၁ စီၤပၤ

၁၃ ဖဲစီၤယၤရၤဘၣ်​ ဆၢထၢၣ်လၢ တၢ်လုၢ်လီၢ်ကပၤ+ ဒ်သိးကလုၢ်ထီၣ်​ တၢ်လုၢ်တၢ်ပာ်* အဂီၢ်အခါ ကစၢ်ယွၤ အပှၤတဂၤ+ လၢအအိၣ်လၢ ယူဒၤအဟီၣ်ကဝီၤန့ၣ်​ ဟဲလၢဝ့ၢ်ဘ့ၤသ့လး ဒ်ယဟိဝၤယွၤ ဟ့ၣ်လီၤ တၢ်ကလုၢ်အသိးလီၤ. ၂ ဒ်ယဟိဝၤယွၤ ဟ့ၣ်လီၤတၢ်ကလုၢ်အသိး အဝဲတဲတၢ်လၢ အထီဒါဝဲ တၢ်လုၢ်လီၢ် ဒီးတဲဝဲလၢ “တၢ်လုၢ်လီၢ်ဧၢ, တၢ်လုၢ်လီၢ်ဧၢ, ယဟိဝၤယွၤ တဲဝဲဒ်အံၤလီၤ. ‘ဖိခွါတဂၤလၢ အမံၤမ့ၢ် စီၤယိၤၡံယၤန့ၣ်+ ကအိၣ်ဖျဲၣ်ထီၣ်လၢ စီၤဒၤဝံး အစၢၤအသွဲၣ်တဖၣ်​ အကျါလီၤ. တၢ်လီၢ်ထီၣ်ထီ အပှၤလုၢ်တၢ်ဒိၣ်တဖၣ်လၢ အလုၢ်ထီၣ်​ တၢ်လုၢ်တၢ်ပာ်လၢ နဖီခိၣ်န့ၣ်​ အဝဲကလုၢ်ထီၣ်​ အဝဲသ့ၣ်လၢ နဖီခိၣ်​ ဒီးအဝဲကဒွဲၣ်အူထီၣ်​ ပှၤကညီအဃံတဖၣ်​ လၢနဖီခိၣ်လီၤ.’”+ ၃ ဖဲနံၤအဝဲန့ၣ်​ ကစၢ်ယွၤ အပှၤတဂၤန့ၣ်​ တဲဖျါထီၣ်ဝဲ တၢ်ပနီၣ်လီၤလးတခါ ဒီးတဲဝဲလၢ “ယဟိဝၤယွၤ ဟ့ၣ်ဝဲတၢ်ပနီၣ်လီၤလး ဒ်အံၤလီၤ. တၢ်လုၢ်လီၢ် ကသ့ၣ်ဖးဝဲ ဒီးဖၣ်ဆါလၢ အအိၣ်ဝဲလၢ တၢ်လုၢ်လီၢ် အဖီခိၣ်န့ၣ်​ ကလီၤလာ်ကွံာ်ဝဲလီၤ.”

၄ ဖဲစီၤပၤယၤရၤဘၣ်​ နၢ်ဟူဝဲ ယွၤလၢ အမ့ၢ်အတီ အပှၤတဂၤ အတၢ်ကတိၤလၢ အထီဒါဝဲ တၢ်လုၢ်လီၢ်လၢ ဝ့ၢ်ဘ့ၤသ့လးအခါ စီၤပၤ ထုးထီၣ်က့ၤအစုလၢ တၢ်လုၢ်လီၢ် ဒီးယူာ်ဃီၤဝဲလၢ အအိၣ်ဒီးတဲဝဲလၢ “ဖီၣ်န့ၢ်ပှၤတဂၤန့ၣ်တထံၣ်.”+ ဒီးစီၤပၤ အစုလၢ အယူာ်ဃီၤဝဲန့ၣ်​ ထီၣ်ဆှိၣ်ဝဲ ဒီးအမၤဟူးဝဲ တန့ၢ်လၢၤဘၣ်.+ ၅ ဒီးတၢ်လုၢ်လီၢ်န့ၣ်​ သ့ၣ်ဖးဝဲ ဒီးဖၣ်ဆါလၢ အအိၣ်ဝဲလၢ တၢ်လုၢ်လီၢ် အဖီခိၣ်န့ၣ်​ လီၤလာ်ကွံာ်ဝဲ ဒ်တၢ်ပနီၣ်လီၤလးလၢ ယဟိဝၤယွၤ တဲပာ်စၢၤ ယွၤလၢ အမ့ၢ်အတီ အပှၤတဂၤန့ၣ်​ အသိးလီၤ.

