ရိမ့ၤ
၆ မ့မ့ၢ်ဒ်န့ၣ်န့ၣ် ပကတဲဒ်လဲၣ်. မ့ၢ်ပကြၢးဆဲးမၤ တၢ်ဒဲးဘး ဒ်သိးတၢ်သးကညီၤ ဒိၣ်ဒိၣ်မုၢ်မုၢ် ကအါထီၣ်အဂီၢ်ဧါ. ၂ လ့ၤတက့ၤ တမ့ၢ်ဒ်န့ၣ်ဘၣ်. ပတၢ်အိၣ်မူလၢ အဘၣ်ဃးဒီး တၢ်ဒဲးဘးန့ၣ် သံကွံာ်လံ. အဃိ ပဆဲးအိၣ်မူလၢ တၢ်ဒဲးဘးအပူၤ ကသ့ဒ်လဲၣ်. ၃ မ့ၢ်သုတသ့ၣ်ညါဘၣ်ဧါ, ပဝဲခဲလၢာ်လၢ အဒိးဘျၢအသးလၢ ယ့ၣ်ၡူးခရံာ်အပူၤန့ၣ် ပဒိးဘျၢပသးလၢ အတၢ်သံအပူၤ စ့ၢ်ကီးလီၤ. ၄ ခီဖျိလၢ ပဒိးဘျၢပသးလၢ အတၢ်သံအပူၤအဃိ ပဘၣ်တၢ်ခူၣ်လီၤပှၤ ဃုာ်ဒီးအီၤလီၤ. ဒီးဒ်ခရံာ်ဘၣ် တၢ်ဒုးဂဲၤဆၢထၢၣ် သမူထီၣ်က့ၤအီၤလၢ တၢ်သံခီဖျိ ပၢ်အတၢ်စိတၢ်ကမီၤ လၢအပှဲၤဒီး တၢ်လၤကပီၤ အဃိအသိးန့ၣ် ပဝဲစ့ၢ်ကီး ပလဲၤတၢ်လၢ တၢ်အိၣ်မူအသီလီၤ. ၅ ပကဲထီၣ် တၢ်တမံၤဃီဒီးအီၤ ခီဖျိလၢ ပသံတ့ၢ်ဒ် အဝဲသံတ့ၢ်ဝဲအသိး အဃိလီၤ. လၢတၢ်န့ၣ်အဃိ ပကကဲထီၣ်စ့ၢ်ကီး တၢ်တမံၤဃီဒီးအီၤ ခီဖျိလၢ ပကဘၣ် တၢ်မၤသမူထီၣ်က့ၤပှၤ လီၤဂာ်ဒ် အတၢ်သမူထီၣ်က့ၤ အသိးန့ၣ်လီၤ. ၆ ပသ့ၣ်ညါလၢ ပလုၢ်လၢ် သကဲာ်ပဝးလၢ အပူၤကွံာ်န့ၣ် ဘၣ်တၢ်ပျၤထီအီၤ ဃုာ်ဒီးယ့ၣ်ၡူး လၢသ့ၣ်တၢၣ်အလိၤ ဒ်သိးပနီၢ်ခိ လၢအပှဲၤဒီးတၢ်ဒဲးဘးန့ၣ် အသုတဒိၣ်စိလၢ ပဖီခိၣ်တဂ့ၤအဂီၢ်လီၤ. အဃိ ပတကြၢးဆဲးကဲ တၢ်ဒဲးဘး အကုၢ်တဖၣ်လၢၤဘၣ်, ၇ မ့ၢ်လၢ ပှၤလၢအသံန့ၣ် ဘၣ်တၢ်မၤ ထူၣ်ဖျဲးထီၣ်ကွံာ်အီၤလၢ အတၢ်ဒဲးဘး အဃိလီၤ.
