လူၤကၣ်

၇ ဖဲယ့ၣ်ၡူး တဲတၢ်လၢ အကဘၣ်တဲ ပှၤဂီၢ်မုၢ်တဖၣ်​ ဝံၤအခါ အလဲၤနုာ်လီၤလၢ ဝ့ၢ်ကပ့းရနီၣ်​ အပူၤလီၤ. ၂ ကုၢ်လၢသုးခိၣ်​ အဲၣ်ဝဲဒိၣ်မးတဂၤ ဆိးက့နးမး ဘူးထီၣ်လၢ အကသံလီၤ.+ ၃ ဖဲသုးခိၣ်တဂၤန့ၣ်​ နၢ်ဟူ ယ့ၣ်ၡူးအဂ့ၢ်အခါ အဝဲဆှၢလီၤဝဲ ပှၤယူဒၤဖိ အပှၤသူၣ်က့သးပှၢ်တနီၤ ဒ်သိးကမၢ ယ့ၣ်ၡူးဟဲမၤဘျါက့ၤ အကုၢ်လီၤ. ၄ အဝဲသ့ၣ်ဟဲလၢ ယ့ၣ်ၡူးအအိၣ်​ ဒီးဃ့ကညးအီၤသပှၢ်တၢၢ် ဒီးတဲဝဲလၢ “သုးခိၣ်တဂၤအံၤ ကြၢးဝဲဒီးနတၢ်မၤစၢၤ, ၅ မ့ၢ်လၢ အဝဲအဲၣ်ပပှၤကလုာ် ဒီးအဝဲတ့ထီၣ်န့ၢ်ပှၤ ဘူၣ်ဘျီၣ်အဃိလီၤ.” ၆ အဃိ ယ့ၣ်ၡူး လဲၤဒီးအဝဲသ့ၣ်လီၤ. ဘၣ်ဆၣ်​ ဖဲအဝဲလဲၤဘူးထီၣ်​ လၢအဟံၣ်အခါ သုးခိၣ်န့ၣ်ဆှၢလီၤဝဲ အသကိးတဖၣ်​ ဒ်သိး ကတဲဘၣ်ယ့ၣ်ၡူးလၢ “ကစၢ်ဧၢ, တဘၣ်ဟဲလၢ ယဟံၣ်တဂ့ၤ. ယတကြၢးတဘၣ်လၢ ယကတူၢ်လိာ်နၤလၢ ယဟံၣ်ပူၤဘၣ်.+ ၇ ဒီးယတူၢ်ဘၣ်လၢ ယတမ့ၢ်ပှၤလၢအကြၢး လဲၤလၢနအိၣ်​ စ့ၢ်ကီးဘၣ်. ထဲနဟ့ၣ်လီၤနကလုၢ်န့ၣ်​ ယပျဲၢ်ကဘျါက့ၤလီၤ. ၈ ယၤစ့ၢ်ကီး ယအိၣ်လၢ ပှၤလၢအဒိၣ်န့ၢ်ယၤတဖၣ်​ အဖီလာ် ဒီးသုးဖိလၢအအိၣ်လၢ ယဖီလာ် အိၣ်ဝဲစ့ၢ်ကီးလီၤ. ယမ့ၢ်တဲ အဝဲတဂၤလၢ ‘လဲၤ’ န့ၣ်​ အလဲၤဝဲလီၤ. ဒီးယမ့ၢ်တဲ အဝဲတဂၤလၢ ‘ဟဲ’ န့ၣ်​ အဟဲဝဲလီၤ. ဒီးယမ့ၢ်တဲ ယကုၢ်လၢ ‘မၤ’ န့ၣ်​ အမၤဝဲလီၤ.” ၉ ဖဲယ့ၣ်ၡူး နၢ်ဟူဝဲဒ်န့ၣ်အခါ အဝဲကမၢကမၣ်​ ဒီးအဝဲ ဃၣ်ဃီၤအသးဆူ ပှၤဂီၢ်မုၢ်လၢ အပိာ်အခံအအိၣ်​ ဒီးတဲဝဲလၢ “ယကတဲဘၣ်သုလၢ, လၢပှၤအံၣ်စရ့လးဖိ အကျါန့ၣ်​ ယတထံၣ်ဘၣ်​ ပှၤလၢ အတၢ်နာ်အိၣ်ထဲအံၤ နီတဂၤဘၣ်.”