လူၤကၣ်

၁၁ ယ့ၣ်ၡူးအိၣ်ဝဲလၢ တၢ်လီၢ်တတီၤ ဒီးဃ့ထုကဖၣ်တၢ်လီၤ. ဖဲအဃ့ဝဲဝံၤအခါ အပျဲၢ်အဘီၣ်တဂၤ တဲအီၤလၢ “ကစၢ်ဧၢ, ဒ်စီၤယိၤဟၣ်​ သိၣ်လိအပျဲၢ်အဘီၣ်တဖၣ်အသိး သိၣ်လိပှၤလၢ ပကဘၣ်ဃ့ထုကဖၣ်တၢ် ဒ်လဲၣ်.”

၂ အဃိ ယ့ၣ်ၡူးတဲအဝဲသ့ၣ်လၢ “ဖဲသုဃ့ထုကဖၣ်တၢ်အခါ တဲလၢ ‘ပၢ်ဧၢ, မ်နမံၤ ဘၣ်တၢ်ပာ်စီဆှံအီၤတက့ၢ်.+ နဘီနမုၢ်န့ၣ်​ မ်အဟဲတက့ၢ်.+ ၃ ဟ့ၣ်လီၤပှၤတၢ်အီၣ်* လၢပလိၣ်ဘၣ်လၢ တနံၤအဂီၢ် တနံၤအဂီၢ်တက့ၢ်.+ ၄ ပျၢ်ကွံာ် ပတၢ်ကမၣ်*+ ဒ်ပပျၢ်ကွံာ်ပှၤကိးဂၤဒဲး အတၢ်ကမၣ်* အသိးတက့ၢ်.+ ဒီးတဘၣ်ပျဲ ပလဲၤနုာ်လီၤလၢ တၢ်လ့ပစီအပူၤတဂ့ၤ.’”+

၅ ဒီးယ့ၣ်ၡူးတဲဘၣ်​ အဝဲသ့ၣ်လၢ “အဒိ ပှၤလၢသုကျါတဂၤ မ့ၢ်လဲၤလၢအသကိးအအိၣ်လၢ ဖးဖီမုၢ် ဒီးတဲအီၤလၢ ‘သကိးဧၢ, ဟ့ၣ်လိၢ်ဆိယၤ ကိၣ်သၢလိၣ်, ၆ မ့ၢ်လၢ ယသကိးတဂၤ လၢအအိၣ်လၢ တၢ်လီၢ်လၢအယံၤန့ၣ်​ ဟဲတုၤဝဲခဲအံၤဒီး ယကဒုးအီၣ်အီၤ တၢ်တအိၣ်​ နီတမံၤဘၣ်အဃိလီၤ.’ ၇ ဒီးဟံၣ်ကစၢ် အိၣ်လၢဟံၣ်ပူၤ ဒီးတဲဆၢက့ၤဝဲလၢ ‘မၤတံာ်တာ်ယၤ လၢၤတဂ့ၤ. တြဲၤကးပံးဃာ်အသးလံ ဒီးယဖိဆံးတဖၣ်​ မံဒီးယၤလၢ လီၢ်မံအပူၤလံ. အဃိ ယဂဲၤဆၢထၢၣ်​ ဟ့ၣ်နၤတၢ် တကဲနီတမံၤဘၣ်.’ ၈ ယကတဲဘၣ်သု, ပှၤတဂၤန့ၣ်​ မ့ၢ်အသကိးသနာ်က့ အဝဲဂဲၤဆၢထၢၣ်ဟ့ၣ်အီၤတၢ် မ့ၢ်တကဲ နီတမံၤဘၣ်ဒၣ်လဲာ် မ့ၢ်လၢပှၤတဂၤန့ၣ်​ ဆဲးဃ့ဝဲဆူၣ်ဆူၣ်လၢ တၢ်သးဒူအပူၤ+ အဃိအသကိး ကဂဲၤဆၢထၢၣ်​ ဒီးဟ့ၣ်အီၤတၢ်လၢ အလိၣ်ဘၣ်​ တမံၤဂ့ၤတမံၤဂ့ၤလီၤ. ၉ အဃိ ယကတဲဘၣ်သုလၢ ဆဲးဃ့တၢ်+ ဒီးတၢ်ကဟ့ၣ်လီၤသုလီၤ. ဆဲးဃုတၢ် ဒီးသုကထံၣ်န့ၢ်တၢ်လီၤ. ဆဲးဒိတကျိာ်တၢ် ဒီးတၢ်ကအိးထီၣ်န့ၢ်သုလီၤ.