၈ တကးဒံးဘၣ် ပမ့ၢ်သံဃုာ်တ့ၢ်ဒီး ခရံာ်န့ၣ် ပနာ်လၢ ပကမူဃုာ်ဒီးအီၤ စ့ၢ်ကီးလီၤ. ၉ ပသ့ၣ်ညါလၢ ခရံာ်န့ၣ် ဘၣ်တၢ်ဒုးဂဲၤဆၢထၢၣ်အီၤလၢ တၢ်သံလံ, အဃိ အတသံ နီတဘျီလၢၤဘၣ်. ဒီးတၢ်သံ ကဲကစၢ်လၢ အဖီခိၣ်တန့ၢ်လၢၤဘၣ်. ၁၀ ဘၣ်ဃးဒီး အတၢ်သံန့ၣ် ဒ်သိး အကမၤလီၤမၢ် တၢ်ဒဲးဘးအဂီၢ် အဝဲသံဝဲ ထဲတဘျီ ဒီးအဝဲတသံ နီတဘျီလၢၤဘၣ်. ဒီးဘၣ်ဃး ဒီးအတၢ်အိၣ်မူလၢ အအိၣ်မူဝဲခဲအံၤန့ၣ် အဝဲအိၣ်မူဝဲလၢ ကစၢ်ယွၤ အဂီၢ်လီၤ. ၁၁ ဒ်န့ၣ်အသိး သုဝဲသ့ၣ်အံၤ, ဘၣ်ဃးဒီး တၢ်ဒဲးဘးန့ၣ် သုကဘၣ် ထံၣ်လီၤသုသးဒ် သုသံလံအသိး ဒီးခဲအံၤ သုမူလၢ ကစၢ်ယွၤအဂီၢ် ခီဖျိလၢ ယ့ၣ်ၡူးခရံာ်လီၤ.
၁၂ အဃိ လၢသုနီၢ်ခိ လၢအသံသ့အပူၤန့ၣ် တဘၣ်ပျဲတၢ်ဒဲးဘး ဆဲးပၢတၢ်ဒ် စီၤပၤအသိး ဒ်သိး သုကဒိကနၣ် သုနီၢ်ခိ အတၢ်သူၣ်လီၤသးကွံ န့ၣ်တဂ့ၤ. ၁၃ ဒီးတဘၣ်ဟ့ၣ်လီၤကွံာ် သုနီၢ်ခိလၢ တၢ်ဒဲးဘးအပူၤ ဒ်သိး ကမၤတၢ်အၢအဂီၢ်တဂ့ၤ. လၢတၢ်န့ၣ်အလီၢ် ဟ့ၣ်လီၤသုနီၢ်ကစၢ်လၢ ယွၤအစုပူၤ ဒ်ပှၤလၢ အသမူထီၣ်က့ၤလၢ တၢ်သံအသိးတက့ၢ်. ဒီးဟ့ၣ်လီၤ သုနီၢ်ခိလၢ ကစၢ်ယွၤအစုပူၤ ဒ်သိး ကမၤတၢ်လၢအဂ့ၤ အဂီၢ်တက့ၢ်. ၁၄ ဒီးသုတအိၣ်လၢ တၢ်သိၣ်တၢ်သီ အဖီလာ်ဘၣ်, သုအိၣ်လၢ တၢ်သးကညီၤ ဒိၣ်ဒိၣ်မုၢ်မုၢ်အဖီလာ်လီၤ. အဃိ တၢ်ဒဲးဘး တဘၣ်ကဲကစၢ်လၢ သုဖီခိၣ်ဘၣ်.