၆ ဒီးစီၤပၤတဲ ယွၤလၢ အမ့ၢ်အတီ အပှၤတဂၤန့ၣ်လၢ “ဝံသးစူၤ ဃ့ကညး နကစၢ် ယဟိဝၤယွၤ လၢတၢ်သးကညီၤအဂီၢ် ဒီးဃ့ထုကဖၣ်န့ၢ်တၢ်လၢ ယဂီၢ် ဒ်သိး ယစုကဘျါက့ၤ အဂီၢ်တက့ၢ်.”+ ဒီးယွၤလၢ အမ့ၢ်အတီ အပှၤတဂၤန့ၣ်​ ဃ့ကညးဝဲ ယဟိဝၤယွၤ လၢတၢ်သးကညီၤအဂီၢ် ဒီးစီၤပၤအစု က့ၤဂ့ၤထီၣ်က့ၤ ဒ်လၢညါအသိးလီၤ. ၇ စီၤပၤတဲဘၣ်​ ယွၤလၢ အမ့ၢ်အတီ အပှၤတဂၤန့ၣ်လၢ “ဟဲလၢယဟံၣ်​ ဒီးအီၣ်တၢ်ဒီးယၤမီၤ. ဒီးယကဟ့ၣ်နၤ တၢ်ဟ့ၣ်တခါ.” ၈ ဘၣ်ဆၣ်​ ယွၤလၢ အမ့ၢ်အတီ အပှၤတဂၤန့ၣ်​ တဲစီၤပၤလၢ “နမ့ၢ်ဟ့ၣ်ယၤ နဟံၣ်​ တဝာ်ဒၣ်လဲာ် ယတလဲၤပိာ်နခံ ဒီးအီၣ်ကိၣ်​ ဒီးအီထံလၢ တၢ်လီၢ်ဖဲအံၤဘၣ်. ၉ ယဟိဝၤယွၤ မၤလိာ်ပာ်စၢၤယၤလၢ ယတဘၣ်အီၣ်ကိၣ်​ ဒီးအီထံဘၣ်​ ဒီးယတဘၣ်​ က့ၤကဒါက့ၤလၢ ကျဲလၢ ယဟဲတဘိန့ၣ်ဘၣ်.” ၁၀ အဃိ အဝဲတက့ၤကဒါက့ၤလၢ ကျဲတဘိဃီလၢ အဟဲဝဲ ဖဲအဟဲလၢ ဝ့ၢ်ဘ့ၤသ့လး အခါန့ၣ်ဘၣ်. အဝဲက့ၤကဒါက့ၤလၢ ကျဲလၢအဂၤတဘိလီၤ.

