ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါနိၣ်ဝ့ဘၢၣ် ၄–၁၀
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ ယိၤဟၣ် ၁–၅
“အဲၣ်ဟီၣ်ခိၣ်ဒီးတၢ်အိၣ်လၢအပူၤတဂ့ၤ”
(၁ ယိၤဟၣ် ၂:၁၅, ၁၆) အဲၣ်ဟီၣ်ခိၣ်ဒီး တၢ်အိၣ်လၢအပူၤတဂ့ၤ. ပှၤမ့ၢ်အဲၣ်ဟီၣ်ခိၣ်တဂၤဂၤဒီး, ပၢ်အတၢ်အဲၣ် တအိၣ်ဘၣ်လၢအပူၤဘၣ်. ၁၆ အဂ့ၢ်ဒ်အံၤ, ကယဲၢ်တၢ်အိၣ်လၢဟီၣ်ခိၣ်ချၢ, ပဖံးပညၣ် အသးကွံတၢ်, ဒီးပမဲာ်အတၢ်သးကွံ, ဒီးအအံၤတဃၣ်အသးကဖၢလၢန့ၣ်, တဘၣ်ဃးဘၣ်ဒီးပၢ်ဘၣ်, မ့ၢ်အဘၣ်ဃးဒီး ဟီၣ်ခိၣ်လီၤ.
တၢး၀၅ ၁/၁ ကဘျံးပၤ ၁၀ အဆၢ ၁၃
မၤထွဲ ယ့ၣ်ၡူးအဒိအတဲာ်တက့ၢ်
၁၃ ပှၤတနီၤတဲဝဲလၢ တၢ်အိၣ်လၢဟီၣ်ခိၣ်တဖၣ်န့ၣ် တမ့ၢ်တၢ်လၢအကမၣ်ခဲလၢာ်ဘၣ်. တၢ်ကတိၤအံၤ မ့ၢ်ဘၣ်သနာ်က့ ဟီၣ်ခိၣ်ဒီးဟီၣ်ခိၣ် အတၢ်သူၣ်လီသးကွံတဖၣ်န့ၣ် မၤယံၤထီၣ်ပှၤဒီး ယဟိဝၤယွၤ သ့ညီမးလီၤ. တၢ်အိၣ်လၢဟီၣ်ခိၣ်တဖၣ်န့ၣ် မၤဘူးထီၣ်ပှၤဒီး ကစၢ်ယွၤတသ့ဘၣ်. တၢ်အိၣ်လၢဟီၣ်ခိၣ်တဖၣ် တမ့ၢ်တၢ်လၢအကမၣ်ဒၣ်လဲာ် ပမ့ၢ်အဲၣ် တၢ်အိၣ်လၢဟီၣ်ခိၣ်တဖၣ်န့ၣ် ပအိၣ်လၢတၢ်ဘၣ်ယိၣ်အပူၤလီၤ. (၁ တံၤမသ့း ၆:၉, ၁၀) တကးဒံးဘၣ် တၢ်အိၣ်လၢဟီၣ်ခိၣ်အါတက့ၢ်န့ၣ် မ့ၢ်တၢ်လၢအတဂ့ၤတဘၣ် သပှၢ်တၢၢ် ဒီးမၤဟးဂီၤပှၤသ့လီၤ. ပမ့ၢ်ကွၢ် တၢ်ဂီၤမူ မ့တမ့ၢ် TV အတၢ်ရဲၣ်တၢ်ကျဲၤလၢ အပာ်ဖျါထီၣ် တၢ်မၤဆူၣ်မၤစိး, တၢ်လူၤကျိၣ်လူၤစ့ မ့တမ့ၢ် တၢ်မၤကမၣ်မုၣ်ကမၣ်ခွါန့ၣ် ကကဲထီၣ်တၢ်လၢ ပတူၢ်လိာ်အီၤသ့ ဒီးလၢခံကကဲထီၣ် တၢ်လ့ပစီလၢပဂီၢ်လီၤ. ပမ့ၢ်ရ့ဒီး ပှၤလၢအဂုာ်ကျဲးစၢးဒ်သိး အတၢ်အိၣ်မူကလဲၤထီၣ်လဲၤထီ မ့တမ့ၢ် အသးဆူၣ်လၢ ကမၤတၢ်ပနံာ်တၢ်ကၤတဖၣ်န့ၣ် တၢ်သ့ၣ်တဖၣ်အံၤ ကကဲထီၣ်တၢ်အရ့ဒိၣ်လၢ ပဂီၢ်စ့ၢ်ကီးလီၤ.—မးသဲ ၆:၂၄; ၁ ကရံၣ်သူး ၁၅:၃၃.
(၁ ယိၤဟၣ် ၂:၁၇) ဒီးဟီၣ်ခိၣ်, ဒီးဟီၣ်ခိၣ်အတၢ်သးကွံန့ၣ် ဒံကွံာ်ဝဲ, မ့မ့ၢ်ပှၤမၤဖဲယွၤအသးန့ၣ်, ကအိၣ်ကဆိးလီၤထူလီၤယိာ်လီၤ.
တၢး၁၃ ၈/၁၅ ကဘျံးပၤ ၂၇ အဆၢ ၁၈
ဆိကမိၣ်ထီၣ်လၢ နကြၢးကဲထီၣ် ပှၤဒ်လဲၣ်တဂၤလဲၣ်
၁၈ ဒ်သိးပတြီဆၢကွံာ် တၢ်အိၣ်လၢ “ဟီၣ်ခိၣ်” တဖၣ်ကန့ၢ်အဂီၢ် တၢ်လၢကမၤစၢၤပှၤ လၢခံတခါန့ၣ်မ့ၢ်ဝဲ ပကဘၣ်သ့ၣ်နီၣ်ထီၣ် စီၤယိၤဟၣ်အတၢ်ကတိၤလၢအမ့ၢ် “ဟီၣ်ခိၣ်, ဒီးဟီၣ်ခိၣ်အတၢ်သးကွံန့ၣ်ဒံကွံာ်ဝဲ, မ့မ့ၢ်ပှၤမၤဖဲယွၤအသးန့ၣ်, ကအိၣ်ကဆိးလီၤထူလီၤယိာ်လီၤ.” (၁ ယိၤ. ၂:၁၇) ပမ့ၢ်ကွၢ်ဟီၣ်ခိၣ်လၢ မုၣ်ကီၤလံၢ်ပၢဝဲအံၤန့ၣ် လီၤဂာ်လၢကအိၣ်လီၤထူလီၤယိာ်လီၤ. ဘၣ်ဆၣ် မုၢ်တနံၤတၢ်သ့ၣ်တဖၣ်အံၤ ကလီၤမၢ်ကွံာ်ဝဲလီၤ. ပမ့ၢ်သ့ၣ်နီၣ်ထီၣ်လၢ မုၢ်တနံၤတၢ်အိၣ်လၢ ဟီၣ်ခိၣ်တဖၣ်ကလီၤမၢ်ကွံာ်ဝဲန့ၣ် ကမၤစၢၤပှၤလၢ ပဟးဆှဲးမုၣ်ကီၤလံၢ် အတၢ်လ့ပစီတဖၣ်ကန့ၢ်ဝဲလီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၁ ယိၤဟၣ် ၂:၇, ၈) ပှၤသးဘိသ့ၣ်ဧၢ, ယကွဲးန့ၢ်သုလၢ တၢ်မၤလိာ်အသီတမ့ၢ်ဘၣ်, မ့ၢ်တၢ်မၤလိာ်အလီၢ်လံၤလၢ အအိၣ်ဒီးသု လၢပျၢၤလံၤလံၤန့ၣ်လီၤ. တၢ်မၤလိာ်အလီၢ်လံၤန့ၣ်, မ့ၢ်တၢ်အကလုၢ်အကထါလၢ သုနၢ်ဟူလၢပျၢၤလံၤလံၤန့ၣ်လီၤ. ၈ မၤကဒီးတစု, ယကွဲးန့ၢ်သုလၢ တၢ်မၤလိာ်အသီ, လၢအမ့ၢ်တၢ်အမ့ၢ်အတီ လၢအဝဲဒၣ်အပူၤ, ဒီးလၢသုပူၤလီၤ. အဂ့ၢ်ဒ်အံၤ, တၢ်ခံးန့ၣ်ဒံကွံာ်, ဒီးတၢ်ကပီၤနီၢ်နီၢ်န့ၣ် ကပီၤထီၣ်ခဲကနံၣ်အံၤလီၤ.
တၢး၁၃ ၉/၁၅ ကဘျံးပၤ ၁၀ အဆၢ ၁၄
ယဟိဝၤယွၤ အတၢ်ဟ့ၣ်ပလီၢ်တဖၣ်န့ၣ် ပနာ်န့ၢ်သ့
၁၄ လံာ်စီဆှံလၢ ကြံးကျိာ်တကတြူၢ်အပူၤန့ၣ် တၢ်ဟ့ၣ်ပလီၢ်လၢဘၣ်ဃးဒီး ပကဘၣ်အဲၣ်လိာ်သးတဂၤဒီးတဂၤန့ၣ် အိၣ်အါမးလီၤ. ယ့ၣ်ၡူးတဲဝဲလၢ တၢ်မၤလိာ်အဒိၣ်ကတၢၢ် ခံထံၣ်တထံၣ်န့ၣ်မ့ၢ်ဝဲ “အဲၣ်ပှၤလၢနဃၢၤ ဒ်နအဲၣ်လီၤနသးဒၣ်နဲအသိးတက့ၢ်.” (မး. ၂၂:၃၉) ဒ်န့ၣ်အသိး ယ့ၣ်ၡူးအဒီပုၢ်ဝဲၢ်ခိၣ်ချၢ စီၤယၤကိာ်စ့ၢ်ကီး ကိးဝဲတၢ်အဲၣ်တၢ်ကွံလၢ “တၢ်သိၣ်တၢ်သီစီၤပၤ” လီၤ. (ယၤ. ၂:၈) တၢ်မၢဖိယိၤဟၣ်တဲဝဲလၢ “ယကွဲးန့ၢ်သုလၢ တၢ်မၤလိာ်အသီတမ့ၢ်ဘၣ်, မ့ၢ်တၢ်မၤလိာ်အလီၢ်လံၤလၢ အအိၣ်ဒီးသု လၢပျၢၤလံၤလံၤန့ၣ်လီၤ.” (၁ ယိၤ. ၂:၇, ၈) “တၢ်မၤလိာ်အလီၢ်လံၤ” န့ၣ်စီၤယိၤဟၣ် အဲၣ်ဒိးတဲဝဲ တၢ်မနုၤလဲၣ်. အဲၣ်ဒိးတဲဝဲ တၢ်မၤလိာ်ဘၣ်ဃး တၢ်အဲၣ်တၢ်ကွံလီၤ. တၢ်မၤလိာ်အံၤလီၢ်လံၤဝဲန့ၣ် မ့ၢ်လၢယ့ၣ်ၡူး ဟ့ၣ်တ့ၢ်ဝဲလၢ ပူၤကွံာ်အနံၣ်အါမးလၢအမ့ၢ် “လၢပျၢၤလံၤလံၤ” အဃိလီၤ. ဘၣ်ဆၣ် တၢ်မၤလိာ်အံၤ မ့ၢ်စ့ၢ်ကီးတၢ်မၤလိာ် “အသီ” မ့ၢ်လၢအပျဲၢ်အဘီၣ်တဖၣ် မ့ၢ်ထံၣ်ဘၣ်တၢ်အိၣ်သးအသီန့ၣ် အဝဲသ့ၣ်ကဘၣ်ပာ်ဖျါထီၣ် တၢ်အဲၣ်လၢတကွၢ်ထဲအနီၢ်ကစၢ်အဘျုးလီၤ. ဒ်ပမ့ၢ်ခရံာ်အပျဲၢ်အဘီၣ်အသိး ပပာ်လုၢ်ပာ်ပှ့ၤ တၢ်ဟ့ၣ်ပလီၢ်လၢ ပသုတအိၣ်ဒီး တၢ်ပာ်သူၣ်ပာ်သးလၢအမ့ၢ် တၢ်အဲၣ်လီၤဒၣ်ထဲသး ဒ်ပှၤတၢ်ချၢတဖၣ်အသိးတဂ့ၤလီၤ. ဒီးပပာ်ဖျါထီၣ် တၢ်အဲၣ်လၢတကွၢ်ထဲအနီၢ်ကစၢ်အဘျုးလီၤ.
(၁ ယိၤဟၣ် ၅:၁၆, ၁၇) ပှၤမ့ၢ်ထံၣ် အဒီပုၢ်ဝဲၢ်မၤတၢ်ဒဲးဘးလၢ အတဘၣ်သံဘၣ်တမံၤဒီး, ကဘါထုကဖၣ်တၢ်လၢအဂီၢ်, ဒီးတၢ်ကဟ့ၣ်အီၤလၢတၢ်မူ, လၢပှၤလၢအမၤတၢ်ဒဲးဘးလၢ အတဘၣ်သံဘၣ် တဖၣ်န့ၣ်အဂီၢ်လီၤ. တၢ်ဒဲးဘးလၢအဘၣ်သံန့ၣ်အိၣ်ဝဲလီၤ. လၢအဘၣ်ဃ့တၢ်လၢ တၢ်န့ၣ်တမံၤအဂ့ၢ်အကျိၤဒီး, ယတစံးဘၣ်. ၁၇ ကယဲၢ်တၢ်တတီတလိၤဘၣ် မ့ၢ်တၢ်ဒဲးဘးလီၤ. ဒီးတၢ်ဒဲးဘးလၢ အတဘၣ်သံဘၣ်အိၣ်ဝဲလီၤ.
