ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါယူၤ ၃–၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ| ကလၤတံ ၄–၆
“တၢ်အဒိအတဲာ် အံၤအခီပညီအိၣ်လၢပဂီၢ်”
(ကလၤတံ ၄:၂၄, ၂၅) တၢ်န့ၣ်တဖၣ်မ့ၢ်အဒိအတဲာ်လီၤ. အဂ့ၢ်ဒ်အံၤ, ပိာ်မုၣ်တဖၣ်အံၤမ့ၢ်တၢ်အၢၣ်လီၤအီလီၤ ခံမံၤန့ၣ်လီၤ. အဝဲတမံၤလၢ အဟဲလၢကစၢၢ်စံၤနါလၢ အဆံးစၢ်အဖိလၢ ကုၢ်အလီၢ်န့ၣ်, မ့ၢ်နီၢ်ဟၤကၢ်လီၤ. ၂၅ အဂ့ၢ်ဒ်အံၤ, နီၢ်ဟၤကၢ်မ့ၢ်ကစၢၢ်စံၤနါလၢကီၢ်ဧ့ရ့း, ဒီးဒ်သိးဒီးယရူၤၡလ့ၣ်လၢ အအိၣ်ခဲကနံၣ်အံၤ, အဂ့ၢ်ဒ်အံၤ, ကဲကုၢ်ဒီးအဖိတဖၣ်လီၤ.
it-1 ကဘျံးပၤ ၁၀၁၈ အဆၢ ၂
နီၢ်ဟၤကၢ်
ဒ်စီၤပီလူး ပာ်ဖျါဝဲအသိး နီၢ်ဟၤကၢ်န့ၣ် မ့ၢ်တၢ်အဒိလၢ အခၢၣ်စးဝဲ ပှၤအံၣ်စရ့လးဖိတဖၣ်လၢ အမၤတၢ်အၢၣ်လီၤအီၤလီၤ ဒီးယဟိဝၤယွၤ ခီဖျိစီၤမိၤၡ့ အတၢ်သိၣ်တၢ်သီလၢ ဘၣ်တၢ်ဟ့ၣ်လီၤအီၤဖဲ ကစၢၢ်စံၤနါန့ၣ်လီၤ. လၢတၢ်သိၣ်တၢ်သီအံၤအဃိ အဝဲသ့ၣ်ကဲထီၣ် ယဟိဝၤယွၤအတၢ်ဒီး အိၣ်ဖျဲၣ်ထီၣ်ဝဲ “ဖိလၢ ကုၢ်အလီၢ်” လီၤ. မ့ၢ်လၢပှၤအံၣ်စရ့လးဖိတဖၣ် မၤကမၣ်တၢ်အဃိ မၤထွဲဝဲ စီၤမိၤၡ့အတၢ်သိၣ်တၢ်သီတန့ၢ်ဘၣ်. အဝဲသ့ၣ် အိၣ်လၢတၢ်သိၣ်တၢ်သီအဖီလာ်အဃိ တမ့ၢ်ပှၤသဘျ့ဘၣ်. အဝဲသ့ၣ်မ့ၢ်တၢ်ဒဲးဘးအကုၢ်အဃိ ဘၣ်သံဝဲလီၤ. (ယိၤ. ၈:၃၄; ရိ. ၈:၁-၃) ဝ့ၢ်ယရူၤၡလ့ၣ်လၢ စီၤပီလူးအစိၤန့ၣ် ဘၣ်တၢ်ဒိလီၤအီၤလၢ နီၢ်ဟၤကၢ်လီၤ. ဝ့ၢ်ခိၣ်ယရူၤၡလ့ၣ်လၢ ဘၣ်တၢ်ဒိလီၤအီၤလၢ ပှၤအံၣ်စရ့လးဖိ အတၢ်ကရၢကရိန့ၣ် ဘၣ်ကဲကုၢ်ဃုာ်ဒီး အဖိတဖၣ်လီၤ. ခရံာ်ဖိလၢ အဘၣ်တၢ်ဒိးဖှူအီၤလၢ သးစီဆှံတဖၣ်န့ၣ်မ့ၢ် “ယရူၤၡလ့ၣ်လၢထး” အဖိတဖၣ်လီၤ. ယရူၤၡလ့ၣ်လၢထးန့ၣ် ဘၣ်တၢ်ဒိလီၤအီၤ ဒ်ကစၢ်ယွၤအမါအသိးလီၤ. ယရူၤၡလ့ၣ်အံၤ လီၤဂာ်ဒ် ပှၤသဘျ့မုၣ် နီၢ်စၤရါ လၢတကဲဘၣ်ကုၢ်နီတဘျီဘၣ်လီၤ. ဘၣ်ဆၣ် ဒ်စီၤယံးၡမၤဧ့လး မၤအၢမၤနးဝဲ စီၤအံၤစဲးအသိး ယရူၤၡလ့ၣ်လၢထး အဖိတဖၣ်လၢ ဒိးန့ၢ်ဘၣ်တၢ်သဘျ့ခီဖျိ ဖိခွါန့ၣ် ဘၣ်တၢ်မၤအၢမၤနးအီၤလၢ ယရူၤၡလ့ၣ်လၢအမ့ၢ်ကုၢ်အဖိတဖၣ်လီၤ. နီၢ်ဟၤကၢ်ဒီးအဖိခွါ ဘၣ်တၢ်နီထုးထီၣ်အီၤန့ၣ် မ့ၢ်တၢ်အဒိလၢ ကစၢ်ယွၤတသူလၢၤဝဲ ပှၤအံၣ်စရ့လးဖိတဖၣ်ဘၣ်လီၤ.—ကလၤ. ၄:၂၁-၃၁; ကွၢ်စ့ၢ်ကီး ယိၤ. ၈:၃၁-၄၀.
(ကလၤတံ ၄:၂၆, ၂၇) မ့မ့ၢ်ယရူၤၡလ့ၣ်လၢထးန့ၣ်, အိၣ်သဘျ့ဒီး မ့ၢ်ပဝဲဒၣ် ခဲလၢာ်အမိၢ်လီၤ. ၂၇ အဂ့ၢ်ဒ်အံၤ, တၢ်ကွဲးအသး, ပှၤတူာ်ဖိလၢ အတဆံးစၢ်ဘၣ် တဂၤဧၢ, သူၣ်ဖှံသးညီတက့ၢ်. ပိာ်မုၣ်လၢအတဘၣ်တၢ်ဟုးဆါဘၣ်ဧၢ, ထုထီၣ်နကလုၢ်ဒီးကိးပသူထီၣ်တက့ၢ်. အဂ့ၢ်ဒ်အံၤ, ပိာ်မုၣ်လၢ အအိၣ်သယုၢ်တဂၤ, အဖိအါန့ၢ်ပိာ်မုၣ်လၢအအိၣ်ဒီးအဝၤတက့ၢ်လီၤ.
အိၣ်ဒီးတၢ်နာ် အဂၢၢ်ကျၢၤလၢ ဘီမုၢ်အဖီခိၣ်
၁၁ ဖဲစီၤအၤဘြၤဟၣ် အဖိအလံၤသ့ၣ်တဖၣ် န့ၢ်သါဘၣ် ကီၢ်တၢ်စံးပာ်အခါ တၢ်အၢၣ်လီၤအီလီၤ ဘၣ်ဃးဒီး စီၤအၤဘြၤဟၣ်န့ၣ် ဟဲလၢပှဲၤထီၣ်ဝဲ အဆိကတၢၢ်လီၤ. ဘၣ်ဆၣ် လံာ်စီဆှံ ပာ်ဖျါဝဲလၢ တၢ်အၢၣ်လီၤအီလီၤအံၤ ကဟဲလၢပှဲၤထီၣ်ဝဲလၢ နီၢ်သးတခီစ့ၢ်ကီးလီၤ. (ကလၤ. ၄:၂၂-၂၅) တၢ်မၢဖိပီလူး တဲဖျါထီၣ်ဝဲလၢ အၤဘြၤဟၣ်အစၢၤအသွဲၣ် တၢတကူာ်န့ၣ်မ့ၢ်ဝဲ ခရံာ် ဒီးခံကူာ်တကူာ်န့ၣ်မ့ၢ်ဝဲ ခရံာ်ဖိလၢအဘၣ်တၢ်ဒိးဖှူအီၤလၢ သးစီဆှံလၢအမ့ၢ် ပှၤ ၁၄၄,၀၀၀ လီၤ. (ကလၤ. ၃:၁၆, ၂၉; လီၣ်. ၅:၉, ၁၀; ၁၄:၁, ၄) ပိာ်မုၣ်လၢ အဒုးအိၣ်ထီၣ်ချံသၣ်န့ၣ်မ့ၢ် “ယရူၤၡလ့ၣ်လၢထး” လၢအမ့ၢ် ယွၤအတၢ်ကရၢကရိလၢမူခိၣ် လၢဘၣ်တၢ်ကရၢကရိထီၣ်အီၤလၢ ပှၤနီၢ်သးဖိလၢအတီတဖၣ်လီၤ. (ကလၤ. ၄:၂၆, ၃၁) ဒ်ကစၢ်ယွၤမၤတၢ်အၢၣ်လီၤအီလီၤဒီး စီၤအၤဘြၤဟၣ်အသိး ပိာ်မုၣ်အချံအသၣ် ကဒုးအိၣ်ထီၣ်တၢ်ဆိၣ်ဂ့ၤ လီၤထူလီၤယိာ်လၢ ပှၤဟီၣ်ခိၣ်ဖိတဖၣ်အဂီၢ်လီၤ.
(ကလၤတံ ၄:၂၈-၃၁) မ့မ့ၢ်ပဝဲဒၣ်အံၤ, ပုၢ်သ့ၣ်ဝဲၢ်သ့ၣ်ဧၢ, ဒ်စီၤအံၤစဲးအသိးန့ၣ်, ပမ့ၢ်တၢ်စံးပာ်အဖိလီၤ. ၂၉ ဘၣ်ဆၣ်ဒီး ဒ်အကတီၢ်ဖဲန့ၣ်အသိး, ပှၤလၢအအိၣ်ဖျဲၣ်လၢ တၢ်ဖံးတၢ်ညၣ် တဂၤန့ၣ်မၤအၢမၤသီပှၤလၢအအိၣ်ဖျဲၣ် လၢသးတဂၤလီၤ. ဒီးခဲကနံၣ်အံၤ, တၢ်မၤအသးဒ်န့ၣ်အသိးစ့ၢ်ကီးလီၤ. ၃၀ ဘၣ်ဆၣ်ဒီးတၢ်ကွဲးအသးစံးဝဲဒ်လဲၣ်. ဟီထီၣ်ကွံာ်ကုၢ်မုၣ်ဒီး အဖိခွါတက့ၢ်. အဂ့ၢ်ဒ်အံၤ, ကုၢ်မုၣ်အဖိခွါတဒိးန့ၢ်ဃုာ်တၢ်ဟ့ၣ်သါဒီးပှၤသဘျ့မုၣ်အဖိခွါဘၣ်. ၃၁ မၤသးဒ်န့ၣ်ဒီး, ပုၢ်သ့ၣ်ဝဲၢ်သ့ၣ်ဧၢ, ပတမ့ၢ်ဘၣ် ကုၢ်မုၣ်အဖိဘၣ်, မ့ၢ်ပှၤသဘျ့မုၣ်အဖိလီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ကလၤတံ ၄:၆) ဒီးသုမ့ၢ်ဖိခွါအဃိဒီး, ယွၤမၢလီၤဖိခွါအသးဆူပသးကံၢ်ပူၤ လၢအကိးထီၣ်, အးဘၤ, ပၢ်ဧၢ, လီၤ.
တၢး၀၉ ၄/၁ ကဘျံးပၤ ၁၃
မ့ၢ်နသ့ၣ်ညါဧါ
ဘၣ်မနုၤအဃိ လၢယ့ၣ်ၡူးအတၢ်ထုကဖၣ်အပူၤ အဝဲကိးအပၢ်လၢ “အးဘၤ, ပၢ်ဧၢ” လဲၣ်.
ပှၤအၤရၣ်ဖိ အတၢ်ကတိၤ “အးဘၤ” န့ၣ်အခီပညီကမ့ၢ် “ပၢ်” မ့တမ့ၢ် “အိပၢ်” လီၤ. လံာ်စီဆှံ ပာ်ဖျါထီၣ်ဝဲ တၢ်ကတိၤအံၤအိၣ်ဝဲသၢဘျီ ဒီးကိးဘျီဒဲးန့ၣ် ဘၣ်ထွဲလိာ်အသးဒီး တၢ်ဃ့ဘါထုကဖၣ် ဒီးဘၣ်တၢ်သူအီၤလၢ ပၢ်အိၣ်လၢမူခိၣ် ယဟိဝၤယွၤအဂီၢ်လီၤ. တၢ်ကတိၤအံၤ အခီပညီမ့ၢ်မနုၤလဲၣ်.
လံာ်တဘ့ၣ် (The International Standard Bible Encyclopedia) ပာ်ဖျါဝဲလၢ “လၢယ့ၣ်ၡူးအစိၤ ‘အးဘၤ’ န့ၣ်မ့ၢ်ဝဲ တၢ်ကတိၤမုၢ်ဆ့ၣ်မုၢ်ဂီၤ ဒီးမ့ၢ်တၢ်ကတိၤလၢ ဖိသၣ်တဖၣ် ကိးဝဲအပၢ်လၢ တၢ်ယူးယီၣ်ပာ်ကဲအပူၤလီၤ.” မ့ၢ်တၢ်ကတိၤလၢအမုာ် ဒီးမ့ၢ်တၢ်ကတိၤလၢဖိသၣ် မၤလိဝဲအဆိကတၢၢ်တဖၣ် အကျါတဖျၢၣ်လီၤ. ယ့ၣ်ၡူးဃ့ဘါထုကဖၣ်တၢ်ဆူ အပၢ်အအိၣ် လၢတၢ်သူၣ်ဆူၣ်သးဆူၣ်အပူၤအခါ သူဝဲ တၢ်ကတိၤအံၤလီၤ. လၢက့ၤသစ့ၤမနၤတၤသၣ်လီၢ်အပူၤ, တချုးလၢယ့ၣ်ၡူးသံဒံးဘၣ် စှၤကိာ်နၣ်ရံၣ် ဖဲအဝဲဃ့ဘါထုကဖၣ်ဆူ ယဟိဝၤယွၤအိၣ်အခါ ကိးဝဲအပၢ်လၢ “အးဘၤ, ပၢ်ဧၢ” လီၤ.—မၢ်ကူး ၁၄:၃၆.
