၁ ကရံၣ်သူး
၅ ပှၤဒုးသ့ၣ်ညါယၤလၢ ပှၤအိၣ်ဝဲလၢ သုကျါတဂၤ မၤကမၣ်မုၣ်ကမၣ်ခွါလီၤ.*+ အဝဲအိၣ်ဃုာ်ဒီး အပၢ်အမါ ဒီးတၢ်မၤကမၣ်မုၣ်ကမၣ်ခွါ ဒ်အံၤတကလုာ်န့ၣ် လၢပှၤကလုာ်တဖၣ် အကျါဒၣ်လဲာ် တအိၣ်ဘၣ်.+ ၂ မ့ၢ်သုပာ်ကဖၢလၢသုသးလၢ တၢ်ဂ့ၢ်အံၤအဃိဧါ. သုတကြၢး သးအုးဧီၤ.+ ပှၤလၢအမၤတၢ် ဒ်အံၤတဂၤန့ၣ် မ့ၢ်သုတကြၢး နီဟးထီၣ်ကွံာ်အီၤလၢ သုကျါဘၣ်ဧါ.+ ၃ ယတအိၣ်ဒီးသုလၢ နီၢ်ခိတခီဘၣ်. ဘၣ်ဆၣ် ယအိၣ်ဒီးသုလၢ သးတခီလီၤ. ဒီးယစံၣ်ညီၣ်ပှၤလၢ အမၤတၢ်ဒ်အံၤတဂၤလံ အဃိ လီၤဂာ်ဒ်သိးဒီးယအိၣ်ဒီးသု အနီၢ်ကီၢ်လီၤ. ၄ ဖဲသုအိၣ်ဖှိၣ် တပူၤဃီလၢ ပကစၢ်ယ့ၣ်ၡူး အမံၤအခါ သ့ၣ်ညါလၢ ယအိၣ်ဒီးသု လၢသးတခီဃုာ်ဒီး ပကစၢ်ယ့ၣ်ၡူး အစိကမီၤတက့ၢ်. ၅ သုကဘၣ်ဟ့ၣ်လီၤကွံာ် ပှၤဒ်အံၤတဂၤ လၢမုၣ်ကီၤလံၢ်* အစုပူၤ+ ဒ်သိးသးလၢ အအဲၣ်ဒိးမၤ တၢ်ဒဲးဘးန့ၣ် ကဘၣ်တၢ်မၤဟးဂီၤကွံာ်အီၤ အဂီၢ်လီၤ. မ့မ့ၢ်ဒ်န့ၣ်န့ၣ် တၢ်အိၣ်ဖှိၣ်အနီၢ်သး ကဘၣ်တၢ်ဒီသဒၢအီၤ ဖဲကစၢ်အမုၢ်နံၤ အတီၢ်ပူၤလီၤ.+
၆ သုပာ်ကဖၢလၢသုသး ဒ်န့ၣ်န့ၣ်တဂ့ၤဘၣ်. ကိၣ်မံၣ်ထဲတစဲးဖိ မၤပွးထီၣ် ကိၣ်ဒီတလိၣ်ညါန့ၣ် သုတသ့ၣ်ညါဧီၤ.+ ၇ ဒ်သိးသုကကဲထီၣ် ကိၣ်အသီတလိၣ်အဂီၢ် သုကဘၣ်ထုးထီၣ်ကွံာ် ကိၣ်မံၣ်လီၢ်လံၤလီၤ. မ့ၢ်လၢ ခရံာ်လၢအမ့ၢ် ပဘူၣ်လဲၤကပာ် အသိဖိအံၤ+ ဟ့ၣ်လုၢ်ထီၣ်အသးဝံၤလံ+ အဃိ သုလီၤဂာ်ဒ် ကိၣ်တလိၣ်လၢ အတပၣ်ဒီး ကိၣ်မံၣ်ဘၣ်. ၈ အဃိ ဘူၣ်လဲၤကပာ်လၢ+ ကဟဲန့ၣ် မ်ပသုတမၤအီၤဒီး ကိၣ်မံၣ်လီၢ်လံၤ မ့တမ့ၢ် ကိၣ်မံၣ်လၢ အအဲၣ်ဒိးတဲဝဲ တၢ်အၢတၢ်သီ ဒီးတၢ်ဒဲးဘးတဂ့ၤ. မ်ပမၤအီၤဒီး ကိၣ်လၢအတပၣ်ဒီး ကိၣ်မံၣ်ဘၣ်လၢ အအဲၣ်ဒိးတဲဝဲ တၢ်သူၣ်ဘျၢသးဘျၢ ဒီးတၢ်တီတၢ်လိၤန့ၣ်တက့ၢ်.