+ ၁၀ ပှၤကိးဂၤဒဲးလၢ အဃ့တၢ်န့ၣ်​ ကဒိးန့ၢ်ဘၣ်ဝဲ,+ ပှၤကိးဂၤဒဲးလၢ အဃုတၢ်န့ၣ်​ ကထံၣ်န့ၢ်ဝဲ ဒီးပှၤကိးဂၤဒဲးလၢ အဒိတကျိာ်တၢ်န့ၣ်​ တၢ်ကအိးထီၣ်န့ၢ် အီၤလီၤ. ၁၁ လၢသုကျါန့ၣ်​ ပၢ်လၢအဖိခွါ မ့ၢ်ဃ့အီၤညၣ်တဘ့ၣ်​ ဒီးကဟ့ၣ်လီၤအီၤ ဂုၢ်တဘိလၢ ညၣ်တဘ့ၣ်အလီၢ်န့ၣ်​ မ့ၢ်အအိၣ်တဂၤဂၤဧါ.+ ၁၂ ဒီးအဝဲမ့ၢ်ဃ့စ့ၢ်ကီး ဆီဒံၣ်တဖျၢၣ်န့ၣ်​ မ့ၢ်အပၢ်ကဟ့ၣ်လီၤအီၤလၢ ပတ့ၤချဲးတဘ့ၣ်ဧါ. ၁၃ သုကဲပှၤအၢပှၤသီမး သုမ့ၢ်သးအိၣ်ဟ့ၣ်​ သုဖိတၢ်ဟ့ၣ်လၢအဂ့ၤန့ၣ်​ သုပၢ်အိၣ်လၢမူခိၣ်​ ကဟ့ၣ်ဝဲ ပှၤလၢအဃ့အီၤသးစီဆှံ အါန့ၢ်အန့ၣ်တမ့ၢ်ဧီၤ.”+

၁၄ လၢခံ တၢ်ဝံတၢ်နါတဒုလၢ အမၤပှၤတဂၤဒ်သိး အတဲတၢ် တသ့ဘၣ်န့ၣ်​ ယ့ၣ်ၡူးနီဟးထီၣ်အီၤလီၤ.+ ဖဲတၢ်ဝံတၢ်နါအံၤ ဟးထီၣ်ဝံၤအလီၢ်ခံ ပှၤလၢအတဲတၢ် တသ့ဘၣ်တဂၤအံၤ တဲတၢ်သ့ထီၣ်အဃိ ပှၤဂီၢ်မုၢ်တဖၣ်​ ကမၢကမၣ်ဝဲလီၤ.+ ၁၅ ဘၣ်ဆၣ်​ အဝဲသ့ၣ်​ တနီၤတဲဝဲလၢ “အဝဲနီဟးထီၣ်​ တၢ်ဝံတၢ်နါတဖၣ်​ ခီဖျိလၢ ဘၤဧၤလစဘူာ်* လၢအမ့ၢ် တၢ်ဝံတၢ်နါတဖၣ်​ အခိၣ်အဃိလီၤ.”+ ၁၆ ဒီးပှၤအဂၤတဖၣ်န့ၣ်​ မၢယ့ၣ်ၡူး မၤတၢ်လီၤလးလၢ+ အဟဲလၢမူခိၣ်တမံၤ ဒ်သိးကမၤကွၢ်အီၤအဂီၢ်လီၤ. ၁၇ ယ့ၣ်ၡူးသ့ၣ်ညါအဝဲသ့ၣ်​ အတၢ်ဆိကမိၣ်အဃိ+ အတဲဘၣ်အဝဲသ့ၣ်လၢ “ကယဲၢ်ဘီမုၢ်လၢ အက့ၤထီဒါလိာ်က့ၤ အသးန့ၣ်​ ကဟးဂီၤဝဲလီၤ. ဒီးလၢဟံၣ်တဖျၢၣ်အပူၤန့ၣ်​ ပှၤမ့ၢ်က့ၤထီဒါလိာ်က့ၤ အသးန့ၣ်​ အကလီၤပှီၢ်ဝဲလီၤ. ၁၈ ဒ်န့ၣ်အသိး မုၣ်ကီၤလံၢ်* မ့ၢ်ထီဒါလိာ်က့ၤအသးန့ၣ်​ အဘီအမုၢ် အိၣ်ဂၢၢ်ကျၢၤဝဲ ကသ့ဒ်လဲၣ်. သုတဲလၢ ယနီဟးထီၣ်​ တၢ်ဝံတၢ်နါတဖၣ်လၢ ဘၤဧၤလစဘူာ် အတၢ်စိတၢ်ကမီၤလီၤ. ၁၉ ယမ့ၢ်နီဟးထီၣ်​ တၢ်ဝံတၢ်နါတဖၣ်လၢ ဘၤဧၤလစဘူာ် အတၢ်စိတၢ်ကမီၤန့ၣ်​ မ့ၢ်သုဖိခွါတဖၣ်​ နီဟးထီၣ်​ တၢ်ဝံတၢ်နါလၢ မတဂၤ အစိအကမီၤအဃိလဲၣ်. လၢတၢ်ဂ့ၢ်အံၤအဃိ အဝဲသ့ၣ်ကကဲထီၣ်​ ပှၤလၢအစံၣ်ညီၣ်သုလီၤ. ၂၀ ယမ့ၢ်နီဟးထီၣ်​ တၢ်ဝံတၢ်နါတဖၣ်လၢ ကစၢ်ယွၤအစိကမီၤအဃိန့ၣ်*+ ကစၢ်ယွၤအဘီမုၢ်ဟဲတုၤလံ ဘၣ်ဆၣ်​ သုတပာ်သူၣ်ပာ်သးဘၣ်.+ ၂၁ ဖဲပှၤလၢအဂံၢ်ဆူၣ်လၢ အစုကဝဲၤအိၣ်ဝဲ လၢလၢပှဲၤပှဲၤတဂၤ အိၣ်ခိးအဟံၣ်အခါ ပှၤဟဲဟုၣ်န့ၢ် အတၢ်ဖိတၢ်လံၤ တန့ၢ်နီတဂၤဘၣ်. ၂၂ ဘၣ်ဆၣ်​ ပှၤလၢအဂံၢ်ဆူၣ်န့ၢ်အီၤတဂၤဂၤ မ့ၢ်ဟဲထီဒါအီၤဒီး မၤနၢၤအီၤန့ၣ်​ အဝဲကက့ၤစိာ်ဝဲ ပှၤတဂၤန့ၣ်​ အစုကဝဲၤလၢ အနာ်န့ၢ်ဝဲခဲလၢာ်လီၤ. ဒီးအဝဲကနီၤဖးဝဲ တၢ်လၢ အက့ၤစိာ်ဝဲတဖၣ်လီၤ. ၂၃ ပှၤလၢ အတအိၣ်လၢ ယအိၣ်တကပၤဘၣ်န့ၣ်​ မ့ၢ်အထီဒါယၤလီၤ ဒီးပှၤလၢ အတပာ်ဖှိၣ်တၢ်ဒီးယၤဘၣ်န့ၣ်​ မ့ၢ်အမၤ လီၤပြံလီၤပြါတၢ်လီၤ.+

၂၄ “ဖဲတၢ်ဝံတၢ်နါတဒု ဟးထီၣ်လၢ ပှၤတဂၤအလိၤအခါ ဒ်သိးအကဃုဝဲ တၢ်အိၣ်ဘှံးအလီၢ်အဂီၢ် အလဲၤခီဂာ်ဘၣ်ဝဲ တၢ်လီၢ်ဃ့ထီတဖၣ်လီၤ. ဘၣ်ဆၣ်​ အဃုဝဲတဘၣ်ဘၣ်. အဃိ အတဲဝဲလၢ ‘ယကက့ၤကဒါက့ၤလၢ ပှၤလၢ ယအိၣ်လၢအပူၤ လၢညါတဂၤအအိၣ်လီၤ.’+ ၂၅ ဖဲအက့ၤတုၤအခါ အထံၣ်ဘၣ်ဝဲလၢ ပှၤတဂၤန့ၣ်​ လီၤဂာ်ဒ်သိးဒီး ဟံၣ်လၢ အဘၣ်တၢ်ခွဲသိၣ်ခွဲပျီအီၤ ဒီးဘၣ်တၢ် မၤဃံမၤလၤထီၣ်အီၤလီၤ. ၂၆ ဒီးအလဲၤကိးန့ၢ် တၢ်ဝံတၢ်နါအဂၤ နွံဒုလၢ အအၢဒိၣ်န့ၢ်ဒံးအီၤ ဒီးက့ၤနုာ်လီၤဝဲလၢ ပှၤတဂၤန့ၣ်အပူၤဝံၤဒီး အိၣ်ဝဲဖဲန့ၣ်လီၤ. အဃိ ပှၤတဂၤန့ၣ်​ အတၢ်အိၣ်သး လၢအလီၢ်ခံကတၢၢ်န့ၣ်​ နးဒိၣ်န့ၢ်ဒံး လၢအခီၣ်ထံးလီၤ.”

