မၢ်ကူး

၁၀ ယ့ၣ်ၡူး ဟးထီၣ်ကွံာ်လၢ တၢ်လီၢ်ဖဲန့ၣ်​ ဒီးလဲၤဝဲလၢ ယူဒၤအဟီၣ်ကဝီၤအဆၢ လၢထံကျိယၢ်ဒ့ၣ်​ အဝၢ်ဘးခီလီၤ. ဒီးပှၤဂီၢ်မုၢ် ဟဲအိၣ်ဖှိၣ်ကဒီး လၢအအိၣ်လီၤ. ဒ်ညီနုၢ်အသိး ယ့ၣ်ၡူးသိၣ်လိ အဝဲသ့ၣ်လီၤ.+ ၂ ဒီးပှၤဖၤရံၤၡဲတဖၣ်​ ဟဲဒ်သိး ကမၤကွၢ်အီၤလီၤ. အဝဲသ့ၣ်​ သံကွၢ်အီၤလၢ ပိာ်ခွါတဂၤ မ့ၢ်မၤကတၢၢ်ကွံာ် အတၢ်ဆီဟံၣ်ဆီဃီ ဒီးအမါန့ၣ်​ မ့ၢ်အဘၣ်​ တၢ်သိၣ်တၢ်သီစ့ၢ်ကီးဧါ.+ ၃ ယ့ၣ်ၡူး တဲဆၢက့ၤ အဝဲသ့ၣ်လၢ “စီၤမိၤၡ့ မၤလိာ်သုဒ်လဲၣ်.” ၄ အဝဲသ့ၣ်တဲဝဲလၢ “စီၤမိၤၡ့ ဟ့ၣ်အခွဲးလၢ ပှၤကကွဲး လံာ်လီၤဖးလၢ ပှၤကမၤကတၢၢ်ကွံာ် အတၢ်ဆီဟံၣ်ဆီဃီဒီးအမါ အဂီၢ်လီၤ.”+ ၅ ယ့ၣ်ၡူး တဲဘၣ်အဝဲသ့ၣ်လၢ “ခီဖျိလၢ သုခိၣ်ကိၤအဃိ+ စီၤမိၤၡ့ကွဲးဝဲ တၢ်မၤလိာ်အံၤ လၢသုဂီၢ်လီၤ.+ ၆ ဘၣ်ဆၣ်​ လၢအခီၣ်ထံးန့ၣ်​ ‘ကစၢ်ယွၤတ့လီၤဝဲ ပိာ်ခွါတဂၤ ဒီးပိာ်မုၣ်တဂၤလီၤ.+ ၇ လၢတၢ်န့ၣ်အဃိ ပိာ်ခွါကပာ်တ့ၢ် အမိၢ်အပၢ်+ ၈ ဒီးပှၤခံဂၤန့ၣ်​ ကကဲထီၣ်​ တၢ်တမံၤဃီလီၤ.’+ အဝဲသ့ၣ်တမ့ၢ် ပှၤခံဂၤလၢၤဘၣ်, မ့ၢ်ဝဲတၢ်တမံၤဃီလီၤ. ၉ အဃိ တၢ်လၢကစၢ်ယွၤ ဒုးအိၣ်ဃုာ်ဝဲန့ၣ်​ မ်ပှၤဟီၣ်ခိၣ်ဖိသု တထုးဖးအီၤတဂ့ၤ.”+ ၁၀ ဖဲအဝဲသ့ၣ်​ အိၣ်ကဒီးလၢ ဟံၣ်ပူၤအခါ ယ့ၣ်ၡူးအပျဲၢ်အဘီၣ်တဖၣ်​ သံကွၢ်အီၤဘၣ်ဃးဒီး တၢ်ဂ့ၢ်တခါအံၤလီၤ. ၁၁ ယ့ၣ်ၡူး တဲအဝဲသ့ၣ်လၢ “ပှၤမ့ၢ်မၤကတၢၢ်ကွံာ် အတၢ်ဆီဟံၣ်ဆီဃီဒီးအမါ ဒီးမ့ၢ်ဆီဟံၣ်ဆီဃီဒီး ပှၤအဂၤတဂၤန့ၣ်​ မ့ၢ်အအဲၣ်ဘၢအမါလီၤ.+ ၁၂ ဒီးပိာ်မုၣ်စ့ၢ်ကီး မ့ၢ်မၤကတၢၢ်ကွံာ် အတၢ်ဆီဟံၣ်ဆီဃီ ဒီးအဝၤ ဒီးအဝဲမ့ၢ် ဆီဟံၣ်ဆီဃီဒီး ပှၤအဂၤတဂၤန့ၣ်​ မ့ၢ်အအဲၣ်ဘၢတၢ်လီၤ.”+