၉ လၢယလံာ်ပရၢအပူၤန့ၣ် ယကွဲးန့ၢ်သုလၢ သုတဘၣ်ရ့လိာ်သးဒီး ပှၤလၢ အမၤကမၣ်မုၣ်ကမၣ်ခွါ လၢၤတဂ့ၤ. ၁၀ ဘၣ်ဆၣ် ယတအဲၣ်ဒိးတဲလၢ သုရ့ဒီးပှၤလၢ အမၤကမၣ်မုၣ်ကမၣ်ခွါ လၢအအိၣ်လၢ ဟီၣ်ခိၣ်ချၢ,+ ပှၤလၢအသးကွံတၢ်, ပှၤလၢအဟံးန့ၢ်ဆူၣ် ပှၤဂၤအတၢ် ဒီးပှၤလၢ အဘါတၢ်ဂီၤတၢ်ဖှီၣ်တဖၣ် လ့ၤတက့ၤ တသ့ဘၣ်န့ၣ် တမ့ၢ်ဘၣ်. သုမ့ၢ်ဘၣ်မၤဒ်န့ၣ်န့ၣ် သုကဘၣ်ဟးထီၣ်ကွံာ်လၢ ဟီၣ်ခိၣ်ချၢလီၤ.+ ၁၁ အဃိ ခဲအံၤန့ၣ် ယကွဲးန့ၢ်သုလၢ ပှၤလၢ အဘၣ်တၢ်ကိးအီၤလၢ ဒီပုၢ်ဝဲၢ်တဂၤဂၤ မ့မ့ၢ် ပှၤလၢ အမၤကမၣ်မုၣ်ကမၣ်ခွါမ့ၢ်ဂ့ၤ, ပှၤလၢ အသးကွံတၢ်မ့ၢ်ဂ့ၤ,+ ပှၤလၢ အဘါတၢ်ဂီၤတၢ်ဖှီၣ်မ့ၢ်ဂ့ၤ, ပှၤလၢ အဒုၣ်ဒွဲၣ်စံးအၢ ပှၤဂၤမ့ၢ်ဂ့ၤ, ပှၤလၢ အအီမူၤသံးမ့ၢ်ဂ့ၤ,*+ ပှၤလၢ အဟံးန့ၢ်ဆူၣ် ပှၤဂၤအတၢ်မ့ၢ်ဂ့ၤ+ သုတဘၣ်ရ့လိာ်သုသးဒီး အီၤတဂ့ၤ.+ အီၣ်သကိးတၢ်ဒီး ပှၤဒ်န့ၣ်တဂၤဒၣ်လဲာ်တဂ့ၤ. ၁၂ တၢ်စံၣ်ညီၣ် ပှၤတၢ်ချၢတဖၣ်န့ၣ် မ့ၢ်အဘၣ်ဃးဒီးယၤဒ်လဲၣ်. သုကဘၣ်စံၣ်ညီၣ် ပှၤလၢအအိၣ်လၢ တၢ်ကိပူၤလီၤ. ၁၃ မ့မ့ၢ် ကစၢ်ယွၤန့ၣ်ကစံၣ်ညီၣ် ပှၤလၢတၢ်ချၢတဖၣ် တမ့ၢ်ဘၣ်ဧါ.+ “ထုးထီၣ်ကွံာ် ပှၤအၢပှၤသီတဂၤအံၤ လၢသုကျါတက့ၢ်.”+