ယိၤဟၣ်

၂၁ ဖဲန့ၣ်ဝံၤအလီၢ်ခံ ယ့ၣ်ၡူးလီၣ်ဖျါထီၣ်​ ကဒီးအသးလၢ အပျဲၢ်အဘီၣ်တဖၣ်အအိၣ်​ ဖဲပီၣ်လဲၣ်​ တံၤဘ့ၤရံလီၤ. အဝဲလီၣ်ဖျါထီၣ်အသးလၢ ကျဲဒ်အံၤလီၤ. ၂ ဘၣ်ဖဲ စီၤၡံမိၣ်ပ့းတရူး, စီၤသိၤမါ (ပှၤကိးအီၤလၢ ပှၤသဃံာ်),+ စီၤနၤသန့လး+ လၢအအိၣ်ဟဲလၢ ကၤနါ လၢကၤလံၤလါ, စီၤစ့းဘ့းဒဲ+ အဖိခွါတဖၣ်​ ဒီးအပျဲၢ်အဘီၣ်​ လၢအဂၤခံဂၤ အိၣ်ဝဲတပူၤဃီလီၤ. ၃ ဒီးစီၤၡံမိၣ်ပ့းတရူး တဲအဝဲသ့ၣ်လၢ “ယကလဲၤဖီၣ်​ ညၣ်လီၤ.” အဝဲသ့ၣ်​ တဲအီၤလၢ “ပကလဲၤပိာ်နခံလီၤ.” အဃိ အဝဲသ့ၣ်​ လဲၤဒိးထီၣ်ကဘီ ဘၣ်ဆၣ်​ တၢ်တနၤန့ၣ်​ အဝဲသ့ၣ်တန့ၢ် တၢ်နီတမံၤဘၣ်.+

၄ ဖဲမုၢ်ဝါထီၣ်​ အဆၢကတီၢ်န့ၣ်​ ယ့ၣ်ၡူးဆၢထၢၣ်ဝဲလၢ ပီၣ်လဲၣ်ကၢၢ်နံၤ ဘၣ်ဆၣ်​ အပျဲၢ်အဘီၣ်တဖၣ်​ တသ့ၣ်ညါဝဲလၢ အမ့ၢ်ယ့ၣ်ၡူးဘၣ်.+ ၅ ယ့ၣ်ၡူးတဲ အဝဲသ့ၣ်လၢ “ဖိသ့ၣ်ဧၢ, သုတၢ်အီၣ်အိၣ်တမံၤမံၤဧါ.” အဝဲသ့ၣ်​ တဲဆၢဝဲလၢ “တအိၣ်ဘၣ်.” ၆ အဝဲတဲဘၣ်​ အဝဲသ့ၣ်လၢ “ကွံာ်လီၤစၤလၢ ကဘီအဃၢၤလၢ အထွဲတခီ ဒီးသုကမၤန့ၢ် ညၣ်တနီၤလီၤ.” အဃိ အဝဲသ့ၣ်​ ကွံာ်လီၤဝဲစၤ ဒီးမ့ၢ်လၢညၣ်န့ၢ် အါမးအဃိ အဝဲသ့ၣ်တွံၢ်ထီၣ်စၤ တန့ၢ်ဘၣ်.+ ၇ ဒီးယ့ၣ်ၡူး အပျဲၢ်အဘီၣ်လၢ အအဲၣ်ဝဲတဂၤ+ တဲဘၣ်စီၤပ့းတရူးလၢ “အဝဲမ့ၢ် ကစၢ်လီၤ.” ဖဲစီၤၡံမိၣ်ပ့းတရူး နၢ်ဟူဘၣ်လၢ အမ့ၢ်ကစၢ်အခါ ခီဖျိလၢ အအိၣ်ဘ့ၣ်ဆ့ အဃိ အသိးထီၣ်ဝဲအဆ့ကၤဒီး ဖုလီၤဝဲလၢ ပီၣ်လဲၣ်ပူၤလီၤ. ၈ ဘၣ်ဆၣ်​ အပျဲၢ်အဘီၣ်​ လၢအဂၤတဖၣ်​ ဟဲက့ၤဒိးကဘီလၢ အဆံးတဘ့ၣ်န့ၣ်​ ဒီးတွံၢ်ဝဲအစၤလၢ အပှဲၤဒီးညၣ်လီၤ. အဝဲသ့ၣ်​ အိၣ်တယံၤဒီးကၢၢ် အါအါဘၣ်​ ဒီးကယံၤထဲ အပျၢ် ၂၀၀ ဃၣ်ဃၣ်လီၤ.*