it-1 ကဘျံးပၤ ၈၆၂ အဆၢ ၅
တၢ်ပျၢ်တၢ်ကမၣ်
ပှၤအဂၤတဖၣ်မ့ၢ်ဂ့ၤ ပှၤလၢအိၣ်လၢပတၢ်အိၣ်ဖှိၣ်တဖၣ်မ့ၢ်ဂ့ၤ ဒ်သိးကစၢ်ယွၤ ကပျၢ်အတၢ်ကမၣ်အဂီၢ် ပမ့ၢ်ဃ့ဘါထုကဖၣ်လၢ အဝဲသ့ၣ်အဂီၢ်န့ၣ် မ့ၢ်တၢ်လၢအကြၢးဝဲဘၣ်ဝဲလီၤ. စီၤမိၤၡ့မၤဝဲ ဒ်န့ၣ်အသိးလီၤ. အဝဲတဲလီၤကျဲၤလီၤဝဲ ပှၤအံၣ်စရ့လးဖိတဖၣ် အတၢ်ကမၣ်, ဃ့ပျၢ်န့ၢ်အဝဲသ့ၣ်အတၢ်ကမၣ် ဒီးယဟိဝၤယွၤ ဒိကနၣ် အဝဲအတၢ်ထုကဖၣ်လီၤ. (၄ မိၤ. ၁၄:၁၉, ၂၀) စီၤၡလိၤမိၤစ့ၢ်ကီး ဖဲပာ်စီဆှံဝဲ တၢ်လုၢ်ဟံၣ်အခါ အဝဲဃ့ဘါထုကဖၣ်လၢ ယဟိဝၤယွၤအအိၣ် ဒ်သိးကပျၢ်ကွံာ်ဝဲ ပှၤအံၣ်စရ့လးဖိတဖၣ် အတၢ်ကမၣ် ဖဲအဝဲသ့ၣ် မၤတၢ်ကမၣ် ဒီးပီၢ်ယၢ်လီၤက့ၤအသးဒီး ဟဲက့ၤကဒါက့ၤဆူအအိၣ်အခါလီၤ. (၁ စီၤပၤ ၈:၃၀, ၃၃-၄၀, ၄၆-၅၂) စီၤဧ့စြၤန့ၣ် ဃ့ပျၢ်န့ၢ် ပှၤယူဒၤဖိလၢ အဟဲက့ၤလၢအထံအကီၢ်တဖၣ် အတၢ်ကမၣ်လၢ ကမျၢၢ်အမဲာ်ညါလီၤ. အဝဲအတၢ်ဃ့ဘါထုကဖၣ်လၢ အသးဒီဖျၢၣ် ဒီးအတၢ်ဟ့ၣ်သဆၣ်ထီၣ်အဃိ ပှၤဂီၢ်မုၢ်တဖၣ်မၤဝဲဒ်သိး ယဟိဝၤယွၤ ကပျၢ်ကွံာ်အဝဲသ့ၣ် အတၢ်ကမၣ်အဂီၢ်လီၤ. (ဧ့. ၉:၁၃–၁၀:၄, ၁၀-၁၉, ၄၄) စီၤယၤကိာ် ဟ့ၣ်ဂံၢ်ဟ့ၣ်ဘါဝဲ ပှၤလၢအနီၢ်သး အဂံၢ်အဘါလီၤစၢ်တဖၣ်လၢ ကကိးဝဲတၢ်အိၣ်ဖှိၣ်သးပှၢ်တဖၣ် လၢကဃ့ဘါထုကဖၣ်န့ၢ်တၢ်လၢ အဝဲသ့ၣ်အဂီၢ် ဒ်သိး “အတၢ်ဒဲးဘးလၢ အမၤတ့ၢ်လံမ့ၢ်အိၣ်ဒီး, တၢ်ကပျၢ်ကွံာ်အီၤ” အဂီၢ်လီၤ. (ယၤ. ၅:၁၄-၁၆) ဘၣ်ဆၣ် ပှၤလၢအကတိၤကမၣ် သးစီဆှံ ဒီးပှၤလၢအမၤကမၣ်တၢ် ဖဲအသးတဖၣ်န့ၣ် မၤဝဲ “တၢ်ဒဲးဘးလၢအဘၣ်သံ” အဃိ တမ့ၢ်လၢအတၢ်ကမၣ် ကဘၣ်တၢ်ပျၢ်ကွံာ်အီၤဘၣ်. ခရံာ်ဖိတဂၤ တကြၢးဃ့ဘါထုကတဖၣ်န့ၢ်လၢ ပှၤမၤတၢ်ကမၣ် ဒ်သိးအံၤတဂၤအဂီၢ်ဘၣ်.—၁ ယိၤ. ၅:၁၆; မး. ၁၂:၃၁; ဧ့ၤ. ၁၀:၂၆, ၂၇; ကွၢ် SIN, I; SPIRIT
တၢ်ဖးလံာ်စီဆှံ
(၁ ယိၤဟၣ် ၁:၁–၂:၆) တၢ်လၢအအိၣ်ဝဲလၢ အခီၣ်ထံးလံၤလံၤ, လၢပနၢ်ဟူလံ, လၢပထံၣ်လၢပမဲာ်လံ, လၢပကွၢ်ထံအီၤ, ဒီးလၢပဟံးအီၤလၢပစု, ဘၣ်ဃးဒီးတၢ်မူအကလုၢ်န့ၣ်, ၂ ဒီးတၢ်မူန့ၣ်အိၣ်ဖျါတ့ၢ်, ဒီးပထံၣ်လံ, ဒီးပအုၣ်ပသး, ဒီးပစံးဘၣ်တဲဘၣ်သုလၢ တၢ်မူအထူအယိာ်လၢ အအိၣ်တ့ၢ်ဒီးပၢ်အသိးန့ၣ်, ဒီးအိၣ်ဖျါထီၣ်လၢပှၤအံၤ, ၃ တၢ်လၢပထံၣ်ဘၣ်, ဒီးပနၢ်ဟူဘၣ်န့ၣ်, ပစံးဘၣ်တဲဘၣ်သု ဒ်သိးသုဝဲသ့ၣ်စ့ၢ်ကီး သုကရ့လိာ်သုသးဒီးပှၤလီၤ. ဒီးပတၢ်ရ့လိာ်အံၤ, မ့ၢ်ပရ့လိာ်ပသးဒီးပၢ်, ဒီးအဖိခွါယ့ၣ်ၡူးခရံာ်လီၤ. ၄ တၢ်န့ၣ်တဖၣ်ပကွဲးန့ၢ်သု ဒ်သိးသုတၢ်သးခု ကလၢထီၣ်ပှဲၤထီၣ်လီၤ. ၅ ဒီးတၢ်စံၣ်တဲၤတဲလီၤ လၢပနၢ်ဟူလၢအီၤ, ဒီးပစံးဘၣ်တဲဘၣ်က့ၤသု မ့ၢ်အအံၤ, ယွၤမ့ၢ်တၢ်ကပီၤ, ဒီးတၢ်ခံးတအိၣ်ဘၣ်လၢ အပူၤနီတမံၤဘၣ်. ၆ ပမ့ၢ်စံးလၢ ပရ့လိာ်ပသးဒီးအီၤ, ဒီးလဲၤတၢ်လၢတၢ်ခံးကျါဒီး, ပကတိၤတၢ်ကဘျံးကဘျၣ်, ဒီးပတမၤဘၣ် တၢ်မ့ၢ်တၢ်တီဘၣ်. ၇ မ့မ့ၢ်ပမ့ၢ်လဲၤတၢ်လၢ တၢ်ကပီၤအပူၤ, ဒ်အဝဲဒၣ်အိၣ်လၢ တၢ်ကပီၤအပူၤအသိးန့ၣ်ဒီး, ပရ့လိာ်ပသး သကိးသကိး, ဒီးအဖိခွါ ယ့ၣ်ၡူးခရံာ်အသွံၣ်န့ၣ် သ့စီကွံာ်ပှၤလၢ ပတၢ်ဒဲးဘးခဲလၢာ်လီၤ. ၈ ပမ့ၢ်စံးလၢ ပတၢ်ဒဲးဘးတအိၣ်ဘၣ်ဒီး, မ့ၢ်ပလီလီၤပသး, ဒီးတၢ်မ့ၢ်တၢ်တီ တအိၣ်ဘၣ်လၢပပူၤဘၣ်. ၉ ပမ့ၢ်တဲာ်လီၤကျဲၤလီၤ ပတၢ်ဒဲးဘးဒီး, အဝဲဒၣ်အကလုၢ်တီ, ဒီးတီဝဲလိၤဝဲဒ်သိး အကပျၢ်ကွံာ်ပတၢ်ဒဲးဘး, ဒီးသ့စီကွံာ်ပှၤလၢ ကယဲၢ်တၢ်အၢတၢ်သီခဲလၢာ်လီၤ. ၁၀ ပမ့ၢ်စံးလၢ ပတမၤဘၣ်တၢ်ဒဲးဘးဒီး, မ့ၢ်ပပာ်အီၤလၢ ပှၤကတိၤတၢ်ကဘျံးကဘျၣ်, ဒီးအကလုၢ်အကထါ တအိၣ်ဘၣ်လၢပပူၤဘၣ်.
၂ ယဖိဆံးသ့ၣ်ဧၢ, တၢ်တဖၣ်အံၤယကွဲးန့ၢ်သု, ဒ်သိးသုသုတမၤ တၢ်ဒဲးဘးတဂ့ၤ. ဒီးပှၤမ့ၢ်မၤ တၢ်ဒဲးဘးတဂၤဂၤဒီး, ပှၤသကွံၢ်ကညးန့ၢ်ပဂီၢ်လၢ ပၢ်အအိၣ်န့ၣ်အိၣ်တဂၤလီၤ. အဝဲဒၣ်မ့ၢ် တၢ်တီတၢ်လိၤ ယ့ၣ်ၡူးခရံာ်တဂၤန့ၣ်လီၤ. ၂ ဒီးအဝဲဒၣ်မ့ၢ် တၢ်မၤပူၤဖျဲးပတၢ်ဒဲးဘး, ဒီးတမ့ၢ်ဘၣ်ထဲ ပတၢ်ဒဲးဘးပဝဲဧိၤဘၣ်. မ့ၢ်ပှၤဟီၣ်ခိၣ်ဖိခဲလၢာ် အတၢ်ဒဲးဘးစ့ၢ်ကီးလီၤ. ၃ ဒီးပမ့ၢ်တိၢ်န့ၢ် အတၢ်မၤလိာ်ဒီး, လၢအဝဲန့ၣ်အဃိ, ပသ့ၣ်ညါလၢ ပသ့ၣ်ညါလံအီၤလီၤ. ၄ ပှၤလၢအစံး, ယသ့ၣ်ညါလံအီၤန့ၣ်, ဒီးတတိၢ်န့ၢ်ဘၣ်အတၢ်မၤလိာ်န့ၣ်, မ့ၢ်ပှၤလၢအကတိၤ တၢ်ကဘျံးကဘျၣ်, ဒီးတၢ်မ့ၢ်တၢ်တီ တအိၣ်ဘၣ်လၢအပူၤဘၣ်. ၅ မ့မ့ၢ်ဖဲဒၣ်ပှၤလၢ အတိၢ်န့ၢ်အကလုၢ်အကထါန့ၣ်, ယွၤအတၢ်အဲၣ်တၢ်ကွံ လၢထီၣ်ပှဲၤထီၣ်လၢ အပူၤနီၢ်နီၢ်လီၤ. လၢအဝဲန့ၣ်အဃိ, ပသ့ၣ်ညါလၢ ပအိၣ်လၢအပူၤလီၤ. ၆ ပှၤလၢအစံးဝဲ, ယအိၣ်ယဆိးလၢအပူၤန့ၣ်ဒီး, ဒ်အဝဲဒၣ်လဲၤတၢ်အသိး, အကစၢ်ဒၣ်ဝဲ ဂ့ၤလဲၤစ့ၢ်ကီးတၢ် ဒ်န့ၣ်အသိးလီၤ.
တၢး၀၄ ၁၀/၁ ကဘျံးပၤ ၂၉
ဖဲ ၁ ယိၤဟၣ် ၄:၁၈ န့ၣ်စီၤယိၤဟၣ် တဲဝဲလၢ “တၢ်အဲၣ်တၢ်ကွံအလၢအပှဲၤန့ၣ်, ဟီထီၣ်ကွံာ်တၢ်ပျံၤတၢ်ဖုး” လီၤ. တၢ်အံၤအခီပညီဒ်လဲၣ်.
တၢ်မၢဖိယိၤဟၣ် ကွဲးဝဲလၢ “တၢ်ပျံၤတၢ်ဖုးတအိၣ်ဘၣ်လၢ တၢ်အဲၣ်တၢ်ကွံအပူၤဘၣ်. မ့မ့ၢ်တၢ်အဲၣ်တၢ်ကွံအလၢအပှဲၤန့ၣ်, ဟီထီၣ်ကွံာ်တၢ်ပျံၤတၢ်ဖုးလီၤ. အဂ့ၢ်ဒ်အံၤ, တၢ်ပျံၤတၢ်ဖုးန့ၣ်အိၣ်ဒီး တၢ်ကိၢ်တၢ်ဂီၤ, ဒီးပှၤလၢအပျံၤတၢ်န့ၣ် တလၢထီၣ်ပှဲၤထီၣ်လၢ တၢ်အဲၣ်အပူၤဘၣ်.”—၁ ယိၤဟၣ် ၄:၁၈.
စီၤယိၤဟၣ် အဲၣ်ဒိးတဲဝဲဘၣ်ဃးဒီး တၢ်တဲတၢ်လၢတၢ်သဘျ့, လီၤဆီဒၣ်တၢ် တၢ်အဲၣ်ကစၢ်ယွၤ ဒီးတဲတၢ်ဒီးကစၢ်ယွၤလၢတၢ်ဘျ့ ဘၣ်ထွဲလိာ်သးအဂ့ၢ်လီၤ. ပမ့ၢ်ဖး အဆၢဖိ ၁၇ န့ၣ်ပကထံၣ်ဘၣ် တၢ်ဂ့ၢ်အံၤ “တၢ်အဲၣ်တၢ်ကွံလၢထီၣ်ပှဲၤထီၣ်ဒီးပှၤ, ဒ်သိးပကအိၣ်ဒီးပသးခူတလ့ၢ် [“တဲတၢ်လၢတၢ်သဘျ့,” NWT] လၢမုၢ်စံၣ်ညီၣ်အနံၤလီၤ.” ခရံာ်ဖိတဂၤ အတၢ်အဲၣ်ကစၢ်ယွၤဒိၣ်ထဲလဲၣ်, အတၢ်တူၢ်ဘၣ်လၢ ကစၢ်ယွၤအဲၣ်အီၤထဲလဲၣ်န့ၣ် ကအိၣ်ဖျါထီၣ်ဖဲ အဝဲဃ့ဘါထုကဖၣ်လၢ ကစၢ်ယွၤအအိၣ်အခါ မ့ၢ်အဝဲတဲတၢ်လၢ တၢ်သဘျ့ဧါ တတဲတၢ်လၢတၢ်သဘျ့ဧါန့ၣ်လီၤ.
တၢ်ကတိၤလၢအမ့ၢ် “တၢ်အဲၣ်တၢ်ကွံလၢထီၣ်ပှဲၤထီၣ်” န့ၣ်အခီပညီယိာ်ဒိၣ်မးလီၤ. ဒ်လံာ်စီဆှံသူဝဲအသိး တၢ်ကတိၤလၢအမ့ၢ် “လၢထီၣ်ပှဲၤထီၣ်” အံၤန့ၣ် တအဲၣ်ဒိးတဲဝဲ လၢထီၣ်ပှဲၤထီၣ်လၢာ်လၢာ်ဆ့ဆ့ ကိးဘျီဒဲးဘၣ် အဲၣ်ဒိးတဲဝဲ တၢ်ထိၣ်သတြီၤ တၢ်လၢထီၣ်ပှဲၤထီၣ်လီၤ. အဒိ ဖဲယ့ၣ်ၡူးစံၣ်တဲၤတဲလီၤတၢ်လၢ တၢ်လုၢ်ခိၣ်အခါ အဝဲတဲဝဲဒ်အံၤ “မ်သုလၢထီၣ်ပှဲၤထီၣ် ဒ်သုပၢ်အိၣ်လၢမူခိၣ် လၢထီၣ်ပှဲၤထီၣ်အသိးန့ၣ်တက့ၢ်.” မ့ၢ်ဒၣ်ယ့ၣ်ၡူး တဲဘၣ်အပျဲၢ်အဘီၣ်တဖၣ်လၢ အဝဲသ့ၣ် မ့ၢ်အဲၣ်ဝဲထဲ ပှၤလၢအအဲၣ်အီၤတဖၣ်လီၤန့ၣ် အဝဲသ့ၣ်အတၢ်အဲၣ်န့ၣ် တလၢတပှဲၤဘၣ်. အဝဲသ့ၣ်တဖၣ် မ့ၢ်အဲၣ်ဃုာ်ဒီး အဒုၣ်အဒါမး အတၢ်အဲၣ်န့ၣ် ကလၢထီၣ်ပှဲၤထီၣ်လီၤ. ဒ်န့ၣ်အသိး ဖဲစီၤယိၤဟၣ် ကွဲးဝဲလၢ “တၢ်အဲၣ်တၢ်ကွံလၢထီၣ်ပှဲၤထီၣ်” န့ၣ် အဲၣ်ဒိးတဲဝဲ တၢ်အဲၣ်ကစၢ်ယွၤလၢ သးဒီဖျၢၣ်, လၢလၢပှဲၤပှဲၤ လၢပတၢ်အိၣ်မူကိးသနၢၣ်ဒဲးလီၤ.—မးသဲ ၅:၄၆-၄၈; ၁၉:၂၀, ၂၁.
