မၢ်ကူး

၆ ယ့ၣ်ၡူး ဟးထီၣ်ကွံာ်ဝဲဖဲန့ၣ်​ ဒီးက့ၤဝဲလၢ အနီၢ်ကစၢ် အဟီၣ်ကဝီၤ+ ဒီးအပျဲၢ်အဘီၣ်တဖၣ်​ လဲၤပိာ်အခံလီၤ. ၂ ဖဲမုၢ်အိၣ်ဘှံးနံၤ ဘၣ်ဝဲအခါ အဝဲသိၣ်လိတၢ်လၢ ဘူၣ်ဘျီၣ်ပူၤ ဒီးပှၤဒိကနၣ်တၢ်ဖဲန့ၣ်​ အါတက့ၢ်န့ၣ်​ ကမၢကမၣ်ဝဲအဃိ တဲဝဲလၢ “ပှၤတဂၤအံၤ လဲၤမၤလိန့ၢ်ဝဲ တၢ်ဂ့ၢ်တဖၣ်အံၤဖဲလဲၣ်.+ ဒီးအလဲၤဒိးန့ၢ်ဘၣ်​ တၢ်ကူၣ်သ့လၢ မတဂၤအအိၣ်လဲၣ်​ ဒီးအမၤတၢ်လီၤလးတဖၣ်အံၤ သ့ဒ်လဲၣ်.+ ၃ ပှၤတဂၤအံၤ မ့ၢ်ဝဲပှၤစုသ့ဖိ+ ဒီးအမ့ၢ် နီၢ်မၤရံအဖိခွါ+ ဒီးမ့ၢ်ဝဲ စီၤယၤကိာ်,+ စီၤယိၤသး, စီၤယူဒၤ ဒီးစီၤၡံမိၣ်+ အဒီပုၢ်ဝဲၢ်ခွါ တမ့ၢ်ဧီၤ. အဒီပုၢ်ဝဲၢ်မုၣ်တဖၣ်​ အိၣ်ဖဲအံၤဒီးပှၤ တမ့ၢ်ဧီၤ.” အဃိ အဝဲသ့ၣ်တနာ်* အီၤဘၣ်. ၄ ဘၣ်ဆၣ်​ ယ့ၣ်ၡူးတဲဘၣ်​ အဝဲသ့ၣ်လၢ “တၢ်လၢဝံန့ၣ်​ ပှၤပာ်ဒိၣ်အီၤလၢ တၢ်လီၢ်ကိးပူၤဒဲးလီၤ. မ့မ့ၢ် လၢအနီၢ်ကစၢ် အဟီၣ်ကဝီၤအပူၤ ဒီးလၢ အဘူးအတံၢ်အကျါ ဒီးအနီၢ်ကစၢ် အဟံၣ်ဖိဃီဖိအကျါန့ၣ်​ ပှၤတပာ်ဒိၣ်အီၤဘၣ်.”+ ၅ အဃိ အဝဲပာ်ထီၣ်အစု ထဲဒၣ်လၢ ပှၤဆိးက့ စှၤကိာ်ဂၤအလိၤ ဒီးမၤဘျါက့ၤ အဝဲသ့ၣ်လီၤ. မ့မ့ၢ် တၢ်လီၤလးအဂၤန့ၣ်​ အဝဲတမၤဝဲဖဲန့ၣ်​ နီတမံၤဘၣ်. ၆ ဒီးမ့ၢ်လၢအဝဲသ့ၣ်​ အတၢ်နာ် တအိၣ်ဘၣ်အဃိ ယ့ၣ်ၡူး ကမၢကမၣ်ဝဲလီၤ. ဒီးယ့ၣ်ၡူး ဟးဝ့ၤဝီၤလၢ သဝီတဖျၢၣ်ဝံၤ တဖျၢၣ်ဝးဝး ဒီးသိၣ်လိတၢ်လီၤ.+

