၁ ကရံၣ်သူး

၂ အဃိ ဒီပုၢ်ဝဲၢ်သ့ၣ်ဧၢ, ဖဲယလဲၤလၢသုအိၣ် ဒီးစံၣ်တဲၤတဲလီၤသုလၢ ကစၢ်ယွၤ အတၢ်ခူသူၣ် စီဆှံအဂ့ၢ်အခါ+ ယတသူတၢ်ကတိၤလၢ အပတီၢ်ထီ+ ဒီးယတသူ တၢ်ကူၣ်သ့ဘၣ်. ၂ ဖဲယအိၣ်လၢ သုကျါအခါ ယပာ်ယသးလၢ ယတသ့ၣ်ညါ တၢ်ဂ့ၢ်အဂုၤအဂၤ နီတမံၤဘၣ်, ယပာ်ယသးလၢ ယသ့ၣ်ညါထဲဒၣ် ယ့ၣ်ၡူးခရံာ်အဂ့ၢ် ဒီးလၢအဝဲ ဘၣ်တၢ်မၤသံအီၤလၢ သ့ၣ်တၢၣ်အလိၤအဂ့ၢ်လီၤ.+ ၃ ယလဲၤလၢသုအိၣ် ပှဲၤဒီးတၢ်ဂံၢ်စၢ်ဘါစၢ်, တၢ်ပျံၤတၢ်ဖုး ဒီးတၢ်ကနိးကစုာ် ဒိၣ်ဒိၣ်မုၢ်မုၢ်လီၤ. ၄ ဖဲယတဲတၢ် ဒီးယစံၣ်တဲၤတဲလီၤတၢ်အခါ ယတသူတၢ်ကတိၤတဖၣ် လၢအလီၤထုးန့ၢ်သူၣ် ထုးန့ၢ်သး ဒ်ပှၤကူၣ်တၢ်သ့တဂၤ သူဝဲအသိးဘၣ်. ဘၣ်ဆၣ် ယတၢ်ကတိၤန့ၣ် ပာ်ဖျါထီၣ် သးစီဆှံအတၢ်စိတၢ်ကမီၤ+ ၅ ဒ်သိးသုတၢ်နာ် သုတဒိးသန့ၤထီၣ်အသး လၢပှၤဟီၣ်ခိၣ်ဖိ အတၢ်ကူၣ်သ့ အဖီခိၣ်တဂ့ၤ ဒီးကဒိးသန့ၤထီၣ် အသးလၢ ကစၢ်ယွၤအစိအကမီၤ အဖီခိၣ်အဂီၢ်လီၤ.

၆ ဒီးပတဲတၢ် ဘၣ်ဃးဒီးတၢ်ကူၣ်သ့လၢ ပှၤလၢ အဒိၣ်တုာ်ခိၣ်ပှဲၤတဖၣ်အကျါ+ ဘၣ်ဆၣ် အတမ့ၢ်တၢ်ကူၣ်သ့လၢ အဘၣ်ဃးဒီး ပှၤတစိၤအံၤဘၣ်. ဒီးတမ့ၢ်စ့ၢ်ကီး ဟီၣ်ခိၣ်တဘ့ၣ်အံၤ အခိၣ်အနၢ်တဖၣ်လၢ အကလီၤမၢ်ကွံာ်ဝဲန့ၣ် အတၢ်ကူၣ်သ့ဘၣ်.+ ၇ ဘၣ်ဆၣ် ပတဲဘၣ်ဃးဒီး တၢ်ခူသူၣ်စီဆှံတခါ+ လၢအမ့ၢ် ကစၢ်ယွၤ အတၢ်ကူၣ်သ့လၢ အအိၣ်ခူသူၣ်အသး လၢကစၢ်ယွၤ တိာ်ပာ်တ့ၢ်ဝဲ တချုးလၢ ဟီၣ်ခိၣ် အတၢ်ရဲၣ်တၢ်ကျဲၤ လၢအအၢအသီအံၤ ဟဲကဲထီၣ်အသးဒံးဘၣ် အခါလီၤ. ကစၢ်ယွၤ မၤဝဲဒ်န့ၣ်န့ၣ် မ့ၢ်ဒ်သိး ပကဒိးန့ၢ်ဘၣ် တၢ်လၤတၢ်ကပီၤအဂီၢ်လီၤ. ၈ ဟီၣ်ခိၣ်အခိၣ်အနၢ်တဖၣ် တသ့ၣ်ညါ တၢ်ကူၣ်သ့အံၤ နီတဂၤဘၣ်.+ အဝဲသ့ၣ် မ့ၢ်သ့ၣ်ညါဝဲန့ၣ် တမ့ၢ်လၢ အကမၤသံ ကစၢ်လၢအပှဲၤဒီး အလၤကပီၤတဂၤ လၢသ့ၣ်တၢၣ်အလိၤဘၣ်. ၉ ဘၣ်ဆၣ် ဒ်တၢ်ကွဲးအသး အိၣ်ဝဲအသိး, “တၢ်လၢကစၢ်ယွၤ ကတဲာ်ကတီၤပာ်စၢၤဝဲလၢ ပှၤလၢအအဲၣ်အီၤသ့ၣ်တဖၣ် အဂီၢ်န့ၣ် ပှၤတထံၣ်ဘၣ်, ပှၤတနၢ်ဟူဘၣ် ဒီးပှၤတဆိကမိၣ်ထီၣ်လၢ ပှၤသးပူၤနီတဂၤဘၣ်.”+ ၁၀ ကစၢ်ယွၤပာ်ဖျါထီၣ်န့ၢ်ပှၤ တၢ်ဂ့ၢ်တဖၣ်အံၤ+ ခီဖျိလၢသးစီဆှံလီၤ.+ သးစီဆှံန့ၣ် ပာ်ဖျါထီၣ်တၢ်ခဲလၢာ် ပၣ်ဃုာ်ဒီးတၢ်ဂ့ၢ်အဒိၣ်အယိာ် လၢအဘၣ်ဃးဒီး ကစၢ်ယွၤအဂ့ၢ် စ့ၢ်ကီးလီၤ.+

