လီၣ်ဖျါ

၉ မူခိၣ်ကလူး ယဲၢ်ဂၤတဂၤန့ၣ် အူထီၣ်အကွဲၤလီၤ.+ ဒီးယထံၣ်ဘၣ် ဆၣ်တဖျၢၣ်လၢ အလီၤတဲာ်လၢ မူခိၣ်ဆူဟီၣ်ခိၣ်ချၢ ဒီးကစၢ်ယွၤ ဟ့ၣ်လီၤအီၤ သီးခွဲးလၢ တၢ်ပူၤယိာ်အခိၣ်ထိး+ အဂီၢ်လီၤ. ၂ အဝဲအိးထီၣ် တၢ်ပူၤယိာ်အခိၣ်ထိး ဒီးမ့ၣ်အူခုၣ်ဟဲထီၣ်ဝဲ ဒ်မ့ၣ်အူခုၣ် ဟဲထီၣ်လၢ ဖၣ်ကပူၤဖးဒိၣ် အသိးလီၤ. မုၢ်ဒီးကလံၤစ့ၢ်ကီး ခံးလီၤဝဲလၢ+ တၢ်ပူၤအမ့ၣ်အူခုၣ် အဃိလီၤ. ၃ ဒီးဒွဲၣ်တဖၣ် ဟဲထီၣ်လၢ မ့ၣ်အူခုၣ်ထီၣ်အကျါ ဒီးလဲၤဝဲလၢဟီၣ်ခိၣ်ချၢ+ ဒီးကစၢ်ယွၤ ဟ့ၣ်လီၤအဝဲသ့ၣ်လၢ တၢ်စိတၢ်ကမီၤ တမံၤဃီဒ် ပတ့ၤချဲးတဖၣ်လၢ အအိၣ်လၢဟီၣ်ခိၣ်ချၢ အတၢ်စိတၢ်ကမီၤ အသိးလီၤ. ၄ ကစၢ်ယွၤမၤလိာ် အဝဲသ့ၣ်လၢ နီၣ်ဧိၤမံၤဧိၤလၢ ဟီၣ်ခိၣ်ချၢမ့ၢ်ဂ့ၤ, တၢ်မုၢ်တၢ်ဘိလၢ အလါမ့ၢ်ဂ့ၤ, သ့ၣ်တဖၣ်မ့ၢ်ဂ့ၤ တဘၣ်မၤဘၣ်ဒိအီၤတဂ့ၤ. ကဘၣ်မၤဘၣ်ဒိထဲ ပှၤလၢအတအိၣ်ဒီး ကစၢ်ယွၤ အတၢ်စဲပနီၣ်လၢ အမဲာ်တူၢ်ခိၣ်ဘၣ် တဖၣ်လီၤ.+

၅ ဒွဲၣ်တဖၣ်န့ၣ် ဒိးန့ၢ်ဘၣ်အခွဲးလၢ ကမၤနးမၤဖှီၣ် ပှၤသ့ၣ်တဖၣ်န့ၣ် ယဲၢ်လါ ဘၣ်ဆၣ် တဒိးန့ၢ်ဘၣ်အခွဲးလၢ ကမၤသံ အဝဲသ့ၣ်ဘၣ်. ဒီးအတၢ်မၤနးမၤဖှီၣ်အံၤ မၤအသးဒ်သိးဒီး ပတ့ၤချဲးဆဲး+ ပှၤကညီလီၤ. ၆ ဒီးလၢမုၢ်နံၤတဖၣ်န့ၣ် အတီၢ်ပူၤ ပှၤကဃုကျဲလၢ အကသံ ဘၣ်ဆၣ် လ့ၤတက့ၤ ဃုဝဲတဘၣ်ဘၣ်. ဒီးအဝဲသ့ၣ် ကအဲၣ်ဒိးသံ ဘၣ်ဆၣ် တၢ်သံကဃ့ၢ်ကွံာ်လၢ အဝဲသ့ၣ်အအိၣ်လီၤ.