၇ ဒီးယ့ၣ်ၡူးကိးန့ၢ်ဝဲ အတၢ်မၢဖိတဆံခံဂၤ ဒီးမၢအဝဲသ့ၣ်လဲၤတၢ် ခံဂၤခံဂၤ+ ဒီးဟ့ၣ်လီၤအဝဲသ့ၣ်​ တၢ်စိတၢ်ကမီၤ လၢတၢ်ဝံတၢ်နါတဖၣ်​ အဖီခိၣ်လီၤ.+ ၈ ယ့ၣ်ၡူး မၤလိာ်အဝဲသ့ၣ်လၢ အဝဲသ့ၣ်​ တဘၣ်လဲၤစိာ်ကိၣ်, ထၢၣ်လၢ တၢ်အီၣ်တၢ်အီအဂီၢ်, စ့လၢစ့ထၢၣ်ပူၤ+ မ့တမ့ၢ် တၢ်အဂၤလၢ တၢ်လဲၤတၢ်က့ၤအဂီၢ် နီတမံၤဘၣ်, အဝဲသ့ၣ်​ ကဘၣ်လဲၤစိာ်ဝဲထဲဒၣ်​ နီၣ်ထိးဘိလီၤ. ၉ တကးဒံးဘၣ်​ ကဘၣ်လဲၤဒိးထဲ ခီၣ်ဖံးတခိၣ်​ ဒီးတဘၣ်​ လဲၤသိးဆ့ကၤ ခံဘ့ၣ်ဘၣ်.* ၁၀ ဒီးယ့ၣ်ၡူးတဲစ့ၢ်ကီး အဝဲသ့ၣ်လၢ “သုမ့ၢ်လဲၤနုာ်လၢ ဟံၣ်တဖျၢၣ်အပူၤန့ၣ်​ အိၣ်ဖဲန့ၣ်တုၤ သုဟးထီၣ်ကွံာ်လၢ တၢ်လီၢ်ဖဲန့ၣ်တက့ၢ်.+ ၁၁ တၢ်လီၢ်လၢ ပှၤမ့ၢ်တတူၢ်လိာ်သု မ့တမ့ၢ် တဒိကနၣ်သုဘၣ်န့ၣ်​ ဖဲသုဟးထီၣ်ကွံာ် ဖဲန့ၣ်အခါ တရုၤလီၤက့ၤ ဟီၣ်ခိၣ်ကမူၣ်လၢ သုခီၣ်လိၤဒ် တၢ်ဟ့ၣ်ပလီၢ်လၢ အဝဲသ့ၣ်အဂီၢ်တက့ၢ်.”+ ၁၂ အဃိ အဝဲသ့ၣ်လဲၤတၢ် ဒီးစံၣ်တဲၤတဲလီၤဝဲလၢ ပှၤကဘၣ်ပီၢ်ယၢ်လီၤက့ၤသးလီၤ.+ ၁၃ အဝဲသ့ၣ်​ နီဟးထီၣ်ဝဲ တၢ်ဝံတၢ်နါအါမး+ ဒီးဖှူပှၤဆိးက့အါဂၤလၢသိ ဒီးမၤဘျါက့ၤ အဝဲသ့ၣ်လီၤ.

