အ့းဖ့းစူး
၁ ယၤ, စီၤပီလူးန့ၣ် ဒ်ကစၢ်ယွၤ အတၢ်ဘၣ်သးအသိး ယမ့ၢ်ယ့ၣ်ၡူးခရံာ်အတၢ်မၢဖိ ဒီးယကွဲးလံာ်အံၤဆူ ပှၤစီဆှံလၢအသးတီလၢအမ့ၢ် ယ့ၣ်ၡူးခရံာ်အပျဲၢ်အဘီၣ်တဖၣ်လၢ အအိၣ်လၢ ဝ့ၢ်အ့းဖ့းစူးလီၤ.+
၂ မ်သုအိၣ်ဒီး တၢ်သးကညီၤ ဒိၣ်ဒိၣ်မုၢ်မုၢ် ဒီးတၢ်ဃူတၢ်ဖိး လၢအဟဲလၢ ပပၢ်ကစၢ်ယွၤ ဒီးကစၢ်ယ့ၣ်ၡူးခရံာ် အအိၣ်တက့ၢ်.
၃ ပကစၢ်ယ့ၣ်ၡူးခရံာ်အပၢ် လၢအမ့ၢ်စ့ၢ်ကီး အကစၢ်ယွၤတဂၤန့ၣ် မ်အဘၣ် တၢ်စံးထီၣ်ပတြၢၤအီၤတက့ၢ်. အဝဲ ပာ်ထီၣ်ထီပှၤလၢ မူခိၣ်အလီၢ်တဖၣ် ဒီးအဝဲဆိၣ်ဂ့ၤပှၤလၢ တၢ်ဆိၣ်ဂ့ၤခဲလၢာ်လၢ အဟဲခီဖျိသးစီဆှံ, မ့ၢ်လၢ ပမ့ၢ်ခရံာ်အပျဲၢ်အဘီၣ်တဖၣ် အဃိလီၤ.+ ၄ တချုး ပှၤဟီၣ်ခိၣ်ဖိ အိၣ်ဖျဲၣ်ထီၣ်လၢ ဟီၣ်ခိၣ်ချၢဒံးဘၣ်န့ၣ်* အဝဲဃုထၢပှၤလၢ ပကအိၣ်လၢ ခရံာ်အပူၤ ဒ်သိးပကပာ်ဖျါထီၣ် တၢ်အဲၣ်, ဒ်သိး ပကစီဆှံ ဒီးဒ်သိးပသုတအိၣ်ဒီး တၢ်လီၤတူာ်လီၤကာ်+ လၢအမဲာ်ညါတဂ့ၤ အဂီၢ်လီၤ. ၅ ဒ်အတၢ်ဘၣ်သးအသိး+ အဝဲဃုထၢပာ်စၢၤပှၤ+ ဒ်သိးကလုၢ်ဖိပှၤ+ ခီဖျိယ့ၣ်ၡူးခရံာ်လီၤ. ၆ အဝဲမၤဝဲဒ်န့ၣ်န့ၣ် မ့ၢ်ဒ်သိး ပှၤကစံးထီၣ်ပတြၢၤအီၤ ခီဖျိလၢ အသူ အဖိခွါသးဘိ+ ဒ်သိးကပာ်ဖျါထီၣ် အတၢ်သးကညီၤ ဒိၣ်ဒိၣ်မုၢ်မုၢ် လၢပဖီခိၣ်အဃိလီၤ.+ ၇ ခီဖျိလၢ တၢ်ပှ့ၤက့ၤပှၤလၢ ပှၤတဂၤန့ၣ်အသွံၣ်အဃိ ပထူၣ်ဖျဲးထီၣ်လီၤ.+ ဒီးပတၢ်ကမၣ်န့ၣ် ဘၣ်တၢ်ပျၢ်ကွံာ်အီၤ+ မ့ၢ်လၢ ကစၢ်ယွၤအတၢ်သးကညီၤ ဒိၣ်ဒိၣ်မုၢ်မုၢ်လၢ အထူးဝဲတီၤဝဲ အဃိလီၤ.