၁၃ ဒီးပှၤဟဲကိးဖိသၣ်တဖၣ်လၢ ယ့ၣ်ၡူးအအိၣ်​ ဒ်သိး အကထိးဘၣ်​ အဝဲသ့ၣ်အဂီၢ်လီၤ. ဘၣ်ဆၣ်​ အပျဲၢ်အဘီၣ်တဖၣ်​ သိၣ်ပှၤတဖၣ်န့ၣ်လီၤ.+ ၁၄ ဖဲယ့ၣ်ၡူး ထံၣ်ဝဲဒ်န့ၣ်အခါ အသးဒိၣ်ထီၣ်တၢ်ဒီး တဲအဝဲသ့ၣ်လၢ “ပျဲဖိသၣ်တဖၣ်​ ဟဲလၢယအိၣ်​ ဒီးတြီအဝဲသ့ၣ်တဂ့ၤ. ကစၢ်ယွၤ အဘီအမုၢ်န့ၣ်​ မ့ၢ်ပှၤဒ်အံၤတဖၣ်​ အတၢ်လီၤ.+ ၁၅ ယကတဲဘၣ်သု တီတီလၢ ပှၤလၢ အတတူၢ်လိာ် ကစၢ်ယွၤအဘီအမုၢ် ဒ်ဖိသၣ်တဂၤ အသိးဘၣ်န့ၣ်​ လ့ၤတက့ၤ အတလဲၤနုာ်လီၤဘၣ်လၢ ဘီမုၢ်အပူၤဘၣ်.”+ ၁၆ ဒီးယ့ၣ်ၡူးဖိးဟု ဖိသၣ်တဖၣ်န့ၣ်​ ဒီးပာ်ထီၣ်အစုလၢ အဝဲသ့ၣ်အလိၤ ဒီးဆိၣ်ဂ့ၤ အဝဲသ့ၣ်လီၤ.+

၁၇ ဖဲအဝဲ လဲၤလၢကျဲအခါ ပှၤပိာ်ခွါတဂၤ ဟဲဃ့ၢ်လၢအအိၣ်​ ဒီးချံးလီၤအခီၣ်​ လၢအမဲာ်ညါ ဒီးသံကွၢ်အီၤလၢ “သရၣ်လၢအဂ့ၤတဂၤဧၢ, ဒ်သိး ယကဒိးန့ၢ်ဘၣ်​ တၢ်မူအထူအယိာ်အဂီၢ် ယကဘၣ်မၤ ဒ်လဲၣ်.”+ ၁၈ ယ့ၣ်ၡူးတဲအီၤလၢ “ဘၣ်မနုၤအဃိ နကိးယၤလၢ ပှၤအဂ့ၤလဲၣ်. ပှၤအဂ့ၤတအိၣ်​ နီတဂၤဘၣ်​ အိၣ်ထဲ ကစၢ်ယွၤတဂၤလီၤ.+ ၁၉ နသ့ၣ်ညါလၢ တၢ်မၤလိာ်တဖၣ်​ တဲဝဲလၢ ‘တဘၣ်​ မၤသံပှၤနီတဂၤတဂ့ၤ,+ တဘၣ်​ အဲၣ်ဘၢမါအဲၣ်ဘၢဝၤတဂ့ၤ,+ တဘၣ်​ ဟုၣ်တၢ်တဂ့ၤ,+ တဘၣ်​ အုၣ်နသးကဘျံးကဘျၣ်တဂ့ၤ,+ တဘၣ်​ လံၣ်အီၣ်လီအီၣ်တၢ် ဒ်သိးနကန့ၢ်ဘၣ်​ ပှၤဂၤအတၢ်တဂ့ၤ+ ဒီးယူးယီၣ်ပာ်ကဲ နမိၢ်ဒီးနပၢ်တက့ၢ်.’”