လီၣ်ဖျါ

၂ “ကွဲးန့ၢ်ဝ့ၢ်အ့းဖ့းစူး+ တၢ်အိၣ်ဖှိၣ်အကလူး+ ဒ်အံၤတက့ၢ်. ပှၤတဂၤလၢ အဖီၣ်ဃာ် ဆၣ်နွံဖျၢၣ်လၢ အစုထွဲ ဒီးဟးဝဲလၢ မ့ၣ်အူဒၢထူနွံဖျၢၣ်အကျါန့ၣ်+ တဲဝဲဒ်အံၤလီၤ. ၂ ‘ယသ့ၣ်ညါတၢ်လၢ နမၤတဖၣ်လီၤ. ဒီးယသ့ၣ်ညါ နတၢ်ဂုာ်ကျဲးစၢး ဒီးနတၢ်တူၢ်န့ၢ်ခီၣ်ကဲလီၤ. ယသ့ၣ်ညါလၢ နတတူၢ်လိာ် ပှၤအၢပှၤသီတဖၣ်ဘၣ်. ဒီးပှၤလၢအတဲလၢ အမ့ၢ်တၢ်မၢဖိတဖၣ်+ ဘၣ်ဆၣ် အတမ့ၢ်တၢ်မၢဖိနီၢ်ကီၢ်ဘၣ်န့ၣ် နမၤကွၢ်အဝဲသ့ၣ် ဒီးနထံၣ်ဘၣ်လၢ အဝဲသ့ၣ်မ့ၢ်ပှၤလၢ အလံၣ်တၢ်လီတၢ်တဖၣ်လီၤ. ၃ နပာ်ဖျါထီၣ်စ့ၢ်ကီး တၢ်တူၢ်န့ၢ်ခီၣ်ကဲ ဒီးနတူၢ်တၢ်အါမံၤလၢ ယမံၤအဃိ+ ဘၣ်ဆၣ် နသးတလီၤဘှံးလီၤတီၤဘၣ်.+ ၄ သနာ်က့ မ့ၢ်လၢ နပျဲလီၤမၢ်ကွံာ် နတၢ်အဲၣ်လၢ အအိၣ်ဒီးနၤလၢ အခီၣ်ထံးအဃိ ယပာ်တၢ်ကမၣ်လၢနလိၤလီၤ.

၅ “‘အဃိ သ့ၣ်နီၣ်ထီၣ်လၢ နလီၤတဲာ်ကွံာ် ဖးယံၤလံ. ဒီးပီၢ်ယၢ်လီၤက့ၤနသး+ ဒီးမၤက့ၤတၢ်လၢ နမၤလၢအခီၣ်ထံးန့ၣ်တက့ၢ်. နမ့ၢ်တပီၢ်ယၢ်လီၤက့ၤ နသးဘၣ်န့ၣ်+ ယကဟဲလၢနအိၣ် ဒီးယကထုးထီၣ်ကွံာ် နမ့ၣ်အူဒၢလၢအလီၢ်လီၤ.+ ၆ ဘၣ်ဆၣ် နအိၣ်ဒီး တၢ်ဂ့ၤတမံၤလၢအမ့ၢ် နသးဟ့တၢ်လၢ ပှၤနံၤကလါဖိအကရူၢ်+ မၤဝဲတဖၣ် ဒ်ယသးဟ့အသိး စ့ၢ်ကီးလီၤ. ၇ ဒိကနၣ်တၢ်လၢ သးစီဆှံတဲဝဲ တၢ်အိၣ်ဖှိၣ်တဖၣ်+ လီၤတံၢ်လီၤဆဲးတက့ၢ်. ပှၤလၢအမၤနၢၤတၢ်န့ၣ်+ ယကဟ့ၣ်အီၣ်အီၤလၢ သ့ၣ်တၢ်မူအသၣ်လၢ+ အအိၣ်လၢ ကစၢ်ယွၤ အပၤရဒံစူးအပူၤလီၤ.’