၉ ဖဲအဝဲသ့ၣ်​ လဲၤတုၤလၢ ထံကၢၢ်နံၤ အဆၢကတီၢ် အဝဲသ့ၣ်ထံၣ်ဝဲ ညၣ်အိၣ်ဝဲလၢ မ့ၣ်အူအ့ၣ်​ ကဲၤကဖးအဖီခိၣ်​ ဒီးကိၣ်အိၣ်ဝဲစ့ၢ်ကီးလီၤ. ၁၀ ယ့ၣ်ၡူးတဲအဝဲသ့ၣ်လၢ “ညၣ်လၢသုဖီၣ်န့ၢ်အီၤ ဖဲမၢကၢာ်န့ၣ်​ ဟဲစိာ်အီၤ တနီၤတက့ၢ်.” ၁၁ အဃိ စီၤၡံမိၣ်ပ့းတရူး လဲၤထီၣ်လၢကဘီပူၤ ဒီးဟဲက့ၤတွံၢ်စၤလၢ အပှဲၤဒီးညၣ်ဖးဒိၣ်​ ၁၅၃ ဘ့ၣ်န့ၣ်​ တုၤလၢ ထံကၢၢ်ခိၣ်လီၤ. ညၣ်အါထဲအံၤညါ သနာ်က့ စၤတညာ်ဝဲဘၣ်. ၁၂ ယ့ၣ်ၡူး တဲအဝဲသ့ၣ်လၢ “ဟဲအီၣ်​ ဂီၤခီတၢ်အီၣ်မီၤ.” ဘၣ်ဆၣ်​ အပျဲၢ်အဘီၣ်​ သ့ၣ်ညါလၢအမ့ၢ် ကစၢ်အဃိ အဝဲသ့ၣ်သံကွၢ်အီၤလၢ “နမ့ၢ်မတဂၤလဲၣ်” တဘူၣ်နီတဂၤဘၣ်. ၁၃ ယ့ၣ်ၡူး ဟံးန့ၢ်ကိၣ်ဒီး ဟ့ၣ်လီၤအဝဲသ့ၣ်​ ဒီးအမၤဝဲညၣ်​ ဒ်န့ၣ်အသိးစ့ၢ်ကီးလီၤ. ၁၄ ဖဲယ့ၣ်ၡူး ဂဲၤဆၢထၢၣ်သမူထီၣ်က့ၤ ဝံၤအလီၢ်ခံ အလီၣ်ဖျါထီၣ်အသးလၢ အပျဲၢ်အဘီၣ်တဖၣ်​ အမဲာ်ညါန့ၣ်​ တၢ်တဘျီအံၤ မ့ၢ်ဝဲသၢဘျီတဘျီလီၤ.+

၁၅ ဖဲအဝဲသ့ၣ်​ အီၣ်ဂီၤခီ တၢ်အီၣ်ဝံၤအလီၢ်ခံ ယ့ၣ်ၡူးသံကွၢ် စီၤၡံမိၣ်ပ့းတရူးလၢ “စီၤယိၤဟၣ်အဖိခွါ စီၤၡံမိၣ်ဧၢ, နအဲၣ်ယၤဒိၣ်န့ၢ် တၢ်သ့ၣ်တဖၣ်အံၤ* ဒံးဧါ.” အဝဲတဲဆၢက့ၤ ယ့ၣ်ၡူးလၢ “မ့ၢ် ကစၢ်ဧၢ, နသ့ၣ်ညါလၢ ယအဲၣ်နၤလီၤ.” ယ့ၣ်ၡူးတဲအီၤလၢ “လုၢ်အီၣ်လုၢ်အီ ယသိဖိတဖၣ်တက့ၢ်.”+ ၁၆ ယ့ၣ်ၡူး သံကွၢ်ကဒီးအီၤ ခံဘျီတဘျီလၢ “စီၤယိၤဟၣ်အဖိခွါ စီၤၡံမိၣ်ဧၢ, နအဲၣ်ယၤဧါ.” အဝဲတဲဆၢက့ၤလၢ “မ့ၢ် ကစၢ်ဧၢ, နသ့ၣ်ညါလၢ ယအဲၣ်နၤလီၤ.” ယ့ၣ်ၡူးတဲအီၤလၢ “ကွၢ်ထွဲ ယသိဖိတဖၣ်တက့ၢ်.”+ ၁၇ ယ့ၣ်ၡူး သံကွၢ်ကဒီးအီၤ သၢဘျီတဘျီလၢ “စီၤယိၤဟၣ်အဖိခွါ စီၤၡံမိၣ်ဧၢ, နအဲၣ်ယၤဧါ.” ဒီးမ့ၢ်လၢ ယ့ၣ်ၡူးသံကွၢ် စီၤပ့းတရူးလၢ “မ့ၢ်နအဲၣ်ယၤဧါ” ပှဲၤထီၣ်​ သၢဘျီတဘျီအဃိ စီၤပ့းတရူးသးအုးလီၤ. အဃိ အတဲယ့ၣ်ၡူးလၢ “ကစၢ်ဧၢ, နသ့ၣ်ညါတၢ်ခဲလၢာ် ဒီးနသ့ၣ်ညါလၢ ယအဲၣ်နၤလီၤ.” ယ့ၣ်ၡူးတဲအီၤလၢ “လုၢ်အီၣ်လုၢ်အီ ယသိဖိတဖၣ်တက့ၢ်.+ ၁၈ ယကတဲဘၣ်နၤ တီတီလၢ ဖဲနသးစၢ်အခါ နကူထီၣ်သိးထီၣ်လၢ နနီၢ်ကစၢ် ဒီးနဟးဖဲ နအဲၣ်ဒိးဟးလီၤ. ဘၣ်ဆၣ်​ ဖဲနသးပှၢ်ထီၣ်အခါ နကယူာ်ထီၣ်နစု ဒီးပှၤအဂၤတဂၤ ကဒုးကူထီၣ်သိးထီၣ်နၤ ဒီးကလဲၤစိာ်နၤလၢ တၢ်လီၢ်လၢ နတအဲၣ်ဒိး လဲၤဘၣ်လီၤ.” ၁၉ အဝဲတဲဝဲ ဒ်န့ၣ်န့ၣ်​ မ့ၢ်ဒ်သိး ကပာ်ဖျါထီၣ်ဝဲလၢ စီၤပ့းတရူး ကသံဒ်လဲၣ်​ ဒီးဖဲအသံအခါ ကကဲထီၣ်​ တၢ်လၤကပီၤလၢ ကစၢ်ယွၤအဂီၢ်လီၤ. ဖဲယ့ၣ်ၡူးတဲဝဲဒ်န့ၣ်​ ဝံၤအလီၢ်ခံ အတဲဘၣ်​ စီၤပ့းတရူးလၢ “ဆဲးပိာ်ယခံတက့ၢ်.”+