၇ ဒွဲၣ်တဖၣ်အက့ၢ်အဂီၤန့ၣ် လီၤဂာ်လၢ ကသ့ၣ်လၢ အအိၣ်ကတဲာ်ကတီၤအသးလၢ တၢ်ဒုးအဂီၢ်လီၤ.+ ဒီးလၢဒွဲၣ်တဖၣ် အခိၣ်လိၤန့ၣ် အိၣ်ဒီးတၢ်လၢ အလီၤဂာ်ဒီး ခိၣ်သလုးထူ ဒီးဒွဲၣ်တဖၣ်အမဲာ်သၣ်န့ၣ် လီၤဂာ်လၢ ပှၤဟီၣ်ခိၣ်ဖိ အမဲာ်သၣ်လီၤ. ၈ ဘၣ်ဆၣ် ဒွဲၣ်တဖၣ် အခိၣ်ဆူၣ်န့ၣ် လီၤဂာ်ဒ် ပှၤပိာ်မုၣ် အခိၣ်ဆူၣ်အသိးလီၤ. ဒီးဒွဲၣ်တဖၣ်အမဲန့ၣ် လီၤဂာ်လၢ ခ့ယုၢ်အမဲလီၤ.+ ၉ ဒီးဒွဲၣ်တဖၣ်န့ၣ် အိၣ်ဝဲဒီး သဃိးတဖၣ်* လၢအလီၤဂာ်ဒီး သဃိးထးလီၤ. ဒီးအဝဲသ့ၣ် အဒံးဆ့သီၣ်ထီၣ် လီၤဂာ်ဒီး ကသ့ၣ်အလ့ၣ်ကဟၣ်လၢ အကရီလဲၤလၢ တၢ်ဒုးအပူၤန့ၣ် အသီၣ်လီၤ.+ ၁၀ ဒွဲၣ်တဖၣ်န့ၣ် အိၣ်ဒီး အခံမဲၢ်တဖၣ်လၢ အဆဲးတၢ်ဒ် ပတ့ၤချဲးအသိး ဒီးအခံမဲၢ်တဖၣ်န့ၣ် အိၣ်ဒီးတၢ်စိတၢ်ကမီၤလၢ အကမၤဆူးမၤဆါ ပှၤဟီၣ်ခိၣ်ဖိတဖၣ် ယဲၢ်လါညါလီၤ.+ ၁၁ ဒွဲၣ်တဖၣ်န့ၣ် အိၣ်ဒီး စီၤပၤတဂၤလၢ အဝဲသ့ၣ်အဖီခိၣ် လၢအမ့ၢ် တၢ်ပူၤယိာ်+ အမူခိၣ်ကလူးတဂၤန့ၣ်လီၤ. လၢဧ့ၤဘြံၤကျိာ်န့ၣ် မူခိၣ်ကလူးတဂၤန့ၣ် အမံၤမ့ၢ်ဝဲ အဘးဒိၣ်* ဘၣ်ဆၣ် လၢကြံးကျိာ်န့ၣ် အမံၤမ့ၢ်ဝဲ အပီးလူၣ်လီၤ.*

၁၂ တၢ်ကီတၢ်ခဲ အဆိကတၢၢ်တခါန့ၣ် လဲၤပူၤကွံာ်လံ. ဘၣ်ဆၣ် တၢ်ကီတၢ်ခဲ ကဟဲဒံး ခံခါလီၤ.+

၁၃ မူခိၣ်ကလူး ဃုဂၤတဂၤန့ၣ်+ အူထီၣ်အကွဲၤလီၤ.+ ဒီးယနၢ်ဟူ တၢ်ကလုၢ်သီၣ်ထီၣ်တခါ လၢအဟဲလၢ တၢ်လုၢ်လီၢ်ထူ+ အနၢၣ်တဖၣ် လၢအအိၣ်လၢ ကစၢ်ယွၤ အမဲာ်ညါလီၤ. ၁၄ တၢ်ကလုၢ်အံၤ တဲဘၣ် မူခိၣ်ကလူး ဃုဂၤတဂၤလၢ အအိၣ်ဒီးကွဲၤန့ၣ်လၢ “ဃဲၣ်လီၤကွံာ် မူခိၣ်ကလူး လွံၢ်ဂၤလၢ အဘၣ်တၢ်စၢဃာ်အီၤဖဲ ထံကျိဖးဒိၣ် ဖရၤသးန့ၣ်တက့ၢ်.”+ ၁၅ ဒီးမူခိၣ်ကလူး လွံၢ်ဂၤလၢ အအိၣ်ကတဲာ်ကတီၤပာ်စၢၤအသးလၢ တနၣ်ရံၣ်, တသီ, တလါ ဒီးတနံၣ်အဂီၢ်န့ၣ် မူခိၣ်ကလူး ဃုဂၤတဂၤန့ၣ် ဃဲၣ်လီၤအဝဲသ့ၣ် ဒ်သိးကမၤသံ ပှၤဟီၣ်ခိၣ်ဖိ သၢပူတပူအဂီၢ်လီၤ.