၂၇ ဖဲယ့ၣ်ၡူး တဲတၢ်ဂ့ၢ်တဖၣ်အံၤအခါ ပိာ်မုၣ်လၢ ပှၤဂီၢ်မုၢ်အကျါတဂၤ ကိးပသူထီၣ်လၢ ယ့ၣ်ၡူးအအိၣ်လၢ “ပိာ်မုၣ်လၢ အအိၣ်ဖျဲၣ်ထီၣ်နၤ ဒီးဒုးအီနၤနုၢ်န့ၣ်​ ကသးခုဝဲသၢၤ.”+ ၂၈ ဘၣ်ဆၣ်​ အဝဲတဲဆၢဝဲလၢ “တမ့ၢ်ဘၣ်, ပှၤလၢအနၢ်ဟူ ကစၢ်ယွၤ အကလုၢ်ကထါဒီး မၤထွဲဝဲန့ၣ်​ ကသးခုဝဲလီၤ.”+

၂၉ ဖဲပှၤဂီၢ်မုၢ်တဖၣ်​ အိၣ်ဖှိၣ်ဝဲ အါထီၣ်အါထီၣ်အခါ ယ့ၣ်ၡူးတဲ အဝဲသ့ၣ်လၢ “ပှၤတစိၤအံၤ မ့ၢ်ပှၤတစိၤလၢ အအၢအသီလီၤ. အဝဲသ့ၣ်​ လူၤဃုကွၢ်ဝဲ တၢ်လီၤလးဘၣ်ဆၣ်​ တၢ်တဒုးထံၣ်​ အဝဲသ့ၣ်ဘၣ်. တၢ်ကဒုးထံၣ်​ အဝဲသ့ၣ်​ ထဲဒၣ်စီၤယိၤနါ အတၢ်လီၤလးတမံၤလီၤ.+ ၃၀ ဒ်စီၤယိၤနါ+ ကဲထီၣ်တၢ်ပနီၣ်လၢ ပှၤနံၤနဝ့ဖိတဖၣ်အဂီၢ် အသိးန့ၣ်​ ပှၤကညီဖိခွါအံၤ ကမၤအသးဒ်န့ၣ်လၢ ပှၤတစိၤအံၤအဂီၢ်လီၤ. ၃၁ ဖဲမုၢ်စံၣ်ညီၣ်အနံၤန့ၣ်​ ကလံၤထံးအနီၢ်ပၤမုၣ်+ ကဂဲၤဆၢထၢၣ်ဃုာ်ဒီး ပှၤတစိၤအံၤလီၤ. ဒီးအကပာ်ဒ့ၣ်ပာ်ကမၣ်​ အဝဲသ့ၣ်, မ့ၢ်လၢအဝဲဘၣ်ဟဲလၢ တၢ်လီၢ်ဖးယံၤ ဒ်သိးအကနၢ်ဟူဘၣ်​ စီၤၡလိၤမိၤ အတၢ်ကူၣ်သ့အဂီၢ်အဃိလီၤ. ဘၣ်ဆၣ်​ ပှၤလၢအဒိၣ်န့ၢ်ဒံး စီၤၡလိၤမိၤန့ၣ်​ အိၣ်ဖဲအံၤတဂၤလီၤ.