လံာ်လၢထးတဘ့ၣ်အံၤ ဆဲးပာ်ဖျါဝဲလၢ “လၢကြံးဒီးရိမ့ၤအစိၤ ပှၤယူဒၤဖိတဖၣ် အလံာ်လဲၢ်အပူၤ တသူဝဲကစၢ်ယွၤလၢ ‘အးဘၤ’ ဘၣ်. မ့ၢ်လၢပှၤမ့ၢ်ကိး ကစၢ်ယွၤ ဒ်န့ၣ်န့ၣ် မ့ၢ်တၢ်တယူးယီၣ်ပာ်ကဲ ယွၤအဃိလီၤ.” ဘၣ်ဆၣ်ဖဲ “ယ့ၣ်ၡူး . . . ဃ့ဘါထုကဖၣ်အခါ သူဝဲတၢ်ကတိၤအံၤန့ၣ် မ့ၢ်ဒၣ်အဝဲပာ်ဖျါထီၣ်ဝဲလၢ အဝဲဒီးကစၢ်ယွၤအိၣ်ဒီး တၢ်ရ့လိာ်သးဘူးဘူးတံၢ်တံၢ် ဒ်အစံးတ့ၢ်ဝဲအသိးလီၤ.” လံာ်လၢတၢ်မၢဖိပီလူး ကွဲးဝဲတဖၣ်အပူၤန့ၣ် တၢ်ကတိၤ “အးဘၤ” အိၣ်ဝဲခံဘျီအဃိ ဖျါလၢခရံာ်ဖိလၢတၢ်မၢဖိအစိၤတဖၣ်စ့ၢ်ကီး သူဝဲတၢ်ကတိၤအံၤလၢ အတၢ်ဃ့ထုကဖၣ်အပူၤလီၤ.—ရိမ့ၤ ၈:၁၅; ကလၤတံ ၄:၆.
(ကလၤတံ ၆:၁၇) တုၤအံၤဆူညါ, သုတမၤတံာ်တာ်ယၤ နီတဂၤတဂ့ၤ. အဂ့ၢ်ဒ်အံၤယစိာ်တၢ်အပူၤလီၢ်တဖၣ်ဘၣ်ဃးဒီး ကစၢ်ယ့ၣ်ၡူး, လၢယနီၢ်ခိအလိၤလီၤ.
တၢး၁၀ ၁၁/၁ ကဘျံးပၤ ၁၅
မ့ၢ်နသ့ၣ်ညါဧါ
စီၤပီလူးတဲဝဲ “ယစိာ်တၢ်အပူၤလီၢ်တဖၣ် ဘၣ်ဃးဒီး ကစၢ်ယ့ၣ်ၡူး” န့ၣ်အဲၣ်ဒိးတဲဝဲတၢ်မနုၤလဲၣ်.—ကလၤတံ ၆:၁၇.
▪ ခရံာ်ဖိလၢတၢ်မၢဖိအစိၤတဖၣ်န့ၣ် ကနၢ်ပၢၢ်ဝဲ စီၤပီလူးအတၢ်ကတိၤအံၤ အခီပညီအမၠိမၠိလီၤ. အဒိ လၢပျၢၤန့ၣ် ပှၤလၢဘၣ်တၢ်ဖီၣ်န့ၢ်အီၤလၢ တၢ်ဒုး, ပှၤလၢအဂုာ်ဟံးန့ၢ် တၢ်လုၢ်ဟံၣ်အတၢ်ဖိတၢ်လံၤ ဒီးကုၢ်လၢအဃ့ၢ်ကွံာ်လၢ အကစၢ်အအိၣ်တဖၣ် ဒ်သိးပှၤတိၢ်နီၣ်အီၤကဘၣ်အဂီၢ် ပှၤမၤပနီၣ်အီၤလၢထးကိၢ်လီၤ. ပှၤလၢအဘၣ် တၢ်မၤနီၣ်အီၤလၢထးကိၢ်တဖၣ်န့ၣ် ပှၤပာ်အီၤဒ် ပှၤလၢအလၤကပီၤတအိၣ်ဘၣ်လီၤ.
ဘၣ်ဆၣ် ထးကိၢ်အတၢ်ပနီၣ်န့ၣ် ပှၤတထံၣ်အီၤ ဒ်တၢ်လၢအလၤကပီၤတအိၣ်အသိးထီဘိဘၣ်. ပှၤလၢပျၢၤတဖၣ်န့ၣ် ဒ်သိးပှၤကသ့ၣ်ညါအီၤလၢ အဝဲသ့ၣ်မ့ၢ် ကလုာ်မနုၤလဲၣ်, ဘါတၢ်ဘူၣ်တၢ်ဘါမနုၤလဲၣ်အဂီၢ် မၤဝဲထးကိၢ်အတၢ်ပနီၣ်တဖၣ်န့ၣ်လီၤ. လံာ်တဘ့ၣ် (Theological Dictionary of the New Testament) ပာ်ဖျါဝဲလၢ “အဒိ, ဆံရံယါကလုာ်ဒူၣ်တဖၣ်န့ၣ် ဒ်သိးပှၤကသ့ၣ်ညါအီၤလၢ အမ့ၢ်ပှၤဘူၣ်ထီၣ်ဘါထီၣ် ယွၤဟးဒ့း (Hadad) ဒီး အထါက့းဒ့း (Atargatis) အဂီၢ် အဝဲသ့ၣ်မၤဝဲထးကိၢ်အတၢ်ပနီၣ်လၢ အစုဒ့ကိာ် မ့တမ့ၢ် အကိာ်လိၤန့ၣ်လီၤ . . . ပှၤလၢအဘူၣ်ထီၣ်ဘါထီၣ် ကြံးအကစၢ်ယွၤ ဒၤယနါစံး (Dionysus) တဖၣ်န့ၣ် မၤဝဲထးကိၢ်အတၢ်ပနီၣ်လၢ သ့ၣ်လၣ်အဂီၤလီၤ.”
စိၤခဲအံၤ ပှၤကူၣ်ဘၣ်ကူၣ်သ့အါဂၤ နာ်ဝဲလၢ စီၤပီလူးအတၢ်ကတိၤ တၢ်ပူၤလီၢ်တဖၣ်န့ၣ် ကအဲၣ်ဒိးတဲဝဲ တၢ်ပူၤလီၢ်ပူၤကျဲလၢ အဒိးန့ၢ်ဘၣ်ဝဲဖဲ ပှၤမၤအၢမၤနးအီၤ လၢအမၤမံးၡ့ၣ်နရ့ၣ်အခါလီၤ. (၂ ကရံၣ်သူး ၁၁:၂၃-၂၇) ဘၣ်ဆၣ် ဘၣ်သ့ၣ်သ့ၣ် စီၤပီလူးကအဲၣ်ဒိးတဲဝဲလၢ ပှၤသ့ၣ်ညါနီၤဖးအီၤလၢ အမ့ၢ်ခရံာ်ဖိတဂၤန့ၣ် တမ့ၢ်လၢအပူၤလီၢ်ပူၤကျဲအဃိဘၣ်, ခီဖျိအတၢ်အိၣ်မူသကဲာ်ပဝးအဃိလီၤ.
တၢ်ဖးလံာ်စီဆှံ
(ကလၤတံ ၄:၁-၂၀) ဘၣ်ဆၣ်ဒီးယစံး, ပှၤန့ၢ်ဘၣ်သါတၢ်တဂၤ, ဖဲအမ့ၢ်ဖိသၣ်အဖၢမုၢ်ဒီး, မ့ၢ်တၢ်ခဲလၢာ်အကစၢ်နာ်သက့ဒီး, တလီၤဆီဘၣ်ဒီး ကုၢ်တဂၤဘၣ်. ၂ မ့မ့ၢ်အမုၢ်အလါလၢအပၢ်စံၣ်ညီၣ်ပာ်ဝဲ တချုးဘၣ်ဒံးဘၣ်ဒီး, မ့ၢ်အအိၣ်လၢပှၤပၢၤတၢ်, ဒီးပှၤကွၢ်တၢ်အဖီလာ်လီၤ. ၃ ဒ်န့ၣ်အသိးလၢပမ့ၢ်ဖိသၣ်အခါန့ၣ်, ပကဲကုၢ်လၢတၢ်အမိၢ်ပှၢ်ဘၣ်ဃးဒီး ဟီၣ်ခိၣ်အဖီလာ်လီၤ. ၄ မ့မ့ၢ်တုၤအမုၢ်အလါပှဲၤထီၣ်ဒီး, ယွၤမၢလီၤအဖိခွါ အိၣ်ဖျဲၣ်လၢပိာ်မုၣ်, အိၣ်ဖျဲၣ်လၢတၢ်သိၣ်တၢ်သီအဖီလာ်, ၅ ဒ်သိးအကပှ့ၤက့ၤပှၤအိၣ် လၢတၢ်သိၣ်တၢ်သီအဖီလာ်, ဒ်သိးပကန့ၢ်ဘၣ်ဖိခွါအလီၢ်လီၤ. ၆ ဒီးသုမ့ၢ်ဖိခွါအဃိဒီး, ယွၤမၢလီၤဖိခွါအသးဆူပသးကံၢ်ပူၤ လၢအကိးထီၣ်, အးဘၤ, ပၢ်ဧၢ, လီၤ. ၇ မၤသးဒ်န့ၣ်ဒီး နတမ့ၢ်လၢၤဘၣ်ကုၢ်ဘၣ်. နမ့ၢ်ဖိခွါလီၤ. ဒီးနမ့မ့ၢ်ဖိခွါဒီး, နမ့ၢ်ပှၤန့ၢ်သါတၢ်လၢယွၤအဃိလီၤ. ၈ ဘၣ်ဆၣ်ဒီးအခါဖဲသုတသ့ၣ်ဘၣ်ယွၤဘၣ်န့ၣ်, သုကဲကုၢ်လၢကစၢ် လၢအတမ့ၢ်ဘၣ်ကစၢ် တဖၣ်န့ၣ်လီၤ. ၉ မ့မ့ၢ်ခဲကနံၣ်အံၤ, သုသ့ၣ်ညါယွၤ, ဒ်ပစံးတၢ်အသိး, ယွၤသ့ၣ်ညါတ့ၢ်သု သတးဒီး, ဘၣ်မနုၤလၢသုဃၣ်ကဒါက့ၤ သုသးဆူ တၢ်အမိၢ်ပှၢ်လၢ အဂံၢ်အဘါစၢ်ဒီးဖှီၣ်ဝဲယာ်ဝဲလၢ သုသးအိၣ်ကဲက့ၤကဒီးကုၢ်လၢအဖီလာ်လဲၣ်. ၁၀ သုတိၢ်န့ၢ်မုၢ်နံၤတဖၣ်, ဒီးလါ, ဒီးတၢ်အခ့အခါ, ဒီးနံၣ်တဖၣ်လီၤ. ၁၁ ယပျံၤတၢ်လၢသုဂ့ၢ်လၢ ယကျဲးစၢးတၢ်လၢသုဂီၢ် ကမ့ၢ်ဘၣ်ဖုးတၢ်ကလီကလီလီၤ. ၁၂ ကဲထီၣ်ဒ်ယၤအသိး, အဂ့ၢ်ဒ်အံၤ, ယမ့ၢ်စ့ၢ်ကီး ဒ်သုအသိး, ပုၢ်သ့ၣ်ဝဲၢ်သ့ၣ်ဧၢ, ယဃ့ကညးသုလီၤ. တမ့ၢ်ဘၣ်သုမၤအၢတ့ၢ်ယၤနီတမံၤဘၣ်. ၁၃ ဒီးလၢထံးလၢသီယဖံးယညၣ်တအိၣ်ဆူၣ်ဘၣ်ဒီး, ယစံၣ်တဲၤတဲလီၤ တၢ်သးခုအကစီၣ် လၢသုန့ၣ်, သုသ့ၣ်ညါလီၤ. ၁၄ ဒီးတၢ်လ့ပစီအိၣ်လၢ ယဖံးယညၣ်အပူၤန့ၣ် သုတမၤတရီတပါဘၣ်, သုတညိကွံာ်ဘၣ်ယၤဘၣ်, သုတူၢ်လိာ်ယၤဒ် ယွၤအကလူးအသိးဒ်ယ့ၣ်ၡူးခရံာ်အသိးန့ၣ်လီၤ. ၁၅ မၤသးဒ်န့ၣ်ဒီး, သုတၢ်ခုၣ်တၢ်မုာ်န့ၣ်, မ့ၢ်အအိၣ်ဖဲလဲၣ်. အဂ့ၢ်ဒ်အံၤ, ယအုၣ်ယသးလၢသု, လၢသုအူခွဲးထီၣ်သုမဲာ် ဒီးဟ့ၣ်လီၤယၤမ့ၢ်သ့ဒီး, အခါဖဲန့ၣ်သုကမၤလီၤ. ၁၆ မ့ၢ်ယကဲထီၣ်သုဒုၣ်သုဒါလၢ ယစံးဘၣ်သုလၢတၢ်မ့ၢ်တၢ်တီ အဃိဧါ. ၁၇ အဝဲသ့ၣ်ဂဲၤလိာ်လၢသုဂီၢ်တမံၤန့ၣ်, တဂ့ၤဘၣ်ဝဲဘၣ်. မ့မ့ၢ်အသးအိၣ်ဟီထီၣ်ကွံာ်သု ဒ်သိးသုကဂဲၤလိာ် သုသးလၢအဂီၢ်လီၤ. ၁၈ ဘၣ်ဆၣ်ဒီးဂ့ၤဂဲၤလိာ်သုသးလၢ တၢ်ဂ့ၤအဂီၢ်တဘိယူၢ်ဃီ, ဒီးတမ့ၢ်ဘၣ်ထဲ ယအိၣ်ဒီးသုအဖၢမုၢ်န့ၣ်ဧိၤဘၣ်. ၁၉ ယဖိဆံးလၢ ယဟုးဆါ ကဒီးလၢသုဃိတုၤခရံာ်အက့ၢ်အဂီၤလိၣ်ထီၣ်အသးလၢ သုပူၤသ့ၣ်ဧၢ. ၂၀ တၢ်မိၣ်အိၣ်ဘၣ်ယသးဒီးသု ခဲကနံၣ်အံၤ, ဒီးမၤလီၤဆီယကလုၢ် ဒီးသုလီၤ. အဂ့ၢ်ဒ်အံၤ, ယသးဒ့ဒီလၢ သုဂ့ၢ်လီၤ.
တၢး၁၂ ၃/၁၅ ကဘျံးပၤ ၃၀-၃၁
ပှၤဖးလံာ်ဖိတဖၣ် အတၢ်သံကွၢ်
ခရံာ်ဖိတဂၤ အလုၢ်လၢ်မ့ၢ်အိၣ်လၢ အကွၢ်တၢ်ဂီၤဘ့ၣ်ဆ့န့ၣ် ကဘၣ်တၢ်ဟီထီၣ်ကွံာ်အီၤလၢ ခရံာ်ဖိတၢ်အိၣ်ဖှိၣ်အပူၤဧါ.
ဘၣ်သ့ၣ်သ့ၣ်ကဘၣ် တၢ်ဟီထီၣ်ကွံာ်အီၤလီၤ. လၢတၢ်န့ၣ်အဃိ အရ့ဒိၣ်ဒိၣ်မးလၢ ပကဘၣ်ဟးဆှဲး တၢ်ကွၢ်တၢ်ဂီၤဘ့ၣ်ဆ့တဖၣ်လီၤ. တၢ်ကွၢ်တၢ်ဂီၤဘ့ၣ်ဆ့န့ၣ် ပၣ်ဃုာ်ဒီး တၢ်ကွၢ်တၢ်ဂီၤ မ့တမ့ၢ် ပှၤကွဲးလံာ်လၢ အလီၤသးဘၣ်အၢလၢ လံာ်, မဲးကစံ, တၢ်ဂီၤမူ ဒီးအ့ထၢၣ်နဲးအပူၤတဖၣ်လီၤ.
