၁ ၡမူၤအ့လး
၂၁ လၢခံစီၤဒၤဝံး လဲၤတုၤလၢ ဝ့ၢ်နိၤဘး+ လၢပှၤလုၢ်တၢ်ဒိၣ် စီၤအဃံၤမ့လ့း အအိၣ်လီၤ. ဖဲစီၤအဃံၤမ့လ့း ထံၣ်ဘၣ် စီၤဒၤဝံးအခါ အပျံၤတၢ် ဒီးတဲဘၣ်အီၤလၢ “ဘၣ်မနုၤအဃိ နဟဲဖဲအံၤ ထဲတဂၤ ဒီးပှၤတဟဲပိာ်နခံ နီတဂၤဘၣ်လဲၣ်.”+ ၂ ဒီးစီၤဒၤဝံး တဲဆၢ ပှၤလုၢ်တၢ်ဒိၣ် စီၤအဃံၤမ့လ့းလၢ “စီၤပၤမၢယမၤ တၢ်တမံၤဘၣ်ဆၣ် အဝဲတဲယၤလၢ ‘ဘၣ်ဃးဒီး တၢ်တမံၤလၢ ယမၢနလဲၤမၤ ဒီးယဟံးစုနဲၣ်ကျဲနၤ ဒ်လဲၣ်ဒ်လဲၣ်န့ၣ် တဘၣ်ဒုးသ့ၣ်ညါပှၤဂၤ နီတစဲးတဂ့ၤ.’ မ့မ့ၢ်ယပှၤတဖၣ်န့ၣ် ယမၤလိာ်အဝဲသ့ၣ်လၢ ကထံၣ်လိာ်သးဒီးယၤ ဖဲတၢ်လီၢ်တတီၤတီၤလီၤ. ၃ နမ့ၢ်အိၣ်ဒီး ကိၣ်ယဲၢ်လိၣ် မ့တမ့ၢ် တၢ်မ့ၢ်အိၣ်ဒီးနၤ တမံၤဂ့ၤ တမံၤဂ့ၤန့ၣ် ဟ့ၣ်လီၤယၤသၢၤ.” ၄ ပှၤလုၢ်တၢ်ဒိၣ် တဲဆၢစီၤဒၤဝံးလၢ “ဖဲအံၤဒု ကိၣ်ယိယိ တအိၣ်ဘၣ်, အိၣ်ထဲ ကိၣ်စီဆှံလီၤ.+ ဘၣ်ဆၣ် ဖဲတယံာ်ဒံးဘၣ်အတီၢ်ပူၤ နပှၤတဖၣ် မ့ၢ်ဟးဆှဲး ပှၤပိာ်မုၣ်တဖၣ်န့ၣ်* အဝဲသ့ၣ် အီၣ်ဝဲသ့လီၤ.”+ ၅ စီၤဒၤဝံး တဲဆၢ ပှၤလုၢ်တၢ်ဒိၣ်လၢ “ဒ်လၢညါအသိး ဖဲယဘၣ်တၢ်မၢလီၤယၤ ကိးဘျီဒဲးန့ၣ် ပဟးဆှဲးပှၤပိာ်မုၣ်တဖၣ်လီၤ.+ ခဲအံၤတဘျီစ့ၢ်ကီး ဒ်န့ၣ်လီၤ. ဖဲယပှၤတဖၣ် ဘၣ်တၢ်မၢလီၤအဝဲသ့ၣ်လၢ တၢ်ဂ့ၢ်ယိယိဖိ အခါဒၣ်လဲာ် အဝဲသ့ၣ်အနီၢ်ခိ မ့ၢ်စီဆှံန့ၣ် တနံၤအံၤ အဝဲသ့ၣ်ကစီဆှံဝဲသၢၤ.” ၆ ဒီးမ့ၢ်လၢ ကိၣ်လၢအဂုၤအဂၤ တအိၣ်ဖဲန့ၣ်ဘၣ်အဃိ ပှၤလုၢ်တၢ်ဒိၣ်ဟ့ၣ်လီၤ စီၤဒၤဝံး ကိၣ်စီဆှံလီၤ.+ ကိၣ်လၢ တၢ်လုၢ်ထီၣ်တၢ်အဂီၢ်အံၤန့ၣ် ပှၤထုးကွံာ်ပာ်စၢၤအီၤလၢ ယဟိဝၤယွၤ အမဲာ်ညါဝံၤလံ ဒီးဖဲပှၤထုးကွံာ်အီၤတသီန့ၣ် ပှၤပာ်ထီၣ်က့ၤ ကိၣ်အသီလၢ အလီၢ်လီၤ.
၇ ဖဲတၢ်တနံၤန့ၣ် စီၤစီလူး အခ့အပှၤတဂၤ ဘၣ်အိၣ်တ့ၢ်ဝဲလၢ ယဟိဝၤယွၤ အမဲာ်ညါ ခီဖျိလၢ အဘၣ်တၢ်တြီဃာ်အီၤ* အဃိလီၤ. အဝဲမ့ၢ်ဝဲ ပှၤအဒိၣ်ဖိ+ စီၤဒိအ့း+ ဒီးအကဲဝဲ စီၤစီလူး အပှၤကွၢ်သိ အခိၣ်တဂၤလီၤ.
