၂ တံၤမသ့း

၂ လၢတၢ်န့ၣ်အဃိ ယဖိခွါဧၢ, ဆဲးဟံးန့ၢ် တၢ်စိတၢ်ကမီၤ ခီဖျိလၢ တၢ်သးကညီၤ ဒိၣ်ဒိၣ်မုၢ်မုၢ် လၢအအိၣ်လၢ ယ့ၣ်ၡူးခရံာ်အပူၤန့ၣ်တက့ၢ်. ၂ ဒီးတၢ်လၢနနၢ်ဟူဘၣ် လၢယအိၣ်လၢ ပှၤအုၣ်အသးအါဂၤ ဆီၣ်ထွဲဝဲန့ၣ် အးလီၤတၢ်သ့ၣ်တဖၣ်အံၤလၢ ပှၤလၢအသးတီတဖၣ် အအိၣ်တက့ၢ်. မ့မ့ၢ်ဒ်န့ၣ်န့ၣ် အဝဲသ့ၣ်စ့ၢ်ကီး ကတုၤထီၣ်ထီၣ်ဘး ဒ်သိးအကသိၣ်လိ ပှၤဂၤတဖၣ်အဂီၢ်လီၤ. ၃ ဒ်ယ့ၣ်ၡူးခရံာ် အသုးဖိလၢ အဂ့ၤတဂၤအသိးန့ၣ် အိၣ်ကတဲာ်ကတီၤနသးလၢ နကတူၢ်ဘၣ် တၢ်နးတၢ်ဖှီၣ်တဖၣ်တက့ၢ်. ၄ ပှၤလၢအကဲသုး တဂၤဂ့ၤတဂၤဂ့ၤန့ၣ် ဒ်သိး အကမၤသးခု ပှၤလၢ အဒုးကဲထီၣ်အီၤလၢ သုးဖိတဂၤအသးအဂီၢ် အတမၤဘၣ်ထွဲ လိာ်အသးဒီး တၢ်ပနံာ်တၢ်ကၤဘၣ်. ၅ လၢတၢ်လိၣ်ကွဲတဖၣ် အပူၤဒၣ်လဲာ် ပှၤလၢ အပြၢတၢ်တဂၤ မ့ၢ်တမၤထွဲဝဲ ဒ်တၢ်ဘျၢအသိးဘၣ်န့ၣ် အတဒိးန့ၢ်ဘၣ် ခိၣ်သလုးဘၣ်. ၆ ဒီးပှၤမၤစံာ်ဖိလၢ အမၤတၢ်ဆူၣ်တဂၤန့ၣ် အဝဲကဘၣ်မ့ၢ် ပှၤလၢအအီၣ်ဘၣ် တၤသၣ်တဖၣ် အဆိကတၢၢ်လီၤ. ၇ တၢ်လၢ ယတဲနၤတဖၣ်န့ၣ် ဆိကမိၣ်ထံအီၤ ထီဘိတက့ၢ်. ကစၢ်ကဟ့ၣ်နၤ တၢ်သ့ၣ်ညါနၢ်ပၢၢ် လၢတၢ်ခဲလၢာ်အပူၤလီၤ.

၈ သ့ၣ်နီၣ်ထီၣ်လၢ ယ့ၣ်ၡူးခရံာ်ဘၣ်တၢ် ဒုးဂဲၤဆၢထၢၣ်က့ၤအီၤလၢ တၢ်သံဒီးကဲဝဲ စီၤဒၤဝံးအချံအသၣ်, ဒ်တၢ်သးခုကစီၣ်လၢ ယစံၣ်တဲၤတဲလီၤအီၤ အသိးန့ၣ်တက့ၢ်. ၉ လၢတၢ်သးခုကစီၣ်အံၤအဃိ ယဘၣ်တၢ်နးတၢ်ဖှီၣ် ဒီးတၢ်စၢဃာ်ယၤ ဒ်ပှၤမၤတၢ်အၢတၢ်သီတဂၤ အသိးန့ၣ်လီၤ. ဘၣ်ဆၣ် ယွၤအကလုၢ်ကထါန့ၣ် တဘၣ်တၢ်စၢဃာ်အီၤဘၣ်. ၁၀ အဃိ ယဆဲးတူၢ်တၢ်ခဲလၢာ်လၢ ပှၤလၢအဘၣ် တၢ်ဃုထၢအီၤတဖၣ်အဂီၢ် ဒ်သိး အဝဲသ့ၣ်စ့ၢ်ကီး ကန့ၢ်ဘၣ် တၢ်အုၣ်က့ၤခီၣ်က့ၤ လၢအဟဲခီဖျိ ယ့ၣ်ၡူးခရံာ် ဃုာ်ဒီးတၢ်လၤကပီၤ လီၤထူလီၤယိာ်န့ၣ်လီၤ. ၁၁ တၢ်ကတိၤတထံၣ်အံၤ မ့ၢ်တၢ်လၢ ပှၤနာ်န့ၢ်အီၤသ့လီၤ. ပမ့ၢ်သံဃုာ်ဒီးအီၤန့ၣ် ပကမူဃုာ်ဒီးအီၤစ့ၢ်ကီး သပှၢ်ကတၢၢ်လီၤ. ၁၂ ပမ့ၢ်ဆဲးအိၣ်ဒီး တၢ်တူၢ်န့ၢ်ခီၣ်ကဲန့ၣ် ပကပၢဃုာ်တၢ်ဒီးအီၤ ဒ်စီၤပၤတဖၣ် အသိးလီၤ. ဘၣ်ဆၣ် ပမ့ၢ်သမၢအီၤန့ၣ် အဝဲကသမၢပှၤ စ့ၢ်ကီးလီၤ. ၁၃ ဒီးပမ့ၢ်တတီဘၣ် သနာ်က့ မ့ၢ်လၢအဝဲ သမၢလီၤအသး တသ့ဘၣ်အဃိ အကလုၢ်တီထီဘိလီၤ.

