၂ တံၤမသ့း
၂ ယဖိခွါဧၢ,+ ဆဲးဟံးန့ၢ် တၢ်စိတၢ်ကမီၤ ခီဖျိလၢ တၢ်သးကညီၤ ဒိၣ်ဒိၣ်မုၢ်မုၢ်လၢ ယ့ၣ်ၡူးခရံာ် ပာ်ဖျါထီၣ်ဝဲန့ၣ်တက့ၢ်. ၂ ဒီးတၢ်လၢနနၢ်ဟူဘၣ် လၢယအိၣ်လၢ ပှၤအုၣ်အသးအါဂၤ ဆီၣ်ထွဲဝဲန့ၣ်+ အးလီၤအီၤလၢ ပှၤလၢအသးတီတဖၣ် အအိၣ်တက့ၢ်. နမ့ၢ်မၤဒ်န့ၣ်န့ၣ် အဝဲသ့ၣ်စ့ၢ်ကီး ကတုၤထီၣ်ထီၣ်ဘး လၢကသိၣ်လိ ပှၤဂၤတဖၣ်အဂီၢ်လီၤ. ၃ ဒ်ယ့ၣ်ၡူးခရံာ် အသုးဖိလၢ အဂ့ၤတဂၤအသိးန့ၣ်+ အိၣ်ကတဲာ်ကတီၤနသးလၢ နကတူၢ် တၢ်နးတၢ်ဖှီၣ်တဖၣ်တက့ၢ်.+ ၄ ပှၤတဂၤဂ့ၤတဂၤဂ့ၤ လၢအကဲသုးန့ၣ် ဒ်သိး အကမၤသးခု ပှၤလၢ အဒုးကဲထီၣ်အီၤလၢ သုးဖိတဂၤအသးအဂီၢ် အတမၤဘၣ်ထွဲ လိာ်အသးဒီး တၢ်မၤအဂၤလၢ အကန့ၢ်အါထီၣ်စ့အဂီၢ်ဘၣ်. ၅ လၢတၢ်လိၣ်ကွဲတဖၣ် အပူၤဒၣ်လဲာ် ပှၤလၢ အပြၢတၢ်တဂၤ မ့ၢ်တမၤထွဲဝဲ ဒ်တၢ်ဘျၢအသိးဘၣ်န့ၣ် အတဒိးန့ၢ်ဘၣ် ခိၣ်သလုးဘၣ်.+ ၆ ဒီးပှၤမၤစံာ်ဖိလၢ အမၤတၢ်ဆူၣ်တဂၤန့ၣ် အဝဲကဘၣ်မ့ၢ် ပှၤလၢအအီၣ်ဘၣ် တၤသၣ်တဖၣ် အဆိကတၢၢ်လီၤ. ၇ တၢ်လၢ ယတဲနၤတဖၣ်န့ၣ် ဆိကမိၣ်ထံအီၤ ထီဘိတက့ၢ်. ကစၢ်ကဟ့ၣ်နၤ တၢ်သ့ၣ်ညါနၢ်ပၢၢ်* လၢတၢ်ခဲလၢာ် အပူၤလီၤ.
၈ သ့ၣ်နီၣ်ထီၣ်လၢ ယ့ၣ်ၡူးခရံာ်ဘၣ်တၢ် ဒုးဂဲၤဆၢထၢၣ်က့ၤအီၤလၢ တၢ်သံ+ ဒီးအကဲဝဲ စီၤဒၤဝံးအချံအသၣ်+ ဒ်တၢ်သးခုကစီၣ်လၢ ယစံၣ်တဲၤတဲလီၤအီၤ အသိးန့ၣ်တက့ၢ်.+ ၉ လၢတၢ်သးခုကစီၣ်အံၤအဃိ ယတူၢ်ဘၣ်တၢ်နးတၢ်ဖှီၣ် ဒီးပှၤစၢဃာ်ယၤ ဒ်ပှၤစၢဃာ် ပှၤလၢအမၤတၢ်အၢတၢ်သီတဂၤ အသိးလီၤ.+ ဘၣ်ဆၣ် ပှၤစၢဃာ် ကစၢ်ယွၤ အကလုၢ်ကထါ တသ့နီတဂၤဘၣ်.+ ၁၀ အဃိ ယဆဲးတူၢ်တၢ်ခဲလၢာ်လၢ ပှၤလၢအဘၣ် တၢ်ဃုထၢအီၤတဖၣ်အဂီၢ်+ ဒ်သိး အဝဲသ့ၣ်စ့ၢ်ကီး ကန့ၢ်ဘၣ် တၢ်အုၣ်က့ၤခီၣ်က့ၤလီၤ. တၢ်အုၣ်က့ၤခီၣ်က့ၤအံၤ ဟဲခီဖျိ ယ့ၣ်ၡူးခရံာ် အဃိအဝဲသ့ၣ်ကအိၣ်ဒီး တၢ်လၤကပီၤ လီၤထူလီၤယိာ်လီၤ. ၁၁ တၢ်ကတိၤလၢလာ်အံၤ မ့ၢ်တၢ်လၢ ပှၤနာ်န့ၢ်အီၤသ့လီၤ. ပမ့ၢ်သံဃုာ်ဒီးအီၤန့ၣ် ပကမူဃုာ်ဒီးအီၤ သပှၢ်တၢၢ်လီၤ.+ ၁၂ ပမ့ၢ်ဆဲးအိၣ်ဒီး တၢ်တူၢ်န့ၢ်ခီၣ်ကဲန့ၣ် ပကပၢဃုာ်တၢ်ဒီးအီၤ ဒ်စီၤပၤတဖၣ် အသိးလီၤ.+ ဘၣ်ဆၣ် ပမ့ၢ်သမၢအီၤန့ၣ် အဝဲကသမၢပှၤ စ့ၢ်ကီးလီၤ.+ ၁၃ ဒီးပမ့ၢ်တတီဘၣ် သနာ်က့ မ့ၢ်လၢအဝဲ သမၢလီၤအသး တသ့ဘၣ်အဃိ အကလုၢ်တီထီဘိလီၤ.