၁၆ ဒီးယနၢ်ဟူ သုးဖိလၢ အဒိးကသ့ၣ်အနီၣ်ဂံၢ် ဒီးအနီၣ်ဂံၢ်အိၣ်ဝဲ အကကွဲၢ် ခံကယၤလီၤ. ၁၇ ဒီးလၢယထံၣ် တၢ်ထံၣ်လၢညါခီအပူၤန့ၣ် ယထံၣ်ဘၣ် ကသ့ၣ်တဖၣ် ဒီးပှၤလၢအဒိးအီၤတဖၣ် မၤအသးဒ်အံၤလီၤ. ပှၤလၢအဒိးကသ့ၣ်တဖၣ်န့ၣ် အိၣ်ဒီးသဃိးတဖၣ်လၢ အဂီၤဝဲဒ်မ့ၣ်အူအသိး, အလွဲၢ်လါအဲး ဒီးဘီဝဲဒ်ကးကမူၣ်* အသိးလီၤ. ကသ့ၣ်တဖၣ် အခိၣ်သၣ်ဃံန့ၣ် လီၤဂာ်ဒီး ခ့ယုၢ်အခိၣ်သၣ်ဃံလီၤ.+ လၢကသ့ၣ်တဖၣ် အကိာ်ပူၤန့ၣ် မ့ၣ်အူ, မ့ၣ်အူအခုၣ် ဒီးကးဟဲထီၣ်ဝဲလီၤ. ၁၈ ဒီးပှၤဟီၣ်ခိၣ်ဖိ သၢပူတပူန့ၣ် သံဝဲခီဖျိလၢ တၢ်နးတၢ်ဖှီၣ်သၢခါအံၤ လၢအမ့ၢ် မ့ၣ်အူ, မ့ၣ်အူအခုၣ် ဒီးကးလၢအဟဲထီၣ်လၢ ကသ့ၣ်တဖၣ် အကိာ်ပူၤ အဃိလီၤ. ၁၉ ကသ့ၣ်တဖၣ်အံၤ အစိအကမီၤန့ၣ် အိၣ်ဝဲလၢ အကိာ်ပူၤ ဒီးအခံမဲၢ်လီၤ. အဝဲသ့ၣ်အခံမဲၢ်န့ၣ် လီၤဂာ်ဒီး ဂုၢ်လၢအအိၣ်ဝဲဒီး အခိၣ်သၣ်ဃံ ဒီးအဝဲသ့ၣ်သူဝဲလၢ ကမၤဆူးမၤဆါတၢ် အဂီၢ်လီၤ.

၂၀ ဘၣ်ဆၣ် ပှၤလၢ အအိၣ်တ့ၢ်တဖၣ်လၢ အတဘၣ်တၢ်မၤသံအီၤလၢ တၢ်နးတၢ်ဖှီၣ်တဖၣ်အံၤ အဃိဘၣ်န့ၣ် တပီၢ်ယၢ်လီၤက့ၤအသးလၢ တၢ်လၢ အဝဲသ့ၣ်တ့ထီၣ်လၢ အစုတဖၣ်ဘၣ်. ဒီးတၢ်ဝံတၢ်နါတဖၣ်, တၢ်ဂီၤထူ, တၢ်ဂီၤစ့, တၢ်ဂီၤတိၢ်, တၢ်ဂီၤလၢၢ် ဒီးတၢ်ဂီၤသ့ၣ် လၢအထံၣ်တၢ် တသ့ဘၣ်, နၢ်ဟူတၢ်တသ့ဘၣ် ဒီးဟးဝဲတသ့ဘၣ်တဖၣ်န့ၣ်+ အဝဲသ့ၣ် တပတုာ် ဘူၣ်ထီၣ်ဘါထီၣ်ဝဲဘၣ်. ၂၁ ဒီးအဝဲသ့ၣ် တပီၢ်ယၢ်လီၤက့ၤအသးလၢ အတၢ်ဒဲးဘးတဖၣ် လၢအမ့ၢ် တၢ်မၤသံပှၤဂၤမ့ၢ်ဂ့ၤ, တၢ်ဝံတၢ်နါ အတၢ်ဖံးတၢ်မၤမ့ၢ်ဂ့ၤ, တၢ်မၤကမၣ် မုၣ်ကမၣ်ခွါမ့ၢ်ဂ့ၤ* ဒီးတၢ်ဟုၣ်တၢ်ဘျၣ်တၢ် မ့ၢ်ဂ့ၤန့ၣ်ဘၣ်.