+ ၂၀ ပိာ်ခွါတဂၤအံၤ တဲအီၤလၢ “သရၣ်ဧၢ, တၢ်သ့ၣ်တဖၣ်န့ၣ်​ ယမၤထွဲအီၤလၢ ယသးစၢ်အခါလံ.” ၂၁ ယ့ၣ်ၡူးကွၢ်အီၤ ဒီးအဲၣ်ဘၣ်အီၤအဃိ တဲအီၤလၢ “တၢ်လၢ နကဘၣ်မၤန့ၣ်​ အိၣ်ဒံးတမံၤလီၤ. ဆါလီၤကွံာ် တၢ်လၢအအိၣ်ဒီးနၤ ဒီးဟ့ၣ်လီၤ ပှၤဖှီၣ်ဖိယာ်ဖိတက့ၢ်. ဒီးနကအိၣ်ဒီး တၢ်လုၢ်ဒိၣ်ပှ့ၤဒိၣ်​ လၢမူခိၣ်လီၤ. မ့ၢ်ဝံၤန့ၣ်​ ဟဲပိာ်ယခံဟီ.”+ ၂၂ ဘၣ်ဆၣ်​ မ့ၢ်လၢ အတၢ်စုလီၢ်ခီၣ်ခိၣ်​ အိၣ်ဝဲအါမးအဃိ ဖဲအနၢ်ဟူဝဲဒ်န့ၣ်အခါ အသးဘၣ်ဒိဒီး က့ၤဝဲလၢတၢ်သးအုးအပူၤလီၤ.+

၂၃ ယ့ၣ်ၡူး ကွၢ်တရံးတၢ်ဝံၤဒီး တဲဘၣ်​ အပျဲၢ်အဘီၣ်တဖၣ်လၢ “ပှၤလၢအစ့အိၣ်တဖၣ်​ ကလဲၤနုာ်လီၤလၢ ကစၢ်ယွၤ အဘီမုၢ်အပူၤန့ၣ်​ ကကီမးလီၤ.”+ ၂၄ ဖဲအပျဲၢ်အဘီၣ်တဖၣ်​ နၢ်ဟူ အတၢ်ကတိၤအံၤအခါ အဝဲသ့ၣ်ကမၢကမၣ်ဝဲလီၤ. ဝံၤဒီး ယ့ၣ်ၡူးတဲဝဲလၢ “ဖိသၣ်သ့ၣ်ဧၢ, ပှၤတဂၤ ကလဲၤနုာ်လီၤလၢ ကစၢ်ယွၤ အဘီမုၢ်အပူၤန့ၣ်​ ကကီမးလီၤ. ၂၅ ကီၤလၤအူး လဲၤနုာ်လီၤလၢ ထးအမဲၢ်ခံန့ၣ်​ ညီဒိၣ်န့ၢ်ဒံး ပှၤထူးပှၤတီၤတဂၤ ကလဲၤနုာ်လီၤလၢ ကစၢ်ယွၤ အဘီမုၢ်အပူၤလီၤ.”+ ၂၆ အဝဲသ့ၣ်​ ကမၢကမၣ်​ ဒိၣ်န့ၢ်ဒံးအလီၢ် ဒီးတဲအီၤလၢ* “မတဂၤ န့ၢ်ဘၣ်​ တၢ်အုၣ်က့ၤခီၣ်က့ၤ ကသ့လဲၣ်.”+ ၂၇ ယ့ၣ်ၡူး ကွၢ်အဝဲသ့ၣ်လိၤလိၤ ဒီးတဲဘၣ်အဝဲသ့ၣ်လၢ “လၢပှၤဟီၣ်ခိၣ်ဖိ အတၢ်ထံၣ်န့ၣ်​ အကဲထီၣ်အသးတသ့ဘၣ်. ဘၣ်ဆၣ်​ မ့မ့ၢ်ကစၢ်ယွၤန့ၣ်​ တမ့ၢ်ဒ်န့ၣ်ဘၣ်, မ့ၢ်လၢ ကစၢ်ယွၤန့ၣ်​ မၤတၢ်သ့ခဲလၢာ်လီၤ.”+ ၂၈ စီၤပ့းတရူး တဲအီၤလၢ “မ့မ့ၢ်ပှၤန့ၣ်​ ပပာ်တ့ၢ်ကွံာ်တၢ်ခဲလၢာ် ဒီးပပိာ်နခံလံ.”