ယံးရမံယၤ
၃၃ ဖဲပှၤဖီၣ်ဃာ် စီၤယံးရမံယၤ ဒီးအအိၣ်ဒံးလၢ ပှၤခိးတၢ်ဖိတဖၣ် အကရၢၢ်ပူၤအခါ+ ယဟိဝၤယွၤ တဲတၢ်ဒီးအီၤ ခံဘျီတဘျီ ဒီးတဲအီၤလၢ ၂ “ယၤ, ယဟိဝၤယွၤ လၢအမ့ၢ် ပှၤတဂၤလၢ အတ့လီၤဟီၣ်ခိၣ် ဒီးဒုးအိၣ်ဂၢၢ်ဆိးကျၢၤအီၤအံၤ ယမံၤမ့ၢ် ယဟိဝၤလီၤ. ယၤ, ယဟိဝၤယွၤအံၤ ယတဲလၢ ၃ ‘ကိးထီၣ်ယၤ ဒီးယကစံးဆၢနၤလီၤ. ယကအိၣ်ကတဲာ်ကတီၤယသးလၢ ယကတဲဘၣ်နၤ တၢ်ဂ့ၢ်လၢအဒိၣ်အမုၢ်လၢ နနၢ်ပၢၢ်အီၤတသ့ဘၣ် ဒီးနတသ့ၣ်ညါအီၤဘၣ် တဖၣ်လီၤ.’”+
၄ “ယၤ, အံၣ်စရ့လးအကစၢ် ယဟိဝၤယွၤ ကတဲဝဲ ဘၣ်ဃးဒီး ဟံၣ်တဖၣ်လၢ ဝ့ၢ်အံၤအပူၤ ဒီးယူဒၤအစီၤပၤတဖၣ်အဟံၣ် လၢပှၤမၤလီၤပှီၢ်အီၤ ဒ်သိး ပှၤကဒီသဒၢလီၤပှၤသးလၢ ဒုၣ်ဒါတဖၣ်လၢ အပာ်ပူၣ်ထီၣ်ဟီၣ်ခိၣ်လၢ ကဒုးတၢ်အဂီၢ် ဒီးဒုၣ်ဒါအနးတဖၣ် အဂီၢ်လီၤ.+ ၅ ဒီးယကတဲဘၣ်ဃးဒီး ပှၤလၢ အကလဲၤဒုးတၢ်ဒီး ပှၤက့ၤစ့းဖိတဖၣ် ဒီးဘၣ်ဃးဒီး ဟံၣ်တဖၣ်အံၤလၢ အကပှဲၤဒီး ပှၤသံစိၣ်တဖၣ်လၢ ယမၤသံတ့ၢ်အီၤလၢ တၢ်သးဒိၣ် ဒီးတၢ်သးထီၣ်အပူၤလီၤ. အဝဲသ့ၣ် အၢသီဒိၣ်မးအဃိ ယပာ်တ့ၢ်ကွံာ် ဝ့ၢ်တဖျၢၣ်အံၤလံ. ၆ ‘ယကမၤဂ့ၤထီၣ်က့ၤ ဝ့ၢ်အံၤအတၢ်အိၣ်သး+ ဒီးယကမၤဘျါက့ၤ ပှၤဂီၢ်မုၢ် ဒီးယကဟ့ၣ်လီၤ အဝဲသ့ၣ်လၢ တၢ်ဃူတၢ်ဖိးဒီး တၢ်ဘံၣ်တၢ်ဘၢ အါအါဂီၢ်ဂီၢ်လီၤ.+ ၇ ယကဟဲက့ၤကိးကဒါက့ၤ ယူဒၤအပှၤဂီၢ်မုၢ် ဒီးအံၣ်စရ့လးအပှၤဂီၢ်မုၢ်လၢ အဘၣ်တၢ်က့ၤဖီၣ်အီၤတဖၣ်+ ဒီးယကဒုးဘီၣ်ထီၣ်ညီထီၣ် အဝဲသ့ၣ် ဒ်လၢညါအသိးလီၤ.