၂ ၡမူၤအ့လး
၆ စီၤဒၤဝံး ကိးဖှိၣ်ကဒီး သုးဖိလၢအဂ့ၤကတၢၢ် လၢအံၣ်စရ့လးအပူၤန့ၣ် အိၣ်ဝဲ အဂၤ ၃၀,၀၀၀ လီၤ. ၂ ဒီးစီၤဒၤဝံး ဒီးပှၤလၢအအိၣ်ဒီးအီၤ ကိးဂၤဒဲး လဲၤလၢ ဝ့ၢ်ဘၤလ့ၤလၢယူဒၤအပူၤ ဒ်သိးကဟံးန့ၢ်ဝဲ ယွၤလၢအမ့ၢ်အတီတဂၤ အတလါစီဆှံ+ လၢအအိၣ်ဝဲဖဲန့ၣ် ဒီးဆှၢထီၣ်အီၤအဂီၢ်လီၤ. လၢတလါစီဆှံ အမဲာ်ညါန့ၣ် ညီနုၢ်ပှၤကိးထီၣ် တၢ်သုးမုၢ်ဂီၢ်မုၢ် အကစၢ် ယဟိဝၤယွၤ+ လၢအဆ့ၣ်နီၤလၢ လီၢ်ပစိာ်လၢ ခ့ရူာ်တဖၣ်+ အဖီခိၣ်န့ၣ်အမံၤလီၤ. ၃ ဘၣ်ဆၣ် ဖဲအဝဲသ့ၣ် လဲၤလၢ စီၤအဘံနဒာ် အဟံၣ် လၢအအိၣ်လၢ+ တၢ်လူၢ်ခိၣ် ဒ်သိးကဟံးန့ၢ် ယွၤလၢအမ့ၢ်အတီတဂၤ အတလါစီဆှံအခါ အဝဲသ့ၣ် ပာ်လီၤအီၤလၢ လ့ၣ်သီသီတခိၣ်အပူၤ+ ဒ်သိးကဆှၢထီၣ်အီၤအဂီၢ်လီၤ. ဒီးစီၤအဘံနဒာ် အဖိခွါတဖၣ် လၢအမ့ၢ် စီၤဧူးစၤ ဒီးစီၤအဃံယိၤ ဆှၢဝဲ လ့ၣ်တခိၣ်အံၤလီၤ.
၄ အဃိ အဝဲသ့ၣ် ဟံးထီၣ်က့ၤ ယွၤလၢအမ့ၢ်အတီတဂၤ အတလါစီဆှံ လၢစီၤအဘံနဒာ် အဟံၣ် လၢအအိၣ်လၢ တၢ်လူၢ်ခိၣ်န့ၣ် ဒီးစီၤအဃံယိၤ ဟးဝဲလၢ တလါစီဆှံ အမဲာ်ညါလီၤ. ၅ ဒီးစီၤဒၤဝံး ဒီးပှၤအံၣ်စရ့လးဖိတဖၣ်န့ၣ် အိၣ်ဒီး တၢ်ဒ့တၢ်အူ အကလုာ်ကလုာ် လၢအဘၣ်တၢ်တ့အီၤလၢ သ့ၣ်ကၠူနံးဖၢၤ ဒီးတနၢ်တဖၣ်, သီတူၢ်တဖၣ်,+ တၢ်ခြ့ခြ့တဖၣ်,+ နီၣ်တရုၤ ဒီးစှၢၣ်စှံးတဖၣ်+ ဒီးအဝဲသ့ၣ် မၤတၢ်သူၣ်ဖှံသးညီလၢ ယဟိဝၤယွၤ အမဲာ်ညါလီၤ. ၆ ဘၣ်ဆၣ် ဖဲအဝဲသ့ၣ် လဲၤတုၤလၢ စီၤနၤကိၣ် အကြဲၢ်ပူၤအခါ မ့ၢ်လၢကျီၢ်တဖၣ် ဘူးကမၤလီၤတကျၢၢ်လ့ၣ်အဃိ စီၤဧူးစၤ ယူာ်ဃီၤအစု ဒီးဖီၣ်ဃာ် ယွၤလၢအမ့ၢ်အတီတဂၤ အတလါစီဆှံလီၤ.+ ၇ ယဟိဝၤယွၤ သးဒိၣ်ထီၣ် စီၤဧူးစၤ ဒိၣ်မးလီၤ. ဒီးမ့ၢ်လၢ စီၤဧူးစၤ တပာ်ကဲ ကစၢ်ယွၤ အတၢ်သိၣ်တၢ်သီဘၣ်အဃိ+ ကစၢ်ယွၤ မၤသံကွံာ်အီၤ+ ဒီးအသံဝဲ ဖဲယွၤလၢအမ့ၢ်အတီတဂၤ အတလါစီဆှံ အကပၤလီၤ. ၈ ဒီးမ့ၢ်လၢ ယဟိဝၤယွၤ အတၢ်သးဒိၣ် ဖျိးထီၣ်လၢ စီၤဧူးစၤအလိၤအဃိ စီၤဒၤဝံး သးပှံၢ်ထီၣ်တၢ်လီၤ.