အ့းဖ့းစူး
၆ ဖိသၣ်သ့ၣ်ဧၢ, ဒိကနၣ်သုမိၢ်သုပၢ်+ ဒ်ကစၢ်အတၢ်ဘၣ်သး အိၣ်ဝဲအသိး* တက့ၢ်. သုမ့ၢ်မၤဒ်န့ၣ်န့ၣ် မ့ၢ်တၢ်လၢ ကစၢ်ယွၤထံၣ်ဝဲလၢ အဘၣ်လီၤ. ၂ “ယူးယီၣ်ပာ်ကဲ နမိၢ်ဒီးနပၢ်တက့ၢ်.”+ အဝဲန့ၣ် မ့ၢ်ဝဲတၢ်မၤလိာ် အဆိကတၢၢ်တထံၣ် လၢအပၣ်ဃုာ်ဒီး တၢ်အၢၣ်လီၤလီၤ. ဒီးတၢ်အၢၣ်လီၤအဝဲအံၤ တဲဝဲလၢ ၃ “မ့ၢ်ဒ်သိး နတၢ်အိၣ်မူ ကလဲၤအသး ဂ့ၤဂ့ၤဘၣ်ဘၣ် ဒီးဒ်သိး နသးသမူကထီလၢ ဟီၣ်ခိၣ်ချၢအဂီၢ်လီၤ.” ၄ ပၢ်သ့ၣ်ဧၢ, မၤအ့န့သုဖိတဖၣ် အသးတဂ့ၤ.+ ဆဲးကွၢ်လုၢ်ဒိၣ်ထီၣ် အဝဲသ့ၣ်လၢ ယဟိဝၤယွၤ* အတၢ်သိၣ်လိနဲၣ်လိ+ ဒီးအတၢ်ဟံးစုနဲၣ်ကျဲတက့ၢ်.+
၅ ကုၢ်သ့ၣ်ဧၢ, ဒ်သုဒိကနၣ် ခရံာ်အသိး ဒိကနၣ် သုကစၢ်လၢ+ ဟီၣ်ခိၣ်ချၢအံၤ အကလုၢ်လၢ တၢ်သူၣ်ဘျၢသးဘျၢအပူၤ ပှဲၤဒီးတၢ်ပျံၤတၢ်ဖုးဒီး တၢ်ကနိးကစုာ်တက့ၢ်. ၆ ဒီးတဘၣ်မ့ၢ်ထဲလၢ ပှၤဂၤကွၢ်သုအဆၢကတီၢ် ဒ်သိးသုကလူၤဘၣ် ပှၤသးအဂီၢ်ဘၣ်.+ ဘၣ်ဆၣ် ကဘၣ်မ့ၢ်ဒ် ခရံာ်အကုၢ်လၢ အမၤကစၢ်ယွၤ အတၢ်ဘၣ်သးလၢ အသးဒီဖျၢၣ်လီၤ.+ ၇ မၤကုၢ်အတၢ်မၤ အိၣ်ဒီးတၢ်ပာ်သူၣ်ပာ်သး လၢအဂ့ၤ ဒ်သုမၤအီၤလၢ ယဟိဝၤယွၤ အဂီၢ်တက့ၢ်.+ ဒီးတဘၣ်မ့ၢ် ဒ်သိးသုမၤအီၤလၢ ပှၤဟီၣ်ခိၣ်ဖိအဂီၢ် တဂ့ၤ. ၈ သုသ့ၣ်ညါလၢ ပှၤတဂၤစုာ်စုာ်လၢအမ့ၢ် ကုၢ်မ့ၢ်ဂ့ၤ, ပှၤလၢအအိၣ်ဒီးတၢ်သဘျ့မ့ၢ်ဂ့ၤ အဝဲမ့ၢ်မၤတၢ်ဂ့ၤ တမံၤဂ့ၤတမံၤဂ့ၤန့ၣ် အဝဲကန့ၢ်ဘၣ်က့ၤတၢ်လၢ ယဟိဝၤယွၤ အအိၣ်လီၤ.+ ၉ ကစၢ်သ့ၣ်ဧၢ, ရ့ဒီးသုကုၢ်ဒ်န့ၣ် အသိးတက့ၢ်. ဒီးတဘၣ်တဲပျံၤတဲဖုး အဝဲသ့ၣ်တဂ့ၤ. သုသ့ၣ်ညါလၢ သုဒီးသုကုၢ်န့ၣ် အကစၢ်မ့ၢ် တဂၤဃီလၢ အအိၣ်လၢမူခိၣ်+ ဒီးအဝဲတကွၢ်မဲာ် ပှၤနီတဂၤဘၣ်.