၁၄ ယ့ၣ်ၡူး အမံၤ ဟူထီၣ်သါလီၤဝဲဒီး ပှၤတဲဝဲလၢ “ပှၤဘျၢတၢ် စီၤယိၤဟၣ်​ ဂဲၤဆၢထၢၣ်​ သမူထီၣ်က့ၤလၢ တၢ်သံအဃိ အဝဲမၤ တၢ်လီၤလးတဖၣ်အံၤလီၤ.”+ အဃိ စီၤပၤဟ့ၤရိာ်စ့ၢ်ကီး နၢ်ဟူဘၣ်ဝဲလီၤ. ၁၅ ဘၣ်ဆၣ်​ ပှၤဂၤတဖၣ်တဲဝဲလၢ “အဝဲမ့ၢ် စီၤအ့ၤလံယၤလီၤ.” မ့မ့ၢ်လၢ အဂၤတနီၤန့ၣ်​ တဲဝဲလၢ “အဝဲမ့ၢ်ဝံ ဒ်ဝံလၢညါတဖၣ်​ အသိးလီၤ.”+ ၁၆ ဘၣ်ဆၣ်​ ဖဲစီၤဟ့ၤရိာ် နၢ်ဟူဝဲအခါ အဝဲတဲဝဲလၢ “စီၤယိၤဟၣ်လၢ ယဒီၣ်တဲာ်အကိာ်တဂၤန့ၣ်​ ဂဲၤဆၢထၢၣ်က့ၤလံ.” ၁၇ လၢညါန့ၣ်​ စီၤဟ့ၤရိာ်ဖျီသးဒီး အဒီပုၢ်ဝဲၢ်ခွါ စီၤဖံလံးပူးအမါ နီၢ်ဟ့ၤရိၤဒံလီၤ.+ ဒီးမ့ၢ်လၢ နီၢ်ဟ့ၤရိၤဒံအဃိ စီၤဟ့ၤရိာ် မၢပှၤလဲၤဖီၣ်​ စီၤယိၤဟၣ်​ ဒီးစၢဃာ်အီၤ ဒီးထၢနုာ်အီၤလၢ ဃိာ်ပူၤလီၤ. ၁၈ လၢညါ စီၤယိၤဟၣ်တဲ စီၤဟ့ၤရိာ် တဘျုးဘျီလၢ “နဟံးန့ၢ် နဒီပုၢ်ဝဲၢ်ခွါအမါန့ၣ်​ တဘၣ်​ တၢ်သိၣ်တၢ်သီဘၣ်.”+ ၁၉ အဃိ နီၢ်ဟ့ၤရိၤဒံ သးဆါအီၤ ဒီးအဲၣ်ဒိးမၤသံအီၤ ဘၣ်ဆၣ်​ အမၤဝဲတသ့ဘၣ်, ၂၀ မ့ၢ်လၢ စီၤဟ့ၤရိာ် ပျံၤဘၣ်ဝဲ စီၤယိၤဟၣ်​ ဒီးသ့ၣ်ညါဝဲလၢအမ့ၢ် ပှၤတီပှၤလိၤ ဒီးပှၤလၢ အစီဆှံတဂၤ+ ဒီးဒီသဒၢအီၤအဃိလီၤ. ဒီးစီၤဟ့ၤရိာ် ဒိကနၣ်ဝဲ တၢ်လၢ စီၤယိၤဟၣ်တဲဝဲတဖၣ်​ မုာ်မးအဃိ ဖဲအဒိကနၣ်​ စီၤယိၤဟၣ်တဲတၢ် တဘျီဂ့ၤတဘျီဂ့ၤအခါ အကဘၣ်မၤအီၤဒ်လဲၣ်န့ၣ်​ အတယာ်ဝဲ တဘၣ်ဘၣ်.