၁၁ ဒီးလၢဝ့ၢ်ဘ့ၤသ့လးအပူၤန့ၣ်​ ဝံသးပှၢ် အိၣ်ဝဲတဂၤလီၤ. ဒီးအဖိခွါတဖၣ်​ ဟဲက့ၤတဲဘၣ်အီၤ တၢ်ခဲလၢာ်လၢ ယွၤလၢ အမ့ၢ်အတီ အပှၤတဂၤန့ၣ်​ မၤဝဲ ဒီးတၢ်လၢ အတဲဘၣ်​ စီၤပၤလၢ ဝ့ၢ်ဘ့ၤသ့လးအပူၤ ဖဲတၢ်တနံၤန့ၣ်လီၤ. ဒီးအဝဲသ့ၣ်​ တဲဘၣ်အပၢ်လၢ တၢ်ဂ့ၢ်သ့ၣ်တဖၣ်န့ၣ်​ ဝံၤအလီၢ်ခံ ၁၂ အပၢ်သံကွၢ် အဝဲသ့ၣ်လၢ “အဝဲက့ၤကျဲ ဖဲလဲၣ်တကပၤလဲၣ်.” ဒီးအဖိခွါတဖၣ်​ ဒုးနဲၣ်အီၤလၢ ကျဲလၢ ယွၤလၢ အမ့ၢ်အတီ အပှၤလၢ အအိၣ်လၢ ယူဒၤတဂၤန့ၣ်​ က့ၤဝဲန့ၣ်လီၤ. ၁၃ ဒီးအဝဲတဲဘၣ်​ အဖိခွါတဖၣ်လၢ “ကတဲာ်ကတီၤထီၣ်န့ၢ်ယၤ ကသ့ၣ်ယီၤတက့ၢ်.” ဒီးအဖိခွါတဖၣ်​ ကတဲာ်ကတီၤထီၣ်န့ၢ်အီၤ ကသ့ၣ်ယီၤဒီး အဝဲဒိးထီၣ်ဝဲ ကသ့ၣ်ယီၤလီၤ.

၁၄ အဝဲလဲၤလူၤဝဲ ယွၤလၢ အမ့ၢ်အတီ အပှၤတဂၤန့ၣ်​ ဒီးထံၣ်ဝဲလၢ အဆ့ၣ်နီၤလၢ သ့ၣ်ဖးဒိၣ်တထူၣ်​ အခီၣ်ထံးလီၤ. ဒီးအတဲဘၣ်​ ယွၤလၢအမ့ၢ်အတီ အပှၤတဂၤန့ၣ်လၢ “နကဲ ယွၤလၢ အမ့ၢ်အတီ အပှၤတဂၤလၢ အအိၣ်လၢ ယူဒၤအဟီၣ်ကဝီၤန့ၣ်ဧါ.”+ အဝဲတဲဆၢဝဲလၢ “မ့ၢ်, အကဲယၤလီၤ.” ၁၅ ဒီးဝံသးပှၢ်န့ၣ်​ တဲဘၣ်အီၤလၢ “လဲၤအီၣ်တၢ်ဒီးယၤ လၢယဟံၣ်မီၤ.” ၁၆ ဘၣ်ဆၣ်​ အဝဲ တဲဆၢက့ၤဝဲလၢ “ယတူၢ်လိာ် နတၢ်ကွဲမုာ် ဒီးလဲၤပိာ်နခံ တသ့ဘၣ်. ဒီးယအီၣ်ကိၣ်​ ဒီးအီထံဒီးနၤလၢ တၢ်လီၢ်ဖဲအံၤ တသ့စ့ၢ်ကီးဘၣ်. ၁၇ ခီဖျိလၢ ယဟိဝၤယွၤ တဲယၤလၢ ယတဘၣ်အီၣ်ကိၣ်​ ဒီးအီထံလၢ တၢ်လီၢ်ဖဲအံၤဘၣ်​ ဒီးယတဘၣ်​ က့ၤကဒါက့ၤလၢ ကျဲလၢ ယဟဲတဘိန့ၣ်ဘၣ်.” ၁၈ ဖဲန့ၣ်ဝံသးပှၢ် တဲဆၢက့ၤအီၤလၢ “ယၤစ့ၢ်ကီး ယကဲဝံတဂၤ ဒ်နၤအသိးလီၤ. ဒီးခီဖျိလၢ ယဟိဝၤယွၤ ဟ့ၣ်လီၤ တၢ်ကလုၢ်အဃိ မူခိၣ်ကလူးတဂၤ တဲယၤလၢ ‘က့ၤကိးအီၤလၢ နဟံၣ်​ ဒ်သိးအကအီၣ်ကိၣ်​ ဒီးအီထံအဂီၢ်တက့ၢ်.’” (ဘၣ်ဆၣ်​ အနီၢ်ကီၢ်န့ၣ်​ မ့ၢ်ဒၣ်​ အလံၣ်န့ၢ်လီန့ၢ် အီၤလီၤ.) ၁၉ အဃိ အဝဲ က့ၤပိာ်ဝံသးပှၢ်အခံ ဒီးအီၣ်ကိၣ်​ ဒီးအီထံလၢ အဟံၣ်ပူၤလီၤ.

၂၀ ဖဲအဝဲသ့ၣ်​ ဆ့ၣ်နီၤလၢ စီၢ်နီၤခိၣ်​ အဃၢၤအခါ ယဟိဝၤယွၤ တဲတၢ်ဒီး ဝံသးပှၢ်လၢ အဟဲက့ၤကိး အဝဲတဂၤန့ၣ်​ ၂၁ ဒီးဝံသးပှၢ် တဲဘၣ်​ ယွၤလၢ အမ့ၢ်အတီ အပှၤတဂၤလၢ အအိၣ်လၢ ယူဒၤအဟီၣ်ကဝီၤန့ၣ်လၢ “ယဟိဝၤယွၤ တဲဝဲလၢ ‘နတမၤထွဲ တၢ်လၢ ယဟိဝၤယွၤ မၤလိာ်နၤဘၣ်​ ဒီးနထီဒါ တၢ်မၤလိာ်လၢ နကစၢ် ယဟိဝၤယွၤ ဟ့ၣ်နၤလီၤ. ၂၂ ဒီးနဘၣ်တၢ်မၤလိာ်နၤလၢ “အီၣ်ကိၣ်​ ဒီးအီထံတဂ့ၤ.” ဘၣ်ဆၣ်​ နဟဲကဒါက့ၤလၢ တၢ်လီၢ်ဖဲအံၤ ဒီးအီၣ်ကိၣ်​ ဒီးအီထံ အဃိ နစိၣ်တဘၣ်​ တၢ်က့ၤခူၣ်လီၤအီၤလၢ နမိၢ်ပၢ်ဖံဖု လၢပျၢၤတဖၣ်​ အတၢ်သွၣ်ခိၣ်ဘၣ်.’”+

၂၃ ဒီးဖဲယွၤလၢ အမ့ၢ်အတီ အပှၤတဂၤန့ၣ်​ အီၣ်ကိၣ်​ ဒီးအီထံဝံၤအခါ ဝံသးပှၢ်တဂၤန့ၣ်​ ကတဲာ်ကတီၤထီၣ်ဝဲ ကသ့ၣ်ယီၤလၢ ဝံလၢ အဟဲက့ၤကိးဝဲ တဂၤန့ၣ်အဂီၢ်လီၤ. ၂၄ ဒီးယွၤလၢ အမ့ၢ်အတီ အပှၤတဂၤန့ၣ်​ က့ၤဝဲလီၤ. ဘၣ်ဆၣ်​ ဖဲအဝဲ က့ၤလၢကျဲအခါ ခ့ယုၢ်တဒု ဟဲထီၣ်သဂၢၢ်အီၤလၢ ကျဲပူၤ ဒီးခ့ယုၢ် အ့ၣ်သံကွံာ်အီၤလီၤ.+ ဒီးအစိၣ်​ အိၣ်ဝဲလၢ ကျဲပူၤ ဒီးအကသ့ၣ်ယီၤ ဒီးခ့ယုၢ်ဆၢထၢၣ်ဝဲလၢ အစိၣ်ကပၤလီၤ. ၂၅ ပှၤလၢ အလဲၤဘၣ်ကျဲ ဖဲန့ၣ်တဖၣ်​ ထံၣ်ဝဲ ပှၤသံစိၣ်အိၣ်လၢ ကျဲပူၤ ဒီးခ့ယုၢ် ဆၢထၢၣ်ဝဲလၢ ပှၤသံစိၣ်​ အကပၤလီၤ. ပှၤတဖၣ်န့ၣ်​ လဲၤလၢ ဝ့ၢ်လၢ ဝံသးပှၢ်အိၣ်ဝဲ တဖျၢၣ်န့ၣ်အပူၤ ဒီးတဲဖျါထီၣ်​ တၢ်ဂ့ၢ်န့ၣ်လီၤ.

