မၤတၢ်

၁၁ တၢ်မၢဖိတဖၣ်​ ဒီးဒီပုၢ်ဝဲၢ်ခွါတဖၣ်လၢ အအိၣ်လၢ ယူဒၤအဟီၣ်ကဝီၤန့ၣ်​ နၢ်ဟူဝဲလၢ ပှၤကလုာ် အဂၤတဖၣ်စ့ၢ်ကီး တူၢ်လိာ်ဝဲ ကစၢ်ယွၤ အကလုၢ်ကထါလီၤ. ၂ အဃိ ဖဲစီၤပ့းတရူး လဲၤထီၣ်လၢ ဝ့ၢ်ယရူၤၡလ့ၣ်အခါ ပှၤလၢအဆီၣ်ထွဲ တၢ်သိၣ်တၢ်သီ ဘၣ်ဃးဒီး တၢ်ကူးတရံးန့ၣ်+ ပာ်ဒ့ၣ်ပာ်ကမၣ်အီၤလီၤ. ၃ ဒီးအဝဲသ့ၣ်​ တဲအီၤလၢ “နလဲၤနုာ်လီၤလၢ ပှၤလၢအတဒိး တၢ်ကူးတရံးဘၣ်တဖၣ်​ အဟံၣ်ပူၤ ဒီးအီၣ်တၢ်ဒီး အဝဲသ့ၣ်လီၤ.” ၄ ဘၣ်ဆၣ်​ စီၤပ့းတရူး တဲနၢ်ပၢၢ် အဝဲသ့ၣ်လၢ တၢ်ဂ့ၢ်တၢ်ကျိၤ လီၤတံၢ်လီၤဆဲး ဒီးတဲဝဲလၢ

၅ “ဖဲယဃ့ထုကဖၣ်တၢ်လၢ ဝ့ၢ်ယၤဖိၤအခါ ယထံၣ်ဘၣ်​ တၢ်ထံၣ်လၢညါခီတခါလီၤ. ဒီးတၢ်လၢ အလီၤဂာ်ဒီး တၢ်ကံးညာ် ဖးလဲၢ်တဘ့ၣ်​ ဘၣ်တၢ်စဲၤလီၤအီၤလၢမူခိၣ်​ လၢအနၢၣ်လွံၢ်နၢၣ်​ ဒီးဟဲလီၤဝဲလိၤလိၤ လၢယအိၣ်လီၤ.+ ၆ ဖဲယကွၢ် တၢ်အိၣ်လၢအပူၤ ထံထံအခါ ယထံၣ်ဘၣ်​ ဆၣ်ဖိကီၢ်ဖိလၢ အအိၣ်ဒီး အခီၣ်လွံၢ်ခီ, ဆၣ်ဖိကီၢ်ဖိအမံၤ, တၢ်လၢအဘျိၣ်​ ဒီးထိၣ်ဖိလံၣ်ဖိလၢ အယူၤလၢ တၢ်ဖးဖီတဖၣ်လီၤ. ၇ ယနၢ်ဟူစ့ၢ်ကီး တၢ်ကလုၢ်တခါ တဲယၤလၢ ‘စီၤပ့းတရူးဧၢ, ဂဲၤဆၢထၢၣ်​ မၤသံအီၤဒီး အီၣ်အီၤတက့ၢ်.’ ၈ ဘၣ်ဆၣ်​ ယတဲလၢ ‘ကစၢ်ဧၢ, လ့ၤတက့ၤ ယတမၤဘၣ်, တၢ်လၢအဘၣ်အၢ ဒီးအတကဆှီဘၣ်န့ၣ်​ တနုာ်လီၤလၢ ယကိာ်ပူၤ နီတဘျီဘၣ်.’ ၉ တၢ်ကလုၢ် သီၣ်ထီၣ်လၢ မူခိၣ်ပှဲၤထီၣ်​ ခံဘျီတဘျီလၢ ‘တၢ်လၢ ကစၢ်ယွၤ မၤကဆှီထီၣ်ဝဲတဖၣ်န့ၣ်​ တဘၣ်ကိးအီၤလၢ တၢ်တကဆှီဘၣ်​ လၢၤတဂ့ၤ.’ ၁၀ တၢ်မၤအသး ပှဲၤထီၣ်သၢဘျီ တဘျီဝံၤဒီး တၢ်ခဲလၢာ် ဘၣ်တၢ်ထုးထီၣ်က့ၤအီၤလၢ မူခိၣ်လီၤ. ၁၁ ဖဲန့ၣ်အဆၢကတီၢ် ပှၤသၢဂၤလၢ အအိၣ်ဟဲလၢ ဝ့ၢ်ကဲၤစါရံၤ လၢပှၤဆှၢလီၤအီၤလၢ ယအိၣ်န့ၣ်​ ဟဲတုၤလၢ ဟံၣ်လၢ ပအိၣ်တဖျၢၣ်န့ၣ်လီၤ.+ ၁၂ ဒီးသးစီဆှံ တဲယၤလၢ လဲၤဒီးအဝဲသ့ၣ်​ ဒီးတဘၣ်သးဒ့ဒီ နီတစဲးတဂ့ၤ. ဒီးဒီပုၢ်ဝဲၢ်ခွါ ဃုဂၤအံၤစ့ၢ်ကီး လဲၤဒီးယၤ ဒီးပလဲၤနုာ်လီၤလၢ စီၤကန့လံး အဟံၣ်ပူၤလီၤ.

