စံၣ်တဲၤတဲလီၤတၢ်
၃ လၢဟီၣ်ခိၣ်ချၢအံၤ တၢ်ဆၢကတီၢ် အိၣ်ဝဲလၢ တၢ်ခဲလၢာ်အဂီၢ်,
တၢ်ဆၢကတီၢ် အိၣ်ဝဲလၢ တၢ်မၤအသးကိးမံၤဒဲးအဂီၢ်,
၂ တၢ်ဆၢကတီၢ်လၢ ပှၤကအိၣ်ဖျဲၣ်ထီၣ်အဂီၢ် ဒီးတၢ်ဆၢကတီၢ်လၢ ပှၤကသံအဂီၢ်,
တၢ်ဆၢကတီၢ်လၢ ပှၤကသူၣ်လီၤတၢ်အဂီၢ် ဒီးတၢ်ဆၢကတီၢ်လၢ ပှၤကထဲးထီၣ်ကွံာ် တၢ်လၢပှၤသူၣ်လီၤဝဲအဂီၢ်,
၃ တၢ်ဆၢကတီၢ်လၢ ပှၤကမၤသံတၢ်အဂီၢ် ဒီးတၢ်ဆၢကတီၢ်လၢ ပှၤကမၤပူၤဖျဲးတၢ်အဂီၢ်,*
တၢ်ဆၢကတီၢ်လၢ ပှၤကမၤလီၤပှီၢ်ကွံာ်တၢ်အဂီၢ် ဒီးတၢ်ဆၢကတီၢ်လၢ ပှၤကသူၣ်ထီၣ်က့ၤတၢ်အဂီၢ်,
၄ တၢ်ဆၢကတီၢ်လၢ ပှၤကဟီၣ်အဂီၢ် ဒီးတၢ်ဆၢကတီၢ်လၢ ပှၤ ကနံၤအဂီၢ်,
တၢ်ဆၢကတီၢ်လၢ ပှၤကသးအုးအဂီၢ် ဒီးတၢ်ဆၢကတီၢ်လၢ ပှၤကဂဲၤကလံၣ်အဂီၢ်,
၅ တၢ်ဆၢကတီၢ်လၢ ပှၤကတၢၤကွံာ် လၢၢ်တဖၣ်အဂီၢ် ဒီးတၢ်ဆၢကတီၢ်လၢ ပှၤကထၢဖှိၣ် လၢၢ်တဖၣ်အဂီၢ်,
တၢ်ဆၢကတီၢ်လၢ ပှၤကဖိးဟုလိာ်သးအဂီၢ် ဒီးတၢ်ဆၢကတီၢ်လၢ ပှၤတဖိးဟုလိာ်သးဘၣ်အဂီၢ်,
၆ တၢ်ဆၢကတီၢ်လၢ ပှၤကဃုတၢ်အဂီၢ် ဒီးတၢ်ဆၢကတီၢ်လၢ ပှၤကပာ် တၢ်တမံၤမံၤဒ်သိးဒီး တၢ်လီၤမၢ်အဂီၢ်,
တၢ်ဆၢကတီၢ်လၢ ပှၤကပာ်ဃာ်တၢ်အဂီၢ် ဒီးတၢ်ဆၢကတီၢ်လၢ ပှၤကတၢၤကွံာ်တၢ်အဂီၢ်,
၇ တၢ်ဆၢကတီၢ်လၢ ပှၤကဖှီညာ်ကွံာ်တၢ်အဂီၢ်+ ဒီးတၢ်ဆၢကတီၢ်လၢ ပှၤကဆးထီၣ်က့ၤတၢ်အဂီၢ်,
တၢ်ဆၢကတီၢ်လၢ ပှၤကအိၣ်ဘှ့ၣ်အဂီၢ်+ ဒီးတၢ်ဆၢကတီၢ်လၢ ပှၤကတဲတၢ်အဂီၢ်,+
၈ တၢ်ဆၢကတီၢ်လၢ ပှၤကအဲၣ်တၢ်အဂီၢ် ဒီးတၢ်ဆၢကတီၢ်လၢ ပှၤကသးဟ့တၢ်အဂီၢ်,+
တၢ်ဆၢကတီၢ်လၢ ပှၤကဒုးတၢ်အဂီၢ် ဒီးတၢ်ဆၢကတီၢ်လၢ ပှၤကအိၣ်ဃူအိၣ်ဖိး အဂီၢ်လီၤ.