+ ၁၀ ဒီးဖဲပှၤလၢ ဘၣ်တၢ်ဆှၢလီၤအီၤတဖၣ်​ က့ၤတုၤလၢဟံၣ်အခါ အဝဲသ့ၣ်ထံၣ်ဝဲလၢ ကုၢ်တဂၤန့ၣ်​ အိၣ်ဆူၣ်ထီၣ်က့ၤလံ.+

၁၁ လၢခံ တယံာ်ဘၣ်န့ၣ်​ ယ့ၣ်ၡူးလဲၤလၢ ဝ့ၢ်နၤအံၣ်​ ဒီးအပျဲၢ်အဘီၣ်​ ဒီးပှၤဂီၢ်မုၢ်ဖးဒိၣ်​ လဲၤဒီးအီၤလီၤ. ၁၂ ဖဲအဝဲလဲၤဘူးထီၣ်ဒီး ဝ့ၢ်တြဲၤအခါ အထံၣ်ဝဲ ပှၤဟဲယိး ပှၤသံတဂၤ ဒီးအမ့ၢ် မုၣ်ကမဲအဖိခွါလီၤ. ဒီးမုၣ်ကမဲအံၤ အဖိခွါ အိၣ်ထဲတဂၤလီၤ.+ ဒီးပှၤဂီၢ်မုၢ်လၢ အဟဲလၢဝ့ၢ်ပူၤန့ၣ်​ အိၣ်ဒီးအီၤစ့ၢ်ကီးလီၤ. ၁၃ ဖဲကစၢ် ထံၣ်အီၤအခါ အသးကညီၤဘၣ်အီၤ+ ဒီးတဲအီၤလၢ “ဟီၣ်လၢၤတဂ့ၤ.”+ ၁၄ ဒီးယ့ၣ်ၡူးလဲၤဃီၤ ဒီးဖီၣ်ဝဲပှၤသံအလီၢ်မံ ဒီးပှၤယိးတၢ်ဖိတဖၣ်​ အိၣ်ပတုာ်ဝဲလီၤ. ဒီးအတဲဝဲလၢ “ပိာ်ခွါသးစၢ်ဧၢ, ယတဲဘၣ်နၤ ဂဲၤဆၢထၢၣ်တက့ၢ်.”+ ၁၅ ဒီးပှၤသံတဂၤန့ၣ်​ ဂဲၤထၢၣ်ဆ့ၣ်နီၤ ဒီးတဲတၢ်လီၤ. ယ့ၣ်ၡူးဟ့ၣ်လီၤက့ၤအီၤလၢ အမိၢ်အအိၣ်လီၤ.+ ၁၆ ပှၤခဲလၢာ်ပျံၤတၢ် ဒီးအဝဲသ့ၣ်​ မၤလၤကပီၤ ကစၢ်ယွၤ ဒီးတဲဝဲလၢ “ဝံဖးဒိၣ်တဂၤ ဟဲအိၣ်ထီၣ်လၢပကျါလံ”+ ဒီး “ကစၢ်ယွၤ သ့ၣ်နီၣ်ထီၣ်​ အပှၤဂီၢ်မုၢ်လံ.”+ ၁၇ ဒီးတၢ်လၢ ယ့ၣ်ၡူးမၤဝဲတခါအံၤန့ၣ်​ ဟူထီၣ်လၢ ယူဒၤအဟီၣ်ကဝီၤ ဒီဘ့ၣ်ညါ ဒီးတၢ်လီၢ်လၢ အခိၣ်အဃၢၤ ဝးဝးလီၤ.

