၁ ကရံၣ်သူး
၇ ဘၣ်ဃးဒီး တၢ်ဂ့ၢ်လၢ သုကွဲးန့ၢ်ယၤန့ၣ် ပှၤပိာ်ခွါတဂၤ မ့ၢ်တထိးဘူး* ပှၤပိာ်မုၣ်ဘၣ်န့ၣ် ကဂ့ၤဒိၣ်ဝဲလီၤ. ၂ ခီဖျိလၢ တၢ်မၤကမၣ်မုၣ်ကမၣ်ခွါ* အိၣ်သကုၤဆးဒးအဃိ မ်ပိာ်ခွါတဂၤစုာ်စုာ် အိၣ်ဒီးအမါ+ ဒီးပိာ်မုၣ် တဂၤစုာ်စုာ်စ့ၢ်ကီး အိၣ်ဒီး အဝၤတက့ၢ်.+ ၃ မ်ဝၤတဂၤမၤလၢပှဲၤ တၢ်လၢ အမါကြၢးဒိးန့ၢ်ဘၣ်ဝဲ* ဒီးမ်မါတဂၤမၤလၢပှဲၤ တၢ်လၢ အဝၤကြၢးဒိးန့ၢ်ဘၣ်ဝဲ စ့ၢ်ကီးတက့ၢ်.+ ၄ မါန့ၣ်တအိၣ်ဒီး တၢ်စိတၢ်ကမီၤလၢ အနီၢ်ခိဒၣ်ဝဲ အဖီခိၣ်ဘၣ်. အဝၤအိၣ်ဒီး တၢ်စိတၢ်ကမီၤလၢ အဖီခိၣ်လီၤ. ဝၤစ့ၢ်ကီးတအိၣ်ဒီး တၢ်စိတၢ်ကမီၤလၢ အနီၢ်ခိဒၣ်ဝဲ အဖီခိၣ်ဘၣ်. အမါအိၣ်ဒီး တၢ်စိတၢ်ကမီၤလၢ အဖီခိၣ်လီၤ. ၅ တဘၣ်တြီလိာ်သးလၢ သုကမံဃုာ်လိာ်သးအဂီၢ်တဂ့ၤ. ဘၣ်ဆၣ် သုသးမ့ၢ်လီၤပလိာ်လၢ သုကဟးဆှဲးအီၤ လၢတၢ်ဆၢကတီၢ်တတီၤဖိ ဒ်သိးသုကဟ့ၣ် တၢ်ဆၢကတီၢ်လၢ တၢ်ဃ့ထုကဖၣ်အဂီၢ်န့ၣ် သုဟးဆှဲးသ့ဝဲလီၤ. ဘၣ်ဆၣ် သုမၤဒ်အံၤမ့ၢ်ဝံၤန့ၣ် က့ၤမံဃုာ်လိာ်သုသးတက့ၢ်. သုမ့ၢ်တမၤဒ်န့ၣ်ဘၣ်န့ၣ် မုၣ်ကီၤလံၢ်* ကဆဲးလ့ပစီသု မ့ၢ်လၢ သုတၢ်ပၢၤသူၣ်ပၢၤသး တအိၣ်ဘၣ်အဃိလီၤ. ၆ တၢ်လၢ ယတဲတ့ၢ်တဖၣ်န့ၣ် သုမၤသ့ဝဲလီၤ. ဘၣ်ဆၣ် တမ့ၢ်တၢ်သိၣ်တၢ်သီဘၣ်. ၇ ဒီးယမုၢ်လၢ်လၢ ပှၤခဲလၢာ်ကအိၣ် ဒ်သိးဒီးယၤလီၤ. ဘၣ်ဆၣ် ကစၢ်ယွၤဟ့ၣ်လီၤပှၤ တၢ်ဟ့ၣ်တဂၤတမံၤ+ အဃိ ပှၤတနီၤ ဆီဟံၣ်ဆီဃီ ဒီးတနီၤန့ၣ် အိၣ်သဘျ့လီၤ.