* ဒီးပှၤကိး တၢ်လီၢ်တတီၤအံၤ အမံၤလၢ ဖ့ရ့းဧူးစၤ* တုၤလၢ မုၢ်မဆါတနံၤအံၤလီၤ. ၉ ဖဲနံၤအဝဲန့ၣ် စီၤဒၤဝံး ပျံၤထီၣ် ယဟိဝၤယွၤ+ ဒီးတဲဝဲလၢ “ယဟိဝၤယွၤ အတလါစီဆှံ ဟဲလၢယအိၣ် ကသ့ဒ်လဲၣ်.”+ ၁၀ ဒီးစီၤဒၤဝံး တအဲၣ်ဒိး ဟဲက့ၤစိာ် ယဟိဝၤယွၤ အတလါစီဆှံလၢ အအိၣ်တၢ်လီၢ် လၢအမ့ၢ် စီၤဒၤဝံး အဝ့ၢ်လၢၤဘၣ်.+ လၢတၢ်န့ၣ်အလီၢ် စီၤဒၤဝံး မၢပှၤလဲၤပာ်ဝဲလၢ ပှၤကၤသးဖိ စီၤဧိၤဘ့းအ့ဒိၣ် အဟံၣ်န့ၣ်လီၤ.+
၁၁ ဒီးယဟိဝၤယွၤ အတလါစီဆှံ အိၣ်ဝဲဖဲ ပှၤကၤသးဖိ စီၤဧိၤဘ့းအ့ဒိၣ် အဟံၣ်န့ၣ်သၢလါ ဒီးယဟိဝၤယွၤ ဆိၣ်ဂ့ၤ စီၤဧိၤဘ့းအ့ဒိၣ် ဒီးအဟံၣ်ဖိဃီဖိ ကိးဂၤဒဲးလီၤ.+ ၁၂ ပှၤတဲဘၣ် စီၤပၤဒၤဝံးလၢ “မ့ၢ်လၢ ယွၤလၢအမ့ၢ်အတီတဂၤ အတလါစီဆှံအဃိ ယဟိဝၤယွၤ ဆိၣ်ဂ့ၤ စီၤဧိၤဘ့းအ့ဒိၣ် အဟံၣ်ဖိဃီဖိ ဒီးတၢ်လၢအိၣ်ဒီးအီၤ ခဲလၢာ်လီၤ.” အဃိ လၢတၢ်သူၣ်ဖှံသးညီအပူၤ စီၤဒၤဝံး လဲၤဟံးန့ၢ်က့ၤဝဲ ယွၤလၢအမ့ၢ်အတီတဂၤ အတလါစီဆှံ လၢစီၤဧိၤဘ့းအ့ဒိၣ် အဟံၣ် ဒီးဆှၢထီၣ်ဝဲလၢ စီၤဒၤဝံးအဝ့ၢ်လီၤ.+ ၁၃ ဖဲပှၤလၢအယိး+ ယဟိဝၤယွၤ အတလါစီဆှံ ခါထီၣ်ခီၣ်န့ၢ်ဝဲ ဃုခါအခါ စီၤဒၤဝံး လုၢ်ထီၣ်ဝဲ ကျီၢ်ဖါတဒု ဒီးဆၣ်ဖိကီၢ်ဖိလၢ အဘီၣ်အသိတဒုလီၤ.
၁၄ စီၤဒၤဝံး ကၤဝဲအ့ဖိး လၢအညၣ်ဂ့ၤတဘ့ၣ် ဒီးဂဲၤကလံၣ်ဝဲလၢ ယဟိဝၤယွၤ အမဲာ်ညါ လၢတၢ်သူၣ်ဆူၣ်သးဆူၣ်အပူၤ လၢာ်ဂံၢ်လၢာ်ဘါလီၤ.+ ၁၅ စီၤဒၤဝံး ဒီးပှၤအံၣ်စရ့လးဖိတဖၣ် ဆှၢထီၣ် ယဟိဝၤယွၤ အတလါစီဆှံ+ ဒီးကိးပသူထီၣ်ဝဲလၢ တၢ်သူၣ်ခုသးခုအပူၤ+ ဒီးအူထီၣ်ဝဲကွဲၤလီၤ.+ ၁၆ ဘၣ်ဆၣ် ဖဲပှၤဟဲက့ၤယိးနုာ်လီၤ ယဟိဝၤယွၤ အတလါစီဆှံလၢ စီၤဒၤဝံး အဝ့ၢ်ပူၤအခါ စီၤစီလူး အဖိမုၣ် နီၢ်မံကၤလး+ ကွၢ်စိလီၤတၢ်လၢ ပဲတြီဖိအပူၤ ဒီးထံၣ်ဝဲလၢ စီၤဒၤဝံး ဖုကဆဲး ဒီးဂဲၤကလံၣ်ဝဲလၢ ယဟိဝၤယွၤ အမဲာ်ညါလီၤ. အဃိ နီၢ်မံကၤလး ဆိကမိၣ်ဆံးအီၤလီၤ.