၁၈ ဒီးစီၤယိၤဟၣ်​ အပျဲၢ်အဘီၣ်တဖၣ်​ တဲဘၣ်အီၤလၢ တၢ်ဂ့ၢ်တဖၣ်အံၤ ခဲလၢာ်လီၤ.+ ၁၉ အဃိ စီၤယိၤဟၣ်​ ကိးန့ၢ်ဝဲအပျဲၢ်အဘီၣ်ခံဂၤ ဒီးမၢအဝဲသ့ၣ်​ လဲၤလၢကစၢ်အအိၣ်​ ဒ်သိး ကသံကွၢ်အီၤလၢ “မ့ၢ်နကဲပှၤလၢ ပခိးကွၢ်လၢ်အီၤတဂၤန့ၣ်ဧါ.+ မ့တမ့ၢ် ပကဘၣ်ခိးကွၢ်လၢ် ပှၤလၢအဂၤတဂၤဒံးဧါ.” ၂၀ ဖဲအဝဲသ့ၣ်​ ဟဲတုၤလၢ ယ့ၣ်ၡူးအအိၣ်အခါ အဝဲသ့ၣ်တဲဝဲလၢ “ပှၤဘျၢတၢ် စီၤယိၤဟၣ်​ ဆှၢလီၤပှၤလၢနအိၣ်​ ဒ်သိးကသံကွၢ်နၤလၢ ‘မ့ၢ်နကဲပှၤလၢ ပခိးကွၢ်လၢ်အီၤ တဂၤန့ၣ်ဧါ. မ့တမ့ၢ် ပကဘၣ်ခိးကွၢ်လၢ် ပှၤလၢ အဂၤတဂၤဒံးဧါ.’” ၂၁ ဖဲနၣ်ရံၣ်ဝဲန့ၣ်​ ယ့ၣ်ၡူးမၤဘျါ ပှၤဆူးပှၤဆါတဖၣ်,+ တၢ်ဆါလၢအနး, နီဟးထီၣ်ကွံာ် တၢ်ဝံတၢ်နါ ဒီးပှၤလၢ အမဲာ်တထံၣ်တၢ်အါဂၤ ထံၣ်ထီၣ်က့ၤတၢ်လီၤ. ၂၂ ဒီးယ့ၣ်ၡူး တဲဆၢအဝဲသ့ၣ်လၢ “က့ၤတဲဘၣ်​ စီၤယိၤဟၣ်လၢ တၢ်လၢသုထံၣ်ဘၣ်​ ဒီးနၢ်ဟူဘၣ်တဖၣ်တက့ၢ်. ပှၤလၢ အမဲာ်တထံၣ်တၢ်တဖၣ်န့ၣ်​ ထံၣ်ထီၣ်က့ၤတၢ်လံ,+ ပှၤလၢ အခီၣ်ဟးဂီၤတဖၣ်န့ၣ်​ ဟးသ့ထီၣ်က့ၤလံ, ပှၤလၢ အဘၣ်တၢ်ဆါအၢတဖၣ်န့ၣ်​ ကဆှီထီၣ်က့ၤလံ, ပှၤလၢ အတနၢ်ဟူတၢ်တဖၣ်န့ၣ်​ နၢ်ဟူထီၣ်က့ၤတၢ်လံ,+ ပှၤလၢ အသံတဖၣ်န့ၣ်​ ဘၣ်တၢ်မၤ သမူထီၣ်က့ၤအီၤလံ ဒီးပှၤလၢ အဖှီၣ်အယာ်တဖၣ်န့ၣ်​ ဘၣ်တၢ်စံၣ်တဲၤတဲလီၤ အဝဲသ့ၣ်လၢ တၢ်သးခုကစီၣ်လံ.+ ၂၃ ပှၤလၢအတလီၤဃံၢ်လၢ ယဃိဘၣ်န့ၣ်​ ကသးခုဝဲလီၤ.”+