ဖဲခရံာ်ဖိတဂၤ ဃ့ဘါထုကဖၣ်လၢကစၢ်ယွၤအအိၣ်အခါ အဝဲသ့ၣ်ညါလီၤအသးလၢ အတၢ်ကမၣ်အိၣ် ဒီးတလၢတပှဲၤဘၣ်. ဘၣ်ဆၣ် အဝဲမ့ၢ်အဲၣ်ကစၢ်ယွၤ ဒီးမ့ၢ်တူၢ်ဘၣ်ဝဲလၢလၢပှဲၤပှဲၤလၢ ကစၢ်ယွၤအဲၣ်အီၤန့ၣ် အဝဲတဘၣ်ယိၣ်တၢ်လၢ ကစၢ်ယွၤကပာ်ဒ့ၣ်ပာ်ကမၣ်အီၤ မ့တမ့ၢ် ကဂ့ၢ်လိာ်အီၤဘၣ်. လၢတၢ်န့ၣ်အလီၢ် အဝဲအိၣ်ဒီးတၢ်ခွဲးတၢ်ယာ်လၢ ကတဲတၢ်လၢတၢ်သဘျ့ ဒ်သိးကတဲဖျါထီၣ် တၢ်အိၣ်လၢအသးပူၤ ဒီးကဃ့ပျၢ်အတၢ်ကမၣ် ခီဖျိသန့ၤထီၣ်ဝဲလၢ ယ့ၣ်ၡူးခရံာ်အတၢ်ပှ့ၤက့ၤ လၢကစၢ်ယွၤကတဲာ်ကတီၤဝဲလၢ တၢ်အဲၣ်တၢ်ကွံအပူၤန့ၣ်လီၤ. ဒီးအဝဲကနာ်ဝဲသပှၢ်တၢၢ်လၢ ကစၢ်ယွၤကဒိကနၣ် အတၢ်ထုကဖၣ်လီၤ.
ပှၤတဂၤမၤ “လၢထီၣ်ပှဲၤထီၣ်” အတၢ်အဲၣ်တၢ်ကွံ ကသ့ဒ်လဲၣ် ဒီး တၢ်ဘၣ်ယိၣ်တၢ်လၢ ကစၢ်ယွၤကပာ်ဒ့ၣ်ပာ်ကမၣ်အီၤ မ့တမ့ၢ် ကဂ့ၢ်လိာ်အီၤန့ၣ် “ဟီထီၣ်ကွံာ်” ဝဲကသ့ဒ်လဲၣ်. တၢ်မၢဖိယိၤဟၣ် တဲဝဲလၢ “ဖဲဒၣ်ပှၤလၢ အတိၢ်န့ၢ်အကလုၢ်အကထါန့ၣ်, ယွၤအတၢ်အဲၣ်တၢ်ကွံ လၢထီၣ်ပှဲၤထီၣ်လၢ အပူၤနီၢ်နီၢ်လီၤ.” (၁ ယိၤဟၣ် ၂:၅) ဆိကမိၣ်ကွၢ် ဖဲပမ့ၢ်ပှၤတၢ်ဒဲးဘးဖိ အဆၢကတီၢ်ဒၣ်လဲာ် ကစၢ်ယွၤမ့ၢ်အဲၣ်ပှၤန့ၣ် ဖဲပပီၢ်ယၢ်လီၤက့ၤပသး ဒီး “တိၢ်န့ၢ်အကလုၢ်ကထါ” အခါ အဝဲကအဲၣ်ပှၤ အါန့ၢ်အန့ၣ်တမ့ၢ်ဧါ. (ရိမ့ၤ ၅:၈; ၁ ယိၤဟၣ် ၄:၁၀) ပမ့ၢ်ဆဲးအိၣ်ဒီးတၢ်သးတီန့ၣ် ပကအိၣ်ဒီးတၢ်နာ်နီၢ်နီၢ် ဒ်တၢ်မၢဖိပီလူးအသိးလီၤ. အဝဲကွဲးဝဲလၢ “ပှၤလၢအတသးလီဘၣ် အဖိခွါဒၣ်ဝဲဘၣ်, ဒီးဟ့ၣ်လီၤကွံာ်အီၤလၢ ပဝဲဒၣ်ခဲလၢာ် အဂီၢ်န့ၣ်, တဟ့ၣ်ကလီ ဃုာ်ဒီးအီၤလၢပတၢ်ခဲလၢာ် စ့ၢ်ကီးဘၣ်ဒီး, ကအိၣ်ဝဲဒ်လဲၣ်.”—ရိမ့ၤ ၈:၃၂.
လါနိၣ်ဝ့ဘၢၣ် ၁၁–၁၇
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ ယိၤဟၣ် ၁–ယူဒၤ
“ဒ်သိးပကအိၣ်ဘၣ်လၢ တၢ်မ့ၢ်တၢ်တီပူၤအဂီၢ် ပကဘၣ်ဒုးတၢ်”
(ယူဒၤ ၃) ပှၤလၢတၢ်အဲၣ်အီၤသ့ၣ်ဧၢ, လၢယဂုာ်ကွဲးန့ၢ်သု သပှၢ်တၢၢ်လၢ တၢ်အုၣ်က့ၤခီၣ်က့ၤလၢ ပဒိးန့ၢ်သကိးအဂ့ၢ်အကျိၤန့ၣ်ဒီး, အလီၢ်အိၣ်လၢ ယကကွဲးသဆၣ်ထီၣ်သုခံ, ဒ်သိးသုကဂုာ်ကျဲးစၢးဒုးတၢ်လၢ တၢ်နာ်လၢတၢ်ဟ့ၣ်လီၤလၢ ပှၤစီဆှံလၢပျၢၤ တဘျီန့ၣ်အဂီၢ်လီၤ.
တၢး၀၄ ၉/၁၅ ကဘျံးပၤ ၁၁-၁၂ အဆၢ ၈-၉
“အိၣ်ဆူၣ်အိၣ်ချ့လၢ ကစၢ်အပူၤ”
၈ လံာ်စီဆှံပာ်ဖျါထီၣ်ဝဲ မုၣ်ကီၤလံၢ်အတၢ်ဖံးတၢ်မၤတဖၣ်အဃိ ပသ့ၣ်ညါမုၣ်ကီၤလံၢ် အတၢ်ကူၣ်တၢ်ဖးတဖၣ်လီၤ. (၂ ကရံၣ်သူး ၂:၁၁) ဖဲအဝဲထီဒါဝဲ ပှၤတီပှၤလိၤ စီၤယိၤဘးအခါ အဝဲမၤဟးဂီၤဝဲ စီၤယိၤဘး အတၢ်ဖံးတၢ်မၤ (စံပွါယ့), မၤသံဝဲ ပှၤလၢအအဲၣ်ဘၣ်ဝဲတဖၣ်, ဒုးအိၣ်ထီၣ်ဝဲ ဟံၣ်ဖိဃီဖိအတၢ်ထီဒုၣ်ထီဒါ, ဒုးတူၢ်ဝဲတၢ်ဆူးတၢ်ဆါ ဒီးအတံၤသကိးအဘျၣ်တဖၣ် အတၢ်ကတိၤ ဒုၣ်ဒွဲစံးအၢလီၤ. အဃိ စီၤယိၤဘးအသးဟးဂီၤ ဒီးတူၢ်ဘၣ်ဝဲလၢ ကစၢ်ယွၤပာ်တ့ၢ်ကွံာ်အီၤလီၤ. (ယိၤဘး. ၁၀:၁, ၂) မုၢ်မဆါတနံၤအံၤ မုၣ်ကီၤလံၢ်တဒုးအိၣ်ထီၣ် တၢ်ကီတၢ်ခဲဒ်သိးန့ၣ် လၢအနီၢ်ကစၢ်သနာ်က့ ခရံာ်ဖိအါတက့ၢ် တူၢ်ဘၣ်တၢ်ကီတၢ်ခဲ ဒ်သိးန့ၣ်တဖၣ် ဒီးတၢ်သ့ၣ်တဖၣ်န့ၣ် မုၣ်ကီၤလံၢ်သူဝဲသ့လီၤ.
၉ လၢမုၢ်နံၤခံကတၢၢ်အံၤအတီၢ်ပူၤန့ၣ် တၢ်ဘၣ်ယိၣ်ဘၣ်ဘီလၢ ကမၤဘၣ်ဒိ ပနီၢ်သးန့ၣ်အါထီၣ်ဝဲ ရူၢ်ရူၢ်လီၤ. ပအိၣ်မူဘၣ် ဆၢကတီၢ်ခဲအံၤန့ၣ် ပှၤအါတက့ၢ် တအိၣ်ဒီးနီၢ်သးဖီတၢၣ်ဘၣ်. လၢတၢ်န့ၣ်အလီၢ် အဝဲသ့ၣ်လူၤဝဲ တၢ်ထူးတၢ်တီၤလီၤ. မံဒံယါတၢ်ကစီၣ်တဖၣ် ပာ်ဖျါထီၣ်ဝဲတလီၢ်လီၢ်လၢ တၢ်မၤကမၣ်မုၣ်ကမၣ်ခွါန့ၣ် တဒုးအိၣ်ထီၣ် တၢ်သူၣ်အုးသးအုးဘၣ် လၢတၢ်န့ၣ်အလီၢ် မ့ၢ်တၢ်လၢ အမၤသးခုပှၤလီၤ. အဃိ ပှၤအါတက့ၢ်န့ၣ် ကဲထီၣ် “ပှၤလၢအအဲၣ်တၢ်မုာ်လၤ ဒိၣ်န့ၢ်အအဲၣ်ယွၤ” လီၤ. (၂ တံၤမသ့း ၃:၁-၅) ပမ့ၢ်တ “ဂုာ်ကျဲးစၢးဒုးတၢ်လၢ တၢ်နာ်” အဂီၢ်ဘၣ်န့ၣ် တၢ်ဆိကမိၣ်တဖၣ်အံၤ ကမၤဘၣ်ဒိ ပနီၢ်သးတၢ်ဖံးတၢ်မၤတဖၣ်လီၤ.—ယူဒၤ ၃.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ယူဒၤ ၄) အဂ့ၢ်ဒ်အံၤ, ပှၤကညီတနီၤနီၤ, လၢအဘၣ်တၢ်ပာ်အီၤလၢပျၢၤ လၢတၢ်စံၣ်ညီၣ်ဃၣ်အံၤအဂီၢ်, ဟဲနုာ်ခူသူၣ်, ပှၤတယူးတယီၣ်ဘၣ်ယွၤ, ဒီးဘိးကဒါပကစၢ်အဘျုးအဖှိၣ် ဆူတၢ်လုၣ်ကိလုၣ်ကပာ်, ဒီးသမၢပခိၣ်တဂၤဃီ, ပကစၢ်ယ့ၣ်ၡူးခရံာ်န့ၣ်လီၤ.
(ယူဒၤ ၁၂) အဝဲသ့ၣ်တပျံၤဘၣ်တၢ်ဘၣ်ဒီး, အီၣ်သကိးအီသကိးတၢ်, ဒီးဘုၣ်အီၣ်လီၤဒၣ်အသးသတးဒီး, မ့ၢ်လၢၢ်ဧိၤလ့ဧိၤလၢ သုဘူၣ်တၢ်အဲၣ်အပူၤလီၤ. တၢ်အၢၣ်လၢထံတအိၣ်ဘၣ်, လၢကလံၤအူဒံကွံာ်အီၤ, သ့ၣ်လၢအလီၤဘဲ, ဒီးအသၣ်တအိၣ်ဘၣ်, သံခံဘျီ, ဘၣ်ထဲးကွံာ်အသးလၢ အဂံၢ်,
it-2 ကဘျံးပၤ ၂၇၉
ဘူၣ်တၢ်အဲၣ်
ဘၣ်ဃးဒီး တၢ်ဘုၣ်အီၣ်ဘုၣ်အီ ဒီးပှၤဘၣ်မၤအီၤပှဲၤဘျီလဲၣ်န့ၣ် လံာ်စီဆှံတပာ်ဖျါဝဲဘၣ်. (ယုဒၤ ၁၂) ဘူၣ်ပွဲတဖၣ်အံၤန့ၣ် တမ့ၢ်ဘူၣ်ပွဲလၢ ယ့ၣ်ၡူး မ့တမ့ၢ် တၢ်မၢဖိတဖၣ်မၤလိာ်ဝဲလၢ ပှၤကဘၣ်မၤအီၤန့ၣ်ဘၣ်. အဃိ ပှၤတကြၢးဆိကမိၣ်ဝဲလၢ ဘူၣ်ပွဲအံၤ ပှၤကဘၣ်မၤသပှၢ်တၢၢ် မ့တမ့ၢ် ပှၤကဘၣ်မၤအီၤထီဘိန့ၣ်ဘၣ်. ပှၤတနီၤတဲဝဲလၢ ခရံာ်ဖိလၢအကဲဒိၣ်တဖၣ် မၤဝဲဘူၣ်ပွဲအံၤ ဒ်သိးကကွဲဒုးအီၣ်ဒုးအီဝဲ ခရံာ်ဖိလၢအဖှီၣ်အယာ်တဖၣ်လီၤ. အဝဲသ့ၣ် ကတဲာ်ကတီၤဝဲ တၢ်အီၣ်တၢ်အီအါအါဂီၢ်ဂီၢ် ဒီးအီၣ်သကိးဝဲဒီး မုၣ်ကမဲ, ဖိၣ်ဃဲ ဒီးပှၤအဖှီၣ်မ့ၢ်ဂ့ၤ ပှၤကဲဒိၣ်မ့ၢ်ဂ့ၤ လၢတၢ်ဃူတၢ်ဖိးအပူၤလီၤ.
it-2 ကဘျံးပၤ ၈၁၆
လၢၢ်ဧိၤလ့ဧိၤ
ကြံးအတၢ်ကတိၤ စပါလး(စ်) န့ၣ် အဲၣ်ဒိးတဲဝဲ လၢၢ်ဖးဒိၣ် မ့တမ့ၢ် လၢၢ်လၢအိၣ်လၢထံဖီလာ်တဖၣ်လီၤ. ဖဲစီၤယူဒၤတဲဝဲ ဘၣ်ဃးဒီး ပှၤလၢအဟဲနုာ်လီၤလၢ ခရံာ်ဖိတၢ်အိၣ်ဖှိၣ်ပူၤ ဒီးအိၣ်ဒီးတၢ်ကူၣ်လၢ အတဂ့ၤတဖၣ်အဂ့ၢ်အခါ အဝဲသူဝဲ တၢ်ကတိၤအံၤလီၤ. ဒ်လၢၢ်လၢအိၣ်လၢ ထံဖီလာ်တဖၣ် ကဲထီၣ်တၢ်လီၤဘၣ်ယိၣ်လၢ ကဘီတဖၣ်အဂီၢ်အသိး ပှၤသ့ၣ်တဖၣ်အံၤစ့ၢ်ကီး မ့ၢ်ဝဲတၢ်လီၤဘၣ်ယိၣ်ဖးဒိၣ်လၢ ခရံာ်ဖိတဖၣ်အဂီၢ်လီၤ. အဃိ ဘၣ်ဃးဒီး ပှၤသ့ၣ်တဖၣ်အံၤန့ၣ် အဝဲကွဲးဝဲလၢ “မ့ၢ်လၢၢ်ဧိၤလ့ဧိၤလၢ သုဘူၣ်တၢ်အဲၣ်အပူၤလီၤ.”—ယူဒၤ ၁၂.