၂၁ ဘၣ်ဆၣ်​ ဖဲစီၤဟ့ၤရိာ် အိၣ်ဖျဲၣ်ဆၢက့ၤ အမုၢ်နံၤဘၣ်အခါ+ တၢ်ခွဲးတၢ်ယာ် အိၣ်ထီၣ်လၢ နီၢ်ဟ့ၤရိၤဒံအဂီၢ်လီၤ. ဖဲန့ၣ်​ စီၤဟ့ၤရိာ် အီၣ်သကိးအီသကိးဝဲ ဟါတၢ်အီၣ်ဒီးပဒိၣ်တဖၣ်, သုးခိၣ်တဖၣ်​ ဒီးပှၤလၢ အမံၤဒိၣ်ကတၢၢ်တဖၣ်လၢ ကၤလံၤလါ အပူၤလီၤ.+ ၂၂ ဒီးနီၢ်ဟ့ၤရိၤဒံ အဖိမုၣ်ဟဲနုာ်လီၤ ဒီးဂဲၤကလံၣ်ဝဲလီၤ. စီၤဟ့ၤရိာ် ဒီးပှၤလၢ အီၣ်သကိးတၢ်ဒီးအီၤတဖၣ်​ ဘၣ်သူၣ်ဘၣ်သးဝဲလီၤ. အဃိ စီၤပၤဟ့ၤရိာ်တဲဘၣ်​ ပိာ်မုၣ်တဂၤန့ၣ်လၢ “ဃ့ယၤတၢ်လၢ နလီကီ ဒီးယကဟ့ၣ်လီၤနၤလီၤ.” ၂၃ ဒီးစီၤပၤ အၢၣ်လီၤအီၤလၢ “တၢ်လၢနဃ့ယၤ တမံၤဂ့ၤတမံၤဂ့ၤန့ၣ်​ ယကဟ့ၣ်လီၤနၤ တုၤလၢယဘီမုၢ် တဝာ်ဒၣ်လဲာ်လီၤ.” ၂၄ အဃိ အဝဲက့ၤတဲဘၣ်​ အမိၢ်လၢ “ယကြၢးဃ့တၢ်မနုၤလဲၣ်.” အမိၢ်တဲဝဲလၢ “ပှၤဘျၢတၢ် စီၤယိၤဟၣ်အခိၣ်လီၤ.” ၂၅ အဃိ အဝဲကရီလဲၤလၢ စီၤပၤအအိၣ်​ တဘျီဃီ ဒီးဃ့ဝဲလၢ “ယအဲၣ်ဒိးလၢ နကဟ့ၣ်ယၤ ပှၤဘျၢတၢ် စီၤယိၤဟၣ်အခိၣ်လၢ လီခီဖးလဲၢ်အပူၤ ခဲအံၤလီၤ.”+ ၂၆ စီၤပၤအသးအုးဒိၣ်မး ဘၣ်ဆၣ်​ မ့ၢ်လၢအအၢၣ်လီၤ ပိာ်မုၣ်အံၤ လၢပှၤတမှံၤတဖၣ်​ အမဲာ်ညါဝံၤလံအဃိ အဝဲတအဲၣ်ဒိး ဂ့ၢ်လိာ်အီၤဘၣ်. ၂၇ အဃိ စီၤပၤဆှၢလီၤဝဲ ပှၤပၢၤတၢ်ဖိတဂၤ တဘျီဃီ ဒီးမၤလိာ်အီၤလၢ အကဟဲစိာ် စီၤယိၤဟၣ်အခိၣ်လီၤ. ဒီးအဝဲလဲၤဒီၣ်တဲာ်ကွံာ် စီၤယိၤဟၣ်အခိၣ်လၢ ဃိာ်ပူၤလီၤ. ၂၈ ဒီးအဝဲဟဲစိာ် စီၤယိၤဟၣ်​ အခိၣ်လၢ လီခီဖးလဲၢ်အပူၤ ဒီးဟ့ၣ်လီၤဝဲပိာ်မုၣ်တဂၤန့ၣ်​ ဒီးပိာ်မုၣ်န့ၣ်​ ဟ့ၣ်လီၤဝဲအမိၢ်လီၤ. ၂၉ ဖဲစီၤယိၤဟၣ်​ အပျဲၢ်အဘီၣ်တဖၣ်​ နၢ်ဟူဝဲအခါ အဝဲသ့ၣ်ဟဲဟံးန့ၢ်ဝဲ အစိၣ်​ ဒီးလဲၤပာ်လီၤဝဲလၢ တၢ်သွၣ်ခိၣ်လီၤ.