၁၄ ဒုးသ့ၣ်နီၣ်ထီၣ် အဝဲသ့ၣ်လၢ တၢ်သ့ၣ်တဖၣ်န့ၣ်တက့ၢ်. ဒီးလၢကစၢ်ယွၤ အမဲာ်ညါန့ၣ် မၤလိာ်အဝဲသ့ၣ် ဒ်သိး အသုတအ့ၣ်လိာ်သး လၢတၢ်ကတိၤတဖၣ် အဃိတဂ့ၤ. ပှၤမ့ၢ်မၤဒ်န့ၣ်န့ၣ် အမၤဘၣ်ဒိပှၤလၢ အနၢ်ဟူတၢ်တဖၣ် အဃိ အဘျုးတအိၣ် နီတမံၤဘၣ်. ၁၅ ဂုာ်ကျဲးစၢးလၢ အဂ့ၤကတၢၢ် ဒ်သိးကစၢ်ယွၤ ကဘၣ်သူၣ်ဘၣ်သးနၤ, ဒ်ပှၤမၤတၢ်ဖိတဂၤလၢ အတမဲာ်ဆှးလၢ အတၢ်မၤအဃိဘၣ် ဒီးဒ်ပှၤတဂၤလၢအသူ ယွၤအကလုၢ်ကထါ တၢ်မ့ၢ်တၢ်တီ တီတီလိၤလိၤ အသိးန့ၣ်တက့ၢ်. ၁၆ မ့မ့ၢ် တၢ်စံၣ်တဲၤတဲလီၤလၢ အဘျုးတအိၣ်ဘၣ်လၢ အထီဒါလိာ်သးဒီး တၢ်လၢအစီဆှံန့ၣ် တဘၣ်ကနၣ်ဃုာ်အီၤတဂ့ၤ. တၢ်သ့ၣ်တဖၣ်အံၤ ကဒုးအိၣ်ထီၣ် တၢ်တယူးတယီၣ်ယွၤ အါထီၣ်အါထီၣ်လီၤ. ၁၇ ဒီးအတၢ်ကတိၤတဖၣ်န့ၣ် ကရၤလီၤအသးဒ် တၢ်ပူၤလီၢ်လၢ အအီၣ်လီၤကလိၤကွံာ်တၢ် အသိးန့ၣ်လီၤ. စီၤဟူၤမ့းနဲ ဒီးစီၤဖံလ့ၤတူး ပၣ်ဃုာ်လၢ ပှၤလၢအရၤလီၤ တၢ်ကတိၤတဖၣ်အံၤအကျါလီၤ. ၁၈ ပှၤတဖၣ်အံၤ ပာ်တ့ၢ်ကွံာ် တၢ်မ့ၢ်တၢ်တီ ဒီးတဲဝဲလၢ တၢ်ဂဲၤဆၢထၢၣ် သမူထီၣ်က့ၤ မၤတ့ၢ်အသးလံလီၤ. ဒီးအဝဲသ့ၣ် မၤဟးဂီၤ ပှၤတနီၤနီၤ အတၢ်စူၢ်တၢ်နာ်လီၤ. ၁၉ ဒ်လဲၣ်ဂ့ၤဒ်လဲၣ်ဂ့ၤ တၢ်အခီၣ်ထံးလၢ ကစၢ်ယွၤ သူၣ်လီၤဂၢၢ်ဂၢၢ်ကျၢၤကျၢၤန့ၣ် အိၣ်ဆၢထၢၣ်ဒံး ဒီးတၢ်စဲပနီၣ်ဃာ်အီၤလၢ “ယဟိဝၤယွၤ သ့ၣ်ညါပှၤလၢ အမ့ၢ်အတၢ်တဖၣ်လီၤ.” ဒီး “ပှၤလၢအကိးထီၣ် ယဟိဝၤယွၤ အမံၤကိးဂၤဒဲးန့ၣ် မ်အပာ်တ့ၢ်ကွံာ် တၢ်တတီတလိၤတဖၣ်တက့ၢ်.”