၁၅ မ့မ့ၢ်ဒ်န့ၣ်န့ၣ် မ့ၢ်လၢ ပတအိၣ်လၢ တၢ်သိၣ်တၢ်သီ အဖီလာ်ဘၣ် ဒီးပအိၣ်လၢ တၢ်သးကညီၤ ဒိၣ်ဒိၣ်မုၢ်မုၢ် အဖီလာ်အဃိ မ့ၢ်ပကြၢး မၤတၢ်ဒဲးဘး တမံၤမံၤဧါ. လ့ၤတက့ၤ တမ့ၢ်ဘၣ်. ၁၆ သုမ့ၢ်ဟ့ၣ်လီၤ သုသးလၢ ပှၤတဂၤအအိၣ် ဒ်ကုၢ်တဖၣ် လၢအအိၣ်ဒီး တၢ်ဒိကနၣ်အသိးန့ၣ် မ့ၢ်သုတသ့ၣ်ညါလၢ သုကဲပှၤလၢ သုဒိကနၣ်အီၤတဂၤအံၤ အကုၢ်ဘၣ်ဧါ. အဃိ သုကဲတၢ်ဒဲးဘးအကုၢ် လၢကဆှၢသုဆူ တၢ်သံ မ့တမ့ၢ် တၢ်ဒိကနၣ်အကုၢ် လၢအကဆှၢသုဆူ တၢ်တီတၢ်လိၤန့ၣ်လီၤ. ၁၇ သုဝဲသ့ၣ်အံၤ လၢညါ သုမ့ၢ်တၢ်ဒဲးဘးအကုၢ် ဘၣ်ဆၣ် တၢ်သိၣ်လိ တကလုာ်လၢ သုဒိးန့ၢ်ဘၣ်အီၤန့ၣ် သုဒိကနၣ်အီၤလၢ သုသူၣ်ကံၢ်သးလဲအဃိ ပစံးဘျုး ကစၢ်ယွၤလီၤ. ၁၈ ဒီးမ့ၢ်လၢ တၢ်မၤထူၣ်ဖျဲးထီၣ်သုလၢ တၢ်ဒဲးဘးအဃိ သုကဲထီၣ် တၢ်တီတၢ်လိၤအကုၢ်လီၤ. ၁၉ ခီဖျိလၢ သုတၢ်တလၢတပှဲၤ* အဃိ ယသူပှၤဟီၣ်ခိၣ်ဖိ အတၢ်ကတိၤ မုၢ်ဆ့ၣ်မုၢ်ဂီၤတဖၣ်လီၤ. လၢညါ သုဟ့ၣ်လီၤသုနီၢ်ခိ ဒ်တၢ်လၢ အတကဆှီဒီး တၢ်အၢတၢ်သီ အကုၢ်လၢ သုကမၤ တၢ်အၢတၢ်သီ အဂီၢ်လီၤ. ခဲအံၤ ဟ့ၣ်လီၤသုနီၢ်ခိဒ် တၢ်တီတၢ်လိၤ အကုၢ်လၢ သုကမၤတၢ်လၢ အစီဆှံအဂီၢ်တက့ၢ်. ၂၀ ဖဲသုမ့ၢ်တ့ၢ် တၢ်ဒဲးဘးအကုၢ်အခါ တၢ်တီတၢ်လိၤ တကဲသုကစၢ်ဘၣ်.
၂၁ ဖဲန့ၣ်အဆၢကတီၢ် သုမၤတ့ၢ် တၢ်မနုၤသ့ၣ်တဖၣ်လဲၣ်. ခဲအံၤန့ၣ် မ့ၢ်တၢ်လၢ အကဲထီၣ် တၢ်မဲာ်ဆှး လၢသုဂီၢ်လီၤ. တၢ်သ့ၣ်တဖၣ်အံၤ အကတၢၢ်န့ၣ် မ့ၢ်တၢ်သံလီၤ. ၂၂ ဘၣ်ဆၣ် ခဲအံၤန့ၣ် တၢ်မၤထူၣ်ဖျဲးထီၣ် သုလၢတၢ်ဒဲးဘး ဒီးသုကဲထီၣ် ကစၢ်ယွၤ အကုၢ်လံအဃိ သုမၤတၢ်လၢ အစီဆှံတဖၣ် ဒီးအကတၢၢ်န့ၣ် မ့ၢ်တၢ်မူအထူအယိာ်လီၤ. ၂၃ တၢ်အဘူးအလဲလၢ တၢ်ဒဲးဘးဟ့ၣ်လီၤဝဲန့ၣ် မ့ၢ်တၢ်သံလီၤ. မ့မ့ၢ် တၢ်ဟ့ၣ်လၢ ကစၢ်ယွၤ ဟ့ၣ်လီၤဝဲန့ၣ် မ့ၢ်တၢ်မူအထူအယိာ် ခီဖျိလၢ ပကစၢ်ယ့ၣ်ၡူးခရံာ်န့ၣ်လီၤ.