၉ ပှၤမၤတၢ်ဖိ မၤတၢ်ဆူၣ်ဆူၣ် သနာ်က့ အဒိးန့ၢ်ဘၣ် အဘျုးမနုၤလဲၣ်.+ ၁၀ ယထံၣ်ဘၣ်လၢ ကစၢ်ယွၤ ဟ့ၣ်လီၤပှၤဟီၣ်ခိၣ်ဖိ လၢတၢ်မၤ ဒ်သိးအဝဲသ့ၣ် အတၢ်မၤ ကအိၣ်ဝဲအဂီၢ်လီၤ. ၁၁ ကစၢ်ယွၤ မၤတ့ၢ်တၢ်ခဲလၢာ် ဃံဃံလၤလၤ လၢဆၢကတီၢ်လၢ အကြၢးအဘၣ်လီၤ.+ အဝဲတ့လီၤ ပှၤဟီၣ်ခိၣ်ဖိ ဒ်သိး အဝဲသ့ၣ် ကအဲၣ်ဒိးအိၣ်မူ လီၤထူလီၤယိာ် အဂီၢ်လီၤ.* ဘၣ်ဆၣ် တၢ်မၤလၢ ယွၤလၢအမ့ၢ်အတီတဂၤ မၤဝဲစးထီၣ်လၢ အခီၣ်ထံး တုၤအကတၢၢ်န့ၣ် ပှၤဟီၣ်ခိၣ်ဖိ ဃုသ့ၣ်ညါဝဲ တလၢာ်နီတဘျီဘၣ်.
၁၂ ယထံၣ်ဘၣ်လၢ တၢ်လၢအဂ့ၤကတၢၢ်လၢ ပှၤဟီၣ်ခိၣ်ဖိ မၤသ့န့ၣ် မ့ၢ်ဝဲ ဖဲအဝဲသ့ၣ် အိၣ်မူအခါ အဝဲသ့ၣ် ကသူၣ်ဖှံသးညီ ဒီးကမၤတၢ်ဂ့ၤလီၤ.+ ၁၃ ဒီးပဝဲခဲလၢာ် ပကြၢးအီၣ်တၢ်အီတၢ် ဒီးသးခုလၢ ပတၢ်မၤခဲလၢာ် အပူၤလီၤ. အဝဲန့ၣ် မ့ၢ်တၢ်ဟ့ၣ်တခါလၢ အဟဲလၢ ကစၢ်ယွၤ အအိၣ်လီၤ.+
၁၄ ယသ့ၣ်ညါထီၣ်ဘၣ်လၢ တၢ်လၢ ယွၤလၢအမ့ၢ်အတီတဂၤ တ့လီၤဝဲ ခဲလၢာ်န့ၣ် ကအိၣ်ဝဲ လီၤထူလီၤယိာ်လီၤ. ဒီးပှၤပာ်ဖှိၣ်အါထီၣ် တၢ်တမံၤမံၤမ့ၢ်ဂ့ၤ, ထုးကွံာ်တၢ်တမံၤမံၤမ့ၢ်ဂ့ၤ တသ့ဘၣ်. ယွၤလၢအမ့ၢ်အတီတဂၤ တ့လီၤတၢ်ခဲလၢာ်ဒ်အံၤန့ၣ် မ့ၢ်ဒ်သိး ပှၤကပျံၤအီၤ အဂီၢ်လီၤ.+
၁၅ တၢ်လၢအကဲထီၣ်အသး တမံၤဂ့ၤတမံၤဂ့ၤန့ၣ် မ့ၢ်တၢ်လၢ အကဲထီၣ်တ့ၢ်အသးလံ. ဒီးတၢ်လၢ အကဟဲခါဆူညါန့ၣ် မ့ၢ်တၢ်လၢ အအိၣ်ပာ်စၢၤလံ.+ ဘၣ်ဆၣ် ယွၤလၢအမ့ၢ်အတီတဂၤ ကဒုးအိၣ်ထီၣ် တၢ်လၢပှၤလူၤဝဲတဖၣ်လီၤ.*
၁၆ လၢဟီၣ်ခိၣ်ချၢအံၤ ယထံၣ်ဘၣ်စ့ၢ်ကီးလၢ ဖဲတၢ်စံၣ်ညီၣ်တီ ကြၢးအိၣ်ဝဲန့ၣ် တၢ်အၢတၢ်သီအိၣ်ဝဲ ဒီးဖဲတၢ်တီတၢ်လိၤ ကြၢးအိၣ်ဝဲန့ၣ် တၢ်အၢတၢ်သီ အိၣ်ဝဲလီၤ.+ ၁၇ ဒီးယတဲလီၤယသးလၢ “ယွၤလၢအမ့ၢ်အတီတဂၤ ကသမံသမိး ပှၤတီပှၤလိၤ ဒီးပှၤအၢပှၤသီလီၤ.+ အဃိ တၢ်ဆၢကတီၢ်အိၣ်ဝဲလၢ တၢ်မၤတမံၤဂ့ၤ တမံၤဂ့ၤအဂီၢ်လီၤ.”
