် ယကဟ့ၣ်ကလီအီၤထံလၢ အဟဲလၢ ထံမူအထံထီၣ်ပၢၢ်လီၤ.+ ၇ ဒီးပှၤတဂၤဂ့ၤ တဂၤဂ့ၤလၢ အမၤနၢၤတၢ်န့ၣ် ကန့ၢ်သါဘၣ် တၢ်သ့ၣ်တဖၣ်န့ၣ်လီၤ. ဒီးယကမ့ၢ်အကစၢ်ယွၤ ဒီးအဝဲကမ့ၢ်ယဖိခွါလီၤ. ၈ မ့မ့ၢ်ပှၤလၢ အတၢ်သးဒူတအိၣ်ဘၣ်, ပှၤလၢ အတၢ်နာ်တအိၣ်ဘၣ်,+ ပှၤလၢအတကဆှီဘၣ် ဒီးလီၤသးဘၣ်အၢ, ပှၤလၢအမၤသံပှၤဂၤ,+ ပှၤမၤကမၣ် မုၣ်ကမၣ်ခွါတဖၣ်,*+ ပှၤလၢအမၤ တၢ်ဝံတၢ်နါ အတၢ်ဖံးတၢ်မၤ, ပှၤလၢအဘါတၢ်ဂီၤတၢ်ဖှီၣ် ဒီးပှၤလံၣ်တၢ်လီတၢ်+ ကိးဂၤဒဲးန့ၣ် အဝဲသ့ၣ် ကတုၤလၢ နိၣ်လၢအအိၣ်ဒီး မ့ၣ်အူဒီးကး*+ အပူၤ လၢအခီပညီမ့ၢ်ဝဲ တၢ်သံခံစုတစုလီၤ.”+
၉ မူခိၣ်ကလူး နွံဂၤလၢ အအိၣ်ဒီးလီခီဖျၢၣ် နွံဖျၢၣ်လၢ အပှဲၤဝဲဒီး တၢ်နးတၢ်ဖှီၣ် အလီၢ်ခံကတၢၢ်နွံခါန့ၣ်+ အကျါတဂၤ ဟဲတဲဘၣ်ယၤလၢ “ဟဲ, ယကဒုးနဲၣ်နၤလၢ တလးမူးပိာ်မုၣ် လၢအမ့ၢ် သိဖိအမါလီၤ.”+ ၁၀ အဃိ အဝဲစိာ်ကွံာ်ယၤဆူ ကစၢၢ်ဖးဒိၣ်ဖးထီအအိၣ် ခီဖျိလၢ သးစီဆှံ အတၢ်စိတၢ်ကမီၤလီၤ. ဒီးအဝဲဒုးနဲၣ်ယၤ ဝ့ၢ်စီဆှံ လၢအမ့ၢ် ယရူၤၡလ့ၣ် လၢအအိၣ်လၢ ကစၢ်ယွၤအအိၣ်တၢ်လီၢ် လၢမူခိၣ်န့ၣ်+ ဟဲလီၤဝဲ ၁၁ အိၣ်ဒီး ကစၢ်ယွၤအလၤကပီၤလီၤ.+ ဒီးဝ့ၢ်အတၢ်ကပီၤန့ၣ် လီၤဂာ်ဒ် လၢၢ်လၢ အလုၢ်ဒိၣ်ပှ့ၤဒိၣ်, ဒ်တၢ်မျၢ်နကၤသွဲး လၢအကပြုၢ်ကပြီၤဝဲဆှံဆှံ ဒ်လၢၢ်ဖျါကလၤအသိးလီၤ.+ ၁၂ ဝ့ၢ်န့ၣ်အိၣ်ဒီး တၢ်ဒူၣ်ဖးဒိၣ်ဖးထီလၢ အအိၣ်ဒီးတြဲၤ ၁၂ ဘ့ၣ် ဒီးမူခိၣ်ကလူး အိၣ်ဝဲ ၁၂ ဂၤ ဒီးအဝဲသ့ၣ် တဂၤစုာ်စုာ်န့ၣ် အိၣ်ဝဲလၢ တြဲၤတဘ့ၣ် စုာ်စုာ်အကပၤလီၤ. ဒီးပှၤအံၣ်စရ့လးဖိ ၁၂ ဒူၣ်အမံၤန့ၣ် အိၣ်ကွဲးအသးလၢ တြဲၤတဖၣ်န့ၣ် အလိၤလီၤ. ၁၃ လၢမုၢ်ထီၣ်တခီန့ၣ် တြဲၤအိၣ်သၢဘ့ၣ်, လၢကလံၤစိးတခီန့ၣ် တြဲၤအိၣ်သၢဘ့ၣ်, လၢကလံၤထံးတခီန့ၣ် တြဲၤအိၣ်သၢဘ့ၣ် ဒီးလၢမုၢ်နုာ်တခီန့ၣ် တြဲၤအိၣ်သၢဘ့ၣ်လီၤ.+ ၁၄ ဒီးဝ့ၢ်ဒူၣ်န့ၣ် အိၣ်စ့ၢ်ကီးဒီး လၢၢ်အခီၣ်ထံး ၁၂ ဖျၢၣ် ဒီးလၢလၢၢ်တဖၣ်အံၤအလိၤန့ၣ် မံၤအိၣ်ဝဲ ၁၂ ဖျၢၣ် လၢအမ့ၢ်သိဖိ အတၢ်မၢဖိ ၁၂ ဂၤ+ အမံၤလီၤ.