၂၀ စီၤပ့းတရူး ဃၣ်ဃီၤအသးဒီး ထံၣ်ဝဲယ့ၣ်ၡူး အပျဲၢ်အဘီၣ်လၢ အအဲၣ်ဝဲတဂၤန့ၣ်+ ပိာ်ထီၣ်​ အဝဲသ့ၣ်အခံလီၤ. အဝဲမ့ၢ်ပှၤလၢ အသုးဘူးအသးဆူ ယ့ၣ်ၡူးအသးနါပှၢ် ဖဲဟါတၢ်အီၣ်​ အဆၢကတီၢ် ဒီးသံကွၢ်ယ့ၣ်ၡူးလၢ “ကစၢ်ဧၢ, ပှၤလၢ အကဟ့ၣ်လီၤကွံာ်နၤန့ၣ်​ မ့ၢ်မတဂၤလဲၣ်.” ၂၁ ဖဲစီၤပ့းတရူး ထံၣ်အီၤအခါ အဝဲတဲဘၣ်​ ယ့ၣ်ၡူးလၢ “ကစၢ်ဧၢ, အဝဲမီၤ, တၢ်ကမၤအသး ဒီးအီၤဒ်လဲၣ်.” ၂၂ ယ့ၣ်ၡူးတဲအီၤလၢ “ယသးမ့ၢ်အိၣ်လၢ အဝဲကအိၣ်တုၤလၢ ယဟဲက့ၤန့ၣ်​ မ့ၢ်အဘၣ်ဃးဒီးနၤဒ်လဲၣ်. မ့မ့ၢ်နၤန့ၣ်​ ဆဲးပိာ်ယခံတက့ၢ်.” ၂၃ အဃိ လၢဒီပုၢ်ဝဲၢ်တဖၣ်အကျါန့ၣ်​ တၢ်ကတိၤ ရၤလီၤအသးလၢ ယ့ၣ်ၡူးအပျဲၢ်အဘီၣ်တဂၤအံၤ တသံဘၣ်ဘၣ်. ဘၣ်ဆၣ်​ အဝဲတသံဘၣ်န့ၣ်​ ယ့ၣ်ၡူးတတဲဝဲဘၣ်. ယ့ၣ်ၡူးတဲဝဲလၢ “ယသးမ့ၢ်အိၣ်လၢ အဝဲကအိၣ်တုၤလၢ ယဟဲက့ၤန့ၣ်​ မ့ၢ်အဘၣ်ဃးဒီးနၤဒ်လဲၣ်.”

၂၄ အဝဲ မ့ၢ်ယ့ၣ်ၡူးအပျဲၢ်အဘီၣ်လၢ+ အအုၣ်သးဘၣ်ဃးဒီး တၢ်ဂ့ၢ်တဖၣ်အံၤ ဒီးအကွဲးဝဲ တၢ်ဂ့ၢ်တဖၣ်အံၤ ဒီးပသ့ၣ်ညါလၢ အတၢ်အုၣ်သးန့ၣ်​ မ့ၢ်ဝဲတီဝဲလီၤ.

၂၅ နီၢ်ကီၢ်န့ၣ်​ ယ့ၣ်ၡူးမၤဝဲ တၢ်အဂၤတဖၣ်စ့ၢ်ကီး အိၣ်ဝဲဒီဒူၣ်လီၤ. တၢ်ဂ့ၢ်တဖၣ်န့ၣ်​ မ့ၢ်ဘၣ်တၢ်ကွဲးလီၤအီၤ ခဲလၢာ်န့ၣ်​ ယဆိကမိၣ်လၢ လံာ်ထူလၢ တၢ်ကွဲးအီၤတဖၣ်န့ၣ်​ ဟီၣ်ခိၣ်တတြီၢ်ဘၣ်.+