လီၣ်ဖျါ

၉ မူခိၣ်ကလူးယဲၢ်ဂၤတဂၤန့ၣ် အူထီၣ်အကွဲၤလီၤ. ဒီးယထံၣ်ဘၣ် ဆၣ်တဖျၢၣ်လၢ အလီၤတဲာ်လၢ မူခိၣ်ဆူဟီၣ်ခိၣ်ချၢ ဒီးတၢ်ဟ့ၣ်လီၤအီၤလၢ တၢ်ပူၤယိာ်အခိၣ်ထိး အသီးခွဲးလီၤ. ၂ အဝဲအိးထီၣ် တၢ်ပူၤယိာ်အခိၣ်ထိး ဒီးမ့ၣ်အူအခုၣ်ဟဲထီၣ်ဝဲ ဒ်မ့ၣ်အူအခုၣ် ဟဲထီၣ်လၢ ဖၣ်ကပူၤဖးဒိၣ် အသိးန့ၣ်လီၤ. ဒီးမုၢ်ဒီးကလံၤစ့ၢ်ကီး ခံးလီၤဝဲလၢ တၢ်ပူၤအမ့ၣ်အူခုၣ် အဃိန့ၣ်လီၤ. ၃ ဒီးဒွဲၣ်တဖၣ်န့ၣ် ဟဲထီၣ်လၢ မ့ၣ်အူခုၣ်ထီၣ်အကျါ ဆူဟီၣ်ခိၣ်ချၢ ဒီးတၢ်ဟ့ၣ်လီၤ အဝဲသ့ၣ်လၢ တၢ်စိတၢ်ကမီၤ တမံၤဃီဒ် ပတ့ၤချဲးတဖၣ်လၢ အအိၣ်လၢဟီၣ်ခိၣ်ချၢ အတၢ်စိတၢ်ကမီၤ အသိးန့ၣ်လီၤ. ၄ တၢ်မၤလိာ် အဝဲသ့ၣ်တဖၣ်လၢ နီၣ်ဧိၤမံၤဧိၤလၢ ဟီၣ်ခိၣ်ချၢမ့ၢ်ဂ့ၤ, တၢ်မုၢ်တၢ်ဘိလၢ အလါမ့ၢ်ဂ့ၤ, သ့ၣ်တဖၣ်မ့ၢ်ဂ့ၤ, တဘၣ်မၤဘၣ်ဒိအီၤတဂ့ၤ. ကဘၣ်မၤဘၣ်ဒိထဲ ပှၤလၢအတအိၣ်ဒီး ကစၢ်ယွၤ အတၢ်စဲပနီၣ်ဃာ်လၢ အမဲာ်တူၢ်ခိၣ်ဘၣ် တဖၣ်န့ၣ်လီၤ.

၅ တၢ်တပျဲဒွဲၣ်တဖၣ်လၢ အကမၤသံ အဝဲသ့ၣ်ဘၣ်. မ့မ့ၢ် ဒ်သိးအကမၤနးမၤဖှီၣ် အဝဲသ့ၣ် ယဲၢ်လါအဂီၢ်လီၤ. ဒီးအတၢ်မၤနးမၤဖှီၣ်အံၤ မၤအသးဒ်သိးဒီး ပတ့ၤချဲးဆဲး ပှၤကညီန့ၣ်လီၤ. ၆ ဒီးလၢမုၢ်နံၤတဖၣ်န့ၣ် အတီၢ်ပူၤ ပှၤကဃုကျဲလၢ အကသံ ဘၣ်ဆၣ် လ့ၤတက့ၤ ဃုဝဲတဘၣ်ဘၣ်. ဒီးအဝဲသ့ၣ် ကအဲၣ်ဒိးသံ ဘၣ်ဆၣ် တၢ်သံကဃ့ၢ်ကွံာ်လၢ အဝဲသ့ၣ်အအိၣ်လီၤ.