၂၄ ဖဲစီၤယိၤဟၣ်​ အပျဲၢ်အဘီၣ်တဖၣ်​ က့ၤဝံၤအလီၢ်ခံ ယ့ၣ်ၡူးတဲဘၣ်​ ပှၤဂီၢ်မုၢ်လၢ စီၤယိၤဟၣ်အဂ့ၢ် ဒ်အံၤလီၤ. “သုလဲၤလၢ ပှၢ်မုၢ်ကနၢ ဒ်သိး သုကလဲၤကွၢ် တၢ်မနုၤလဲၣ်. သုလဲၤ ဒ်သိး သုကထံၣ်​ ပှၤတဂၤလၢ အလီၤဂာ် ဒ်သိးဒီး တပိၢ်တဘိလၢ အဟူးဝးဝဲလၢ ကလံၤကျါန့ၣ်ဧါ.+ ၂၅ မ့တမ့ၢ်ဘၣ်န့ၣ်​ မ့ၢ်သုလဲၤကွၢ် တၢ်မနုၤလဲၣ်. မ့ၢ်သုလဲၤဒ်သိး သုကထံၣ်​ ပှၤတဂၤလၢ အသိးဝဲဆ့ကၤ ကပုာ်လုး* န့ၣ်ဧါ.+ ပှၤလၢ အသိးဝဲဆ့ကၤ ဃံဃံလၤလၤ ဒီးအိၣ်ဘၣ်​ ဘီၣ်ဘီၣ်ညီညီန့ၣ်​ အိၣ်ဝဲလၢ စီၤပၤအဟံၣ်ပူၤလီၤ. ၂၆ မ့မ့ၢ်ဒ်န့ၣ်န့ၣ်​ မ့ၢ်သုလဲၤကွၢ် တၢ်မနုၤလဲၣ်, ဝံတဂၤဧါ. မ့ၢ်, ယကတဲဘၣ်သုလၢ အဝဲဒိၣ်န့ၢ်ဒံး ဝံတဂၤလီၤ.+ ၂၇ ဘၣ်ဃးဒီး ပှၤတဂၤအံၤအဂ့ၢ်န့ၣ်​ တၢ်ကွဲးအသး အိၣ်ဝဲလၢ ‘ကွၢ်မီၤ, ယကမၢလီၤ ယပှၤစိာ်တၢ်ကစီၣ်ဖိတဂၤ လၢနမဲာ်ညါ ဒ်သိးအဝဲ ကကတဲာ်ကတီၤဆိန့ၢ် ကျဲလၢနမဲာ်ညါလီၤ.’+ ၂၈ ယကတဲဘၣ်သု, လၢပှၤဟီၣ်ခိၣ်ဖိခဲလၢာ် အကျါန့ၣ်* ပှၤလၢအဒိၣ်န့ၢ် စီၤယိၤဟၣ်​ တအိၣ်နီတဂၤဘၣ်. ဘၣ်ဆၣ်​ ပှၤအဆံးတဂၤလၢ ကစၢ်ယွၤ အဘီမုၢ်အပူၤန့ၣ်​ ဒိၣ်န့ၢ်ဒံးအီၤလီၤ.”+ ၂၉ (ပှၤထၢတၢ်ခိတၢ်သွဲဖိ ဒီးပှၤခဲလၢာ်န့ၣ်​ ဒိးဘျၢတ့ၢ်အသးလၢ ပှၤဘျၢတၢ် စီၤယိၤဟၣ်+ အတၢ်ဒိးဘျၢဝံၤလံအဃိ ဖဲအဝဲသ့ၣ်​ နၢ်ဟူဝဲဒ်န့ၣ်အခါ အဝဲသ့ၣ်တဲဖျါထီၣ်​ ဝဲလၢ ကစၢ်ယွၤမ့ၢ် ပှၤတီပှၤလိၤလီၤ. ၃၀ ဘၣ်ဆၣ်​ ပှၤဖၤရံၤၡဲ ဒီးပှၤလၢ အသ့စီၤမိၤၡ့ အတၢ်သိၣ်တၢ်သီန့ၣ်​ အဝဲသ့ၣ်​ တတူၢ်လိာ်ဝဲ ကစၢ်ယွၤ အတၢ်ဟံးစုနဲၣ်ကျဲဘၣ်အဃိ+ အဝဲသ့ၣ်တဒိးဘျၢအသးလၢ စီၤယိၤဟၣ်​ အအိၣ်ဘၣ်.)