၁၅ ဒီးပှၤတဂၤလၢ အတဲတၢ်ဒီးယၤန့ၣ် ဖီၣ်ဃာ်ဝဲ တပိၢ်ထူတဘိ ဒ်သိးအကထိၣ်ဝဲဝ့ၢ်, ဝ့ၢ်အတြဲၤတဖၣ် ဒီးဝ့ၢ်ဒူၣ် အဂီၢ်လီၤ.+ ၁၆ ဒီးဝ့ၢ်န့ၣ် မ့ၢ်ဝဲတၢ်လွံၢ်နၢၣ်လၢ အကနူၤ ထဲသိးလိာ်အသးလီၤ. အလဲၢ် ဒီးအဒီၣ်ဃီၤန့ၣ် တုၤသိးထဲသိးလိာ်အသးလီၤ. ဒီးအဝဲထိၣ်ဝဲဝ့ၢ်လၢ တပိၢ်ဘိ ဒီးအလဲၢ်မ့ၢ်ဂ့ၤ, အဒီၣ်ဃီၤမ့ၢ်ဂ့ၤ, အကစီၤထီၣ်ထီမ့ၢ်ဂ့ၤ အိၣ်ဝဲ ၁,၃၇၉ မံးလာ်* ဒ်သိးသိးလီၤ. ၁၇ အဝဲထိၣ်စ့ၢ်ကီးဝဲ ဝ့ၢ်ဒူၣ် ဒီးအကစီၤထီၣ်ထီ အိၣ်ဝဲ ၁၄၄ ပျၢ်* ဒ်ပှၤဟီၣ်ခိၣ်ဖိ အတၢ်ထိၣ်အသိး ဒီးမူခိၣ်ကလူး အတၢ်ထိၣ်စ့ၢ်ကီး အိၣ်ဒ်န့ၣ်လီၤ. ၁၈ ဒီးဝ့ၢ်ဒူၣ်န့ၣ် ဘၣ်တၢ်တ့အီၤလၢ တၢ်မျၢ်နကၤသွဲး+ ဒီးဝ့ၢ်န့ၣ် မ့ၢ်ဝဲထူစီလၢ အလီၤဂာ်ဒ် မဲာ်ထံကလၤဆှံ အသိးလီၤ. ၁၉ ဝ့ၢ်ဒူၣ် အခီၣ်ထံးန့ၣ် ဘၣ်တၢ် မၤဃံမၤလၤထီၣ်အီၤလၢ လၢၢ်လၢအလုၢ်ဒိၣ်ပှ့ၤဒိၣ် ကိးကလုာ်ဒဲးလီၤ. လၢၢ်အဆိကတၢၢ်တဖျၢၣ် မ့ၢ်ဝဲတၢ်မျၢ်နကၤသွဲး, ခံဖျၢၣ်တဖျၢၣ် မ့ၢ်ဝဲတၢ်မျၢ်နံၤလါအဲး, သၢဖျၢၣ်တဖျၢၣ် မ့ၢ်ဝဲမဟူယၤဝါ, လွံၢ်ဖျၢၣ်တဖျၢၣ် မ့ၢ်ဝဲတၢ်မျၢ်လါဟ့, ၂၀ ယဲၢ်ဖျၢၣ်တဖျၢၣ် မ့ၢ်ဝဲမဟူယၤတိၤအသး, ဃုဖျၢၣ်တဖျၢၣ် မ့ၢ်ဝဲမဟူယၤဂီၤ, နွံဖျၢၣ်တဖျၢၣ် မ့ၢ်ဝဲတၢ်မျၢ်ဘီလါ, ဃိးဖျၢၣ်တဖျၢၣ် မ့ၢ်ဝဲတၢ်မျၢ်ဘီလါဟ့, ခွံဖျၢၣ်တဖျၢၣ် မ့ၢ်ဝဲတၢ်မျၢ်ဘီအူးသပးယၢ်, တဆံဖျၢၣ်တဖျၢၣ် မ့ၢ်ဝဲတၢ်မျၢ်ဘီဟ့, တဆံတၢဖျၢၣ်တဖျၢၣ် မ့ၢ်ဝဲတၢ်မျၢ်လါဂီၤ ဒီးတဆံခံဖျၢၣ်တဖျၢၣ် မ့ၢ်ဝဲတၢ်မျၢ်သကီၤဖီလီၤ. ၂၁ တကးဒံးဘၣ် တြဲၤ ၁၂ ဘ့ၣ်န့ၣ် မ့ၢ်ဝဲပလဲ ၁၂ ဖျၢၣ် ဒီးတြဲၤတဘ့ၣ်စုာ်စုာ်န့ၣ် ဘၣ်တၢ်တ့အီၤလၢ ပလဲတဖျၢၣ်စုာ်စုာ်လီၤ. ဒီးဝ့ၢ်အကျဲမုၢ်ခိၣ်န့ၣ် မ့ၢ်ဝဲထူစီ ဒီးအဖျါဆှံဝဲ ဒ်မဲာ်ထံကလၤအသိးလီၤ.
၂၂ လၢဝ့ၢ်ပူၤန့ၣ် ယတထံၣ်တၢ်လုၢ်ဟံၣ်ဘၣ်, မ့ၢ်လၢဝ့ၢ်အံၤ အတၢ်လုၢ်ဟံၣ်န့ၣ် မ့ၢ်ဝဲသ့တၢ်လၢာ်ကစၢ်+ ယဟိဝၤယွၤ* ဒီးသိဖိအဃိလီၤ. ၂၃ ဒီးမ့ၢ်လၢ ကစၢ်ယွၤအလၤကပီၤန့ၣ်+ မၤကပီၤထီၣ်ဝ့ၢ်တဖျၢၣ်အံၤ+ ဒီးဝ့ၢ်အံၤ အမ့ၣ်အူဒၢန့ၣ် မ့ၢ်ဝဲသိဖိအဃိ တလိၣ်လၢ မုၢ်မ့ၢ်ဂ့ၤ, လါမ့ၢ်ဂ့ၤ အတၢ်ကပီၤ ကဆဲးကပီၤလီၤလၢအပူၤဘၣ်. ၂၄ ပှၤကလုာ်တဖၣ် ကလဲၤတၢ်လၢ ဝ့ၢ်အံၤအတၢ်ကပီၤအဃိ+ ဒီးစီၤပၤတဖၣ်လၢ ဟီၣ်ခိၣ်ချၢန့ၣ် ကဟဲစိာ်ဝဲ အဝဲသ့ၣ် အတၢ်လၤကပီၤလၢ ဝ့ၢ်အံၤအပူၤလီၤ. ၂၅ လၢမုၢ်ဆါခီန့ၣ် ဝ့ၢ်အံၤအတြဲၤတဖၣ် တကးပံးဃာ်အသး နီတဘျီဘၣ် ဒီးဖဲန့ၣ်န့ၣ် မုၢ်နၤခီတအိၣ်ဘၣ်.+ ၂၆ ဒီးပှၤကလုာ်တဖၣ် အတၢ်လၤကပီၤ ဒီးအတၢ်ယူးတၢ်ယီၣ်န့ၣ် ကဘၣ်တၢ်ဟဲစိာ်အီၤလၢ ဝ့ၢ်အံၤအပူၤလီၤ.+ ၂၇ ဘၣ်ဆၣ် တၢ်လၢ အဘၣ်အၢဘၣ်သီ ဒီးပှၤလၢ အမၤတၢ်လၢ အလီၤသးဘၣ်အၢ ဒီးလံၣ်တၢ်လီတၢ်န့ၣ် လ့ၤတက့ၤ တနုာ်လီၤဘၣ်လၢ ဝ့ၢ်ပူၤဘၣ်.+ ထဲဒၣ်ပှၤလၢအမံၤ ဘၣ်တၢ်ကွဲးလီၤအီၤလၢ သိဖိအလံာ်မူအပူၤန့ၣ် ကနုာ်လီၤဘၣ်လၢ ဝ့ၢ်ပူၤလီၤ.+