၇ ဒွဲၣ်တဖၣ်အက့ၢ်အဂီၤန့ၣ် လီၤဂာ်လၢ ကသ့ၣ်လၢအအိၣ် ကတဲာ်ကတီၤအသးလၢ တၢ်ဒုးအဂီၢ်န့ၣ်လီၤ. ဒီးလၢအဝဲသ့ၣ် အခိၣ်လိၤန့ၣ် အိၣ်ဒီးတၢ်လၢ အလီၤဂာ်ဒီး ခိၣ်သလုးထူ ဒီးအမဲာ်သၣ်န့ၣ် လီၤဂာ်လၢ ပှၤဟီၣ်ခိၣ်ဖိ အမဲာ်သၣ်လီၤ. ၈ ဘၣ်ဆၣ် အဝဲသ့ၣ် အခိၣ်ဆူၣ်န့ၣ် လီၤဂာ်ဒ် ပှၤပိာ်မုၣ် အခိၣ်ဆူၣ်အသိးလီၤ. ဒီးအဝဲသ့ၣ်အမဲန့ၣ် လီၤဂာ်လၢ ခ့ယုၢ်အမဲလီၤ. ၉ ဒီးအဝဲသ့ၣ်အိၣ်ဝဲဒီး အသဃိးတဖၣ်လၢ အလီၤဂာ်ဒီးသဃိးထးလီၤ. ဒီးအဝဲသ့ၣ် အဒံးဆ့သီၣ်ထီၣ် လီၤဂာ်ဒီး ကသ့ၣ် အလ့ၣ်ကဟၣ်လၢ အကရီလဲၤလၢ တၢ်ဒုးအပူၤန့ၣ် အသီၣ်လီၤ. ၁၀ အဝဲသ့ၣ်အိၣ်ဒီး အခံမဲၢ်တဖၣ်လၢ အဆဲးတၢ်ဒ် ပတ့ၤချဲးအသိး ဒီးအခံမဲၢ်တဖၣ်န့ၣ် အိၣ်ဒီးတၢ်စိတၢ်ကမီၤလၢ အကမၤဆူးမၤဆါ ပှၤဟီၣ်ခိၣ်ဖိတဖၣ် ယဲၢ်လါညါလီၤ. ၁၁ အဝဲသ့ၣ်အိၣ်ဒီး စီၤပၤတဂၤလၢ အဝဲသ့ၣ် အဖီခိၣ်လၢအမ့ၢ် တၢ်ပူၤယိာ် အမူခိၣ်ကလူးတဂၤန့ၣ်လီၤ. လၢဧ့ၤဘြံၤကျိာ်န့ၣ် အမံၤမ့ၢ်ဝဲ အဘးဒိၣ်* ဘၣ်ဆၣ် လၢကြံးကျိာ်န့ၣ် အမံၤအိၣ်ဝဲလၢ အပီးလူၣ်လီၤ.*

၁၂ တၢ်ကီတၢ်ခဲ အဆိကတၢၢ်တခါန့ၣ် လဲၤပူၤကွံာ်လံ ဒီးတၢ်သ့ၣ်တဖၣ်အံၤ မ့ၢ်ဝံၤန့ၣ် တၢ်ကီတၢ်ခဲ ကဟဲဒံးခံခါလီၤ.

၁၃ မူခိၣ်ကလူး ဃုဂၤတဂၤန့ၣ် အူထီၣ်အကွဲၤလီၤ. ဒီးယနၢ်ဟူ တၢ်ကလုၢ်သီၣ်ထီၣ်တခါ လၢအဟဲလၢ တၢ်လုၢ်လီၢ်ထူ အနၢၣ်တဖၣ် လၢအအိၣ်လၢ ကစၢ်ယွၤ အမဲာ်ညါန့ၣ် ၁၄ တဲဘၣ်ဝဲ မူခိၣ်ကလူး ဃုဂၤတဂၤလၢ အအိၣ်ဒီးကွဲၤန့ၣ်လၢ “ဃဲၣ်လီၤကွံာ် မူခိၣ်ကလူးလွံၢ်ဂၤလၢ အဘၣ်တၢ်စၢဃာ်အီၤဖဲ ထံကျိဖးဒိၣ် ဖရၤသးန့ၣ်တက့ၢ်.” ၁၅ ဒီးမူခိၣ်ကလူး လွံၢ်ဂၤလၢ အဘၣ် တၢ်ကတဲာ်ကတီၤအီၤလၢ တနၣ်ရံၣ်, တသီ, တလါ ဒီးတနံၣ်အဂီၢ်န့ၣ် တၢ်ဃဲၣ်လီၤအဝဲသ့ၣ် ဒ်သိးကမၤသံ ပှၤဟီၣ်ခိၣ်ဖိ သၢပူတပူအဂီၢ်လီၤ.