(ယူဒၤ ၁၄, ၁၅) ဒီးစီၤဃနိာ်လၢ စီၤအၤဒၣ်အလီၢ်ခံနွံဂၤတဂၤန့ၣ်, ကတိၤတၢ်လၢဝံအကျိာ်, လၢပှၤတဖၣ်အံၤ အဂ့ၢ်အကျိၤစ့ၢ်ကီး, ဒီးစံးဝဲဒၣ်, ကွၢ်ကွၢ်, ကစၢ်ဟဲလီၤဒီး အပှၤစီဆှံအကလးတဖၣ်, ၁၅ ဒ်သိးအကစံၣ်ညီၣ်ပှၤခဲလၢာ်, ဒီးကဘိးဘၣ်သ့ၣ်ညါ ပှၤလၢအတယူးတယီၣ်ဘၣ်ယွၤ, လၢအတၢ်မၤခဲလၢာ် ဘၣ်ဃးဒီး တၢ်တယူးတယီၣ်ဘၣ်ယွၤ, လၢအမၤဝဲအိၣ်ဒီး အတၢ်တယူးတယီၣ်ဘၣ်ယွၤ, ဒီးလၢအတၢ်ကတိၤ အအၢအသီခဲလၢာ် လၢပှၤတၢ်ဒဲးဘးဖိလၢ အတယူးတယီၣ်ဘၣ်ယွၤတဖၣ်, ကတိၤထီဒါအီၤလီၤ.
“ယွၤဘၣ်အသးလၢအီၤ”
စီၤဃနိာ်အတၢ်စံးပာ်န့ၣ် မ့ၢ်မနုၤလဲၣ်. အဝဲတဲဝဲလၢ– “ကွၢ်ကွၢ်, ကစၢ်ဟဲလီၤဒီး အပှၤစီဆှံအကလးတဖၣ်, ဒ်သိးအကစံၣ်ညီၣ်ပှၤခဲလၢာ်, ဒီးကဘိးဘၣ်သ့ၣ်ညါ ပှၤလၢအတယူးတယီၣ်ဘၣ်ယွၤ, လၢအတၢ်မၤခဲလၢာ်ဘၣ်ဃးဒီး တၢ်တယူးတယီၣ်ဘၣ်ယွၤ, လၢအမၤဝဲအိၣ်ဒီး အတၢ်တယူးတယီၣ်ဘၣ်ယွၤ, ဒီးလၢအတၢ်ကတိၤ အအၢအသီခဲလၢာ် လၢပှၤတၢ်ဒဲးဘးဖိလၢ အတယူးတယီၣ်ဘၣ်ယွၤတဖၣ်, ကတိၤထီဒါအီၤလီၤ.” (ယူဒၤ ၁၄, ၁၅) တၢ်လၢစီၤဃနိာ်စံးပာ်ဝဲတဖၣ် ကဟဲကဲထီၣ်အသး သပှၢ်ကတၢၢ်အဃိ အဝဲပာ်ဖျါထီၣ်ဝဲဒ် အဟဲကဲထီၣ်တ့ၢ်အသးလံန့ၣ်လီၤ. ဒီးပထံၣ်ဘၣ်လၢ ဝံအတၢ်စံးပာ်အါတီၤ ပာ်ဖျါထီၣ်ဝဲတၢ်ဂ့ၢ်ဒ်န့ၣ်စ့ၢ်ကီးလီၤ.—ယၡါယၤ ၄၆:၁၀.
“ယွၤဘၣ်အသးလၢအီၤ”
ပမ့ၢ်ဆိကမိၣ်ထံဘၣ်ဃးဒီး စီၤဃနိာ်အတၢ်နာ်န့ၣ် ပကအဲၣ်ဒိးသံကွၢ်လီၤပသးလၢ မ့ၢ်ပထံၣ်ဟီၣ်ခိၣ်အံၤဒ်ယွၤထံၣ်ဝဲအသိးဧါ. တၢ်စံၣ်ညီၣ်အကစီၣ်လၢ စီၤဃနိာ်တဲဝဲန့ၣ် ဘၣ်ထွဲလိာ်အသးဒီး ဟီၣ်ခိၣ်လၢစီၤဃနိာ်အစိၤ တကးဒံးဘၣ် ဘၣ်ထွဲလိာ်အသးဒီးဟီၣ်ခိၣ်လၢ မုၢ်မဆါတနံၤညါအံၤစ့ၢ်ကီးလီၤ. ဒ်စီၤဃနိာ်ဟ့ၣ်ပလီၢ်ပာ်စၢၤဝဲ ဘၣ်ဃးဒီးယဟိဝၤယွၤအတၢ်စံၣ်ညီၣ်အသိး ဖဲစီၤနိအၤအစိၤန့ၣ် ယွၤစံၣ်ညီၣ်ဟီၣ်ခိၣ်လၢထံ ဒီးမၤဟးဂီၤကွံာ်ပှၤလၢ အတယူးတယီၣ်ဘၣ်ယွၤလီၤ. ကစၢ်ယွၤအတၢ်စံၣ်ညီၣ် လၢဆၢကတီၢ်ဖဲန့ၣ် မ့ၢ်တၢ်အဒိအတဲာ်လၢ ယွၤအတၢ်စံၣ်ညီၣ်လၢ အကဟဲလၢခါဆူညါန့ၣ်လီၤ. (မးသဲ ၂၄:၃၈, ၃၉; ၂ ပ့းတရူး ၂:၄-၆) ဒ်လၢညါအသိး မုၢ်မဆါတနံၤအံၤစ့ၢ်ကီး ကစၢ်ယွၤ ဒီးအမူခိၣ်ကလူး စီဆှံတဖၣ် ကစံၣ်ညီၣ်ဟီၣ်ခိၣ်လၢ အအၢအသီအံၤ တီတီလိၤလိၤလီၤ. ပဝဲခဲလၢာ်ပကဘၣ် ဆိကမိၣ်ထံ စီၤဃနိာ်အတၢ်ဟ့ၣ်ပလီၢ် ဒီးဟ့ၣ်နီၤလီၤအီၤဆူ ပှၤဂၤအအိၣ်လီၤ. ဘၣ်သ့ၣ်သ့ၣ် ပဟံၣ်ဖိဃီဖိ ဒီးပတံၤသကိးသ့ၣ်တဖၣ် တတူၢ်လိာ် ပတၢ်ကစီၣ်ဘၣ်အဃိ တဘျီတခီၣ်ပကတူၢ်ဘၣ်လၢ ပအိၣ်သယုၢ်သညိထဲတဂၤဧိၤလီၤ. ဘၣ်ဆၣ် ဒ်ယဟိဝၤယွၤတပာ်တ့ၢ်ကွံာ် စီၤဃနိာ်အသိး အဝဲတပာ်တ့ၢ်ကွံာ်အခ့အပှၤလၢ မုၢ်မဆါတနံၤအံၤစ့ၢ်ကီးဘၣ်.
တၢ်ဖးလံာ်စီဆှံ
(၂ ယိၤဟၣ် ၁-၁၃) ယၤပှၤသးပှၢ်အံၤ, ယစံးဘၣ် နီၢ်ကူၤရံ လၢတၢ်ဃုထၢအီၤ, ဒီးအဖိတဖၣ်လၢယအဲၣ်အီၤလၢ တၢ်မ့ၢ်တၢ်တီအပူၤ, ဒီးတမ့ၢ်ဘၣ်ထဲယၤဘၣ်, မ့ၢ်စ့ၢ်ကီး ကယဲၢ်ပှၤလၢ အသ့ၣ်ညါတၢ်မ့ၢ်တၢ်တီ, ၂ လၢတၢ်မ့ၢ်တၢ်တီ လၢအအိၣ်လၢပပူၤ, ဒီးလၢအကအိၣ် ဒီးပှၤလီၤထူလီၤယိာ်အဃိ, ၃ တၢ်ဘျုးတၢ်ဖှိၣ်, တၢ်သူၣ်ကညီၤတၢ်သးကညီၤ, တၢ်ဃူတၢ်ဖိးလၢပၢ်ယွၤ, ဒီးပၢ်အဖိခွါ ယ့ၣ်ၡူးခရံာ် လၢတၢ်မ့ၢ်တၢ်တီ ဒီးတၢ်အဲၣ်တၢ်ကွံအပူၤန့ၣ် ကအိၣ်ဒီးပှၤလီၤ. ၄ ယထံၣ်န့ၢ်လံနဖိတနီၤ လဲၤတၢ်လၢ တၢ်မ့ၢ်တၢ်တီအပူၤ, ဒ်ပဒိးန့ၢ်တၢ်မၤလိာ်လၢ ပၢ်အသိးန့ၣ်ဒီး, ယသးခုဒိၣ်မးလီၤ. ၅ ဒီးခဲကနံၣ်အံၤ, နီၢ်ကူၤရံဧၢ, ယဃ့ကညးနၤ, တမ့ၢ်ဘၣ်ဒ် ယကွဲးတၢ်မၤလိာ်အသီအသိးဘၣ်, မ့ၢ်တၢ်လၢပန့ၢ်ဘၣ် လၢအခီၣ်ထံးန့ၣ်, လၢပကအဲၣ်လိာ်ကွံလိာ်ပသးလီၤ. ၆ ဒီးတၢ်အံၤ မ့ၢ်တၢ်အဲၣ်တၢ်ကွံလၢ ပကလဲၤတၢ်ဒ် အတၢ်မၤလိာ်တဖၣ်အသိးန့ၣ်လီၤ. တၢ်မၤလိာ်န့ၣ်မ့ၢ်တၢ်အံၤ, လၢပကလဲၤလၢအပူၤ, ဒ်ပနၢ်ဟူလၢ အခီၣ်ထံးအသိးန့ၣ်လီၤ. ၇ အဂ့ၢ်ဒ်အံၤ, ပှၤလီတၢ်အါဂၤ လဲၤထီၣ်ဆူဟီၣ်ခိၣ်ချၢ, လၢအတအၢၣ်လီၤအီလီၤဘၣ် လၢယ့ၣ်ၡူးခရံာ်ဟဲလၢ ပဖံးပညၣ်အပူၤဘၣ်. အဝဲန့ၣ်မ့ၢ်ပှၤလီတၢ်တဂၤန့ၣ် ဒီးပှၤဂ့ၢ်လိာ်ဘှီလိာ်ခရံာ်န့ၣ်လီၤ. ၈ ဒ်သိးသုသုတဒုးဟါမၢ် သုတၢ်မၤတဖၣ်တဂ့ၤ, ဒီးဒ်သိးသုကန့ၢ်ဘၣ် တၢ်ဘျုးတၢ်ဖှိၣ်အလၢအပှဲၤဒီး, ပလီၢ်သုသးတက့ၢ်. ၉ ကယဲၢ်ပှၤလၢအမၤကမၣ်တၢ်, ဒီးတအိၣ်တဆိးဘၣ်လၢ ခရံာ်အတၢ်သိၣ်တၢ်သီ အပူၤဘၣ်န့ၣ်, တအိၣ်ဘၣ်ဒီးယွၤဘၣ်. ပှၤလၢအအိၣ်ဝဲဆိးဝဲလၢ ခရံာ်အတၢ်သိၣ်တၢ်သီအပူၤန့ၣ်, မ့ၢ်အအိၣ်ဒီးပၢ်ဒီးဖိခွါန့ၣ်လီၤ. ၁၀ ပှၤတဂၤဂၤမ့ၢ်ဟဲဆူသုအိၣ်, ဒီးတဟဲစိာ်ဘၣ် တၢ်သိၣ်တၢ်သီအံၤဘၣ်ဒီး, တူၢ်လိာ်အီၤလၢ သုဟံၣ်ပူၤတဂ့ၤ. ဒီးစံး, တၢ်အမုာ်မ်အအိၣ်ဒီးနၤတက့ၢ်န့ၣ်, တဂ့ၤ. ၁၁ အဂ့ၢ်ဒ်အံၤ, ပှၤလၢအစံး, တၢ်အမုာ်မ်အအိၣ်ဒီးအီၤတက့ၢ်န့ၣ်, မ့ၢ်အဘၣ်ဃးဒီးအဝဲဒၣ် အမၤတၢ်လၢ အအၢန့ၣ်လီၤ. ၁၂ မ့ၢ်တၢ်ကွဲးန့ၢ်သု အဂ့ၢ်အကျိၤအိၣ်အါမံၤဒီး, တၢ်တမိၣ်ကွဲးဘၣ်ယသးလၢ စးခိဒီးကသံၣ်ထံဘၣ်. မ့မ့ၢ်ယမုၢ်လၢ်လၢ ယကဟဲဆူသုအိၣ်, ဒီးကတိၤလိာ်ပသးလၢ ထးခိၣ်သကိးထးခိၣ်, ဒ်သိးပတၢ်သူၣ်ခုသးခု ကလၢထီၣ်ပှဲၤထီၣ်လီၤ. ၁၃ နဒီပုၢ်ဝဲၢ်မုၣ်လၢ တၢ်ဃုထၢအီၤအဖိတဖၣ်န့ၣ် ကတိၤဒိၣ်နၤလီၤ.
လါနိၣ်ဝ့ဘၢၣ် ၁၈–၂၄
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | လီၣ်ဖျါ ၁–၃
“ယသ့ၣ်ညါနတၢ်ဖံးတၢ်မၤ”
(လီၣ်ဖျါ ၁:၂၀) တၢ်ခူသူၣ်ဘၣ်ဃးဒီး ဆၣ်နွံဖျၢၣ်လၢ နထံၣ်လၢယစုထွဲအပူၤ, ဒီးမ့ၣ်အူဒၢထူနွံဖျၢၣ်န့ၣ် မ့ၢ်အအံၤ, ဆၣ်နွံဖျၢၣ်မ့ၢ်တၢ်အိၣ်ဖှိၣ်နွံပူၤ အကလူးတဖၣ်, ဒီးမ့ၣ်အူဒၢနွံဖျၢၣ် မ့ၢ်တၢ်အိၣ်ဖှိၣ်နွံပူၤန့ၣ်လီၤ.
