မးသဲ
၁၇ ဃုသီဝံၤအလီၢ်ခံန့ၣ် ယ့ၣ်ၡူးကိးန့ၢ်ဝဲ စီၤပ့းတရူး, စီၤယၤကိာ် ဒီးအဒီပုၢ်ဝဲၢ်ခွါ စီၤယိၤဟၣ် ဒီးလဲၤထီၣ်ဝဲဆူ ကစၢၢ်ဖးထီတဖျၢၣ် အလိၤလီၤ.+ ၂ ဒီးယ့ၣ်ၡူး လဲလိာ်အသး လၢအဝဲသ့ၣ် အမဲာ်ညါ ဒီးအမဲာ်သၣ် ကပီၤထီၣ်ဒ်မုၢ်အသိး ဒီးအတၢ်ကူတၢ်ကၤ ကပြုၢ်ကပြီၤ* ဒ်တၢ်ကပီၤအသိးလီၤ.+ ၃ ဒီးဝံအ့ၤလံယၤ ဒီးစီၤမိၤၡ့ ဟဲဖျါထီၣ်လၢ အဝဲသ့ၣ်အမဲာ်ညါဒီး တဲသကိးတၢ်ဒီးယ့ၣ်ၡူးလီၤ. ၄ စီၤပ့းတရူး တဲဘၣ်ယ့ၣ်ၡူးလၢ “ကစၢ်ဧၢ, ပမ့ၢ်အိၣ်ဖဲအံၤဒုဂ့ၤမး. မ့ၢ်ဘၣ်နသးန့ၣ် ယကသူၣ်ထီၣ်ဒဲဖဲအံၤ သၢဖျၢၣ်လီၤ. လၢနဂီၢ်တဖျၢၣ်, လၢစီၤမိၤၡ့အဂီၢ်တဖျၢၣ် ဒီးလၢဝံအ့ၤလံယၤအဂီၢ် တဖျၢၣ်.” ၅ ဖဲအတဲတၢ်ဒံး အဆၢကတီၢ်န့ၣ် တၢ်အၢၣ်လၢ အကပြုၢ်ကပြီၤ မၤဘၢအဝဲသ့ၣ်လီၤ. ဒီးလၢတၢ်အၢၣ်အပူၤန့ၣ် တၢ်ကလုၢ်သီၣ်ထီၣ်ဝဲလၢ “အဝဲ မ့ၢ်ယဖိခွါလၢယအဲၣ်အီၤ ဒီးယဘၣ်သူၣ်ဘၣ်သးအီၤလီၤ.+ ဒိကနၣ်အကလုၢ်တက့ၢ်.”+ ၆ ဖဲအပျဲၢ်အဘီၣ်တဖၣ် နၢ်ဟူဝဲ တၢ်ကလုၢ်အံၤအခါ အဝဲသ့ၣ် ကျးလီၤအမဲာ်လၢ ဟီၣ်ခိၣ်လိၤ ဒီးပျံၤတၢ်ဒိၣ်မးလီၤ. ၇ ယ့ၣ်ၡူးဟဲဃီၤဝဲ ဒီးထိးဘၣ်အဝဲသ့ၣ် ဒီးတဲဝဲလၢ “ဂဲၤဆၢထၢၣ်ဟီ, ပျံၤတၢ်တဂ့ၤ.” ၈ ဖဲအဝဲသ့ၣ် ကွၢ်ထီၣ်တၢ်အခါ အဝဲသ့ၣ်တထံၣ် ပှၤနီတဂၤလၢၤဘၣ်. အဝဲသ့ၣ် ထံၣ်ဝဲထဲ ယ့ၣ်ၡူးတဂၤလီၤ. ၉ ဒီးဖဲအဝဲသ့ၣ် ဟဲက့ၤလီၤလၢ ကစၢၢ်လိၤအခါ ယ့ၣ်ၡူးမၤလိာ်အဝဲသ့ၣ်လၢ “တချုးလၢ ပှၤကညီဖိခွါအံၤ ဂဲၤဆၢထၢၣ်သမူထီၣ်က့ၤလၢ တၢ်သံဒံးဘၣ်န့ၣ် တၢ်ထံၣ်လၢညါခီ လၢသုထံၣ်အံၤန့ၣ် တဲဘၣ် ပှၤနီတဂၤတဂ့ၤ.”+
၁၀ ဘၣ်ဆၣ် အပျဲၢ်အဘီၣ်တဖၣ် သံကွၢ်အီၤလၢ “မ့မ့ၢ်ဒ်န့ၣ်န့ၣ် ဘၣ်မနုၤအဃိ ပှၤကွဲးလံာ်ဖိတဖၣ် တဲဝဲလၢ ဝံအ့ၤလံယၤ ကဘၣ်ဟဲဆိလဲၣ်.”+ ၁၁ ယ့ၣ်ၡူးတဲဆၢက့ၤဝဲလၢ “ဝံအ့ၤလံယၤ ကဟဲဝဲသပှၢ်ကတၢၢ် ဒီးကမၤဂ့ၤထီၣ်က့ၤ တၢ်ခဲလၢာ်လီၤ.