+ ၂၉ ယ့ၣ်ၡူးတဲဝဲလၢ “ယကတဲဘၣ်သု တီတီလၢ ပှၤလၢ အပာ်တ့ၢ်ကွံာ် အဟံၣ်အဃီမ့ၢ်ဂ့ၤ, အဒီပုၢ်ဝဲၢ်မုၣ်မ့ၢ်ဂ့ၤ, အဒီပုၢ်ဝဲၢ်ခွါမ့ၢ်ဂ့ၤ, အမိၢ်မ့ၢ်ဂ့ၤ, အပၢ်မ့ၢ်ဂ့ၤ, အဖိ မ့တမ့ၢ် အစံာ်ဧိၤပှဲၤဧိၤတဖၣ်​ လၢယဃိဒီး လၢတၢ်သးခုကစီၣ်​ အဃိန့ၣ်+ ၃၀ ဆၢကတီၢ်ခဲအံၤ အဝဲသ့ၣ်​ ကန့ၢ်ဘၣ်​ အဟံၣ်, အဒီပုၢ်ဝဲၢ်မုၣ်, အဒီပုၢ်ဝဲၢ်ခွါ, အမိၢ်, အဖိ ဒီးအစံာ်ဧိၤပှဲၤဧိၤတဖၣ်​ အါန့ၢ်အလီၢ်အစး ၁၀၀ ဃုာ်ဒီး တၢ်မၤနးမၤဖှီၣ်လီၤ.+ ဒီးလၢခါဆူညါန့ၣ်* ကန့ၢ်ဘၣ်ဝဲ တၢ်မူအထူအယိာ်လီၤ. ၃၁ ဘၣ်ဆၣ်​ ပှၤအါဂၤလၢ အအိၣ်လၢတၢ်မဲာ်ညါန့ၣ်​ ကအိၣ်က့ၤလၢတၢ်လီၢ်ခံ ဒီးပှၤလၢ အအိၣ်လၢတၢ်လီၢ်ခံန့ၣ်​ ကအိၣ်က့ၤလၢ တၢ်မဲာ်ညါလီၤ.”+

၃၂ ဒီးအဝဲသ့ၣ်​ လဲၤဝဲလၢ ဝ့ၢ်ယရူၤၡလ့ၣ်လီၤ. ဒီးလၢကျဲန့ၣ်​ ယ့ၣ်ၡူးလဲၤဆိလၢ အဝဲသ့ၣ်အမဲာ်ညါလီၤ. ဒီးအဝဲသ့ၣ်​ ကမၢကမၣ်​ ဘၣ်ဆၣ်​ ပှၤအဂၤလၢ အဟဲပိာ်အဝဲသ့ၣ်အခံန့ၣ်​ ပျံၤထီၣ်တၢ်လီၤ. ဒီးယ့ၣ်ၡူးကိးဝဲ အတၢ်မၢဖိတဆံခံဂၤ လၢတၢ်ကပၤ ဒီးတဲဘၣ်အဝဲသ့ၣ်​ တၢ်လၢ ကမၤအသးဒီးအီၤ အဂ့ၢ်လီၤ.+ ၃၃ ဒီးတဲဝဲလၢ “ခဲအံၤ ပကလဲၤထီၣ်လၢ ယရူၤၡလ့ၣ်​ ဒီးပှၤကညီဖိခွါအံၤ ကဘၣ်​ တၢ်ဟ့ၣ်လီၤကွံာ်အီၤလၢ ပှၤလုၢ်တၢ်ဒိၣ်အခိၣ်တဖၣ်​ ဒီးပှၤကွဲးလံာ်ဖိတဖၣ်​ အစုပူၤလီၤ. အဝဲသ့ၣ်​ ကစံၣ်ညီၣ်သံအီၤ ဒီးအဝဲသ့ၣ်ကဟ့ၣ်လီၤကွံာ်အီၤလၢ ပှၤကလုာ်တဖၣ်​ အစုပူၤလီၤ. ၃၄ ဒီးပှၤတဖၣ်န့ၣ်​ ကဒုၣ်ဒွဲၣ်အီၤ, ကထူးပှဲာ်ဒိးအီၤ, ကတီၢ်အီၤ ဒီးကမၤသံအီၤလီၤ. ဘၣ်ဆၣ်​ လၢသၢသီတသီန့ၣ်* အဝဲကဂဲၤဆၢထၢၣ်က့ၤဝဲလီၤ.”+