၈ ခဲအံၤ ယကတဲပှၤလၢ အတဆီဟံၣ်ဆီဃီဒံးဘၣ်တဖၣ်* ဒီးပှၤမုၣ်ကမဲတဖၣ်လၢ သုမ့ၢ်အိၣ် ဒ်သိးဒီးယၤန့ၣ် ကဂ့ၤဒိၣ်လၢ သုဂီၢ်လီၤ.+ ၉ ဘၣ်ဆၣ် သုပၢၤသုသး မ့ၢ်တန့ၢ်ဘၣ်န့ၣ် မ်သု ဆီဟံၣ်ဆီဃီတက့ၢ်. သုဆီဟံၣ်ဆီဃီန့ၣ် ဂ့ၤဒိၣ်န့ၢ်ဒံး သုအိၣ်ဒီးတၢ်သးကတၢ ဒ်မ့ၣ်အူ အီၣ်တၢ်အသိးလီၤ.+
၁၀ ယကမၤလိာ်ပှၤလၢ အဆီဟံၣ်ဆီဃီတဖၣ်လၢ မါန့ၣ် တကြၢးအိၣ်လီၤဖးဒီး အဝၤဘၣ်.+ အဝဲန့ၣ်မ့ၢ်ဝဲ ကစၢ်အတၢ်ကတိၤ ဒီးတမ့ၢ်ယတၢ်ကတိၤဘၣ်. ၁၁ ဘၣ်ဆၣ် အဝဲမ့ၢ်အိၣ်လီၤဖးန့ၣ် မ်အသုတဆီဟံၣ်ဆီဃီ ဒီးပှၤလၢ အဂၤတဂၤတဂ့ၤ. ဒီးအဝဲမ့ၢ်တအဲၣ်ဒိး အိၣ်တဂၤဘၣ်န့ၣ် မ်အက့ၤ မၤဃူမၤဖိးလိာ်အသးဒီး အဝၤတက့ၢ်. ဒီးဝၤတဂၤန့ၣ် တကြၢးပာ်တ့ၢ် အမါဘၣ်.+
၁၂ မ့မ့ၢ် ပှၤအဂၤတဖၣ်န့ၣ် ယကတဲအဝဲသ့ၣ်ဒ်အံၤ, (ယၤလီၤ တမ့ၢ်ကစၢ်တဲဝဲဘၣ်)+ ဒီပုၢ်ဝဲၢ်တဂၤ မ့ၢ်အိၣ်ဒီးအမါလၢ အတမ့ၢ် ပှၤစူၢ်က့ၤနာ်က့ၤတၢ်ဘၣ် ဒီးမါတဂၤအံၤ အသးမ့ၢ်အိၣ်လၢ အကဆဲးအိၣ်ဒီးအီၤန့ၣ် မ်အသုတပာ်တ့ၢ်ကွံာ် အမါတဂ့ၤ. ၁၃ ဒီးပိာ်မုၣ်လၢ အအိၣ်ဒီးအဝၤ လၢအတမ့ၢ် ပှၤစူၢ်က့ၤနာ်က့ၤတၢ်ဘၣ် ဒီးဝၤတဂၤအံၤ အသးမ့ၢ်အိၣ်လၢ အကဆဲးအိၣ်ဒီးအီၤန့ၣ် မ်အသု တပာ်တ့ၢ်ကွံာ် အဝၤတဂ့ၤ. ၁၄ ဝၤလၢအတမ့ၢ် ပှၤစူၢ်က့ၤနာ်က့ၤတၢ်တဂၤ အတၢ်ဆီဟံၣ်ဆီဃီန့ၣ် ဘၣ်တၢ်ပာ်စီဆှံအီၤလၢ အမါအဃိ မ့မ့ၢ် မါလၢအတမ့ၢ် ပှၤစူၢ်က့ၤနာ်က့ၤတၢ်တဂၤ အတၢ်ဆီဟံၣ်ဆီန့ၣ် ဘၣ်တၢ်ပာ်စီဆှံအီၤလၢ အဝၤအဃိလီၤ. မ့တမ့ၢ်ဒ်န့ၣ်ဘၣ်န့ၣ် သုဖိတကဆှီဘၣ်. ဘၣ်ဆၣ်ခဲအံၤန့ၣ် အဝဲသ့ၣ်စီဆှံဝဲလီၤ. ၁၅ သနာ်က့ ပှၤလၢ အတစူၢ်က့ၤ နာ်က့ၤတၢ်တဂၤ မ့ၢ်ဃုထၢဝဲလၢ အကအိၣ်လီၤဖးန့ၣ် ပျဲအီၤလၢ အကအိၣ်လီၤဖးတက့ၢ်. တၢ်မ့ၢ်ကဲထီၣ်အသး ဒ်န့ၣ်န့ၣ် ဒီပုၢ်ဝဲၢ်ခွါမ့ၢ်ဂ့ၤ, ဒီပုၢ်ဝဲၢ်မုၣ်မ့ၢ်ဂ့ၤ တလိၣ်ဆဲးအိၣ်ဒီးအီၤ တပူၤဃီဘၣ်. ကစၢ်ယွၤဟ့ၣ်လီၤသုလၢ တၢ်မုာ်တၢ်ခုၣ်လံ.+ ၁၆ မါသ့ၣ်ဧၢ, သုမ့ၢ်ဆဲးအိၣ်ဒီး သုဝၤန့ၣ် ဘၣ်သ့ၣ်သ့ၣ် သုကအုၣ်က့ၤခီၣ်က့ၤအီၤ တမ့ၢ်ဘၣ်ဧါ.+ ဒီးဝၤသ့ၣ်ဧၢ, သုမ့ၢ်ဆဲးအိၣ်ဒီး သုမါန့ၣ် ဘၣ်သ့ၣ်သ့ၣ် သုကအုၣ်က့ၤခီၣ်က့ၤအီၤ တမ့ၢ်ဘၣ်ဧါ.
၁၇ ဘၣ်ဆၣ် ဖဲကစၢ်ယွၤ ကိးပှၤတဂၤစုာ်စုာ်အခါ အတၢ်အိၣ်သးမ့ၢ်အိၣ် ဒ်လဲၣ်ဂ့ၤဒ်လဲၣ်ဂ့ၤန့ၣ် မ်အဝဲအိၣ်မူဝဲဒ် အတၢ်အိၣ်သးတဖၣ်အံၤလၢ ယဟိဝၤယွၤ* ဟ့ၣ်တ့ၢ်အီၤ အသိးန့ၣ်တက့ၢ်.+ ယမၤလိာ် တၢ်အိၣ်ဖှိၣ်ကိးဖျၢၣ်ဒဲး ဒ်န့ၣ်လီၤ. ၁၈ ပှၤလၢအဘၣ် တၢ်ကိးအီၤတဂၤန့ၣ် မ့ၢ်အကူးတရံးတ့ၢ်အသး ဝံၤလံဧါ.+ မ့ၢ်ဝံၤဒီး မ်အဆဲးအိၣ်ဒ်န့ၣ်တက့ၢ်. ဒီးပှၤလၢ အဘၣ်တၢ်ကိးအီၤတဂၤန့ၣ် မ့ၢ်တဒိး တၢ်ကူးတရံးဒံးဘၣ်ဒီး မ်အသု တဒိးတၢ်ကူးတရံးတဂ့ၤ.+ ၁၉ တၢ်ဒိးတၢ်ကူးတရံးမ့ၢ်ဂ့ၤ, တဒိးတၢ်ကူးတရံးဘၣ်မ့ၢ်ဂ့ၤ တမ့ၢ် တၢ်နီတမံၤဘၣ်.+ တၢ်လၢအရ့ဒိၣ်န့ၣ် မ့ၢ်ဝဲတၢ်မၤထွဲကစၢ်ယွၤ အတၢ်မၤလိာ်တဖၣ်လီၤ.+ ၂၀ ဖဲတၢ်ကိးန့ၢ် ပှၤတဂၤစုာ်စုာ်အခါ အတၢ်အိၣ်သး မ့ၢ်အိၣ် ဒ်လဲၣ်ဂ့ၤဒ်လဲၣ်ဂ့ၤ မ်အဆဲးအိၣ် ဒ်န့ၣ်တက့ၢ်.+ ၂၁ ဖဲတၢ်ကိးန့ၢ်နၤအခါ မ့ၢ်နကဲကုၢ်ဧါ. တဘၣ်သူၣ်ကိၢ်သးဂီၤလၢ နတၢ်အိၣ်သးအံၤအဃိတဂ့ၤ.