လံာ်လဲၢ်လၢ ဘၣ်ဃးဒီး တၢ်ဂီၤဘ့ၣ်ဆ့တဖၣ်န့ၣ် ရၤလီၤအသးလၢ ဟီၣ်ခိၣ်ဒီဘ့ၣ်လီၤ. ပှၤကွၢ်အီၤလၢ အ့ထၢၣ်နဲးအပူၤသ့ ညီညီဖိအဃိ ပှၤလၢအကွၢ်တၢ်ဂီၤဘ့ၣ်ဆ့တဖၣ် အါထီၣ်ဝဲလီၤ. ခရံာ်ဖိသးပှၢ် ဒီးသးစၢ်တနီၤန့ၣ် လၢတၢ်တပာ်သူၣ်ပာ်သးအပူၤ အဝဲသ့ၣ်ကွၢ်ဘၣ်ဝဲ တၢ်ဂီၤဘ့ၣ်ဆ့တဖၣ်လၢ အ့ထၢၣ်နဲးအပူၤ သနာ်က့ တနီၤန့ၣ် အဝဲသ့ၣ်နုာ်လီၤကွၢ်ဝဲလၢ အသးဒၣ်ဝဲလီၤ. အဝဲသ့ၣ်ကွၢ်ဝဲ တၢ်သ့ၣ်တဖၣ်အံၤလၢ အဟံၣ် မ့တမ့ၢ် တၢ်မၤလီၢ်လၢပှၤတထံၣ်အီၤအလီၢ်အဃိ တတူၢ်ဘၣ်ဝဲတၢ်နီတမံၤဘၣ်. ဘၣ်မနုၤအဃိ တၢ်ဂီၤဘ့ၣ်ဆ့တဖၣ်အံၤ ကဲထီၣ်တၢ်လီၤဘၣ်ယိၣ်လၢ ခရံာ်ဖိတဖၣ်အဂီၢ်လဲၣ်.
တၢ်ဂ့ၢ်အံၤမ့ၢ်တၢ်လၢအရ့ဒိၣ်န့ၣ် ပထံၣ်ဘၣ်လၢ ယ့ၣ်ၡူးအတၢ်ဟ့ၣ်ပလီၢ်အပူၤလီၤ. “ကယဲၢ်ပှၤလၢအကွၢ်ပိာ်မုၣ်ဒီး အသးကတၢကိးဂၤဒဲးန့ၣ် အဲၣ်ဘၢလံ တၢ်ဒီးအီၤလၢအသးကံၢ်ပူၤလံ.” (မး. ၅:၂၈) ပှၤလၢအဆီဟံၣ်ဆီဃီတဖၣ် အတၢ်မံဃုာ်အိၣ်ဃုာ်န့ၣ် မ့ၢ်တၢ်လၢအကြၢးဝဲဘၣ်ဝဲ ဒီးဒုးသးခုအဝဲသ့ၣ်လီၤ. (ကတိၤ. ၅:၁၅-၁၉; ၁ ကရံၣ်. ၇:၂-၅) ဘၣ်ဆၣ် တၢ်ဂီၤဘ့ၣ်ဆ့တဖၣ်န့ၣ် ပာ်ဖျါထီၣ်ဝဲ တၢ်မၤကမၣ်မုၣ်ကမၣ်ခွါ ဒီးဒုးအိၣ်ထီၣ်တၢ်ဆိကမိၣ်အကမၣ် လၢယ့ၣ်ၡူးဟ့ၣ်ပလီၢ်တ့ၢ်ဝဲလီၤ. လၢတၢ်န့ၣ်အဃိ တၢ်ဖး မ့တမ့ၢ် တၢ်ကွၢ်တၢ်ဂီၤဘ့ၣ်ဆ့န့ၣ် ထီဒါလိာ်အသးဒီး ကစၢ်ယွၤအတၢ်သိၣ်တၢ်သီလီၤ. ကစၢ်ယွၤ မၤလိာ်ဝဲဒ်အံၤ “မၤသးဒ်န့ၣ်ဒီး, မၤသံသုဂီၤတဖၣ်လၢဟီၣ်ခိၣ်ချၢ, ဒ်ပစံးတၢ်အသိး, တၢ်မၤကမၣ်မုၣ်ကမၣ်ခွါ, တၢ်အဲၣ်တလ့ၤအဲၣ်တဘီ, တၢ်သးကတၢ, တၢ်သးကွံတၢ်လၢအအၢ, ဒီးတၢ်သးကွံစုလီၢ်ခီၣ်ခိၣ်လၢအမ့ၢ် တၢ်ဘါတၢ်ဂီၤန့ၣ်တက့ၢ်.”—ကလီး. ၃:၅.
ခရံာ်ဖိတဂၤ မ့ၢ်ကွၢ်ဘၣ်တၢ်ဂီၤဘ့ၣ်ဆ့ တဘျီ မ့တမ့ၢ် ခံဘျီမီၣ်. အဝဲအတၢ်အိၣ်သးန့ၣ် လီၤဘၣ်ယိၣ်လီၤ. လၢညါစီၤအၤစာ်စ့ၢ်ကီး လီၤဘၣ်လၢတၢ်အိၣ်သးလၢ အလီၤဘၣ်ယိၣ်အပူၤလီၤ. လၢခံအဝဲတဲဝဲလၢ “တစဲးဖိဒီး ယခီၣ်ကဘၣ်တိၢ်, ဒီးဘူးဒီး ယခီၣ်ကလီၤတလံာ်လီၤ.” ခရံာ်ဖိတဂၤ မ့ၢ်ကွၢ်ဝဲတၢ်ဂီၤလၢ ပိာ်မုၣ်ပိာ်ခွါအကူးအသိးတအိၣ်ဘၣ် မ့တမ့ၢ် ပိာ်မုၣ်ပိာ်ခွါမံဃုာ်အိၣ်ဃုာ်လိာ်အသးန့ၣ် အဝဲအသးလၢ အသ့ၣ်ညါဒၣ်တၢ်တကဆှီလၢၤဘၣ်. ဘၣ်သ့ၣ်သ့ၣ် အတၢ်ရ့လိာ်သးဒီး ကစၢ်ယွၤစ့ၢ်ကီး ကဟးဂီၤဝဲလီၤ. အဝဲကတူၢ်ဘၣ်ဝဲ ဒ်စီၤအၤစာ်တဲဝဲအသိး “ယဘၣ်တၢ်တီၢ် ကိးမုၢ်နံၤဒဲး, ဒီးယဘၣ်တၢ်သိၣ်ဃီၣ် ကိးဂီၤဒဲးလီၤ.”—စံး. ၇၃:၂, ၁၄
ခရံာ်ဖိတဂၤ အလုၢ်အလၢ်မ့ၢ်အိၣ်လၢ အကွၢ်တၢ်ဂီၤဘ့ၣ်ဆ့န့ၣ် အဝဲတၢ်ဖံးတၢ်မၤတဖၣ် မၤဘၣ်ဒိအတၢ်ရ့လိာ်သးဒီး ယဟိဝၤယွၤသ့လီၤ. အဃိအဝဲကြၢးသ့ၣ်ညါဝဲလၢ ကဘၣ်ဃ့တၢ်မၤစၢၤလီၤ. အဝဲဒိးန့ၢ်ဘၣ်တၢ်မၤစၢၤသ့လၢ တၢ်အိၣ်ဖှိၣ်သးပှၢ်တဖၣ်အအိၣ်လီၤ “ပှၤကညီတဂၤဂၤမ့ၢ် ဘၣ်တၢ်ချုးန့ၢ်အီၤလၢတၢ်လီၤကမၣ်တမံၤမံၤဒီး, သုဝဲလၢအဘၣ်ဃးဒီးသးန့ၣ်, ဝံၣ်ဆၢထၢၣ်က့ၤအီၤအိၣ်ဒီး သုသူၣ်စူၤသးစူၤ, ဒီးကွၢ်လီၤနသးဒၣ်နဲဒ်သိး နသုတဘၣ် တၢ်လ့ပစီတဂ့ၤန့ၣ် စ့ၢ်ကီးတက့ၢ်.” (ကလၤ. ၆:၁) တၢ်အိၣ်ဖှိၣ်သးပှၢ်တဂၤ မ့တမ့ၢ် ခံဂၤ ဟ့ၣ်အီၤတၢ်မၤစၢၤလၢ အလိၣ်ဘၣ်ဝဲတဖၣ်သ့လီၤ. အဝဲနာ်ဝဲသ့လၢ တၢ်အိၣ်ဖှိၣ်သးပှၢ်တဖၣ် အတၢ်ထုကဖၣ်န့ၣ် “အုၣ်က့ၤခီၣ်က့ၤပှၤဆါ” ဒီး “အတၢ်ဒဲးဘးလၢ အမၤတ့ၢ်လံမ့ၢ်အိၣ်ဒီး, တၢ်ကပျၢ်ကွံာ်အီၤလီၤ.” (ယၤ. ၅:၁၃-၁၅) ခီဖျိလၢ စီၤအၤစာ်အိၣ်ဘူးဒီး ကစၢ်ယွၤအဃိ ဒိးန့ၢ်ဘၣ်တၢ်အဘျုးလီၤ. ပှၤလၢအကွၢ်တၢ်ဂီၤဘ့ၣ်ဆ့တဖၣ်စ့ၢ်ကီး မ့ၢ်တူၢ်လိာ်ဝဲ တၢ်မၤစၢၤ ဒ်သိးအဝဲသ့ၣ် ပာ်ပတုာ်ဝဲ တၢ်ကွၢ်တၢ်ဂီၤဘ့ၣ်ဆ့ကန့ၢ်အဂီၢ်န့ၣ် အဝဲသ့ၣ်အတၢ်ရ့လိာ်သးဒီး ယဟိဝၤယွၤ ကဂ့ၤထီၣ်ဝဲ ဒီးကဒိးန့ၢ်ဘၣ်တၢ်အဘျုးလီၤ.—စံး. ၇၃:၂၈.
ဘၣ်ဆၣ်, တၢ်မၢဖိပီလူး တဲဝဲပှၤတနီၤလၢ “တပီၢ်ယၢ်လီၤက့ၤအသးဘၣ်လၢ အတၢ်အဲၣ်တလ့ၤအဲၣ်တဘီ, ဒီးအတၢ်မၤကမၣ်မုၣ်ကမၣ်ခွါ, ဒီးအတၢ်မၤထွဲအသးကလိၢ်ကလ့ၤအခံ” အဂ့ၢ်လီၤ. (၂ ကရံၣ်. ၁၂:၂၁) ကြံးအတၢ်ကတိၤလၢ ဘၣ်တၢ်ကွဲးကျိာ်က့ၤလၢ “တၢ်အဲၣ်တလ့ၤအဲၣ်တဘီ” န့ၣ် ပှၤကူၣ်ဘၣ်ကူၣ်သ့တဂၤ (Professor Marvin R. Vincent) ကွဲးဝဲလၢ တၢ်ကတိၤအံၤ အခီပညီအိၣ်လၢ “တၢ်ဘၣ်အၢဘၣ်သီ, တၢ်လီၤသးဘၣ်အၢ” လီၤ. တၢ်ဂီၤဘ့ၣ်ဆ့န့ၣ် ပၣ်ဃုာ်ဒီး ပိာ်မုၣ်ကဒဲကဒဲ ပိာ်ခွါကဒဲကဒဲ တၢ်မံဃုာ်လိာ်သး, တၢ်ပာ်ဖှိၣ်ထီၣ်သးဒီး မၤကမၣ်မုၣ်ကမၣ်ခွါ, တၢ်မံဃုာ်ဒီး ဆၣ်ဖိကီၢ်ဖိ, ဖိသၣ်တၢ်ဂီၤဘ့ၣ်ဆ့, တၢ်ပာ်ဖှိၣ်ထီၣ်သးဒီး မၤတရီတပါပှၤဂၤ, တၢ်မၤဆူၣ်မၤစိးပိာ်မုၣ်, မၤဆူးမၤဆါပှၤ မ့တမ့ၢ် စၢတံၢ်ပှၤဝံၤ မံဃုာ်ဒီးပှၤတဖၣ်လီၤ. လၢစီၤပီလူးအစိၤခါ ပှၤတနီၤန့ၣ် “အသူၣ်ခံးအသးခံး” ဒီး “အမဲာ်တဆှးလၢၤဘၣ်ဒီး, ဟ့ၣ်လီၤဒၣ်အသးလၢအသးကတၢအပူၤ, ဒ်သိး အကဂုာ်မၤ ကယဲၢ်တၢ်အဲၣ်တလ့ၤ အဲၣ်တဘီခဲလၢာ်လီၤ.”—အ့း. ၄:၁၈, ၁၉.
ဖဲ ကလၤတံ ၅:၁၉ န့ၣ်စီၤပီလူး ပာ်ဖျါထီၣ်ဝဲ “တၢ်အဲၣ်တလ့ၤအဲၣ်တဘီ” အဂ့ၢ်လီၤ. ပှၤကူၣ်ဘၣ်ကူၣ်သ့တဂၤ တဲဝဲလၢ တၢ်ကတိၤအံၤ အဲၣ်ဒိးတဲဝဲ တၢ်သးကွံတၢ်လၢ အထီဒါလိာ်အသးဒီး န့ဆၢၣ်န့ၣ်လီၤ. တၢ်လၢအဘၣ်တၢ်ပာ်ဖျါထီၣ်လၢ တၢ်ကွဲးအံၤအပူၤတဖၣ်န့ၣ် မ့ၢ်တၢ်လၢ အလီၤသးဘၣ်အၢတဖၣ်လီၤ. တၢ်သ့ၣ်တဖၣ်န့ၣ် မ့ၢ်တၢ်လၢ အဒုးအိၣ်ထီၣ် တၢ်သူၣ်လီသးကွံလၢ အတကြၢးတဘၣ်န့ၣ် ခရံာ်ဖိခဲလၢာ် ကတူၢ်လိာ်ဝဲလီၤ. ကလၤတံ ၅:၁၉-၂၁ ပာ်ဖျါဝဲလၢ ပှၤလၢအမၤတၢ်သ့ၣ်တဖၣ်အံၤန့ၣ် “တန့ၢ်ဘၣ်သါ ယွၤအဘီအမုၢ်ဘၣ်.” ပှၤတဂၤ မ့ၢ်ညီနုၢ်လၢ တၢ်ကွၢ်တၢ်ဂီၤဘ့ၣ်ဆ့ ဒီးကွၢ်ဝဲမ့ၢ်ယံာ်လံန့ၣ် ပှၤကြၢးမၤအီၤဒ်လဲၣ်. အဝဲမ့ၢ်တပီၢ်ယၢ်လီၤက့ၤအသးဘၣ် ဒီးမ့ၢ်ဆဲးကွၢ်ဝဲန့ၣ် ဒ်သိးတၢ်အိၣ်ဖှိၣ်ကအိၣ်ကဆှီ ဒီးကဘၣ်တၢ်ဒီသဒၢအဂီၢ် ပှၤကဘၣ်ဟီထီၣ်ကွံာ်အီၤလီၤ.—၁ ကရံၣ်. ၅:၅, ၁၁.
