ရိမ့ၤ

၆ မ့မ့ၢ်ဒ်န့ၣ်န့ၣ် ပကတဲဒ်လဲၣ်. မ့ၢ်ပကြၢးဆဲးမၤ တၢ်ဒဲးဘး ဒ်သိးပကဒိးန့ၢ်အါထီၣ် တၢ်သးကညီၤ ဒိၣ်ဒိၣ်မုၢ်မုၢ်အဂီၢ်ဧါ. ၂ လ့ၤတက့ၤ တမ့ၢ်ဒ်န့ၣ်ဘၣ်. ပထူၣ်ဖျဲးထီၣ်လၢ တၢ်ဒဲးဘးအပူၤ* အဃိ+ ပဆဲးအိၣ်မူလၢ တၢ်ဒဲးဘးအပူၤ ကသ့ဒ်လဲၣ်.+ ၃ မ့ၢ်သုတသ့ၣ်ညါဘၣ်ဧါ, ပဝဲခဲလၢာ်လၢ အဒိးဘျၢအသးလၢ ယ့ၣ်ၡူးခရံာ်အပူၤန့ၣ်+ ပဒိးဘျၢပသးလၢ အတၢ်သံအပူၤ စ့ၢ်ကီးလီၤ.+ ၄ ခီဖျိလၢ ပဒိးဘျၢပသးလၢ အတၢ်သံအပူၤအဃိ ပဘၣ်တၢ်ခူၣ်လီၤပှၤ ဃုာ်ဒီးအီၤလီၤ.+ ဒီးဒ်ခရံာ်ဘၣ် တၢ်ဒုးဂဲၤဆၢထၢၣ် သမူထီၣ်က့ၤအီၤလၢ တၢ်သံခီဖျိ ပၢ်အတၢ်စိတၢ်ကမီၤ လၢအပှဲၤဒီး တၢ်လၤကပီၤ အဃိအသိးန့ၣ် ပဝဲစ့ၢ်ကီး ခဲအံၤပအိၣ်မူ တၢ်အိၣ်မူလၢ အသီလံ.+ ၅ ပကဲထီၣ် တၢ်တမံၤဃီဒီးအီၤ ခီဖျိလၢ ပသံတ့ၢ်ဒ် အဝဲသံတ့ၢ်ဝဲအသိး အဃိလီၤ.+ လၢတၢ်န့ၣ်အဃိ ပကကဲထီၣ်စ့ၢ်ကီး တၢ်တမံၤဃီဒီးအီၤ ခီဖျိလၢ ပကဘၣ် တၢ်မၤသမူထီၣ်က့ၤပှၤ ဒ်အဝဲသမူထီၣ်က့ၤ အသိးလီၤ.+ ၆ ပသ့ၣ်ညါလၢ ပလုၢ်လၢ် သကဲာ်ပဝးလၢ အပူၤကွံာ်န့ၣ် ဘၣ်တၢ်ပျၤထီအီၤ ဃုာ်ဒီးယ့ၣ်ၡူး လၢသ့ၣ်တၢၣ်အလိၤ+ ဒ်သိးပနီၢ်ခိ လၢအပှဲၤဒီးတၢ်ဒဲးဘးန့ၣ် အသုတဒိၣ်စိလၢ ပဖီခိၣ်တဂ့ၤအဂီၢ်လီၤ.+ အဃိ ပတကြၢးဆဲးကဲ တၢ်ဒဲးဘး အကုၢ်တဖၣ်လၢၤဘၣ်,+ ၇ မ့ၢ်လၢ ပှၤလၢအသံန့ၣ် ဘၣ်တၢ်မၤ ထူၣ်ဖျဲးထီၣ်ကွံာ်အီၤလၢ အတၢ်ဒဲးဘး အဃိလီၤ.

၈ တကးဒံးဘၣ် ပမ့ၢ်သံဃုာ်တ့ၢ်ဒီး ခရံာ်န့ၣ် ပနာ်လၢ ပကမူဃုာ်ဒီးအီၤ စ့ၢ်ကီးလီၤ. ၉ ပသ့ၣ်ညါလၢ ခရံာ်န့ၣ် ဘၣ်တၢ်ဒုးဂဲၤဆၢထၢၣ်အီၤလၢ တၢ်သံလံ.+ အဃိ အတသံ နီတဘျီလၢၤဘၣ်.+ ဒီးတၢ်သံ ဒိၣ်စိ* လၢအဖီခိၣ်တန့ၢ်လၢၤဘၣ်. ၁၀ ဘၣ်ဃးဒီး အတၢ်သံန့ၣ် ဒ်သိး အကမၤလီၤမၢ် တၢ်ဒဲးဘးအဂီၢ် အဝဲသံဝဲ ထဲတဘျီ ဒီးလၢခံ အဝဲတသံ နီတဘျီလၢၤဘၣ်.+ ဒီးဘၣ်ဃးဒီး အတၢ်အိၣ်မူလၢ အအိၣ်မူဝဲခဲအံၤန့ၣ် အဝဲအိၣ်မူဝဲလၢ ကစၢ်ယွၤ အဂီၢ်လီၤ. ၁၁ ဒ်န့ၣ်အသိး ဘၣ်ဃးဒီး တၢ်ဒဲးဘးန့ၣ် သုကဘၣ် ထံၣ်လီၤသုသးလၢ သုသံတ့ၢ်လံ ဒီးခဲအံၤ သုမူလၢ ကစၢ်ယွၤအဂီၢ် ခီဖျိလၢ ယ့ၣ်ၡူးခရံာ်လီၤ.+

၁၂ အဃိ တဘၣ်ပျဲတၢ်ဒဲးဘး ပၢသုတၢ်အိၣ်မူ* တဂ့ၤ. တဘၣ်မၤထွဲသုနီၢ်ခိ လၢအသံသ့အံၤ+ အတၢ်သူၣ်လီသးကွံ န့ၣ်တဂ့ၤ. ၁၃ ဒီးတဘၣ်ဟ့ၣ်လီၤကွံာ် သုနီၢ်ခိလၢ တၢ်ဒဲးဘးအပူၤ ဒ်သိး သုကမၤတၢ်အၢအဂီၢ်တဂ့ၤ. လၢတၢ်န့ၣ်အလီၢ် ဟ့ၣ်လီၤသုနီၢ်ကစၢ်လၢ ကစၢ်ယွၤအစုပူၤ ဒ်ပှၤလၢ အသမူထီၣ်က့ၤလၢ တၢ်သံအသိးတက့ၢ်. ဒီးဟ့ၣ်လီၤ သုနီၢ်ခိလၢ ကစၢ်ယွၤအစုပူၤ ဒ်သိး သုကမၤတၢ်လၢအဂ့ၤ အဂီၢ်တက့ၢ်.+ ၁၄ ဒီးသုတအိၣ်လၢ တၢ်သိၣ်တၢ်သီ အဖီလာ်ဘၣ်.+ သုအိၣ်လၢ တၢ်သးကညီၤ ဒိၣ်ဒိၣ်မုၢ်မုၢ်အဖီလာ်လီၤ.+ အဃိ တၢ်ဒဲးဘး တဘၣ်ကဲကစၢ်လၢ သုဖီခိၣ်ဘၣ်.