၈ “ကွဲးန့ၢ်ဝ့ၢ်စမူရနၤ တၢ်အိၣ်ဖှိၣ်အကလူး ဒ်အံၤတက့ၢ်. ‘တၢ်အဆိကတၢၢ် ဒီးတၢ်အလီၢ်ခံကတၢၢ်’+ လၢအမ့ၢ် ပှၤလၢအသံဝံၤဒီး သမူထီၣ်က့ၤကဒီးတဂၤန့ၣ်+ တဲဝဲလၢ ၉ ‘ယသ့ၣ်ညါ နတၢ်နးတၢ်ဖှီၣ် ဒီးနတၢ်ဖှီၣ်တၢ်ယာ်လီၤ. ဘၣ်ဆၣ် နကဲပှၤထူးပှၤတီၤလီၤ.+ ဒီးပှၤလၢ အကိးလီၤအသးလၢ ပှၤယူဒၤဖိ ဒီးကတိၤထီဒါနၤန့ၣ် ယသ့ၣ်ညါလီၤ. ဘၣ်ဆၣ် အဝဲသ့ၣ်တမ့ၢ် ပှၤယူဒၤဖိနီၢ်ကီၢ်ဘၣ်. အဝဲသ့ၣ် မ့ၢ်ပှၤတဒူၣ်* လၢအဘၣ်ဃးဒီး မုၣ်ကီၤလံၢ်လီၤ.*+ ၁၀ တယံာ်တမီၢ် တၢ်လၢနကတူၢ်ဘၣ်တဖၣ်န့ၣ် တဘၣ်ပျံၤအီၤတဂ့ၤ.+ မုၣ်ကီၤလံၢ်ကဆဲး ဖၢနုာ်သုဝဲတနီၤနီၤ လၢဃိာ်ပူၤ ဒ်သိး သုကဘၣ်တၢ်မၤကွၢ်သု လၢလၢပှဲၤပှဲၤအဂီၢ် ဒီးသုကဘၣ်နးဘၣ်ဖှီၣ် အသီတဆံလီၤ. တီတုၤလၢ နသံတစုတက့ၢ်. ဒီးယကဟ့ၣ်နၤ တၢ်မူအခိၣ်သလုးလီၤ.+ ၁၁ ဒိကနၣ်တၢ်လၢ+ သးစီဆှံတဲဝဲ တၢ်အိၣ်ဖှိၣ်တဖၣ် လီၤတံၢ်လီၤဆဲးတက့ၢ်. ပှၤလၢအမၤနၢၤတၢ်န့ၣ်+ လ့ၤတက့ၤ တတူၢ်ဘၣ် တၢ်သံခံစုတစုဘၣ်.’+

၁၂ “ကွဲးန့ၢ်ဝ့ၢ်ပ့ၢ်ကမူး တၢ်အိၣ်ဖှိၣ်အကလူး ဒ်အံၤတက့ၢ်. ပှၤလၢအအိၣ်ဒီး နးဖးထီတဘ့ၣ် လၢအကနၣ်အိၣ်ဝဲခံကပၤ ဒီးအကနၣ်အ့ၣ်ဂ့ၤဂ့ၤန့ၣ်+ တဲဝဲလၢ ၁၃ ‘ယသ့ၣ်ညါ နတၢ်အိၣ်တၢ်ဆိးအလီၢ် လၢအမ့ၢ် တၢ်လီၢ်ဖဲမုၣ်ကီၤလံၢ် အလီၢ်ပစိာ် အိၣ်ဝဲန့ၣ်လီၤ. ဘၣ်ဆၣ် နသးတီဒီးယၤ+ ဒီးဖဲယပှၤအုၣ်အသးလၢအတီ+ စီၤအၣ်တံပၤ အမုၢ်နံၤတဖၣ် အတီၢ်ပူၤဒၣ်လဲာ် နတသမၢ နတၢ်နာ်လၢ ယဖီခိၣ်ဘၣ်.+ ပှၤမၤသံအီၤ+ လၢသုဝ့ၢ်ပူၤ ဖဲမုၣ်ကီၤလံၢ် အိၣ်ဝဲဆိးဝဲအလီၢ်လီၤ.