၂၀ လၢဟံၣ်ဖးဒိၣ်တဖျၢၣ်အပူၤန့ၣ် တအိၣ်ထဲ သပၢၤထူ ဒီးသပၢၤစ့ဘၣ်. သပၢၤသ့ၣ် ဒီးသပၢၤဟီၣ်ခိၣ် အိၣ်ဝဲစ့ၢ်ကီးလီၤ. ဒီးသပၢၤတနီၤန့ၣ် တၢ်ကသူအီၤလၢ တၢ်လၢအလီၤပာ်ကဲ တမံၤမံၤအဂီၢ် ဒီးတနီၤန့ၣ် တၢ်ကသူအီၤလၢ တၢ်လၢအတလီၤပာ်ကဲဘၣ် တမံၤမံၤအဂီၢ်လီၤ. ၂၁ အဃိန့ၣ် ပှၤတဂၤဂၤလၢ အအိၣ်ယံၤဒီး သပၢၤလၢ တၢ်သူအီၤလၢ တၢ်လၢအတလီၤပာ်ကဲဘၣ် တမံၤမံၤအဂီၢ်န့ၣ် အကကဲထီၣ် သပၢၤလၢ တၢ်ကသူအီၤလၢ တၢ်လၢအလီၤပာ်ကဲ တမံၤမံၤအဂီၢ်လီၤ. ဒီးအဝဲကဘၣ် တၢ်ပာ်စီဆှံအီၤ, ကကဲဘျုးလၢ အကစၢ်လၢ အပၢအီၤအဂီၢ် ဒီးကအိၣ်ကတဲာ်ကတီၤအသးလၢ တၢ်မၤလၢအဂ့ၤကိးမံၤဒဲး အဂီၢ်လီၤ. ၂၂ အဃိ ဟးဆှဲးပှၤသးစၢ် အတၢ်သူၣ်လီသးကွံတဖၣ်တက့ၢ်. မ့မ့ၢ် လူၤတၢ်တီတၢ်လိၤ, တၢ်စူၢ်တၢ်နာ်, တၢ်အဲၣ်တၢ်ကွံ, တၢ်သူၣ်မံသးမုာ်တက့ၢ်. ဒီးမၤဒ်အံၤ ဃုာ်ဒီးပှၤလၢ အကိးထီၣ်ကစၢ်လၢ တၢ်သးကဆှီအပူၤန့ၣ်တက့ၢ်.

၂၃ တကးဒံးဘၣ် ဂ့ၢ်လိာ် တၢ်ကတိၤကလီကလီ ဒီးတၢ်သံကွၢ်လၢ အခီပညီတအိၣ်ဘၣ်တဖၣ် န့ၣ်တက့ၢ်. ဒ်နသ့ၣ်ညါအသိး တၢ်သ့ၣ်တဖၣ်အံၤ ဒုးအိၣ်ထီၣ်တၢ်အ့ၣ်လိာ်သးလီၤ. ၂၄ ဒီးကစၢ်အကုၢ်န့ၣ် တလိၣ်အ့ၣ်လိာ်အသးဘၣ်. ကဘၣ်မ့ၢ် ပှၤလၢ အသူၣ်ကပုာ်လုးသးကဖီလီ လၢပှၤခဲလၢာ်အဖီခိၣ်ဒီး ကဘၣ် တုၤထီၣ်ထီၣ်ဘးလၢ ကသိၣ်လိတၢ်အဂီၢ် ဒီးဖဲပှၤမၤကမၣ်အီၤအခါဒၣ်လဲာ် အိၣ်ဒီးတၢ်ပၢၤသူၣ်ပၢၤသး ၂၅ ဒီးသိၣ်က့ၤသီက့ၤ ပှၤလၢအနၢ်က့ၣ်တဖၣ် လၢတၢ်သးစူၤအပူၤန့ၣ်လီၤ. ဘၣ်တဘၣ် ကစၢ်ယွၤကဟ့ၣ် အဝဲသ့ၣ် တၢ်ခွဲးတၢ်ယာ် ဒ်သိး ကပီၢ်ယၢ်လီၤက့ၤအသး ဒီးကအိၣ်ဒီး တၢ်သ့ၣ်ညါတၢ်မ့ၢ်တၢ်တီ လီၤတံၢ်လီၤဆဲးအဂီၢ်လီၤ. ၂၆ ဒီးအဝဲသ့ၣ် ကသ့ၣ်ညါလီၤက့ၤအသး ဒီးကထူၣ်ဖျဲးထီၣ်ကွံာ်လၢ မုၣ်ကီၤလံၢ်အပျံၤသကွီၤ မ့ၢ်လၢ မုၣ်ကီၤလံၢ်ဖီၣ်သမူဒံး အဝဲသ့ၣ် ဒ်သိးကမၤတၢ်ဘၣ် အသးအဂီၢ်လီၤ.