ကလီးစဲ
၄ ကစၢ်သ့ၣ်ဧၢ, ရ့ဒီးသုကုၢ်တဖၣ် ဂ့ၤဂ့ၤဘၣ်ဘၣ် ဒီးတီတီလိၤလိၤတက့ၢ်. သုသ့ၣ်ညါလၢ သုအိၣ်စ့ၢ်ကီး ဒီးသုကစၢ်တဂၤ လၢမူခိၣ်လီၤ.+
၂ ဆဲးဃ့ထုကဖၣ်တၢ် ထီဘိတက့ၢ်.+ တဘၣ်သးပ့ၤနီၣ်* ဃ့ထုကဖၣ်တဂ့ၤ ဒီးစံးဘျုးစံးဖှိၣ်တၢ်တက့ၢ်.+ ၃ တကတီၢ်ဃီန့ၣ် ဃ့ထုကဖၣ်စ့ၢ်ကီးလၢပဂီၢ်+ ဒ်သိးကစၢ်ယွၤ ကအိးဟိထီၣ်ကျဲလၢ ပကစံၣ်တဲၤတဲလီၤ အကလုၢ်ကထါ ဒီးတၢ်ခူသူၣ်စီဆှံ ဘၣ်ဃးဒီး ခရံာ်တက့ၢ်. ခီဖျိလၢ တၢ်ခူသူၣ်စီဆှံအံၤအဃိ ပှၤစၢဃာ်ယၤလီၤ.+ ၄ ဒီးဃ့ထုကဖၣ်တၢ် ဒ်သိး ယကစံၣ်တဲၤတဲလီၤ တၢ်ခူသူၣ်စီဆှံပျီပျီ ဒ်ယကြၢးမၤ အသိးတက့ၢ်.
၅ ဆဲးအိၣ်မူလၢ တၢ်ကူၣ်သ့အပူၤ လၢပှၤလၢ အတစူၢ်တနာ်တၢ်ဘၣ်တဖၣ်အကျါ ဒီးသူသုတၢ်ဆၢကတီၢ်လၢ အဂ့ၤကတၢၢ်တက့ၢ်.*+ ၆ တဲတၢ်ကတိၤလၢအမုာ် ဒီးဟီဒ်အံသၣ်အသိး+ ထီဘိတက့ၢ်. သုမ့ၢ်မၤဒ်န့ၣ်န့ၣ် သုကဘၣ်စံးဆၢပှၤတဂၤဂ့ၤ တဂၤဂ့ၤ ဒ်လဲၣ်ဒ်လဲၣ်န့ၣ် သုကသ့ၣ်ညါလီၤ.+
၇ ယဒီပုၢ်ဝဲၢ်သးဘိ စီၤတူဃံၤကူး+ လၢအမ့ၢ် ခရံာ်အခ့အပှၤ လၢအသးတီ ဒီးအမ့ၢ် ကစၢ်အကုၢ် ဒ်သိးဒီးယၤန့ၣ် ကတဲဘၣ်သု ယကစီၣ်ခဲလၢာ်လီၤ. ၈ ယကဆှၢလီၤအီၤလၢ သုအိၣ်ဒ်သိး သုကသ့ၣ်ညါ တၢ်မၤအသးဒီးပှၤ ဒ်လဲၣ် ဒီးဒ်သိး အကမၤမုာ်ထီၣ် သုသးအဂီၢ်လီၤ. ၉ စီၤတူဃံၤကူး ကလဲၤလၢသုအိၣ် ဃုာ်ဒီး စီၤအီးန့ၤစံမူး+ လၢအမ့ၢ် ယဒီပုၢ်ဝဲၢ်သးဘိလၢ အသးတီတဂၤန့ၣ်လီၤ. လၢညါန့ၣ် စီၤအီးန့ၤစံမူး မ့ၢ်ဝဲပှၤတဂၤလၢ အအိၣ်လၢ သုတၢ်လီၢ်လီၤ. အဝဲသ့ၣ် ကတဲဘၣ်သု တၢ်လၢအကဲထီၣ်အသး ဖဲအံၤခဲလၢာ်လီၤ.