၃၀ တၢ်မၢဖိတဖၣ်​ ဟဲက့ၤလၢ ယ့ၣ်ၡူးအအိၣ်​ ဒီးတဲဘၣ်အီၤ ကယဲၢ်တၢ်လၢ အဝဲသ့ၣ်မၤဝဲ ဒီးသိၣ်လိဝဲတဖၣ်လီၤ.+ ၃၁ ဒီးမ့ၢ်လၢ ပှၤလဲၤလဲၤက့ၤက့ၤဖဲန့ၣ်​ အိၣ်ဝဲဒီဒူၣ်​ ဒီးအဝဲသ့ၣ်အီၣ်တၢ်မး တချုးဘၣ်အဃိ ယ့ၣ်ၡူးတဲဘၣ်​ အဝဲသ့ၣ်လၢ “ပကလဲၤလၢ တၢ်လီၢ်လၢ ပှၤတအိၣ်နီတဂၤဘၣ်အလီၢ် ဒ်သိး သုကအိၣ်ဘှံးအိၣ်သါ တစဲးဖိနီၤ.”+ ၃၂ အဃိ အဝဲသ့ၣ်ဒိးထီၣ်ကဘီ ဒီးလဲၤဝဲလၢ တၢ်လီၢ်လၢ ပှၤတအိၣ်နီတဂၤဘၣ်​ အလီၢ်လီၤ.+ ၃၃ ဘၣ်ဆၣ်​ ဖဲအဝဲသ့ၣ်​ လဲၤတၢ်အခါ ပှၤထံၣ်အဝဲသ့ၣ်အဃိ ပှၤအါဂၤသ့ၣ်ညါဝဲလီၤ. အဃိ ပှၤအိၣ်လၢ ကယဲၢ်ဝ့ၢ်ခဲလၢာ်အပူၤ လဲၤဃ့ၢ်လၢအခီၣ်​ ဒီးလဲၤတုၤဝဲလၢ အဝဲသ့ၣ်အမဲာ်ညါလီၤ. ၃၄ ဖဲယ့ၣ်ၡူးဟးထီၣ်လၢ ကဘီပူၤအခါ အဝဲထံၣ်ဘၣ်ဝဲ ပှၤဂီၢ်မုၢ်ဖးဒိၣ်လီၤ. မ့ၢ်လၢအဝဲသ့ၣ်​ လီၤဂာ်ဒ်သိလၢ ပှၤကွၢ်ထွဲအီၤ တအိၣ်ဘၣ်အဃိ+ ယ့ၣ်ၡူးသးကညီၤဘၣ်​ အဝဲသ့ၣ်လီၤ.+ ဒီးအဝဲသိၣ်လိအဝဲသ့ၣ်​ တၢ်ဂ့ၢ်အါမံၤလီၤ.+

၃၅ ဖဲမုၢ်ဟါလီၤအခါ အပျဲၢ်အဘီၣ်တဖၣ်​ ဟဲတဲအီၤလၢ “တၢ်လီၢ်တခါအံၤ အိၣ်ဖးယံၤညါ ဒီးမုၢ်ဟါလီၤလံ.+ ၃၆ ပျဲက့ၤအဝဲသ့ၣ်​ ဒ်သိး အဝဲသ့ၣ်ကလဲၤလၢ ခိခိၣ်ဒီးသဝီလၢ အဘူးတဖၣ်​ ဒီးကပှ့ၤအီၣ်တၢ်အီၣ်မီၤ.”+ ၃၇ ယ့ၣ်ၡူး တဲဆၢက့ၤအဝဲသ့ၣ်လၢ “သုကဘၣ်ဟ့ၣ်အီၣ်​ အဝဲသ့ၣ်တၢ်အီၣ်လီၤ.” အဝဲသ့ၣ်​ တဲယ့ၣ်ၡူးလၢ “ပကဘၣ်​ လဲၤပှ့ၤန့ၢ် ပှၤဂီၢ်မုၢ် ကိၣ်လၢစ့ ဒန့ၤရံၤ* ၂၀၀ ဒ်သိးကဒုးအီၣ်​ အဝဲသ့ၣ်အဂီၢ်ဧါ.”+ ၃၈ ယ့ၣ်ၡူး တဲဘၣ်အဝဲသ့ၣ်လၢ “သုကိၣ်အိၣ်​ ပှဲၤလိၣ်လဲၣ်. လဲၤကွၢ်နီၤ.” ဖဲအဝဲသ့ၣ်​ လဲၤကွၢ်ဝဲဝံၤအခါ တဲဝဲလၢ “ကိၣ်အိၣ်ယဲၢ်လိၣ်​ ဒီးညၣ်အိၣ်ခံဘ့ၣ်လီၤ.”