+ ဘၣ်ဆၣ် နထူၣ်ဖျဲးထီၣ် မ့ၢ်သ့န့ၣ် ဂုာ်ဟံးန့ၢ် တၢ်ခွဲးတၢ်ယာ်အံၤတက့ၢ်. ၂၂ ပှၤလၢအကဲကုၢ်လၢ အဘၣ်တၢ်ကိးန့ၢ်အီၤလၢ ကစၢ်အပူၤန့ၣ် မ့ၢ်ကစၢ်အပှၤလၢ အအိၣ်ဒီးတၢ်သဘျ့တဂၤလီၤ.+ ဒ်န့ၣ်အသိး ပှၤလၢအအိၣ်ဒီး တၢ်သဘျ့တဂၤ လၢအဘၣ်တၢ်ကိးအီၤန့ၣ် မ့ၢ်ဝဲခရံာ်အကုၢ်လီၤ. ၂၃ ကစၢ်ယွၤ ပှ့ၤသုလၢ တၢ်လုၢ်ဒိၣ်ပှ့ၤဒိၣ်လီၤ.+ အဃိ တဘၣ်ကဲထီၣ် ပှၤဟီၣ်ခိၣ်ဖိ အကုၢ်လၢၤတဂ့ၤ. ၂၄ ဒီပုၢ်ဝဲၢ်သ့ၣ်ဧၢ, ဖဲတၢ်ကိးန့ၢ် ပှၤတဂၤစုာ်စုာ်အခါ အတၢ်အိၣ်သးမ့ၢ်အိၣ် ဒ်လဲၣ်ဂ့ၤဒ်လဲၣ်ဂ့ၤ မ်အဆဲးအိၣ်ဒ်န့ၣ် လၢယွၤအမဲာ်ညါတက့ၢ်.
၂၅ မ့မ့ၢ် ဘၣ်ဃးဒီး မုၣ်ကနီၤတဖၣ်န့ၣ်* ယတဒိးန့ၢ်ဘၣ် တၢ်မၤလိာ်လၢ ကစၢ်အအိၣ်ဘၣ်. ဘၣ်ဆၣ် ကစၢ်ပာ်ဖျါထီၣ် တၢ်သးကညီၤလၢ ယဖီခိၣ် အဃိ သုနာ်န့ၢ် တၢ်လၢယတဲသ့လီၤ.+ လၢတၢ်န့ၣ်အဃိ ယဟ့ၣ်ထီၣ် ယတၢ်ထံၣ်လီၤ. ၂၆ ပအိၣ်မူဘၣ်လၢ တၢ်ဆၢကတီၢ်လၢ အကီအခဲအဃိ ယဆိကမိၣ်လၢ ပှၤတဂၤ မ့ၢ်ဆဲးအိၣ်ဝဲဒ် အအိၣ်ညီနုၢ်ဝဲအသိးန့ၣ် ဂ့ၤကတၢၢ်လီၤ. ၂၇ နမါအိၣ်ဧါ. မ့ၢ်အိၣ်န့ၣ် တဘၣ်ဃုကျဲလၢ နကအိၣ်လီၤဖးဒီးအီၤတဂ့ၤ.+ နမါ တအိၣ်ဘၣ်ဧါ. မ့ၢ်တအိၣ်ဘၣ်န့ၣ် တဘၣ်ဃုမါလၢၤတဂ့ၤ. ၂၈ ဘၣ်ဆၣ် နမ့ၢ်ဆီဟံၣ်ဆီဃီ သနာ်က့ တမ့ၢ်လၢ နမၤတၢ်ဒဲးဘးဘၣ်. ဒီးမုၣ်ကနီၤတဂၤ မ့ၢ်ဆီဟံၣ်ဆီဃီန့ၣ် တမ့ၢ်လၢ အဝဲမၤတၢ်ဒဲးဘး စ့ၢ်ကီးဘၣ်. ဘၣ်ဆၣ် ပှၤလၢ အဆီဟံၣ်ဆီဃီန့ၣ် ကအိၣ်ဒီးတၢ်ကီတၢ်ခဲ အါမံၤလီၤ. အဃိ ယအဲၣ်ဒိးမၤပူၤဖျဲးသုလီၤ.