၁၅ မ့မ့ၢ်ဒ်န့ၣ်န့ၣ် မ့ၢ်လၢ ပတအိၣ်လၢ တၢ်သိၣ်တၢ်သီ အဖီလာ်ဘၣ် ဒီးပအိၣ်လၢ တၢ်သးကညီၤ ဒိၣ်ဒိၣ်မုၢ်မုၢ် အဖီလာ်အဃိ+ မ့ၢ်ပကြၢး မၤတၢ်ဒဲးဘး တမံၤမံၤဧါ. လ့ၤတက့ၤ တမ့ၢ်ဘၣ်. ၁၆ သုမ့ၢ်ဟ့ၣ်လီၤ သုသးလၢ ပှၤတဂၤအအိၣ် ဒ်ကုၢ်လၢ အကဒိကနၣ်တၢ်အသိးန့ၣ် သုကဲပှၤလၢ သုဒိကနၣ်အီၤတဂၤအံၤ အကုၢ်န့ၣ် သုတသ့ၣ်ညါဧီၤ.+ အဃိ သုကဲတၢ်ဒဲးဘးအကုၢ်+ လၢကဆှၢသုဆူ တၢ်သံ+ မ့တမ့ၢ် တၢ်ဒိကနၣ်အကုၢ် လၢအကဆှၢသုဆူ တၢ်တီတၢ်လိၤလီၤ. ၁၇ သုဝဲသ့ၣ်အံၤ လၢညါ သုမ့ၢ်တၢ်ဒဲးဘးအကုၢ် ဘၣ်ဆၣ် တၢ်သိၣ်လိ တကလုာ်လၢ သုဒိးန့ၢ်ဘၣ်အီၤန့ၣ် သုဒိကနၣ်အီၤလၢ သုသူၣ်ကံၢ်သးလဲအဃိ ပစံးဘျုး ကစၢ်ယွၤလီၤ. ၁၈ ဒီးမ့ၢ်လၢ တၢ်မၤထူၣ်ဖျဲးထီၣ်သုလၢ တၢ်ဒဲးဘးအဃိ+ သုကဲထီၣ် တၢ်တီတၢ်လိၤအကုၢ်လီၤ.+ ၁၉ ခီဖျိလၢ သုတမ့ၢ်ပှၤလၢပှၤပှဲၤဘၣ်* အဃိ ယသူပှၤဟီၣ်ခိၣ်ဖိ အတၢ်ကတိၤ မုၢ်ဆ့ၣ်မုၢ်ဂီၤတဖၣ်လီၤ. လၢညါသုပျဲလၢ သုနီၢ်ခိ အတၢ်သူၣ်လီသးကွံ ဒုးကဲကုၢ်သု ဒ်သိးသုကမၤတၢ်လၢ အတကဆှီဘၣ် ဒီးတၢ်အၢတၢ်သီလီၤ. ခဲအံၤ သုကြၢးပျဲလၢ သုတၢ်သူၣ်လီသးကွံ ကဒုးကဲထီၣ်သုလၢ တၢ်တီတၢ်လိၤ ဒီးတၢ်စီဆှံ အကုၢ်လီၤ.+ ၂၀ ဖဲသုမ့ၢ်တ့ၢ် တၢ်ဒဲးဘးအကုၢ်အခါ သုတလိၣ်မၤတၢ်လၢ အတီအလိၤဘၣ်.

၂၁ ဖဲန့ၣ်အဆၢကတီၢ် သုမၤတ့ၢ် တၢ်မနုၤသ့ၣ်တဖၣ်လဲၣ်. ခဲအံၤန့ၣ် မ့ၢ်တၢ်လၢ အကဲထီၣ် တၢ်မဲာ်ဆှး လၢသုဂီၢ်လီၤ. တၢ်သ့ၣ်တဖၣ်အံၤ အကတၢၢ်န့ၣ် မ့ၢ်တၢ်သံလီၤ.+ ၂၂ ဘၣ်ဆၣ် ခဲအံၤန့ၣ် တၢ်မၤထူၣ်ဖျဲးထီၣ် သုလၢတၢ်ဒဲးဘး ဒီးသုကဲထီၣ် ကစၢ်ယွၤ အကုၢ်လံအဃိ သုမၤတၢ်လၢ အစီဆှံတဖၣ်+ ဒီးအကတၢၢ်န့ၣ် မ့ၢ်တၢ်မူအထူအယိာ်လီၤ.+ ၂၃ တၢ်အဘူးအလဲလၢ တၢ်ဒဲးဘးဟ့ၣ်လီၤဝဲန့ၣ် မ့ၢ်တၢ်သံလီၤ.+ မ့မ့ၢ် တၢ်ဟ့ၣ်လၢ ကစၢ်ယွၤ ဟ့ၣ်လီၤဝဲန့ၣ် မ့ၢ်တၢ်မူအထူအယိာ်+ ခီဖျိလၢ ပကစၢ်ယ့ၣ်ၡူးခရံာ်လီၤ.+