+ ၈ ဒီးယကမၤကဆှီထီၣ်က့ၤ အဝဲသ့ၣ်လၢ အတၢ်ဒဲးဘးခဲလၢာ်+ ဒီးယကပျၢ်ကွံာ် အဝဲသ့ၣ် အတၢ်ဒဲးဘး ဒီးတၢ်ကမၣ် လၢအမၤကမၣ်ဘၣ်ယၤ ခဲလၢာ်လီၤ.+ ၉ ဒီးပှၤကလုာ်ခဲလၢာ် လၢဟီၣ်ခိၣ်ချၢန့ၣ် ကနၢ်ဟူဝဲဘၣ်ဃးဒီး တၢ်အဂ့ၤခဲလၢာ်လၢ ယမၤန့ၢ် ယပှၤဂီၢ်မုၢ်အဃိ ဝ့ၢ်တဖျၢၣ်အံၤ ကကဲထီၣ် တၢ်မံၤဟူသၣ်ဖျါ, တၢ်သးခု, တၢ်စံးထီၣ်ပတြၢၤ ဒီးတၢ်လၤကပီၤလၢယဂီၢ် လၢပှၤကလုာ်တဖၣ်န့ၣ် အမဲာ်ညါလီၤ.+ ဒီးအဝဲသ့ၣ် ကပျံၤတၢ် ဒီးကကနိးဝဲ+ ခီဖျိယမၤဂ့ၤတၢ်လၢ ဝ့ၢ်အံၤအဂီၢ် ဒီးဟ့ၣ်လီၤအီၤလၢ တၢ်မုာ်တၢ်ခုၣ် အဃိလီၤ.’”+
၁၀ “ယဟိဝၤယွၤ တဲဝဲလၢ ‘သုကတဲလၢ တၢ်လီၢ်အံၤ အိၣ်သယုၢ်ဝဲအဃိ ပှၤကညီမ့ၢ်ဂ့ၤ, ဆၣ်ဖိကီၢ်ဖိလၢပှၤဘုၣ်အီၤမ့ၢ်ဂ့ၤ တအိၣ်ဘၣ်. ဒီးလၢယူဒၤအဝ့ၢ်တဖၣ် အပူၤမ့ၢ်ဂ့ၤ, လၢဝ့ၢ်ယရူၤၡလ့ၣ် အကျဲတဖၣ်အပူၤမ့ၢ်ဂ့ၤ ပှၤကညီ ဒီးဆၣ်ဖိကီၢ်ဖိလၢပှၤဘုၣ်အီၤ တအိၣ်ဘၣ်. ဘၣ်ဆၣ် ဖဲတၢ်လီၢ်တဖၣ်န့ၣ် သုကနၢ်ဟူဘၣ်ကဒီး ၁၁ တၢ်သးခုအကလုၢ်, တၢ်သူၣ်ဖှံသးညီအကလုၢ်,+ တလးမူးပိာ်ခွါ အကလုၢ် ဒီးတလးမူးပိာ်မုၣ် အကလုၢ် ဒီးသုကနၢ်ဟူဘၣ် ပှၤတဲလၢ “မ့ၢ်လၢ ယဟိဝၤယွၤန့ၣ် မ့ၢ်ပှၤလၢအဂ့ၤ+ ဒီးအတၢ်အဲၣ်လၢအတီ အိၣ်ဂၢၢ်ဆိးကျၢၤ လီၤထူလီၤယိာ်+ အဃိ စံးဘျုးစံးဖှိၣ် တၢ်သုးမုၢ်ဂီၢ်မုၢ် အကစၢ် ယဟိဝၤယွၤတက့ၢ်.”’
“ယဟိဝၤယွၤ တဲဝဲလၢ ‘ယကဟဲက့ၤကိးက့ၤပှၤလၢ အဘၣ်တၢ်က့ၤဖီၣ်အီၤတဖၣ် အဃိအဝဲသ့ၣ် ကဟဲစိာ် တၢ်လုၢ်စံးဘျုးစံးဖှိၣ်က့ၤတဖၣ်လၢ ယၤ, ယဟိဝၤယွၤ အဟံၣ်ပူၤ+ ဒ်လၢညါအသိးလီၤ.’”