၂၉ ဒီပုၢ်ဝဲၢ်သ့ၣ်ဧၢ, ယအဲၣ်ဒိးတဲစ့ၢ်ကီးသုလၢ တၢ်ဆၢကတီၢ် တအိၣ်တ့ၢ် အါအါလၢၤဘၣ်.+ အဃိ စးထီၣ်ခဲအံၤ ပှၤလၢ အအိၣ်ဒီးအမါန့ၣ် မ်အအိၣ်ဒ် အမါတအိၣ်ဘၣ်အသိး န့ၣ်တက့ၢ်. ၃၀ ဒီးပှၤလၢ အဟီၣ်တဖၣ်န့ၣ် မ်အအိၣ်ဒ်သိးဒီး ပှၤလၢအတဟီၣ်ဘၣ်တက့ၢ်. ပှၤလၢ အသူၣ်ဖှံသးညီတဖၣ်န့ၣ် မ်အအိၣ်ဒ်သိးဒီး ပှၤလၢ အတသူၣ်ဖှံသးညီဘၣ်တက့ၢ်. ပှၤလၢ အပှ့ၤတၢ်န့ၣ် မ်အအိၣ်ဒ်သိးဒီး ပှၤလၢအ တပှ့ၤတၢ်ဘၣ်တက့ၢ်. ၃၁ ဒီးမ့ၢ်လၢ တၢ်မၤအသးတဖၣ်လၢ ဟီၣ်ခိၣ်ချၢန့ၣ် ဆီတလဲအသး ကွ့ၢ်ကွ့ၢ်အဃိ ပှၤလၢအသူ တၢ်အိၣ်လၢ ဟီၣ်ခိၣ်ချၢတဖၣ်န့ၣ် မ်အကဲထီၣ်ဒ် ပှၤလၢအတသူအီၤ လၢာ်လၢာ်ဆ့ဆ့ဘၣ်အသိး န့ၣ်တက့ၢ်. ၃၂ နီၢ်ကီၢ်န့ၣ် ယအဲၣ်ဒိးလၢ သုကပူၤဖျဲးဒီး တၢ်သူၣ်ကိၢ်သးဂီၤလီၤ. ပိာ်ခွါလၢ အတဆီဟံၣ်ဆီဃီဘၣ်န့ၣ် သူၣ်ကိၢ်သးဂီၤတၢ် ဘၣ်ဃးဒီးကစၢ်အတၢ်မၤ မ့ၢ်လၢ အအဲၣ်ဒိးမၤသးခု ကစၢ်အသး အဃိလီၤ. ၃၃ မ့မ့ၢ် ပိာ်ခွါလၢ အအိၣ်ဒီးအမါန့ၣ် မ့ၢ်လၢအဝဲအဲၣ်ဒိး မၤသးခုအမါအသးအဃိ အဝဲသူၣ်ကိၢ်သးဂီၤတၢ် ဘၣ်ဃးဒီး တၢ်အိၣ်မူလၢ ဟီၣ်ခိၣ်အံၤလီၤ.+ ၃၄ အဃိ အဝဲဘၣ်သးစၢၢ်ဆၢ တၢ်ဂ့ၢ်ခံခါလီၤ. မ့မ့ၢ် ပိာ်မုၣ်လၢ အဝၤတအိၣ်ဘၣ်မ့ၢ်ဂ့ၤ, မုၣ်ကနီၤမ့ၢ်ဂ့ၤ သူၣ်ကိၢ်သးဂီၤတၢ် ဘၣ်ဃးဒီး ကစၢ်အတၢ်မၤ+ ဒ်သိးအကစီဆှံလၢ နီၢ်ခိဒီးလၢသး ခံကပၤလၢာ်လီၤ. မ့မ့ၢ် ပိာ်မုၣ်လၢ အဆီဟံၣ်ဆီဃီန့ၣ် ဒ်သိးအကမၤသးခု အဝၤအသးအဂီၢ် အဝဲသူၣ်ကိၢ်သးဂီၤတၢ် ဘၣ်ဃးဒီး တၢ်အိၣ်မူလၢ ဟီၣ်ခိၣ်အံၤလီၤ. ၃၅ တၢ်လၢယတဲတဖၣ်အံၤန့ၣ် မ့ၢ်လၢ သုနီၢ်ကစၢ် အဘျုးအဂီၢ်လီၤ. ဒီးတမ့ၢ်ဒ်သိး ယကဖီၣ်ဃံးသု အဂီၢ်ဘၣ်. မ့ၢ်ဒ်သိး ယကထိၣ်ဟူးထိၣ်ဂဲၤထီၣ်သုလၢ သုကမၤတၢ်လၢ အကြၢးဝဲဘၣ်ဝဲ ဒီးဒ်သိးသုကမၤ ကစၢ်အတၢ်မၤလၢ သုသးဒီဖျၢၣ်ထီဘိ ဒီးသုသးစၢၢ်ဆၢအီၤ လၢလၢပှဲၤပှဲၤ ကန့ၢ်အဂီၢ်လီၤ.