+ ၃၂ ဖဲမုၢ်စံၣ်ညီၣ်အနံၤန့ၣ်​ ပှၤနံၤနဝ့ဖိတဖၣ်​ ကဂဲၤဆၢထၢၣ်ဃုာ်ဒီး ပှၤတစိၤအံၤလီၤ. ဒီးအဝဲသ့ၣ်​ ကပာ်ဒ့ၣ်ပာ်ကမၣ်​ ပှၤတစိၤအံၤ မ့ၢ်လၢဖဲစီၤယိၤနါ စံၣ်တဲၤတဲလီၤတၢ်အခါ အဝဲသ့ၣ်​ ပီၢ်ယၢ်လီၤက့ၤအသး အဃိလီၤ.+ ဘၣ်ဆၣ်​ ပှၤလၢအဒိၣ်န့ၢ်ဒံး စီၤယိၤနါ အိၣ်ဖဲအံၤတဂၤလီၤ. ၃၃ ပှၤဒွဲၣ်ထီၣ်မ့ၣ်အူဒၢ ဝံၤအလီၢ်ခံ ပှၤတပာ်အီၤလၢ တၢ်တဒၢအလီၢ် မ့တမ့ၢ် နာ်တဖျၢၣ်* အဖီလာ်ဘၣ်. ပှၤပာ်အီၤလၢ မ့ၣ်အူဒၢအလီၢ်+ ဒ်သိး ပှၤလၢ အဟဲနုာ်လီၤတဖၣ်​ ကထံၣ်​ တၢ်ကပီၤအဂီၢ်လီၤ. ၃၄ နနီၢ်ခိ အမ့ၣ်အူဒၢန့ၣ်​ မ့ၢ်ဝဲနမဲာ်ချံလီၤ. နမဲာ်ချံ မ့ၢ်ကွၢ်တၢ်ထံထံန့ၣ်* နနီၢ်ခိဒီတဂၤ ကကပီၤဝဲလီၤ.* ဘၣ်ဆၣ်​ နမဲာ်ချံ မ့ၢ်ကွၢ်တၢ်လၢ တၢ်သးက့ၣ်အပူၤန့ၣ်* နနီၢ်ခိ ကခံးဝဲလီၤ.+ ၃၅ အဃိ ဒ်သိးတၢ်ကပီၤလၢ နပူၤသုတမ့ၢ် တၢ်ခံးတဂ့ၤအဂီၢ် ပလီၢ်နသးတက့ၢ်. ၃၆ အဃိ နနီၢ်ခိဒီတဂၤမ့ၢ်ကပီၤ ဒီးတၢ်ခံးမ့ၢ်တအိၣ်​ နီတပူၤဘၣ်န့ၣ်​ နနီၢ်ခိခဲလၢာ် ကကပီၤဝဲဒ် မ့ၣ်အူဒၢကပီၤထီၣ်​ ဘၣ်နၤအသိးလီၤ.”

၃၇ ဖဲယ့ၣ်ၡူး တဲတၢ်ဂ့ၢ်တဖၣ်အံၤ ဝံၤအလီၢ်ခံ ပှၤဖၤရံၤၡဲတဂၤ မၢအဟဲအီၣ်တၢ် ဒီးအီၤလီၤ. အဃိ ယ့ၣ်ၡူး လဲၤနုာ်လီၤဝဲ ဒီးသန့ၤအသးလၢ စီၢ်နီၤခိၣ်လီၤ. ၃၈ ဘၣ်ဆၣ်​ တချုးဖဲယ့ၣ်ၡူးအီၣ်​ မုၢ်ဆါခီ တၢ်အီၣ်ဒံးဘၣ်အခါ အဝဲတသ့အစုဘၣ်* အဃိ ပှၤဖၤရံၤၡဲတဂၤထံၣ်ဝဲဒီး ကမၢကမၣ်ဝဲလီၤ.