၃၅ စီၤစ့းဘ့းဒဲ အဖိခွါတဖၣ်+ လၢအမ့ၢ် စီၤယၤကိာ် ဒီးစီၤယိၤဟၣ်​ ဟဲလၢ ယ့ၣ်ၡူးအအိၣ်​ ဒီးတဲအီၤလၢ “သရၣ်ဧၢ, တၢ်လၢပကဃ့နၤန့ၣ်​ ပအဲၣ်ဒိးလၢ နကဟ့ၣ်ပှၤလီၤ.”+ ၃၆ ယ့ၣ်ၡူး တဲအဝဲသ့ၣ်လၢ “သုလီကီ မနုၤလဲၣ်.” ၃၇ အဝဲသ့ၣ်​ တဲဆၢဝဲလၢ “ဖဲနဒိးန့ၢ်ဘၣ်​ တၢ်လၤကပီၤအခါ ဟ့ၣ်ပှၤအခွဲးလၢ ပကဆ့ၣ်နီၤလၢ နစုထွဲတဂၤ ဒီးလၢ နစုစ့ၣ်တဂၤမီၤ.”+ ၃၈ ဘၣ်ဆၣ်​ ယ့ၣ်ၡူး တဲဘၣ်အဝဲသ့ၣ်လၢ “သုဃ့တၢ်မနုၤလဲၣ်န့ၣ်​ သုတသ့ၣ်ညါဘၣ်. ခွးလၢယအီအီၤန့ၣ်​ မ့ၢ်သုအီကကဲဧါ. ဒီးတၢ်ဒိးဘျၢလၢ ယဒိးဘျၢယသးန့ၣ်​ မ့ၢ်သုဒိးဘျၢသုသး ကကဲစ့ၢ်ကီးဧါ.”+ ၃၉ အဝဲသ့ၣ်​ တဲဆၢအီၤလၢ “ကဲဝဲသၢၤ.” ဖဲန့ၣ်​ ယ့ၣ်ၡူးတဲအဝဲသ့ၣ်လၢ “ခွးလၢယအီအီၤန့ၣ်​ သုကအီအီၤလီၤ. ဒီးတၢ်ဒိးဘျၢလၢ ယဒိးဘျၢယသးန့ၣ်​ သုကဒိးဘျၢစ့ၢ်ကီးလီၤ.+ ၄၀ ဘၣ်ဆၣ်​ မတဂၤကဆ့ၣ်နီၤလၢ ယစုထွဲလဲၣ်, မတဂၤ ကဆ့ၣ်နီၤလၢ ယစုစ့ၣ်လဲၣ်န့ၣ်​ ယတအိၣ်ဒီးတၢ်ခွဲးတၢ်ယာ်လၢ ယကရဲၣ်ကျဲၤတၢ်ဘၣ်. မတဂၤ ကဆ့ၣ်နီၤဖဲန့ၣ်လဲၣ်န့ၣ်​ ကစၢ်ယွၤ ကဆၢတဲာ်ဝဲလီၤ.”

၄၁ ဖဲအပျဲၢ်အဘီၣ်​ အဂၤတဆံ နၢ်ဟူဘၣ်ဝဲ တၢ်ဂ့ၢ်တခါအံၤအခါ အဝဲသ့ၣ်​ သးဒိၣ်ထီၣ်​ စီၤယၤကိာ် ဒီးစီၤယိၤဟၣ်လီၤ.+ ၄၂ ဘၣ်ဆၣ်​ ယ့ၣ်ၡူးကိးဃီၤ အဝဲသ့ၣ်လၢအအိၣ်​ ဒီးတဲအဝဲသ့ၣ်လၢ “သုသ့ၣ်ညါလၢ ပှၤကလုာ် အခိၣ်အနၢ်တဖၣ်န့ၣ်​ ပၢပှၤဂၤဖဲ အသး ဒီးပှၤဒိၣ်ပှၤပှၢ်တဖၣ်န့ၣ်​ သူအတၢ်စိတၢ်ကမီၤ ဒ်သိး ကပၢပှၤဂၤအဂီၢ်လီၤ.+ ၄၃ မ့မ့ၢ်သုန့ၣ်​ သုတဘၣ်မၤဒ်န့ၣ်ဘၣ်. ပှၤမ့ၢ်အဲၣ်ဒိးကဲထီၣ်​ ပှၤလၢအဒိၣ်တဂၤ လၢသုကျါန့ၣ်​ အကဘၣ်ကဲထီၣ်​ သုခ့သုပှၤလီၤ.