ဘၣ်ဆၣ် လီၤသးခုဒိၣ်မးလၢ ပှၤတနီၤလၢ အကွၢ်တၢ်ဂီၤဘ့ၣ်ဆ့န့ၣ် ဃ့တၢ်မၤစၢၤလၢ တၢ်အိၣ်ဖှိၣ်သးပှၢ်တဖၣ်အအိၣ် ဒီးဆီတလဲအသးလီၤ. ယ့ၣ်ၡူးတဲဘၣ် စၢ်ဒံတၢ်အိၣ်ဖှိၣ်လၢ “တၢ်လၢအအိၣ်လီၤတဲာ်လၢ အကသံတ့ၢ်တဖၣ်န့ၣ်, ဒုးဆူၣ်ထီၣ်အဂံၢ်အဘါတက့ၢ်, . . . နဒိးန့ၢ်တၢ်ဒီးနနၢ်ဟူတၢ်ဒ်လဲၣ်ဒ်လဲၣ်န့ၣ် သ့ၣ်နီၣ်ထီၣ်တက့ၢ်. ဒီးတိၢ်န့ၢ်တၢ်, ဒီးပီၢ်ယၢ်လီၤက့ၤနသးတက့ၢ်. နမ့ၢ်တဆိးသီဘၣ်ဒီး, . . . ဒ်တၢ်ဟုၣ်တၢ်ဘျၣ်အသိး, ဒီးယကဟဲဆူနအိၣ်နၣ်ရံၣ်ဖဲလဲၣ်ဖဲလဲၣ်န့ၣ်, နတသ့ၣ်ညါဘၣ်. (လီၣ်. ၃:၂, ၃) ပှၤတဂၤ ပီၢ်ယၢ်လီၤက့ၤအသး ဒီးထူၣ်ဖျဲးထီၣ်ကွံာ်လၢ တၢ်ကွၢ်တၢ်ဂီၤဘ့ၣ်ဆ့ အပျံၤသကွီၢ်ပူၤသ့ဝဲလီၤ.—ယူဒၤ ၂၂, ၂၃.
ပဝဲကိးဂၤဒဲး ပမ့ၢ်ပာ်လီၤပသးဂၢၢ်ဂၢၢ်ကျၢၤကျၢၤလၢ ပသုတလဲၤဘူးဒီး တၢ်လီၤဘၣ်ယိၣ်အလီၢ်တဂ့ၤန့ၣ် အဂ့ၤကတၢၢ်လီၤ. ပဝဲကိးဂၤဒဲး ပကြၢးပာ်လီၤပသးလၢ ပကဟးဆှဲးတၢ်ကွၢ် တၢ်ဂီၤဘ့ၣ်ဆ့န့ၣ်လီၤ.
လါယူၤ ၁၀–၁၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | အ့းဖ့းစူး ၁–၃
“ယဟိဝၤယွၤ အတၢ်ရဲၣ်တၢ်ကျဲၤ ဒီးအတၢ်မၤ”
(အ့းဖ့းစူး ၁:၈, ၉) လၢအမၤအါထီၣ်ဝဲလၢပဂီၢ်, လၢတၢ်ကူၣ်သ့ဒီး တၢ်သ့ၣ်ညါနၢ်ပၢၢ်တၢ်အပူၤလီၤ. ၉ ဒီးဒုးသ့ၣ်ညါပှၤလၢ အသးဒၣ်ဝဲအတၢ်ခူသူၣ်ဒ်တၢ်ဘၣ်အသးလၢ အတိာ်ပာ် လၢအပူၤဒၣ်ဝဲအသိး,
it-2 ကဘျံးပၤ ၈၃၇ အဆၢ ၄
တၢ်ခူသူၣ်
မ့းၡံအၤဘီမုၢ်. လၢစီၤပီလူးအတၢ်ကွဲးအပူၤ အဝဲပာ်ဖျါထီၣ်ဝဲ ခရံာ်အတၢ်ခူသူၣ်စီဆှံအဂ့ၢ်လီၤ. ဖဲ အ့းဖ့းစူး ၁:၉-၁၁ န့ၣ်အဝဲတဲဝဲ “တၢ်ခူသူၣ်” န့ၣ်မ့ၢ်ဒ်တၢ်ဘၣ် ကစၢ်ယွၤအသးအသိး ဒီးစံးဝဲ “ဒ်သိးဖဲအမုၢ်အလါပှဲၤထီၣ်ဒီး, အကဒုးအိၣ်ဖှိၣ်တၢ်ခဲလၢာ် လၢအခိၣ်တဂၤဃီခရံာ်အပူၤ, တၢ်အိၣ်လၢမူခိၣ်ဒီး တၢ်အိၣ်လၢဟီၣ်ခိၣ်လီၤ. လၢအဝဲဒၣ်အပူၤန့ၣ်, ပဘၣ်တၢ်ပာ်ပာ်ပှၤ, ဒ်ပှၤလၢ အမၤတၢ်ခဲလၢာ် ဖဲအသးဒၣ်ဝဲတဂၤ တိာ်ပာ်ဝဲအသိး, ဒီးပကဲထီၣ်တၢ်န့ၢ်သါ” လီၤ. “တၢ်ခူသူၣ်” န့ၣ်မ့ၢ်ဝဲ တၢ်ပၢတၢ်ပြးတခါလၢ အမ့ၢ်ယွၤအဘီအမုၢ်လီၤ. “တၢ်အိၣ်လၢမူခိၣ်” လၢစီၤပီလူးတဲဝဲန့ၣ် မ့ၢ်ပှၤတဖၣ်လၢကန့ၢ်သါဘၣ် မူခိၣ်အဘီမုၢ် ဒီးခရံာ်လီၤ. “တၢ်အိၣ်လၢဟီၣ်ခိၣ်” န့ၣ်ကမ့ၢ် ဘီမုၢ်အံၤအထံဖိကီၢ်ဖိလၢ အအိၣ်လၢဟီၣ်ခိၣ်တဖၣ်လီၤ. ဖဲယ့ၣ်ၡူးတဲဝဲ အပျဲၢ်အဘီၣ်တဖၣ်လၢ “ယွၤအဘီအမုၢ်အတၢ်ခူသူၣ်န့ၣ်, တၢ်ဟ့ၣ်သ့ၣ်ညါသု” အခါမ့ၢ်ဒၣ် အဝဲဒုးသ့ၣ်ညါအပျဲၢ်အဘီၣ်တဖၣ်လၢ တၢ်ခူသူၣ်န့ၣ် ဘၣ်ဃးဒီးယွၤအဘီအမုၢ်လီၤ.—မၢ်. ၄:၁၁.
(အ့းဖ့းစူး ၁:၁၀) ဒ်သိးဖဲအမုၢ်အလါပှဲၤထီၣ်ဒီး, အကဒုးအိၣ်ဖှိၣ်တၢ်ခဲလၢာ် လၢအခိၣ်တဂၤဃီခရံာ်အပူၤ, တၢ်အိၣ်လၢမူခိၣ်ဒီး တၢ်အိၣ်လၢဟီၣ်ခိၣ်လီၤ.
တၢး၁၂ ၇/၁၅ ကဘျံးပၤ ၂၇-၂၈ အဆၢ ၃-၄
“ယွၤတဂၤဃီ” ပာ်ဖှိၣ်အဟံၣ်ဖိဃီဖိ
၃ စီၤမိၤၡ့စံးဘၣ် ပှၤအံၣ်စရ့လးဖိတဖၣ်လၢ “ယွၤပကစၢ်န့ၣ် မ့ၢ်ယွၤတဂၤဃီလီၤ.” (၅ မိၤ. ၆:၄) ယဟိဝၤယွၤ အတၢ်မၤဒီးအတၢ်တိာ်ပာ်န့ၣ် လီၤပလိာ်လိာ်အသးလီၤ. ယဟိဝၤယွၤ စးထီၣ်ကတဲာ်ကတီၤဝဲလၢ ကပာ်ဖှိၣ်ဝဲအတၢ်ဘၣ်တ့လၢ အိၣ်ဒီးတၢ်သ့ၣ်ညါနၢ်ပၢၢ်တဖၣ် လၢအိၣ်လၢမူခိၣ်မ့ၢ်ဂ့ၤ, ဟီၣ်ခိၣ်မ့ၢ်ဂ့ၤ ဒ်ဟံၣ်ဖိဃီဖိတဒူၣ်အသိးလီၤ. တၢ်ကတဲာ်ကတီၤအံၤ ဘၣ်တၢ်ကိးအီၤလၢ “တၢ်ရဲၣ်တၢ်ကျဲၤ” လီၤ. (ဖး အ့းဖ့းစူး ၁:၈-၁၀, ခ့ခါစှီၤကျိာ် တက့ၢ်.) တၢ်ပၢတၢ်ဆှၢအံၤ အိၣ်ဝဲခံကူာ်လီၤ. အဆိကတၢၢ်တကူာ်န့ၣ် မ့ၢ်တၢ်ကတဲာ်ကတီၤ ပှၤဘၣ်တၢ်ဒိးဖှူအီၤတဖၣ်လၢ မူခိၣ်တၢ်အိၣ်မူအဂီၢ် ဒီးအဝဲသ့ၣ် အခိၣ်မ့ၢ်ခရံာ်လီၤ. တၢ်ကတဲာ်ကတီၤအံၤ စးထီၣ်အသးလၢ ခ.န ၃၃ ဘူၣ်ယဲၢ်ဆံအနံၤ ဖဲယဟိဝၤယွၤ ပာ်ဖှိၣ်ပှၤလၢ ကပၢဃုာ်တၢ်ဒီးခရံာ် လၢမူခိၣ်တဖၣ်အခါလီၤ. (မၤတၢ် ၂:၁-၄) ပှၤလၢအဘၣ်တၢ်ဒိးဖှူအီၤတဖၣ်န့ၣ် ကစၢ်ယွၤထံၣ်အီၤ ဒ်ပှၤတီပှၤလိၤ ခီဖျိလၢခရံာ်အတၢ်ပှ့ၤက့ၤအဃိလီၤ. အဝဲသ့ၣ် သ့ၣ်ညါလီၤအသးလၢ အဘၣ်တၢ်လုၢ်ဖိအီၤဒ် “ယွၤအဖိတဖၣ်” အသိးလီၤ.—ရိ. ၃:၂၃, ၂၄; ၅:၁; ၈:၁၅-၁၇.
၄ ခံကူာ်တကူာ်န့ၣ် မ့ၢ်ဝဲကစၢ်ယွၤကတဲာ်ကတီၤဝဲ ပှၤလၢကအိၣ်မူဘၣ်လၢဟီၣ်ခိၣ်ချၢလၢ မ့းၡံအၤဘီမုၢ်အတၢ်ပၢဖီလာ်လီၤ. “ပှၤဂီၢ်မုၢ်ဖးဒိၣ်” န့ၣ်မ့ၢ်ပှၤအဆိကတၢၢ်တဖုလၢ ကအိၣ်မူဘၣ်လၢ ဟီၣ်ခိၣ်ပၤရဒံစူးအပူၤလီၤ. (လီၣ်. ၇:၉, ၁၃-၁၇; ၂၁:၁-၅) လၢခရံာ်အတၢ်ပၢ အနံၣ်တကထိအတီၢ်ပူၤ အဝဲသ့ၣ်ကအိၣ်ဘၣ်ဒီး ပှၤအကကွဲၢ်တဖၣ်လၢ အဂဲၤဆၢထၢၣ်သမူထီၣ်က့ၤန့ၣ်လီၤ. (လီၣ်. ၂၀:၁၂, ၁၃) တၢ်ဂဲၤဆၢထၢၣ်သမူထီၣ်က့ၤန့ၣ် မ့ၢ်ဝဲတၢ်ခွဲးတၢ်ယာ်လၢခံတခါလၢ ပကပာ်ဖျါထီၣ် တၢ်ဃူတၢ်ဖိးလီၤ. ပှၤဂီၢ်မုၢ်ဖးဒိၣ် ဒီးပှၤလၢအဂဲၤဆၢထၢၣ်သမူထီၣ်က့ၤတဖၣ်န့ၣ် မ့ၢ်ဝဲ “တၢ်အိၣ်လၢဟီၣ်ခိၣ်” လီၤ. အနံၣ်တကထိအကတၢၢ်န့ၣ် အဝဲသ့ၣ်ကဘၣ်တၢ်မၤကွၢ်အီၤ ဒီးပှၤလၢအအိၣ်ဒီးတၢ်သးတီတဖၣ်န့ၣ် ကဘၣ်တၢ်လုၢ်ဖိအီၤဒ် “ယွၤအဖိတဖၣ်” အသိးလီၤ.—ရိ. ၈:၂၁; လီၣ်. ၂၀:၇, ၈.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(အ့းဖ့းစူး ၃:၁၃) မၤသးဒ်န့ၣ်ဒီး, ယဃ့ကညးလၢ သုသုတလီၤဘှါလၢ ယတၢ်နးတၢ်ဖှီၣ်လၢယဒိးလၢသုဃိန့ၣ်တဂ့ၤ. အဝဲန့ၣ်မ့ၢ်သုလၤသုကပီၤလီၤ.
တၢး၁၃ ၂/၁၅ ကဘျံးပၤ ၂၈ အဆၢ ၁၅
ဒ်သိးနသုတဒိးန့ၢ်ဘၣ် တၢ်လၤကပီၤတဂ့ၤအဂီၢ် တဘၣ်ပျဲတၢ်လၢ ကမၤတံာ်တာ်နၤတဂ့ၤ
၁၅ ပမ့ၢ်မၤ ယဟိဝၤယွၤအတၢ်မၤလၢ တၢ်သူၣ်ဆူၣ်သးဆူၣ်အပူၤန့ၣ် ကကဲထီၣ်တၢ်မၤစၢၤလၢ ပှၤဂၤကအိၣ်ဒီးအလၤကပီၤအဂီၢ်လီၤ. စီၤပီလူး ကွဲးဝဲလံာ်ဆူ အ့းဖ့းစူးတၢ်အိၣ်ဖှိၣ်အအိၣ်ဒ်အံၤ “ယဃ့ကညးလၢ သုသုတလီၤဘှါလၢ ယတၢ်နးတၢ်ဖှီၣ်လၢ ယဒိးလၢသုဃိန့ၣ်တဂ့ၤ. အဝဲန့ၣ်မ့ၢ်သုလၤသုကပီၤလီၤ.” (အ့း. ၃:၁၃) ဘၣ်မနုၤအဃိ စီၤပီလူးတဲဝဲလၢ အတၢ်နးတၢ်ဖှီၣ်န့ၣ် ကဲထီၣ် ‘တၢ်လၤကပီၤ’ လၢပှၤအ့းဖ့းစူးဖိတဖၣ်အဂီၢ်လဲၣ်. စီၤပီလူး စံၣ်တဲၤတဲလီၤတၢ်လၢ တၢ်ကီတၢ်ခဲအပူၤအဃိ မ့ၢ်ဒၣ်အဝဲပာ်ဖျါထီၣ်ဝဲလၢ တၢ်လၢအလုၢ်ဒိၣ်ပှ့ၤဒိၣ်ကတၢၢ်လၢ ခရံာ်ဖိအတၢ်အိၣ်မူပူၤန့ၣ် မ့ၢ်တၢ်စံၣ်တဲၤတဲလီၤတၢ်မၤလီၤ. ဖဲစီၤပီလူး ထံၣ်ဘၣ်တၢ်ကီတၢ်ခဲအခါ အဝဲမ့ၢ်တဆဲး စံၣ်တဲၤတဲလီၤတၢ်ဘၣ်န့ၣ် ဒီပုၢ်ဝဲၢ်သ့ၣ်တဖၣ် ကဆိကမိၣ်ဝဲလၢ အဝဲသ့ၣ်အတၢ်ရ့လိာ်သးဒီး ယဟိဝၤယွၤ, တၢ်စံၣ်တဲၤတဲလီၤတၢ်မၤ ဒီးအဝဲသ့ၣ်အတၢ်မုၢ်လၢ်န့ၣ် အရ့တဒိၣ်ဘၣ်. စီၤပီလူး အဒိအတဲာ်လၢ ဘၣ်ဃးဒီးတၢ်တူၢ်န့ၢ်ခီၣ်ကဲန့ၣ် ပာ်ဖျါထီၣ်ဝဲလၢ ပှၤကကဲထီၣ် ခရံာ်အပျဲၢ်အဘီၣ်အဂီၢ် ပှၤကဘၣ်တူၢ်ဆါပှၤသးလီၤ.