၁၁ တၢ်အိၣ်လၢ ပှၤတဂၤအသးပူၤန့ၣ် ပှၤတသ့ၣ်ညါဝဲ နီတဂၤဘၣ်, သ့ၣ်ညါထဲဒၣ် အနီၢ်ကစၢ်လီၤ. ဒ်န့ၣ်အသိး တၢ်အိၣ်လၢ ကစၢ်ယွၤအသးပူၤန့ၣ် ပှၤတသ့ၣ်ညါဝဲ နီတဂၤဘၣ်. ထဲဒၣ်ကစၢ်ယွၤ အသးစီဆှံန့ၣ် သ့ၣ်ညါဝဲလီၤ. ၁၂ ပတဒိးန့ၢ်ဘၣ် ဟီၣ်ခိၣ်အသးဘၣ်. ပဒိးန့ၢ်ဘၣ်သး* လၢအဟဲလၢ ကစၢ်ယွၤအအိၣ်+ ဒ်သိးပကသ့ၣ်ညါဘၣ် တၢ်လၢကစၢ်ယွၤ ဟ့ၣ်လီၤပှၤလၢ တၢ်အဲၣ်တၢ်ကွံ အပူၤလီၤ. ၁၃ ပတဲဖျါထီၣ် တၢ်ဂ့ၢ်တဖၣ်အံၤန့ၣ် တမ့ၢ်လၢ တၢ်ကတိၤတဖၣ်လၢ ပမၤလိဘၣ်အီၤခီဖျိ ပှၤဟီၣ်ခိၣ်ဖိ အတၢ်ကူၣ်သ့ဘၣ်,+ မ့ၢ်ဝဲ တၢ်ကတိၤတဖၣ်လၢ သးစီဆှံသိၣ်လိပှၤလီၤ.+ အဃိ ပသူတၢ်ကတိၤတဖၣ်လၢ အဟဲခီဖျိလၢ သးစီဆှံ ဒ်သိးကတဲဖျါထီၣ် တၢ်ဂ့ၢ်လၢ အဘၣ်ဃးဒီး နီၢ်သးတခီလီၤ.

၁၄ ဘၣ်ဆၣ် ပှၤတဂၤလၢ အအိၣ်မူဒ်အနီၢ်ကစၢ် အတၢ်သူၣ်လီသးကွံအသိးန့ၣ်* တတူၢ်လိာ်တၢ်လၢ အဘၣ်ဃးဒီး ကစၢ်ယွၤ အသးစီဆှံဘၣ်. တၢ်ဂ့ၢ်တဖၣ်န့ၣ် အဝဲထံၣ်ဝဲဒ် တၢ်ကလီကလီအသိး ဒီးအဝဲနၢ်ပၢၢ်ဝဲ တသ့ဘၣ်, မ့ၢ်လၢ တၢ်ဂ့ၢ်တဖၣ်န့ၣ် ပှၤသမံသမိးအီၤ သ့ထဲလၢ သးစီဆှံ အတၢ်မၤစၢၤအဃိလီၤ. ၁၅ မ့မ့ၢ်ပှၤလၢ သးစီဆှံ ဟံးစုနဲၣ်ကျဲအီၤတဂၤန့ၣ် သမံသမိးဝဲတၢ်ခဲလၢာ်+ ဘၣ်ဆၣ် အနီၢ်ကစၢ်န့ၣ် ပှၤတသမံသမိးအီၤ နီတဂၤဘၣ်. ၁၆ ဒ်တၢ်ကွဲးအသး အိၣ်ဝဲအသိး “မ့ၢ်မတဂၤသ့ၣ်ညါ ယဟိဝၤယွၤ* အသး ဒ်သိးကသိၣ်လိအီၤ အဂီၢ်လဲၣ်.”+ ဘၣ်ဆၣ် ပအိၣ်ဒီး ခရံာ်အသးလီၤ.+