၁၃ “ဒီးအဝဲ တဲဘၣ်ပှၤလၢ အဝဲထံၣ်ဘၣ်​ မူခိၣ်ကလူးဆၢထၢၣ်လၢ အဟံၣ်ပူၤ ဒီးမူခိၣ်ကလူး တဲအီၤလၢ ‘ဆှၢလီၤ ပှၤပိာ်ခွါတနီၤ လၢဝ့ၢ်ယၤဖိၤ ဒ်သိး ကလဲၤကိးန့ၢ်ဝဲ စီၤၡံမိၣ်​ လၢပှၤကိးအီၤလၢ စီၤပ့းတရူးတက့ၢ်.+ ၁၄ ဒီးစီၤပ့းတရူး ကတဲဘၣ်နၤလၢ နၤဒီးပှၤလၢအအိၣ်​ ဟံၣ်တဖျၢၣ်ဃီဒီးနၤ ကိးဂၤဒဲး ကန့ၢ်ဘၣ်​ တၢ်အုၣ်က့ၤခီၣ်က့ၤ ဒ်လဲၣ်အဂ့ၢ်လီၤ.’ ၁၅ ဘၣ်ဆၣ်​ ဖဲယစးထီၣ်​ တဲတၢ်အခါ သးစီဆှံဟဲလီၤလၢ အဝဲသ့ၣ်အလိၤ ဒ်အဟဲလီၤလၢ ပလိၤလၢ အဆိကတၢၢ်တဘျီ အသိးလီၤ.+ ၁၆ ဖဲန့ၣ်အခါ ယသ့ၣ်နီၣ်ထီၣ်​ ကစၢ်အတၢ်ကတိၤ ဖဲအတဲဝဲလၢ ‘စီၤယိၤဟၣ်​ ဒိးဘျၢတၢ်လၢထံ+ ဘၣ်ဆၣ်မ့မ့ၢ် သုန့ၣ်​ တၢ်ကဒိးဘျၢသုလၢ သးစီဆှံလီၤ.’+ ၁၇ အဃိ ကစၢ်ယွၤ မ့ၢ်ဟ့ၣ်လီၤ အဝဲသ့ၣ်​ တၢ်ဟ့ၣ်တမံၤဃီလၢ အဟ့ၣ်လီၤ ပဝဲသ့ၣ်လၢ အမ့ၢ်ပှၤလၢ အစူၢ်က့ၤနာ်က့ၤ ကစၢ်ယ့ၣ်ၡူးခရံာ်န့ၣ်​ ယမ့ၢ် မတဂၤလၢ အတြီ ကစၢ်ယွၤသ့န့ၣ်လဲၣ်.”+