၁၄ “‘ဒ်လဲၣ်ဂ့ၤဒ်လဲၣ်ဂ့ၤ ယကပာ် တၢ်ကမၣ်လၢနလိၤ လၢတၢ်ဂ့ၢ်စှၤမံၤအဃိလီၤ. လၢနကျါန့ၣ် ပှၤတနီၤလၢ အမၤထွဲ စီၤဘံးလၣ် အတၢ်သိၣ်လိန့ၣ်+ အိၣ်ဝဲလီၤ. စီၤဘံးလၣ် မ့ၢ်ပှၤလၢ အသိၣ်လိ စီၤဘၤလးလၢ+ အကဒုးအိၣ်ထီၣ် တၢ်လီၤဃံၢ်အလီၢ်လၢ ပှၤအံၣ်စရ့လးဖိတဖၣ်အဂီၢ် ဒီးကွဲန့ၢ်လွဲန့ၢ်အဝဲသ့ၣ် ဒ်သိးအဝဲသ့ၣ် ကအီၣ်တၢ်အီၣ်လၢ အဘၣ်တၢ်လုၢ်ထီၣ်အီၤလၢ တၢ်ဂီၤတၢ်ဖှီၣ်အအိၣ် ဒီးကမၤကမၣ်မုၣ်ကမၣ်ခွါ* အဂီၢ်လီၤ.+ ၁၅ ဒ်န့ၣ်အသိး နအိၣ်ဒီး ပှၤလၢအမၤထွဲ ပှၤနံၤကလါဖိအကရူၢ်+ အတၢ်သိၣ်လိ စ့ၢ်ကီးလီၤ. ၁၆ အဃိ ပီၢ်ယၢ်လီၤက့ၤ နသးတက့ၢ်. နမ့ၢ်တမၤဒ်န့ၣ်ဘၣ်န့ၣ် ယကဟဲလၢ နအိၣ်ချ့ချ့ ဒီးယကဒုးပှၤတဖၣ်န့ၣ်လၢ နးဖးထီလၢ အဟဲထီၣ်လၢ ယကိာ်ပူၤလီၤ.+

၁၇ “‘ဒိကနၣ်တၢ်လၢ သးစီဆှံတဲဝဲ တၢ်အိၣ်ဖှိၣ်တဖၣ်+ လီၤတံၢ်လီၤဆဲးတက့ၢ်. ပှၤလၢအမၤနၢၤတၢ်န့ၣ်+ ယကဟ့ၣ်လီၤအီၤလၢ ကိၣ်မၤနၤလၢ+ အအိၣ်ခူသူၣ်တနီၤ ဒီးယကဟ့ၣ်လီၤအီၤလၢ လၢၢ်ဝါဖိတဖျၢၣ်လီၤ. ဒီးမံၤလၢအသီတဖျၢၣ် အိၣ်ကွဲးလီၤအသးလၢ လၢၢ်ဝါဖိတဖျၢၣ်အံၤအလိၤလၢ ပှၤတသ့ၣ်ညါအီၤ နီတဂၤဘၣ်. သ့ၣ်ညါထဲဒၣ် ပှၤလၢ အဒိးန့ၢ်ဘၣ်ဝဲတဂၤန့ၣ်လီၤ.’

၁၈ “ကွဲးန့ၢ်ဝ့ၢ်သူၤအတံရၤ တၢ်အိၣ်ဖှိၣ်အကလူး+ ဒ်အံၤတက့ၢ်. ပှၤလၢ အအိၣ်ဒီးအမဲာ်ချံလၢ အမၤအသးဒ် မ့ၣ်အူလၣ်အသိး+ ဒီးအခီၣ်လၣ်လၢ အမၤအသးဒ် တိၢ်ဘီလၢအဂ့ၤအသိး+ လၢအမ့ၢ် ကစၢ်ယွၤအဖိခွါန့ၣ် တဲဝဲလၢ ၁၉ ‘ယသ့ၣ်ညါ တၢ်လၢနမၤတဖၣ်, နတၢ်အဲၣ်တၢ်ကွံ, နတၢ်နာ်, နတၢ်မၤလၢ ကစၢ်ယွၤအဂီၢ် ဒီးနတၢ်တူၢ်န့ၢ်ခီၣ်ကဲလီၤ. ဒီးယသ့ၣ်ညါလၢ တၢ်လၢနမၤလၢ ဆၢကတီၢ်ခဲအံၤန့ၣ် အိၣ်အါန့ၢ်တၢ်လၢ နမၤလၢအခီၣ်ထံးဒံးလီၤ.