၈ ဒီးစီၤဒၤဝံး တဲဘၣ် စီၤအဃံၤမ့လ့းလၢ “လၢနအိၣ်န့ၣ် ဘီ မ့တမ့ၢ် နးအိၣ်တဘ့ၣ်ဘ့ၣ်ဧါ. စီၤပၤမၢလီၤယၤ တၢ်လၢယကဘၣ်မၤန့ၣ် မ့ၢ်တၢ်လၢ ယကဘၣ်မၤအီၤချ့ချ့အဃိ ယတဟဲစိာ် ယနး မ့တမ့ၢ် ယတၢ်စုကဝဲၤတဖၣ်ဘၣ်.” ၉ အဃိ ပှၤလုၢ်တၢ်ဒိၣ် တဲဝဲလၢ “ပှၤဖလ့ၡသးဖိ စီၤကၤလယး+ လၢနမၤသံကွံာ်အီၤဖဲ အ့လၤအတၢ်တြီၤပူၤန့ၣ်+ အနး အိၣ်ဖဲအံၤလီၤ. ပှၤဘိၣ်ဘံဃာ်အီၤလၢ တၢ်ကံးညာ်တဘ့ၣ် ဒီးပှၤပာ်အီၤလၢ အ့ဖိးတဘ့ၣ် အလီၢ်ခံလီၤ.+ နးလၢအအိၣ် ဖဲအံၤန့ၣ် အိၣ်ထဲ တၢ်တဘ့ၣ်န့ၣ်အဃိ နမ့ၢ်အဲၣ်ဒိးဟံးန့ၢ်န့ၣ် ဟံးန့ၢ်ဟီ.” စီၤဒၤဝံး တဲဆၢက့ၤလၢ “နးဒ်န့ၣ် တအိၣ်နီတဘ့ၣ်ဘၣ်. ဟ့ၣ်လီၤယၤဟီ.”
၁၀ ဖဲတၢ်တနံၤန့ၣ် စီၤဒၤဝံး ဆဲးဃ့ၢ်ပူၤဖျဲးအသးလၢ+ စီၤစီလူးအအိၣ်လီၤ. လၢခံ အလဲၤတုၤ လၢစီၤပၤအၤကံၣ် အအိၣ်လၢ ဝ့ၢ်ကၤသးအပူၤလီၤ.+ ၁၁ စီၤအၤကံၣ် အခ့အပှၤတဖၣ် တဲအီၤလၢ “ပှၤတဂၤအံၤ မ့ၢ်ဝဲ စီၤဒၤဝံး လၢအကဲစီၤပၤလၢ အကီၢ်ပူၤန့ၣ် တမ့ၢ်ဧီၤ. လၢညါ ပှၤဂဲၤကလံၣ် ဒီးသးဝံၣ်တၢ် ဘၣ်ဃးဒီး ပှၤတဂၤအံၤအဂ့ၢ်လၢ
‘စီၤစီလူး မၤသံ ပှၤလၢအကထိတဖၣ်,
မ့မ့ၢ် စီၤဒၤဝံးန့ၣ် မၤသံ ပှၤလၢ အကလးတဖၣ်’+ တမ့ၢ်ဧီၤ.”
၁၂ စီၤဒၤဝံး တိၢ်နီၣ်ဃာ်ဝဲ တၢ်ကတိၤတဖၣ်န့ၣ် လၢအသးပူၤ ဒီးအဝဲပျံၤ+ ဝ့ၢ်ကၤသး အစီၤပၤအၤကံၣ် ဒိၣ်မးလီၤ. ၁၃ အဃိ စီၤဒၤဝံး ပာ်မၤအသး ဒ်ပှၤပျုၢ်တဂၤအသိး+ လၢအဝဲသ့ၣ် အကျါလီၤ. အဝဲဟးကွဲးဘၣ်အၢတၢ်လၢ ဝ့ၢ်အတြဲၤတဖၣ်အလိၤ ဒီးဒုးယွၤလီၤ အထးခိၣ်ထံလၢ အခၣ်ဆူၣ်လိၤလီၤ. ၁၄ ဒီးစီၤအၤကံၣ် တဲအခ့အပှၤတဖၣ်လၢ “သုသ့ၣ်ညါလၢ ပှၤတဂၤအံၤ ပျုၢ်လံဒၢး, ဘၣ်မနုၤအဃိ သုဟဲကိးအီၤလၢ ယအိၣ်လဲၣ်. ၁၅ ပှၤပျုၢ်တဖၣ် လၢအအိၣ်ဒီးယၤန့ၣ် မ့ၢ်အအိၣ်စှၤတလၢ အဃိ သုဘၣ်ဟဲကိးအါထီၣ်တဂၤ လၢအကမၤပျုၢ်အသး လၢယမဲာ်ညါ ဒ်အံၤဧါ, မ့ၢ်ပှၤတဂၤအံၤ ကြၢးနုာ်လီၤလၢ ယဟံၣ်ပူၤဧါ.”