+ ၁၂ ဒီးယကတဲဘၣ်သုလၢ ဝံအ့ၤလံယၤ ဟဲဝံၤလံ. ဘၣ်ဆၣ် ပှၤတသ့ၣ်ညါအီၤဘၣ် ဒီးပှၤမၤအီၤဖဲ အဲၣ်ဒိးမၤဝဲလီၤ.+ ဒ်န့ၣ်အသိး အဝဲသ့ၣ် ကမၤအၢမၤနး ပှၤကညီဖိခွါအံၤ စ့ၢ်ကီးလီၤ.”+ ၁၃ ဖဲန့ၣ်န့ၣ် အပျဲၢ်အဘီၣ်တဖၣ် နၢ်ပၢၢ်ထီၣ်ဝဲလၢ အဝဲအဲၣ်ဒိးတဲ ပှၤဘျၢတၢ် စီၤယိၤဟၣ်အဂ့ၢ်လီၤ.
၁၄ ဖဲအဝဲသ့ၣ် ဟဲဘူးထီၣ်ဒီး ပှၤဂီၢ်မုၢ်အခါ+ ပှၤတဂၤ ဟဲချံးလီၤအခီၣ်လၢ ယ့ၣ်ၡူးအမဲာ်ညါ ဒီးတဲဝဲလၢ ၁၅ “ကစၢ်ဧၢ, သးကညီၤယဖိခွါမီၤ. အဝဲအိၣ်ဒီး ထိးပျုၢ်တၢ်ဆါ ဒီးအဆိးက့လီၤ. အဝဲလီၤတဲာ်လၢ မ့ၣ်အူအပူၤဒီး လၢထံကျါ တလီၢ်လီၢ်လီၤ.+ ၁၆ ယဟဲကိးအီၤလၢ နပျဲၢ်နဘီၣ်တဖၣ်အအိၣ် ဘၣ်ဆၣ် အဝဲသ့ၣ် မၤဘျါအီၤတသ့ဘၣ်.” ၁၇ ယ့ၣ်ၡူးတဲဆၢဝဲလၢ “ပှၤတစိၤလၢ အတၢ်နာ်တအိၣ်ဘၣ် ဒီးအၢသီသ့ၣ်ဧၢ,+ ယကဘၣ်ဆဲးအိၣ်ဒီးသု ယံာ်ဒံးထဲလဲၣ်. ဒီးယကဘၣ်ဆဲးဝံသးစူၤသု ယံာ်ဒံးထဲလဲၣ်. ဟဲကိးအီၤလၢ ယအိၣ်တက့ၢ်.” ၁၈ ယ့ၣ်ၡူးဟ့ၣ်လီၤ တၢ်ကလုၢ်လၢ တၢ်ဝံတၢ်နါအအိၣ် ဒီးတၢ်ဝံတၢ်နါန့ၣ် ဟးထီၣ်ဝဲ ဒီးဖိသၣ်ပိာ်ခွါတဂၤန့ၣ် ဘျါက့ၤဝဲ တဘျီဃီလီၤ.+ ၁၉ ဒီးယ့ၣ်ၡူး အပျဲၢ်အဘီၣ်တဖၣ် ဟဲလၢအအိၣ် ဒီးသံကွၢ်ခူသူၣ်အီၤလၢ “ပနီဟးထီၣ်အီၤ တန့ၢ်ဘၣ် ဘၣ်လဲၣ်.” ၂၀ ယ့ၣ်ၡူးတဲဘၣ် အဝဲသ့ၣ်လၢ “မ့ၢ်လၢ သုတၢ်နာ်စှၤအဃိလီၤ. ယကတဲဘၣ်သု တီတီလၢ သုတၢ်နာ် မ့ၢ်အိၣ်ထဲသိးဒီး သဘၣ်အချံ* တဖျၢၣ်န့ၣ် သုမ့ၢ်တဲ ကစၢၢ်တဖျၢၣ်အံၤလၢ ‘လဲၤသုးလၢတၢ်လီၢ် အဝဲန့ၣ်’ န့ၣ်အကသုးအသးလီၤ. ဒီးတၢ်လၢ သုမၤတသ့ဘၣ်န့ၣ် တအိၣ်ဘၣ်နီတမံၤဘၣ်.”+ ၂၁ *—
၂၂ ဖဲအဝဲသ့ၣ်အိၣ်ဝဲ တပူၤဃီလၢ ကၤလံၤလါအခါ ယ့ၣ်ၡူးတဲဘၣ် အဝဲသ့ၣ်လၢ “ပှၤကညီဖိခွါအံၤ ကဘၣ်တၢ်ဟ့ၣ်လီၤကွံာ်အီၤလၢ ပှၤဂၤအစုပူၤလီၤ.+ ၂၃ အဝဲသ့ၣ် ကမၤသံအီၤ ဘၣ်ဆၣ် လၢသၢသီတသီန့ၣ် အကဘၣ် တၢ်ဒုးဂဲၤဆၢထၢၣ်က့ၤအီၤလီၤ.”+ ဒီးအပျဲၢ်အဘီၣ်တဖၣ် သးအုးဒိၣ်မးလီၤ.