+ ၃၉ ကစၢ်တဲဘၣ်အီၤလၢ “သုဝဲပှၤဖၤရံၤၡဲတဖၣ်န့ၣ်​ သုလီၤဂာ်ဒ်သိးဒီး ထံခွးဒီး လီခီလၢ အဘၣ်တၢ်မၤကဆှီအီၤ ထဲအချၢလီၤ. ဘၣ်ဆၣ်​ သုသးန့ၣ်​ ပှဲၤဝဲဒီး တၢ်သးကွံ ဒီးတၢ်အၢတၢ်သီတဖၣ်လီၤ.+ ၄၀ ပှၤလၢ အခိၣ်ကိၤသ့ၣ်ဧၢ, ပှၤတဂၤလၢ အတ့လီၤပနီၢ်ခိန့ၣ်​ တ့လီၤစ့ၢ်ကီး ပသူၣ်ပသး တမ့ၢ်ဧီၤ. ၄၁ ဖဲသုဟ့ၣ်မၤစၢၤ ပှၤဖှီၣ်ဖိယာ်ဖိတဖၣ်​ အခါ ဟ့ၣ်အီၤလၢ တၢ်သးအိၣ်အပူၤတက့ၢ်. ဒီးသုမ့ၢ်မၤဒ်န့ၣ်န့ၣ်​ တၢ်ခဲလၢာ်လၢ အဘၣ်ဃးဒီးသုန့ၣ်​ ကကဆှီဝဲလီၤ. ၄၂ ပှၤဖၤရံၤၡဲသ့ၣ်ဧၢ, သုကဘၣ်ကီဘၣ်ခဲလီၤ. သုဟ့ၣ်​ တၢ်ဆံဆဲၣ်ပူတပူလၢ ဟီၣ်ဝီၤသွ့ ဒီးပံကနၣ်အဒိး ဒီးတၢ်ဒိးတၢ်လၣ်​ အဂၤခဲလၢာ်+ ဘၣ်ဆၣ်​ သုကွၢ်ကပာ် ကစၢ်ယွၤ အတၢ်စံၣ်ညီၣ်တီ ဒီးအတၢ်အဲၣ်လီၤ. နီၢ်ကီၢ်န့ၣ်​ သုကဘၣ်ဟ့ၣ်လီၤ တၢ်ဆံဆဲၣ်ပူတပူ ဘၣ်ဆၣ်​ သုတဘၣ်ကွၢ်ကပာ် ကစၢ်ယွၤ အတၢ်စံၣ်ညီၣ်တီ ဒီးအတၢ်အဲၣ်ဘၣ်.+ ၄၃ ပှၤဖၤရံၤၡဲသ့ၣ်ဧၢ, သုကဘၣ်ကီဘၣ်ခဲ မ့ၢ်လၢ သုအဲၣ်ဒိးဆ့ၣ်နီၤလၢ တၢ်မဲာ်ညါကတၢၢ်လၢ ဘူၣ်ဘျီၣ်ပူၤ ဒီးသုအဲၣ်ဒိးလၢ ပှၤကဆၢဂ့ၤဆၢဝါသုလၢ တၢ်ဆါတၢ်ပှ့ၤအလီၢ် အဃိလီၤ.+ ၄၄ သုကဘၣ်ကီဘၣ်ခဲ, မ့ၢ်လၢ သုလီၤဂာ်ဒီး တၢ်သွၣ်ခိၣ်လၢ ပှၤတထံၣ်အီၤဂ့ၤဂ့ၤဘၣ်*+ အဃိ ပှၤဟးလၢအဖီခိၣ်​ ဘၣ်ဆၣ်​ ပှၤတသ့ၣ်ညါဝဲဘၣ်.”