+ ၄၄ ဒီးပှၤလၢ အအဲၣ်ဒိးန့ၢ်ဘၣ်​ လီၢ်လၤလၢအဒိၣ်ကတၢၢ် လၢသုကျါန့ၣ်​ ကဘၣ်ကဲ သုခဲလၢာ်အကုၢ်လီၤ. ၄၅ ပှၤကညီဖိခွါဒၣ်လဲာ် ဟဲလီၤန့ၣ်​ တမ့ၢ်လၢ ပှၤကမၤန့ၢ်တၢ်လၢ အဂီၢ်ဘၣ်. အဟဲလီၤဒ်သိး အကမၤန့ၢ်တၢ်လၢ ပှၤဂၤအဂီၢ်+ ဒီးဟ့ၣ်လီၤအသးသမူလၢ ပှၤအါဂၤအဂီၢ် ဒ်တၢ်ပှ့ၤက့ၤ အသိးလီၤ.”+

၄၆ ဝံၤဒီး အဝဲသ့ၣ်​ လဲၤနုာ်လီၤလၢ ဝ့ၢ်ယရံၤဃိအပူၤလီၤ. ဖဲယ့ၣ်ၡူး ဒီးအပျဲၢ်အဘီၣ်​ ဒီးပှၤဂီၢ်မုၢ် ဟးထီၣ်လၢ ဝ့ၢ်ယရံၤဃိအခါ စီၤဘၣ်တံၤမဲ (စီၤတံၤမဲအဖိခွါ) လၢအမ့ၢ် ပှၤမဲာ်တထံၣ်တၢ်လၢ အဃ့အီၣ်တၢ်တဂၤ ဆ့ၣ်နီၤလၢ ကျဲကပၤလီၤ.+ ၄၇ ဖဲအနၢ်ဟူဝဲလၢ ပှၤနစၤရ့းဖိယ့ၣ်ၡူး ဟဲဝဲအခါ အကိးပသူထီၣ်လၢ “စီၤဒၤဝံးအဖိခွါ+ ယ့ၣ်ၡူးဧၢ, သးကညီၤယၤမီၤ.”+ ၄၈ ဒီးပှၤဂီၢ်မုၢ်တဖၣ်​ ဒူအီၤ ဒီးမၢအအိၣ်ဘှ့ၣ်လီၤ. ဘၣ်ဆၣ်​ အဝဲကိးပသူထီၣ်ဝဲ ဆူၣ်န့ၢ်ဒံးအလီၢ်လၢ “စီၤဒၤဝံးအဖိခွါဧၢ, သးကညီၤယၤမီၤ.” ၄၉ အဃိ ယ့ၣ်ၡူးအိၣ်ပတုာ် ဒီးတဲဝဲလၢ “မၢအဟဲလၢ ယအိၣ်ဟီ.” အဃိ အဝဲသ့ၣ်ကိးန့ၢ် ပှၤမဲာ်တထံၣ်တၢ်တဂၤန့ၣ်​ ဒီးတဲအီၤလၢ “ပာ်ဆူၣ်ထီၣ်နသးဒီး ဆၢထၢၣ်ဟီ, အဝဲကိးနၤလံ.” ၅၀ အဃိ အဝဲဘ့ၣ်လီၤကွံာ် အဆ့ကၤ လၢအဖီခိၣ်တဘ့ၣ်​ ဒီးဆၢထၢၣ်​ လဲၤလၢ ယ့ၣ်ၡူးအအိၣ်​ တဘျီဃီလီၤ. ၅၁ ဒီးယ့ၣ်ၡူးတဲအီၤလၢ “နအဲၣ်ဒိးလၢ ယကမၤန့ၢ်နၤ တၢ်မနုၤလဲၣ်.” ပှၤမဲာ်တထံၣ်တၢ်တဂၤန့ၣ်​ တဲအီၤလၢ “သရၣ်ဧၢ,* ယအဲၣ်ဒိး ထံၣ်ထီၣ်က့ၤတၢ်လီၤ.” ၅၂ ယ့ၣ်ၡူး တဲဘၣ်အီၤလၢ “က့ၤဟီ, နတၢ်နာ် မၤဘျါက့ၤနၤလံ.”+ တဘျီဃီန့ၣ်​ အဝဲထံၣ်ထီၣ်က့ၤတၢ်+ ဒီးပိာ်ထီၣ်​ ယ့ၣ်ၡူးအခံလီၤ.