တၢး၁၂ ၁၀/၁၅ ကဘျံးပၤ ၁၄ အဆၢ ၈
နအိၣ်ဒီး တၢ်ပာ်သူၣ်ပာ်သးဒ်လဲၣ်
၈ ဒ်သိးပကဟးဆှဲး တၢ်ပာ်သူၣ်ပာ်သးဒ်အံၤအဂီၢ် ပကဘၣ်သ့ၣ်နီၣ်ထီၣ်က့ၤ လံာ်စီဆှံတဲဝဲ “ဆၣ်နွံဖျၢၣ်” လၢအအိၣ်လၢ ယၣ်ၡူး “အစုထွဲ” အဂ့ၢ်လီၤ. “ဆၣ်” တဖၣ်န့ၣ် ဘၣ်တၢ်ဒိလီၤအီၤလၢ တၢ်အိၣ်ဖှိၣ်သးပှၢ်လၢ အဘၣ်တၢ်ဒိးဖှူအီၤတဖၣ် သနာ်က့ ပၣ်ဃုာ်ဒီး တၢ်အိၣ်ဖှိၣ်သးပှၢ်လၢ တၢ်အိၣ်ဖှိၣ်တဖၣ် အပူၤစ့ၢ်ကီးလီၤ. ယ့ၣ်ၡူး ဟံးစုနဲၣ်ကျဲဝဲ “ဆၣ်” တဖၣ်အံၤ ဒ်ကျဲလၢ အဝဲဆိကမိၣ်ဝဲလၢ အကြၢးဝဲဘၣ်ဝဲအသိးလီၤ. (လီၣ်. ၁:၁၆, ၂၀) ဒ်အမ့ၢ်ခရံာ်ဖိ တၢ်အိၣ်ဖှိၣ်အခိၣ်အသိး ယ့ၣ်ၡူးန့ၣ် ပၢၤဃာ်ဝဲ တၢ်အိၣ်ဖှိၣ်သးပှၢ်ကရူၢ် လၢလၢပှဲၤပှဲၤလီၤ. ယ့ၣ်ၡူး အမဲာ်ချံန့ၣ် လီၤဂာ်ဒ် “မ့ၣ်အူလၣ်အသိး” အဃိ အဝဲထံၣ်တၢ်သ့ခဲလၢာ်လီၤ. အဃိ တၢ်အိၣ်ဖှိၣ်သးပှၢ်တဂၤဂၤ မ့ၢ်လိၣ်ဘၣ် တၢ်ဘှီဘၣ်ထီၣ်က့ၤန့ၣ် အဝဲကဘှီဘၣ်ထီၣ်က့ၤဝဲလၢ တၢ်ဆၢကတီၢ် ဒီးကျဲလၢအကြၢးဝဲဘၣ်ဝဲန့ၣ်လီၤ. (လီၣ်. ၁:၁၄) အဃိပကဘၣ် ဆဲးပာ်ဖျါထီၣ် တၢ်ယူးယီၣ်ပာ်ကဲ တၢ်အိၣ်ဖှိၣ်သးပှၢ်လၢ သးစီဆှံပာ်ထီၣ်အီၤတဖၣ် တုၤတၢ်ဆၢကတီၢ်အဝဲန့ၣ်လီၤ. စီၤပီလူးကွဲးဝဲလၢ “ပှၤလၢအကဲထီၣ်သုခိၣ်တဖၣ်န့ၣ်, စူၢ်အကလုၢ်, ဒီးဆီၣ်လီၤသုသးလၢအဖီလာ်တက့ၢ်. အဂ့ၢ်ဒ်အံၤ, အဝဲသ့ၣ်ဆိးသီလၢ သုသးအဂီၢ်, ဒ်ပှၤလၢအကဘၣ် စံးဆၢတၢ်အသိး, ဒ်သိးအကမၤတၢ်အံၤလၢတၢ်သးခုဒီး တမ့ၢ်ဘၣ်လၢတၢ်သးအုးဘၣ်န့ၣ်လီၤ. အဂ့ၢ်ဒ်အံၤ, အဝဲန့ၣ်တမၤအါထီၣ်ဘၣ်သုဘျုးဘၣ်.”—ဧ့ၤ. ၁၃:၁၇.
(လီၣ်ဖျါ ၂:၁, ၂) ကွဲးန့ၢ်အ့းဖ့းစူး အတၢ်အိၣ်ဖှိၣ်အကလူး, ပှၤလၢအဟံးဃာ်ဆၣ်နွံဖျၢၣ်လၢ အစုထွဲပူၤ, ဒီးဟးလၢမ့ၣ်အူဒၢထူ နွံဖျၢၣ်အကျါတဂၤန့ၣ်, စံးတၢ်ဒ်အံၤ, ၂ ယသ့ၣ်ညါနတၢ်ဖံးတၢ်မၤ, ဒီးနမၤတၢ်တုၤတၢ်ဘှံးနသး, ဒီးနတၢ်ဝံသးစူၤ, ဒီးလၢနအိၣ်ဘၣ်လိာ်ဒီး ပှၤအအၢအသီတကဲဘၣ်, ဒီးပှၤလၢအစံးလီၤအသးလၢ ပှၤတၢ်မၢဖိ ဒီးတမ့ၢ်ဘၣ်ဝဲတဖၣ်န့ၣ်, နမၤကွၢ်အီၤ, ဒီးနထံၣ်န့ၢ်အီၤလၢအမ့ၢ် ပှၤကတိၤကဘျံးကဘျၣ်,
တၢး၁၂ ၄/၁၅ ကဘျံးပၤ ၂၉ အဆၢ ၁၁
ဒ်သိးပကဒိးန့ၢ်ဘၣ် တၢ်အုၣ်က့ၤခီၣ်က့ၤအဂီၢ် ယဟိဝၤယွၤ ဒီသဒၢပှၤ
၁၁ တၢ်ထံၣ်လၢညါခီလၢ လီၣ်ဖျါ အဆၢဒိၣ် ၂ ဒီး ၃ အပူၤန့ၣ် ပာ်ဖျါထီၣ်ဝဲလၢ ယ့ၣ်ၡူးသ့ၣ်ညါဝဲ တၢ်ကဲထီၣ်အသးလၢ တၢ်အိၣ်ဖှိၣ်နွံဖျၢၣ်လၢ အအိၣ်လၢအၤစံအပူၤလီၤ. တၢ်ထံၣ်လၢညါခီအံၤ ပာ်ဖျါထီၣ်ဝဲလၢ ယ့ၣ်ၡူးသ့ၣ်ညါ တၢ်ကဲထီၣ်အသးန့ၣ် တမ့ၢ်ထဲတၢ်အိၣ်ဖျါလၢခိဘၣ် အဝဲသ့ၣ်ညါဝဲ တၢ်ကဲထီၣ်အသး လီၤတံၢ်လီၤဆဲးလီၤ. အဝဲပာ်ဖျါထီၣ်ဝဲ တၢ်မနုၤကဲထီၣ်အသးလဲၣ် တကးဒံးဘၣ် ပာ်ဖျါထီၣ်စ့ၢ်ကီးဝဲ ပှၤတဂၤစုာ်စုာ်လီၤ. အဝဲစံးပတြၢၤဝဲ တၢ်အိၣ်ဖှိၣ်တဖုစုာ်စုာ် ဒီးဒ်အဝဲသ့ၣ်အတၢ်လိၣ်ဘၣ်အသိး ဒီးဟ့ၣ်ကူၣ်ဟ့ၣ်ဖးဝဲစ့ၢ်ကီးလီၤ. တၢ်ထံၣ်လၢညါခီအံၤ အခီပညီအိၣ်လၢပဂီၢ်ဒ်လဲၣ်. တၢ်အိၣ်ဖှိၣ်နွံဖျၢၣ်န့ၣ် ဒိလီၤဝဲ ပှၤလၢအဘၣ်တၢ်ဒိးဖှူအီၤတဖၣ်လၢ အအိၣ်မူဖဲ ၁၉၁၄ ဒီးအလီၢ်ခံတဖၣ်လီၤ. ယ့ၣ်ၡူးဟ့ၣ်လီၤဝဲ တၢ်ဟံးစုနဲၣ်ကျဲ လီၤဆီဒၣ်တၢ် ပှၤလၢအဘၣ်တၢ်ဒိးဖှူအီၤတဖၣ်အဂီၢ် သနာ်က့ ကဲဘျုးလၢမုၢ်မဆါတနံၤအံၤ ကစၢ်ယွၤအပှၤဂီၢ်မုၢ် အတၢ်အိၣ်ဖှိၣ်ခဲလၢာ်လၢ အအိၣ်လၢဟီၣ်ခိၣ်ချၢတဖၣ် အဂီၢ်စ့ၢ်ကီးလီၤ. လၢတၢ်န့ၣ်အဃိ ပတဲသ့လၢ ယဟိဝၤယွၤသူဝဲ အဖိခွါ ဒီးဟံးစုနဲၣ်ကျဲဝဲ အပှၤဂီၢ်မုၢ်လၢ ဆၢကတီၢ်ခဲအံၤတဖၣ်လီၤ. ပဒိးန့ၢ်ဘၣ်တၢ်အဘျုးလၢ တၢ်ဟံးစုနဲၣ်ကျဲတဖၣ်အံၤ ကသ့ဒ်လဲၣ်.
တၢး၀၁ ၁/၁၅ ကဘျံးပၤ ၂၀-၂၁ အဆၢ ၂၀
ဆဲးလဲၤတၢ်ဒီး ယဟိဝၤယွၤအတၢ်ကရၢကရိတက့ၢ်
၂၀ ဒ်သိးပကဆဲးလဲၤတၢ်ဒီး ယဟိဝၤယွၤ အတၢ်ကရၢကရိလၢ အလဲၤထီၣ်လဲၤထီအဂီၢ် ပကဘၣ်အၢၣ်လီၤတူၢ်လိာ် “တၢ်အိၣ်ဖှိၣ်အခိၣ်” ယ့ၣ်ၡူးအမူဒါလၢ ကစၢ်ယွၤဟ့ၣ်လီၤအီၤတဖၣ်န့ၣ်လီၤ. (အ့းဖ့းစူး ၅:၂၂, ၂၃) ပာ်သူၣ်ပာ်သး ယၡါယၤ ၅၅:၄ စ့ၢ်ကီးတဲဝဲလၢ “ကွၢ်ကွၢ်, ယ [ယဟိဝၤ] ပာ်အီၤလၢတၢ်အုၣ်အသးလၢ ပှၤကလုာ်တဖၣ်အဂီၢ်, တၢ်အခိၣ်ဒီးပှၤမၤလိာ်တၢ်လၢ ပှၤဂီၢ်မုၢ်တဖၣ်အဂီၢ်လီၤ.” ယ့ၣ်ၡူးကဘၣ် တီခိၣ်ရိၤမဲတၢ်ဒ်လဲၣ်န့ၣ် သ့ၣ်ညါဝဲဂ့ၤဂ့ၤလီၤ. အဝဲသ့ၣ်ညါဝဲ အသိတဖၣ် ဒီးအဝဲသ့ၣ်အတၢ်ဖံးတၢ်မၤတဖၣ်လီၤ. ဖဲအဝဲသမံသမိးဝဲ တၢ်အိၣ်ဖှိၣ်နွံဖျၢၣ်လၢ အအိၣ်လၢအၤစံဝံၤအခါ ကွဲးဝဲလၢ “ယသ့ၣ်ညါနတၢ်ဖံးတၢ်မၤ” တဖၣ်ယဲၢ်ဘျီညါလီၤ. (လီၣ်ဖျါ ၂:၂, ၁၉; ၃:၁, ၈, ၁၅) ဒ်ယဟိဝၤယွၤအသိး ယ့ၣ်ၡူးစ့ၢ်ကီး သ့ၣ်ညါပတၢ်လိၣ်ဘၣ် တဖၣ်လီၤ. တချုးလၢအဟ့ၣ်လီၤပှၤ ကစၢ်အတၢ်ထုကဖၣ်ဒံးဘၣ်န့ၣ် အဝဲတဲဝဲလၢ “သုတချုးဃ့ဒံးဘၣ်ဒီး, တၢ်လၢသုန့ၢ်ဘၣ်အီၤ အလီၢ်အိၣ်တဖၣ်န့ၣ် သုပၢ်သ့ၣ်ညါဝဲလီၤ.”—မးသဲ ၆:၈-၁၃.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(လီၣ်ဖျါ ၁:၇) ကွၢ်ကွၢ်, ဟဲလီၤဝဲအိၣ်ဒီးတၢ်အၢၣ်တဖၣ်, ဒီးပှၤလၢအဆဲးအီၤ, ဒီးကယဲၢ်တၢ်အမဲာ်, ကထံၣ်ဘၣ်အီၤ, ဒီးကယဲၢ်ပှၤကလုာ်ကလုာ်လၢ ဟီၣ်ခိၣ်ချၢ, ကဟီၣ်ဝဲယၢၤဝဲလၢအဃိလီၤ. မ့ၢ်လံ, အၤမ့ၣ်.
kr ကဘျံးပၤ ၂၂၆ အဆၢ ၁၀
ယွၤအဘီအမုၢ် မၤနၢၤဝဲ အဒုၣ်အဒါတဖၣ်
၁၀ ဘိးဘၣ်သ့ၣ်ညါ တၢ်စံၣ်ညီၣ်အကစီၣ်. ယွၤအဘီအမုၢ် အဒုၣ်အဒါတဖၣ်န့ၣ် ကထံၣ်ဘၣ်ဝဲ တၢ်လၢအလီၤပျံၤလီၤဖုးဒိၣ်မးတခါလီၤ. ယ့ၣ်ၡူးတဲဝဲလၢ “ပှၤကထံၣ်ဘၣ် ပှၤကညီဖိခွါအံၤဟဲလီၤလၢ တၢ်အၢၣ်တဖၣ်အကျါ အိၣ်ဒီးအစိဒိၣ်အကမီၤဒိၣ်, ဒီးအလၤအကပီၤလီၤ.” (မၢ်ကူး ၁၃:၂၆) တၢ်စိတၢ်ကမီၤလၢ အလီၤကမၢကမၣ်ဖးဒိၣ် ကကဲထီၣ်အသးန့ၣ် မ့ၢ်ဝဲတၢ်ပနီၣ်လၢ ယ့ၣ်ၡူးဟဲလီၤဝဲ ဒ်သိးကဘိးဘၣ်သ့ၣ်ညါဝဲ တၢ်စံၣ်ညီၣ်အကစီၣ်အဂီၢ်လီၤ. ဝံအတၢ်စံးပာ်လၢဘၣ်ဃးဒီး မုၢ်နံၤခံကတၢၢ် အဂၤတကူာ်န့ၣ် ပာ်ဖျါထီၣ်ဝဲ ဖဲန့ၣ်အဆၢကတီၢ် ယ့ၣ်ၡူးကစံၣ်ညီၣ်တၢ်အဂ့ၢ် လီၤတံၢ်လီၤဆဲးလီၤ. တၢ်ဂ့ၢ်အံၤပထံၣ်ဘၣ်လၢ တၢ်အဒိဘၣ်ဃးဒီး သိဒီးမဲာ်တဲးလဲးလီၤ. (ဖး မးသဲ ၂၅:၃၁-၃၃, ၄၆ တက့ၢ်.) ပှၤလၢအဆီၣ်ထွဲမၤစၢၤ ယွၤအဘီအမုၢ်လၢ တၢ်သးတီအပူၤတဖၣ်န့ၣ် ကဘၣ်တၢ်စံၣ်ညီၣ်အီၤ ဒ်အမ့ၢ် “သိ” တဖၣ် ဒီးအဝဲသ့ၣ် ကသ့ၣ်ညါဝဲလၢ ‘တၢ်အုၣ်က့ၤခီၣ်က့ၤ အမုၢ်အလါဘူးထီၣ်’ လံအဃိက “မိာ်ထီၣ်” အခိၣ်လီၤ. (လူၤကၣ် ၂၁:၂၈) ပှၤလၢအထီဒါ ယွၤအဘီအမုၢ်တဖၣ်န့ၣ် တၢ်ကစံၣ်ညီၣ်အီၤဒ်အမ့ၢ် “မဲာ်တဲးလဲး” ဒီး အဝဲသ့ၣ် သ့ၣ်ညါဝဲလၢ ကဒိးန့ၢ်ဘၣ် “တၢ်ဒဲးဘးအထူအယိာ်” အဃိ “ကဟီၣ်ဝဲယၢၤဝဲ” လီၤ.—မးသဲ ၂၄:၃၀; လီၣ်ဖျါ ၁:၇.
(လီၣ်ဖျါ ၂:၇) ပှၤအိၣ်ဒီးအနၢ်, မ်အနၢ်ဟူတၢ်လၢ သးန့ၣ် စံးဘၣ်တၢ်အိၣ်ဖှိၣ်တဖၣ်တက့ၢ်. ပှၤလၢအမၤနၢၤတၢ်န့ၣ်, ယကဟ့ၣ်အီၣ်အီၤလၢ သ့ၣ်မူအိၣ်ဝဲလၢ ယွၤအပၤရဒံစူးအသးကံၢ်ပူၤလီၤ.
တၢး၀၉ ၁/၁၅ ကဘျံးပၤ ၃၁ အဆၢ ၁
လံာ်စီဆှံ အတၢ်ပာ်ဖျါလၢ လံာ်လီၣ်ဖျါ—အကူာ် ၁
၂:၇—“ယွၤအပၤရဒံစူး” န့ၣ်မ့ၢ်မနုၤလဲၣ်. တၢ်ကတိၤတဖၣ်အံၤန့ၣ် ကစၢ်ယွၤတဲဝဲ ခရံာ်ဖိလၢအဘၣ် တၢ်ဒိးဖှူအီၤတဖၣ်အဃိ ပၤရဒံစူးလၢ ဘၣ်တၢ်သူအီၤဖဲအံၤန့ၣ် ကမ့ၢ်ဝဲပၤရဒံစူးလၢမူခိၣ် လၢကစၢ်ယွၤ အနီၢ်ကစၢ်ဒၣ်ဝဲအိၣ်အလီၢ်န့ၣ်လီၤ. ပှၤလၢအဘၣ်တၢ်ဒိးဖှူအီၤလၢ အိၣ်ဒီးတၢ်သးတီတဖၣ် အိၣ်ဒီးတၢ်ခွဲးတၢ်ယာ်လၢ ကအီၣ် “သ့ၣ်မူ” အသၣ်လီၤ. အဝဲသ့ၣ်တဖၣ် ကဒိးန့ၢ်ဘၣ်ဝဲ သးသမူလၢအသံတသ့ဘၣ်န့ၣ်လီၤ.—၁ ကရံၣ်. ၁၅:၅၃.
တၢ်ဖးလံာ်စီဆှံ
(လီၣ်ဖျါ ၁:၁-၁၁) ယ့ၣ်ၡူးခရံာ် အတၢ်လီၣ်ဖျါလၢ ယွၤဟ့ၣ်လီၤအီၤ, ဒ်သိးအကဒုးနဲၣ် အခ့အပှၤတဖၣ်လၢ တၢ်လၢအဘၣ်မၤအသး ချ့ချ့တဖၣ်န့ၣ်လီၤ. ဒီးမၢလီၤအကလူး, ဒီးဒုးနဲၣ်ဝဲလၢအခ့အပှၤ စီၤယိၤဟၣ်, ၂ လၢအအုၣ်အသးလၢ ယွၤအကလုၢ်အကထါ, ဒီးယ့ၣ်ၡူးခရံာ် အတၢ်အုၣ်အသး, ဖဲဒၣ်တၢ်လၢအထံၣ်ဝဲတဖၣ် အဂ့ၢ်အကျိၤလီၤ. ၃ ပှၤလၢအဖး, ဒီးပှၤလၢအနၢ်ဟူ ဝံအကလုၢ်အကထါအံၤ, ဒီးတိၢ်န့ၢ်ဖံးဃာ် တၢ်ကွဲးအသးအိၣ်လၢအပူၤန့ၣ်, ဘၣ်ဆိၣ်ဂ့ၤဝဲလီၤ. အဂ့ၢ်ဒ်အံၤ, အဆၢအကတီၢ်ဘၣ် ဘူးတ့ၢ်လီၤ. ၄ ယၤစီၤယိၤဟၣ်အံၤ, ယစံးဘၣ်တၢ်အိၣ်ဖှိၣ်နွံပူၤ အိၣ်လၢအၤစံအပူၤန့ၣ်, တၢ်ဘျုးတၢ်ဖှိၣ်, ဒီးတၢ်ဃူတၢ်ဖိးလၢ ပှၤလၢအအိၣ်, ဒီးအိၣ်တ့ၢ်, ဒီးကဟဲတဂၤ, ဒီးလၢသးနွံဖျၢၣ်အိၣ်လၢ အလီၢ်ပစိာ်အမဲာ်ညါ, ၅ ဒီးလၢယ့ၣ်ၡူးခရံာ်လၢအမ့ၢ် ပှၤလၢအအုၣ်အသးလၢ အကလုၢ်တီ, လၢအမ့ၢ်ပှၤအိၣ်ဖျဲၣ်ဆိလၢ တၢ်သံန့ၣ်, ဒီးမ့ၢ်ဟီၣ်ခိၣ်စီၤပၤတဖၣ် အခိၣ်တဂၤအအိၣ်န့ၣ်, မ်အအိၣ်ဒီးသုတက့ၢ်. ပှၤလၢအအဲၣ်ပှၤ ဒီးသ့စီကွံာ် ပတၢ်ဒဲးဘးလၢအသွံၣ်ဒၣ်ဝဲ ၆ ဒီးပာ်ပှၤလၢဘီမုၢ်, ဒီးပှၤလုၢ်တၢ်အဒိၣ်တဖၣ် လၢယွၤဒီးအပၢ် အမဲာ်ညါတဂၤန့ၣ်, မ်တၢ်လၤတၢ်ကပီၤ, ဒီးတၢ်စိတၢ်ကမီၤအိၣ်ဒီးအီၤ အစိၤစိၤအဃၣ်ဃၣ်တက့ၢ်. အၤမ့ၣ်. ၇ ကွၢ်ကွၢ်, ဟဲလီၤဝဲအိၣ်ဒီး တၢ်အၢၣ်တဖၣ်, ဒီးပှၤလၢအဆဲးအီၤ, ဒီးကယဲၢ်တၢ်အမဲာ်, ကထံၣ်ဘၣ်အီၤ, ဒီးကယဲၢ်ပှၤကလုာ်ကလုာ်လၢ ဟီၣ်ခိၣ်ချၢ, ကဟီၣ်ဝဲယၢၤဝဲလၢအဃိလီၤ. မ့ၢ်လံ, အၤမ့ၣ်. ၈ ပှၤလၢအသ့တၢ်လၢာ်ကစၢ်ယွၤ, လၢအအိၣ်ဝဲ, ဒီးအိၣ်တ့ၢ်, ဒီးကဟဲဝဲတဂၤစံးစဲဒၣ်, ယမ့ၢ်က, ဒီးဧလီၤ. ၉ ပှၤလၢအဒီတံၤဒီသကိး ဒီးသုလၢတၢ်နးတၢ်ဖှီၣ်အပူၤ, ဒီးလၢယ့ၣ်ၡူးအဘီအမုၢ်အပူၤ, ဒီးလၢတၢ်ဝံသးစူၤအပူၤ, သုဒီပုၢ်ဝဲၢ်ယၤစီၤယိၤဟၣ်အံၤ, ယအိၣ်လၢကီးတဖျၢၣ် ကိးဝဲအမံၤလၢပးမူး, လၢယွၤအကလုၢ်အကထါအဃိ, ဒီးလၢယ့ၣ်ၡူးခရံာ် အတၢ်အုၣ်အသးအဃိန့ၣ်လီၤ. ၁၀ ယအိၣ်လၢသးအပူၤလၢ ကစၢ်အမုၢ်တနံၤ, ဒီးယနၢ်ဟူ တၢ်ကလုၢ်သီၣ်ဖးဒိၣ်လၢ ယချၢဃံဒ်ကွဲၤသီၣ်အသိး, ၁၁ ဒီးစံးဝဲဒၣ်, တၢ်လၢနထံၣ်, ကွဲးလၢလံာ်ပူၤ, ဒီးဟ့ၣ်ယုၢ်ဆူတၢ်အိၣ်ဖှိၣ်နွံပူၤ, ဆူအ့းဖ့းစူး, ဒီးစမူရနၤ, ဒီးပ့ၢ်ကမူး, ဒီးသူၤအတံရၤ, ဒီးစၢ်ဒံ, ဒီးဖံၤလဒ့းလဖံ, ဒီးလီၤဒံၤကံတက့ၢ်.
လါနိၣ်ဝ့ဘၢၣ် ၂၅–လါဒံၣ်စ့ဘၢၣ် ၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | လီၣ်ဖျါ ၄–၆
“ပှၤဒိးကသ့ၣ် လွံၢ်ဂၤ”
(လီၣ်ဖျါ ၆:၂) ဒီးယထံၣ်တၢ်, ဒီးကွၢ်ကွၢ်, ကသ့ၣ်ဝါ, ဒီးပှၤလၢအဆ့ၣ်နီၤလၢ အလိၤတဂၤအိၣ်ဒီးအချံၣ်လီၤ. ဒီးတၢ်ဟ့ၣ်လီၤအီၤလၢခိၣ်သလုး, ဒီးဒ်သိးအကမၤနၢၤတၢ်ဒီး, ဟးထီၣ်မၤနၢၤတၢ်လီၤ.
wp17.3 4 ¶3
ပှၤဒိးကသ့ၣ်လွံၢ်ဂၤ– အဝဲသ့ၣ် မ့ၢ်မတၤတဖၣ်လဲၣ်
ပှၤလၢအဒိးကသ့ၣ်ဝါန့ၣ် မ့ၢ်မတၤလဲၣ်. အဝဲမ့ၢ်မတၤလဲၣ်န့ၣ် လံာ်လီၣ်ဖျါပာ်ဖျါထီၣ်ဝဲလီၤ. ပှၤဒိးကသ့ၣ်လၢ မူခိၣ်န့ၣ် ဘၣ်တၢ်ကိးအီၤလၢ “ယွၤအကလုၢ်အကထါလီၤ.” (လီၣ်ဖျါ ၁၉:၁၁-၁၃) မ့ၢ်လၢယ့ၣ်ၡူးဘၣ်ကတိၤတၢ်လၢ ကစၢ်ယွၤအခၢၣ်စးအဃိ ဒိးန့ၢ်ဘၣ်ဝဲ မံၤလၤသၣ်ကပီၤလၢအမ့ၢ် ယွၤအကလုၢ်အကထါလီၤ. (ယိၤဟၣ် ၁:၁, ၁၄) တကးဒံးဘၣ် ဘၣ်တၢ်ကိးစ့ၢ်ကီးအီၤလၢ “စီၤပၤတဖၣ်အစီၤပၤ ဒီးကစၢ်တဖၣ်အကစၢ်” ဒီး “ပှၤအကလုၢ်တီ ဒီးပှၤအမ့ၢ်အတီ” လီၤ. (လီၣ်ဖျါ ၁၉:၁၁, ၁၆) အဝဲဒိးန့ၢ်ဘၣ် တၢ်စိတၢ်ကမီလၢ ကဒုးတၢ်ဒ် စီၤပၤတဂၤအသိးသနာ်က့ အဝဲတသူကမၣ် အတၢ်စိတၢ်ကမီၤတဖၣ်ဘၣ်. ဘၣ်ဆၣ် တၢ်သံကွၢ်အိၣ်ထီၣ်ဝဲတနီၤလီၤ.
wp17.3 4 ¶5
ပှၤဒိးကသ့ၣ်လွံၢ်ဂၤ– အဝဲသ့ၣ် မ့ၢ်မတၤတဖၣ်လဲၣ်
ပှၤဒိးကသ့ၣ်တဖၣ် စးထီၣ်ဒိးကသ့ၣ်လၢ ဖဲလဲၣ်အဆၢကတီၢ်လဲၣ်. ပှၤအဆိကတၢၢ်တဂၤလၢ အဒိးကသ့ၣ်န့ၣ် မ့ၢ်ဝဲယ့ၣ်ၡူး ဒီးအဝဲစးထီၣ်ဒိးဝဲဖဲ အဒိးန့ၢ်ဘၣ်ခိၣ်သလုးအခါလီၤ. (လီၣ်ဖျါ ၆:၂) ယ့ၣ်ၡူးကဲထီၣ် စီၤပၤလၢမူခိၣ်န့ၣ် လၢဆၢကတီၢ်ဖဲလဲၣ်. တမ့ၢ်ဖဲအဝဲသံဝံၤ က့ၤထီၣ်တုၤလၢမူခိၣ်အခါဘၣ်. လံာ်စီဆှံပာ်ဖျါထီၣ်ဝဲလၢ အဝဲဘၣ်အိၣ်ခိးတၢ်ဖးယံာ်လီၤ. (ဧ့ၤဘြံၤ ၁၀:၁၂, ၁၃) ဒ်သိးအပျဲၢ်အဘီၣ်တဖၣ် ကသ့ၣ်ညါဝဲလၢ လၢမူခိၣ်န့ၣ် အဝဲကဘၣ်အိၣ်ခိးတၢ် တုၤလၢအဆၢကတီၢ်ဖဲလဲၣ် ဒီးအဝဲကစးထီၣ်ပၢတၢ်လၢ ဆၢကတီၢ်ဖဲလဲၣ်န့ၣ် ဒုးသ့ၣ်ညါဝဲ ခီဖျိတၢ်ပနီၣ်လီၤ. အဝဲတဲဝဲလၢ အတၢ်ပၢမ့ၢ်စးထီၣ်န့ၣ် ဟီၣ်ခိၣ်အတၢ်အိၣ်သးတဖၣ် ကနးဒိၣ်ထီၣ်ဝဲလီၤ. တၢ်ဒုးတၢ်ယၤ, တၢ်သၣ်ဝံၤလီၤဒိ ဒီးတၢ်ဆါသံသတြိာ်တဖၣ် ကကဲထီၣ်ဝဲလီၤ. (မးသဲ ၂၄:၃, ၇; လူၤကၣ် ၂၁:၁၀, ၁၁) စးထီၣ်ဖဲ ၁၉၁၄ န့ၣ် ဟီၣ်ခိၣ်တၢ်ဒုးတၢတဘျီ ကဲထီၣ်ဝံၤတယံာ်ဘၣ်ဒီး ပှၤဟီၣ်ခိၣ်ဖိတဖၣ် ထံၣ်ဘၣ်တၢ်ကီတၢ်ခဲအါမးလီၤ. တၢ်အံၤ လံာ်စီဆှံကိးဝဲလၢ “မုၢ်နံၤအခံကတၢၢ်” လီၤ.—၂ တံၤမသ့း ၃:၁-၅.