၁၆ ဒီးယနၢ်ဟူ သုးဖိလၢ အဒိးကသ့ၣ်အနီၣ်ဂံၢ် ဒီးအနီၣ်ဂံၢ်အိၣ်ဝဲ အကကွဲၢ် ခံကယၤလီၤ. ၁၇ ဒီးလၢယထံၣ် တၢ်ထံၣ်လၢညါခီအပူၤန့ၣ် ယထံၣ်ဘၣ် ကသ့ၣ်တဖၣ် ဒီးပှၤလၢအဒိးအီၤတဖၣ် မၤအသးဒ်အံၤ, အဝဲသ့ၣ် အိၣ်ဒီးသဃိးတဖၣ်လၢ အဂီၤဝဲဒ်မ့ၣ်အူအသိး, အလွဲၢ်လါအဲး ဒီးဘီဝဲဒ်ကးကမူၣ် အသိးန့ၣ်လီၤ. ကသ့ၣ်တဖၣ် အခိၣ်သၣ်ဃံန့ၣ် လီၤဂာ်ဒီး ခ့ယုၢ်အခိၣ်သၣ်ဃံလီၤ. ဒီးမ့ၣ်အူ, မ့ၣ်အူအခုၣ် ဒီးကးဟဲထီၣ်လၢ အဝဲသ့ၣ်အကိာ်ပူၤလီၤ. ၁၈ ဒီးပှၤဟီၣ်ခိၣ်ဖိ သၢပူတပူန့ၣ် သံဝဲခီဖျိလၢ တၢ်နးတၢ်ဖှီၣ်သၢခါအံၤ လၢအမ့ၢ် မ့ၣ်အူ, မ့ၣ်အူအခုၣ် ဒီးကးလၢအဟဲထီၣ်လၢ အဝဲသ့ၣ် အကိာ်ပူၤန့ၣ်လီၤ. ၁၉ ကသ့ၣ်တဖၣ်အံၤ အစိအကမီၤန့ၣ် အိၣ်ဝဲလၢ အကိာ်ပူၤဒီး လၢအခံမဲၢ်လီၤ. အဝဲသ့ၣ်အခံမဲၢ်န့ၣ် လီၤဂာ်ဒီး ဂုၢ်လၢအ အိၣ်ဝဲဒီးအခိၣ်သၣ်ဃံ ဒီးအဝဲသ့ၣ်သူဝဲလၢ ကမၤဆူးမၤဆါတၢ်အဂီၢ်လီၤ.

၂၀ ဘၣ်ဆၣ် ပှၤလၢ အအိၣ်တ့ၢ်တဖၣ်လၢ အတဘၣ်တၢ်မၤသံအီၤလၢ တၢ်နးတၢ်ဖှီၣ်တဖၣ်အံၤ အဃိဘၣ်န့ၣ် တပီၢ်ယၢ်လီၤက့ၤအသးလၢ အစုအတၢ်မၤဘၣ်. အဝဲသ့ၣ် တပတုာ် ဘူၣ်ထီၣ်ဘါထီၣ် တၢ်ဝံတၢ်နါတဖၣ်, တၢ်ဂီၤထူ, တၢ်ဂီၤစ့, တၢ်ဂီၤတိၢ်, တၢ်ဂီၤလၢၢ် ဒီးတၢ်ဂီၤသ့ၣ် လၢအထံၣ်တၢ် တသ့ဘၣ်, နၢ်ဟူတၢ်တသ့ဘၣ် ဒီးဟးဝဲတသ့ဘၣ် တဖၣ်န့ၣ်ဘၣ်. ၂၁ ဒီးအဝဲသ့ၣ် တပီၢ်ယၢ်လီၤက့ၤအသးလၢ အတၢ်မၤသံပှၤဂၤမ့ၢ်ဂ့ၤ, အတၢ်ဝံတၢ်နါ အတၢ်ဖံးတၢ်မၤမ့ၢ်ဂ့ၤ, အတၢ်မၤကမၣ် မုၣ်ကမၣ်ခွါမ့ၢ်ဂ့ၤ* ဒီးအတၢ်ဟုၣ်တၢ်ဘျၣ် တၢ်မ့ၢ်ဂ့ၤန့ၣ်ဘၣ်.