(အ့းဖ့းစူး ၃:၁၉) ဒီးဒ်သိးသုကသ့ၣ်ညါခရံာ်အတၢ်အဲၣ်လၢ ပသ့ၣ်ညါလၢာ်တသ့ဘၣ်, ဒ်သိးသုကလၢထီၣ်ပှဲၤထီၣ်ဒီး ယွၤအတၢ်လၢ တၢ်ပှဲၤခဲလၢာ်လီၤ.
cl ကဘျံးပၤ ၂၉၉ အဆၢ ၂၁
“သ့ၣ်ညါခရံာ်အတၢ်အဲၣ်”
၂၁ ကြံးအတၢ်ကတိၤလၢ ဘၣ်တၢ်ကွဲးကျိာ်က့ၤလၢ “သ့ၣ်ညါ” န့ၣ်အခီပညီအိၣ်လၢ “တၢ်အဘျုးလၢပှၤဒိးန့ၢ် ခီဖျိတၢ်လဲၤခီဖျိ” လီၤ. ဒ်ယ့ၣ်ၡူးအသိး ပမ့ၢ်ပာ်ဖျါထီၣ်တၢ်အဲၣ် ခီဖျိပဟ့ၣ်လီၤပသးလၢပှၤဂၤအဂီၢ်, မၤလၢပှဲၤပှၤဂၤအတၢ်လိၣ်ဘၣ်လၢ တၢ်သူၣ်အိၣ်သးအိၣ်အပူၤ, ပျၢ်ပှၤဂၤအတၢ်ကမၣ်လၢ ပသးဒီဖျၢၣ်န့ၣ် ပကနၢ်ပၢၢ်ထီၣ် ယ့ၣ်ၡူးအတၢ်တူၢ်ဘၣ် နီၢ်နီၢ်လီၤ. ပမ့ၢ်မၤဒ်အံၤန့ၣ်ပ “ကသ့ၣ်ညါခရံာ်အတၢ်အဲၣ်လၢ ပသ့ၣ်ညါလၢာ်တသ့ဘၣ်” လီၤ. ပကဘၣ်သ့ၣ်နီၣ်ထီဘိလၢ ပမ့ၢ်လီၤဂာ်ဒီးခရံာ်ဒံးယံာ် ဒီးပကဘူးထီၣ်ဒီး ယဟိဝၤယွၤဒံးအါထီၣ်လီၤ.
တၢ်ဖးလံာ်စီဆှံ
(အ့းဖ့းစူး ၁:၁-၁၄) ယ့ၣ်ၡူးခရံာ်အပှၤတၢ်မၢဖိဖဲယွၤအသး, ယၤစီၤပီလူး, စံးဘၣ်ပှၤစီဆှံလၢ အအိၣ်လၢအ့းဖ့းစူးအပူၤ, ဒီးပှၤလၢ အစူၢ်က့ၤနာ်က့ၤယ့ၣ်ၡူးခရံာ်န့ၣ်, ၂ မ်တၢ်ဘျုးတၢ်ဖှိၣ်ဒီး တၢ်ဃူတၢ်ဖိးလၢ ပပၢ်ယွၤဒီးကစၢ်ယ့ၣ်ၡူးခရံာ်န့ၣ်, ဘၣ်သုတက့ၢ်. ၃ ယွၤ, ပကစၢ်ယ့ၣ်ၡူးခရံာ်အပၢ်, လၢအဆိၣ်ဂ့ၤပှၤလၢ ကယဲၢ်သးအတၢ်ဆိၣ်ဂ့ၤ လၢမူခိၣ်အလီၢ်တဖၣ်, လၢခရံာ်အပူၤန့ၣ်, မ်အဘၣ်တၢ်ဆိၣ်ဂ့ၤတက့ၢ်. ၄ ဒ်အဃုထၢပှၤလၢအဝဲဒၣ်အပူၤ လၢဟီၣ်ခိၣ်အခီၣ်ထံးတချုးကဲထီၣ်ဒံးဘၣ်, ဒ်သိးပကစီဆှံ, ဒီးတသံၣ်သူမီၢ်ကျာ်ဘၣ် လၢအမဲာ်ညါ, လၢတၢ်အဲၣ်တၢ်ကွံအပူၤအသိးလီၤ. ၅ အဝဲဒၣ်ပာ်ပာ်ပှၤလၢဖိအလီၢ်လၢခရံာ်အဃိ, လၢအဂီၢ်ဒၣ်ဝဲ, ဖဲဒၣ်အသးဂ့ၤအသိး, ၆ ဒ်သိးပကကဲထီၣ် တၢ်စံးထီၣ်ပတြၢၤအဘျုးလၤအဖှိၣ်ကပီၤ လၢအဟ့ၣ်ပှၤလၢ ပှၤလၢတၢ်အဲၣ်အီၤတဂၤအပူၤန့ၣ်လီၤ. ၇ လၢအဝဲဒၣ်အပူၤ, ပအိၣ်ဒီးတၢ်ပှ့ၤက့ၤပှၤလၢအသွံၣ်, တၢ်ပျၢ်ပတၢ်ကမၣ်, ဒ်အဘျုးထူးအဖှိၣ်တီၤအသိး, ၈ လၢအမၤအါထီၣ်ဝဲလၢပဂီၢ်, လၢတၢ်ကူၣ်သ့ဒီး တၢ်သ့ၣ်ညါနၢ်ပၢၢ်တၢ်အပူၤလီၤ. ၉ ဒီးဒုးသ့ၣ်ညါပှၤလၢ အသးဒၣ်ဝဲအတၢ်ခူသူၣ်ဒ်တၢ်ဘၣ်အသးလၢ အတိာ်ပာ် လၢအပူၤဒၣ်ဝဲအသိး, ၁၀ ဒ်သိးဖဲအမုၢ်အလါပှဲၤထီၣ်ဒီး, အကဒုးအိၣ်ဖှိၣ်တၢ်ခဲလၢာ် လၢအခိၣ်တဂၤဃီခရံာ်အပူၤ, တၢ်အိၣ်လၢမူခိၣ်ဒီး တၢ်အိၣ်လၢဟီၣ်ခိၣ်လီၤ. ၁၁ လၢအဝဲဒၣ်အပူၤန့ၣ်, ပဘၣ်တၢ်ပာ်ပာ်ပှၤ, ဒ်ပှၤလၢ အမၤတၢ်ခဲလၢာ် ဖဲအသးဒၣ်ဝဲတဂၤ တိာ်ပာ်ဝဲအသိး, ဒီးပကဲထီၣ်တၢ်န့ၢ်သါ, ၁၂ ဒ်သိးပဝဲဒၣ်, လၢအမုၢ်လၢ်တၢ်ဆိလၢ ခရံာ်အပူၤ, ကကဲထီၣ်လၢ တၢ်စံးထီၣ်ပတြၢၤအလၤကပီၤအဂီၢ်လီၤ. ၁၃ လၢအဝဲဒၣ်အပူၤ, သုဝဲသ့ၣ်စ့ၢ်ကီးနၢ်ဟူ တၢ်မ့ၢ်တၢ်တီအကလုၢ်အကထါ, တၢ်အုၣ်က့ၤခီၣ်က့ၤသုအတၢ်သးခု အကစီၣ်ဒီး, သုစူၢ်က့ၤနာ်က့ၤစ့ၢ်ကီးတၢ်ဝံၤဒီး, သုဘၣ်တၢ်ဃံၤဃာ်သုလၢသးစီဆှံ ဘၣ်ဃးဒီးအတၢ်စံးပာ်န့ၣ်လီၤ. ၁၄ အဝဲန့ၣ်မ့ၢ်တၢ်ဟ့ၣ်ကီၤလၢပတၢ်န့ၢ်သါအဂ့ၢ်, တုၤလီၤလၢပန့ၢ်တၢ်လၢ တၢ်ပှ့ၤပာ်လၢပဂီၢ်, လၢတၢ်စံးထီၣ်ပတြၢၤအဝဲဒၣ်အလၤအကပီၤအဂ့ၢ်လီၤ.
လါယူၤ ၁၇–၂၃
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | အ့းဖ့းစူး ၄–၆
“သိးထီၣ်ယွၤ အစုကဝဲၤခဲလၢာ်”
(အ့းဖ့းစူး ၆:၁၁-၁၃) သိးထီၣ်ယွၤ အစုကဝဲၤခဲလၢာ်, ဒ်သိးသုတြီမုၣ်ကီၤလံၢ်အတၢ်လီတၢ်ဝ့ၤကသ့န့ၣ်တက့ၢ်. ၁၂ အဂ့ၢ်ဒ်အံၤ, တမ့ၢ်ဘၣ်ပကနိဒီးတၢ်သွံၣ်ဒီးတၢ်ဖံးတၢ်ညၣ်ဘၣ်, မ့ၢ်လၢတၢ်အခိၣ်, ဒီးတၢ်အစိအကမီၤ, ဒီးအအံၤတဃၣ် အတၢ်ခံးအကစၢ်, တၢ်နါအိၣ်လၢမူခိၣ်အလီၢ်တဖၣ်လီၤ. ၁၃ မၤသးဒ်န့ၣ်ဒီး, ဟံးန့ၢ်ယွၤအစုကဝဲၤခဲလၢာ်, ဒ်သိးသုဆၢထၢၣ်လၢမုၢ်နံၤအအၢန့ၣ်ကသ့, ဒီးဒ်သိးသုမၤတၢ်ခဲလၢာ်ဝံၤဒီး, သုကဆၢထၢၣ်တက့ၢ်.
ပှၤသးစၢ်သ့ၣ်ဧၢ ဒုးဆၢက့ၤ မုၣ်ကီၤလံၢ်ဒူဒူတက့ၢ်
တၢ်မၢဖိပီလူး ထိၣ်သတြီၤဝဲ ခရံာ်ဖိတဖၣ်ဒီးသုးဖိလီၤ. ပအိၣ်လၢတၢ်ဒုးပျီအပူၤ ဒီးပဒုၣ်ပဒါန့ၣ် တမ့ၢ်ပှၤဟီၣ်ခိၣ်ဖိဘၣ် မ့ၢ်ဝဲမုၣ်ကီၤလံၢ် ဒီးတၢ်ဝံတၢ်နါတဖၣ်လီၤ. အဝဲသ့ၣ်တဖၣ်န့ၣ် မ့ၢ်တ့ၢ်သုးဖိအိၣ်လၢ အနံၣ်လၢအကထိတဖၣ်လံ ဒီးအဝဲသ့ၣ် ဒုးတၢ်ဖၠဲးမးလီၤ. လၢတၢ်န့ၣ်အဃိ ဖျါလၢပဝဲခရံာ်ဖိ လီၤဆီဒၣ်တၢ် ပှၤသးစၢ်သ့ၣ်တဖၣ် ဒုးနၢၤ အဝဲသ့ၣ်တညီဘၣ်. မ့ၢ်ပှၤသးစၢ်တဖၣ် မၤနၢၤဝဲအဒုၣ်အဒါလၢ အဂံၢ်ဆူၣ်တဖၣ်အံၤကသ့ဧါ. သ့ဝဲလီၤ ဒီးအဝဲသ့ၣ်အါဂၤန့ၣ် မၤနၢၤတၢ်လံ. ဘၣ်မနုၤအဃိ အဝဲသ့ၣ်မၤနၢၤဝဲသ့လဲၣ်. မ့ၢ်လၢအဝဲသ့ၣ် ဒိးန့ၢ်ဘၣ်တၢ်ဂံၢ်တၢ်ဘါလၢ ယဟိဝၤယွၤ အအိၣ်အဃိလီၤ. တကးဒံးဘၣ် ဒ်သုးဖိတဖၣ်လၢ အဒိးန့ၢ်ဘၣ်တၢ်သိၣ်လိ ဂ့ၤဂ့ၤအသိး အဝဲသ့ၣ် “သိးထီၣ်ယွၤ အစုကဝဲၤခဲလၢာ်” ဒ်သိးကကတဲာ်ကတီၤအသးလၢ တၢ်ဒုးအဂီၢ်န့ၣ်လီၤ.—ဖး အ့းဖ့းစူး ၆:၁၀-၁၂ တက့ၢ်.
(အ့းဖ့းစူး ၆:၁၄, ၁၅) မၤသးဒ်န့ၣ်ဒီး, ကံၢ်တူာ်သုယီၢ်ဒ့ဒီး တၢ်မ့ၢ်တၢ်တီ, ဒီးသိးထီၣ်တၢ်တီတၢ်လိၤအသဃိး, ၁၅ ဒီးဖျီၣ်သုခီၣ်ဒီးတၢ်သးခုအကစီၣ် ဘၣ်ဃးဒီး တၢ်ဃူတၢ်ဖိး အတၢ်ကတဲာ်ကတီၤ, ဒီးဆၢထၢၣ်တက့ၢ်.
တၢး၁၈.၀၅ ကဘျံးပၤ ၂၂-၂၃ အဆၢ ၄, ၇, ၁၀
ပှၤသးစၢ်သ့ၣ်ဧၢ ဒုးဆၢက့ၤ မုၣ်ကီၤလံၢ်ဒူဒူတက့ၢ်
၄ ဒ်ယီၢ်တကိး ဒီသဒၢဝဲသုးဖိအသိး တၢ်မ့ၢ်တၢ်တီလၢ ပမၤလိဘၣ်လၢလံာ်စီဆှံအပူၤတဖၣ်န့ၣ် ဒီသဒၢပှၤလၢ တၢ်သိၣ်လိနဲၣ်လိလၢ အကမၣ်တဖၣ်လီၤ. (ယိၤဟၣ် ၈:၃၁, ၃၂; ၁ ယိၤဟၣ် ၄:၁) ပတၢ်အဲၣ် လံာ်စီဆှံ တၢ်မ့ၢ်တၢ်တီတဖၣ် မ့ၢ်အါထီၣ်န့ၣ် ပအိၣ်မူမၤထွဲဒ် ယွၤအတၢ်သိၣ်တၢ်သီအသိး မ့တမ့ၢ် ပကသိးထီၣ် “သဃိး” အဂီၢ်ကညီထီၣ်ဝဲလီၤ. (စံးထီၣ်ပတြၢၤ ၁၁၁:၇, ၈; ၁ ယိၤဟၣ် ၅:၃) တကးဒံးဘၣ် ပနၢ်ပၢၢ်တၢ်မ့ၢ်တၢ်တီ မ့ၢ်အါထီၣ်န့ၣ် ပဒုးဆၢက့ၤ ပဒုၣ်ပဒါကသ့ အါထီၣ်စ့ၢ်ကီးလီၤ.—၁ ပ့းတရူး ၃:၁၅.