၁၀ စီၤအရံစတၢ်ဃူး+ လၢအဘၣ် တၢ်စၢဃာ်အီၤ ဃုာ်ဒီးယၤ ဒီးစီၤဘၢ်နါဘၤအတခွါ စီၤမၢ်ကူးန့ၣ်+ (ဘၣ်ဃးဒီးအီၤန့ၣ် သုဒိးန့ၢ်ဘၣ် တၢ်ဟံးစုနဲၣ်ကျဲလၢ အဝဲမ့ၢ်လဲၤလၢသုအိၣ်န့ၣ် သုကဘၣ် တူၢ်လိာ်အီၤဂ့ၤဂ့ၤ)+ ဆၢဂ့ၤဆၢဝါသုလီၤ. ၁၁ တကးဒံးဘၣ် စီၤယ့ၣ်ၡူးလၢ ပှၤကိးအီၤလၢ စီၤယူစတူးန့ၣ် ဆၢဂ့ၤဆၢဝါသု စ့ၢ်ကီးလီၤ. အဝဲသ့ၣ်န့ၣ် ပၣ်ဃုာ်လၢ ပှၤလၢအဒိး တၢ်ကူးတရံးတဖၣ်အကျါလီၤ. ဘၣ်ဆၣ် ထဲဒၣ်အဝဲသ့ၣ်န့ၣ် မ့ၢ်ပှၤလၢ အမၤသကိးတၢ်ဒီးယၤလၢ ကစၢ်ယွၤ အဘီမုၢ်အဂီၢ် ဒီးအဝဲသ့ၣ်ကဲထီၣ် တၢ်ဟ့ၣ်ဂံၢ်ဟ့ၣ်ဘါလၢ ယဂီၢ်ဒိၣ်မးလီၤ. ၁၂ စီၤအ့းပၤဖြါ+ လၢအမ့ၢ် ယ့ၣ်ၡူးခရံာ်အကုၢ် လၢအအိၣ်ဒီးသုလၢညါန့ၣ် ဆၢဂ့ၤဆၢဝါသုလီၤ. ထီဘိန့ၣ် အဝဲဃ့ထုကဖၣ်န့ၢ်တၢ်လၢ သုဂီၢ်ဆူၣ်ဆူၣ် ဒ်သိး သုကဆဲးကဲ ပှၤဒိၣ်တုာ်ခိၣ်ပှဲၤ ဒီးသုကအိၣ်ဒီး တၢ်နာ်လၢအဂၢၢ်ကျၢၤ လၢအဘၣ်ဃးဒီး တၢ်လၢကစၢ်ယွၤ ဘၣ်အသးကိးမံၤဒဲးအဂီၢ်လီၤ. ၁၃ ယအုၣ်ယသးလၢ အဝဲဂုာ်ကျဲးစၢးဆူၣ်ဆူၣ် လၢသုဂီၢ် ဒီးလၢပှၤအိၣ်လၢ ဝ့ၢ်လီၤဒံၤကံ ဒီးဝ့ၢ်ဟံၣ်ရိးပလံ အဂီၢ်လီၤ.
၁၄ ကသံၣ်သရၣ် စီၤလူၤကၣ်+ လၢအဘၣ်တၢ်အဲၣ်အီၤ ဒီးစီၤဒ့မၤန့ၣ်+ ဆၢဂ့ၤဆၢဝါသုလီၤ. ၁၅ ဆၢဂ့ၤဆၢဝါန့ၢ်ယၤ ဒီပုၢ်ဝဲၢ်တဖၣ်လၢ အအိၣ်လၢ ဝ့ၢ်လီၤဒံၤကံ ဒီးနီၢ်နူၣ်ဖၤ ဒီးတၢ်အိၣ်ဖှိၣ်လၢ အအိၣ်ဖှိၣ်ဝဲလၢ အဟံၣ်န့ၣ်တက့ၢ်.+ ၁၆ ဒီးဖဲပှၤဖးထီၣ် လံာ်ပရၢအံၤ လၢသုကျါ ဝံၤအလီၢ်ခံ ရဲၣ်ကျဲၤဒ်သိး ပှၤကဖးအီၤလၢ+ ပှၤလီၤဒံၤကံဖိ အတၢ်အိၣ်ဖှိၣ်ပူၤစ့ၢ်ကီးတက့ၢ်. ဒီးသုကဘၣ်ဖးလံာ်ပရၢ လၢအဟဲလၢ ဝ့ၢ်လီၤဒံၤကံ စ့ၢ်ကီးလီၤ. ၁၇ ဒီးတဲဘၣ် စီၤအၢ်ဃံးပူးလၢ+ “ဒ်သိး နကမၤလၢပှဲၤမူဒါလၢ နဒိးန့ၢ်ဘၣ်အီၤလၢ ကစၢ်အအိၣ်အဂီၢ် ဂုာ်ကျဲးစၢးလၢ အဂ့ၤကတၢၢ်တက့ၢ်.”
၁၈ ယၤ, စီၤပီလူးအံၤ ယကွဲးန့ၢ်သု ယတၢ်ဆၢဂ့ၤဆၢဝါအံၤလၢ ယနီၢ်ကစၢ်အစုလီၤ.+ သ့ၣ်နီၣ်ထီၣ်လၢ ယဘၣ်တၢ်စၢဃာ်ယၤန့ၣ်တက့ၢ်.+ မ်သုဒိးန့ၢ်ဘၣ် တၢ်သးကညီၤ ဒိၣ်ဒိၣ်မုၢ်မုၢ်တက့ၢ်.