၁၀ လၢခံကတၢၢ်န့ၣ် မ်သုဆဲးဒိးန့ၢ်ဘၣ် တၢ်စိတၢ်ကမီၤလၢ+ ကစၢ်အအိၣ် ခီဖျိ အတၢ်ဂံၢ်တၢ်ဘါ ဒိၣ်ဒိၣ်မုၢ်မုၢ်န့ၣ်တက့ၢ်. ၁၁ ဒ်သိး သုဆၢထၢၣ်ဂၢၢ်ကျၢၤ ဒီးတြီဆၢမုၣ်ကီၤလံၢ် အတၢ်ကူၣ်ထီၣ်ဖးလီၤတဖၣ် ကသ့အဂီၢ် ဟံးထီၣ်ဖီၣ်ထီၣ် တၢ်စုကဝဲၤခဲလၢာ်+ လၢအဟဲလၢ ကစၢ်ယွၤ အအိၣ်တက့ၢ်. ၁၂ တမ့ၢ်လၢ ပဒုးလိာ်သးဒီး+ ပှၤဟီၣ်ခိၣ်ဖိဘၣ်. ပဒုးလိာ်သးဒီး တၢ်ပၢတၢ်ပြးတဖၣ်, တၢ်စိတၢ်ကမီၤတဖၣ် ဒီးခိၣ်နၢ်တဖၣ်လၢ အပၢဝဲဟီၣ်ခိၣ်လၢ အပှဲၤဒီးတၢ်ခံးအံၤလီၤ. အဝဲသ့ၣ်မ့ၢ်ဝဲ ပှၤနီၢ်သးဖိလၢ အအၢအသီတဖၣ်+ လၢအအိၣ်လၢ မူခိၣ်လီၤ. ၁၃ လၢတၢ်န့ၣ်အဃိ ဟံးထီၣ်ဖီၣ်ထီၣ် တၢ်စုကဝဲၤခဲလၢာ်လၢ အဟဲလၢကစၢ်ယွၤအအိၣ်+ ဒ်သိးသုတြီဆၢတၢ် ဖဲမုၢ်နံၤလၢ အအၢအသီတဖၣ်အတီၢ်ပူၤ ကန့ၢ်အဂီၢ် ဒီးဒ်သိးဖဲသုမၤ တၢ်ခဲလၢာ်ဝံၤအခါ သုဆၢထၢၣ်ဂၢၢ်ကျၢၤ ကန့ၢ်အဂီၢ်တက့ၢ်.