၁၂ “တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ ‘လၢတၢ်လီၢ်လၢ အအိၣ်သယုၢ်လၢ ပှၤကညီမ့ၢ်ဂ့ၤ, ဆၣ်ဖိကီၢ်ဖိလၢပှၤဘုၣ်အီၤမ့ၢ်ဂ့ၤ တအိၣ်လၢအပူၤဘၣ် ဒီးလၢအဝ့ၢ်ကိးဖျၢၣ်ဒဲး အကပၤန့ၣ် တၢ်အီၣ်ဆၣ်အလီၢ် ကအိၣ်ထီၣ်ကဒီးလၢ ပှၤကွၢ်သိတဖၣ် ကဒုးအိၣ်ဘှံးအသိတဖၣ် အဂီၢ်လီၤ.’+
၁၃ “ယဟိဝၤယွၤ တဲဝဲလၢ ‘ဝ့ၢ်တဖၣ်လၢ ကစၢၢ်ကလိကျါ, ဝ့ၢ်တဖၣ်လၢ တၢ်လီၢ်လၢအဖုၣ်, ဝ့ၢ်တဖၣ်လၢ ကလံၤထံးတခီ, လၢဘံၣ်ယၤမံၣ် အဟီၣ်ကဝီၤ, လၢတၢ်လီၢ်လၢ အအိၣ်လၢ ဝ့ၢ်ယရူၤၡလ့ၣ် အကပိာ်ကပၤ+ ဒီးလၢယူဒၤ အဝ့ၢ်တဖၣ်အပူၤန့ၣ်+ ပှၤကွၢ်သိတဖၣ် ကဂံၢ်ကဒီးဝဲ အသိတဖၣ်လီၤ.’”
၁၄ “ယဟိဝၤယွၤ တဲဝဲလၢ ‘မုၢ်နံၤတဖၣ်လၢ ယကမၤလၢပှဲၤ တၢ်အၢၣ်လီၤလၢအဂ့ၤ လၢယတဲပာ်စၢၤ ဘၣ်ဃးဒီး အံၣ်စရ့လး အပှၤဂီၢ်မုၢ် ဒီးယူဒၤ အပှၤဂီၢ်မုၢ်န့ၣ် ဘူးထီၣ်လံ.+ ၁၅ ဖဲန့ၣ်အဆၢကတီၢ် ဒီးလၢမုၢ်နံၤတဖၣ်န့ၣ် အတီၢ်ပူၤ ယကဒုးမဲထီၣ် တၢ်အဒ့ဘီၣ်လၢ အတီအလိၤတဒ့*+ လၢအလီၤစၢၤလၢ စီၤဒၤဝံးလီၤ. ဒီးလၢကီၢ်ပူၤန့ၣ် ပှၤတဂၤန့ၣ် ကစံၣ်ညီၣ်တၢ်တီတီလိၤလိၤ ဒီးကမၤတၢ်တီတီလိၤလိၤလီၤ.+ ၁၆ ဖဲန့ၣ်အဆၢကတီၢ် ယူဒၤအပှၤဂီၢ်မုၢ် ကပူၤဖျဲး+ ဒီးဝ့ၢ်ယရူၤၡလ့ၣ် ကအိၣ်ဘၣ် ဘံၣ်ဘံၣ်ဘၢဘၢလီၤ.+ ဒီးဝ့ၢ်န့ၣ် ကဘၣ်တၢ်ကိးအီၤလၢ ယဟိဝၤယွၤ မ့ၢ်ဝဲ ပတၢ်တီတၢ်လိၤ အဂံၢ်ခီၣ်ထံးလီၤ.’”+
၁၇ “ယဟိဝၤယွၤ တဲဝဲလၢ ‘စီၤဒၤဝံး အစၢၤအသွဲၣ်တဂၤ ကဆ့ၣ်နီၤလၢ အံၣ်စရ့လး အလီၢ်ပစိာ်အဖီခိၣ် ထီဘိလီၤ.+ ၁၈ ဒီးလၢပှၤလုၢ်တၢ်ဒိၣ်တဖၣ်* အကျါန့ၣ် ပှၤတဂၤ ကလုၢ်ထီၣ် တၢ်လုၢ်ဒွဲၣ်အူ, တၢ်လုၢ်ဘု ဒီးတၢ်လုၢ်တၢ်ပာ်တဖၣ် လၢယမဲာ်ညါထီဘိလီၤ.’”