၁၈ ဖဲအဝဲသ့ၣ်နၢ်ဟူ တၢ်ဂ့ၢ်တဖၣ်အံၤအခါ အဝဲသ့ၣ်​ တတဲအါတၢ်လၢၤဘၣ်. လၢတၢ်န့ၣ်အလီၢ် အဝဲသ့ၣ်​ မၤလၤကပီၤ ကစၢ်ယွၤ ဒီးတဲဝဲလၢ “မ့မ့ၢ်ဒ်န့ၣ်န့ၣ်​ ကစၢ်ယွၤ ဟ့ၣ်လီၤစ့ၢ်ကီး ပှၤကလုာ်အဂၤတဖၣ်​ တၢ်ခွဲးတၢ်ယာ်လၢ အကပီၢ်ယၢ်လီၤက့ၤအသး ဒ်သိးကဒိးန့ၢ်ဘၣ်​ တၢ်မူအဂီၢ်လီၤ.”+

၁၉ ပှၤလၢ အလီၤပြံလီၤပြါ+ ခီဖျိလၢ တၢ်မၤအၢမၤနးလၢ အဟဲကဲထီၣ်အသး ဖဲစီၤစတ့းဖၣ်​ ဘၣ်တၢ်မၤသံအီၤ ဝံၤအလီၢ်ခံန့ၣ်​ အဝဲသ့ၣ်လဲၤတုၤလၢ ဖံၤနံက့ၤ, ကီးကူပြူး ဒီးဝ့ၢ်အၣ်တံၤအီာ်လီၤ. ဘၣ်ဆၣ်​ အဝဲသ့ၣ်န့ၣ်​ စံၣ်တဲၤတဲလီၤထဲဒၣ်လၢ ပှၤယူဒၤဖိတဖၣ်အအိၣ်လီၤ.+ ၂၀ သနာ်က့ ပှၤတနီၤလၢ အဝဲသ့ၣ်အကျါလၢ အဟဲလၢကီးကူပြူး ဒီးဝ့ၢ်ကူၤရ့ၤန့န့ၣ်​ လဲၤဝဲလၢ ဝ့ၢ်အၣ်တံၤအီာ် ဒီးတဲသကိးတၢ်ဒီး ပှၤလၢအတဲ ကြံးကျိာ်တဖၣ်​ ဒီးစံၣ်တဲၤတဲလီၤ အဝဲသ့ၣ်လၢ တၢ်သးခုကစီၣ်​ ဘၣ်ဃးဒီး ကစၢ်ယ့ၣ်ၡူးလီၤ. ၂၁ တကးဒံးဘၣ်​ မ့ၢ်လၢ ယဟိဝၤယွၤ* ဆီၣ်ထွဲမၤစၢၤ အဝဲသ့ၣ်အဃိ ပှၤအါအါဂီၢ်ဂီၢ် ကဲထီၣ်​ ပှၤစူၢ်က့ၤနာ်က့ၤတၢ် ဒီးဃၣ်က့ၤ အသးဆူ ကစၢ်အအိၣ်လီၤ.+