၁၄ အဃိ ဆၢထၢၣ်ဂၢၢ်ကျၢၤ ဒီးစၢဃာ်သုယီၢ်ဒ့လၢ တၢ်မ့ၢ်တၢ်တီ အယီၢ်တကိး*+ ဒီးသိးထီၣ် တၢ်တီတၢ်လိၤ အသဃိး*+ တက့ၢ်. ၁၅ ဒီးဒိးထီၣ်ပာ်စၢၤ ခီၣ်ဖံးလၢ သုခီၣ်လိၤဒ်သိး သုကအိၣ် ကတဲာ်ကတီၤပာ်စၢၤ သုသးထီဘိလၢ သုကစံၣ်တဲၤတဲလီၤ တၢ်သးခုကစီၣ် ဘၣ်ဃးဒီး တၢ်ဃူတၢ်ဖိးအဂ့ၢ်တက့ၢ်.+ ၁၆ ထဲန့ၣ်တကးဒံးဘၣ် ဒ်သိးသုမၤလီၤပံာ် မုၣ်ကီၤလံၢ်* အပျၢ်မ့ၣ်အူခဲလၢာ်+ ကသ့အဂီၢ် ဟံးထီၣ် တၢ်နာ်အကတီၤဖးဒိၣ်+ တဘ့ၣ်တက့ၢ်. ၁၇ ဖျီၣ်ထီၣ် တၢ်အုၣ်က့ၤခီၣ်က့ၤ အခိၣ်ဖျီၣ်ထး+ ဒီးဟံးထီၣ် သးစီဆှံအနး လၢအမ့ၢ်ကစၢ်ယွၤ အကလုၢ်ကထါ+ န့ၣ်တက့ၢ်. ၁၈ ဒီးဆဲးဃ့ထုကဖၣ်တၢ် ကိးဆၢကတီၢ်ဒဲးလၢ တၢ်ဃ့ထုကဖၣ် ကိးကလုာ်ဒဲး+ ဒီးတၢ်ဃ့ကညးတၢ် ကိးကလုာ်ဒဲး ခီဖျိလၢ သးစီဆှံန့ၣ်တက့ၢ်.+ စီၣ်မဲာ်စီၣ်နါ* ဒီးဃ့ကညး ကစၢ်ယွၤလၢ ပှၤစီဆှံခဲလၢာ်အဂီၢ် ထီဘိတက့ၢ်. ၁၉ ဒီးဖဲယအိးထီၣ် ယထးခိၣ်အခါ ဒ်သိး ကစၢ်ယွၤကဟ့ၣ်ယၤ တၢ်ကတိၤလၢ အဘၣ် ဒီးယတဲဖျါထီၣ် တၢ်သးခုကစီၣ် အတၢ်ခူသူၣ်စီဆှံအဂ့ၢ်+ ဒူဒူကသ့အဂီၢ် ဃ့ထုကဖၣ်စ့ၢ်ကီး လၢယဂီၢ်တက့ၢ်. ၂၀ လၢတၢ်သးခုကစီၣ်အဂီၢ် ယမၤတၢ်ဒ် ပှၤခၢၣ်စးတဂၤလၢ+ အဘၣ်တၢ်စၢဃာ်အီၤဒီး ပျံၤထးတဖၣ်လီၤ. ဃ့ထုကဖၣ်တၢ်ဒ်သိး ယကတဲ တၢ်သးခုကစီၣ်လၢ တၢ်သးဒူအပူၤ ဒ်ယကြၢးတဲအီၤ အသိးတက့ၢ်.
၂၁ ဒ်သိးသုကသ့ၣ်ညါ တၢ်ဂ့ၢ်လၢအဘၣ်ဃးဒီးယၤ ဒီးတၢ်မၤအသးဒီးယၤ ဒ်လဲၣ်အဂီၢ် ဒီပုၢ်ဝဲၢ်သးဘိ စီၤတူဃံၤကူး+ လၢအမ့ၢ် ကစၢ်အခ့အပှၤလၢ အသးတီတဂၤအံၤ ကဒုးသ့ၣ်ညါသု တၢ်ခဲလၢာ်လီၤ.+ ၂၂ အဃိ ယကဆှၢလီၤအီၤလၢသုအိၣ် ဒ်သိးသုကသ့ၣ်ညါ တၢ်မၤအသးဒီးပှၤဒ်လဲၣ် ဒီးဒ်သိး အကမၤမုာ်ထီၣ် သုသးအဂီၢ်လီၤ.
၂၃ တၢ်ဃူတၢ်ဖိး ဒီးတၢ်အဲၣ်လၢ အအိၣ်ဒီးတၢ်နာ် လၢအဟဲလၢ ပၢ်ကစၢ်ယွၤ ဒီးကစၢ်ယ့ၣ်ၡူးခရံာ် အအိၣ်န့ၣ် မ်အအိၣ်ဒီး ဒီပုၢ်ဝဲၢ်တဖၣ်တက့ၢ်. ၂၄ ဒီးမ်တၢ်သးကညီၤဒိၣ်ဒိၣ်မုၢ်မုၢ် အိၣ်ဒီးပှၤခဲလၢာ်လၢ အအဲၣ်ပကစၢ် ယ့ၣ်ၡူးခရံာ်လၢ တၢ်အဲၣ်လၢ အဟးဂီၤတသ့ဘၣ် န့ၣ်တက့ၢ်.