၇ ဒ်သုးဖိ အသဃိးအသိး ယဟိဝၤယွၤ အတၢ်သိၣ်တၢ်သီလၢ အတီအလိၤတဖၣ်အံၤ ဒီသဒၢပ “သး” လီၤ. (ကတိၤဒိ ၄:၂၃) သုးဖိတဂၤ တဆီတလဲဝဲ အသဃိးထးလၢအကျၢၤအံၤ ဆူသဃိးထးလၢ အတကျၢၤဒိၣ်ဒိၣ်န့ၣ်ဘၣ်. ဒ်န့ၣ်အသိး ပတဆိကမိၣ်လၢ ပတၢ်ထံၣ်န့ၣ်ဂ့ၤန့ၢ် ယဟိဝၤယွၤ အတၢ်သိၣ်တၢ်သီတဖၣ်ဘၣ်. ပသ့ၣ်ညါလၢ ပတအိၣ်ဒီး တၢ်သ့တၢ်ဘၣ်လၢ ပကဒီသဒၢလီၤပသးဘၣ်. (ကတိၤဒိ ၃:၅, ၆) လၢတၢ်န့ၣ်အဃိ မ့ၢ်ပ “သဃိး” ဒီသဒၢပသးဒံးဧါန့ၣ် ပကဘၣ် သမံသမိးလီၤက့ၤအီၤ ထီဘိလီၤ.
၁၀ ဒ်ခီၣ်ဖံးမၤစၢၤဝဲ သုးဖိတဖၣ်လၢ ကမၤနၢၤ တၢ်ဒုးအသိး နီၢ်သးခီၣ်ဖံးစ့ၢ်ကီး ကမၤစၢၤပှၤလၢ ပကစံၣ်တဲၤတဲလီၤ “တၢ်သးခုအကစီၣ် ဘၣ်ဃးဒီး တၢ်ဃူတၢ်ဖိ” အဂီၢ်လီၤ. (ယၡါယၤ ၅၂:၇; ရိမ့ၤ ၁၀:၁၅) ဘၣ်ဆၣ် တဘျီတခီၣ်န့ၣ် ဒ်သိး ပကစံၣ်တဲၤတဲလီၤတၢ်အဂီၢ် ပလိၣ်ဘၣ် တၢ်သူၣ်ဒူသးဒူလီၤ. ဘိၤ လၢအသးအိၣ်အနံၣ် ၂၀ န့ၣ်တဲဝဲလၢ “လၢညါယစံၣ်တဲၤတဲလီၤ ယတံၤသကိးလၢ ကၠိတဖၣ်တဘူၣ်ဘၣ်. ယဆိမိၣ်မ့ၢ်လၢ ယမဲာ်ဆှးအဃိလီၤ. ဘၣ်မနုၤအဃိ ယမဲာ်ဆှးလဲၣ်န့ၣ် ယတသ့ၣ်ညါဘၣ်. ဘၣ်ဆၣ် ခဲအံၤယစံၣ်တဲၤတဲလီၤ ယတံၤသကိးတဖၣ်ဘူၣ်လံ.”
(အ့းဖ့းစူး ၆:၁၆, ၁၇) လၢတၢ်ခဲလၢာ်အဖီခိၣ်န့ၣ်, ဒ်သိးသုမၤလီၤပံာ် မုၣ်ကီၤလံၢ်အပျၢ်မ့ၣ်အူခဲလၢာ် လၢအီၤကသ့ဒီး, ဟံးထီၣ်တၢ်နာ်အကတီၤတက့ၢ်. ၁၇ ဒီးကုာ်ထီၣ်တၢ်အုၣ်က့ၤခီၣ်က့ၤအခိၣ်ကုာ်သုး, ဒီးဟံးထီၣ်သးအနးလၢအမ့ၢ်ယွၤ အကလုၢ်အကထါတက့ၢ်.
တၢး၁၈.၀၅ ကဘျံးပၤ ၂၅-၂၆ အဆၢ ၁၃, ၁၆, ၂၀
ပှၤသးစၢ်သ့ၣ်ဧၢ ဒုးဆၢက့ၤ မုၣ်ကီၤလံၢ်ဒူဒူတက့ၢ်
၁၃ မုၣ်ကီၤလံၢ် ခးပှၤဒီး “ပျၢ်မ့ၣ်အူ” မနုၤတဖၣ်လဲၣ်. ဘၣ်သ့ၣ်သ့ၣ် မုၣ်ကီၤလံၢ် ကသူဝဲ တၢ်လံၣ်တၢ်လီ ဘၣ်ဃးဒီး ယဟိဝၤယွၤအဂ့ၢ် ဒ်သိးကဒုးတၢ်ဒီး နၤအဂီၢ်လီၤ. မုၣ်ကီၤလံၢ်အဲၣ်ဒိးလၢ နကတူၢ်ဘၣ်လၢ ယဟိဝၤယွၤ တအဲၣ်နၤဘၣ် ဒီးပှၤတအဲၣ်နၤ နီတဂၤဘၣ်. အံဒၤ လၢအသးအိၣ် ၁၉ နံၣ်န့ၣ်တဲဝဲလၢ “အါဘျီယတူၢ်ဘၣ်လၢ ယတဘူးဒီးယဟိဝၤယွၤဘၣ် ဒီးအဝဲတအဲၣ်ဒိးကဲ ယတံၤသကိးဘၣ်.” ဖဲအဝဲတူၢ်ဘၣ်ဒ်န့ၣ်အခါ အဝဲမၤဝဲဒ်လဲၣ်. “တၢ်အိၣ်ဖှိၣ်ရိဖှိၣ်န့ၣ် မၤဂၢၢ်ကျၢၤထီၣ်ဝဲ ယတၢ်နာ်လီၤ. ညီနုၢ်န့ၣ် ယလဲၤဆ့ၣ်နီၤဒီး ယတဟ့ၣ်တၢ်စံးဆၢဘၣ် မ့ၢ်လၢယဆိကမိၣ်လၢ ပှၤတအဲၣ်ဒိးနၢ်ဟူ ယတၢ်စံးဆၢ နီတဂၤဘၣ်အဃိလီၤ. ဘၣ်ဆၣ်ခဲအံၤ ယကတဲာ်ကတီၤပာ်စၢၤလၢ တၢ်အိၣ်ဖှိၣ်အဂီၢ် ဒီးဂုာ်ကျဲးစၢး ဟ့ၣ်ထီၣ်တၢ်စံးဆၢ ခံဘျီသၢဘျီလီၤ. ယကမၤဒ်န့ၣ်အဂီၢ် တညီဘၣ် ဘၣ်ဆၣ် ယဒိးန့ၢ်ဘၣ်တၢ်သးခုလီၤ. တကးဒံးဘၣ် ဒီပုၢ်ဝဲၢ်တဖၣ် ဟ့ၣ်ဂံၢ်ဟ့ၣ်ဘါယၤလီၤ. ထီဘိန့ၣ် ဖဲယလဲၤထီၣ် တၢ်အိၣ်ဖှိၣ်ဝံၤ ယဟဲက့ၤအခါ ယတူၢ်ဘၣ်လၢ ယဟိဝၤယွၤအဲၣ်ယၤလီၤ.”
၁၆ ဒ်ခိၣ်ဖျီၣ်ထး ဒီသဒၢဝဲ သုးဖိအခိၣ်နူာ်အသိး ပ “တၢ်မုၢ်လၢ်ဘၣ်ဃးဒီး တၢ်အုၣ်က့ၤခီၣ်က့ၤ အခိၣ်ကုာ်” န့ၣ်ကဒီသဒၢ ပတၢ်ဆိကမိၣ်လီၤ. (၁ သ့းစၤလနံ ၅:၈; ကတိၤဒိ ၃:၂၁) တၢ်မုၢ်လၢ်န့ၣ် မၤစၢၤပှၤဒ်သိး ပကသးစၢၢ်ဆၢ ကစၢ်ယွၤအတၢ်အၢၣ်လီၤ ဒီးကမၤစၢၤပှၤဒ်သိး ဖဲပထံၣ်ဘၣ် တၢ်ကီတၢ်ခဲအခါ ပသးသုတလီၤစၢ်တဂ့ၤအဂီၢ်လီၤ. (စံးထီၣ်ပတြၢၤ ၂၇:၁, ၁၄; မၤတၢ် ၂၄:၁၅) ဒ်သိး “ခိၣ်ကုာ်” ကဒီသဒၢပှၤအဂီၢ် ပတဘၣ်စိာ်အီၤလၢပစုဘၣ် ပကဘၣ်ဖျီၣ်အီၤလၢပခိၣ်လီၤ. ဒ်န့ၣ်အသိး ပမ့ၢ်အဲၣ်ဒိးလၢ ပတၢ်မုၢ်လၢ်ကဒီသဒၢပှၤန့ၣ် ပကဘၣ်နာ်လၢ ပတၢ်မုၢ်လၢ် မ့ၢ်တၢ်နီၢ်ကီၢ်တခါလီၤ.
၂၀ တၢ်မၢဖိပီလူး တဲဝဲလၢ ယွၤအကလုၢ်ကထါန့ၣ် လီၤဂာ်ဒ်နးတဘ့ၣ်လီၤ. ယဟိဝၤယွၤ ဟ့ၣ်လီၤပှၤ စုကဝဲၤအံၤလီၤ. ဘၣ်ဆၣ် ပကဘၣ်မၤ လိသ့ထီၣ်ပသး ဒ်သိးပသူစုကဝဲၤအံၤ ကသ့ဂ့ၤဂ့ၤလၢ ပကတဲပၠးပှၤဂၤ ပတၢ်နာ်ဒီးကမၤဘၣ်ထီၣ် ပတၢ်ထံၣ် ဒီးပတၢ်ဆိကမိၣ်လၢ အကမၣ်တဖၣ်အဂီၢ်လီၤ. (၂ ကရံၣ်သူး ၁၀:၄, ၅; ၂ တံၤမသ့း ၂:၁၅) ဒ်သိးနသူ စုကဝဲၤအံၤကသ့ ဂ့ၤဂ့ၤအဂီၢ် နမၤလိနသးကသ့ဒ်လဲၣ်. စဘဲစၢၤ(န်) လၢအသးအိၣ် ၂၁ နံၣ်န့ၣ်တဲဝဲလၢ “ဖဲယဖး လံာ်စီဆှံအခါ အဆၢဒိၣ်တဆၢစုာ်စုာ်န့ၣ် ယကွဲးနီၣ်ဃာ်အဆၢဖိတဆၢလီၤ. ယမၤနီၣ်ဃာ် အဆၢဖိလၢ ယဘၣ်သးအဒိၣ် ကတၢၢ်တဖၣ်လီၤ.” အဝဲမၤဝဲဒ်အံၤအဃိ မၤစၢၤအီၤဒ်သိး အကနၢ်ပၢၢ်ထီၣ် ယဟိဝၤယွၤ အတၢ်ထံၣ်န့ၣ်လီၤ. ဒဲနံၣ်ယၢၤ စ့ၢ်ကီးတဲဝဲလၢ “ယဖးလံာ်စီဆှံ ဒီးယမၤနီၣ်ဃာ် လံာ်စီဆှံအဆၢလၢ ယဆိကမိၣ်လၢ ကကဲဘျုးလၢ ပှၤလၢယကလဲၤစံၣ်တဲၤတဲလီၤအီၤ တဖၣ်အဂီၢ်န့ၣ်လီၤ. ယထံၣ်လၢ ဖဲပှၤဂၤထံၣ်လၢ နသ့ၣ်ညါလံာ်စီဆှံအဂ့ၢ်ဂ့ၤဂ့ၤ ဒီးနအဲၣ်ဒိးမၤစၢၤအီၤအခါ အဝဲသ့ၣ်သးအိၣ် ဒိကနၣ်တၢ်လီၤ.”
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(အ့းဖ့းစူး ၄:၃၀) ဒီးသုတဒုးသးအုးယွၤ အသးစီဆှံတဂ့ၤ. လၢအဝဲဒၣ်န့ၣ် သုဘၣ်တၢ်ဃံၤဃာ်သု, တုၤတၢ်ပှ့ၤက့ၤအမုၢ်တနံၤဘၣ်န့ၣ်လီၤ.
it-1 ကဘျံးပၤ ၁၁၂၈ အဆၢ ၃
တၢ်စီတၢ်ဆှံ
သးစီဆှံ. ယဟိဝၤယွၤ အသးစီဆှံမ့ၢ်ဝဲ အတၢ်စိတၢ်ကမီၤလၢ အသူဝဲဒ်သိး ကမၤလၢပှဲၤအတၢ်ဘၣ်သးအဂီၢ် ဒီးကစၢ်သူဝဲ ဖဲအသးဒၣ်ဝဲသ့လီၤ. သးစီဆှံန့ၣ် ကဆှီ, စီဆှံဝဲ ဒီးကစၢ်ယွၤ ပာ်လီၤဆီဝဲ လၢကသူဝဲအဂီၢ်လီၤ. လၢတၢ်န့ၣ်အဃိ ဘၣ်တၢ်ကိးအီၤလၢ “သးစီဆှံ” ဒီး “သးအစီအဆှံ” လီၤ. (စံး. ၅၁:၁၁; လူၤ. ၁၁:၁၃; ရိ. ၁:၄; အ့း. ၁:၁၃) သးစီဆှံန့ၣ် မၤကဆှဲကဆှီထီၣ်က့ၤ ပှၤသ့ဝဲလီၤ. တၢ်သကဲာ်ပဝးလၢ အတဂ့ၤ မ့တမ့ၢ် တၢ်ကမၣ်န့ၣ် တြီဝဲ မ့တမ့ၢ် “ဒုးသးအုးယွၤအသးစီဆှံ” လီၤ. (အ့း. ၄:၃၀) သးစီဆှံန့ၣ် တမ့ၢ်ပှၤတဂၤသနာ်က့ မ့ၢ်ဝဲယွၤအတၢ်ဂ့ၤတၢ်ဝါလၢ အကဆှီအဃိ ‘အသးအုး’ သ့လီၤ. ကယဲၢ်တၢ်မၤလၢ အတဂ့ၤတဘၣ်ကိးမံၤဒဲးန့ၣ် “မၤလီၤပံာ်ကွံာ်” သးစီဆှံအမ့ၣ်အူလီၤ. (၁ သ့း. ၅:၁၉) ပှၤမ့ၢ်ဆဲးမၤတၢ်လၢအတဂ့ၤတဖၣ်န့ၣ် ယွၤအသးစီဆှံ ကသးအုး ဒီးကစၢ်ယွၤကကဲထီၣ် ပှၤလၢအထီဒါတၢ်တဂၤအံၤ အဒုၣ်အဒါလီၤ. (ၡါ . ၆၃:၁၀) ပှၤတဂၤမၤသးအုးဘၣ် သးစီဆှံ, တကးဘၣ် ကဲထီၣ်ဒုၣ်ဒါလၢ အကတိၤဒုၣ်ဒွဲၣ် ယွၤအသးစီဆှံသ့လီၤ. ယ့ၣ်ၡူးခရံာ်တဲဝဲလၢ ပှၤလၢအမၤတၢ်ကမၣ်ဒ်အံၤတဂၤန့ၣ် ဆၢကတီၢ်ခဲအံၤမ့ၢ်ဂ့ၤ ခါဆူညါမ့ၢ်ဂ့ၤ တဘၣ်တၢ်ပျၢ်အတၢ်ကမၣ်ဘၣ်.—မး. ၁၂:၃၁, ၃၂; မၢ်. ၃:၂၈-၃၀; ကွၢ် SPIRIT
(အ့းဖ့းစူး ၅:၅) အဂ့ၢ်ဒ်အံၤ, တၢ်အံၤသုသ့ၣ်ညါ လၢကယဲၢ်ပှၤမၤကမၣ်မုၣ်ကမၣ်ခွါမ့ၢ်ဂ့ၤ, ပှၤအဲၣ်တလ့ၤအဲၣ်တဘီမ့ၢ်ဂ့ၤ, ပှၤသးကွံတၢ်မ့ၢ်ဂ့ၤ, (လၢအမ့ၢ်ပှၤဘါတၢ်ဂီၤ,) န့ၢ်ဘၣ်သါတၢ် လၢခရံာ်ဒီး ယွၤအဘီအမုၢ်အပူၤတသ့ဘၣ်နီတဂၤဘၣ်.