၂၂ တၢ်ကစီၣ်အဝဲန့ၣ်​ ဟူထီၣ်သါလီၤဝဲလၢ တၢ်အိၣ်ဖှိၣ်လၢ ဝ့ၢ်ယရူၤၡလ့ၣ်အပူၤ အဃိအဝဲသ့ၣ်​ ဆှၢလီၤဝဲ စီၤဘၢ်နါဘၤ+ လၢဝ့ၢ်အၣ်တံၤအီာ်လီၤ. ၂၃ ဖဲအဝဲ လဲၤတုၤအခါ အဝဲထံၣ်ဘၣ်​ ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ်အဃိ အသးခုဝဲ ဒီးဟ့ၣ်ဂံၢ်ဟ့ၣ်ဘါ အဝဲသ့ၣ်ကိးဂၤဒဲး ဒ်သိး ကဆဲးတီဒီးကစၢ် လၢအသးဒီဖျၢၣ်​ အဂီၢ်လီၤ.+ ၂၄ စီၤဘၢ်နါဘၤ မ့ၢ်ပှၤလၢအဂ့ၤ လၢအပှဲၤဒီး သးစီဆှံ ဒီးအိၣ်ဒီးတၢ်နာ် လၢအဂၢၢ်အကျၢၤလီၤ. ဒီးပှၤဂီၢ်မုၢ် အါအါဂီၢ်ဂီၢ် စူၢ်က့ၤနာ်က့ၤ ကစၢ်လီၤ.+ ၂၅ အဃိ စီၤဘၢ်နါဘၤ လဲၤလၢ ဝ့ၢ်တၢ်စူး ဒ်သိး ကဟးဃုဝဲ စီၤစီလူးအဂီၢ်လီၤ.+ ၂၆ ဖဲအဝဲထံၣ်န့ၢ် စီၤစီလူးအခါ အဝဲဟဲက့ၤကိးအီၤလၢ ဝ့ၢ်အၣ်တံၤအီာ်လီၤ. ဒီးအဝဲသ့ၣ်ခံဂၤ လဲၤထီၣ်​ တၢ်အိၣ်ဖှိၣ်ဖဲန့ၣ်​ ဒီတနံၣ်ညါ ဒီးသိၣ်လိ ပှၤဂီၢ်မုၢ်လီၤ. ဒီးခီဖျိလၢ ကစၢ်ယွၤ အတၢ်ဟံးစုနဲၣ်ကျဲအဃိ လၢဝ့ၢ်အၣ်တံၤအီာ်အပူၤန့ၣ်​ ယ့ၣ်ၡူး အပျဲၢ်အဘီၣ်တဖၣ်​ ဘၣ်တၢ်ကိးအီၤလၢ ခရံာ်ဖိ အဆိကတၢၢ် တဘျီလီၤ.+

၂၇ ဖဲမုၢ်နံၤတဖၣ်န့ၣ်​ အတီၢ်ပူၤ ဝံတဖၣ်လၢ+ ဝ့ၢ်ယရူၤၡလ့ၣ်န့ၣ်​ ဟဲလီၤလၢ ဝ့ၢ်အၣ်တံၤအီာ်လီၤ. ၂၈ ဒီးပှၤလၢ အဝဲသ့ၣ်အကျါတဂၤန့ၣ်​ အမံၤမ့ၢ်ဝဲ စီၤအကၤဘူးလီၤ.+ ဒီးခီဖျိလၢ သးစီဆှံအဃိ အဝဲတဲဆိပာ်ဝဲလၢ တၢ်သၣ်ဝံၤလီၤဒိဖးဒိၣ်​ ကအိၣ်ထီၣ်လၢ ဟီၣ်ခိၣ်ဒီဘ့ၣ်​ ဘူးထီၣ်လံ.+ ဒီးတၢ်သၣ်ဝံၤလီၤဒိအံၤ ဟဲကဲထီၣ်အသးလၢ စီၤကျီၤဒံ အစိၤလီၤ. ၂၉ အဃိ ယ့ၣ်ၡူး အပျဲၢ်အဘီၣ်တဖၣ်​ ပာ်လီၤအသးလၢ ဒ်အဝဲသ့ၣ်​ တဂၤစုာ်စုာ် မၤဝဲန့ၢ်အသိး+ အဝဲသ့ၣ်ကဆှၢလီၤဝဲ တၢ်မၤစၢၤလၢ+ ဒီပုၢ်ဝဲၢ်တဖၣ်လၢ အအိၣ်လၢ ယူဒၤအဟီၣ်ကဝီၤလီၤ. ၃၀ ဒီးအဝဲသ့ၣ်​ မၤဝဲဒ်န့ၣ်​ ဒီးဆှၢလီၤ တၢ်မၤစၢၤတဖၣ်လၢ ပှၤသူၣ်က့သးပှၢ် တဖၣ်အအိၣ်​ ခီဖျိ စီၤဘၢ်နါဘၤ ဒီးစီၤစီလူးလီၤ.+