၁၄ ဒုးသ့ၣ်နီၣ်ထီၣ် အဝဲသ့ၣ်လၢ တၢ်ဂ့ၢ်တဖၣ်န့ၣ်တက့ၢ်. ဒီးလၢကစၢ်ယွၤ အမဲာ်ညါန့ၣ် မၤလိာ်အဝဲသ့ၣ် ဒ်သိး အသုတအ့ၣ်လိာ်သးလၢ တၢ်ကတိၤတဖၣ် အဃိတဂ့ၤ. ပှၤမ့ၢ်မၤဒ်န့ၣ်န့ၣ် အမၤဘၣ်ဒိပှၤလၢ အနၢ်ဟူတၢ်တဖၣ် အဃိ အဘျုးတအိၣ် နီတမံၤဘၣ်. ၁၅ ဂုာ်ကျဲးစၢးလၢ အဂ့ၤကတၢၢ် ဒ်သိးကစၢ်ယွၤ ကဘၣ်သူၣ်ဘၣ်သးနၤအဂီၢ်တက့ၢ်. ဂုာ်ကျဲးစၢး ဒ်သိးနကမ့ၢ် ပှၤမၤတၢ်ဖိတဂၤလၢ အတမဲာ်ဆှးလၢ အတၢ်မၤအဃိဘၣ် ဒီးဒ်သိးနကမ့ၢ် ပှၤတဂၤလၢအသူ ကစၢ်ယွၤ အကလုၢ်ကထါ တၢ်မ့ၢ်တၢ်တီ တီတီလိၤလိၤ န့ၣ်တက့ၢ်.+ ၁၆ မ့မ့ၢ် တၢ်စံၣ်တဲၤတဲလီၤလၢ အဘျုးတအိၣ်ဘၣ်လၢ အထီဒါလိာ်သးဒီး တၢ်လၢအစီဆှံန့ၣ် တဘၣ်ကနၣ်ဃုာ်အီၤတဂ့ၤ.+ တၢ်သ့ၣ်တဖၣ်န့ၣ် ကဒုးအိၣ်ထီၣ် တၢ်တယူးတယီၣ်ယွၤ အါထီၣ်အါထီၣ်လီၤ. ၁၇ ဒီးတၢ်ကတိၤဒ်န့ၣ်တဖၣ် ကရၤလီၤအသးဒ် တၢ်ပူၤလီၢ်လၢ အအီၣ်လီၤကလိၤကွံာ်တၢ်* အသိးလီၤ. စီၤဟူၤမ့းနဲ ဒီးစီၤဖံလ့ၤတူး ပၣ်ဃုာ်လၢ ပှၤလၢအရၤလီၤ တၢ်ကတိၤတဖၣ်အံၤအကျါလီၤ.+ ၁၈ ပှၤတဖၣ်အံၤ ပာ်တ့ၢ်ကွံာ် တၢ်မ့ၢ်တၢ်တီ ဒီးတဲဝဲလၢ တၢ်ဂဲၤဆၢထၢၣ် သမူထီၣ်က့ၤ မၤတ့ၢ်အသးလံ.+ ဒီးအဝဲသ့ၣ် မၤဟးဂီၤ ပှၤတနီၤနီၤ အတၢ်စူၢ်တၢ်နာ်လီၤ. ၁၉ ဒ်လဲၣ်ဂ့ၤဒ်လဲၣ်ဂ့ၤ တၢ်အခီၣ်ထံးလၢ ကစၢ်ယွၤ သူၣ်လီၤဝဲ ဂၢၢ်ဂၢၢ်ကျၢၤကျၢၤန့ၣ် အိၣ်ဆၢထၢၣ်ဒံး ဒီးတၢ်ကွဲးအသးအိၣ်ဝဲလၢ အလိၤလၢ “ယဟိဝၤယွၤ* သ့ၣ်ညါပှၤလၢ အမ့ၢ်အတၢ်တဖၣ်လီၤ.”+ ဒီး “ပှၤလၢအကိးထီၣ် ယဟိဝၤယွၤ အမံၤကိးဂၤဒဲးန့ၣ်+ မ်အပာ်တ့ၢ်ကွံာ် တၢ်တတီတလိၤတဖၣ်တက့ၢ်.”