၃၁ “အဃိ ယကြၢးထိၣ်သတြီၤ ပှၤတစိၤအံၤဒီး မတၤတဖၣ်လဲၣ်​ ဒီးအဝဲသ့ၣ်​ လီၤဂာ်ဒီး မတၤလဲၣ်.+ ၃၂ အဝဲသ့ၣ်န့ၣ်​ လီၤဂာ်ဒ်သိးဒီး ဖိသၣ်တဖၣ်လၢ အဆ့ၣ်နီၤလၢ တၢ်ဆါတၢ်ပှ့ၤအလီၢ် ဒီးတဲလိာ်အသး တဂၤဒီးတဂၤလၢ ‘ပအူပံလၢသုဂီၢ် ဘၣ်ဆၣ်​ သုတဂဲၤကလံၣ်ဘၣ်. ပဟီၣ်ကိးပသူ ဘၣ်ဆၣ်​ သုတဟီၣ်ဘၣ်.’ ၃၃ ဒ်န့ၣ်အသိး ပှၤဘျၢတၢ် စီၤယိၤဟၣ်န့ၣ်​ ဒုၣ်တၢ်အီၣ်​ ဒီးတအီစပံးထံဘၣ်.+ ဘၣ်ဆၣ်​ သုတဲလၢ ‘တၢ်ဝံတၢ်နါ အိၣ်လၢအလိၤလီၤ.’ ၃၄ မ့မ့ၢ်ပှၤကညီဖိခွါန့ၣ်​ အီၣ်တၢ်အီတၢ် ဘၣ်ဆၣ်​ သုတဲလၢ ‘ကွၢ်မီၤ, အဝဲမ့ၢ်ပှၤလၢ အအီၣ်တၢ်အါတလၢ ဒီးအီစပံးထံအါတလၢ ဒီးအဒီသကိးဒီး ပှၤထၢတၢ်ခိတၢ်သွဲဖိ ဒီးပှၤတၢ်ဒဲးဘးဖိတဖၣ်လီၤ.’+ ၃၅ ဘၣ်ဆၣ်​ ပှၤတဂၤမ့ၢ်အိၣ်ဒီး တၢ်ကူၣ်သ့န့ၣ်​ အအိၣ်ဖျါထီၣ်* ခီဖျိလၢ တၢ်လၢအမၤဝဲတဖၣ်အဃိလီၤ.”+

၃၆ ပှၤဖၤရံၤၡဲတဂၤ ကွဲမုာ်ယ့ၣ်ၡူးဒ်သိး ကဟဲအီၣ်တၢ် ဒီးအီၤအဂီၢ်လီၤ. အဃိ ယ့ၣ်ၡူး လဲၤနုာ်လီၤလၢ ပှၤဖၤရံၤၡဲအဟံၣ်ပူၤ ဒီးလဲၤဆ့ၣ်နီၤလၢ စီၢ်နီၤခိၣ်အကပၤလီၤ. ၃၇ ဒီးပိာ်မုၣ်လၢ အအိၣ်လၢ ဝ့ၢ်ပူၤတဂၤလၢ ပှၤသ့ၣ်ညါအီၤလၢ အမ့ၢ်ပှၤတၢ်ဒဲးဘးဖိန့ၣ်​ နၢ်ဟူဝဲလၢ ယ့ၣ်ၡူးဟဲအီၣ်တၢ်လၢ ပှၤဖၤရံၤၡဲ အဟံၣ်လီၤ. အဃိ အဝဲဟဲစိာ်ဝဲ သိနၢမူလၢ ပလီလၢၢ်ဝါတဖျၢၣ်+ အပူၤလီၤ. ၃၈ အဝဲဟဲချံးလီၤအခီၣ်လၢ ယ့ၣ်ၡူးအခီၣ်ထံး, ဟီၣ်ဝဲ ဒီးဒုးလီၤအမဲာ်ထံလၢ ယ့ၣ်ၡူးအခီၣ်လိၤလီၤ. ဒီးအထွါကွံာ်ဝဲ ယ့ၣ်ၡူးအခီၣ်လၢအခိၣ်ဆူၣ်​ တကးဒံးဘၣ်​ နၢမူဝဲအခီၣ်​ ကဖီလီဖိ ဒီးလူလီၤဝဲ သိနၢမူလၢ အခီၣ်လိၤလီၤ. ၃၉ ဖဲပှၤဖၤရံၤၡဲတဂၤလၢ အကွဲမုာ်ယ့ၣ်ၡူးန့ၣ်​ ထံၣ်ဝဲ တၢ်မၤအသးအံၤအခါ အဝဲဆိကမိၣ်ထီၣ်ဝဲလၢ “ပှၤအံၤ မ့မ့ၢ်ဝံနီၢ်ကီၢ်တဂၤန့ၣ်​ ပိာ်မုၣ်လၢ အထိးအီၤတဂၤအံၤ မ့ၢ်မတဂၤလဲၣ်​ ဒီးအမ့ၢ်ပှၤဒ်လဲၣ်တဂၤလဲၣ်န့ၣ်​ အဝဲ ကသ့ၣ်ညါဝဲလီၤ. ဒီးပိာ်မုၣ်တဂၤအံၤ မ့ၢ်ပှၤတၢ်ဒဲးဘးဖိန့ၣ်+ အဝဲကသ့ၣ်ညါဝဲလီၤ.” ၄၀ ဘၣ်ဆၣ်​ ယ့ၣ်ၡူးတဲဆၢက့ၤအီၤလၢ “စီၤၡံမိၣ်ဧၢ,* ယကဘၣ်တဲနၤ တၢ်တမံၤနီၤ.” ဒီးအဝဲတဲဝဲ “သရၣ်ဧၢ, တဲသၢၤ.”

၄၁ “ပှၤခံဂၤ အကမၢ်ထီၣ်ဒီး ပှၤလၢ အဟ့ၣ်လိၢ်တၢ်တဂၤလီၤ. တဂၤန့ၣ်​ အကမၢ်အိၣ်ဝဲ ဒန့ၤရံၤ* ၅၀၀ မ့မ့ၢ် လၢအဝဲတဂၤန့ၣ်​ ၅၀ လီၤ. ၄၂ ဖဲအဝဲသ့ၣ်​ ကလိးက့ၤအီၤအဂီၢ် အတၢ်တအိၣ်​ နီတမံၤလၢၤဘၣ်အခါ ပှၤဟ့ၣ်လိၢ်တၢ်တဂၤ မၤလီၤတူာ်ကွံာ် အဝဲသ့ၣ်အကမၢ် လၢတၢ်သူၣ်အိၣ်သးအိၣ်​ အပူၤလီၤ. အဃိ ပှၤခံဂၤအံၤ ကအဲၣ်အီၤဒိၣ်​ ဖဲလဲၣ်တဂၤလဲၣ်.” ၄၃ စီၤၡံမိၣ်​ တဲဆၢက့ၤအီၤလၢ “ယဆိကမိၣ်​ ကမ့ၢ်ပှၤလၢအကမၢ် ဘၣ်တၢ်မၤလီၤတူာ်ကွံာ်အီၤ အါတဂၤန့ၣ်ဧါသၢၤ.” ယ့ၣ်ၡူးတဲအီၤလၢ “နတဲဆၢတၢ်န့ၣ်​ ဘၣ်ဝဲလီၤ.” ၄၄ ဒီးယ့ၣ်ၡူး ဃၣ်အသးလၢ ပိာ်မုၣ်တဂၤန့ၣ်အအိၣ်​ ဒီးတဲဘၣ်​ စီၤၡံမိၣ်လၢ “နထံၣ်​ ပိာ်မုၣ်တဂၤအံၤဧါ. ယဟဲနုာ်လီၤလၢ နဟံၣ်ပူၤ ဒီးနတဟ့ၣ်ယၤ ထံသ့ခီၣ်ဘၣ်. ဘၣ်ဆၣ်​ ပိာ်မုၣ်တဂၤအံၤ ဒုးလီၤအမဲာ်ထံလၢ ယခီၣ်လိၤ ဒီးထွါကွံာ်ဝဲလၢ အခိၣ်ဆူၣ်လီၤ. ၄၅ နတနၢမူယၤဘၣ်​ ဘၣ်ဆၣ်​ စးထီၣ်လၢ ယဟဲနုာ်လီၤန့ၣ်​ ပိာ်မုၣ်အံၤ နၢမူဝဲယခီၣ်ကဖီလီဖိ တုၤခဲအံၤလီၤ. ၄၆ နတလူလီၤသိလၢ ယခိၣ်လိၤဘၣ်​ ဘၣ်ဆၣ်​ ပိာ်မုၣ်တဂၤအံၤ လူလီၤသိနၢမူလၢယခီၣ်လိၤလီၤ. ၄၇ အဃိ ယကတဲဘၣ်နၤ, မ့ၢ်လၢ ပိာ်မုၣ်တဂၤအံၤ ပာ်ဖျါထီၣ်​ တၢ်အဲၣ်အါအဃိ အတၢ်ဒဲးဘး မ့ၢ်အိၣ်ဝဲအါမး* ဘၣ်ဆၣ်​ အတၢ်ဒဲးဘး ဘၣ်တၢ်ပျၢ်ကွံာ်အီၤလံ.+ မ့မ့ၢ် ပှၤလၢအတၢ်ကမၣ်​ ဘၣ်တၢ်ပျၢ်ကွံာ်အီၤ ထဲတစဲးဖိန့ၣ်​ အဝဲသ့ၣ်ပာ်ဖျါထီၣ်​ တၢ်အဲၣ်ထဲတစဲးဖိလီၤ.” ၄၈ ဝံၤဒီး ယ့ၣ်ၡူးတဲဘၣ်​ ပိာ်မုၣ်တဂၤအံၤလၢ “နတၢ်ဒဲးဘးပျၢ်လံ.”+ ၄၉ ဒီးပှၤလၢအဆ့ၣ်နီၤ ဃုာ်ဒီးအီၤလၢ စီၢ်နီၤခိၣ်အကပၤန့ၣ်​ တဲလိာ်အသး တဂၤဒီးတဂၤလၢ “ပှၤဂၤအတၢ်ဒဲးဘးဒၣ်လဲာ် အဝဲပျၢ်ကွံာ်ဝဲသ့အဃိ အမ့ၢ် မတဂၤလဲၣ်.”+ ၅၀ ဘၣ်ဆၣ်​ ယ့ၣ်ၡူးတဲဘၣ်​ ပိာ်မုၣ်တဂၤန့ၣ်လၢ “နတၢ်နာ် မၤပူၤဖျဲးနၤလံ.+ အဃိ က့ၤမုာ်မုာ်တက့ၢ်.”