၁၈ ယတဲလီၤစ့ၢ်ကီးယသးလၢ ဘၣ်ဃးဒီး ပှၤဟီၣ်ခိၣ်ဖိန့ၣ် ယွၤလၢအမ့ၢ်အတီတဂၤ ကမၤကွၢ်အဝဲသ့ၣ် ဒီးပာ်ဖျါထီၣ်န့ၢ်အဝဲသ့ၣ်လၢ အဝဲသ့ၣ်န့ၣ် လီၤဂာ်ဒ်သိးဒီး ဆၣ်ဖိကီၢ်ဖိတဖၣ်, ၁၉ မ့ၢ်လၢ လၢခံကတၢၢ်န့ၣ် ပှၤဟီၣ်ခိၣ်ဖိ ဒီးဆၣ်ဖိကီၢ်ဖိတဖၣ်န့ၣ် တၢ်ကမၤအသးဒီးအီၤ ဒ်သိးသိးလီၤ.+ ဒ်ဆၣ်ဖိကီၢ်ဖိ သံအသိး ပှၤဟီၣ်ခိၣ်ဖိ သံဝဲစ့ၢ်ကီး ဒီးဆၣ်ဖိကီၢ်ဖိမ့ၢ်ဂ့ၤ ပှၤဟီၣ်ခိၣ်ဖိမ့ၢ်ဂ့ၤ အိၣ်ဝဲဒီးသး* ထဲတမံၤလီၤ.+ အဃိ ပှၤဟီၣ်ခိၣ်ဖိ တဂ့ၤဒိၣ်န့ၢ်ဒံး ဆၣ်ဖိကီၢ်ဖိတဖၣ်ဘၣ်. တၢ်ခဲလၢာ် မ့ၢ်ဝဲတၢ်ကလီကလီလီၤ. ၂၀ အဝဲသ့ၣ်ခဲလၢာ် ကလဲၤလၢ တၢ်လီၢ်တပူၤဃီလီၤ.+ အဝဲသ့ၣ်ခဲလၢာ်န့ၣ် ဘၣ်တၢ်တ့အီၤလၢ ဟီၣ်ခိၣ်ကမူၣ်+ ဒီးအဝဲသ့ၣ်ခဲလၢာ် ကကဲထီၣ်က့ၤ ဟီၣ်ခိၣ်ကမူၣ်လီၤ.+ ၂၁ မ့ၢ်ပှၤဟီၣ်ခိၣ်ဖိအသး* လဲၤထီၣ်လၢ ထးခီဧါ ဒီးဆၣ်ဖိကီၢ်ဖိအသး လဲၤလီၤလၢ ဟီၣ်ခိၣ်လာ်ဧါ. မတဂၤ သ့ၣ်ညါကသ့ နီၢ်ကီၢ်လဲၣ်.+ ၂၂ ဒီးယထံၣ်ဘၣ်လၢ တၢ်လၢအဂ့ၤကတၢၢ်လၢ ပှၤဟီၣ်ခိၣ်ဖိ မၤသ့န့ၣ် မ့ၢ်ဝဲ အကသူၣ်ဖှံသးညီလၢ အတၢ်မၤအပူၤ,+ မ့ၢ်လၢ အဝဲန့ၣ် မ့ၢ်ဝဲအခိၣ်ဖးအဃိလီၤ. ဒီးအသံဝံၤအလီၢ်ခံ ပှၤဒုးနဲၣ်အီၤလၢ တၢ်လၢကမၤအသးတဖၣ်န့ၣ် တသ့နီတဂၤဘၣ်.+