၈ အဝဲဟ့ၣ်ပှၤ တၢ်သးကညီၤ ဒိၣ်ဒိၣ်မုၢ်မုၢ်အံၤ အါအါဂီၢ်ဂီၢ်ဃုာ်ဒီး တၢ်ကူၣ်သ့ ဒီးတၢ်သ့ၣ်ညါနၢ်ပၢၢ် ခဲလၢာ်လီၤ. ၉ ဒီးအဒုးသ့ၣ်ညါပှၤလၢ တၢ်ခူသူၣ်စီဆှံလၢ+ အဘၣ်ဃးဒီး အတၢ်ဘၣ်သးလီၤ. တၢ်ခူသူၣ်စီဆှံအံၤန့ၣ် ဘၣ်ထွဲဒီးတၢ်လၢ အဝဲအဲၣ်ဒိးမၤဝဲ ဒ်အတၢ်တိာ်ပာ် အိၣ်ဝဲအသိးလီၤ. ၁၀ အတၢ်တိာ်ပာ်မ့ၢ်ဝဲလၢ ဖဲတၢ်ဆၢကတီၢ်လၢ အဘၣ်တၢ်ပာ်ပနီၣ်အီၤ လၢထီၣ်ပှဲၤထီၣ်ဝဲအခါ အဝဲကဒုးအိၣ်ထီၣ် တၢ်ရဲၣ်တၢ်ကျဲၤတခါ ဒ်သိး ကပာ်ဖှိၣ်တၢ်ခဲလၢာ်, တၢ်အိၣ်လၢမူခိၣ်မ့ၢ်ဂ့ၤ, တၢ်အိၣ်လၢ ဟီၣ်ခိၣ်မ့ၢ်ဂ့ၤ လၢခရံာ်အမဲာ်ညါလီၤ.+ မ့ၢ်လီၤ, တၢ်ခဲလၢာ် ကဘၣ်တၢ်ပာ်ဖှိၣ်ထီၣ်အီၤလၢ ခရံာ်အမဲာ်ညါလီၤ. ၁၁ ပဝဲအံၤ ပအိၣ်လၢခရံာ်အပူၤ ဒီးကစၢ်ယွၤပာ်ထီၣ်ပှၤ ဒ်ပှၤန့ၢ်သါဘၣ်တၢ် တဖၣ်အသိးလီၤ.+ ဒီးကစၢ်ယွၤဃုထၢပာ်စၢၤပှၤ ဒ်အတၢ်တိာ်ပာ် အိၣ်ဝဲအသိး ဒီးအဝဲမၤ ကဲထီၣ်လိၣ်ထီၣ် တၢ်ခဲလၢာ် ဒ်အတၢ်ဘၣ်သးအသိးလီၤ. ၁၂ ပဝဲလၢအမ့ၢ် ပှၤအဆိကတၢၢ်တဖၣ်လၢ အမုၢ်လၢ်တၢ်လၢ ခရံာ်န့ၣ် ကစၢ်ယွၤဃုထၢပာ်စၢၤပှၤလၢ ပကကဲထီၣ် တၢ်စံးထီၣ်ပတြၢၤ ဒီးတၢ်လၤကပီၤလၢ ကစၢ်ယွၤအဂီၢ်လီၤ. ၁၃ ဘၣ်ဆၣ် ဖဲသုနၢ်ဟူ တၢ်မ့ၢ်တၢ်တီ လၢအမ့ၢ် တၢ်သးခုကစီၣ် လၢအဘၣ်ဃးဒီး တၢ်အုၣ်က့ၤခီၣ်က့ၤသုအဂ့ၢ် ဝံၤအလီၢ်ခံ သုမုၢ်လၢ်တၢ်လၢ ခရံာ်စ့ၢ်ကီးလီၤ. ဒီးသုစူၢ်က့ၤနာ်က့ၤတၢ်ဝံၤဒီး ခီဖျိလၢ ခရံာ်အဃိ သုဘၣ် တၢ်စဲပနီၣ်သုလၢ+ သးစီဆှံ လၢကစၢ်ယွၤအၢၣ်လီၤပာ်စၢၤဝဲလီၤ. ၁၄ သးစီဆှံန့ၣ် လီၤဂာ်ဒ်သိးဒီး တၢ်အၢၣ်လီၤတခါ* လၢအပာ်ဖျါထီၣ်တၢ်လၢ ပကန့ၢ်သါဘၣ်လၢ ခါဆူညါလီၤ.+ ဒီးတၢ်စဲပနီၣ်အံၤန့ၣ် မ့ၢ်ဒ်သိး ကမၤထူၣ်ဖျဲးထီၣ်ကွံာ် ကစၢ်ယွၤ အပှၤဂီၢ်မုၢ်+ ခီဖျိလၢ တၢ်ပှ့ၤက့ၤအဃိလီၤ.+ တၢ်အဝဲန့ၣ် ကဲထီၣ် တၢ်စံးထီၣ်ပတြၢၤ ဒီးတၢ်လၤကပီၤလၢ ကစၢ်ယွၤအဂီၢ်လီၤ.