it-1 ကဘျံးပၤ ၁၀၀၆ အဆၢ ၂
တၢ်သူၣ်လီသးကွံ
အိၣ်ဖျါထီၣ်လၢတၢ်မၤ. တၢ်ဖံးတၢ်မၤတနီၤနီၤန့ၣ် ပာ်ဖျါထီၣ်ဝဲ ပှၤလၢအသးကွံတၢ်တဂၤ အတၢ်မၤလၢအကမၣ် ဒီးအတၢ်သးကွံအါတလၢကွံာ်အခၢးလီၤ. ပှၤကွဲးလံာ်စီဆှံ ယၤကိာ် တဲဝဲလၢ ပမ့ၢ်အိၣ်ဒီးတၢ်သးကွံလၢအကမၣ် ဒီးတၢ်သးကွံအံၤ မ့ၢ်ဒိၣ်ထီၣ်န့ၣ် ပကမၤဘၣ်တၢ်ဒဲးဘးလီၤ. (ယၤ. ၁:၁၄, ၁၅) လၢတၢ်န့ၣ်အဃိ ပှၤတဂၤမ့ၢ်ပှၤလၢ အသူၣ်လီသးကွံတၢ်န့ၣ် အိၣ်ဖျါထီၣ်လၢ အတၢ်ဖံးတၢ်မၤတဖၣ်လီၤ. တၢ်မၢဖိပီလူး တဲဝဲလၢပှၤအသူၣ်လီသးကွံတၢ်န့ၣ် မ့ၢ်ဝဲပှၤဘါတၢ်ဂီၤလီၤ. (အ့း. ၅:၅) အဝဲသူၣ်လီသးကွံတၢ် အါတလၢအဃိ တၢ်လၢအသးလီဝဲတဖၣ်န့ၣ် ကဲထီၣ်အယွၤလီၤ. မ့ၢ်လၢအဝဲပာ်ဆိဝဲ တၢ်သ့ၣ်တဖၣ်န့ၣ်လၢ တၢ်မၤယွၤအတၢ်မၤ ဒီးတၢ်ဘူၣ်ထီၣ်ဘါထီၣ် တၢ်ဘၣ်တ့ကစၢ်အမဲာ်ညါအဃိလီၤ.—ရိ. ၁:၂၄, ၂၅.
တၢ်ဖးလံာ်စီဆှံ
(အ့းဖ့းစူး ၄:၁၇-၃၂) မၤသးဒ်န့ၣ်ဒီး, ယစံးတၢ်အံၤ, ဒီးအုၣ်ယသးလၢကစၢ်အပူၤ, ဒ်သိးသုသုတလဲၤလၢၤ, ဒ်ပှၤကလုာ်တဖၣ်လၢ အလဲၤတၢ်ဖဲဒၣ် အကူၣ်တၢ်ကလီကလီ အသိးန့ၣ်တဂ့ၤလီၤ. ၁၈ အဝဲသ့ၣ်တဖၣ်အသူၣ်ခံးအသးခံးသတးဒီး, လီၤဖးကွံာ်ဒီးယွၤအတၢ်မူ, လၢတၢ်တသ့ၣ်ညါဘၣ်အိၣ်လၢ အပူၤအဃိ, ဒီးလၢအသူၣ်ကိၤအသးကိၤအဃိလီၤ. ၁၉ အမဲာ်တဆှးလၢၤဘၣ်ဒီး, ဟ့ၣ်လီၤဒၣ်အသးလၢအသးကတၢအပူၤ, ဒ်သိးအကဂုာ်မၤကယဲၢ်တၢ်အဲၣ်တလ့ၤအဲၣ်တဘီခဲလၢာ်လီၤ. ၂၀ မ့မ့ၢ်သုတမၤလိဘၣ်ခရံာ်ဒ်န့ၣ်ဘၣ်. ၂၁ ဒ်ပစံးတၢ်အသိး, သုမ့ၢ်နၢ်ဟူအီၤဒီး ဘၣ်တၢ်သိၣ်လိသုလၢအပူၤ, ဒ်တၢ်မ့ၢ်တၢ်တီလၢယ့ၣ်ၡူးအပူၤအသိး, ၂၂ ဒ်သိးသုကဘ့ၣ်လီၤကွံာ် သုနီၢ်လီၢ်လံၤ ဘၣ်ဃးဒီး သုတၢ်မၤလၢပျၢၤ လၢအအုၣ်သံဝဲဒ်တၢ်လီတၢ်ဝ့ၤ အတၢ်သးကွံအသိးန့ၣ်, ၂၃ ဒီးဒ်သိးသုကကဲထီၣ် ပှၤအသီလၢ သးအတၢ်ဆိကမိၣ်, ၂၄ ဒီးကူထီၣ်သိးထီၣ်သုနီၢ်သီတ့အသးလၢ တၢ်လီၤဂာ်ယွၤအသိး, လၢတၢ်တီတၢ်လိၤ, ဒီးတၢ်စီဆှံနီၢ်နီၢ်အပူၤလီၤ. ၂၅ မၤသးဒ်န့ၣ်ဒီး, ကွံာ်တ့ၢ်ကွံာ် တၢ်ကတိၤကဘျံးကဘျၣ်, ဒီးကတိၤလိာ်သုသးလၢ တၢ်မ့ၢ်တၢ်တီတဂၤဒီးတဂၤတက့ၢ်. အဂ့ၢ်ဒ်အံၤ, ပမ့ၢ်ပဂီၤသကိးပဂီၤတဂၤဒီးတဂၤလီၤ. ၂၆ သးဒိၣ်ထီၣ်ဒီး, မၤကမၣ်တၢ်တဂ့ၤ. လၢသုတၢ်သးဒိၣ်ထီၣ်န့ၣ်သုတဒုးလီၤနုာ်မုၢ်တဂ့ၤ. ၂၇ ဒီးဟ့ၣ်မုၣ်ကီၤလံၢ် အလီၢ်တဂ့ၤ. ၂၈ ပှၤလၢအဟုၣ်တၢ်, မ်အသုတဟုၣ်လၢၤတၢ်တဂ့ၤ, အခိၣ်တလိာ်, ဒ်သိးအကဟ့ၣ်နီၤတၢ်လၢ ပှၤဖှီၣ်ဖိယာ်ဖိဒီး, မ်အကျဲးစၢးမၤတၢ်ဂ့ၤလၢအစုသပှၢ်ပှၢ်တက့ၢ်. ၂၉ တၢ်ကတိၤ အအၢအသီန့ၣ်, မ်သုသုတဒုးဟဲထီၣ်လၢသုကိာ်ပူၤ နီတဘီတဂ့ၤ. ဒ်သိးပှၤနၢ်ဟူတၢ်တဖၣ်ကန့ၢ်ဘၣ်အဘျုးအဖှိၣ်ဒီး, ကတိၤတၢ်ဂ့ၤလၢ တၢ်မၤထီၣ်မၤထီတၢ် ဖဲအလီၢ်အိၣ်တက့ၢ်. ၃၀ ဒီးသုတဒုးသးအုးယွၤ အသးစီဆှံတဂ့ၤ. လၢအဝဲဒၣ်န့ၣ် သုဘၣ်တၢ်ဃံၤဃာ်သု, တုၤတၢ်ပှ့ၤက့ၤအမုၢ်တနံၤဘၣ်န့ၣ်လီၤ. ၃၁ ကယဲၢ်တၢ်အခၣ်, ဒီးတၢ်သးဒိၣ်, ဒီးတၢ်သးဟ့, ဒီးတၢ်ကလာ်တၢ်, ဒီးဒုၣ်ဒွဲၣ်တၢ်, ဒီးကယဲၢ်တၢ်အအၢအသီခဲလၢာ်န့ၣ်, ကွံာ်တ့ၢ်ကွံာ်တက့ၢ်. ၃၂ ဒီးဝံသးစူၤလိာ်သုသး, သူၣ်ကညီၤသးကညီၤလိာ်သုသး, ပျၢ်လိာ်သုတၢ်, ဒ်ယွၤအိၣ်လၢခရံာ်အပူၤပျၢ်သုတၢ်အသိးန့ၣ်တက့ၢ်.
လါယူၤ ၂၄–၃၀
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ| ဖံလံးပံၤ ၁–၄
“သုတဘၣ်ယိၣ်တၢ်နီတမံၤတဂ့ၤ”
(ဖံလံးပံၤ ၄:၆) သုတဘၣ်ယိၣ်တၢ်နီတမံၤတဂ့ၤ. မ့မ့ၢ်လၢတၢ်ကိးမံၤဒဲးန့ၣ်လၢတၢ်ထုကဖၣ်, ဒီးလၢတၢ်ဃ့ကညးအိၣ်ဒီး တၢ်စံးထီၣ်ပတြၢၤတၢ်အဘျုး အဖှိၣ်အပူၤန့ၣ်, ဘိးဘၣ်သ့ၣ်ညါယွၤ လၢသုတၢ်အဲၣ်ဒိးတဖၣ်န့ၣ်တက့ၢ်.
“ယွၤအတၢ်ဃူတၢ်ဖိးလၢ အဒိၣ်န့ၢ်ယိာ်န့ၢ် ကယဲၢ်ပသ့ၣ်ညါနၢ်ပၢၢ်တၢ်”
၁၀ ဒ်သိးပကအိၣ်ဒီး “ယွၤအတၢ်ဃူတၢ်ဖိး” ဒီးပ “သုတဘၣ်ယိၣ်တၢ်နီတမံၤတဂ့ၤ” အဂီၢ် တၢ်မနုၤကမၤစၢၤပှၤလဲၣ်. စီၤပီလူးအလံာ်ပရၢလၢ အကွဲးန့ၢ်ဝဲပှၤဖံလံးပံၤဖိတဖၣ်န့ၣ် ပာ်ဖျါထီၣ်န့ၢ်ပှၤလၢ ဖဲပသူၣ်ကိၢ်သးဂီၤတၢ်အခါ တၢ်လၢကမၤခုၣ်လီၤပသးန့ၣ် မ့ၢ်ဝဲတၢ်ဃ့ဘါထုကဖၣ်လီၤ. လၢတၢ်န့ၣ်အဃိ ဖဲပသူၣ်ကိၢ်သးဂီၤတၢ်အခါ ပကဘၣ်ပာ်ထီၣ် ပတၢ်ဘၣ်ယိၣ်ဘၣ်ဘှီတဖၣ်လၢ ယဟိဝၤယွၤအလိၤဒီး ဃ့ဘါထုကဖၣ်တၢ်လီၤ. (ဖး ၁ ပ့းတရူး ၅:၆, ၇ တက့ၢ်.) ဖဲနဃ့ဘါထုကဖၣ်တၢ်လၢ ယဟိဝၤယွၤအအိၣ်အခါ နာ်နီၢ်နီၢ်လၢ အဝဲသူၣ်အိၣ်သးအိၣ်နၤ သပှၢ်ကတၢၢ်န့ၣ်တက့ၢ်. ထီဘိန့ၣ် စံးဘျုးစံးဖှိၣ်ယဟိဝၤယွၤလၢ တၢ်ဆိၣ်ဂ့ၤလၢ နဒိးန့ၢ်ဘၣ်တဖၣ်တက့ၢ်. ဒီးယဟိဝၤယွၤမၤတၢ်သ့ “အါန့ၢ်ဒိၣ်န့ၢ်ကယဲၢ် ပဃ့တၢ်ဒီးဆိကမိၣ်တၢ်” န့ၣ်တဘၣ်သးပ့ၤနီၣ် နီတဘျီတဂ့ၤ.—အ့းဖ့းစူး ၃:၂၀.
(ဖံလံးပံၤ ၄:၇) ဒီးယွၤအတၢ်ဃူတၢ်ဖိးလၢ အဒိၣ်န့ၢ်ယိာ်န့ၢ်ကယဲၢ်ပသ့ၣ်ညါ နၢ်ပၢၢ်တၢ်န့ၣ်ကပၢၤသုသူၣ်သုသးဒီး သုဆိကမိၣ်တၢ်လၢယ့ၣ်ၡူးခရံာ်အပူၤလီၤ.
“ယွၤအတၢ်ဃူတၢ်ဖိးလၢ အဒိၣ်န့ၢ်ယိာ်န့ၢ် ကယဲၢ်ပသ့ၣ်ညါနၢ်ပၢၢ်တၢ်”
၇ ဖဲဒီပုၢ်ဝဲၢ်လၢအအိၣ်လၢ ဝ့ၢ်ဖံလံးပံၤတဖၣ် ဖးဝဲစီၤပီလူးအလံာ်ပရၢအခါ အဝဲသ့ၣ်ကသ့ၣ်နီၣ်ထီၣ်တၢ်မနုၤလဲၣ်. အဝဲသ့ၣ်အါဂၤ ကသ့ၣ်နီၣ်ထီၣ်ဝဲ ယဟိဝၤယွၤမၤစၢၤ စီၤပီလူးဒီးစီၤစံလၤ လၢကျဲဒ်လဲၣ်န့ၣ်လီၤ. လၢလံာ်ပရၢအံၤအပူၤ စီၤပီလူးဟ့ၣ်ဂံၢ်ဟ့ၣ်ဘါ အဝဲသ့ၣ်လၢကမၤတၢ်မနုၤလဲၣ်. စီၤပီလူးဟ့ၣ်ဂံၢ်ဟ့ၣ်ဘါ အဝဲသ့ၣ်လၢ တလိၣ်ဘၣ်ယိၣ်တၢ်ဘၣ်, ကဘၣ်ဃ့ဘါထုကဖၣ်တၢ် ဒီးအဝဲသ့ၣ်ကဒိးန့ၢ်ဘၣ် “ယွၤအတၢ်ဃူတၢ်ဖိးလၢ အဒိၣ်န့ၢ်ယိာ်န့ၢ် ကယဲၢ်ပသ့ၣ်ညါနၢ်ပၢၢ်တၢ်” လီၤ. တၢ်ကတိၤအံၤ အဲၣ်ဒိးစံးဝဲတၢ်မနုၤလဲၣ်. ပှၤကွဲးကျိာ်ထံလံာ်စီဆှံတနီၤန့ၣ် ကွဲးကျိာ်ထံဝဲ တၢ်ကတိၤအံၤလၢ “ဒိၣ်န့ၢ်ယိာ်န့ၢ် ကယဲၢ်တၢ်လၢပမုၢ်လၢ်” မ့တမ့ၢ် “ဂ့ၤဒိၣ်န့ၢ်ဒံးပှၤဟီၣ်ခိၣ်ဖိ အတၢ်ရဲၣ်တၢ်ကျဲၤခဲလၢာ်လီၤ.” စီၤပီလူးအဲၣ်ဒိးတဲဝဲ ယွၤအတၢ်ဃူတၢ်ဖိး ကဲဘျုးဒိၣ်န့ၢ်ဒံးတၢ်လၢ ပမုၢ်လၢ်အီၤသ့ၣ်တဖၣ်န့ၣ်လီၤ. တဘျီတခီၣ် ပကဘၣ်မၤဘၣ်ဂီၢ်က့ၤ ပတၢ်ဂ့ၢ်ကီတဖၣ်ဒ်လဲၣ်န့ၣ် ပတသ့ၣ်ညါဘၣ်. မ့မ့ၢ်ယဟိဝၤယွၤန့ၣ် သ့ၣ်ညါဝဲလီၤ. ဒီးတၢ်လၢပတမုၢ်လၢ်ဘၣ်ဒၣ်လဲာ် အဝဲမၤဝဲသ့ခဲလၢာ်လီၤ.—ဖး ၂ ပ့းတရူး ၂:၉ တက့ၢ်.
