၁ သ့းစၤလနံ
၂ ဒီပုၢ်ဝဲၢ်သ့ၣ်ဧၢ, သုသ့ၣ်ညါလီၤတံၢ်လီၤဆဲးလၢ ပတၢ်လဲၤအိၣ်သကိးသုန့ၣ် ကဲဘျုးဝဲလီၤ.+ ၂ ဒ်သုသ့ၣ်ညါအသိး လၢဝ့ၢ်ဖံလံးပံၤအပူၤန့ၣ်+ ပတူၢ်ဘၣ်တၢ်နးတၢ်ဖှီၣ် ဒီးပှၤမၤမဲာ်ဆှးပှၤနးမးလီၤ. ဒီးဖဲပလဲၤလၢသုအိၣ်အခါ ပှၤထီဒါပှၤအါမး သနာ်က့ ကစၢ်ယွၤ ဟ့ၣ်ပှၤတၢ်သူၣ်ဒူသးဒူ ဒ်သိးပကတဲဘၣ်သုလၢ ကစၢ်ယွၤ အတၢ်သးခုကစီၣ်အဂီၢ်လီၤ.+ ၃ ပဟ့ၣ်သဆၣ်ထီၣ်သုန့ၣ် တမ့ၢ်တၢ်လၢအကမၣ်ဘၣ်. ဒီးပတဟ့ၣ်သဆၣ်ထီၣ်သု ခီဖျိလၢ ပအိၣ်ဒီး တၢ်ပာ်သူၣ်ပာ်သးလၢ အတကဆှီဘၣ် မ့တမ့ၢ် ဒ်သိးကလံၣ်န့ၢ်လီန့ၢ်သုအဂီၢ်ဘၣ်. ၄ ဘၣ်ဆၣ် ပတဲတၢ်ဒီးသု ဒ်ပမ့ၢ် ပှၤလၢ ကစၢ်ယွၤ ဃုထၢထီၣ်ဝဲလၢ ကတဲတၢ်သးခုကစီၣ် အဂီၢ်လီၤ. ပတတဲတၢ်ဒီးသု ဒ်သိး ပကမၤတၢ်ဘၣ် ပှၤဟီၣ်ခိၣ်ဖိအသးဘၣ်. ဘၣ်ဆၣ် ဒ်သိးပကမၤ ကစၢ်ယွၤလၢ အသမံသမိး ပသူၣ်ပသးတဂၤန့ၣ် အတၢ်ဘၣ်သးအဂီၢ် ပတဲတၢ်ဒီးသုလီၤ.+
၅ နီၢ်ကီၢ်န့ၣ် သုသ့ၣ်ညါလၢ ပတဟးစံးပတြၢၤသု ဒ်သိးကကွဲန့ၢ်လွဲန့ၢ်သု အဂီၢ်ဘၣ်. ဒီးပတပာ်မၤပသး ဒ်သိးပကန့ၢ်ဘၣ် တၢ်တမံၤမံၤလၢ တၢ်သးကွံအပူၤအဂီၢ်ဘၣ်.+ ကစၢ်ယွၤ သ့ၣ်ညါဝဲ တၢ်ဂ့ၢ်အံၤဂ့ၤဂ့ၤလီၤ. ၆ ဒ်ပမ့ၢ် ခရံာ်အတၢ်မၢဖိတဖၣ်အသိး ပပာ်ထီၣ် တၢ်ဝံတၢ်ယိးဃၢလၢ သုလိၤလၢ ကျိၣ်စ့တကပၤန့ၣ် သ့ဝဲလီၤ.+ ဘၣ်ဆၣ် ပတလီကီ တၢ်လၤကပီၤလၢ သုအိၣ် မ့တမ့ၢ် လၢပှၤအဂၤတဖၣ် အအိၣ်ဘၣ်. ၇ လၢတၢ်န့ၣ်အလီၢ် ဖဲပအိၣ်လၢ သုကျါအခါ ပကဲထီၣ်ပှၤလၢ အသူၣ်ကပုာ်လုး သးကဖီလီ လၢသုဖီခိၣ် ဒ်မိၢ်တဂၤလၢ အအံးထွဲကွၢ်ထွဲ အဖိအီနုၢ်တဖၣ်လၢ တၢ်အဲၣ်တၢ်ကွံအပူၤ အသိးလီၤ. ၈ အဃိ မ့ၢ်လၢ ပသူၣ်အိၣ်သးအိၣ်သု ဒီးပအဲၣ်သုဒိၣ်မးအဃိ+ ပပာ်လီၤပသး ဂၢၢ်ဂၢၢ်ကျၢၤကျၢၤ လၢပကဟ့ၣ်လီၤသုလၢ ယွၤအတၢ်သးခုကစီၣ် တကးဒံးဘၣ် ပကဟ့ၣ်လီၤ ပသးသမူလၢ သုဂီၢ်စ့ၢ်ကီးလီၤ.+