၄၅ ဒီးပှၤလၢအသ့ စီၤမိၤၡ့ အတၢ်သိၣ်တၢ်သီတဂၤ တဲဆၢအီၤလၢ “သရၣ်ဧၢ, နတဲ တၢ်ဂ့ၢ်တဖၣ်အံၤန့ၣ်​ မ့ၢ်ဒၣ်​ နတဲဆါပှၤစ့ၢ်ကီးလီၤ.” ၄၆ ယ့ၣ်ၡူး တဲအီၤလၢ “ပှၤလၢအသ့ စီၤမိၤၡ့ အတၢ်သိၣ်တၢ်သီဧၢ, သုဝဲစ့ၢ်ကီး သုကဘၣ်ကီဘၣ်ခဲ မ့ၢ်လၢ သုတီၣ်ထီၣ်​ တၢ်ဝံတၢ်ယိးလၢ ပှၤဂၤယိးဘၣ်အီၤ ကီကီခဲခဲ ဘၣ်ဆၣ်​ မ့မ့ၢ် သုနီၢ်ကစၢ်န့ၣ်​ သုလဲၤထိးအီၤလၢ သုစုနၢတဘိမး တကဲဘၣ်.+

၄၇ “သုမိၢ်ပၢ်ဖံဖု လၢပျၢၤတဖၣ်​ မၤသံဝံတဖၣ်+ ဘၣ်ဆၣ်​ မ့ၢ်လၢ သုတ့ထီၣ်​ တၢ်သွၣ်ခိၣ်လၢ ဝံတဖၣ်အဂီၢ်အဃိ သုကဘၣ်ကီဘၣ်ခဲလီၤ. ၄၈ သုမိၢ်ပၢ်ဖံဖု လၢပျၢၤတဖၣ်​ မၤသံဝံတဖၣ်+ မ့မ့ၢ်သုန့ၣ်​ သုတ့ထီၣ်​ တၢ်သွၣ်ခိၣ်လၢ ဝံတဖၣ်အဂီၢ်လီၤ. အဃိ သုသ့ၣ်ညါတၢ်လၢ သုမိၢ်ပၢ်ဖံဖု လၢပျၢၤတဖၣ်မၤဝဲ ဒီးသုဘၣ်သူၣ်ဘၣ်သးအီၤလီၤ. ၄၉ အဃိ ကစၢ်ယွၤလၢ အကူၣ်တၢ်သ့တဂၤ တဲဝဲလၢ ‘ယကဆှၢလီၤဝံတဖၣ်​ ဒီးတၢ်မၢဖိတဖၣ်လၢ အဝဲသ့ၣ်အအိၣ်လီၤ. ဒီးအဝဲသ့ၣ်​ ကမၤသံဝဲတနီၤ ဒီးကမၤအၢမၤနးဝဲ တနီၤလီၤ. ၅၀ လၢတၢ်ဂ့ၢ်အံၤအဃိ ဝံခဲလၢာ်အသွံၣ်​ စးထီၣ်လၢ ပှၤဟီၣ်ခိၣ်ဖိ အိၣ်ဖျဲၣ်ထီၣ်လၢ ဟီၣ်ခိၣ်ချၢလံၤလံၤ,* ကလီၤတီလၢ ပှၤတစိၤအံၤအခိၣ်လိၤ,+ ၅၁ စးထီၣ်လၢ စီၤဟ့းဘ့းလးအသွံၣ်+ တုၤလီၤလၢ စီၤစကၤရယၤ လၢအဘၣ်​ တၢ်မၤသံအီၤလၢ တၢ်လုၢ်လီၢ်ဒီး တၢ်လုၢ်ဟံၣ်​ အဘၢၣ်စၢၤလီၤ.’+ မ့ၢ်, ယကတဲသု လၢပှၤသ့ၣ်တဖၣ်အံၤ အသွံၣ်အဃိန့ၣ်​ ပှၤတစိၤအံၤ ကဘၣ်တၢ်စံၣ်ညီၣ်အီၤလီၤ.

၅၂ “ပှၤလၢအသ့ စီၤမိၤၡ့ အတၢ်သိၣ်တၢ်သီဧၢ, မ့ၢ်လၢ သုဟံးထီၣ်ကွံာ် တၢ်သ့ၣ်ညါအသီးခွဲး အဃိ သုကဘၣ်ကီဘၣ်ခဲလီၤ. သုနီၢ်ကစၢ် တလဲၤနုာ်လီၤဘၣ်​ ဒီးသုဂုာ်ကျဲးစၢးတြီ ပှၤလၢအအဲၣ်ဒိး လဲၤနုာ်ဝဲတဖၣ်လီၤ.”+

၅၃ ဖဲယ့ၣ်ၡူး ဟးထီၣ်ကွံာ် ဖဲန့ၣ်အခါ ပှၤကွဲးလံာ်ဖိ ဒီးပှၤဖၤရံၤၡဲတဖၣ်​ ကဝီၤဃာ်အီၤ ဒီးဆီၣ်သနံးအီၤဆူၣ်ဆူၣ်​ ဒီးသံကွၢ်အီၤ တၢ်သံကွၢ်အါမးလီၤ. ၅၄ ဒီးအဝဲသ့ၣ်​ ခိးကွၢ်ဝဲယ့ၣ်ၡူး ဒ်သိး ကပာ်ဒ့ၣ်ပာ်ကမၣ်အီၤ လၢအတၢ်ကတိၤလီၤ.+