၂၆ ဖဲဝံသးပှၢ်လၢ အဟဲက့ၤကိးအီၤတဂၤန့ၣ်​ နၢ်ဟူဝဲဒ်န့ၣ်အခါ တဘျီဃီန့ၣ်​ အဝဲတဲဝဲလၢ “ပှၤတဂၤန့ၣ်​ အကဲဝဲ ယွၤလၢ အမ့ၢ်အတီ အပှၤတဂၤလီၤ. အဝဲထီဒါက့ၤ ယဟိဝၤယွၤ အတၢ်မၤလိာ်အဃိ+ ယဟိဝၤယွၤ ဟ့ၣ်လီၤအီၤလၢ ခ့ယုၢ်အစုပူၤ ဒ်သိးခ့ယုၢ် ကအ့ၣ်ဖှီကွံာ်အီၤ ဒီးမၤသံအီၤ ဒ်ယဟိဝၤယွၤ တဲပာ်စၢၤအီၤ အသိးလီၤ.”+ ၂၇ ဒီးဝံသးပှၢ်န့ၣ်​ တဲဘၣ်​ အဖိခွါတဖၣ်လၢ “ကတဲာ်ကတီၤထီၣ်န့ၢ်ယၤ ကသ့ၣ်ယီၤတက့ၢ်.” အဃိ အဝဲသ့ၣ်​ ကတဲာ်ကတီၤထီၣ်န့ၢ်အီၤ ကသ့ၣ်ယီၤလီၤ. ၂၈ ဒီးအဝဲလဲၤထံၣ်ဝဲ ပှၤသံအစိၣ်​ အိၣ်လၢကျဲပူၤ ဒီးကသ့ၣ်ယီၤ ဒီးခ့ယုၢ်ဆၢထၢၣ်ဝဲလၢ ပှၤသံစိၣ်အကပၤလီၤ. ဒီးခ့ယုၢ်န့ၣ်​ တအီၣ်ဝဲ ပှၤသံစိၣ်ဘၣ်​ ဒီးတအ့ၣ်ဖှီကွံာ်ဝဲ ကသ့ၣ်ယီၤ စ့ၢ်ကီးဘၣ်. ၂၉ ဒီးဝံသးပှၢ်န့ၣ်​ စိာ်ထီၣ်ဝဲ ယွၤလၢ အမ့ၢ်အတီ အပှၤတဂၤန့ၣ်​ အစိၣ်​ ဒီးတီၣ်ထီၣ်ဝဲလၢ ကသ့ၣ်ယီၤ အလိၤလီၤ. ဒီးဝံသးပှၢ် ဟဲက့ၤစိာ်အီၤလၢ ဝံသးပှၢ် အနီၢ်ကစၢ်အဝ့ၢ် ဒ်သိးအကဟီၣ်ဝဲလၢ အဃိ ဒီးကခူၣ်လီၤကွံာ်အီၤ အဂီၢ်လီၤ. ၃၀ ဒီးဝံသးပှၢ်န့ၣ်​ ခူၣ်လီၤဝဲ ပှၤသံစိၣ်န့ၣ်လၢ အနီၢ်ကစၢ် အတၢ်သွၣ်ခိၣ်လီၤ. ဒီးအဝဲသ့ၣ်​ ဟီၣ်ဝဲလၢအဃိ ဒီးတဲဝဲလၢ “အိ ယဒီပုၢ်ဝဲၢ်ဧၢ, နတၢ်အိၣ်မူအံၤ လီၤသးအုးထဲလဲၣ်.” ၃၁ ဝံသးပှၢ် ခူၣ်လီၤဝံတဂၤန့ၣ်​ ဝံၤဒီး အဝဲတဲဘၣ်​ အဖိခွါတဖၣ်လၢ “ယမ့ၢ်သံန့ၣ်​ သုကဘၣ်​ ခူၣ်လီၤကွံာ်ယၤ ဖဲယွၤလၢ အမ့ၢ်အတီ အပှၤတဂၤန့ၣ်​ ဘၣ်တၢ်ခူၣ်လီၤအီၤ အလီၢ်န့ၣ်လီၤ. ပာ်လီၤယဃံလၢ အဃံကပၤတက့ၢ်.+ ၃၂ ဒ်ယဟိဝၤယွၤ ဟ့ၣ်လီၤအီၤ တၢ်ကလုၢ်အသိး တၢ်ကတိၤလၢ အဝဲတဲတၢ်လၢ အထီဒါ တၢ်လုၢ်လီၢ်လၢ ဝ့ၢ်ဘ့ၤသ့လးအပူၤ ဒီးတၢ်ဘူၣ်ထီၣ်ဘါထီၣ်အဟံၣ်​ ကိးဖျၢၣ်ဒဲးလၢ အအိၣ်ဝဲလၢ တၢ်လီၢ်ထီၣ်ထီတဖၣ်+ လၢၡၤမရံ အဝ့ၢ်တဖၣ်​ အပူၤန့ၣ်​ ကလၢထီၣ်ပှဲၤထီၣ်ဝဲ သပှၢ်တၢၢ်လီၤ.”+

၃၃ တၢ်ကဲထီၣ်အသး ဒ်အံၤတဖၣ်​ ဝံၤအလီၢ်ခံဒၣ်လဲာ် စီၤယၤရၤဘၣ်​ တပာ်ပတုာ်ကွံာ် အတၢ်မၤလၢ အအၢအသီဘၣ်. လၢတၢ်န့ၣ်အလီၢ် အဝဲဃုထၢထီၣ်ဒံး ပှၤမုၢ်ဆ့ၣ်မုၢ်ဂီၤဖိလၢ ပှၤဂီၢ်မုၢ်အကျါ လၢကကဲထီၣ်​ တၢ်လီၢ်ထီၣ်ထီ အပှၤလုၢ်တၢ်ဒိၣ်တဖၣ်လီၤ.+ ပှၤတဂၤဂ့ၤ တဂၤဂ့ၤ လၢအအဲၣ်ဒိးကဲထီၣ်​ ပှၤလုၢ်တၢ်ဒိၣ်န့ၣ်​ အဝဲပာ်ထီၣ်​ အဝဲသ့ၣ်လၢ ပှၤလုၢ်တၢ်ဒိၣ်တဖၣ်​ ဒီးတဲဝဲလၢ “မ်ပှၤတဂၤအံၤ ကဲထီၣ်​ တၢ်လီၢ်ထီၣ်ထီ အပှၤလုၢ်တၢ်ဒိၣ်တက့ၢ်.”+ ၃၄ ခီဖျိလၢ စီၤယၤရၤဘၣ်+ အဒူၣ်ဖိထၢဖိ အတၢ်ဒဲးဘးအံၤအဃိ လၢခံ တၢ်မၤဟးဂီၤကွံာ် အဝဲသ့ၣ်​ ဒီးတၢ်မၤလီၤတူာ်ကွံာ် အဝဲသ့ၣ်​ လၢဟီၣ်ခိၣ်ချၢလီၤ.+