“ယွၤအတၢ်ဃူတၢ်ဖိးလၢ အဒိၣ်န့ၢ်ယိာ်န့ၢ် ကယဲၢ်ပသ့ၣ်ညါနၢ်ပၢၢ်တၢ်”
၁၆ ပမ့ၢ်ဒိးန့ၢ်ဘၣ် “ယွၤအတၢ်ဃူတၢ်ဖိးလၢ အဒိၣ်န့ၢ်ယိာ်န့ၢ် ကယဲၢ်ပသ့ၣ်ညါနၢ်ပၢၢ်တၢ်” န့ၣ် တၢ်ကမၤအသးဒီးပှၤဒ်လဲၣ်. လံာ်စီဆှံတဲဝဲလၢ ယွၤအတၢ်ဃူတၢ်ဖိးက “ပၢၤ” ပသးဒီး ပတၢ်ဆိကမိၣ်တဖၣ်လီၤ. (ဖံလံးပံၤ ၄:၇) တၢ်ကတိၤလၢအမ့ၢ် “ပၢၤ” န့ၣ်ပှၤသူဝဲလၢအဘၣ်ဃးဒီး သုးဖိတဖုလၢအကဘၣ်ပၢၤဝဲ ဝ့ၢ်အဂီၢ်န့ၣ်လီၤ. အဒိ, ပှၤသုးဖိတဖုန့ၣ် အဝဲသ့ၣ်ဘၣ်ဒီသဒၢဝဲ ဝ့ၢ်ဖံလံးပံၤ ဒ်သိးပှၤဝ့ၢ်ဖိတဖၣ် ကအိၣ်ဘၣ်ဘံၣ်ဘံၣ်ဘၢဘၢ ဒီးကမံၤဘၣ်မုာ်မုာ်ခုၣ်ခုၣ်အဂီၢ်န့ၣ်လီၤ. ဒ်န့ၣ်အသိး ပမ့ၢ်အိၣ်ဒီး “ယွၤအတၢ်ဃူတၢ်ဖိး” န့ၣ် တလိၣ်ပဘၣ်ယိၣ်တၢ်လၢၤဘၣ် ဒီးပအိၣ်မုာ်မုာ်ခုၣ်ခုၣ်သ့ဝဲလီၤ. ပသ့ၣ်ညါလၢ ယဟိဝၤယွၤအဲၣ်ပှၤဒီး အဲၣ်ဒိးဝဲလၢပကအိၣ်ဒီး တၢ်သူၣ်ဖှံသးညီလီၤ. (၁ ပ့းတရူး ၅:၁၀) ပသ့ၣ်ညါဘၣ်ဒ်အံၤအဃိ ဖဲပထံၣ်ဘၣ်တၢ်ဘၣ်ယိၣ်ဘၣ်ဘှီ ဒီးတၢ်သူၣ်ဟးဂီၤသးဟးဂီၤအခါ ကဲထီၣ်တၢ်မၤစၢၤလၢပဂီၢ်လီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ဖံလံးပံၤ ၂:၁၇) မ့ၢ်လံ, တၢ်မ့ၢ်ဂၢ်လီၤယၤလၢတၢ်လုၢ်ဒီး တၢ်မၤဘၣ်ဃးဒီးသုတၢ်နာ်အဖီခိၣ်ဒီး, ယသးခုဒီးယသးခုဃုာ်ဒီး သုခဲလၢာ်လီၤ.
it-2 ကဘျံးပၤ ၅၂၈ အဆၢ ၅
တၢ်လုၢ်တၢ်ပာ်
တၢ်လုၢ်အီ. ဖဲပှၤအံၣ်စရ့လးဖိတဖၣ် လဲၤတုၤလၢ ကီၢ်တၢ်စံးပာ်အခါ အဝဲသ့ၣ်ဘၣ်မၤဝဲ တၢ်လုၢ်အီ ဃုာ်ဒီးတၢ်လုၢ်အဂၤတဖၣ်လီၤ. (၄ မိၤ. ၁၅:၂, ၅, ၈-၁၀) တၢ်သ့ၣ်တဖၣ်န့ၣ်အကျါ ပၣ်ဃုာ်ဒီး စပံးထံ (“သံးဧိၤဂာ်ဧိၤ”) ဒီးတၢ်သ့ၣ်တဖၣ်အံၤ ဘၣ်တၢ်လူလီၤအီၤလၢ တၢ်လုၢ်လီၢ်လီၤ. (၄ မိၤ. ၂၈:၇, ၁၄; ထိၣ်သတြီၤ ၂ မိၤ. ၃၀:၉; ၄ မိၤ. ၁၅:၁၀.) တၢ်မၢဖိပီလူး ကွဲးဝဲလံာ်လၢ ခရံာ်ဖိလၢအအိၣ်လၢ ဝ့ၢ်ဖံလံးပံၤတဖၣ်အအိၣ်ဒ်အံၤ “တၢ်မ့ၢ်ဂၢ်လီၤယၤလၢတၢ်လုၢ်ဒီး တၢ်မၤဘၣ်ဃးဒီး သုတၢ်နာ်အဖီခိၣ်ဒီး, ယသးခု” လီၤ. အဝဲအသးအိၣ်တူၢ်ဆါအသးလၢ ခရံာ်ဖိကဒဲကဒဲတဖၣ်အဂီၢ်အဃိ အဝဲတဲဝဲလၢ တၢ်ဂၢ်လီၤအီၤဒ် တၢ်လုၢ်အီအသိးလီၤ. (ဖံလံး. ၂:၁၇) တချုးလၢအဝဲသံဒံးဘၣ်န့ၣ် ကွဲးဝဲလံာ်လၢ စီၤတံၤမသ့းအအိၣ်ဒ်အံၤ “အဂ့ၢ်ဒ်အံၤ, ခဲကနံၣ်အံၤဒၣ်လဲာ်, တၢ်လူလီၤဂၢ်လီၤယၤ, ဒီးယက့ၤတၢ်အဆၢအကတီၢ်ဘၣ်လံ.”—၂ တံၤ. ၄:၆.
(ဖံလံးပံၤ ၃:၁၁) ဒ်သိးမ့ၢ်သ့ဒီး ယကတုၤလၢ တၢ်ဂဲၤဆၢထၢၣ်က့ၤ လၢတၢ်သံလီၤ.
တၢး၀၇ ၁/၁ ကဘျံးပၤ ၂၆-၂၇ အဆၢ ၅
“တၢ်ဂဲၤဆၢထၢၣ်သမူထီၣ်က့ၤ အဆိကတၢၢ်”—ကဲထီၣ်အသးလံ
၅ လၢခံတခါန့ၣ် ပှၤလၢအဘၣ်တၢ်ဒိးဖှူအီၤ လၢအမ့ၢ် “ယွၤအအံၣ်စရ့လး” တဖၣ်န့ၣ် ကပာ်ဖှိၣ်ထီၣ်အသးဒီး ယ့ၣ်ၡူးခရံာ် ဒ်သိးကနုာ်လီၤလၢ မူခိၣ်တၢ်လၤကပီၤအပူၤ ဒီးအဝဲသ့ၣ် “ကအိၣ်ဒီးကစၢ်အစိၤစိၤအဃၣ်ဃၣ်” လီၤ. (ကလၤတံ ၆:၁၆; ၁ သ့းစၤလနံ ၄:၁၇) တၢ်မၤအသးအံၤန့ၣ် ပှၤကိးအီၤလၢ “တၢ်ဂဲၤဆၢထၢၣ်အခီၣ်ထံးတတီၤ” မ့တမ့ၢ် “တၢ်ဂဲၤဆၢထၢၣ်သမူထီၣ်က့ၤ အဆိကတၢၢ်” လီၤ. (ဖံလံးပံၤ ၃:၁၀, ၁၁; လီၣ်ဖျါ ၂၀:၆) တၢ်ဂဲၤဆၢထၢၣ်သမူထီၣ်က့ၤအံၤဝံၤ အလီၢ်ခံ ပှၤအကကွဲၢ်တဖၣ် လၢအိၣ်ဒီးတၢ်မုၢ်လၢ်လၢ ကအိၣ်မူဘၣ်လီၤထူလီၤယိာ်လၢ ဟီၣ်ခိၣ်ပၤရဒံစူးအပူၤန့ၣ် ကဂဲၤဆၢထၢၣ်သမူထီၣ်က့ၤဝဲလီၤ. လၢတၢ်န့ၣ်အဃိ ပအိၣ်ဒီးတၢ်မုၢ်လၢ်လၢ ဟီၣ်ခိၣ်မ့ၢ်ဂ့ၤ လၢမူခိၣ်မ့ၢ်ဂ့ၤ ပကြၢးသးစၢၢ်ဆၢ “တၢ်ဂဲၤဆၢထၢၣ်သမူထီၣ်က့ၤ အဆိကတၢၢ်” အဂ့ၢ်လီၤ. တၢ်အံၤကမ့ၢ်ဝဲ တၢ်ဂဲၤဆၢထၢၣ်သမူထီၣ်က့ၤ ဒ်လဲၣ်တကလုာ်လဲၣ်. ဒီးကကဲထီၣ်အသးအခါဖဲလဲၣ်.
တၢ်ဖးလံာ်စီဆှံ
(ဖံလံးပံၤ ၄:၁၀-၂၃) ဒီးယသူၣ်ခုသးခုလၢကစၢ်အပူၤဒိၣ်မးလီၤ. အဂ့ၢ်ဒ်အံၤ, ခဲကနံၣ်အံၤ, သုတၢ်အံးက့ၤကွၢ်က့ၤယၤန့ၣ် အိၣ်ထီၣ်ကဒီးလီၤ. သုသးအိၣ်တ့ၢ်ဝဲန့ၣ်ဘၣ်ဆၣ်ဒီး, သုတထံၣ်ဘၣ် အလီၢ်အကျဲဘၣ်. ၁၁ တမ့ၢ်ဘၣ် ယကတိၤတၢ် လၢတၢ်ဖှီၣ်တၢ်ယာ်အဂ့ၢ်ဘၣ်. အဂ့ၢ်ဒ်အံၤ, ဖဲဒၣ်တၢ်မၤအသးလၢယၤန့ၣ်, ဒ်သိးယကသူၣ်မံသးမံဒီးယမၤလိလံတၢ်လံ. ၁၂ ယဘၣ်တၢ်ဆီၣ်လီၤယၤ, ယသ့ၣ်ညါဒီး ယဒိးတၢ်အါယသ့ၣ်ညါလီၤ. လၢတၢ်ကိးမံၤဒဲး ဒီးလၢတၢ်ခဲလၢာ်အပူၤန့ၣ်, တၢ်သိၣ်လိယၤလၢတၢ်အီၣ်ဘျဲးအီၣ်, ဒီးတၢ်အိၣ်ဝံၤအိၣ်စ့ၤ, လၢတၢ်လၢတၢ်ပှဲၤ, ဒီးလၢတၢ်ဖှီၣ်တၢ်ယာ်န့ၣ်လီၤ. ၁၃ ယမၤတၢ်ခဲလၢာ်သ့လၢ ပှၤလၢအဒုးဆူၣ်ထီၣ်ယဂံၢ်ယဘါတဂၤအပူၤလီၤ. ၁၄ ဘၣ်ဆၣ်ဒီးသုမၤစၢၤယၤလၢ ယတၢ်နးတၢ်ဖှီၣ်အပူၤ ဒီးသုမၤတၢ်ဂ့ၤလီၤ. ၁၅ ပှၤဖံလံးပံၤဖိသ့ၣ်ဧၢ, သုသ့ၣ်ညါသုဝဲ, လၢယဟးထီၣ်လၢမၤက့းဒနံလၢ တၢ်သးခုအကစီၣ်အခီၣ်ထံးန့ၣ်, လၢသုဝဲဒၣ် အမဲာ်ညါတၢ်အိၣ်ဖှိၣ်တမၤတၢ်ဘၣ်ဃးဒီးယၤလၢ တၢ်ဟ့ၣ်ဒီးတၢ်ဒိးန့ၢ်န့ၣ်, နီတပူၤဘၣ်လီၤ. ၁၆ အဂ့ၢ်ဒ်အံၤ, လၢယအိၣ်လၢသ့းစၤလနံဒၣ်လဲာ်, လၢယန့ၢ်ဘၣ်တၢ်အလီၢ်အိၣ်န့ၣ်, သုဟ့ၣ်ယုၢ်တၢ်လၢယၤ, တစုဒီးခံစုလီၤ. ၁၇ တမ့ၢ်ဘၣ်ယဃုတၢ်ဟ့ၣ်န့ၣ်ဘၣ်. မ့ၢ်ယဃုတၤသၣ်လၢအကဒုးအါထီၣ် တၢ်လၢသုဂီၢ်လီၤ. ၁၈ ဘၣ်ဆၣ်ဒီးယအိၣ် ဒီးတၢ်ခဲလၢာ်ဒီးပှဲၤလုၣ်ကွံာ်လံ. ယဒိးန့ၢ်တၢ်လၢသုအိၣ်လၢ စီၤအ့းပၤဖရီးဒံတူးအစုပူၤ, တၢ်နၢမူတၢ်လုၢ်လၢအဘၣ်ယွၤအသးန့ၣ်, ဒီးယတၢ်လၢထီၣ်ပှဲၤထီၣ်လီၤ. ၁၉ ဒီးကယဲၢ်တၢ်လၢ သုန့ၢ်ဘၣ်အီၤအလီၢ်အိၣ်တဖၣ်, ဒ်အလၤကပီၤအတၢ်ထူးတၢ်တီၤအသိး ယကစၢ်ကဟ့ၣ်လီၤသုလၢ ယ့ၣ်ၡူးခရံာ်အပူၤလီၤ. ၂၀ မ်တၢ်လၤကပီၤအိၣ်ဒီး ပပၢ်ယွၤအစိၤစိၤအဃၣ်ဃၣ်တက့ၢ်. အၤမ့ၣ်. ၂၁ ကတိၤဒိၣ်ပှၤစီဆှံလၢ ယ့ၣ်ၡူးခရံာ် အပူၤကိးဒံကိးဂၤတက့ၢ်. ပှၤဒီပုၢ်ဝဲၢ်အိၣ်ဒီးယၤကတိၤဒိၣ်သုလီၤ. ၂၂ ပှၤစီဆှံခဲလၢာ်ကတိၤဒိၣ်သု, ဒီးကဲစၢ်အဟံၣ်ဖိတဖၣ် အါဒၣ်တၢ်တက့ၢ်လီၤ. ၂၃ မ်ပကစၢ်ယ့ၣ်ၡူးခရံာ် အဘျုးအဖှိၣ် အိၣ်ဒီးသုခဲလၢာ်တက့ၢ်. အၤမ့ၣ်.