၃၆ ဘၣ်ဆၣ် ပှၤတဂၤဂၤ မ့ၢ်ဆိကမိၣ်လၢ အဝဲတကြၢးအိၣ်ဒ် ပှၤသဘျ့အသိးလၢၤဘၣ် ဒီးအဝဲမ့ၢ်လဲၤပူၤကွံာ် ပှၤသးစၢ်အတၢ်သးကတၢ အသဟီၣ်ဆူၣ်အကတီၢ်န့ၣ် အဝဲကြၢးမၤဝဲဒ်အံၤလီၤ. အဝဲမ့ၢ်အဲၣ်ဒိး ဖျီအသးန့ၣ် မ်အဝဲဖျီအသးတက့ၢ်. တမ့ၢ်လၢ အဝဲမၤတၢ်ဒဲးဘးဘၣ်.+ ၃၇ ဘၣ်ဆၣ် ပှၤတဂၤ မ့ၢ်ပာ်လီၤအသးလၢ အတဆီဟံၣ်ဆီဃီဘၣ် ဒီးမ့ၢ်ဆၢတဲာ်လီၤအသးဒ်န့ၣ် မ့ၢ်လၢအတူၢ်ဘၣ်လၢ အတလိၣ်ဆီဟံၣ်ဆီဃီဘၣ် ဒီးအဝဲပၢၤဃာ် အတၢ်သးကွံ မ့ၢ်န့ၢ်န့ၣ် အတၢ်ဆၢတဲာ်ဂ့ၤဝဲလီၤ.+ ၃၈ ဒီးပှၤလၢ အဆီဟံၣ်ဆီဃီန့ၣ် ဂ့ၤဝဲစ့ၢ်ကီးလီၤ. ဘၣ်ဆၣ် ပှၤလၢ အတဆီဟံၣ်ဆီဃီဘၣ်န့ၣ် ဂ့ၤဒိၣ်န့ၢ်အန့ၣ်လီၤ.+
၃၉ မါတဂၤ ဖဲအဝၤအိၣ်မူဒံးဝဲအခါ အဝဲကဘၣ်အိၣ်ဒီးအဝၤလီၤ.+ ဘၣ်ဆၣ် အဝၤမ့ၢ်သံန့ၣ် အဝဲအိၣ်ဒီးတၢ်သဘျ့လၢ အကဖျီအသးဒီး ပိာ်ခွါတဂၤဂ့ၤ တဂၤဂ့ၤလၢ အဘၣ်သူၣ်ဘၣ်သးဝဲလီၤ. ဘၣ်ဆၣ် ကဘၣ်မ့ၢ်ပှၤတဂၤလၢ ကစၢ်အပူၤလီၤ.+ ၄၀ သနာ်က့ လၢယတၢ်ထံၣ်န့ၣ် အဝဲမ့ၢ်တဆီဟံၣ်ဆီဃီ လၢၤဘၣ်န့ၣ် အကသးခုဒိၣ်န့ၢ် အလီၢ်လီၤ. ဒီးယဆိကမိၣ်လၢ ကစၢ်ယွၤအသးစီဆှံ အိၣ်ဒီးယၤ သပှၢ်တၢၢ်လီၤ.