(လီၣ်ဖျါ ၆:၄-၆) ဒီးကသ့ၣ်အဂၤလၢ အဂီၤတဒုဟးထီၣ်, ဒီးတၢ်ဟ့ၣ်လီၤ အစိအကမီၤလၢ ပှၤလၢအဆ့ၣ်နီၤလၢအလိၤတဂၤ, ဒ်သိးအကထုးကွံာ် တၢ်ဃူတၢ်ဖိးလၢဟီၣ်ခိၣ်ချၢ, ဒီးလၢပှၤကမၤသံလိာ်အသးလီၤ. ဒီးတၢ်ဟ့ၣ်လီၤအီၤလၢ နးဖးဒိၣ်တဘ့ၣ်လီၤ. ၅ ဒီးဖဲအအိးထီၣ် တၢ်စဲပနီၣ်ဃာ်လၢ အပှဲၤထီၣ်သၢဖျၢၣ်တဖျၢၣ်န့ၣ်, ယနၢ်ဟူတၢ်အသးလၢ အပှဲၤထီၣ်သၢဒုတဒုန့ၣ် စံးဝဲဒၣ်, ဟဲတက့ၢ်. ဒီးယထံၣ်တၢ်, ဒီးကွၢ်ကွၢ်, ကသ့ၣ်သူတဒု, ဒီးပှၤလၢအဆ့ၣ်နီၤ လၢအလိၤတဂၤ အိၣ်ဒီးစီၤပီၢ်လၢအစုပူၤလီၤ. ၆ ဒီးယနၢ်ဟူတၢ်အကလုၢ်လၢ တၢ်အသးလွံၢ်ဒုအကျါ စံးဝဲဒၣ်, ဘုကၠူၣ်တသလိးလၢ ဒန့ၤရံတဘ့ၣ်အဂီၢ်, ဒီးဘုမုယီၤသၢသလိးလၢ ဒန့ၤရံတဘ့ၣ်အဂီၢ်လီၤ. ဒီးမၤဟးဂီၤသိဧိၤချါဧိၤ ဒီးစပံးထံတဂ့ၤ.
wp17.3 5 ¶2
ပှၤဒိးကသ့ၣ်လွံၢ်ဂၤ– အဝဲသ့ၣ် မ့ၢ်မတၤတဖၣ်လဲၣ်
ပှၤဒိးကသ့ၣ်ဂီၤန့ၣ် ဘၣ်တၢ်ဒိလီၤအီၤလၢ တၢ်ဒုးတၢ်ယၤလီၤ. အဝဲကထုးထီၣ်ကွံာ် တၢ်ဃူတၢ်ဖိးန့ၣ် တမ့ၢ်ထဲ ထံကီၢ်တနီၤဘၣ်, ကထုးထီၣ်ကွံာ်ဝဲလၢ ဟီၣ်ခိၣ်ဒီဘ့ၣ်လီၤ. ဖဲ ၁၉၁၄ န့ၣ်လၢပှၤဟီၣ်ခိၣ်ဖိ အတၢ်စံၣ်စိၤတဲစိၤအပူၤ ဟီၣ်ခိၣ်ဒီဘ့ၣ်တၢ်ဒုးကဲထီၣ်ဝဲ အဆိကတၢၢ်တဘျီလီၤ. ဒီးလၢခံ တၢ်ဒုးလၢအဆူၣ်န့ၣ်အီၤ တၢ်ဒုးခံဘျီတဘျီ ဟဲပိာ်ထီၣ်အခံလီၤ. စးထီၣ်လၢ ၁၉၁၄ တၢ်ဒုးတၢ်ယၤ ဒီးတၢ်သဘံၣ်သဘုၣ်တဖၣ်အဃိ ပှၤတနီၤတယးကွၢ်ဝဲ ပှၤသံကအိၣ် အကကွဲၢ် ၁၀၀ ဘျဲၣ်လီၤ. ပှၤလၢအဘၣ်ဒိဘၣ်ထံး နးနးကလဲာ်တဖၣ်စ့ၢ်ကီး အိၣ်အါမးလီၤ.
wp17.3 5 ¶4-5
ပှၤဒိးကသ့ၣ်လွံၢ်ဂၤ– အဝဲသ့ၣ် မ့ၢ်မတၤတဖၣ်လဲၣ်
“ဒီးကွၢ်ကွၢ်, ကသ့ၣ်သူတဒု, ဒီးပှၤလၢအဆ့ၣ်နီၤ လၢအလိၤတဂၤ အိၣ်ဒီးစီၤပီၢ်လၢအစုပူၤလီၤ. ဒီးယနၢ်ဟူတၢ်အကလုၢ်လၢ တၢ်အသးလွံၢ်ဒုအကျါစံးဝဲဒၣ်, ဘုကၠူၣ်တသလိးလၢ ဒန့ၤရံတဘ့ၣ်အဂီၢ်, ဒီးဘုမုယီၤသၢသလိးလၢ ဒန့ၤရံတဘ့ၣ်အဂီၢ်လီၤ. ဒီးမၤဟးဂီၤသိဧိၤချါဧိၤဒီးစပံးထံတဂ့ၤ.”—လီၣ်ဖျါ ၆:၅, ၆.
ပှၤဒိးကသ့ၣ်သူန့ၣ် ဘၣ်တၢ်ဒိလီၤအီၤလၢ တၢ်သၣ်ဝံၤလီၤဒိလီၤ. ဒ်ပထံၣ်ဘၣ်လၢ တၢ်ဂီၤပူၤအသိး တၢ်အီၣ်တၢ်အီကၤ တုၤဒၣ်လဲာ် ဘုကၠူၣ်တသလိးအဂီၢ်န့ၣ် ပှၤဘၣ်ဟ့ၣ်ဒန့ၤရံတဘ့ၣ် လၢအလီၤလဲဝဲ တၢ်မၢဖိအစိၤ ပှၤမၤတၢ်တသီအဂီၢ်ညါလီၤ. (မးသဲ ၂၀:၂) မ့မ့ၢ်ဘုမုယီၤလၢ အတဂ့ၤထဲသိးဒီး ဘုကၠူၣ်န့ၣ် ကန့ၢ်ဝဲသၢသလိးလီၤ. မ့မ့ၢ်ပှၤလၢအဟံၣ်ဖိဃီဖိအါတဖၣ် အီၣ်ဝဲကလၢဒ်လဲၣ်. ပှၤဖဲန့ၣ်အစိၤတဖၣ် ဘၣ်တၢ်ဟ့ၣ်ပလီၢ်အဝဲသ့ၣ်လၢ ကသူဝဲ တနံၤဘၣ်တနံၤအတၢ်လိၣ်ဘၣ် လၢအမ့ၢ် သ့ၣ်စၤယံးအသိ ဒီးစပံးထံတဖၣ် သ့သ့ဘၣ်ဘၣ်လီၤ.
(လီၣ်ဖျါ ၆:၈) ဒီးယထံၣ်တၢ်, ဒီးကွၢ်ကွၢ်, ကသ့ၣ်လါဝါတဒု, ဒီးပှၤလၢအဆ့ၣ်နီၤလၢ အလိၤတဂၤအမံၤမ့ၢ်တၢ်သံ, ဒီးပျုၤပူၤပိာ်ထီၣ်အခံလီၤ. ဒီးတၢ်ဟ့ၣ်လီၤ အဝဲသ့ၣ်အစိအကမီၤ, လၢဟီၣ်ခိၣ်လွံၢ်ပူတပူအဖီခိၣ်, ဒ်သိးအကမၤသံတၢ်လၢနး, ဒီးလၢတၢ်သၣ်ဝံၤ, ဒီးလၢတၢ်သံ, ဒီးလၢဟီၣ်ခိၣ်တၢ်ဒူတၢ်ဃိၤလီၤ.
wp17.3 5 ¶8-10
ပှၤဒိးကသ့ၣ်လွံၢ်ဂၤ– အဝဲသ့ၣ် မ့ၢ်မတၤတဖၣ်လဲၣ်
ပှၤဒိးကသ့ၣ်လွံၢ်ဂၤတဂၤန့ၣ် ဘၣ်တၢ်ဒိလီၤအီၤလၢ တၢ်ဆါသံသတြိာ် ဒီးတၢ်သံတၢ်ပှၢ်လၢ အကဲထီၣ်အသးလၢတၢ်အဂၤတဖၣ်လီၤ. ဖဲ ၁၉၁၄ ဝံၤအလီၢ်ခံ လၢတိးကွ့တၢ်ဆါ (Spanish flu) အဃိ ပှၤသံလၢအကကွဲၢ်တဖၣ်လီၤ. တၢ်ဆါအံၤဘၣ်ကူဘၣ်ဂာ်ဝဲ ပှၤအကကွဲၢ် ၅၀၀ ဃၣ်ဃၣ် ဒီး ပှၤ ၃ ဂၤန့ၣ် မူတ့ၢ်ထဲ ၁ ဂၤလီၤ.
တိးကွ့တၢ်ဆါ (Spanish flu) အံၤမ့ၢ်ဒၣ်အခီၣ်ထံးဒံးလီၤ. ယၤဖှိၣ်နံၣ် ၂၀ အတီၢ်ပူၤ ပှၤတယးကွၢ်န့ၣ် ပှၤသံလၢ ပှၤဘၣ်လၢၢ်တၢ်ဆါအဃိန့ၣ် ကအိၣ်ဝဲ အကကွဲၢ် ၃၀၀ ဘျဲၣ်လီၤ. ဆၢကတီၢ်ခဲအံၤ ကသံၣ်ကသီလဲၤထီၣ်လဲၤထီအါမး သနာ်က့ ပှၤသံလၢ AIDS, တၢ်ပသိၣ်ဆါ ဒီးတၢ်ညၣ်ဂိၢ်န့ၣ် ကအိၣ်လၢ အကကွဲၢ်တဖၣ်လီၤ.
မ့မ့ၢ်လၢတၢ်ဒုးတၢ်ယၤအဃိမ့ၢ်ဂ့ၤ, တၢ်သၣ်ဝံၤလီၤဒိအဃိမ့ၢ်ဂ့ၤ, တၢ်ဆူးတၢ်ဆါအဃိမ့ၢ်ဂ့ၤ ပှၤခဲလၢာ်အကျဲကတၢၢ်လၢတၢ်သံလီၤ. တၢ်သွၣ်ခိၣ်န့ၣ် တဟ့ၣ်ထီၣ်တၢ်မုၢ်လၢ်နီတမံၤဘၣ်, ထဲဒၣ်အဟံးန့ၢ်ဝဲ ပှၤသးသမူတဖၣ်လီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(လီၣ်ဖျါ ၄:၄) ဒီးဝးတရံးလီၢ်ပစိာ်န့ၣ်, လီၢ်ပစိာ်ခံဆံလွံၢ်ဖျၢၣ်အိၣ်ဝဲ, ဒီးပှၤသူၣ်က့သးပှၢ်ကူသိးဒီး တၢ်ကူတၢ်သိးဝါ, ဒီးကုာ်ခိၣ်သလုးထူခံဆံလွံၢ်ဂၤ, ဆ့ၣ်နီၤဝဲလၢလီၢ်ပစိာ်တဖၣ်န့ၣ်လီၤ.
(လီၣ်ဖျါ ၄:၆) ဒီးပီၣ်လဲၣ်ယွၤခၣ်စိးလီၤဂာ်လၢ လၢၢ်ဖျါကလၤ, အိၣ်ဝဲလၢလီၢ်ပစိာ်အမဲာ်ညါလီၤ. ဒီးတၢ်အသးလွံၢ်ဒုလၢ ပှဲၤဝဲဒီးအမဲာ်သၣ်တိၣ်လၢညါ ဒီးလၢအချၢဃံန့ၣ်, အိၣ်ဝဲဖဲလီၢ်ပစိာ်အဖးဖီဒီး အိၣ်ဝးတရံးလီၢ်ပစိာ်လီၤ.
re ကဘျံးပၤ ၇၆-၇၇ အဆၢ ၈
ယဟိဝၤယွၤ မူခိၣ်အလီၢ်ပစိာ် လီၤဘီလီၤမုၢ်
၈ စီၤယိၤဟၣ် သ့ၣ်ညါဝဲလၢ လၢပျၢၤန့ၣ် ပှၤလုၢ်တၢ်အဒိၣ်တဖၣ် အမူဒါအိၣ်လၢ ကဘၣ်မၤတၢ်လၢ ဒဲစီဆှံအပူၤလီၤ. အဃိ ဖဲအထံၣ်ဘၣ်တၢ်ထံၣ်လၢခံတခါအခါ ကကမၢကမၣ်ဝဲလီၤ. အဝဲ ပာ်ဖျါထီၣ်ဝဲဒ်အံၤ “ဒီးဝးတရံးလီၢ်ပစိာ်န့ၣ်, လီၢ်ပစိာ်ခံဆံလွံၢ်ဖျၢၣ်အိၣ်ဝဲ, ဒီးပှၤသူၣ်က့သးပှၢ်ကူသိးဒီး တၢ်ကူတၢ်သိးဝါ, ဒီးကုာ်ခိၣ်သလုးထူခံဆံလွံၢ်ဂၤ, ဆ့ၣ်နီၤဝဲလၢလီၢ်ပစိာ်တဖၣ်န့ၣ်လီၤ.” (လီၣ်ဖျါ ၄:၄) လၢပှၤလုၢ်တၢ်အဒိၣ်တဖၣ်အလီၢ် ပှၤသူၣ်က့သးပှၢ် ၂၄ ဂၤန့ၣ် ကုာ်ခိၣ်သလုး ဒ်စီၤပၤအသိး ဒီးဆ့ၣ်နီၤလၢ လီၢ်ပစိာ်အဖီခိၣ်လီၤ. ပှၤသူၣ်က့သးပှၢ်တဖၣ်အံၤန့ၣ် မ့ၢ်မတၤတဖၣ်လဲၣ်. အဝဲသ့ၣ်တဖၣ်န့ၣ် မ့ၢ်ပှၤလၢအဘၣ်တၢ်ဒိးဖှူအီၤ လၢအအိၣ်လၢခရံာ်ဖိတၢ်အိၣ်ဖှိၣ်ပူၤလၢ အဂဲၤဆၢထၢၣ်သမူထီၣ်က့ၤ ဒီးဒိးန့ၢ်ဘၣ်တၢ်ခွဲးတၢ်ယာ်လၢ ကထီၣ်ဘၣ်ဆူမူခိၣ် ဒ်ယဟိဝၤယွၤ အၢၣ်လီၤပာ်အဝဲသ့ၣ်အသိးလီၤ. ပသ့ၣ်ညါဘၣ်သ့ဒ်လဲၣ်.