+ ၃၉ ဒီးအဝဲ မၤလိာ်ဝဲလၢ ပှၤခဲလၢာ် ကဆ့ၣ်နီၤလၢ နီၣ်လါဟ့အဖီခိၣ်​ တကရူၢ်ဘၣ်တကရူၢ်လီၤ.+ ၄၀ အဝဲသ့ၣ်ဆ့ၣ်နီၤဝဲ တကရူၢ်ဘၣ်တကရူၢ် ဒီးတကရူၢ်န့ၣ်ပှၤအိၣ်ဝဲ အဂၤ ၁၀၀ ဒီးတနီၤန့ၣ်​ အဂၤ ၅၀ လီၤ. ၄၁ ဒီးယ့ၣ်ၡူးဟံးန့ၢ် ကိၣ်ယဲၢ်လိၣ်​ ဒီးညၣ်ခံဘ့ၣ်​ ဒီးကွၢ်ထီၣ်တၢ်လၢမူခိၣ်​ ဒီးဃ့တၢ်ဆိၣ်ဂ့ၤလီၤ.+ ဝံၤဒီး အဝဲဘိးကၢ်ဝဲကိၣ်​ ဒီးဟ့ၣ်လီၤဝဲ အပျဲၢ်အဘီၣ်တဖၣ်​ ဒ်သိး ကပာ်လီၤဝဲလၢ ပှၤမဲာ်ညါလီၤ. ဒီးအဝဲနီၤလီၤ ညၣ်ခံဘ့ၣ်လၢ ပှၤခဲလၢာ်အဂီၢ်လီၤ. ၄၂ အဃိ ပှၤခဲလၢာ် အီၣ်ဝဲတုၤအဘျဲလီၤ. ၄၃ ဒီးအဝဲသ့ၣ်​ ထၢဖှိၣ်ဝဲကိၣ်​ အဘျဲၣ်အစဲၢ်န့ၣ်​ ပှဲၤကု ၁၂ ဒုလီၤ. ဒီးညၣ်စ့ၢ်ကီး အိၣ်တ့ၢ်ဒံးဝဲလီၤ.+ ၄၄ ဒီးပိာ်ခွါလၢ အအီၣ်ကိၣ်န့ၣ်​ အိၣ်ဝဲအဂၤ ၅,၀၀၀ လီၤ.

၄၅ ဝံၤဒီး ယ့ၣ်ၡူး မၢအပျဲၢ်အဘီၣ်တဖၣ်​ ဒိးထီၣ်ကဘီတဘျီဃီ ဒ်သိး ကလဲၤဆိလၢ အမဲာ်ညါလၢ ဝၢ်ဘးခီလၢ ဝ့ၢ်ဘ့ၤသစဲဒၤလီၤ. ဒီးအဝဲ ပျဲက့ၤဝဲ ပှၤဂီၢ်မုၢ်တဖၣ်လီၤ.+ ၄၆ ဖဲပှၤဂီၢ်မုၢ်တဖၣ်​ က့ၤဝံၤအလီၢ်ခံ အဝဲလဲၤထီၣ်လၢ ကစၢၢ်ခိၣ်​ ဒ်သိး ကဃ့ထုကဖၣ်တၢ် အဂီၢ်လီၤ.+ ၄၇ ဖဲမုၢ်လီၤနုာ်အဆၢကတီၢ် ကဘီန့ၣ်အိၣ်ဝဲလၢ ပီၣ်လဲၣ်ခၢၣ်သး ဘၣ်ဆၣ်​ မ့မ့ၢ်ယ့ၣ်ၡူးန့ၣ်​ အိၣ်ဝဲလၢ ခိခိၣ်ထဲတဂၤလီၤ.