၁၉ ဒီးယဟိဝၤယွၤ တဲကဒီးတၢ်ဒီး ဝံယံးရမံယၤလီၤ. ၂၀ “ယဟိဝၤယွၤ တဲဝဲလၢ ‘သုမၤဟးဂီၤ ယတၢ်အၢၣ်လီၤအီလီၤ လၢအဘၣ်ဃးဒီးမုၢ်နံၤ ဒီးယတၢ်အၢၣ်လီၤအီလီၤ လၢအဘၣ်ဃးဒီးမုၢ်နၤ ဒ်သိး မုၢ်နံၤဒီးမုၢ်နၤ သုတဟဲထီၣ် ဘၣ်ဆၢဘၣ်ကတီၢ် တဂ့ၤအဂီၢ် မ့ၢ်သ့မး+ ၂၁ ယတၢ်အၢၣ်လီၤအီလီၤဒီး ယခ့ယပှၤစီၤဒၤဝံးလၢ အဖိခွါကကဲထီၣ် စီၤပၤလၢ အလီၢ်ပစိာ်အဖီခိၣ်+ ဒီးယတၢ်အၢၣ်လီၤအီလီၤဒီး ယခ့ယပှၤတဖၣ်+ လၢအမ့ၢ် ပှၤလုၢ်တၢ်ဒိၣ်တဖၣ်န့ၣ် ကဟးဂီၤဝဲလီၤ.+ ၂၂ ယခ့ယပှၤ စီၤဒၤဝံး အချံအသၣ် ဒီးပှၤလ့ၤဝံဖိတဖၣ်လၢ အမၤန့ၢ်ယတၢ်န့ၣ် ယကမၤအါထီၣ်အီၤဒ် မူခိၣ်အသုးမုၢ်* လၢတၢ်ဂံၢ်အီၤတသ့ဘၣ် ဒီးဒ်မဲးလၢပီၣ်လဲၣ်နံၤ လၢတၢ်ဂံၢ်အီၤ တသ့ဘၣ်အသိးလီၤ.’”
၂၃ ဒီးယဟိဝၤယွၤ တဲကဒီးတၢ်ဒီး ဝံယံးရမံယၤလၢ ၂၄ “ပှၤလၢအထီဒါတၢ်တဖၣ် တဲဝဲလၢ ‘ယဟိဝၤယွၤ ကပာ်တ့ၢ်ကွံာ် ဟံၣ်ဖိဃီဖိခံဒူၣ်လၢ အဃုထၢဝဲလီၤ’ န့ၣ်နတပာ်သူၣ်ပာ်သးဧီၤ. ပှၤလၢအထီဒါတၢ်တဖၣ်အံၤ တရ့ဒီး ယပှၤဂီၢ်မုၢ်လၢ တၢ်ယူးယီၣ်ပာ်ကဲအပူၤဘၣ် ဒီးအဝဲသ့ၣ် တပာ်ယပှၤဂီၢ်မုၢ် ဒ်ပှၤတကလုာ် အသိးလၢၤဘၣ်.
၂၅ “ယဟိဝၤယွၤ တဲဝဲလၢ ‘ယဒုးအိၣ်ထီၣ် ယတၢ်အၢၣ်လီၤအီလီၤလၢ အဘၣ်ဃးဒီး မုၢ်နံၤဒီးမုၢ်နၤ+ ဒီးတၢ်သိၣ်တၢ်သီလၢ အဘၣ်ထွဲဒီး မူခိၣ်ဒီးဟီၣ်ခိၣ်န့ၣ် လီၤတံၢ်လီၤဆဲးလီၤ.+ ၂၆ ဒ်န့ၣ်အသိး ယတပာ်တ့ၢ်ကွံာ် စီၤယၤကိာ် အချံအသၣ် ဒီးယခ့ယပှၤ စီၤဒၤဝံး အချံအသၣ် နီတဘျီဘၣ်. ယကပာ်ဖှိၣ်ထီၣ်ကဒါက့ၤ အဝဲသ့ၣ် အပှၤလၢ အဘၣ်တၢ်က့ၤဖီၣ်အီၤတဖၣ်+ ဒီးယကပာ်ဖျါထီၣ် တၢ်သးကညီၤလၢ အဝဲသ့ၣ် အဖီခိၣ်လီၤ.+ ဒီးလၢ စီၤဒၤဝံး အချံအသၣ်တဖၣ် အကျါန့ၣ် ယဃုထၢထီၣ် ပှၤပၢတၢ်တဖၣ်လၢ အကပၢဝဲ စီၤအၤဘြၤဟၣ်, စီၤအံၤစဲး ဒီးစီၤယၤကိာ် အစၢၤအသွဲၣ်တဖၣ်လီၤ.’”*