၂၄ ဖဲအဝဲသ့ၣ် လဲၤတုၤလၢ ဝ့ၢ်ကပ့းရနီၣ်အခါ ပှၤလၢအထၢဝဲ စ့ခံဒြးမူးတဘ့ၣ်* လၢတၢ်ခိတၢ်သွဲအဂီၢ်န့ၣ် ဟဲဝဲလၢ စီၤပ့းတရူးအအိၣ် ဒီးတဲအီၤလၢ “နသရၣ်န့ၣ် မ့ၢ်အဟ့ၣ်စ့ခံဒြးမူးလၢ တၢ်ခိတၢ်သွဲအဂီၢ် စ့ၢ်ကီးဧါ.”+ ၂၅ ဒီးစီၤပ့းတရူးတဲဆၢဝဲလၢ “ဟ့ၣ်ဝဲသၢၤ.” ဘၣ်ဆၣ် ဖဲအဝဲလဲၤနုာ်လီၤလၢ ဟံၣ်ပူၤအခါ ယ့ၣ်ၡူးတဲဆိတၢ်ဒီးအီၤ ဒီးတဲဝဲလၢ “စီၤၡံမိၣ်ဧၢ, မ့ၢ်နဆိကမိၣ်ဒ်လဲၣ်. ဟီၣ်ခိၣ်အစီၤပၤတဖၣ်န့ၣ် ဒိးန့ၢ်ဘၣ် တၢ်ခိတၢ်သွဲ အကလုာ်ကလုာ်လၢ မတၤတဖၣ်အအိၣ်လဲၣ်. လၢအဖိတဖၣ် အအိၣ်ဧါ မ့တမ့ၢ် လၢပှၤဂၤတဖၣ် အအိၣ်ဧါ.” ၂၆ ဖဲစီၤပ့းတရူးတဲလၢ “ပှၤဂၤသ့ၣ်တဖၣ်အအိၣ်” အခါ ယ့ၣ်ၡူးတဲအီၤလၢ “မ့မ့ၢ်ဒ်န့ၣ်န့ၣ် အဖိခွါတဖၣ်န့ၣ် တလိၣ်ဟ့ၣ် တၢ်ခိတၢ်သွဲဘၣ်. ၂၇ ဘၣ်ဆၣ် ဒ်သိးပသုတကဲထီၣ် တၢ်လီၤဃံၢ်အလီၢ်လၢ အဝဲသ့ၣ်အဂီၢ်တဂ့ၤန့ၣ်+ လဲၤစဲၤလီၤတခွဲ လၢပီၣ်လဲၣ်ပူၤ ဒီးညၣ်လၢနန့ၢ်အီၤ အဆိကတၢၢ်တဘ့ၣ်န့ၣ် ဟံးန့ၢ်အီၤဒီး အိးထီၣ်အကိာ်ပူၤ ဒီးနကထံၣ်စ့ညၣ်တဘ့ၣ်လီၤ.* ဟံးန့ၢ်ဒီးဟ့ၣ်လီၤ အဝဲသ့ၣ်လၢ ပဝဲခံဂၤလၢာ်အဂီၢ်တက့ၢ်.”