+ ၄၈ ဖဲတၢ်ခိးကွၢ်တၢ်လၢ မုၢ်နၤခီ လွံၢ်တီၤတတီၤ ဃၣ်ဃၣ်န့ၣ်* မ့ၢ်လၢ ကလံၤအူတၢ် ဆူၣ်မးအဃိ အဝဲသ့ၣ်​ ဘၣ်ပၢၤဃာ်ဝဲ ကဘီနးမးလီၤ. ဖဲယ့ၣ်ၡူး ထံၣ်ဝဲဒ်န့ၣ်အခါ အဟးဝဲလၢထံဖံးခိၣ်​ ဒီးလဲၤဝဲလၢ အဝဲသ့ၣ်အအိၣ်​ ဘၣ်ဆၣ်ဖျါလၢ အဝဲကလဲၤတလၢ အဝဲသ့ၣ်လီၤ. ၄၉ ဖဲအပျဲၢ်အဘီၣ်တဖၣ်​ ထံၣ်အဝဲဟးလၢ ပီၣ်လဲၣ်ပူၤအခါ အဝဲသ့ၣ်တဲဝဲလၢ “လၢန့ၣ်​ တၢ်လီၤဆီတခါ.”* ဒီးအဝဲသ့ၣ်​ ကိးပသူထီၣ်ဝဲ, ၅၀ မ့ၢ်လၢ အဝဲသ့ၣ်ခဲလၢာ် ထံၣ်အီၤဒီး သူၣ်ကိၢ်သးဂီၤတၢ် အဃိလီၤ. တဘျီဃီန့ၣ်​ ယ့ၣ်ၡူး တဲအဝဲသ့ၣ်လၢ “ပာ်ဆူၣ်သုသးသၢၤ. မ့ၢ်ဒၣ်ယၤလီၤ, ပျံၤတၢ်တဂ့ၤ.”+ ၅၁ ဖဲယ့ၣ်ၡူး လဲၤထီၣ်လၢကဘီပူၤ လၢအဝဲသ့ၣ်အိၣ်အခါ ကလံၤပတုာ်ဝဲလီၤ. ဖဲန့ၣ်အခါ အဝဲသ့ၣ်​ ကမၢကမၣ်ဝဲဒိၣ်မး, ၅၂ မ့ၢ်လၢ အဝဲသ့ၣ်​ တနၢ်ပၢၢ်ဝဲ တၢ်လီၤလး ဘၣ်ဃးဒီး ကိၣ်တဖၣ်​ အခီပညီဒံးဘၣ်, ဒီးအတၢ်သ့ၣ်ညါစ့ၢ်ကီး တတုၤထီၣ်ထီၣ်ဘးဒံးဘၣ်​ အဃိလီၤ.

၅၃ ဖဲအဝဲသ့ၣ်​ လဲၤတုၤလၢ ဝၢ်ဘးခီတုၤလၢ ကံးန့ၤရ့သးအခါ အဝဲသ့ၣ်ပတုာ်ကဘီဘူးဒီး ထံကၢၢ်နံၤလီၤ.+ ၅၄ ဘၣ်ဆၣ်​ ဖဲအဟးထီၣ်လၢ ကဘီပူၤအခါ ပှၤကွၢ်နီၣ်အီၤဘၣ်​ တဘျီဃီလီၤ. ၅၅ ဒီးပှၤ လဲၤဃ့ၢ်လၢ ပှၤလၢအအိၣ်လၢ ဟီၣ်ကဝီၤဖဲန့ၣ်တဖၣ်​ အအိၣ်ဝးဝးလီၤ. ဖဲအဝဲသ့ၣ်​ နၢ်ဟူဝဲလၢ ယ့ၣ်ၡူးအိၣ်လၢ တၢ်လီၢ်ဖဲန့ၣ်အခါ အဝဲသ့ၣ်ဟဲစိာ်ဝဲ ပှၤလၢအဆိးက့တဖၣ်​ လၢလီၢ်မံပူၤ လၢအအိၣ်လီၤ. ၅၆ ဖဲယ့ၣ်ၡူး လဲၤနုာ်လီၤလၢ ဝ့ၢ်တဖၣ်မ့ၢ်ဂ့ၤ, သဝီတဖၣ်မ့ၢ်ဂ့ၤ, ခိခိၣ်မ့ၢ်ဂ့ၤအခါ ပှၤပာ်လီၤဝဲ ပှၤဆါတဖၣ်လၢ တၢ်ဆါတၢ်ပှ့ၤအလီၢ်လီၤ. ဒီးအဝဲသ့ၣ်​ ဃ့ကညးယ့ၣ်ၡူးဒ်သိး ကထိးဘၣ်ထဲ အဆ့ကၤအနွံလီၤ.+ ဒီးပှၤလၢ အထိးဝဲ အဆ့ကၤအနွံ ကိးဂၤဒဲးန့ၣ်​ ဘျါက့ၤဝဲခဲလၢာ်လီၤ.