၂၀ လၢဟံၣ်ဖးဒိၣ်တဖျၢၣ်အပူၤန့ၣ် တအိၣ်ထဲ သပၢၤထူ ဒီးသပၢၤစ့ဘၣ်. သပၢၤသ့ၣ် ဒီးသပၢၤဟီၣ်ခိၣ် အိၣ်ဝဲစ့ၢ်ကီးလီၤ. ဒီးသပၢၤတနီၤန့ၣ် ပှၤကသူအီၤလၢ တၢ်လၢအလီၤပာ်ကဲ တမံၤမံၤအဂီၢ် ဒီးတနီၤန့ၣ် ပှၤကသူအီၤလၢ တၢ်လၢအတလီၤပာ်ကဲဘၣ် တမံၤမံၤအဂီၢ်လီၤ. ၂၁ အဃိ ပှၤတဂၤဂၤလၢ အအိၣ်ယံၤဒီး သပၢၤလၢ ပှၤသူအီၤလၢ တၢ်လၢအတလီၤပာ်ကဲဘၣ် တမံၤမံၤအဂီၢ်န့ၣ် အကကဲထီၣ် သပၢၤလၢ ပှၤကသူအီၤလၢ တၢ်လၢအလီၤပာ်ကဲ တမံၤမံၤအဂီၢ်လီၤ. ဒီးအကဘၣ် တၢ်ပာ်စီဆှံအီၤ, ကကဲဘျုးလၢ အကစၢ်လၢ အပၢအီၤအဂီၢ် ဒီးကအိၣ်ကတဲာ်ကတီၤအသးလၢ တၢ်မၤလၢအဂ့ၤကိးမံၤဒဲး အဂီၢ်လီၤ. ၂၂ အဃိ ဟးဆှဲးပှၤသးစၢ် အတၢ်သူၣ်လီသးကွံတဖၣ်တက့ၢ်. လူၤတၢ်တီတၢ်လိၤ, ပာ်ဖျါထီၣ်တၢ်နာ်ဒီး တၢ်အဲၣ်တၢ်ကွံ ဒီးအိၣ်ဒီး တၢ်သူၣ်မံသးမုာ်တက့ၢ်.* နကဘၣ်မၤဒ်အံၤ ဃုာ်ဒီးပှၤလၢ အကိးထီၣ်ကစၢ်လၢ တၢ်သးကဆှီအပူၤလီၤ.
၂၃ တကးဒံးဘၣ် တၢ်ကတိၤကလီကလီ ဒီးတၢ်သံကွၢ်လၢ အခီပညီတအိၣ်ဘၣ်တဖၣ်န့ၣ် ကနၣ်ဃုာ်အီၤတဂ့ၤ.+ ဒ်နသ့ၣ်ညါအသိး တၢ်သ့ၣ်တဖၣ်န့ၣ် ဒုးအိၣ်ထီၣ်တၢ်အ့ၣ်လိာ်သးလီၤ. ၂၄ ဒီးကစၢ်အကုၢ်န့ၣ် တလိၣ်အ့ၣ်လိာ်အသးဘၣ်. အကဘၣ်မ့ၢ် ပှၤလၢ အသူၣ်ကပုာ်လုးသးကဖီလီ လၢပှၤခဲလၢာ်အဖီခိၣ်+ ဒီးကဘၣ် တုၤထီၣ်ထီၣ်ဘးလၢ ကသိၣ်လိတၢ်အဂီၢ်လီၤ. ဒီးဖဲပှၤမၤကမၣ်အီၤ အခါဒၣ်လဲာ် အကဘၣ်အိၣ်ဒီး တၢ်ပၢၤသူၣ်ပၢၤသးလီၤ.+ ၂၅ ဒီးအကဘၣ် သိၣ်က့ၤသီက့ၤ ပှၤလၢအနၢ်က့ၣ်တဖၣ်လၢ တၢ်သးစူၤအပူၤလီၤ.+ ဘၣ်တဘၣ် ကစၢ်ယွၤကဟ့ၣ် အဝဲသ့ၣ် တၢ်ခွဲးတၢ်ယာ် ဒ်သိး ကပီၢ်ယၢ်လီၤက့ၤအသး ဒီးကအိၣ်ဒီး တၢ်သ့ၣ်ညါတၢ်မ့ၢ်တၢ်တီ လီၤတံၢ်လီၤဆဲးလီၤ.+ ၂၆ ဒီးအဝဲသ့ၣ် ကသ့ၣ်ညါလီၤက့ၤအသး ဒီးကထူၣ်ဖျဲးထီၣ်ကွံာ်လၢ မုၣ်ကီၤလံၢ်အပျံၤသကွီၤ မ့ၢ်လၢ မုၣ်ကီၤလံၢ်ဖီၣ်သမူဒံး အဝဲသ့ၣ် ဒ်သိး အဝဲသ့ၣ်ကမၤ မုၣ်ကီၤလံၢ် အတၢ်ဘၣ်သးအဂီၢ်လီၤ.+