၂၀ “‘ဒ်လဲၣ်ဂ့ၤဒ်လဲၣ်ဂ့ၤ ယပာ်တၢ်ကမၣ် လၢနလိၤ မ့ၢ်လၢနဝံသးစူၤ ပိာ်မုၣ်နီၢ်အံၤစ့ဘ့ၤလး+ လၢအကိးလီၤအသးလၢ ဝံမုၣ်တဂၤန့ၣ်လီၤ. အဝဲသိၣ်လိ ဒီးဆှၢကမၣ်ဝဲ ယကုၢ်တဖၣ်လၢ ကမၤကမၣ်မုၣ်ကမၣ်ခွါ+ ဒီးအီၣ်တၢ်အီၣ်လၢ အဘၣ်တၢ်လုၢ်ထီၣ်အီၤလၢ တၢ်ဂီၤတၢ်ဖှီၣ်တဖၣ် အအိၣ်လီၤ. ၂၁ ယဟ့ၣ်အီၤ တၢ်ဆၢကတီၢ်လၢ အကပီၢ်ယၢ်လီၤက့ၤအသး ဘၣ်ဆၣ် အဝဲတသးအိၣ် ပီၢ်ယၢ်လီၤက့ၤအသးလၢ အတၢ်မၤ ကမၣ်မုၣ်ကမၣ်ခွါန့ၣ်ဘၣ်. ၂၂ ယကကွံာ်လီၤအီၤလၢ ပှၤဆိးက့အလီၢ်မံခိၣ်န့ၣ် ဘူးထီၣ်လံ. ဒီးပှၤလၢ အအဲၣ်ဘၢမါ အဲၣ်ဘၢဝၤဒီးအီၤတဖၣ်န့ၣ် အဝဲသ့ၣ် မ့ၢ်တပီၢ်ယၢ်လီၤက့ၤအသးလၢ တၢ်လၢအမၤဝဲ လၢအလီၤဂာ်ဒ် နီၢ်အံၤစ့ဘ့ၤလး မၤဝဲအသိးဘၣ်န့ၣ် ယကကွံာ်လီၤ အဝဲသ့ၣ်လၢ တၢ်နးတၢ်ဖှီၣ် ဒိၣ်ဒိၣ်မုၢ်မုၢ်အပူၤလီၤ. ၂၃ ဒီးယကမၤသံ အဖိတဖၣ်လၢ တၢ်ဆူးတၢ်ဆါလၢ အမၤသံတၢ်သ့ ဒ်သိး တၢ်အိၣ်ဖှိၣ်ခဲလၢာ် ကသ့ၣ်ညါလၢ ယမ့ၢ်ပှၤလၢအဃုကွၢ် တၢ်ဆိကမိၣ်လၢအယိာ်* ဒီးပှၤသူၣ်ကံၢ်သးလဲ ဒီးယကဟ့ၣ်သုတဂၤစုာ်စုာ် ဒ်တၢ်လၢ သုမၤတဖၣ်အသိးလီၤ.+

၂၄ “‘ဘၣ်ဆၣ် ပှၤအဂၤလၢ အအိၣ်လၢ ဝ့ၢ်သူၤအတံရၤအပူၤ လၢအမ့ၢ် ပှၤကိးဂၤဒဲးလၢ အတမၤထွဲ နီၢ်အံၤစ့ဘ့ၤလး အတၢ်သိၣ်လိအံၤဘၣ် ဒီးတသ့ၣ်ညါဝဲ တၢ်လၢအဘၣ် တၢ်ကိးအီၤလၢ “မုၣ်ကီၤလံၢ် အတၢ်ခူသူၣ်အဒိၣ်အယိာ်” တဖၣ်ဘၣ်န့ၣ်+ ယကတဲဘၣ်သုလၢ ယတပာ်ထီၣ် တၢ်ဝံတၢ်ယိးအဂၤလၢ သုလိၤနီတမံၤဘၣ်. ၂၅ ဘၣ်ဆၣ် တၢ်လၢအအိၣ်ဒီးသုန့ၣ် ဟံးဃာ်အီၤကျၢၤကျၢၤ တုၤယဟဲတုၤတက့ၢ်.+ ၂၆ ပှၤလၢအမၤနၢၤတၢ် ဒီးမၤတၢ်လၢယမၤတဖၣ် တုၤလၢအကတၢၢ်န့ၣ် ယကဟ့ၣ်အီၤ တၢ်စိတၢ်ကမီၤလၢ ပှၤကလုာ်တဖၣ်အဖီခိၣ်+ ၂၇ ဒ်ယဒိးန့ၢ်ဘၣ်တၢ်လၢ ယပၢ်အအိၣ် အသိးလီၤ. ဒီးအဝဲကပၢဘၣ် ပှၤကလုာ်တဖၣ်လၢ နီၣ်ထိးဘိထး+ ဒ်သိးအဝဲသ့ၣ် ကဘၣ်တၢ်မၤသ့ၣ်ဖးအီၤ ဒ်သပၢၤဟီၣ်ခိၣ်လၢ အသ့ၣ်ဖးကွံာ်ဝဲလၢ အက့တဖၣ် အသိးလီၤ. ၂၈ ဒီးယကဟ့ၣ်လီၤအီၤ ဆၣ်တူၢ်ဂီၤလီၤ.+ ၂၉ ဒိကနၣ်တၢ်လၢ သးစီဆှံတဲဝဲ တၢ်အိၣ်ဖှိၣ်တဖၣ် လီၤတံၢ်လီၤဆဲးတက့ၢ်.’