re ကဘျံးပၤ ၈၀ အဆၢ ၁၉
ယဟိဝၤယွၤ မူခိၣ်အလီၢ်ပစိာ် လီၤဘီလီၤမုၢ်
၁၉ တၢ်သးတဖၣ်န့ၣ် ဒိလီၤဝဲ တၢ်မနုၤလဲၣ်. ဝံယဃ့းစက့လး အတၢ်ထံၣ်လၢညါခီအပူၤန့ၣ် မၤစၢၤပှၤလၢ ပကထံၣ်န့ၢ်တၢ်စံးဆၢလီၤ. ယဃ့စက့လး အတၢ်ထံၣ်လၢညါခီန့ၣ် ထံၣ်ဝဲ ယဟိဝၤယွၤ ဆ့ၣ်နီၤလၢ မူခိၣ်လ့ၣ်ကဟၣ်အဖီခိၣ် ဒီးတၢ်သးတဖၣ်ဝးတရံးအီၤလီၤ. အဝဲအတၢ်ထံၣ်တၢ်လၢညါခီအံၤ လီၤဂာ်ဒီး စီၤယိၤဟၣ်အတၢ်ထံၣ်လီၤ. (ယဃ့းစက့လး ၁:၅-၁၁, ၂၂-၂၈) လၢခံ ယဃ့းစက့လး ထံၣ်ဘၣ်ကဒီး လ့ၣ်ကဟၣ်လၢ တၢ်သးတဖၣ်ဝးတရံးအီၤန့ၣ်လီၤ. ဘၣ်ဆၣ် တဘျီအံၤ အဝဲပာ်ဖျါထီၣ်ဝဲလၢ တၢ်သးတဖၣ်အံၤန့ၣ် မ့ၢ်ဝဲ ခ့ရူာ်တဖၣ်လီၤ. (ယဃ့းစက့လး ၁၀:၉-၁၅) တၢ်သးလွံၢ်ဂၤလၢ စီၤယိၤဟၣ်ထံၣ်ဝဲန့ၣ် ခၢၣ်စးဝဲ ကစၢ်ယွၤ အခ့ရူာ်တဖၣ်, တၢ်သးလၢ အလီၢ်အလၤအပတီၢ်ထီ လၢအအိၣ်လၢပှၤနီၢ်သးဖိ အတၢ်ကရၢကရိအကျါလီၤ. ဖဲစီၤယိၤဟၣ် ထံၣ်ဝဲ ခ့ရူာ်တဖၣ် အိၣ်ဘူးလၢယဟိဝၤယွၤအခါ တမ့ၢ်လၢအဝဲ ကကမၢကမၣ်ဘၣ်. မ့ၢ်လၢ လၢပျၢၤဒဲစီဆှံအတၢ်ရဲၣ်တၢ်ကျဲၤန့ၣ် တၢ်အၢၣ်လီၤအီလီၤတလါလၢ အဒိလီၤဝဲ ယဟိဝၤယွၤအလီၢ်ပစိာ် အဖီခိၣ်န့ၣ် အိၣ်ဒီးခ့ရူာ်ထူခံဂၤလီၤ. ဖဲယဟိဝၤယွၤ ဟ့ၣ်ပှၤအံၣ်စရ့လးဖိတဖၣ် တၢ်မၤလိာ်အခါ အကလုၢ်သီၣ်ထီၣ်ဖဲ ခ့ရူာ်ခံဂၤအဘၢၣ်စၢၤလီၤ.—၂ မိၤၡ့ ၂၅:၂၂; စံးထီၣ်ပတြၢၤ ၈၀:၁.
(လီၣ်ဖျါ ၅:၅) ဒီးပှၤသူၣ်က့သးပှၢ်တဂၤ စံးဘၣ်ယၤ, ဟီၣ်တဂ့ၤ. ကွၢ်ကွၢ်, ခ့ယုၢ်ဘၣ်ဃးဒီးယူဒၤအဒူၣ်, ဒီးစီၤဒၤဝံးအဂံၢ်တဂၤ, မၤနၢၤတၢ် ဒ်သိးအကအိးထီၣ်လံာ်, ဒီးအတၢ်စဲပနီၣ်ဃာ်နွံဖျၢၣ်န့ၣ်လီၤ.
cf ကဘျံးပၤ ၃၆ အဆၢ ၅-၆
“ကွၢ်ကွၢ်, ခ့ယုၢ်ဘၣ်ဃးဒီး ယူဒၤအဒူၣ်”
၅ ခ့ယုၢ်န့ၣ် ဘၣ်တၢ်ပာ်ဖျါထီၣ်အီၤ ဃုာ်ဒီးတၢ်သူၣ်ဒူသးဒူလီၤ. နဂဲၤဆၢထၢၣ်ဘၣ်လၢ ခ့ယုၢ်ဖါဖိတဒုအမဲာ်ညါ တဘျီဘျီဧါ. နမ့ၢ်ဂဲၤဆၢထၢၣ်ဘၣ်န့ၣ် ဘၣ်သ့ၣ်သ့ၣ်ကမ့ၢ် ခ့ယုၢ်လၢအအိၣ်လၢ ဆၣ်ဖိကီၢ်ဖိ တၢ်ကွၢ်ကီအလီၢ် လၢဘၣ်တၢ်ဒူးဃာ်အီၤလၢ ကပိၤပူၤအမဲာ်ညါလီၤ. မ့မ့ၢ်ဒ်န့ၣ်သနာ်က့ နကပျံၤတၢ်ဒံးလီၤ. ဖဲနကွၢ် ဆၣ်ဖိကီၢ်ဖိလၢ အနီၢ်ဒိၣ် ဒီးအဂံၢ်ဆူၣ်ဘါဆူၣ်တဒုအံၤအခါ အဝဲစ့ၢ်ကီး ကကွၢ်စူၣ်က့ၤနၤလီၤ. တၢ်လၢခ့ယုၢ်န့ၣ် တဖျါလၢ အိၣ်ဒီးတၢ်ပျံၤတၢ်ဖုး ဒီးကဃ့ၢ်ကွံာ်ဘၣ်. လံာ်စီဆှံတဲဝဲလၢ “ခ့ယုၢ်ဆူၣ်ဝဲလၢ ဆၣ်ဖိကီၢ်ဖိအကျါ, ဒီးတဃၣ်ကွံာ်အသးလၢ တၢ်နီတမံၤဘၣ်.” (ကတိၤဒိ ၃၀:၃၀) ယ့ၣ်ၡူးအတၢ်သူၣ်ဒူသးဒူစ့ၢ်ကီး ဒ်န့ၣ်အသိးလီၤ.
၆ ပကတဲသကိး ကျဲသၢဘိလၢ ယ့ၣ်ၡူးပာ်ဖျါထီၣ် တၢ်သူၣ်ဒူသးဒူ ဒ်ခ့ယုၢ်အသိးလီၤ. ကျဲသၢဘိလၢ အဝဲပာ်ဖျါထီၣ် တၢ်သူၣ်ဒူသးဒူန့ၣ်မ့ၢ်ဝဲ ဆၢထၢၣ်ဂၢၢ်ကျၢၤလၢ တၢ်မ့ၢ်တၢ်တီတကပၤ, တူၢ်လိာ်တၢ်တီတၢ်လိၤ ဒီးဖဲအကွၢ်ဆၢၣ်မဲာ်ဘၣ်တၢ် ထီဒုၣ်ထီဒါအခါလီၤ. ပဝဲသ့ၣ်တဖၣ်စ့ၢ်ကီး ပမ့မ့ၢ်ပှၤလၢ အိၣ်ဒီးတၢ်သူၣ်ဒူသးဒူမ့ၢ်ဂ့ၤ တအိၣ်ဘၣ်မ့ၢ်ဂ့ၤ ပကွၢ်လိမၤဒိး ယ့ၣ်ၡူးဒီးပာ်ဖျါထီၣ် တၢ်သူၣ်ဒူသးဒူသ့လီၤ.
တၢ်ဖးလံာ်စီဆှံ
(လီၣ်ဖျါ ၄:၁-၁၁) တၢ်န့ၣ်တဖၣ်အလီၢ်ခံဒီး, ယထံၣ်တၢ်, ဒီးကွၢ်ကွၢ်, တြဲၤအိၣ်အိးထီၣ်အသးလၢမူခိၣ်, ဒီးတၢ်ကလုၢ်သီၣ်အခီၣ်ထံးလၢ ယနၢ်ဟူကတိၤတ့ၢ်ဒီးယၤ ဒ်ကွဲၤသီၣ်အသိးန့ၣ်, စံးဝဲဒၣ်, ဟဲက့ၤထီၣ်ဖဲအံၤ, ဒီးယကဒုးနဲၣ်နၤလၢ တၢ်လၢအဘၣ်မၤအသး လၢတၢ်န့ၣ်တဖၣ်အလီၢ်ခံလီၤ. ၂ ဒီးယအိၣ်လၢ သးန့ၣ်အပူၤတကီၢ်ခါ, ဒီးကွၢ်ကွၢ်, လီၢ်ပစိာ်အိၣ်ပာ်လီၤ အသးလၢမူခိၣ်, ဒီးပှၤတဂၤဆ့ၣ်နီၤလၢ အဖီခိၣ်လီၤ. ၃ ဒီးပှၤလၢအဆ့ၣ်နီၤလၢ အဖီခိၣ်န့ၣ်, ဖျါဝဲလီၤဂာ်လၢ တၢ်မျၢ်နကၤသွဲး ဒီးတၢ်မျၢ်ဆီသွံၣ်အသိး, ဒီးတၢၢ်ကွဲၤအိၣ်ဝးတရံး လီၢ်ပစိာ်န့ၣ်, ဖျါဝဲလီၤဂာ်လၢ တၢ်မျၢ်ဟ့မၠးလီၤ. ၄ ဒီးဝးတရံးလီၢ်ပစိာ်န့ၣ်, လီၢ်ပစိာ်ခံဆံလွံၢ်ဖျၢၣ်အိၣ်ဝဲ, ဒီးပှၤသူၣ်က့သးပှၢ်ကူသိးဒီး တၢ်ကူတၢ်သိးဝါ, ဒီးကုာ်ခိၣ်သလုးထူခံဆံလွံၢ်ဂၤ, ဆ့ၣ်နီၤဝဲလၢ လီၢ်ပစိာ်တဖၣ်န့ၣ်လီၤ. ၅ ဒီးလီဝၢ်အဒံး, ဒီးလီသီၣ်, ဒီးတၢ်အကလုၢ်သီၣ်တဖၣ်, ဟဲထီၣ်လၢလီၢ်ပစိာ်အပူၤ, ဒီးမ့ၣ်အူဒၢနွံဖျၢၣ်လၢ အမ့ၢ်ယွၤအသးနွံဖျၢၣ်, ကဲၤကပီၤလၢလီၢ်ပစိာ်အမဲာ်ညါလီၤ. ၆ ဒီးပီၣ်လဲၣ်ယွၤခၣ်စိး လီၤဂာ်လၢ လၢၢ်ဖျါကလၤ, အိၣ်ဝဲလၢလီၢ်ပစိာ်အမဲာ်ညါလီၤ. ဒီးတၢ်အသးလွံၢ်ဒု လၢပှဲၤဝဲဒီးအမဲာ်သၣ်တိၣ်လၢညါ ဒီးလၢအချၢဃံန့ၣ်, အိၣ်ဝဲဖဲလီၢ်ပစိာ်အဖးဖီ ဒီးအိၣ်ဝးတရံးလီၢ်ပစိာ်လီၤ. ၇ ဒီးတၢ်အသးအခီၣ်ထံးတဒုန့ၣ်, လီၤဂာ်လၢခ့ယုၢ်, ဒီးတၢ်အသးပှဲၤထီၣ်ခံဒုတဒုန့ၣ်, လီၤဂာ်လၢဂီၤဖံးဖိ, ဒီးတၢ်အသးပှဲၤထီၣ် သၢဒုတဒုန့ၣ် အမဲာ်လီၤဂာ်လၢ ပှၤကညီ, ဒီးတၢ်အသးပှဲၤထီၣ် လွံၢ်ဒုတဒုန့ၣ် လီၤဂာ်လၢ လံာ်ဖးဒိၣ်လၢအယူၤဝဲလီၤ. ၈ ဒီးတၢ်အသးလွံၢ်ဒုန့ၣ် အိၣ်ဒီးအဒံးဆ့တဒုဃုဘ့ၣ်, တဒုဃုဘ့ၣ်, ဒီးလၢခိဝးတရံး, ဒီးလၢအပူၤလၢ ပှဲၤဝဲဒီးအမဲာ်သၣ်တိၣ်လီၤ. ဒီးလၢမုၢ်ဆါမ့ၢ်ဂ့ၤ, လၢမုၢ်နၤမ့ၢ်ဂ့ၤ, တဆိတ့ၢ်ဘၣ်, ဒီးစံးဝဲဒၣ်, ယွၤလၢအသ့တၢ်လၢာ်, လၢအအိၣ်တ့ၢ်လံ, ဒီးလၢအအိၣ်ဝဲ, ဒီးလၢအကဟဲတဂၤန့ၣ်, စီဆှံဝဲ, စီဆှံဝဲ, စီဆှံဝဲလီၤ. ၉ ဒီးတုၤတၢ်အသးလွံၢ်ဒု ဟ့ၣ်တၢ်လၤကပီၤ, ဒီးတၢ်ယူးယီၣ်, ဒီးတၢ်စံးထီၣ်ပတြၢၤလၢ ပှၤလၢအဆ့ၣ်နီၤလၢ လီၢ်ပစိာ်အဖီခိၣ် လၢအမူဝဲလီၤထူလီၤယိာ်ဒီး, ၁၀ ပှၤသူၣ်က့သးပှၢ်ခံဆံလွံၢ်ဂၤ တီၤလီၤကဒွံကျိာ်လၢ ပှၤဆ့ၣ်နီၤလၢ အလီၢ်ပစိာ်အဖီခိၣ် တဂၤအမဲာ်ညါ, ဒီးဘူၣ်ထီၣ်ဘါထီၣ်ပှၤလၢ အမူဝဲလီၤထူလီၤယိာ်, ဒီးကွံာ်လီၤအခိၣ်သလုးလၢ လီၢ်ပစိာ်အမဲာ်ညါ, ဒီးစံးဝဲဒၣ်. ၁၁ ယွၤပကစၢ်ဧၢ, နဂ့ၤဒိးန့ၢ်တၢ်လၤကပီၤ, ဒီးတၢ်ယူးတၢ်ယီၣ်, ဒီးတၢ်စိတၢ်ကမီၤလီၤ. အဂ့ၢ်ဒ်အံၤ, နတ့လီၤတၢ်ခဲလၢာ်, ဒီးမ့ၢ်နသးအိၣ်ဒီး, ကဲထီၣ်ဝဲ, ဒီးဘၣ်တၢ်တ့လီၤအီၤလီၤ.