+ ၁၇ ဒီးအဝဲသ့ၣ် ဟဲက့ၤယိးနုာ်လီၤဝဲ ယဟိဝၤယွၤ အတလါစီဆှံ ဒီးပာ်လီၤဝဲလၢအလီၢ် ဖဲဒဲလၢ စီၤဒၤဝံး သူၣ်ထီၣ်ဝဲ တဖျၢၣ်န့ၣ်အပူၤလီၤ.+ ဝံၤဒီး စီၤဒၤဝံး လုၢ်ထီၣ်ဝဲ တၢ်လုၢ်ဒွဲၣ်အူ+ ဒီးတၢ်လုၢ်အိၣ်ဃူအိၣ်ဖိးတဖၣ်+ လၢယဟိဝၤယွၤ အအိၣ်လီၤ.+ ၁၈ ဖဲစီၤဒၤဝံး လုၢ်ထီၣ် တၢ်လုၢ်ဒွဲၣ်အူ ဒီးတၢ်လုၢ်အိၣ်ဃူအိၣ်ဖိးတဖၣ် ဝံၤအခါ အဝဲဆိၣ်ဂ့ၤ ပှၤဂီၢ်မုၢ်လၢ တၢ်သုးမုၢ်ဂီၢ်မုၢ် အကစၢ် ယဟိဝၤယွၤအမံၤပူၤလီၤ. ၁၉ ဒီးပိာ်မုၣ်ပိာ်ခွါ ကိးဂၤဒဲးလၢ အံၣ်စရ့လး အပှၤဂီၢ်မုၢ်အကျါန့ၣ် အဝဲဟ့ၣ်နီၤလီၤ အဝဲသ့ၣ်တဂၤစုာ်စုာ်လၢ ကိၣ်ထံဖှံၣ်တခါ, ကိၣ်တလိၣ်လၢ အဘၣ်တၢ်တ့အီၤလၢ စူၣ်ပလိၣ်သၣ် ဒီးကိၣ်တလိၣ်လၢ အဘၣ်တၢ်တ့အီၤလၢ စပံးသၣ်ဃ့လီၤ. ဝံၤဒီးပှၤကိးဂၤဒဲး က့ၤလၢ အနီၢ်ကစၢ်အဟံၣ်လီၤ.
၂၀ ဖဲစီၤဒၤဝံး ဟဲက့ၤဒ်သိး ကဆိၣ်ဂ့ၤ အနီၢ်ကစၢ် အဟံၣ်ဖိဃီဖိအခါ စီၤစီလူး အဖိမုၣ် နီၢ်မံကၤလး+ ဟဲထီၣ်သဂၢၢ်အီၤလီၤ. ဒီးနီၢ်မံကၤလး တဲဝဲလၢ “တနံၤအံၤ အံၣ်စရ့လး အစီၤပၤ ဘ့ၣ်လီၤကွံာ် အကူအကၤလၢ အခ့အပှၤ အကုၢ်မုၣ်တဖၣ် အမဲာ်ညါ ဒ်ပှၤလၢအခိၣ်နူာ်တအိၣ်ဘၣ်တဂၤ ဘ့ၣ်လီၤကွံာ် အကူအကၤအသိး အဃိ နမၤအါထီၣ် နလၤကပီၤ ဖးဒိၣ်ညါနီၤ.”+ ၂၁ ဒီးစီၤဒၤဝံး က့ၤတဲဆၢက့ၤ နီၢ်မံကၤလးလၢ “ယမၤတၢ်သူၣ်ဖှံသးညီလၢ ယဟိဝၤယွၤ အမဲာ်ညါလီၤမၢၤ. လၢအကဃုထၢ နပၢ်ဒီးအဒူၣ်ဖိထၢဖိအလီၢ် အဃုထၢထီၣ်ယၤ ဒီးပာ်ထီၣ်ယၤလၢ ယဟိဝၤယွၤ အပှၤဂီၢ်မုၢ် အံၣ်စရ့လး အခိၣ်အနၢ်လီၤ.+ အဃိ ယကမၤတၢ်သူၣ်ဖှံသးညီလၢ ယဟိဝၤယွၤအမဲာ်ညါလီၤ. ၂၂ ဒီးယကဆီၣ်လီၤယသး အါန့ၢ်အန့ၣ်ဒံး ဒီးလၢယနီၢ်ကစၢ် အတၢ်ထံၣ်ဒၣ်လဲာ် ယကမ့ၢ် ပှၤလၢအပတီၢ်ဖုၣ်လီၤ. ဘၣ်ဆၣ် မ့မ့ၢ် ကုၢ်မုၣ်လၢ နတဲဖဲမကၢာ်တဖၣ်န့ၣ် အဝဲသ့ၣ် ကမၤလၤကပီၤယၤလီၤ.” ၂၃ အဃိ စီၤစီလူး အဖိမုၣ် နီၢ်မံကၤလး+ အဖိတအိၣ်ဘၣ် တုၤလၢ အသံတစုလီၤ.