၁၅ အဃိ စးထီၣ်ဖဲယနၢ်ဟူ သုတၢ်နာ်ကစၢ်ယ့ၣ်ၡူး ဒီးတၢ်အဲၣ်လၢ သုပာ်ဖျါထီၣ်လၢ ပှၤစီဆှံခဲလၢာ် အဖီခိၣ်အဂ့ၢ်အခါ ၁၆ ယစံးဘျုးစံးဖှိၣ် ကစၢ်ယွၤ လၢသုဃိ ထီဘိလီၤ. ဒီးယဆဲးဃ့ထုကဖၣ်န့ၢ်တၢ်လၢ သုဂီၢ်ထီဘိလီၤ. ၁၇ ယမၤဒ်န့ၣ် မ့ၢ်ဒ်သိး တၢ်လၤတၢ်ကပီၤအပၢ် လၢအမ့ၢ် ပကစၢ် ယ့ၣ်ၡူးခရံာ် အကစၢ်ယွၤန့ၣ် ကဟ့ၣ်သုတၢ်ကူၣ်သ့ ဒီးကလီၣ်ဖျါထီၣ်န့ၢ်သု တၢ်သ့ၣ်ညါနၢ်ပၢၢ် ဘၣ်ဃးဒီးအဂ့ၢ် လီၤတံၢ်လီၤဆဲးအဂီၢ်လီၤ.+ ၁၈ အဝဲမၤကပီၤထီၣ် သုသးအမဲာ်ချံ အဃိသုသ့ၣ်ညါလၢ အဝဲကိးန့ၢ်သုဆူ တၢ်မုၢ်လၢ် မနုၤတမံၤလဲၣ် ဒီးသုသ့ၣ်ညါ တၢ်ထူးတၢ်တီၤ* လၢအအိၣ်ဒီးအလၤကပီၤတဖၣ် လၢအဝဲကဟ့ၣ်လီၤဝဲ ဒ်တၢ်န့ၢ်သါအသိး လၢပှၤစီဆှံတဖၣ်အဂီၢ်လီၤ.+ ၁၉ ဒီးသုကသ့ၣ်ညါလၢ အစိကမီၤလၢ ပဝဲပှၤစူၢ်က့ၤနာ်က့ၤတၢ်တဖၣ် အဖီခိၣ်န့ၣ် မ့ၢ်အဒိၣ်ဝဲ ဒီးအဆူၣ်ဝဲ ထဲလဲၣ်န့ၣ်လီၤ.+ တၢ်စိဒိၣ်ကမီၤထီအံၤ ဘၣ်တၢ်ပာ်ဖျါထီၣ်အီၤ ၂၀ ဖဲအဝဲ ဒုးဂဲၤဆၢထၢၣ်က့ၤ ခရံာ်လၢတၢ်သံ ဒီးဒုးဆ့ၣ်နီၤအီၤလၢ အစုထွဲ+ လၢမူခိၣ်အလီၢ်လီၤ. ၂၁ ဖဲန့ၣ် ကစၢ်ယွၤပာ်ထီၣ်ထီခရံာ် ထီန့ၢ်ဒံး ကယဲၢ်တၢ်ပၢတၢ်ပြး, တၢ်န့ၢ်စိန့ၢ်ကမီၤ, ပှၤလၢအိၣ်ဒီး တၢ်စိတၢ်ကမီၤ, ကစၢ်တဖၣ် ဒီးတၢ်အမံၤခဲလၢာ်အဖီခိၣ်+ စၢၢ်တလၢၢ် လၢဆၢကတီၢ်ခဲအံၤ တကးဒံးဘၣ် လၢခါဆူညါ စ့ၢ်ကီးလီၤ. ၂၂ ကစၢ်ယွၤ ပာ်လီၤတၢ်ခဲလၢာ်လၢ ခရံာ်အခီၣ်ဖီလာ်+ ဒီးဒုးကဲထီၣ်အီၤလၢ တၢ်အိၣ်ဖှိၣ်အခိၣ်လၢ တၢ်ခဲလၢာ်အပူၤလီၤ.+ ၂၃ တၢ်အိၣ်ဖှိၣ်န့ၣ် မ့ၢ်ခရံာ်အနီၢ်ခိ+ ဒီးလၢဝဲပှဲၤဝဲဒီးခရံာ် အတၢ်ဂ့ၤတၢ်ဝါ ဒီးခရံာ်မၤပှဲၤထီၣ် တၢ်ခဲလၢာ်လၢ ကျဲကိးဘိဒဲးလီၤ.