၉ ဒီပုၢ်ဝဲၢ်သ့ၣ်ဧၢ, ပမၤတၢ်ဆူၣ်ဆူၣ် ဒီးပထဲးဂံၢ်ထဲးဘါန့ၣ် သုကနီၣ်ဘၣ်လီၤ. ဖဲပစံၣ်တဲၤတဲလီၤ ယွၤအတၢ်သးခုကစီၣ် လၢသုအိၣ်အခါ ဒ်သိးပသုတပာ်ထီၣ် တၢ်ဝံတၢ်ယိးဃၢလၢ သုလိၤလၢ ကျိၣ်စ့တကပၤ နီတဂၤတဂ့ၤအဂီၢ် ပမၤတၢ်လၢ မုၢ်ဆါဒီးလၢမုၢ်နၤလီၤ.+ ၁၀ ဖဲပအိၣ်ဒီးသု လၢအမ့ၢ် ပှၤစူၢ်က့ၤနာ်က့ၤတၢ်တဖၣ်အခါ ပသးတီ, ပမၤတၢ်တီတီလိၤလိၤ ဒီးတၢ်ပာ်တၢ်ကမၣ် လၢပလိၤအလီၢ် တအိၣ်ဘၣ်န့ၣ် သုဒီးကစၢ်ယွၤ သ့ၣ်ညါဝဲ ဂ့ၤဂ့ၤလီၤ. ၁၁ သုသ့ၣ်ညါဂ့ၤဂ့ၤလၢ ပဟ့ၣ်သဆၣ်ထီၣ်သု, ပမၤမုာ်ထီၣ်သုသး ဒီးပဟ့ၣ်ကူၣ်ဟ့ၣ်ဖးသု တဂၤစုာ်စုာ်+ ဒ်ပၢ်တဂၤမၤစၢၤ+ အဖိတဖၣ်အသိးလီၤ. ၁၂ ပမၤဒ်န့ၣ်န့ၣ် မ့ၢ်ဒ်သိး သုကဆဲးအိၣ်မူ ဒ်အကြၢးဒီး ကစၢ်ယွၤလၢ+ အကိးသုဆူအဘီမုၢ်+ ဒီးအလၤကပီၤလီၤ.+
၁၃ လၢတၢ်ဂ့ၢ်အံၤအဃိ ပစံးဘျုး ကစၢ်ယွၤထီဘိလီၤ.+ ဖဲသုဒိးန့ၢ်ဘၣ် ကစၢ်ယွၤ အကလုၢ်ကထါလၢ သုနၢ်ဟူဘၣ်အီၤလၢ ပအိၣ်အခါ သုတူၢ်လိာ်အီၤ ဒ်တၢ်လၢအမ့ၢ် တၢ်အနီၢ်ကီၢ်အသိး လၢအမ့ၢ် ယွၤအကလုၢ်ကထါ ဒီးတမ့ၢ်ဒ် ပှၤဟီၣ်ခိၣ်ဖိ အတၢ်ကတိၤဘၣ်. ကစၢ်ယွၤ အကလုၢ်ကထါအံၤ မၤတၢ်လၢသုဝဲလၢ အမ့ၢ်ပှၤစူၢ်က့ၤနာ်က့ၤတၢ်တဖၣ် အပူၤစ့ၢ်ကီးလီၤ. ၁၄ ဒီပုၢ်ဝဲၢ်သ့ၣ်ဧၢ, သုကဲထီၣ်ပှၤလၢ အကွၢ်လိ ခရံာ်ဖိအတၢ်အိၣ်ဖှိၣ်တဖၣ်လၢ အအိၣ်လၢ ယူဒၤအဟီၣ်ကဝီၤ လၢအမ့ၢ် ကစၢ်ယွၤ အတၢ်အိၣ်ဖှိၣ်တဖၣ်လီၤ. ဒ်ဒီပုၢ်ဝဲၢ်တဖၣ်လၢ အအိၣ်လၢ ယူဒၤအဟီၣ်ကဝီၤ တူၢ်ဘၣ်တၢ်မၤနးမၤဖှီၣ်လၢ ပှၤယူဒၤဖိအစုပူၤအသိး သုဝဲစ့ၢ်ကီး သုတူၢ်ဘၣ် တၢ်မၤနးမၤဖှီၣ်လၢ သုပှၤကလုာ်အစုပူၤ+ ဒ်န့ၣ်အသိးလီၤ. ၁၅ ဒီးပှၤယူဒၤဖိတဖၣ်န့ၣ် မ့ၢ်ပှၤလၢ အမၤသံကစၢ်ယ့ၣ်ၡူး+ ဒီးဝံတဖၣ် ဒီးမၤအၢမၤနးပှၤလီၤ.+ တကးဒံးဘၣ် အဝဲသ့ၣ်တမၤ တၢ်ဘၣ်ကစၢ်ယွၤအသးဘၣ် ဒီးအဝဲသ့ၣ်ထီဒါ တၢ်လၢအကဲဘျုးလၢ ပှၤခဲလၢာ်အဂီၢ်လီၤ. ၁၆ အဝဲသ့ၣ် မၤဝဲဒ်န့ၣ် ခီဖျိ အဝဲသ့ၣ်ကျဲးစၢးတြီပှၤ ဒ်သိးပသု တစံၣ်တဲၤတဲလီၤ ပှၤကလုာ်တဖၣ်လၢ တၢ်ကစီၣ်လၢ ကဆှၢအဝဲသ့ၣ်လၢ တၢ်အုၣ်က့ၤခီၣ်က့ၤတဂ့ၤအဂီၢ်လီၤ.+ လၢတၢ်န့ၣ်အဃိ အဝဲသ့ၣ်မၤအါထီၣ် အတၢ်ဒဲးဘးထီဘိလီၤ. ဘၣ်ဆၣ် ကစၢ်ယွၤအတၢ်သးဒိၣ်န့ၣ် ကလီၤဘၣ်လၢ အဝဲသ့ၣ်အလိၤ သပှၢ်တၢၢ်လီၤ.+
၁၇ ဒီပုၢ်ဝဲၢ်သ့ၣ်ဧၢ, လၢအပူၤကွံာ်န့ၣ် ပဘၣ်လီၤဖးဒီးသုတစိၢ်တလီၢ် လၢနီၢ်ခိတခီ သနာ်က့ လၢပသူၣ်ပသးန့ၣ် ပတလီၤဖးဒီးသုဘၣ်. ဘၣ်ဆၣ် မ့ၢ်လၢ ပအဲၣ်ဒိးထံၣ်သုဒိၣ်မးအဃိ ပဂုာ်ကျဲးစၢး သပှၢ်တၢၢ်ဒ်သိး ပကထံၣ်ဘၣ်သုလီၤ. ၁၈ လၢတၢ်ဂ့ၢ်အံၤအဃိ ပအဲၣ်ဒိးလဲၤကဒီး လၢသုအိၣ်လီၤ. မ့ၢ်လီၤ, ယၤစီၤပီလူး ယဂုာ်ကျဲးစၢး လဲၤကဒီးတဘျီ တကးဒံးဘၣ် ခံဘျီညါ ဘၣ်ဆၣ် မုၣ်ကီၤလံၢ်* တြီပကျဲလီၤ. ၁၉ ဖဲပကစၢ်ယ့ၣ်ၡူး ဟဲက့ၤအိၣ်ဒီးပှၤအဆၢကတီၢ် ပတၢ်မုၢ်လၢ်, ပတၢ်သးခု ဒီးပတၢ်သူၣ်ဖှံသးညီ အခိၣ်သလုး လၢအမဲာ်ညါန့ၣ် ကကဲမတဂၤလဲၣ်. နီၢ်ကီၢ်န့ၣ် အကဲသု တမ့ၢ်ဧီၤ.+ ၂၀ သုဝဲဒၣ်အံၤ သုမ့ၢ်ပလၤကပီၤ ဒီးပတၢ်သးခု သပှၢ်တၢၢ်လီၤ.